Part 22 C അന്തമില്ലാത്ത വരികൾ - സഖിയുടെ സഖാവ് - തിരഞ്ഞെടുപ്പിന്റെ ചൂട് അപ്പോഴേക്കും കോളേജ് ക്യാമ്പസിലാകെ പടർന്നിരുന്നു. ലക്ഷ്മിയുടെ മൗനവും പതിഞ്ഞ നടപ്പും കണ്ടപ്പോൾ നിയയ്ക്ക് അവളുടെ മനസ്സിലെ ആശയക്കുഴപ്പം മനസ്സിലായി. അവൾ പതിയെ ലക്ഷ്മിയോട് ചേർന്ന് നടന്നു. ചുണ്ടിൽ ഒരു ചെറുപുഞ്ചിരിയോടെ അവൾ പറഞ്ഞു, “നിന്റെ സഖാവിനെ… ഈ തിരഞ്ഞെടുപ്പിനിടയിൽ നമുക്ക് കണ്ടെത്താം.” ലക്ഷ്മി ഒന്നും പറയാതെ അവളെ നോക്കി. നിയ വീണ്ടും മൃദുവായി തുടർന്നു. “എന്തുകൊണ്ടോ… ഈ തിരഞ്ഞെടുപ്പിന്റെ ഏതെങ്കിലും ഒരു ദിവസം, നിന്റെ സഖാവ് നിന്റെ മുന്നിൽ പ്രത്യക്ഷപ്പെടുമെന്ന് എന്റെ മനസ്സ് പറയുന്നുണ്ട്.” ആ വാക്കുകൾ കേട്ടപ്പോൾ ലക്ഷ്മിയുടെ ഹൃദയം അറിയാതെ ഒന്നു പിടഞ്ഞു. അവൾ മറുപടിയൊന്നും പറഞ്ഞില്ല. പക്ഷേ, അവളുടെ മനസ്സിലും എവിടെയോ ഒരു ചെറിയ പ്രതീക്ഷയുടെ നാളം പതിയെ തെളിയാൻ തുടങ്ങി. മുത്തശ്ശിമാവിന്റെ ചുവട്ടിൽ നിന്ന് ദേവ് നേരെ പാർട്ടി ഓഫീസിലേക്ക് നടന്നു. അവിടെ എത്തി ചുറ്റുമൊന്ന് നോക്കിയ ശേഷം, മേശപ്പുറത്തിരുന്ന “അന്തമില്ലാത്ത വരികൾ” എന്ന പുസ്തകം പതിയെ കൈയിലെടുത്തു. പിന്നെ പുസ്തകം തുറന്ന്, അവൾക്കായി രണ്ട് വരികൾ മെല്ലെ കുറിച്ചു. പുസ്തകം പഴയതുപോലെ തന്നെ അടച്ചുവെച്ച്, ആരുടെയും ശ്രദ്ധയിൽപ്പെടാതിരിക്കാൻ സൂക്ഷിച്ച് അതേ സ്ഥാനത്ത് തിരിച്ചുവച്ചു. ശേഷം ഒരു ദീർഘനിശ്വാസം വിട്ട് ദേവ് പാർട്ടി ഓഫീസിലാകെ ഒന്ന് കണ്ണോടിച്ചു. വൈകുന്നേരം നടക്കാനിരുന്ന തിരഞ്ഞെടുപ്പ് യോഗത്തിനുള്ള ഒരുക്കങ്ങളെല്ലാം സ്വയം പരിശോധിച്ച് പൂർത്തിയാക്കി. എല്ലാം ശരിയാണെന്ന് ഉറപ്പാക്കിയ ശേഷം, ഒരിക്കൽ കൂടി ഓഫീസിലേക്ക് തിരിഞ്ഞുനോക്കി അവൻ പതിയെ പുറത്തേക്കിറങ്ങി. അധ്യാപകർ ഓരോ പീരിയഡ് കഴിഞ്ഞതോറും ക്ലാസുകൾ എടുത്തുകൊണ്ടിരുന്നു. പാഠങ്ങൾ മുന്നോട്ട് പോയെങ്കിലും, കുട്ടികളുടെ മനസ്സിലും ചിന്തകളിലും നിറഞ്ഞുനിന്നത് തിരഞ്ഞെടുപ്പ് മാത്രമായിരുന്നു. ക്ലാസ് മുറികളിലും വരാന്തകളിലും ഇടവേളകളിലും എല്ലാം അതേ ചർച്ചകൾ തന്നെ. സമയം പതിയെ മുന്നോട്ട് നീങ്ങി. ഒടുവിൽ…. തുടരും part 22 D വായിക്കൂ … #📙 നോവൽ #💞 പ്രണയകഥകൾ #📔 കഥ #📝 ഞാൻ എഴുതിയ വരികൾ #തുടർകഥ