അടുക്കളയിലെ പാത്രങ്ങൾ തമ്മിൽ കൂട്ടിമുട്ടുന്ന കലപില ശബ്ദം കേട്ടാണ് വിശ്വം കണ്ണ് തുറന്നത്.തുറന്നിട്ട ജനൽ പാളികളിലൂടെ അരിച്ചെത്തിയ സൂര്യ പ്രകാശത്തിൽ അവൻ കണ്ണുകൾ കൂട്ടിയടച്ചു.. തല പൊട്ടി പോകുന്ന വേദന. ഇന്നലെ രണ്ടെണ്ണം വിട്ടിരുന്നു.. രണ്ടോ മൂന്നോ കൃത്യമായി ഓർമയില്ല. കണ്ണ് തിരുമ്മികൊണ്ട് വിശ്വൻ ചുറ്റുമൊന്നു കണ്ണോടിച്ചു.സുചിത്ര കിടന്നിടം ശൂന്യമായിരിക്കുന്നു.. പാവം കോഴി കൂവും മുൻപേ എഴുനേറ്റ് കുളിയും കഴിഞ്ഞു അടുക്കളയിൽ കയറി കാണും.. ഇത്തിരി കൂടി കിടക്കടീ എന്ന് പറഞ്ഞാൽ കേൾക്കില്ല. അമ്മയെ പേടിച്ചുള്ള ഓട്ടമാണ്. പതിയെ ചാഞ്ചാടുന്ന തൊട്ടിലിലേയ്ക്ക് വിശ്വന്റെ മിഴികൾ പാഞ്ഞു പോയി.ശ്രീക്കുട്ടി ഉറക്കമാണ്,വെള്ളി കൊലുസ് കെട്ടിയ കുഞ്ഞിക്കാൽ തൊട്ടിലിനു പുറത്തേയ്ക്കല്പം നീണ്ട് കാണാം..രാവിലെയുള്ള ഈ ഉറക്കം പതിവാണ്.. ഒരു കണക്കിന് അത് സുജിത്രയ്ക്ക് ഒരാശ്വാസമാണ്. അവളുടെ രാവിലത്തെ അടുക്കള പണിക്കിടയിൽ ശ്രീക്കുട്ടി കൂടി ഉണർന്നാൽ ആ പാവത്തിന്റെ കഷ്ടപ്പാട് പിന്നെ പറയണ്ട. ശ്രീകുട്ടിക്കിപ്പൊ ഒന്നര വയസായി.. അവൾക്ക് മുന്നേ തങ്ങൾക്കിടയിലേയ്ക്ക് വന്നതാണ് നന്ദൂട്ടൻ.. ദേവനന്ദൻ. മൂന്ന് വയസായി. ആളിപ്പോ അംഗൻവാടിയിൽ പോയി തുടങ്ങി. ഗമയിലുള്ള നിൽപ്പ് കണ്ടാൽ വല്ല്യ ആളായീനാ വിചാരം.. ഉമ്മറത്ത് നിന്നും നന്ദൂട്ടന്റെ ഒച്ച കേട്ടപ്പോഴാണ് വിശ്വന് ബോധം വന്നത്. ദൈവമേ സമയമെത്രയായി.. അവൻ കയ്യെത്തിച്ചു ടീപോയ്ക്ക് മേലെയിരുന്ന വാച്ചെടുത്ത് സമയം നോക്കി.. ഈശ്വരാ എട്ട് മണി.. ഓഫീസിൽ പോകാനുള്ളതാണ്. എന്നും അവൾ ഒരു ചായയുമായി വന്നുണർത്താറുള്ളതാണ്.. ഇന്ന് ഈ പരിസരത്തേയ്ക്കെ കണ്ടില്ല.എന്ത് പറ്റി ആവോ.. വിശ്വൻ പതിയെ മുറി വിട്ടിറങ്ങി.. നടുത്തളത്തിലേയ്ക്ക് ചെന്നതും അമ്മയുടെ ബഹളമാണ് കാതിൽ വീണത്.ഇന്നത്തെ അമ്മയുടെ ഇര അച്ഛനാണല്ലോ എന്നോർത്ത് പതിയെ അവരുടെ വാക്കുകൾക്ക് വിശ്വൻ കാതോർത്തു.പോകെ വിശ്വന് മനസിലായി അച്ഛനല്ല തന്റെ ഭാര്യ സുചിത്രയെ ആണ് അമ്മ പഴി ചാരികൊണ്ടിരിക്കുന്നത് എന്ന്.. അതെങ്ങനെയാ കുടുംബത്തിരിക്കുന്ന പെണ്ണുങ്ങൾ കെട്ടിയോന്മാർക്ക് മനസമാധാനം കൊടുത്തില്ലേൽ അവര് അന്തിക്ക് വീട്ടിൽ വന്നു കയറുന്നത് ചിലപ്പോൾ നാല് കാലേൽ ആയിരിക്കും.