नाशिकमधील इंडिया सिक्युरिटी प्रेसने १०० वर्षांचा गौरवशाली टप्पा पूर्ण केल्याच्या निमित्ताने विशेष टपाल तिकिटाचे अनावरण करण्यात आले. शनिवारी आयोजित शताब्दी सोहळ्यात प्रेस सुरू झाल्यावेळच्या इमारतीचे चित्र असलेले टपाल तिकीट नवी मुंबई परिक्षेत्राच्या पोस्टमस्टर जनरल सुचिता जोशी यांच्या हस्ते प्रसिद्ध करण्यात आले. या कार्यक्रमाला केंद्र सरकारच्या वित्त मंत्रालयाच्या सचिव अनुराधा ठाकूर यांची प्रमुख उपस्थिती होती. या उपक्रमामुळे प्रेसच्या ऐतिहासिक वाटचालीला अभिवादन करण्यात आले.

नाशिक येथे मेट भुजबळ नॉलेज सिटीत एमइटी बीकेसी उत्सव २०२६ अंतर्गत ‘विरासत’ हा भव्य सांस्कृतिक सोहळा उत्साहात पार पडला. विश्वस्त समीर भुजबळ, आमदार पंकज भुजबळ व डॉ. शेफाली भुजबळ यांच्या हस्ते अक्षय कुमार, वामिगा गब्बी व जोया अफरोज यांचा सन्मान झाला. क्रेन स्टंट व ऑटोमधून एन्ट्रीमुळे जल्लोष उसळला. विद्यार्थ्यांच्या कलागुणांचे कौतुक करत अक्षय कुमार यांनी संस्थेच्या इन्फ्रास्ट्रक्चरचे विशेष कौतुक केले. ‘विरासत’मधून परंपरा व आधुनिकतेचा सुंदर संगम साकारला.

नाशिक महानगरपालिकेने कुसुमाग्रज यांच्या नावाने ओळखल्या जाणाऱ्या कुसुमाग्रज काव्य उद्यानातील वृक्षतोड करून ती जागा एसटीपी प्रकल्पासाठी देण्याचा निर्णय घेतल्याबद्दल आमदार सत्यजित तांबे यांनी तीव्र नाराजी व्यक्त केली. कुसुमाग्रजांच्या जयंतीच्या पूर्वसंध्येला वृक्षतोड झाल्याने त्यांच्या स्मृतीचा व मराठी संस्कृतीचा अपमान झाल्याचे त्यांनी म्हटले. पर्यावरण संवर्धन व सांस्कृतिक वारसा जपणे ही शासनाची जबाबदारी असल्याचे नमूद करत त्यांनी अधिवेशनात हा मुद्दा उपस्थित केला.

मुंबईतील अधिवेशनादरम्यान आरोग्यमंत्री प्रकाश अबिटकर यांनी मंत्री दादा भुसे यांच्यासह मालेगाव महिला व बाल रुग्णालयाच्या कामकाजाचा ऑनलाईन आढावा घेतला. रुग्णालयातील उपलब्ध सुविधा, सुरू असलेली कामे आणि रुग्णसेवेबाबत सविस्तर माहिती सादर करण्यात आली. यानंतर मंत्र्यांनी व्हिडिओ कॉलद्वारे डॉ. दीपक पवार तसेच काही रुग्णांशी थेट संवाद साधत सेवा व्यवस्थेबाबत माहिती घेतली. रुग्णालयाच्या कार्यपद्धतीबाबत समाधान व्यक्त करत त्यांनी प्रशासनाला सेवा अधिक सक्षम व परिणामकारक करण्याच्या सूचना दिल्या. नागरिकांना दर्जेदार आरोग्य सुविधा मिळाव्यात, यावर त्यांनी विशेष भर दिला.

