#sareeswag #baluchari आज खूप दिवसानंतर ही बालुचरी साडी नेसायचा योग आला. ही ‘रिव्हायव्हल मोटिफ बालुचरी’ आहे, म्हणजे जुन्या डिझाईन्सबरहुकूम नवीन विणलेली. बंगालची शान असलेल्या बालूचरी साडीचा इतिहास फार मनोरंजक आहे. ह्या साडीला नाव मिळालं ते एका गावाचं, पण ही साडी आज विणली जाते ती भलत्याच गावात. पश्चिम बंगालच्या मुर्शिदाबाद जिल्ह्यातील बालुचर या छोट्या गावात या साडीचा जन्म झाला. अठराव्या शतकाच्या सुरुवातीला बंगालचा पहिला नवाब मुर्शिद कुली खान याने आपली राजधानी ढाक्याहून मुर्शिदाबादला हलवली. त्याच्यासोबत ढाक्यातील कुशल विणकर देखील स्थलांतरित झाले. या विणकरांनी बालुचर गावात आपला संसार मांडला आणि तिथूनच या साडीला बालुचारी हे नाव मिळाले. हे बहुसंख्य विणकर हिंदू होते. या साडीच्या पदरावर काल्का म्हणजे कैरी मोटिफचं विणकाम सहसा केलं जाई तसेच रामायण महाभारतातले प्रसंग, इतर पुराणातले प्रसंग देखील विणले जात असत. नवाबी राज्यात असल्यामुळे या साड्यांच्या पदरावर नवाबी दरबाराचेही चित्रण केले जात असे. घोडागाडीत बसलेले नवाब, हुक्का ओढणारे नवाब, हॅट घातलेले युरोपियन अधिकारी असे डिझाईन्सही ह्या साड्यांच्या पदरावर विणले जात. जसे ह्या साडीच्या पदरावर विणले गेले आहेत. भागीरथी नदीच्या काठावर वसलेले बालुचर गाव नदीच्या वारंवार बदलणाऱ्या प्रवाहामुळे आणि पुढे कधीतरी आलेल्या मोठ्या पुरामुळे जलमय झाले. विणकरांना ते गाव सोडावे लागले आणि हा वारसा बांकुरा जिल्ह्यातील बिष्णुपूर येथे स्थलांतरित झाला. बिष्णुपूर हे हिंदू मल्ल राजवंशाच्या राजधानीचे शहर. या राजांच्या आश्रयाखाली बालुचरी विणकामाला नवे रूप मिळाले. बिष्णुपूरच्या प्रसिद्ध टेराकोटा मंदिरावरील शिल्पकाम विणकरांना प्रेरणा देऊ लागले. दुबराज दास नावाचा प्रसिद्ध विणकर तर साडीच्या पदरावर आपले नाव देखील विणायचा. त्याने विणलेल्या बालुचरी साड्या आजही जगातल्या प्रसिद्ध म्युझियम्स मध्ये ठेवलेल्या आहेत. १९०३ मध्ये त्याचा मृत्यू झाला. ब्रिटिशांनी भारतातला हातमाग व्यवसाय संपवायचे खूप प्रयत्न केले, त्या काळात आर्थिक अडचणींमुळे काही काळ बालुचरी साड्यांचे विणकाम बंदच झाले होते. विसाव्या शतकाच्या पूर्वार्धात सुभो ठाकूर या कलाकाराने ही परपरा पुन्हा जिवंत करण्याचा प्रयत्न केला. घरोघरी जाऊन त्याने जुन्या बालुचरी साड्यांची डिझाईन्स मिळवली आणि बिष्णुपुरच्या अक्षय कुमार दास ह्या विणकराने जाकार्ड यंत्रमागावर हे विणकाम शिकून घेतले आणि बिष्णुपूर पुन्हा एकदा बालुचारी विणकामाचे केंद्र बनले. आज बंगालमध्ये विणल्या जाणाऱ्या बालुचरी साड्या ह्या बिष्णुपूर मध्येच जकार्ड मागांवर विणल्या जातात. आज हे विणकाम भौगोलिक मानांकन म्हणजेच जीआय टॅगने संरक्षित आहे. मला ह्या साडीचा शॉट कलर, म्हणजे दुरंगी शेड आणि पदर फार आवडतो. बालुचरी साडी केवळ वस्त्र नाही तर बंगालची शान आहे. #😍Marathi Status King #🎭Whatsapp status #😊Feeling happy #👌प्रेरणादायी स्टेट्स #🌞उन्हाळ्यातील त्या आठवण🤗