லடாக்கில் 9 கோடி லிட்டர் தண்ணீர் மறுசீரமைப்பு - விவசாயத்துக்கு புதிய நம்பிக்கை! பனிப்பாலைவனம் என்று அழைக்கப்படும் லடாக்கில் விவசாயத்தை காப்பாற்ற ஒரு அருமையான முயற்சி நடந்துள்ளது. லே பகுதியில் உள்ள ஸ்டோக் கிராம ஓடையில் (Stok Nallah) உருகி வரும் பனிப்பாறை நீர் இதுவரை யாருக்கும் பயன்படாமல் நேரடியாக சிந்து நதியில் கலந்து வந்தது. இப்போது அந்த தண்ணீரை லடாக் நிர்வாகம் திருப்பி விட்டுள்ளது. தினமும் சுமார் 9 கோடி லிட்டர் தண்ணீர் அங்கிருந்து 43 கி.மீ நீளமுள்ள இகு-பே பாசன கால்வாய்க்கு (Igoo-Phey Canal) கொண்டு செல்லப்படுகிறது. இந்த கால்வாய் 1979-ல் தொடங்கி 2005-ல் கட்டி முடிக்கப்பட்டது, ஆனால் இத்தனை ஆண்டுகளாக போதுமான தண்ணீர் இல்லாமல் இருந்தது. இந்த திட்டத்தின் சிறப்பு என்னவென்றால், பெரிய செலவு எதுவும் இல்லாமல், வெறும் மண் அணை மற்றும் இரண்டு குழிகள் மூலம் இந்த தண்ணீரை திருப்பி விட்டுள்ளனர். ஸ்டோக் ஓடையில் மொத்தம் 36.6 கன அடி தண்ணீர் வருகிறது. இதில் 26 கன அடி தண்ணீர் தற்போது திருப்பி விடப்பட்டுள்ளது - இகு பகுதிக்கு 19 கன அடி, பே பகுதிக்கு 7 கன அடி. மீதமுள்ள தண்ணீரையும் பயன்படுத்த திட்டமிட்டுள்ளனர். இதனால் கால்வாயில் தண்ணீர் வரத்து 50 கன அடியில் இருந்து 80 கன அடியாக உயரும். 1000 ஏக்கருக்கும் மேலான வறண்ட நிலங்கள் இனி பசுமையாகும். சுற்றியுள்ள 12 கிராமங்களுக்கு இனி முறை வைத்து தண்ணீர் தராமல், தினமும் தண்ணீர் கிடைக்கும். விளைச்சல், வருமானம், வேலைவாய்ப்பு அனைத்தும் அதிகரிக்கும் என்று எதிர்பார்க்கப்படுகிறது. இதே போல மாத்தோ, துச்சிக் சென்மோ, துச்சிக் சோன், ஸ்டாக்னா போன்ற மற்ற ஓடைகளிலும் இந்த முயற்சியை விரிவுபடுத்த லடாக் நிர்வாகம் திட்டமிட்டுள்ளது. வீணாக போன பனிநீரை வைத்து ஒரு பாலைவனத்தையே விவசாய பூமியாக மாற்றும் அற்புதம் இது. #AgricultureNews #WaterConservation #LadakhDiaries #IndiaFarming #🤔 Unknown Facts