नाशिक–अक्कलकोट ग्रीनफील्ड महामार्गाला गती; जमीन संपादन अंतिम टप्प्यात उत्तर व दक्षिण महाराष्ट्राला जोडणाऱ्या ‘नाशिक–अक्कलकोट ग्रीनफील्ड महामार्गा’साठी राष्ट्रीय महामार्ग प्राधिकरणने जमीन संपादन प्रक्रिया वेगात सुरू केली आहे. नाशिक जिल्ह्यातील नाशिक, निफाड व सिन्नर तालुक्यांतील १०७.३३ हेक्टर जमीन संपादनासाठी २१ दिवसांची मुदत देण्यात आली आहे. महामार्ग आडगावहून सुरू होऊन अक्कलकोटपर्यंत जाणार असून पुढील दोन वर्षांत प्रकल्प पूर्ण करण्याचे उद्दिष्ट आहे.

नाशिक:लहान मुले मोबाईलशिवाय जेवत नाहीत, ही वाढती सवय चिंताजनक असल्याचे मत शालेय शिक्षण मंत्री दादा भुसे यांनी व्यक्त केले. मुलांच्या जडणघडणीत पालकांची भूमिका अत्यंत महत्त्वाची असल्याचे त्यांनी सांगितले. काही गावांमध्ये पालक व शाळांच्या पुढाकारातून संध्याकाळी ७ ते ९ या वेळेत मोबाईल आणि टीव्ही बंद ठेवण्याची ‘मोबाईलमुक्त वेळ’ योजना राबविण्यात येत आहे. या उपक्रमामुळे मुलांमध्ये अभ्यासाची सवय वाढत असून कुटुंबीयांमध्ये संवादही सुधारल्याचे सकारात्मक परिणाम दिसत आहेत.

मालेगाव–अहिल्यानगर महामार्ग येवला शहरालगतून जात असल्याने परिसरात वारंवार वाहतूक कोंडीची समस्या निर्माण होत आहे. वाढती लोकसंख्या, वाहनांची वाढ आणि अपुरी रस्ते सुविधा यामुळे नागरिकांना मोठा त्रास सहन करावा लागत आहे. या पार्श्वभूमीवर आमदार किशोर दराडे यांनी अर्थसंकल्पीय अधिवेशनात प्रश्न उपस्थित करत तातडीच्या उपाययोजनांची मागणी केली. त्यांच्या सातत्यपूर्ण पाठपुराव्याची सभागृहाने दखल घेत सकारात्मक प्रतिसाद दिला. यामुळे येवला शहराच्या विकासाला चालना मिळून वाहतूक कोंडी कमी होण्याची अपेक्षा व्यक्त होत आहे.

