*ఆద్యంత రహితం* లింగమధ్యే జగత్సర్వం త్రైలోక్యం సచరాచరమ్ | లింగరూపీ మహదేవః తస్మాల్లింగం ప్రపూజయేత్ || శివలింగం కేవలం ఒక ఆకారం కాదు, అది అనంతమైన విశ్వానికి, నిరాకారమైన పరబ్రహ్మ తత్వానికి ఒక ప్రతీక. శివ శివేతి శివేతి వా! భవ భవేతి భవేతి వా! హర హరేతి హరేతి వా! భజ మనః శివ మేవ నిరంతరమ్‌ !! అని శ్రుతి ప్రమాణం. 'శివ' అనే రెండక్షరాల చేత చెప్పబడే పరతత్త్వం సమస్త జగత్తుకు ఆధారం. నిత్య సుఖప్రదం. త్రిగుణాతీతం. విశ్వ సంరక్షకం. సర్వకారణ కారకం. అంతేకాదు! సర్వం శివమయం జగత్‌. కనుక సచ్చిదానంద స్వరూపం - పరమైశ్వర్య స్వరూపం. నిర్మలం, నిర్వికల్పం, నిరంజనం అయిన పరమార్ధ తత్త్వం. ఒక విలక్షణ విశిష్ట అనంత అగణిత అఖిలస్ధల వ్యాప్తమైన సత్య సుందర వాస్తవ వస్తువే శివశబ్ద వాచ్యం. ఆది మధ్యాంతాలు లేనిది - నామరూపాలకు అతీతమైనది. స్థూల - సూక్ష్మ ప్రపంచాని కంతటికీ అధిష్ఠానమై, దానిని భాసింపజేసే నడిపించే నిరామయ శక్తి సమన్విత విశ్వైక మూలం శివజ్యోతి. అణువులలో అణువై మహత్తులలో మహత్తై విభిన్నములలో అభిన్నమై అనేకములలో ఏకమై విశ్వమయమై, విశ్వాతీతమై దృశ్యమై, అదృశ్యమై అద్వైతమైనట్టి సాక్షీభూత చైతన్యమే 'శివ'శబ్దార్ధం. ఈ యావద్వివరణ యొక్క అవాజ్మానస గోచర తత్త్వానికి ప్రతీక శివలింగం. పరమేశ్వరుని నిరాకార రూపానికి భక్తుల - సాధకుల సాధన కోసం ఓ సహకారిగా నిరూపింపబడిన సూచిక ఈ 'నిరాకారాకారం' సంస్కృతంలో 'లింగం' అనగా చిహ్నం, గుర్తు లేదా ప్రతీక. అది దేనినైతే సూచిస్తుందో, దానిని 'లింగం' అంటారు. శివలింగం, పరమశివుని యొక్క నిర్గుణ, నిరాకార తత్వాన్ని సూచించే చిహ్నం. స్కంద పురాణంలో దీనికి చక్కటి వివరణ ఉంది.. శ్లోకం: ఆకాశం లింగమిత్యాహుః పృథివీ తస్య పీఠికా | ఆలయః సర్వదేవానాం లయనాత్ లింగముచ్యతే || భావం.. ఆకాశమే లింగం, భూమి దాని పీఠం (ఆధారం). సర్వ దేవతలు ఇందులోనే లయమవుతారు (విలీనమవుతారు) కాబట్టి దీనిని "లింగం" అని పిలుస్తారు. మరొక ముఖ్యమైన శ్లోకం ఇలా వివరిస్తుంది శ్లోకం: లయం గచ్ఛతి యత్ర భూతాని, నిర్గచ్ఛతి పునః పునః | తస్మాత్ లింగమితి ప్రోక్తం పరం బ్రహ్మ సనాతనమ్ || భావం.. సమస్త సృష్టి (భూతాలు) ప్రళయకాలంలో దేనిలో లయమవుతుందో, సృష్టి సమయంలో దేని నుండి తిరిగి వ్యక్తమవుతుందో, ఆ సనాతనమైన పరబ్రహ్మ తత్వమే 'లింగం'. ఈ శ్లోకాల ప్రకారం, లింగం అంటే సృష్టికి మూలమైన, మరియు ప్రళయకాలంలో సర్వం విలీనమయ్యే అనంతమైన శక్తికి ప్రతీక. సర్వాధారుడైన జగత్ప్రభువునకు ఏ ఆకారం లేదనీ - ఎటువంటి అవయవాలూ ఉండవనీ - సర్వాంతర్యామి అనీ - సర్వ వేదమయుడనీ - చరాచర ప్రపంచ స్వరూపుడనీ చెప్పడానికి గుర్తుగా ఉన్న తత్త్వం శివలింగమన్న మాట! మనకు ప్రధానంగా కనబడేవి - పరంపరగా ఊహించబడేవి పంచభూతాలే! వీటిలో భూమిని పీఠంగాను - అకాశాన్ని లింగంగాను పంచభాతాలను అంతర్లీనంగా కలిగింది కనుక 'లింగం' అని నిర్వచించారు. అంతేకాదు ! లయించిన జగత్తును మళ్ళీ సృష్టించేది అని కూడా అనే అంతరార్ధం ఉన్నది. అంటే...ఆ పరమేశ్వరుడే, జగత్కారణుడనీ - సృష్టి స్థితి లయాలు చేసేవాడనీ అర్థం. శివలింగ స్వరూపం - వేదాలు మరియు పురాణాల ప్రకారం 1. జ్యోతిర్లింగం - అంతులేని అగ్నిస్తంభం శివ పురాణంలోని విద్వేశ్వర సంహితలో శివలింగం యొక్క ఆవిర్భావం గురించి ఒక ముఖ్యమైన కథ ఉంది. ఒకసారి బ్రహ్మకు, విష్ణువుకు 'మాలో ఎవరు గొప్ప...' అనే అహంకారం కలిగింది. ఆ సమయంలో వారి మధ్య ఒక అంతులేని, ప్రజ్వలించే అగ్నిస్తంభం (జ్యోతిర్లింగం) ఆవిర్భవించింది. ఆ స్తంభం యొక్క ఆది (మొదలు), అంతం (చివర) కనుగొన్నవారే గొప్ప అని వారు నిర్ణయించుకున్నారు. విష్ణువు వరాహ రూపం ధరించి స్తంభం యొక్క మూలాన్ని కనుగొనడానికి పాతాళంలోకి వెళ్ళాడు. బ్రహ్మ హంస రూపం ధరించి స్తంభం యొక్క అగ్రభాగాన్ని చూడటానికి ఆకాశంలోకి వెళ్ళాడు. ఎంత ప్రయత్నించినా ఇద్దరూ దాని ఆది, అంతాలను కనుగొనలేకపోయారు. అది అనంతమైనదని గ్రహించి, ఆ జ్యోతిస్తంభమే పరబ్రహ్మ స్వరూపమైన శివుడని తెలుసుకొని ప్రార్థించారు. ఆ అగ్నిస్తంభమే భక్తుల పూజల కోసం సంక్షిప్త రూపం దాల్చి 'శివలింగం'గా స్థిరపడింది. శివలింగం ఆది, అంతం లేని పరమాత్మకు ప్రతీక. అది విశ్వమంతా వ్యాపించి ఉన్న చైతన్య శక్తి. దాని ఆకారం గోళాకారంగా, అంచులు లేకుండా ఉండటం ఈ అనంత తత్వాన్ని సూచిస్తుంది. 