"എന്നാലും എന്റെ മോൾക്ക് ഇത് പോലെയൊക്കെ വന്നല്ലോ എന്റെ ഭഗവതി... എന്റെ കുഞ്ഞ് എന്ത് തെറ്റ് ചെയ്തിട്ടാ... അറിഞ്ഞു കൊണ്ട് ആരേം ദ്രോഹിച്ചിട്ടില്ല എന്റെ മോള്... എന്നിട്ടും എന്റെ മോളോട് ഈ ചതി വേണായിരുന്നോ ഈശ്വരാ..." അറിയാവുന്ന ദൈവങ്ങളെയെല്ലാം വിളിച്ചു അവർ കരയുമ്പോൾ അതൊന്നും കേൾക്കാനോ കാണാനോ ഉള്ള ശക്തിയില്ലാതെ അവൾ ചുവരും ചാരി ഇരുന്നു കണ്ണീർ വാർത്തു... "ഗംഗ ലക്ഷ്മി .." അരക്കൊപ്പം ഉള്ള അവളുടെ മുടിയിഴകൾ നിലത്ത് പരന്നു കിടന്നിരുന്നു... അവ കെട്ടി വെക്കാതെ അവളുടെ മുഖത്ത് ചിതറി കിടന്നിരുന്നു... അലസമായിരുന്നു അവളുടെ വേഷം... കണ്ണുനീർ അവളുടെ കവിളുകളെ നനച്ചു കൊണ്ട് ധാരധാരയായി ഒഴുകി... ചുണ്ടുകൾ വിതുമ്പി പോയവൾ മുഖം താഴ്ത്തിയിരുന്നു പൊട്ടിക്കരഞ്ഞു.... ശിക്ഷയാണ്... അമ്മയെയും അച്ഛനെയും നോവിച്ചതിനുള്ള ശിക്ഷ.. അവരുടെ കണ്ണുനീരിനുള്ള ശിക്ഷ... അല്ല... അവരെ മാത്രം അല്ലല്ലോ... താൻ വേദനിപ്പിച്ച മറ്റൊരാൾ കൂടിയില്ലേ... ആ ആളുടെ വേദന , കണ്ണുനീർ... അതിനും കൂടിയുള്ള ശിക്ഷയാണ്... എല്ലാവരെയും വേദനിപ്പിച്ചു സന്തോഷിച്ചതിന് ദൈവം തനിക്ക് തന്ന ശിക്ഷ..... അത്‌ താൻ അനുഭവിച്ചേ തീരൂ...... അവളുടെ കണ്ണുനീരിന് അകമ്പടി പോലെ ആ വീടിന് പുറത്ത് മഴ തിമിർത്തു പെയ്യുന്നുണ്ടായിരുന്നു... ആർത്തിരമ്പുന്ന അവളുടെ മനസ്സിന്റെ വേദന കൂട്ടാൻ മാത്രമേ ആ മഴയ്ക്ക് കഴിഞ്ഞുള്ളൂ.... കൂടി വരുന്ന maxha കാണും തോറും ഭയം നിറഞ്ഞു നിന്നു അവളിൽ... ************************* തുള്ളിക്കൊരു കുടം പെയ്യുന്ന പോലെ മഴയാണ് പുറത്ത്... ഓടിട്ട വീടിന്റെ അകത്തും അടുക്കളയിലും രണ്ട് കുഞ്ഞ് മുറി ഉള്ളതിലും എല്ലാം പാത്രങ്ങൾ വെച്ചിട്ടുണ്ട്.... ഓട് പൊട്ടി ചോരുന്ന വെള്ളം തറയിൽ പരക്കാതിരിക്കാനായിട്ടാണ് .... എന്നിട്ടും പരക്കുന്ന വെള്ളം ചണ ചാക്കിന്റെ കഷണങ്ങൾ ഇട്ടു തടഞ്ഞിട്ടുണ്ട്.... പുറത്ത് നല്ല മഴയുണ്ട്... ഇരുട്ടും കാറ്റും.. മരങ്ങളൊക്കെ ആടിയൂലയുന്നു... ഇറയത്തേക്ക് ഒന്നിറങ്ങി നിന്ന് ആധിയോടെ പുറത്തേക്ക് നോക്കി അവർ ... കുറച്ചകലെ മലനിരകളിൽ തോരാത്ത മഴ കാണാം.... "ഈ ചെക്കനിത് എവിടെ പോയി കിടക്കാ... മഴ കാണുമ്പോ എങ്കിലും ഇങ്ങോട്ട് പോന്നൂടെ...." പിറുപിറുക്കും പോലെയാണ് പറച്ചിൽ... ഇരുട്ടിനു കനം വെച്ചതും അവരുടെ ഭയവും കൂടി.... ഉമ്മറത്തു തന്നെ ഇരുന്ന അവർ ഉണർന്നത് അടുത്തു വരുന്ന ഒരു ബൈക്കിന്റെ ശബ്ദം കേട്ടാണ്... നനഞ്ഞു കുതിർന്നു ബൈക്കിൽ ഇരിക്കുന്നവനെ കാണെ അവരുടെ മുഖത്ത് അരിശം കയറിയിരുന്നു... ബൈക്ക് ടാർപോളിൻ ഷീറ്റ് വലിച്ചു കെട്ടി ഉണ്ടാക്കിയ ഷെഡിലേക്ക് കേറ്റി ഇട്ടിട്ട് കുസൃതി നിറഞ്ഞൊരു ചിരിയോടെ അവൻ അകത്തേക്ക് കേറി വന്നു അവരെ ചേർത്ത് പിടിച്ചു... "അമ്മക്കുട്ടി പിണങ്ങിയോ.." "ദേ ചെറുക്കാ... ഇത്രേം നേരം എവിടായിരുന്നു... ഞാനിവിടെ ഒറ്റക്കല്ലേ... നിന്നോട് ഇരുട്ടും മുൻപേ എത്തണംന്ന് പറഞ്ഞിട്ടില്ലേ ഞാൻ..." "ശെടാ... അതാണോ ഇപ്പോ കാര്യം.. ഇക്കണക്കിനു ഞാൻ ജോലിക്ക് പോയി തുടങ്ങിയാൽ എന്റെ അമ്മ എന്തു ചെയ്യും.." "അത്‌ അപ്പോ അല്ലേ.. ഇപ്പോ നിനക്ക് പണിയെന്താ... കളിക്കാൻ പോയാല് ഒരു കണ്ണും മൂക്കും ഇല്ല... നേരം ഇരുട്ടാവണതോ മഴ വരണതോ ഒന്നും ഇല്ല.." "കുറച്ചു നാളും കൂടെയല്ലേ അമ്മേ.. എന്റെ റിസൾട്ട്‌ ഒന്ന് വന്നോട്ടെ... അതുവരെ.. " "ഉവ്വ... കൊട്ടക്കണക്കിന് മാർക്ക്‌ വാങ്ങുവല്ലോ നീ.." "കൊട്ടക്കണക്കിന് മാർക്കൊന്നും ഉണ്ടാവില്ല.. എന്നാലും ജയിക്കും.. പിന്നെ വല്യേ ഉദ്യോഗം ഒന്നും കിട്ടിയില്ലെങ്കിലും എന്റെ അമ്മയെ പൊന്ന് പോലെ നോക്കാൻ ഒരു ജോലി ഞാൻ സംഘടിപ്പിക്കുന്നുണ്ട്." "അതെന്ത് ജോലി... " "രഘുവേട്ടനോട് പറഞ്ഞിട്ടുണ്ട് ഞാൻ..." "ഏത്... നമ്മടെ വടക്കേലെ..." "ആ... അത്‌ തന്നെ...." "അതിന് അവൻ ഏതോ ബസില് ഡ്രൈവർ അല്ലേ..." മ്... "അവനോട് എന്ത് പറയാൻ..." "രഘുവേട്ടന്റെ മുതലാളീടെ ഏതെങ്കിലും വണ്ടീല് ഡ്രൈവർ ആയിട്ട് എനിക്കും ഒരു ജോലി വാങ്ങിച്ചു തരാൻ..." "അതൊക്കെ നിന്നെ കൊണ്ട് പറ്റുവോ മനുട്ടാ..." "നമ്മളെ കൊണ്ട്പ റ്റാത്തത് പറ്റും എന്ന് തെളിയിക്കണ്ടേ... അതിലല്ലേ ഒരു ത്രില്ലുള്ളൂ..." "നിന്റെ ത്രില്ല്... എന്തായാലും വേണ്ടില്ല... ഒരു ജോലി വേഗം നോക്കണം.. അച്ഛനെ കൊണ്ട് എത്രയെന്നു വെച്ചിട്ടാ... തീരെ വയ്യ ആ മനുഷ്യന്.." "മ്... അച്ഛനെന്തേ..." "വന്നപ്പോ മുതല് കിടക്കാ... തീരെ വയ്യെന്ന്.... പനിക്കോളും കാണുന്നുണ്ട്...." "വയ്യെങ്കിൽ നാളെ പണിക്ക് പോണ്ടെന്ന് പറയ്‌ അമ്മേ.... ഹോസ്പിറ്റലിൽ പോവാം..." "അതിന് കാശെവിടെ... അച്ഛന് ഈ പോയ പണീടെ കൂലി കിട്ടീട്ടില്ല... അവരെന്തോ മുടക്ക് പറഞ്ഞു..." "സാരല്ല... എന്റേല് കുറച്ചു കാശ് ഇരിപ്പുണ്ട്.. കഴിഞ്ഞയാഴ്ച കാറ്ററിംഗിന് പോയപ്പോ കിട്ടിയതാ.. കുറച്ചു കൂട്ടി വെച്ച പൈസേം കാണണം." "അതൊന്നും വേണ്ടെടാ... നീ ഷർട്ടും പാന്റും വാങ്ങിക്കാൻ വെച്ച കാശല്ലേ... അച്ഛനെ ഗവണ്മെന്റ് ഹോസ്പിറ്റലിൽ കൊണ്ട് പോവാം... അതാവുമ്പോ അത്രേം കാശ് ആവൂല.. പുറത്തുന്നു മരുന്ന് എഴുതിയാല് മാത്രേ പ്രശ്നം ഉളളൂ..." "മ്... എന്താന്ന് വെച്ചാ ചെയ്യ്.. ഞാനീ ഡ്രെസ്സൊക്കെ ഒന്ന് മാറട്ടെ.." അതും പറഞ്ഞു അകത്തേക്ക് പോയവന്റെ കണ്ണുകൾ അച്ഛന്റെ മുറിയുടെ നേർക്ക് നീണ്ടു... കട്ടിലിൽ പുതച്ചു മൂടി കിടക്കുന്ന അച്ഛനെ കണ്ടു ചങ്ക് പിടഞ്ഞു.... പിറ്റേന്ന് രാവിലേ അച്ഛനെയും കൊണ്ട് അമ്മ ഹോസ്പിറ്റലിൽ പോകുമ്പോൾ മനു കൊടുത്ത കാശ് അവരുടെ കയ്യിൽ ഉണ്ടായിരുന്നു... അവൻ അവരെ നിർബന്ധിച്ചു ഏൽപ്പിച്ചത്.... "ലെച്ചൂട്ടി... മഴ വരുമ്പോ ആ തുണികള് എടുത്ത് അകത്തിടണേ..." അച്ഛന്റെ ബൈക്കിന്റെ പുറകിൽ കേറി ഇരുന്നു അമ്മ പറയെ ലെച്ചു മടിയോടെ തലയാട്ടി... "മടിച്ചി... പറഞ്ഞ കാര്യം ചെയ്യണം ട്ടോ... അലക്കിയിട്ടത് നനയ്ക്കരുത്..." "ഓ.. ചെയ്യാമെന്റെ അമ്മേ.. നിങ്ങള് പോയിട്ട് വേഗം വരൂലേ..." "വരാം... അത്‌ വരെ ഡോർ അടച്ചിട്ടു ഇരുന്നേക്ക്.... ആര് വന്നാലും തുറക്കണ്ട..." "ഇല്ലെന്നേ... " "മഴ വന്നാല് തുണികള് എടുത്തിട്ട് വേഗം അകത്തു കേറി കുറ്റിയിട്ട് ഇരുന്നോ..." "ശെരിയെന്റെ അമ്മേ... " ചിരിയോടെ പറഞ്ഞു കൊണ്ട് വാതിൽ അടച്ചു ഇരിക്കുമ്പോൾ അച്ഛനും അമ്മയും പോകുന്ന ശബ്ദം കേട്ടു.... വിനോദ് - പാർവതി ദമ്പതികളുടെ രണ്ട് മക്കളിൽ മൂത്തവളാണ് ലെച്ചു എന്ന ഗംഗ ലക്ഷ്മി... പ്ലസ് ടു വിന് പഠിക്കുന്നു... രണ്ടാമത്തേത് പെണ്ണ് തന്നെ.. ഗൗരി നന്ദ.... രണ്ട് വയസ്സിന്റെ വ്യത്യാസം മാത്രം... അവളിപ്പോ പത്തിൽ ആണ്... അങ്ങനെ ഇക്കൊല്ലത്തെ വീട്ടുകാരുടെ ഫുൾ എ പ്ലസ് പ്രതീക്ഷയാണ് ലെച്ചു മോളും നന്ദു മോളും.... അച്ഛന്റെയും അമ്മയുടെയും വീട്ടുകാരുടെയും ലെച്ചു മോള് സ്കൂളിൽ കൂട്ടുകാരികൾക്ക് ഗംഗ... ആൺകുട്ടികൾ സുരേഷ് ഗോപിയുടെ നകുലന്റെ സ്റ്റൈലിൽ ഗംഗേ എന്ന് വിളിച്ചു കളിയാക്കുന്ന ഗംഗ... യേശുദാസ് സ്റ്റൈലിൽ ഗംഗേ എന്ന് നീട്ടി വിളിക്കുന്ന ഗംഗ.... പെണ്ണിന് പെട്ടെന്നാണ് ദേഷ്യം വരുന്നത്.. കളിയാക്കുന്നവന്റെ നേരെ തുറിച്ചു നോക്കി പ്രതിഷേധം പ്രകടിപ്പിക്കുമെങ്കിലും കാര്യം ഒന്നും ഇല്ല.. പിള്ളേര് അവളെ ചൊറിയാൻ ഇത് തുടർന്നു കൊണ്ടേ ഇരിക്കും... അമ്മേം അച്ഛനും നന്ദുവും പോയതും ഗംഗക്ക് ഒരു ഒറ്റപ്പെടൽ ഫീൽ ചെയ്തു... നന്ദുവിന് സ്പെഷ്യൽ ക്ലാസ് ആണ്.. അമ്മയ്ക്കും അച്ഛനും ഒരു കല്യാണം ഉണ്ട്... എക്സാം നടക്കുന്നത് കൊണ്ട് തനിക്ക് പോവാൻ പറ്റിയില്ല... അല്ല.. കല്യാണത്തിനൊന്നും പോവാൻ ഒരു താല്പര്യവും ഇല്ല.. അമ്മയെക്കാളും പൊക്കം വെച്ച തന്നെ കാണുമ്പോ എല്ലാർക്കും ഒരു പറച്ചിലാ... പാറു... മോള് നിന്നെക്കാളും വലുതായി... കെട്ടിക്കാറായീലോ എന്ന്.... പിന്നെ.. ഞാനിവിടെ പുര നിറഞ്ഞു നിൽക്കുവല്ലേ... പതിനേഴു വയസ്സേ ആയിട്ടുള്ളു... അപ്പോഴാ ഓരോരുത്തർക്ക്... ഹും..... ടീവിയും ഓണാക്കി പാട്ടും വെച്ച് ചിപ്സ് കഴിച്ചു കൊണ്ട് ഇരിക്കുമ്പോ വീടിന്റെ മുന്നിലുള്ള