#🕵️‍♀️ കുറ്റാന്വേഷണ കഥകൾ #📔 കഥ #📖 കുട്ടി കഥകൾ #💞 പ്രണയകഥകൾ രാത്രി പുറത്ത് ശക്തമായ മഴ പെയ്യുകയായിരുന്നു. ജനൽ ചില്ലുകളിൽ മഴത്തുള്ളികൾ തട്ടി വീഴുന്ന ശബ്ദം മാത്രം വീടിനുള്ളിൽ മുഴങ്ങി കൊണ്ടിരുന്നു. മീര തൻ്റെ ലാപ്ടോപ് അടച്ചുവെച്ച് സമയം നോക്കി,11:46 PM ഒരു നീണ്ട ദിവസം കഴിഞ്ഞതിൻ്റെ ക്ഷീണം അവളുടെ മുഖത്ത് തെളിഞ്ഞിരുന്നു. കാപ്പിക്കപ്പ് മേശപുറത്ത് വച്ചിട്ട് ഫോൺ കയ്യിൽ എടുത്തു, സോഷ്യൽ മീഡിയയിൽ കുറച്ച് സമയം ചെലവഴിച്ച ശേഷം ഫോൺ മാറ്റി വക്കാൻ പോകുമ്പോൾ ആയിരുന്നു അതു സംഭവിച്ചത്! "ടിങ്" ഒരു വോയിസ് മെസേജ്.. അയച്ച ആളിൻ്റെ പേര് കണ്ട നിമിഷം മീരയുടെ കൈകൾ വിറച്ചു. "അർജുൻ" അത് അസാധ്യമായിരുന്നു. കാരണം... മൂന്ന് ദിവസം മുമ്പ് അർജുൻ ഒരു കാർ അപകടത്തിൽ മരിച്ചിരുന്നു. മീരയുടെ ഹൃദയം വേഗത്തിൽ മിടിച്ചു. ഒരു നിമിഷം അവൾ സ്ക്രീനിലേക്ക് നോക്കി നിന്നു. ശേഷം വിറക്കുന്ന വിരലുകൾ കൊണ്ട് മെസേജ് തുറന്നു. വോയിസ് പ്ലേ ആയി. "മീര... നീ ഈ മെസ്സേജ് കേൾക്കുമ്പോഴേക്കും ഞാൻ ജീവിച്ചിരിക്കില്ല. എന്നെ കൊന്നത് ആരാണെന്ന് നിനക്കറിയാം... പക്ഷേ സൂക്ഷിക്കണം. അയാൾ ഇപ്പോഴും നിൻ്റെ അടുത്തുണ്ട്". ഒരു കാര്യം മാത്രം ഓർക്കുക "King Never Falls" മെസേജ് അവസാനിച്ചു. മുറിയിൽ നിശബ്ദത പുറത്ത് ഇടിമിന്നൽ.. മീരയുടെ ശ്വാസം പോലും നിലച്ചു പോയതുപോലെ തോന്നി. " ഇത് എങ്ങനെ സാധിക്കും"? അവൾ സ്വയം ചോദിച്ചു. അർജുൻ്റെ മരണ ദിവസം അവൾക്ക് വ്യക്തമായി ഓർമയുണ്ടായിരുന്നു. അപകടം ഉണ്ടായ സ്ഥലത്ത് അവൾ തന്നെയാണ് ആദ്യം എത്തിയത്. പോലീസും ഡോക്ടർമാരും അത് ഒരു സാധാരണ അപകടമാണെന്ന് പറഞ്ഞിരുന്നു. പക്ഷേ ഈ മെസ്സേജ് ? "King Never Falls" എന്നതിന് എന്താണ് അർത്ഥം ? ആ രാത്രിയിൽ ഉറങ്ങാൻ കഴിയാതെ മീര പഴയ ചാറ്റുകൾ തുറന്നുനോക്കി. അർജുൻ്റെ അവസാന മെസ്സേജ് മൂന്ന് ദിവസം മുൻപ് ആയിരുന്നു. അതിനു താഴെ മറ്റൊരു കാര്യം അവളുടെ ശ്രദ്ധയിൽ പെട്ടു. അർജുൻ മരിക്കുന്നതിന് രണ്ട് മണിക്കൂർ മുൻപ് അയച്ച ഒരു ഫോട്ടോ. ഒരു ചെസ്സ് ബോർഡ്, അതിൽ എല്ലാ പീസുകളും ഉണ്ടായിരു. പക്ഷേ... കറുത്ത രാജാവ് ( Black King ) മാത്രം കാണാനില്ലായിരുന്നു. മീരയുടെ മനസ്സിൽ ഒരു ചോദ്യമുയർന്നു. "അർജുൻ എന്തിനാണ് ഈ ഫോട്ടോ എനിക്ക്  അയച്ചത്". അവൾ വീണ്ടും വോയിസ് മെസേജ് കേൾക്കാൻ ശ്രമിച്ചു. അപ്പോൾ ഫോൺ സ്ക്രീനിൽ ഒരു പുതിയ നോട്ടിഫിക്കേഷൻ തെളിഞ്ഞു. " Unknown Number : Game Started". മീരയുടെ കണ്ണുകൾ ഭയത്തോടെ വലുതായി. ആരാണ് ഈ കളി തുടങ്ങിയത് ? ആരാണ് കറുത്ത രാജാവ് ? തുടരും....