സോഷ്യൽ മീഡിയ ഇൻഫ്ലുവൻസർമാരായ മൂന്ന് സഹോദരിമാർ ഒരുമിച്ച് ഒരേ യുവാവിനെ വിവാഹം കഴിച്ച സംഭവം രാജ്യവ്യാപകമായി ചർച്ചയാകുന്നു. ഉത്തർപ്രദേശിലെ അംറോഹ ജില്ലയിലാണ് സിനിമാക്കഥകളെ പോലും വെല്ലുന്ന ഈ അപൂർവ്വ വിവാഹം നടന്നത്. ഹാസൻപൂരിലെ പ്രശസ്‌തമായ ചാമുണ്ഡ ക്ഷേത്രത്തിൽ വച്ച് ജൂലൈ 15-നായിരുന്നു വിവാഹച്ചടങ്ങുകൾ. രണ്ടാം വർഷ ബി.ടെക് വിദ്യാർത്ഥിനിയായ സരോജ് (20), സഹോദരി സാവിത്രി (19), ഇവരുടെ ബന്ധുവായ ഖടക്വംശി (18) എന്നിവരാണ് 20-കാരനായ വികാസ് എന്ന വിക്കിയെ ജീവിതപങ്കാളിയാക്കിയത്. ശ്യാംപുരി സ്വദേശിയായ വികാസ് ഈ സഹോദരിമാരുടെ ജനപ്രിയ സോഷ്യൽ മീഡിയ റീലുകളുടെ സ്ഥിരം ക്യാമറാമാൻ കൂടിയാണ്. കൂടാതെ, ഇവരുടെ റീൽ വീഡിയോകളിൽ ഭർത്താവിന്റെ വേഷത്തിൽ പതിവായി പ്രത്യക്ഷപ്പെട്ടിരുന്നതും വികാസ് തന്നെയായിരുന്നു. #വാർത്തകൾ