స్వాతంత్ర్య దినోత్సవం — నా బాల్యం నుంచి సంపూర్ణ స్వాతంత్ర్య స్వప్నం వరకు రచన — లాయర్ కృష్ణ స్వామి అభ్యుదయ్ బలపంతో పలకపై అక్షరాలు దిద్దే వయసులో “స్వాతంత్ర్య దినోత్సవం” అంటే నాకు ఒక పెద్ద పండుగ! జనగణమన పూర్తవగానే “పంపరమెట్లు ఎప్పుడు ఇస్తారు? ఎప్పుడు తిందాం?” అని ఆతృతగా ఎదురు చూసేవాడిని. ఆ చిన్న ప్యాకెట్ చేతిలో పడగానే అది నాకు ఒక అవార్డు గెలిచినంత ఆనందం! ఇంటికి వెళ్లి నాన్న అంటే భయం తో ముందు అమ్మకు, తరువాత అమ్మమ్మకు చూపించి ఆనందంతో మురిసిపోయేవాడిని. అప్పుడు నాకు తెలియదు— ఆ రోజు కేవలం పంపరమెట్లు పంచే రోజు కాదని, ఎందరో మహానుభావుల త్యాగాల ఫలితంగా మన దేశం స్వేచ్ఛా గాలి పీల్చిన మహత్తర దినమని! కాలం గడిచింది... పలకపై బలపంతో అక్షరాలు దిద్దిన నా చేతులు పెన్నుతో నోట్‌బుక్‌లో చరిత్రను చదవడం మొదలుపెట్టాయి. అప్పుడు తెలిసింది— తెల్లదొరలను తరిమికొట్టి, మన దేశాన్ని మనమే పాలించుకునే స్వేచ్ఛను సాధించిన రోజు ఆగస్టు 15 అని! అప్పటి నుంచి స్వాతంత్ర్య దినోత్సవం నాకు ఒక సాధారణ పండుగ కాదు— భారతదేశ ఆత్మగౌరవ దినోత్సవం! స్వాతంత్ర్య దినోత్సవానికి రెండు మూడు రోజుల ముందే టీచర్లు చెప్పేవారు— “మంచి తెల్లని బట్టలు వేసుకుని రావాలి... బట్టలు చక్కగా ఐరన్ చేసి రావాలి...” అప్పుడు అమ్మను, అమ్మమ్మను ఇబ్బంది పెట్టి తెల్లని బట్టలు సిద్ధం చేయించుకునేవాడిని. అమ్మకు బట్టలు తెల్లగా చేయడం కుదరని రోజు... ఐరన్ సమయానికి దొరకని రోజు... స్కూల్లో చెక్క స్కేల్ దెబ్బలు తప్పేవి కావు! కానీ ఆ బాధను కూడా చేతిలో పెట్టిన ఒక చాక్లెట్ కొద్దిసేపట్లోనే మరిపించేది. అలా నా బాల్యంలో స్వాతంత్ర్యం అంటే పంపరమెట్లు... చాక్లెట్... తెల్లని బట్టలు... జనగణమన... అనే చిన్న ప్రపంచం ఉండేది. కానీ కాలేజీకి వచ్చేసరికి స్వాతంత్ర్యానికి మరో అర్థం తెలిసింది. విద్యార్థి ఉద్యమాల్లో, SFIలో విద్యార్థి నాయకుడిగా ఎదుగుతున్న రోజుల్లో కామ్రేడ్స్ చెప్పిన మాటలు నా ఆలోచనలను మార్చాయి. “దేశానికి రాజకీయ స్వాతంత్ర్యం వచ్చింది... కానీ ప్రతి మనిషికి సామాజిక, ఆర్థిక, న్యాయ స్వాతంత్ర్యం వచ్చిందా?” అనే ప్రశ్న నా మనసును వెంటాడింది. అప్పటి నుంచి స్వాతంత్ర్య దినోత్సవాన్ని కేవలం సంబరంగా జరుపుకోవడం నాకు అంత సులభం కాలేదు. సమాజంపై ఒక విపరీతమైన ప్రేమ పుట్టింది. అణగారినవారి బాధ నా బాధగా అనిపించింది. వివక్షకు గురవుతున్నవారి కన్నీళ్లు నా మనసులో ప్రశ్నలుగా మారాయి. “నిజమైన స్వాతంత్ర్యం అందరికీ ఎప్పుడు?” అనే ప్రశ్నకు నా మనసు ఇచ్చిన సమాధానం— “న్యాయ పోరాటమే మార్గం!” అప్పటి నుంచి న్యాయం కోసం పోరాడుతున్నాను. అయితే బాధ కలిగించే నిజం ఏమిటంటే— కొంతమంది చేస్తున్న న్యాయ పోరాటం ఇప్పటికీ అరణ్య రోదనగానే మిగిలిపోతోంది. దేశం స్వాతంత్ర్యం సాధించి దశాబ్దాలు గడిచినా ప్రతి పేదవాడి ఇంటికి న్యాయం చేరలేదు. ప్రతి కూలీకి గౌరవం దక్కలేదు. ప్రతి అణగారిన మనిషికి సమానత్వం అందలేదు. వివక్ష సంకెళ్లు పూర్తిగా తెగిపోలేదు. వెట్టి చాకిరీ రూపాలు పూర్తిగా అంతరించిపోలేదు. అందుకే నా హృదయంలో ఒక బాధ ఉంది. కానీ ఆ బాధ నన్ను నిరాశపరచదు. ఎందుకంటే ఈ దేశం కోసం ప్రాణాలను అర్పించిన అమరుల ఆశయాలు ఇంకా మన ముందే ఉన్నాయి. భారతమాత ముద్దుబిడ్డలైన ఆ స్వాతంత్ర్య సమరయోధుల కలలు ఇంకా మన బాధ్యతగానే ఉన్నాయి. అందుకే మిత్రులారా... స్వాతంత్ర్య దినోత్సవాన్ని జరుపుకుందాం! అది కేవలం జెండా ఎగురవేసే రోజు కాదు— మన దేశ ఆత్మగౌరవాన్ని గుండెల నిండా జరుపుకునే రోజు! పేదల కోసం... కూలీల కోసం... వివక్షకు గురవుతున్న వారి కోసం... అణగారిన వర్గాల కోసం... న్యాయం కోసం ఎదురు చూస్తున్న ప్రతి మనిషి కోసం... మన చేతులు కలుపుదాం. మన అడుగులు కలుపుదాం. మన గొంతులు కలుపుదాం. నిజమైన సంపూర్ణ స్వాతంత్ర్యం కోసం మన పోరాటాన్ని మరింత బలపరుద్దాం! రేపటి భారతదేశంలో స్వాతంత్ర్య దినోత్సవం కేవలం ఒక జాతీయ పండుగగా కాకుండా— ప్రతి పేదవాడి ముఖంలో చిరునవ్వుగా, ప్రతి కూలీ చేతిలో గౌరవంగా, ప్రతి పౌరుడి జీవితంలో సమానత్వంగా, ప్రతి మనిషి హృదయంలో స్వేచ్ఛగా పది రెట్లు గొప్పగా జరుపుకునే రోజుగా మారాలి! నిరాశను పంచే నల్ల జెండాల రాజకీయాల మాయలో కాకుండా, ఆశను నింపే భారతదేశ నిర్మాణంలో మనం భాగస్వాములం కావాలి. విమర్శించాల్సిన చోట విమర్శిద్దాం. ప్రశ్నించాల్సిన చోట ప్రశ్నిద్దాం. అన్యాయాన్ని ఎదుర్కోవాల్సిన చోట ఎదుర్కొందాం. కానీ భారతదేశ ఆత్మగౌరవాన్ని మాత్రం మన గుండెల్లో ఎప్పటికీ నిలుపుకుందాం. బలపంతో పలకపై అక్షరాలు దిద్దిన ఆ చిన్నారి నుంచి న్యాయం కోసం పోరాడుతున్న నేటి న్యాయవాది వరకు నా ప్రయాణం నాకు ఒకే విషయం నేర్పింది— స్వాతంత్ర్యం మనకు లభించిన బహుమతి మాత్రమే కాదు... దాన్ని ప్రతి మనిషికి అందించాల్సిన బాధ్యత కూడా! అందుకే ఈ ఆగస్టు 15న మనమందరం ఒకే మాట చెప్పుకుందాం— **“భారతదేశం మనది... స్వాతంత్ర్యం మనది... సమానత్వం అందరిదీ... న్యాయం ప్రతి ఒక్కరిదీ!”** **జై భారత్ ! జై జై భారత్ 🇮🇳 From Facebook Wall #🎉స్వాతంత్ర్య దినోత్సవ శుభాకాంక్షలు🇮🇳 #🇮🇳స్వాతంత్ర్య దినోత్సవం స్టేటస్🇮🇳 #❤I love my India❤ #💗నా మనస్సు లోని మాట #jai hind