🍃🍃🌼🍃🍃 બાળ ચરીત્ર....           હે ભાઈ ! ત્યાર પછી ત્યાં થકી ચાલ્યા તે બંગાળ દેશમાં મોટું એક શહેર આવ્યું. તે શહેરની સમીપે મોટી એક નદીમાં સ્નાન કરતા સતા પીપળાના વૃક્ષ નીચે ઓટા ઉપર બેઠા અને પોતાનો નિત્ય વિધિ પૂજાપાઠ કરીને હનુમાનજીએ આપેલાં ફળનું નૈવેદ્ય વિષ્ણુને ધરીને પોતે જમતા હતા. પછી એક ઘડી વિશ્રામ કરીને ચાલવાની તૈયારી કરી. તે વખતે એક બ્રાહ્મણનો છોકરો આવ્યો. તે પગે લાગીને બેઠો એટલે તેને પૂર્વનો મુમુક્ષુ જાણીને પોતાના સ્વરૂપનું જ્ઞાન આપીને પોતાને વિષે ભગવાન-પણાનો નિશ્ચય કરાવ્યો. ત્યારે તેણે પ્રાર્થનાને કર્યા સતા તેના ઘેર જઈને પંદર દિવસ રહ્યા. ત્યારે તે છોકરાની માતાએ ચરણારવિંદમાં ચિહ્ન જોઈને પોતાના મનમાં એમ જાણ્યું જે, આ બાલા બ્રહ્મચારી સાક્ષાત્ ઇશ્વર છે. એમ જાણીને હેતે સહિત તે બાઈ સેવા કરતી હતી. અને પોતાના ઘેર રાખવાનો પોતાના અંતઃકરણમાં સંકલ્પ કર્યો. તે સંકલ્પને અંતર્યામીપણે જાણીને ત્યાં થકી ચાલી નીકળ્યા. ત્યારે તે બાઇએ પોતાના પુત્રને કહ્યું જે, હે પુત્ર ! એ બાલા બ્રહ્મચારીની કેડે તું જા અને પાછા આવે તો વાળી લાવજે. અને જો ન આવે તો તું પાછો ઘેર આવીશ નહીં. એવું પોતાની માતાનું દુઃખ ભરેલું વચન સાંભળીને છોકરો પણ વાંસે ચાલ્યો, તે કેટલાક ગાઉ ગયો ત્યારે તેને ભેગા થયા અને તે છોકરે બહુ રીતે સમજાવીને પાછા વળવાનું કહ્યું પણ વળ્યા નહીં. ત્યારે છોકરો પણ વાંસે ચાલ્યો. પછી તે છોકરાને સમજાવીને કહ્યું જે, હે ભાઈ ! હમણાં તું ઘરે જા અને તારી માતા અતિ વૃદ્ધ અને અપંગ છે. તેની સેવા કરજે. અને દેહ મૂકી જાય એટલે તું પશ્ચિમ દેશમાં દ્વારિકાની યાત્રા કરવા આવજે. ત્યાં તને અમો મળીશું. એવી રીતે તેને ઘણોક સમજાવ્યો પણ માન્યું નહીં. પછી બન્ને જણ ત્યાં રાત્રિ રહ્યા. અને મોહ રૂપી નિદ્રામાં તેને સુવાડીને પોતે ચાલી નીકળતા હતા. પછી તે જાગ્યો એટલે ચારે બાજુ જોયું પણ ક્યાંય દીઠા નહીં. પછી તે છોકરો ઘણો ઉદાસ થઇને જગન્નાથમાં જઈને વૈરાગી થઈને રહ્યો અને થોડાંક વર્ષ ત્યાં ઠાકોરજીની સેવા કરીને પાછો ત્યાં થકી ચાલ્યો, તે ફરતો ફરતો કેટલાક વર્ષ વીત્યા બાદ ગુજરાત દેશમાં શ્રીજી મહારાજ પાસે ભુજનગરમાં આવ્યો. ત્યારે અતિ પ્રેમમગ્ન થઇને દંડવત્ પ્રણામ કરીને પગે લાગતો હતો. ત્યારે શ્રીજી મહારાજ બોલ્યા જે, કેમ એ વાત સાંભરે છે? ત્યારે કહે હા અને બોલ્યો જે, હે મહારાજ ! તમોએ મને કહ્યું હતું તે આપણો મેળાપ થયો. માટે તમારો સેવક કરીને મને રાખો. ત્યારે પરમહંસ કરીને તેને પોતાની પાસે રાખતા હતા.                        🍃🍃🌼🍃🍃 #🦋😊 𝗝𝗮𝘆 𝘀𝘄𝗮𝗺𝗶𝗻𝗮𝗿𝗮𝘆𝗮𝗻 🤗 #✋ જય સ્વામીનારાયણ #અનાદિમુક્તરાજ શ્રી અબજીબાપા ##જય સ્વામિનારાયણ #🙏 સ્વામિનારાયણ મંદિર