പറമ്പിലെ ഗ്രൗണ്ടിൽ നിന്ന് ആർപ്പും വിളിയും കേൾക്കുന്നുണ്ട്... ക്രിക്കറ്റോ ഫുട്ബോളോ കളിക്കുന്നതാ ഏതോ ചെറുക്കന്മാര്.... കുറെ ഉണ്ടാവും... വേറെ എവിടെന്നോ ഒക്കെ വരുന്ന കുറെ എണ്ണം... ആ ഭാഗത്തേക്ക്‌ നോക്കി പോവരുതെന്നാ അമ്മയുടേം അച്ഛന്റേം ഓർഡർ... പക്ഷേ ഞാൻ നോക്കും.. ഒളിഞ്ഞു നോക്കും.. എനിക്കും വേണ്ടേ എന്തെങ്കിലും ഒക്കെ എന്റർടൈൻമെന്റ്... എനിക്ക് മാത്രല്ല.. നന്ദൂനും ആ പണിയുണ്ട്... ഞങ്ങടെ വായ്നോട്ടം അസ്സലായി മുന്നോട്ട് പൊയ്കൊണ്ടേ ഇരുന്നു.... ആരും അറിയാതെ.... മഴ പെയ്യല്ലേ എന്നായിരുന്നു മനസ്സില്... തുണികള് എടുക്കാൻ ഓടണ്ടേ... പക്ഷേ മഴ ചതിച്ചു... TV കണ്ടു കൊണ്ട് ഇരിക്കുകയായിരുന്ന ലെച്ചുവിനെ വെറുതെ ഇരുത്തരുത് എന്നായിരുന്നു മുകളിലുള്ള ആൾടെ തീരുമാനമേ .... ചറപറാ പെയ്യുന്ന മഴയെ ശപിച്ചു കൊണ്ട് അവൾ മുറ്റത്തേക്ക് ഓടി... തുണികൾ വലിച്ചു കയ്യിലേക്ക് ഇടുമ്പോഴേക്കും മഴ കൂടിയിരുന്നു... ഗ്രൗണ്ടിലെ ചെക്കന്മാർ എങ്ങോട്ടോ ഒക്കെ പായുന്നത് അവൾ കണ്ടിരുന്നു.... അങ്ങോട്ട് നോക്കി തുണികൾ എടുത്തത് കൊണ്ടാണോ എന്തോ ചെളിയിൽ ചവിട്ടി സ്ലിപ് ആയത്... അമ്മേ.... നടുവും തല്ലി വീണപ്പോൾ അമ്മയെ വിളിച്ചു പോയി.... കേൾക്കാൻ അമ്മയെവിടെ... കയ്യിലുള്ള തുണികൾ മൊത്തം മുറ്റത്തു വീണു ചെളി പടർന്നു... അമ്മയുടെ അടുക്കൽ നിന്ന് അടി കിട്ടുവല്ലോ എന്നോർത്തു വല്ലാതെ വെപ്രാളം കൂടി.... ചാടി എഴുന്നേൽക്കാൻ നോക്കുമ്പോ പറ്റുന്നില്ല... കാല് ഉളുക്കിയെന്ന് തോന്നുന്നു... അവിടെയിരുന്നു ആ മഴ മുഴുവൻ കൊള്ളേണ്ടി വന്നു... അലക്കിയ തുണികള് മുഴുവൻ നനഞ്ഞു കുതിർന്നു... സങ്കടം കൊണ്ട് ചുണ്ട് വിതുമ്പി പോയി... കാലും അനക്കാൻ വയ്യ പോരാത്തതിന് തുണികള് ചീത്തയാക്കിയതിനു അമ്മയുടെ അടുത്തുന്നു തല്ലും കിട്ടും.. എഴുന്നേൽക്കാൻ നോക്കുമ്പോ കാലിനു നല്ല വേദന... എന്നിട്ടും പതിയെ എഴുന്നേറ്റ് നിന്ന് നോക്കിയതും ഒരടി പോലും നടക്കാൻ വയ്യ... പതിയെ അടി അടി വെച്ച് നടക്കുമ്പോഴാണ് പുറകിൽ നിന്ന് ഒരു ശബ്ദം കേട്ടത്... "എന്ത്പറ്റി കൊച്ചേ..." തിരിഞ്ഞു നോക്കിയപ്പോൾ കണ്ടത് ഒരു ചേട്ടനെ... ഗ്രൗണ്ടിൽ കളിക്കാൻ വന്നതെങ്ങണ്ടാ.. ജഴ്‌സിയാണ് ഇട്ടിരിക്കുന്നെ... അത്യാവശ്യം പൊക്കം ഒക്കെയുണ്ട്.. ഇരു നിറമാണ്... ആളും നിന്ന് നനയുന്നുണ്ട്... കണ്ടപ്പോ പക്ഷേ പേടിയാണ് തോന്നിയത്... വീട്ടില് ആരൂല്ലാത്ത നേരത്ത് പെൺകുട്ടികളെ ഉപദ്രവിക്കാൻ വരുന്ന ന്യൂസ്‌ ഒക്കെ കാണുന്നത് കൊണ്ടുള്ള പേടി.... ഒന്നുമില്ലെന്ന് പറഞ്ഞു നടക്കാൻ നോക്കിയപ്പോഴേക്കും വേദന കൊണ്ട് ഒച്ചയിട്ട് പോയിരുന്നു... ആ ചേട്ടൻ ഓടി വരുന്നത് കണ്ടു ആലില പോലെ വിറയ്ക്കാൻ തുടങ്ങിയിരുന്നു അവൾ.... "എന്ത് പറ്റിയതാ..." മുന്നിൽ നിന്ന് വീണ്ടും ചോദിച്ചപ്പോൾ അവൾ മുഖം താഴ്ത്തി... "തെന്നി വീണതാ .. കാല് ഉളുക്കി..." "ആണോ..." അതും പറഞ്ഞു അവളുടെ പുറകിലേക്ക് നോക്കിയപ്പോൾ നനഞ്ഞു ചെളി പുരണ്ടു കിടക്കുന്ന തുണികൾ കണ്ടു അവൻ... "ഡ്രസ്സ്‌ എടുത്തിട്ട് ഓടിയോ താൻ.." "മ്... മഴ കണ്ടപ്പോ.. " "വീട്ടില് ആരും ഇല്ലേ... ആരെയെങ്കിലും സഹായത്തിനു വിളിച്ചൂടായിരുന്നോ..." "ആരും ഇല്ല... കല്യാണത്തിന് പോയി അച്ഛനും അമ്മേം..." പേടിയോടെയാണ് അത്‌ പറഞ്ഞത്... "ആഹാ... ഒരു പെങ്കൊച്ചിനെ വീട്ടില് ഒറ്റക്കിട്ടിട്ട് വീട്ടുകാരൊക്കെ കല്യാണം കൂടാൻ പോയോ... അത്‌ കൊള്ളാം.. നല്ല ധൈര്യം.... താൻ വാ... ഞാൻ പിടിക്കാം... വീടിന്റെ ഉള്ളിലേക്ക് നടന്നോ..." 😳... "ഏഹ്.. വേണ്ട..." "വേണ്ടേ... പിന്നെ അമ്മയൊക്കെ വരും വരെ ഇവിടെ നിന്ന് മഴ കൊള്ളാനാണോ..." "അല്ല.. ഞാൻ.. ഞാൻ തനിയെ പൊക്കോളാം..." "ഈ കാലും വെച്ചോ.." "അത്‌.. അത്‌ കൊഴപ്പില്ല...." "എന്തെ... ഞാൻ വല്ലതും ചെയ്യുമെന്ന് പേടിച്ചിട്ടാണോ..." മനസ്സിലുള്ളത് അവൻ പറയുന്നത് കേട്ട് മുഖം ഉയർത്തി നോക്കിയപ്പോൾ നെഞ്ചിൽ കയ്യും കെട്ടി തന്നെ ഗൗരവത്തോടെ നോക്കി നിൽക്കുന്ന ആളെയാണ് കാണുന്നത് ... "അല്ല.. അതല്ല..." "ഹ്മ്മ്.. മനസ്സിലായി.. എനിക്കെ അമ്മേം പെങ്ങളും ഒക്കെ ഉള്ളതാ കൊച്ചേ.. വന്നേ.. ഇവിടെ നിന്നിങ്ങനെ മഴ കൊള്ളണ്ട...." മറുത്തു പറയും മുൻപേ തന്നെ അവളുടെ കയ്യിൽ പിടിച്ചു കഴിഞ്ഞിരുന്നു അവൻ ... ദേഹത്തു ഷോക്ക് അടിക്കുന്നത് പോലെയാണ് അവൾക്ക് തോന്നിയത്... തുറിച്ചു നോക്കിയപ്പോഴേക്കും അവളെ ഇരു കയ്യിലുമായി ഉയർത്തി എടുത്തിരുന്നു അവൻ..." "യ്യോ... വിട്... എന്നെ ഒന്നും ചെയ്യല്ലേ..." അവൾ ഒച്ചയിട്ടതിന് മറുപടി കിട്ടിയത് ഒരു തുറിച്ചു നോട്ടം.. "എനിക്ക് പേടിയാ..." അതിനും മറുപടി കിട്ടിയില്ല... അവളെയും കൊണ്ട് വീടിന്റെ അകത്തേക്ക് കേറി കസേരയിലേക്ക് ഇരുത്തി കൊടുത്തു അവൻ... ദൈവമേ... ഇയാള് ഇപ്പോ ഡോർ കുറ്റിയിടോ... എനിക്ക് ഓടാനും കൂടെ വയ്യല്ലോ എന്റെ ദേവി.... ഞാനെങ്ങനെ രക്ഷപ്പെടും... വിറയലോടെ ആലോചിക്കുമ്പോൾ അവൻ ചുറ്റും നോക്കുന്നതാണ് കണ്ടത്... "ഇവിടെ ബാം വല്ലോം ഇരിപ്പുണ്ടോ.." "ആവോ.. എനിക്കറിയില്ല..." "ഇത് തന്റെ വീടല്ലേ..." "അതേലോ... എന്തെ..." "ഒന്നുല്ലെന്റെ കൊച്ചേ... തോർത്ത് എവിടെയാ ഉള്ളെ..." "എന്റെ മുറീല്.." "ഏതാ തന്റെ മുറി..." മുറിക്ക് നേരെ ചൂണ്ടി കാട്ടിയതും അവൻ അങ്ങോട്ട് കേറുന്നത് കണ്ടു.... തിരിച്ചിറങ്ങിയത് തോർത്തും