അതിന് അവനെ മാത്രം കുറ്റം പറഞ്ഞിട്ട് കാര്യമില്ല. എന്റെ വത്സലെ നീയൊന്നടങ്ങ്... ആ പെങ്കൊച്ചു കേട്ടാൽ എന്തോ വിചാരിക്കും. അത് അവന് മനഃസമാധാനം കൊടുക്കാഞ്ഞിട്ടാണെന്ന് കരുതില്ലേ.. ഗംഗാതരൻ നായര് ഭാര്യയെ അനുനയിപ്പിക്കാൻ ഒരു ശ്രമം നടത്തി നോക്കി. അത് പാളി പോയി എന്ന് മാത്രമല്ല വത്സല ഒന്ന് കൂടി എരിഞ്ഞു കത്തി. കേൾക്കട്ടെ.. കേൾക്കാൻ വേണ്ടി തന്നെയാ ഞാൻ പറഞ്ഞത്. അവള് സ്വൈര്യം കൊടുത്തിരുന്നേൽ അവനിന്നലെ കുടിച്ചു വെളിവില്ലാതെ കയറി വരോ. നിങ്ങളവന്റെ അച്ചനല്ലേ,എന്താ നിങ്ങളൊരു കള്ള് കുടിയനാകാഞ്ഞത്.. ഞാൻ അത്ര കാര്യമായി നിങ്ങളെ നോക്കിയത് കൊണ്ട്. അതും പറഞ്ഞ് വത്സല മുറി വിട്ടിറങ്ങിയതും ഗംഗാതരൻ മനസിൽ പറഞ്ഞു.. ഉവ്വേ.. നിന്റെ കയ്യിലിരിപ്പിനു ഞാൻ പണ്ടേ കുടിച്ചു ചാവേണ്ടതാ. പക്ഷേ എനിക്കതിന്റെ രുചി പിടിക്കുകേലാ.. അത് കൊണ്ട് അത് വേണ്ടാന്ന് വച്ചു.. അത്ര തന്നെ.. ആത്മഗതം പറഞ്ഞ് അച്ഛനും അമ്മയ്ക്ക് പിന്നാലെ പോയതോടെ വിശ്വന് കാര്യങ്ങളുടെ കിടപ്പു വശം ഏകദേശം മനസിലായി.. താനിന്നലെ വെളിവില്ലാതെയാണ് വന്നു കയറിയത്.അതിനാണ് അമ്മ തന്റെ പ്രിയപെട്ടവളെ നെഞ്ചത്തോട്ട് കേറുന്നത്.അവളുടെ ഒച്ചയൊന്നും കേൾക്കാനും ഇല്ല.പണ്ടേ അവളെങ്ങനെയാണല്ലോ.അമ്മ ഇനി അവളെ പച്ചയ്ക്ക് തിന്നാലും ഒരക്ഷരം മിണ്ടാതെ നിന്ന് കൊടുത്തോളും.ഇങ്ങനെയൊരു പെണ്ണ്.. ഒടുക്കം അതിന്റെ പരിഭവം മുഴുവൻ തീർക്കുക തന്റെ നേർക്കും.രാവിലെ അമ്മയുടെ കയ്യിൽ നിന്നും കിട്ടിയതിന്റെ പരിഭവമാകും ഇന്നത്തെ ചായ പോലും ക്യാൻസൽ ചെയ്തേ.. വത്സല അടുക്കളയിൽ ചെന്നൊനെത്തി നോക്കി.. എണ്ണയിൽ മൊരിഞ്ഞ ദോശയുടെ മണം.. കറി എന്താ ഉണ്ടാക്കിയെ സുചിത്രെ.. ഇപ്പോ ചമ്മന്തിയരയ്ക്കാം അമ്മേ.. ഓഹോ.. അപ്പൊ ഇത്രയും നേരം നീ ദോശ കല്ലിനു മുൻപിൽ തപസിരിക്കയായിരുന്നോ.. ദോശ ചുട്ടു തീർന്നാലെ അടുത്ത പണി ചെയ്യാവുള്ളൂ എന്നൊന്നും ഇല്ല. ദോശയ്ക്ക് മാവ് ഒഴിച്ചു വച്ച് തേങ്ങ ചുരണ്ടി കൂടായിരുന്നോ.. അമ്മേ.. ഇടയ്ക്ക് ശ്രീകുട്ടി ഉണർന്നപ്പോൾ അവളെ ഉറക്കാൻ പോയി,അതാ.. എന്ത് പറഞ്ഞാലും ഉടനെ ഒരു ന്യായം കണ്ടെത്തിക്കോളും.. നിനക്കറിയില്ലേ അച്ഛന് കാലത്തെ കട തുറക്കാനുള്ളതാണെന്ന്.. ഇപ്പൊ കാപ്പി എടുത്ത് വയ്ക്കാം അമ്മേ... വത്സലെ എന്നാ പിന്നെ നിനക്ക് കൂടി ഒരു കൈ സഹായിച്ചൂടെ, അവളെ കൊണ്ട് ഒറ്റയ്ക്ക് എല്ലാം കൂടി ആകാഞ്ഞിട്ടല്ലേ.. പിന്നിൽ ഭർത്താവിന്റെ സ്വരം കേട്ടതും വത്സലയ്ക്ക് വിറഞ്ഞു കയറി. നിങ്ങള് എന്തോ കാണുവാൻ വന്നു നിൽക്കാ മനുഷ്യാ.. പോയി കട തുറക്കാൻ നോക്ക്. കാലത്താ രണ്ട് കച്ചോടം കിട്ടാ. ആ സമയം ഇവിടെ നിന്ന് തിരിയും.. കാപ്പി ആയിട്ട് ഞാൻ വന്ന് വിളിക്കാം.. പോകാൻ നോക്ക് മനുഷ്യാ.. ഞാൻ പോയേക്കാം.. ഇനി ഞാനിവിടെ നിന്നിട്ട് കച്ചോടം നടക്കാതിരിക്കണ്ട.നീ പോയി കടയുടെ ആ താക്കോലിങ്ങെടുക്ക്.. വത്സല അടുക്കള വിട്ട് പോയതും ഗംഗാധരൻ സുചിത്രയ്‌ക്കരികിലേയ്ക്ക് ചെന്ന് കൊണ്ട് പറഞ്ഞു. മോള് തിരക്ക് പിടിച്ച് വച്ചുണ്ടാക്കി കയ്യൊന്നും പൊള്ളിക്കണ്ട ട്ടോ.. അച്ഛന് വിശപ്പായിട്ടൊന്നുമില്ല. കുറച്ച് നേരം കൂടി കഴിഞ്ഞു മതി.നന്ദൂട്ടൻ ഉമ്മറത്തിരുന്നു കളിക്കുന്നുണ്ട്. അവന് കൊടുക്ക്‌, അത് കഴിഞ്ഞു വിശ്വനെ പറഞ്ഞു വിടാൻ നോക്ക്. ഇന്നലെ കുടിച്ചതിന്റെ കെട്ടിറങ്ങി ആ മഹാൻ കണ്ണ് തുറന്നോ ആവോ.. ഇനി അവനെ കുത്തിപൊന്തിക്കലും എന്റെ മോളെ പണിയാണല്ലോ.. സാരമില്ല അച്ഛാ.. ഞാനിപ്പൊ കാപ്പി ഇടാം.അച്ഛനത് കുടിച്ചിട്ട് പോയാൽ മതി. എന്നാ ഒരു ഗ്ലാസ്‌ കാപ്പി മാത്രം എടുത്തോ. സുചിത്ര വേഗം ഒരു ചില്ലു ഗ്ലാസെടുത്തു അതിലേക്ക് ആറ്റി തണുപ്പിച്ച കാപ്പി ഒഴിച്ചെടുത്ത് അയാളെ കൈകളിലേയ്ക്ക് കൊടുത്തു. കാപ്പി കുടിച്ച് ഗ്ലാസ് അവളുടെ കയ്യിലേയ്ക്ക് തന്നെ തിരികെ കൊടുത്തു കൊണ്ട് അയാൾ പറഞ്ഞു. അമ്മ പറയുന്നതൊന്നും കേട്ട് എന്റെ മോള് വിഷമിക്കണ്ട. അവള് പണ്ടേ ഒരു വാ പോയ കോടാലിയാ.എവിടെ എന്ത് പറയണമെന്നറിയില്ല. അമ്മയുടെ സ്വഭാവം എനിക്കറിയാലോ അച്ഛാ.. എന്നാ അച്ഛൻ പോയി വരാം മോളെ.. സുചിത്ര തലയാട്ടി. വിശ്വന്റെ അച്ഛൻ ഗംഗാതരന് വീടിനോട് ചേർന്ന് തന്നെ ഒരു ഒറ്റ മുറി കടയുണ്ട്.കുറച്ച് പലചരക്ക് സാധനങ്ങളും മുറുക്കാനുമൊക്കെയായി നാട്ടിൻപുറത്തെ ചെറിയൊരു കച്ചവടം.ഗംഗാതരൻ കട തുറന്നാൽ പിന്നാലെ തന്നെ ഭാര്യ വത്സലയും പോയി കടയിലിരിക്കും. രണ്ടാളിരിക്കേണ്ട കച്ചവടമൊന്നും കടയില്ലെങ്കിലും വത്സല പോക്ക് മുടക്കാറില്ല. അതിന്റെ പിന്നിൽ മറ്റൊന്നു കൂടിയുണ്ട്.വത്സലയ്ക്ക് വീട്ടു ജോലി നോക്കാനോ കുഞ്ഞുങ്ങളെ നോക്കി മരുമകളെ ഒരു കൈ സഹായിക്കാനോ വയ്യ,അതെല്ലാം മരുമകളുടെ മാത്രം ഉത്തരവാദിത്തമെന്ന നിലയിലാണ് അവരുടെ പെരുമാറ്റം. അച്ഛൻ അടുക്കള വിട്ട് പുറത്തിറങ്ങിയതും വിശ്വൻ പതിയെ സുചിത്രയ്ക്ക് പിന്നിലേയ്ക്ക് ചെന്ന് അവളെ വട്ടം കെട്ടിപിടിച്ചു.. അവൾ വിറച്ചു കൊണ്ട് ആ കൈകളെ തട്ടി മാറ്റി അടുക്കള പുറത്തെ ചെറിയ തിണ്ണയിലേയ്ക്കിറങ്ങി പോയി.