एसटी कर्मचाऱ्यांचे जुलैचे वेतन ११ ऑगस्ट रोजी खात्यात जमा होणार 86 हजार कर्मचाऱ्यांना दिलासा; प्रशासकीय दिरंगाई आणि सुट्ट्यांमुळे वेतनाला विलंब मुंबई, दि. १० : प्रतिनिधी महाराष्ट्र राज्य मार्ग परिवहन महामंडळाच्या (एसटी) कर्मचाऱ्यांच्या जुलै महिन्याच्या वेतनाला झालेला विलंब आता दूर झाला आहे. एसटी महामंडळाच्या तब्बल ८६ हजार कर्मचाऱ्यांचे जुलै महिन्याचे वेतन उद्या, ११ ऑगस्ट रोजी त्यांच्या बँक खात्यात जमा होणार आहे, अशी माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली. दर महिन्याला एसटी कर्मचाऱ्यांचे वेतन साधारणपणे ७ तारखेला अदा केले जाते. मात्र, यंदा प्रशासकीय प्रक्रियेला झालेला विलंब आणि सलग आलेल्या सुट्ट्यांमुळे वेतन लांबले. त्यामुळे कर्मचाऱ्यांमध्ये काहीशी चिंता निर्माण झाली होती. एसटी महामंडळाकडून शासनाच्या विविध सवलतींच्या प्रतिपूर्ती रकमेची माहिती दर महिन्याला वित्त विभागाला नियमितपणे सादर केली जाते. जुलै महिन्याची प्रतिपूर्तीची माहितीही महामंडळाने वेळेत सादर केली होती. मात्र, शासनाकडून प्रतिपूर्तीची रक्कम वेळेत प्राप्त न झाल्याने वेतन वितरणाच्या प्रक्रियेवर परिणाम झाला. साधारणपणे महिन्याच्या ७ ते १० तारखेपर्यंत एसटी कर्मचाऱ्यांचे वेतन अदा केले जाते. परंतु, यावेळी सलग आलेल्या सुट्ट्या तसेच प्रशासकीय प्रक्रियेला झालेल्या विलंबामुळे वेतन १० तारखेनंतर देण्याची वेळ आली. दरम्यान, ११ ऑगस्ट रोजी वेतन खात्यात जमा होणार असल्याने एसटीच्या ८६ हजार कर्मचाऱ्यांना मोठा दिलासा मिळाला आहे. #1️⃣महाराष्ट्र अपडेट्स