കൊണ്ട്... "ഇന്നാ ദേ തല തുവർത്തിക്കോ.. പനി പിടിക്കണ്ട...." കയ്യിലേക്ക് വെച്ച് തന്നു ആള് പുറത്തേക്ക് ഇറങ്ങി പോയി... അന്തം വിട്ടു ഇരുന്നപ്പോൾ അവൻ വീണ്ടും കേറി വന്നു നനഞ്ഞ തുണികളും കൊണ്ട്... എന്നിട്ടത് ഒരു കസേരയിലേക്ക് ഇട്ടു.. "തുണിയില് ചെളിയൊക്കെ പറ്റിട്ടുണ്ട്... അമ്മയോട് പറഞ്ഞാ മതി വീണുന്ന്... അമ്മ തല്ലില്ല..." മ്... "അവര് എപ്പോ വരും..." "കുറച്ചു കഴിയുമ്പോ...." "മ്... എന്നാ ഞാൻ പോട്ടെ... ഒറ്റയ്ക്ക് ഇരിക്കുവോ..." "ഇരുന്നോളാം ..." "പേടിയില്ലേ... " "ഇല്ല... " "എങ്കിൽ ok.... " അതും പറഞ്ഞു വാതിൽക്കൽ വരെ പോയവൻ തിരിഞ്ഞോന്ന് നോക്കി... "അതേയ്... തന്റെ പേരെന്താ.. " "ഗംഗാ ലക്ഷ്മി..." തലയൊന്നാട്ടി പുറത്തേക്ക് കടന്നു അവൻ... "അതേയ്... ചേട്ടന്റെ പേരെന്താ..." അവനൊന്നു നിന്നിട്ട് വീണ്ടും തിരിഞ്ഞു... "അറിഞ്ഞിട്ട് എന്തിനാ..." അവൻ ചോദിച്ചതും അവൾ കൂർപ്പിച്ചു നോക്കി... അവന്റെ ചുണ്ടിലൊരു ചിരി മിന്നി മാഞ്ഞ് പോയത് അവൾ കണ്ടു.... "അഭിമന്യു......" അതും പറഞ്ഞു പുറത്തേക്ക് ഇറങ്ങി പോയ അവനെ നോക്കി ഇരിക്കുമ്പോൾ അവളുടെ ചുണ്ടിൽ പുഞ്ചിരി വിടർന്നിരുന്നു..... എന്റെ ഈശ്വരാ... ഇനീം ഞാനിതൊക്കെ അലക്കണോല്ലോ... എങ്ങനെ കഴുകി വെച്ച തുണികളാ.. എത്ര നേരമിട്ട് അലക്കിയാലാ ഇനി ഇതൊന്ന് വെളുപ്പിച്ചു കിട്ടാ... അമ്മയുടെ പതം പറച്ചില് കേട്ടപ്പോ വിഷമം തോന്നി... എങ്ങനെയാ... കണ്ണും മൂക്കും ഇല്ലാതെയല്ലേ നടത്തം... അവൾക്കവിടെ ഇരുന്നാ മതീലോ... ബാക്കിയുള്ളോര് ഉണ്ടല്ലോ ഇവിടെ ഓരോന്ന് ചെയ്യാൻ... ഒറ്റയൊരെണ്ണത്തിനെ ഒരു സഹായത്തിന് കിട്ടില്ല... ഒരു വാഷിംഗ്‌ മെഷീൻ വാങ്ങി തരാൻ പറഞ്ഞിട്ട് അത്‌ കേൾക്കുവോ... അച്ഛനും മക്കളും ഒക്കെ കണക്കാ.. ഞാനിവിടെ കിടന്നു പണിയെടുത്തു ചാവേ ഉളളൂ... അമ്മയുടെ ബഹളങ്ങൾ ഒന്നും കേൾക്കാത്ത പോലെ ഇരുന്നു ഗംഗ.... വിഷമം ഉണ്ട്.. താൻ കാരണം അല്ലേ അമ്മയ്ക്ക് വീണ്ടും പണി ആയെ എന്നോർക്കുമ്പോൾ സങ്കടം.. പക്ഷേ എന്ത് ചെയ്യാൻ... ഒന്ന് സഹായിക്കാൻ ചെല്ലാനായിട്ട് കാല് അനക്കാൻ പറ്റുന്നില്ല.. അച്ഛന് പിന്നെ എന്ത് കേട്ടാലും ഒരു കുലുക്കവും ഇല്ല..... പാവം അമ്മ... ആ ചേട്ടൻ പോയി കഴിഞ്ഞപ്പോഴാ നന്ദു വന്നത്.. എന്ത് പറ്റി ലെച്ചു എന്നും ചോദിച്ചാ അവള് ഓടി വന്നേ.. അവള് തന്നെയാ ബാമും പുരട്ടി തന്നേ... എന്നിട്ട് എന്നെ കുറെ ചീത്തയും പറഞ്ഞു... അവളുടെ ഭാവം കണ്ടാൽ അവളാ എന്റെ ചേച്ചി എന്ന് തോന്നും.... പ്രായത്തിന്റെ വ്യത്യാസം അധികം ഇല്ലല്ലോ.. അതോണ്ട് അവളെന്നെ ചേച്ചി എന്ന് വിളിക്കാറ് പോലും ഇല്ല... ആ ചേട്ടൻ എടുത്തോണ്ട് വന്നതൊന്നും ഞാൻ അവളോട് പറഞ്ഞില്ല.... ചീത്ത പറഞ്ഞാലോ... ആരാ ഏതാ എന്നൊന്നും അറിയാത്ത ആളല്ലേ... അവരൊക്കെ പേടിച്ച് പോവും... അമ്മ വന്നപ്പോ ഒരു ബഹളം ആയിരുന്നു... നോക്കി നടക്കണ്ടേന്ന് പറഞ്ഞിട്ട്.. ഗ്രൗണ്ടിലേക്ക് വായി നോക്കാൻ നിന്നത് കൊണ്ടാ വീണതെന്ന് പറയാൻ പറ്റില്ലല്ലോ... അമ്മ ചൂട് പിടിച്ചു തന്നു... ഡോക്ടറുടെ പോവാണോന്ന് ചോദിച്ചപ്പോ വേണ്ടെന്ന് പറഞ്ഞു ഞാൻ... എടീ നന്ദു... എണീറ്റ് വന്നു ചോറ് തിന്നുന്നുണ്ടോ... ഒക്കെത്തിനും പിന്നിലൂടെ നടന്നു പറഞ്ഞിട്ട് വേണം.. നന്ദുവിനെ ഒച്ചയിട്ട് അമ്മ വിളിക്കുന്നത് കേട്ടാ ഓരോന്ന് ചിന്തിക്കുന്നത് ഞാൻ നിർത്തിയത്.... അമ്മ തന്നേ എനിക്കുള്ള ചോറും കൊണ്ട് മുറിയിലേക്ക് വന്നു... തൈലം പുരട്ടി ഇരിക്കുന്നത് കൊണ്ട് നിലത്തേക്ക് ഇറങ്ങി പോവരുതെന്നായിരുന്നു അമ്മയുടെ ഓർഡർ.... നേരത്തെ അമ്മയുടെ പരാതി പറച്ചില് കേട്ട് പതുക്കെ എഴുന്നേറ്റ് ചെന്നതാ... കണ്ണ് പൊട്ടുന്ന ചീത്ത പറഞ്ഞു അമ്മ പോയി കിടക്കാൻ പറഞ്ഞിട്ട്.... കിടക്കാൻ നേരം അച്ഛനും വന്നു ശ്രദ്ധിക്കണ്ടേ ലെച്ചൂട്ടി എന്നും പറഞ്ഞു ആശ്വസിപ്പിച്ചു.. അച്ഛൻ എപ്പോഴും ഇങ്ങനെയാ.. അമ്മ എത്ര ഒച്ചയിട്ടാലും നെവർ മൈൻഡ്.. ഞങ്ങള് മക്കളോട് സ്നേഹവും... അച്ഛന് അമ്മയെ ഇഷ്ടമില്ലാതെയല്ല.. മൗനം വിദ്വാന് ഭൂഷണം എന്ന് കേട്ടിട്ടില്ലേ.... എന്നാല് ഈ അച്ഛന് അമ്മയ്ക്ക് ഒരു വാഷിംഗ്‌ മെഷീൻ വാങ്ങിച്ചു കൊടുത്താലെന്താ... കാശില്ലാഞ്ഞിട്ടൊന്നും അല്ലല്ലോ... ഞാനും നന്ദുവും ഒരുമിച്ചാ കിടക്കുന്നത്... നന്ദു കൂർക്കം വലിച്ചു ഉറങ്ങുമ്പോ എന്റെ ചിന്ത മുഴുവൻ ആ ചേട്ടനെ പറ്റി ആയിരുന്നു... അഭിമന്യു... പേര് പറയുമ്പോൾ പോലും അടിവയറ്റിൽ നിന്ന് പൂമ്പാറ്റ പറന്നു പോകും പോലെ... ഇതെന്താ ഇങ്ങനെ... അയ്യോ... ************************ അച്ഛന് എങ്ങനെയുണ്ട്... കട്ടിലിൽ കണ്ണടച്ച് കിടക്കുന്ന മധുവിന്റെ അടുത്തേക്ക് ഇരുന്നു മനു... നെറ്റിയിൽ തൊട്ട് നോക്കികൊണ്ടായിരുന്നു ചോദ്യം... കണ്ണുകൾ തുറന്നു അദ്ദേഹം... കുറവുണ്ട് മോനെ... മ്.. കുറച്ചൂസത്തിന് പണിക്ക് പോവണ്ട... ഞാനേ നാളെ മുതല് ബസിൽ പോവാ... രഘുവേട്ടനോട് പറഞ്ഞിട്ടുണ്ട്... അത്‌ വേണോ മോനെ... റിസൾട്ട്‌ വന്നിട്ട്... റിസൾട്ട്‌ എന്തെങ്കിലും ഒക്കെ ആയിക്കോട്ടെന്നേ... എന്തായാലും ഈ പഠിച്ചതിന്റെ ജോലി ഒന്നും എനിക്ക് കിട്ടാൻ പോണില്ല... പിന്നെ എവിടെയെങ്കിലും ഒക്കെ അന്വേഷിച്ചു പറയാൻ ആരെങ്കിലും ഒക്കെ വേണം.. അതും ഇല്ലല്ലോ.... മോനെ... അച്ഛൻ വിഷമിക്കണ്ട.... ഒക്കെ ശെരിയാവുംന്നേ... ഞാനേ മുതലാളിയെ ഒന്ന് കാണാൻ പോട്ടെ.. രഘുവേട്ടൻ പറഞ്ഞിരുന്നേ... വണ്ടി ഓടിക്കാനാണോ മോനെ...