പിന്നെ അഴയിൽ നിന്നും അലക്കാനുള്ള തുണികളെല്ലാമെടുത്ത് ബക്കറ്റിലേയ്ക്ക് നിറച്ചു..രാവിലത്തെ അടുക്കളയിലെ മേളം കഴിഞ്ഞു വേണം തുണിയലക്കലിലേയ്ക്ക് തിരിയാൻ. അപ്പോഴേക്കും നന്ദൂട്ടൻ ഓടിയെത്തി വിശ്വന്റെ കാലിൽ കെട്ടിപിടിച്ചു.. അച്ഛന്റെ നന്ദൂട്ടൻ നേരത്തെ എഴുനേറ്റോ.. ഉം.. എണീറ്റു,നാന് പല്ലും തേച്ചു.. വെത്തോ അച്ഛാ.. അവൻ തന്റെ കുഞ്ഞിപല്ല് കാട്ടി ചിരിച്ചു. ഉം.. വെളുത്തല്ലോ.. എന്റെ സുചിത്ര കുട്ടിയല്ലേ നന്ദൂട്ടന്റെ പല്ല് തേച്ച് തരണേ, അപ്പൊ വെളുക്കാതിരിക്കോ.. അതും പറഞ്ഞവൻ സുചിത്രയെ ഒന്ന് ഏറു കണ്ണിട്ടു നോക്കി. എന്നാ അവളത് കേട്ട ഭാവം പോലും കാണിക്കാതെ അടുക്കളയിലേക്ക് പോയി നിലത്ത് ചിരവയിട്ടിരുന്നു തേങ്ങ ചുരണ്ടാൻ തുടങ്ങി.. സുചി... അടുത്ത് ചെന്നിരുന്ന് ഒന്ന് വിളിച്ചു നോക്കി.. അവളൊന്നു മുഖമുയർത്തി നോക്കുക പോലും ചെയ്യാതിരുന്നപ്പോൾ വിശ്വന് മനസ് നൊന്തു.. അച്ഛാ അച്ഛൻ കൊണ്ടോന്ന വാളെവതെ.. വാളോ..എന്താ നന്ദൂട്ടൻ പറയുന്നെ.. ആ.. അച്ഛനിന്നലെ ചോക്കേറ്റ് കൊണ്ടന്നില്ലേ ചോദിച്ചപ്പൊ അമ്മ പഞ്ഞല്ലോ അച്ഛൻ വല്ല്യ വാള് കൊണ്ടൊന്നൂന്.. അച്ഛൻ കൊണ്ട് വന്ന വാള് അമ്മ പിന്നാമ്പുറത്തെ അഴയിൽ അലക്കാൻ ഇട്ടിട്ടുണ്ട്.. മോൻ ഇന്നലെ ഉറങ്ങി പോയതോണ്ട് വാള് വച്ചുള്ള അച്ഛന്റെ യുദ്ധമൊന്നും കാണാഞ്ഞതല്ലേ.. അത് വരെ മൗനം പാലിച്ച സുചിത്ര വാ തുറന്നതും വിശ്വന് കാര്യം മനസിലായി.. ഈശ്വരാ.. അപ്പൊ ഇന്നലെ കുടിച്ചത് മുഴുവൻ ഇവിടെ വന്ന് ശർദ്ധിക്കേം ചെയ്തോ.. വെറുതെയല്ല അമ്മ രാവിലെ തന്നെ ഉറഞ്ഞു തുള്ളിയത്. സുചി... ഇന്നലെ രണ്ടെണ്ണം വിട്ടു എന്നുള്ളത് ശരിയാ,അതിനാണോ നീ രാവിലെ തൊട്ട് മുഖം വീർപ്പിച്ചു നടക്കുന്നെ...ഇത് കണ്ടാൽ തോന്നും ഞാൻ ദിവസോം കുടിച്ചിട്ടാ വരുന്നതെന്ന്.. എടി ഇന്നലെ സദാനന്ദൻ ചേട്ടന്റെ മോളെ കല്ല്യാണമായിരുന്നു.ഓഫീസിൽ ഉള്ള എല്ലാവർക്കും ക്ഷണമുണ്ടായിരുന്നു.കൂടെ ഉള്ളവന്മാരെല്ലാം വെള്ളം തൊടാതെ വിഴുങ്ങുമ്പോ ഞാൻ മാത്രം എങ്ങനെയാ സുചി.. അതോണ്ട് ചെറുതൊന്ന്.. വിശ്വേട്ടൻ കുടിച്ചതിലല്ല എന്റെ പ്രശ്നം.. അമ്മ കുറ്റപെടുത്തുന്നത് മുഴുവൻ എന്നെയാ.. ഞാൻ സമാധാനം തരാഞ്ഞിട്ടാണ് വിശ്വേട്ടൻ കുടിച്ചത് എന്നും പറഞ്ഞ് അമ്മ എന്നെ എന്തൊക്കെ പറഞ്ഞു.. അല്ലെങ്കിൽ തന്നെ ഞാൻ തൊടുന്നതെല്ലാം അമ്മയ്ക്ക് കുറ്റമാ.ഇനി വിശ്വേട്ടനായി കൂടി.. കുടിക്കണ്ട എന്ന് പറയുന്നില്ല.വല്ലപ്പോഴും ആയിക്കോ.. പക്ഷേ ഇന്നലെ കയറി വന്നത് പോലെ നാലാൽ കൂടി താങ്ങി പിടിച്ചു കൊണ്ടു വരുന്നൊരു സാഹചര്യം.. അതുണ്ടാകല്ലേ വിശ്വേട്ടാ.. സുചിത്രയുടെ ആ പറച്ചിലിനു മുൻപിൽ വിശ്വൻ മറുപടിയില്ലാതെ തറഞ്ഞു നിന്നു. കുളിക്കാനായി വിശ്വൻ കുളിമുറിയിലേയ്ക്ക് കയറുമ്പോഴാണ് നന്ദൂട്ടൻ ഓടി വന്നത്.. അച്ഛാ നാനും വരുവാ കുച്ചാൻ.. നന്ദൂട്ടനെ അമ്മ കുളിപ്പിച്ചു തരുമല്ലോ.. അമ്മയ്ക്ക് കുറേ പണിയുണ്ട്.. അച്ഛൻ കുപ്പിച്ചാൽ മതി.. എന്നാ മോനിവിടെ നിക്ക്.. അച്ഛൻ പോയി ചൂട് വെള്ളം ഉണ്ടോന്ന് നോക്കട്ടെ.. വിശ്വൻ ചെല്ലുമ്പോൾ സുചിത്ര ചമ്മന്തിക്കുള്ള തേങ്ങ അരയ്ക്കാനുള്ള പുറപ്പാടിലാണ്.. എന്റെ സുചി ജാമ്പുവന്റെ കാലത്തുള്ള ആ അമ്മികല്ല് എടുത്ത് പോക്കാനുള്ള ആരോഗ്യം നിനക്കുണ്ടോ.. വിശ്വൻ അവളെ കളിയാക്കി കൊണ്ട് ചോദിച്ചു.. ഇല്ലാതെ പറ്റില്ലല്ലോ.. ആകെ ഉള്ള മിക്സി കേട് വന്നിട്ട് നന്നാക്കാനാന് പറഞ്ഞ് ഇവിടുന്ന് കൊണ്ട് പോയിട്ട് എത്ര നാളായി.. മറന്നതല്ല സുചി.. മിക്സി ഒക്കെ എന്നേ നന്നാക്കി വച്ചിട്ടുണ്ട്.. കൊടുക്കാൻ കയ്യിൽ പൈസ വേണ്ടെ.. ഈ മാസം ശമ്പളം കിട്ടുമ്പോ മറക്കാതെ അതിങ്ങു മേടിക്കാം.. അത് പോരേ.. ഇപ്പൊ എന്റെ ഭാര്യ ഇങ്ങോട്ട് മാറ്.. ഞാനരച്ചു തരാം. വേണ്ടാ.. വിശ്വേട്ടൻ പോയി കുളിക്കാൻ നോക്ക്. നീ ഇങ്ങോട്ട് മാറടി.. ഞാൻ ചെയ്യാന് പറഞ്ഞില്ലേ.. വിശ്വൻ സുചിത്രയെ പിടിച്ചു മാറ്റി അരപ്പ് തുടങ്ങി.അവന്റെ കോപ്രായം കണ്ട് സുചിത്ര ചിരിയടക്കി.. ഇവിടെ ഇളിച്ചോണ്ട് നിക്കാതെ നീ പോയി മോനെ കുളിപ്പിക്കടി.. വിശ്വൻ ചമ്മൽ മാറ്റാനായി പറഞ്ഞു.. ഉവ്വേ.. ഞാൻ പോയി.. അരപ്പ് കഴിഞ്ഞു ആ ചട്ടിണി അങ്ങ് കൂട്ടിക്കോ.. നന്ദൂട്ടനെ ഒക്കത്ത് വച്ച് പോകുന്ന പോക്കിൽ സുജിത്ര വിശ്വനോടായി വിളിച്ചു പറഞ്ഞു. ഓഹോ, കിട്ടിയ ചാൻസിൽ ആ പണി കൂടി നീയെന്റെ തലയിൽ വച്ചോ..