2. నిరాకారం నుండి సాకారానికి ప్రతీక (Formless to Form) వేదాల ప్రకారం, పరమాత్మ నిరాకారుడు, నిర్గుణుడు, అనగా రూపం, గుణాలు లేనివాడు. సాధారణ మానవులు అలాంటి నిరాకార తత్వాన్ని ధ్యానం చేయడం, ఆరాధించడం కష్టం. అందుకే, ఆ నిరాకార పరబ్రహ్మాన్ని ఒక గుర్తుగా, ఒక ప్రతీకగా ఆరాధించడానికి ఏర్పడిందే శివలింగం. లింగం (పైభాగం): పరమశివుడిని (పురుష తత్వం, చైతన్యం) సూచిస్తుంది. పానువట్టం / పీఠం (కింది భాగం): ఆదిపరాశక్తిని (ప్రకృతి తత్వం, శక్తి) సూచిస్తుంది. శివలింగం అంటే శివ-శక్తుల ఏకత్వానికి, సృష్టికి మూలమైన పురుష-ప్రకృతుల సంయోగానికి ప్రతీక. ఈ రెండింటి కలయిక వలనే ఈ సమస్త విశ్వం ఆవిర్భవించి, నడుస్తోంది. 3. వేదాలలో స్తంభ భావన (Cosmic Pillar) శివలింగ భావనకు మూలాలు వేదాలలో కూడా ఉన్నాయి. అధర్వణ వేదంలో 'స్కంధ సూక్తం' అనే ఒక ముఖ్యమైన భాగం ఉంది. ఇందులో విశ్వానికి ఆధారమైన ఒక దివ్యమైన స్తంభం గురించి వర్ణించబడింది. ఈ విశ్వమంతా ఆ స్తంభంపైనే ఆధారపడి ఉందని వేదం చెబుతుంది. ఈ వేద భావనే పురాణాలలో జ్యోతిర్లింగంగా రూపుదిద్దుకుంది. శివలింగం సృష్టికి ప్రతీక, కానీ అది జీవసంబంధమైన సృష్టి అంటే Biological creationకాదు. అది విశ్వ సృష్టికి అనగాCosmic creation సంబంధించిన ఉన్నతమైన తాత్విక భావన. శివ-శక్తుల కలయిక అంటే స్త్రీ-పురుషుల భౌతిక కలయిక కాదు. అది విశ్వంలోని చైతన్యం అనగా Consciousness మరియు శక్తి అంటే Energy యొక్క ఏకత్వం. శివలింగం ఒక సామాన్యమైన ఆకారం కాదు. అది... ఆది, అంతం లేని పరబ్రహ్మ తత్వానికి చిహ్నం. సమస్త సృష్టి దేని నుండి ఉద్భవించి, దేనిలో లయమవుతుందో ఆ మూలశక్తికి ప్రతీక. శివ-శక్తుల, పురుష-ప్రకృతుల అద్వైతానికి (ఏకత్వానికి) గుర్తు. నిరాకారమైన భగవంతుడిని ఆరాధించడానికి ఏర్పడిన ఒక దివ్యమైన, శాస్త్రీయమైన రూపం. కాబట్టి, శివలింగాన్ని పూజించడం అంటే ఆ అనంతమైన విశ్వశక్తిని, పరమాత్మను పూజించడమే. అసందర్భ వ్యాఖ్యానాలపై స్పష్టత కొంతమంది పాశ్చాత్యులు, అలాగే మన సంస్కృతిపై సరైన అవగాహన లేనివారు, శివలింగాన్ని కేవలం భౌతికమైన దృష్టితో చూసి, అపార్థం చేసుకున్నారు. ఇది పూర్తిగా తప్పు మరియు మన సనాతన ధర్మం యొక్క తాత్విక లోతును గ్రహించలేకపోవడం వలన కలిగిన అజ్ఞానం. దానిపై అసందర్భ వ్యాఖ్యానాలు కేవలం అజ్ఞానం వల్ల వచ్చినవిగా భావించి, దాని వెనుక ఉన్న మహోన్నతమైన తత్వాన్ని గ్రహించడం తెలియని వారికి తెలియచెప్పడం మన కర్తవ్యం. #హర హర మహాదేవ శంభో శంకర #హర హర మహాదేవ 🙏 #అరుణాచల. శివ 🙏 #om Arunachala siva🙏 #తెలుసుకుందాం