നീ കുഞ്ഞല്ലേടാ... പിന്നേ.. കുഞ്ഞ്.... 23 വയസ്സായി എന്റെ അച്ഛാ.... ഒരു വണ്ടി ഓടിക്കാനുള്ള ധൈര്യം ഒക്കെ എനിക്കുണ്ട്.... ഞാൻ പിന്നെ വെറുതെയാണോ ഹെവി വെഹിക്കിൾ ലൈസെൻസ് എടുത്തത്.... ഇനിയിപ്പോ മൊതലാളി എന്റെ കയ്യില് ഒരു ബസ്സൊക്കെ വിശ്വസിച്ച് ഏൽപ്പിക്കോ ആവോ.... അതേ ഉളളൂ ടെൻഷൻ... ഞാനെന്നാ ഈ ഡ്രെസൊന്ന് മാറീട്ട് പോയിട്ട് വരാം... അവൻ അതും പറഞ്ഞു എഴുന്നേറ്റ് പോയിരുന്നു.... എന്റെ മോന് നല്ല വിഷമം ഉണ്ട് മധുവേട്ടാ... അവനെ കൊണ്ട് ഒന്നിനും പറ്റണില്ലല്ലോ എന്ന വിഷമാ..... അവൻ വിഷമിക്കണത് എന്തിനാ... ഇതിപ്പോ ചെറിയൊരു പനിയല്ലേ എനിക്ക് വന്നുള്ളൂ.... എനിക്ക് ആരോഗ്യം ഉള്ള കാലത്തോളം ഒരു കുഴപ്പം ഇല്ലാണ്ട് ഞാൻ നോക്കിക്കോളാം.... വയ്യാണ്ടായാലാ... നിങ്ങളിങ്ങനെ വെഷമിക്കണ്ടേ... അവനില്ലേ... മ്... അച്ചു വിളിച്ചിരുന്നോ... കുറച്ചു മുന്നേ വിളിച്ചിട്ട് വെച്ചതേയുള്ളൂ... എന്താ അവിടത്തെ വിശേഷം... ഓ... എന്ത് പറയാൻ... കുറെ പരാതീം പരിഭവോം തന്നെ... ആ കൂട്ടത്തിന്റെ ഇടയില് കെടന്ന് നട്ടം തിരിയാ എന്റെ കൊച്ച്... ഹാ.. അതിന്റെ വിധി അങ്ങനെ.... എന്റെ മോൾക്ക് ഒക്കെ കിടന്നു അനുഭവിക്കാനാ യോഗം... ഒരു നെടുവീർപ്പോടെ അവർ പറഞ്ഞു നിർത്തുമ്പോൾ അയാളും ഒരു ദീർഘ നിശ്വാസം എടുത്തു.... മൂന്ന് മക്കളിൽ മൂത്തത് മോളാണ്... അശ്വതി.... അതിന് താഴെ രണ്ട് ആമ്പിള്ളേർ... മനുവിന് താഴെ ഉള്ളവൻ പ്ലസ് ടു വിന് പഠിക്കുന്നു.. അനൂപ്... പ്ലസ് ടു കഴിഞ്ഞു എഞ്ചിനീയറിംഗ്ന് പോണം എന്ന് പറഞ്ഞാ നടപ്പ്... അതിനുള്ള കാശ് ഒപ്പിക്കാൻ എന്തു ചെയ്യും എന്നാണ്.... അതിനിടയിലാ അച്ചുവിന്റെ ഭർത്താവിന്റെ വീട്ടില് ഓരോരോ ആവശ്യങ്ങൾ.. സ്ത്രീധനം മുഴുവൻ കൊടുത്ത് തീർത്തത് തന്നേ കുറച്ചു നാള് മുന്നെയാ.. അതിന്റെ ഇടയില് അവളുടെ പ്രസവം കഴിഞ്ഞു.. സനീഷിന്റെ പെങ്ങളുടെ കല്യാണം കഴിഞ്ഞു.. അതിന് അച്ചുവിന്റെ സ്വർണം എടുത്തിട്ടും അവരുടെ പരാതി ഒഴിയുന്നില്ല... എല്ലാ ഭാരവും കൂടെ ചുമക്കാൻ വയ്യാതെ ആയിരിക്കുന്നു.. എന്ന് വേണമെങ്കിലും തളർന്ന് പോകും തന്റെ ശരീരം.... അതിനുള്ള സൂചന ഒക്കെ ശരീരം കാണിച്ചു തുടങ്ങി.... ആലോചനകളോടെ കിടക്കുമ്പോൾ മുന്നോട്ടുള്ള ഭാവി തന്റെ മകന്റെ കയ്യിലാണ് അവനൊരു നല്ല ജോലി കിട്ടുന്നതോടെ എല്ലാം ശെരിയാകും എന്ന പ്രത്യാശ ആയിരുന്നു.... 📖 കഥയുടെ ബാക്കി ഭാഗങ്ങൾ ഇവിടെ വായിക്കാം: 👉 https://app.aksharathalukal.in/series/50226/view വായിച്ചിട്ട് അഭിപ്രായം പറയണേ 🥰 #💞 പ്രണയകഥകൾ #📔 കഥ #📙 നോവൽ