ഇതാണ് പറയുന്നത് പെണ്ണുങ്ങളെ സഹായിക്കാൻ അടുക്കളയിൽ കയറരുതെന്ന്.. അപ്പോഴേക്കും സുചിത്ര അടുക്കളയ്ക്ക് പുറത്ത് കടന്നിരുന്നു. സുചിത്ര എൽപ്പിച്ച പണി വൃത്തിയായി ചെയ്തു തീർത്തിട്ട് വിശ്വൻ കുളിക്കാനായി ഓടി. കുളിയും കഴിഞ്ഞു വിശ്വൻ കണ്ണാടിക്ക് മുൻപിൽ നിന്ന് മുടി ചീകുമ്പോഴാണ് ശ്രീക്കുട്ടി ഉണർന്ന് കരച്ചിൽ തുടങ്ങിയത്.. സുചി... മോളുണർന്നു.. ദാ വരുന്നു വിശ്വേട്ടാ.. പിന്നാലെ തന്നെ ചട്ടിണി പുരണ്ട കയ്യുമായി സുചിത്ര ഓടി മുറിയിലെത്തി. നീ കഴിക്കായിരുന്നോ.. അല്ല. നന്ദൂട്ടന് വാരി കൊടുക്കായിരുന്നു. എന്നാ അത് കൊടുത്തിട്ടു വാ, ഞാൻ മോളെയെടുത്തോളാ. വിശ്വേട്ടന് നേരം വൈകില്ലേ.. സാരമില്ല.. അല്ലാതെ എന്താ ചെയ്യാ,മറ്റൊന്നും ചെയ്യാൻ വയ്യച്ചാൽ അമ്മയ്ക്ക് ഈ കുട്ടികളെ എങ്കിലും നോക്കി തന്നൂടെ.ഞാൻ വല്ലതും പറഞ്ഞാൽ കുറച്ചതികായി പോകും. പിന്നെ അതിന്റെ ദേഷ്യം കൂടി അമ്മ നിന്നോട് തീർക്കും.അതാ പലതും കണ്ടിട്ടും ഞാൻ കണ്ണടയ്ക്കുന്നെ.. സുചിത്ര ഒന്നും മിണ്ടാതെ അടുക്കളയിലേയ്ക്ക് പോയി. സുചി ഞാൻ ഇറങ്ങാ.. വിശ്വൻ പോകാനായി ഇറങ്ങി.സ്ഥലത്തെ വില്ലേജോഫീസിൽ ആണ് വിശ്വന് ജോലി.കുറേ നാളത്തെ ഉറക്കമൊഴിച്ചുള്ള പഠിപ്പും ടെസ്റ്റ്‌ എഴുതലുമൊക്കെയായി കിട്ടിയ ജോലിയാണ്.. വിശ്വേട്ടാ.. ഏട്ടൻ പോകുന്ന വഴി നന്ദൂട്ടനെ അംഗൻവാടിയിൽ ഒന്നാക്കുമോ.. അതിന് ഞാനിപ്പൊ ഓഫീസലേയ്ക്കല്ല സുചി.. ഒരു സൈറ്റ് കാണാനുണ്ട്.നേരെ അങ്ങോട്ടാ പോകുന്നെ.. എന്നാ ഏട്ടൻ പൊയ്ക്കോ.. ഞാൻ കൊണ്ടുപോയാക്കിക്കോളാം.. ഇനി ഈ വെയിലും കൊണ്ട് മോളേയും എടുത്ത് നീ അത്രയും ദൂരം നടക്കണ്ട. അമ്മയോട് ഞാൻ പറയാം നന്ദൂട്ടനെയൊന്ന് അംഗൻവാടിയിലേയ്ക്ക് ആക്കാൻ.. അതും കേട്ട് കൊണ്ടാണ് കടയിൽ നിന്നും വാത്സല ഇറങ്ങി വന്നത്. വിശ്വൻ പറയും മുൻപേ തന്നെ വത്സല അവനുള്ള മറുപടി കൊടുത്തു. എനിക്കെങ്ങും നേരമില്ല വിശ്വാ.ഞാൻ അയൽക്കൂട്ടത്തിനു പോകുവാ.. എവിടെയാ അമ്മേ ഇന്ന് നുണക്കൂട്ടം കൂടുന്നെ.. അവന്റെ ചോദ്യം ഇഷ്ടപ്പെടാതെ വത്സല അവനെയൊന്നു നോക്കി കൊണ്ട് പറഞ്ഞു. അമ്മിണിയുടെ വീട്ടിൽ.. നമ്മുടെ പ്രഭാകരേട്ടന്റെ അമ്മിണി ചേച്ചിയല്ലേ.. ഉം.. അംഗൻവാടി കഴിഞ്ഞല്ലേ അമ്മേ അവരെ വീട്,സുചി നീ മോനെ ഒരുക്കിയെങ്കിൽ അമ്മയ്ക്കൊപ്പം വിട്.. അത്രയും പറഞ്ഞ് വിശ്വൻ ഇറങ്ങി പോയി. വാടാ കൊച്ചനെ..എടുക്കാനൊന്നും എന്നെ കൊണ്ട് മേലാ.