*लासलगाव शहराला मुबलक पाणी पुरवठा होण्यासाठी स्वतंत्र पाणी पुरवठा योजनेसाठी सकारात्मक विचार करू - राज्यमंत्री मेघना बोर्डीकर* *लासलगाव विंचूरसह १६ गावे प्रादेशिक पाणी पुरवठा योजनेच्या दुरुस्तीचे काम पूर्ण झाल्यावर १६ गावांना मुबलक पाणी* *आमदार पंकज भुजबळ यांनी उपस्थित केलेल्या लक्षवेधी सूचनेवर राज्यमंत्री मेघना बोर्डीकर यांची माहिती* *मुंबई,नाशिक,लासलगाव,दि.२४ फेब्रुवारी:-* जलजीवन मिशन रेट्रोफिटिंग योजनेअंतर्गत लासलगाव विंचूरसह १६ गावे प्रादेशिक पाणी पुरवठा योजनेच्या दुरुस्तीसाठी २६.५० कोटी रुपये निधी मंजूर करण्यात आलेला आहे. या योजनेच्या दुरुस्तीचे काम अंतिम टप्प्यात असून योजनेचे काम पूर्ण झाल्यानंतर लासलगाव विंचूरसह १६ गावांना मुबलक प्रमाणात पाणी पुरवठा केला जाईल. योजनेचे काम पूर्ण झाल्यानंतरही जर लासलगाव सारख्या मोठ्या शहरांना पाणी पुरवठा मुबलक प्रमाणात होऊ शकला नाही तर लासलगाव शहरासाठी स्वतंत्र पाणी पुरवठा योजना राबविण्यासाठी सकारात्मक विचार करण्यात येईल अशी माहिती पाणी पुरवठा राज्य मंत्री मेघना बोर्डीकर यांनी दिली आहे. महाराष्ट्र राज्याचे अर्थसंकल्पीय अधिवेशन मुंबई येथे सुरु आहे. आज महाराष्ट्र विधान परिषद नियम १०१ अन्वये आमदार पंकज भुजबळ यांनी लासलगाव शहरासाठी स्वतंत्र पाणी पुरवठा योजना राबविण्यासाठी लक्षवेधी सूचना उपस्थित केली. त्यावरील उत्तरात पाणी पुरवठा राज्यमंत्री मेघना बोर्डीकर यांनी उत्तर दिले. नियम १०१ अन्वये उपस्थित केलेल्या लक्षवेधी सूचनेवर आमदार पंकज भुजबळ म्हणाले की, नाशिक जिल्ह्यातील लासलगाव ही आशिया खंडातील कांद्याची अग्रगण्य बाजारपेठ असून हे शहर झपाट्याने विकसित होत आहे. गेल्या १५ वर्षांत येथील लोकसंख्या तिपटीने वाढून ती ३० हजारांच्या वर गेली आहे. सध्या लासलगाव शहरासाठी १६ गावे प्रादेशिक पाणीपुरवठा योजनेद्वारे पाणी दिले जात आहे. लोकसंख्येच्या तुलनेत लासलगाव साठी अत्यंत अपुरे आहे. विविध तांत्रिक अडचणींमुळे हा पुरवठा वारंवार खंडित होत असतो. अनेकदा नागरिकांना काही दिवस पाण्याविना राहावे लागत लागते. प्रसंगी जन सामान्यांमध्ये प्रचंड असंतोष निर्माण होत आहे. त्यामुळे लासलगाव शहरासाठी पाण्याचा प्रश्न कायमस्वरूपी सोडविण्यासाठी शहरापासून १० कि.मी.अंतरावर असलेल्या 'खडक माळेगाव धरण' येथून स्वतंत्र जलवाहिनी टाकून नवीन पाणीपुरवठा योजना राबवणे अत्यंत आवश्यक असल्याची मागणी त्यांनी केली. या लक्षवेधी सूचनेवरील उत्तरात पाणी पुरवठा राज्यमंत्री मेघना बोर्डीकर म्हणाल्या की, जलजीवन मिशन रेट्रोफिटिंग योजनेअंतर्गत लासलगाव विंचूरसह १६ गावे प्रादेशिक पाणी पुरवठा योजनेच्या दुरुस्तीसाठी २६.५० कोटी रुपये निधी मंजूर करण्यात आलेला आहे. या योजनेच्या दुरुस्तीचे काम अतिंम टप्प्यात असून योजनेचे काम पूर्ण झाल्यानंतर लासलगाव विंचूरसह १६ गावांना मुबलक प्रमाणात पाणी पुरवठा होणार आहे. मात्र तरी देखील लासलगाव सारख्या मोठ्या गावांचा विस्तार बघता पाणी पुरवठा मुबलक होऊ शकला नाही तर स्वतंत्र योजना राबविण्यासाठी शासन सकारात्मक विचार करेल. तसेच या प्रश्नाची सोडवणूक करण्यासाठी लवकरच बैठक घेऊन मार्ग काढला जाईल अशी माहिती त्यांनी दिली.

नाशिक २३ फेब्रुवारी रोजी राज्यातील बाजार समित्यांमध्ये सुमारे ३ लाख ३६ हजार क्विंटल कांद्याची आवक झाली. यापैकी नाशिक जिल्ह्यात लाल कांद्याची पावणेदोन लाख क्विंटल आवक नोंदली गेली. लासलगाव येथे किमान ५०० व सरासरी ११०० रुपये दर मिळाला. सोलापूरमध्ये किमान १०० व सरासरी ७०० रुपये, येवला ९२५, अमरावती व नागपूर १५००, कळवण ९५०, जळगाव ८२५ रुपये दर राहिला. पांढऱ्या कांद्याला नागपूरमध्ये १८५० रुपये दर मिळाला.