Nara Lokesh గారు చెప్పిన గ్రీన్ సిమెంట్ అంటే ఏంటి.. అది బూడిద రంగులో కాక వేరే రంగులో ఉంటుందా ? సిమెంట్‌ రంగు బూడిదగానే ఉంటుంది. మరి దానిని “గ్రీన్ సిమెంట్” అని ఎందుకు అంటారు? రంగును బట్టి కాదు… తయారీ విధానాన్ని బట్టి.. సాధారణ సిమెంట్ తయారీలో సున్నపురాయిని అత్యధిక ఉష్ణోగ్రత వద్ద కాల్చి క్లింకర్‌ను తయారుచేస్తారు. ఈ ప్రక్రియలో భారీగా కార్బన్ డయాక్సైడ్ విడుదలవుతుంది. ప్రపంచ కార్బన్ ఉద్గారాల్లో సిమెంట్ పరిశ్రమ వాటా దాదాపు 7 శాతంగా ఉండటం వల్ల ఈ రంగంలో మార్పు ఎంతో అవసరం. గ్రీన్ సిమెంట్ తయారీలో క్లింకర్ వినియోగాన్ని తగ్గించి, థర్మల్ విద్యుత్ కేంద్రాల నుంచి వచ్చే ఫ్లై యాష్, ఉక్కు పరిశ్రమల నుంచి వచ్చే బ్లాస్ట్ ఫర్నేస్ స్లాగ్ వంటి వ్యర్థ పదార్థాలను ఉపయోగిస్తారు. ప్రత్యామ్నాయ ఇంధనాలు, పునరుత్పాదక విద్యుత్, వ్యర్థ ఉష్ణాన్ని తిరిగి వినియోగించే సాంకేతికతల ద్వారా కర్బన ఉద్గారాలను తగ్గిస్తారు. అంటే పర్యావరణ ప్రభావం పూర్తిగా ఉండదని కాదు, సంప్రదాయ సిమెంట్‌తో పోలిస్తే ఉద్గారాలు, సహజ వనరుల వినియోగం, పారిశ్రామిక వ్యర్థాల భారం గణనీయంగా తగ్గుతాయి. ఈ నేపథ్యంలో జూలై 15న కడప జిల్లా జమ్మలమడుగు నియోజకవర్గంలోని చిన్నకొమర్ల దాల్మియా సిమెంట్ ప్లాంట్‌లో రూ.3,478 కోట్ల లైన్–2 విస్తరణ ప్రాజెక్టుకు మంత్రి నారా లోకేశ్ శంకుస్థాపన చేయనున్నారు. దాల్మియా సంస్థ గ్రీన్ సిమెంట్ ఉత్పత్తులకు GRIHA గ్రీన్ గుర్తింపు పొందిన భారతదేశంలోని తొలి సిమెంట్ సంస్థ. అంతేకాదు, 2040 నాటికి కార్బన్ నెగెటివ్ సంస్థగా మారాలనే లక్ష్యంతో పనిచేస్తున్నారు. ఒకప్పుడు రాళ్లసీమగా పేరుపడి, కరవుకు చిరునామాగా చెప్పుకున్న రాయలసీమలో ఇప్పుడు గ్రీన్ ఎనర్జీ, గ్రీన్ స్టీల్, గ్రీన్ సిమెంట్ ప్రాజెక్టులతో పారిశ్రామిక ప్రగతికి చిరునామాగా మారుతోంది. #📖జనరల్ ఇన్ఫర్మేషన్👩‍💼 #📰ఈరోజు అప్‌డేట్స్ #🏛️పొలిటికల్ అప్‌డేట్స్ #🟡నారా లోకేష్ #🤔స్టార్టప్ ఐడియాస్💡