നടന്നോണം. വത്സല നന്ദുവിനോടായി പറഞ്ഞ് മുന്നേ നടന്നു. ശ്രീമോക്ക് നാന് മുത്തായി കൊണ്ടരാ ട്ടോ.. അവൻ കുഞ്ഞനിയത്തിയെ നോക്കി കൈവീശി.. ആ പോക്ക് നോക്കി സുചിത്ര ശ്രീകുട്ടിയെ ഒക്കത്ത് വച്ച് മുറ്റത്ത് തന്നെ നിന്നു. പാവം എന്റെ മോൻ.. അവിടം വരെ നന്ദൂട്ടനെ അമ്മ നടത്തിക്കും.. സാധാരണ വിശ്വൻ ഓഫീസിൽ പോകുന്ന വഴി നന്ദൂട്ടനെ അംഗൻവാടിയിൽ ആക്കുകയാണ് ചെയ്യാറ്.ഇന്നിപ്പൊ അവന് നേരമില്ലാത്തതിനാലാണ് ആ ജോലി വത്സലയുടെ തലയിലായത്. ആ ദേഷ്യം നന്ദൂട്ടനെ അംഗൻവാടി വരെ നടത്തി തീർക്കാൻ തന്നെ വത്സലയും മനസിൽ കണക്ക് കൂട്ടി. 🍂🍂🍂 ദല്ലാൾ ശിവൻകുട്ടി രാവിലെ ഒരു പെണ്ണ് കാണിക്കലിന് പോകാനായി ഇറങ്ങിയതായിരുന്നു.ചെന്ന് ചാടിയതോ കൃത്യം വത്സലയുടെ മുന്നിൽ.ഒന്ന് വഴി മാറി പോകാനുള്ള സമയം പോലും ശിവൻ കുട്ടിക്ക് കിട്ടിയില്ല,അപ്പോഴേക്കും വാത്സല അയാളെ കണ്ട് കഴിഞ്ഞിരുന്നു... അല്ല ആരിത്, വത്സലേച്ചിയോ.. നമ്മുടെ ലോലൻ ചേട്ടൻ വീട്ടിലില്ലിയോ.. ആളെ ഇപ്പൊ പുറത്തോട്ടൊന്നും കാണാനേ ഇല്ലല്ലോ.. ആരുണ്ടോന്നാ ശിവൻകുട്ടി നീ ചോദിച്ചേ.. അയ്യോ.. ചേച്ചി, അത് പിന്നെ നാക്കുളുക്കിയതാ.. ഗംഗാതരൻ ചേട്ടൻ.. തനിക്ക് പറ്റിയ അബദ്ധം ശിവൻകുട്ടി തിരുത്തി.. ഗംഗാതരൻ നായരെ അയാള് കേൾക്കാതെ നാട്ടുകാര് മുഴുവൻ വിളിക്കുക ലോലൻ നായരെന്നാണ്.. കാരണം ഗംഗാതരൻ നായരെ ഹൃദയം അത്ര ലോലമാണ്..ഭാര്യ വത്സല നേരെ മറിച്ചും.. അങ്ങേര് വീട്ടിലുണ്ട്.. അത്യാവശ്യത്തിന് നാട്ടിലേയ്കൊക്കെ ഇറങ്ങാറും ഉണ്ട്.അതൊക്കെ പോട്ടെ,അല്ല ശിവൻ കുട്ടി... ഇന്ന് നീ ആരെ കഴുത്തിൽ കയറിടാനാടാ പോകുന്നെ.. അതെന്നാ വർത്തമാനമാ ചേച്ചി.. ചേച്ചിക്ക് ഞാൻ വല്ല ദ്രോഹോം ചെയ്തോ.വിശ്വന് ഒരു പെണ്ണ് വേണമെന്ന് ചേച്ചി തന്നെയല്ലേ പറഞ്ഞത്.പറഞ്ഞ പോലെ നല്ല മണി മണി പോലൊരു പെങ്കൊച്ചിനെയല്ലേ ഞാൻ വിശ്വന് കാണിച്ചു കൊടുത്തത്.കണ്ടപ്പോൾ തന്നെ വിശ്വന് പെണ്ണിനെ ഇഷ്ടമാവുകയും ചെയ്തു.അവരെ കെട്ടും കഴിഞ്ഞു, പിള്ളേരും രണ്ടായി.. പിന്നെയിപ്പൊ എന്നതാ ചേച്ചി ഇങ്ങനെയൊരു വർത്തമാനം പറഞ്ഞത്. വിശ്വന് പെണ്ണ് നോക്കാൻ പറഞ്ഞപ്പൊ ഞാൻ നിന്നോട് പറഞ്ഞായിരുന്നോ സ്ത്രീധനം ഒന്നും വേണ്ടാ പെണ്ണിനെ മാത്രം മതിയെന്ന്.. അവള് ഏത് കോലത്തിലാ കെട്ടി കേറി വന്നത്.. കാതിലും കഴുത്തിലുമായി തികച്ചും അഞ്ചു പവന്റെ പൊന്നെങ്കിലും ഉണ്ടായിരുന്നോ. അതോടെ ശിവൻ കുട്ടി ഒന്ന് പരുങ്ങി.. അത് പിന്നെ ചേച്ചി.. സുചിത്രയ്ക്ക് അച്ഛനും അമ്മയും ഇല്ലല്ലോ. അവരൊക്കെ നേരത്തെ മരിച്ചു പോയില്ലേ. പിന്നെ ആകെയുള്ളത് ആ ആങ്ങള ചെക്കനല്ലേ.അവന്റേലാണേൽ വാരിക്കോരി കൊടുക്കാനും മാത്രം ഒന്നുമില്ല. ഇനി അങ്ങനെ കൊടുക്കാമെന്നു വച്ചാൽ തന്നെ അവന്റെ കെട്ടിയോള് ആ വടയക്ഷി സമ്മതിക്കത്തും ഇല്ല. ആ പെങ്കൊച്ചിന് ഒരു ജീവിതം ഉണ്ടാകട്ടെ എന്നേ ഞാൻ കരുതിയുള്ളു. വിശ്വനെ പോലെ നല്ലയൊരുത്തനാകുമ്പോൾ അതിന്റെ കണ്ണീര് കാണണ്ടല്ലോ കരുതി.. ആ അങ്ങനെ പറ... അപ്പൊ നീയെന്റെ മോനെ കൊണ്ടു പോയി ആ അറ്റമില്ലാത്ത കുഴിയിൽ കൊണ്ട് ചാടിച്ചു. അവരെ കയ്യീന് നല്ല പൈസ കിട്ടികാണും ല്ലേ.. ഒരു കാര്യം ചെയ്യ് നീ അവളെ ചേട്ടനെ കണ്ട് അവൾക്ക് കൊടുക്കാനുള്ളത് എന്താനു വച്ചാൽ കൊടുക്കാൻ പറ. എന്റെ ചേച്ചി പശുവും ചത്തു മോരിലെ പുളിയും പോയി.. ഇനി ഇപ്പോഴാണോ സ്ത്രീധനവും ചോദിച്ചു ചെല്ലുന്നേ.. അങ്ങനെ പറഞ്ഞ് നീയതങ്ങ് തള്ളി കളയല്ലേ ശിവൻകുട്ടി.. എന്റെ മോള് പ്രവിതയെ കെട്ടിച്ചപ്പോ ഞാൻ നല്ലോണം കാശും സ്വർണ്ണവും കൊടുത്തു.അങ്ങനെ വേണം പെണ്മക്കളെ കെട്ടിച്ചു വിടാൻ.. ഇത് പണ്ടെങ്ങാണ്ടാരോ പറഞ്ഞ പോലെ പിറന്ന പടി പറഞ്ഞയച്ചേക്കുവാ.. ചേച്ചീടെ മോളെ കെട്ടിച്ചപ്പോ സ്ത്രീധനം കൊടുത്തെങ്കി അത് ഉള്ള വീട് വിറ്റല്ലേ ചെയ്തേ.. അത് കൊണ്ടിപ്പോ നിങ്ങൾക്ക് വാടക വീട്ടിൽ കഴിയേണ്ട ഗതിയായില്ലേ.. വല്ല കാര്യവും ഉണ്ടായിരുന്നോ.. പിന്നെ ചേച്ചിയെ ഇപ്പൊ പഴയ കാലമൊന്നുമല്ല കേട്ടോ.. സ്ത്രീധനം വാങ്ങുന്നതും കൊടുക്കുന്നതും ഒക്കെ തെറ്റാ.അറിഞ്ഞാൽ വല്ല്യ കേസാ.. ശിവൻകുട്ടിയുടെ ആ പറച്ചിലിൽ വത്സല ഒന്നടങ്ങി.. എന്തെങ്കിലും ആകട്ടെ.. ഞങ്ങളെയോ ഇങ്ങനെ ഒരു ചതിയിൽ നീ പെടുത്തി.. നീയിനി ആരെ മണ്ടയ്ക്കും ഇത് പോലെയുള്ള മുടക്കാ ചരക്കിനെയൊന്നും കെട്ടിവയ്ക്കല്ലേ ശിവൻ കുട്ടി... അത്രയും പറഞ്ഞ് വത്സല നടന്നു നീങ്ങി.. ആ പോക്ക് നോക്കി ശിവൻകുട്ടി നെടുവീർപ്പിട്ടു.. വല്ലാത്തൊരു ജന്മം.. ഇതിന്റെ കയ്യിലോട്ടാണല്ലോ ഞാൻ ആ തങ്കം പോലുള്ള ആ കൊച്ചിനെ കൊണ്ടു കൊടുത്തേ.. അതിന്റെ പ്രാക്ക് എന്റെ മേൽ വീഴാതെ നീ എന്നെ കാത്തോണെ ഭഗവതി.. മനസ്സറിഞ്ഞൊന്നു പ്രാർത്ഥിച്ചു കൊണ്ട് ശിവൻകുട്ടി റോഡ് മുറിച്ചു കടന്നു പോയി. 📖 കഥയുടെ ബാക്കി ഭാഗങ്ങൾ ഇവിടെ വായിക്കാം: 👉 https://share.aksharathalukal.in/s/51140/view വായിച്ചിട്ട് അഭിപ്രായം പറയണേ 🥰 #💞 പ്രണയകഥകൾ #📔 കഥ #📙 നോവൽ