ഇന്നത്തെ ദിവസമെങ്കിലും അൽപ്പം നേരത്തേ ചെല്ലാമെന്ന് വെച്ചാൽ അതിനും സമ്മതിക്കരുത്. വെളുപ്പാൻ കാലത്ത് തുടങ്ങിക്കോളും. നശിച്ചൊരു മഴ. " ഇടുപ്പിലിരുന്ന വെള്ളം നിറഞ്ഞ കലം വിറകടുപ്പിലേക്ക് ഇറക്കി വെച്ചവൾ ആരോടെന്നില്ലാതെ പറഞ്ഞു. അടുപ്പിലേക്ക് വെക്കാനായി വിറക് തിരഞ്ഞെങ്കിലും കൈയിൽ കിട്ടിയ പൊടി വിറക് കണ്ടപ്പോൾ ആ കാര്യത്തിലും തീരുമാനമായെന്ന് ഉറപ്പായി. " ഇല്ല.. വെട്ടി നുറുക്കിയിട്ടതും തീർന്നു. " ദേഷ്യത്തോടെ കൈയിൽ ഇരുന്ന പൊടി വിറക് അടുപ്പിലേക്ക് തന്നെ തള്ളി കയറ്റിവെച്ചു. പിന്നെന്തോ ഓർത്തത് പോലെ അടുക്കള കടന്ന് ആദ്യം കാണുന്ന മുറിയിലേക്ക് കയറി. അവിടെ പുതച്ചു മൂടി കിടക്കുന്ന ആളെ കണ്ടതും ഇട്ടിരുന്ന ഫാനിന്റെ സ്പീടവൾ കുറച്ചു. " കഴിഞ്ഞ മാസത്തെ കറന്റ് ബില്ല് 600 രൂപയാ. എല്ലാ വട്ടത്തേക്കാളും കൂടുതൽ. ഉപയോഗിക്കുന്നവർക്ക് ലാഭിഷായി അതങ്ങ് ചെയ്താൽ മതിയല്ലോ. ബാക്കി ഉള്ളവർ വേണം പണം അടയ്ക്കാൻ നുള്ളി പെറുക്കേണ്ടത്. " " കാലത്ത് തന്നെ അമ്മുമ്മ മുറുമുറുപ്പ് തുടങ്ങിയോ.. " പുതപ്പിനടിയിൽ നിന്നാശബ്ദം കേട്ടതും അവൾ സൈഡിലായി മാറ്റി വെച്ച പച്ചചൂരലെടുത്ത് പുതപ്പിന് മുകളിലോരടി കൊടുത്തു. " ഹാ.. അമ്മേ.. " അതിൽ നിന്നും ചാടി എഴുനേറ്റ് ഇരിന്ന് കാല് തടവുന്നവനെ അവൾ കൂർപ്പിച്ചു നോക്കി. " ആകെ സമാധാനം കിട്ടുന്നത് ഒരു ഞായറാഴ്‌ചയാ. അന്നും ചൂരലും പൊക്കി പിടിച്ചോണ്ട് വന്നേക്കുവാ. നിനക്കെന്തുവാടി ചേച്ചി.. " " നിന്നെ ഞാൻ കിടത്താം.. ഇന്നലെ പെറുക്കി അടുപ്പിന്റെ അടിയിൽ ഇടാൻ തന്ന ഓലക്കാല് എവിടെയാടാ.. തീയെരിക്കാൻ ഒരു വകയില്ല അവിടെ. " " ഏത് ഓലക്കാല്.. " " ഏത് ഓലക്കാല് അല്ലേ.. " പറയുന്നതിനോടൊപ്പം തന്നെ അവൾ ചൂരൽ ഉയർത്തുന്നത് കൂടി കണ്ടതും അവൻ കട്ടിലിൽ നിന്ന് ചാടി നിലത്തേക്ക് ഇറങ്ങി നിന്നു. " അയ്യോ തല്ലല്ലേ.. ഈ ഉറക്കപ്പിച്ചിൽ നിൽക്കുന്ന എന്നോട് ചോദിച്ചാൽ പെട്ടന്നെങ്ങനെ പറയാനാ. ഞാൻ ഒന്ന് ആലോചിക്കട്ടെ. " " നിന്റെ ആലോചന കഴിയുന്നത് വരെ ഞാൻ ഇവിടെ നിൽക്കണോ. " " വേണ്ട.. കിട്ടി പോയി. ഇന്നലെ എന്നോട് പറഞ്ഞത് അടുപ്പിന്റെ അടിയിൽ കൊണ്ടിടാൻ അല്ലേ. അപ്പോഴാ ചന്തു വന്ന് ക്രിക്കറ്റ് കളിക്കാൻ വിളിച്ചത്. ആ ഒരു തിരക്കിനിടയിൽ ഞാൻ അത്‌ കുറച്ച് നേരത്തേക്ക് ഒരിടത്തേക്ക് മാറ്റി വെച്ചിട്ടാ കളിക്കാൻ പോയത്. " " എവിടോട്ട്.. " " കോഴിക്കൂടിന്റെ സൈഡിൽ സേഫ് ആയിട്ട് ഉണ്ട്. വാ കാണിച്ചു തരാം. " അവളുടെ മുഖത്ത് ദേഷ്യം ഇരച്ചു കയറുന്നത് കണ്ടതും കാര്യം പന്തിയല്ലെന്ന് തോന്നിയപ്പോൾ തന്നെയവൻ പുറത്തേക്ക് ഓടി. " നിൽക്കെടാ അവിടെ. നിന്റെ പുറം ഞാൻ ഇന്ന് പൊളിക്കും. " " ഞാൻ എന്തോ ചെയ്തിട്ടാടി ചേച്ചീ.. എന്നെ ഇങ്ങനെ ഓടിക്കുന്നത്. അതവിടെ തന്നെ കാണും. " ഓടുന്നതിനിടയിൽ പിറകിലേക്ക് തിരിഞ്ഞു നോക്കി വിളിച്ചു പറഞ്ഞവൻ. എന്നാൽ പുറത്തെ മഴ കണ്ടതും ആ ഓട്ടം അടുക്കള വാതിലിൽ തന്നെ നിന്നു. " ഓ.. മൈ ഗോഡ്.. ഐ ആം ട്രാപ്പ്ഡ്. " അപ്പോഴേക്കും അവന്റെ ചെവിയിൽ നല്ലൊരു പിടിത്തം വീണു കഴിഞ്ഞിരുന്നു. " നീ സേഫ് ആയിട്ട് വെച്ചതെല്ലാം ദോ കിടന്ന് നനയുന്നു. നിന്നേ ഞാൻ എന്താ ചെയ്യേണ്ടത്. " " ഇത്ര നാളും ഇല്ലാത്ത മഴ ഈ രാവിലെ പെയ്യുമെന്ന് ഞാൻ അറിഞ്ഞോ. ഇത് വല്ലാത്ത ചതിയായിപ്പോയല്ലേ ചേച്ചി. " " നീ എന്റെ മുന്നീന്ന് പോയേ യദൂ... പറയുന്ന കാര്യങ്ങൾ ഇനിയെന്നാ നീയൊന്ന് കേൾക്കുന്നത്. ഇന്നലെ അതെല്ലാം എടുത്ത് കൊണ്ടിട്ടാരുന്നേൽ ഇങ്ങനെ കിടന്ന് നനയുവോ. " " സോറി ചേച്ചി.. " തന്റെ മുൻപിൽ മുഖവും താഴ്ത്തി നിൽക്കുന്നവനെ കണ്ട് അവൾക്ക് പിന്നെയൊന്നും പറയാനും തോന്നിയില്ല. " ഇനി പറഞ്ഞിട്ട് കാര്യമില്ലല്ലോ. നീ ചെന്ന് പല്ല് തേക്കാൻ നോക്ക്. കിടക്കുന്ന പൊടി വിറക് കൊണ്ട് വല്ലതും ആക്കാൻ പറ്റുവോന്ന് നോക്കട്ടെ. " " സമയം ആറ് കഴിഞ്ഞതേ ഒള്ളു. ഇന്നേലും ഞാനൊന്ന് ഉറങ്ങിക്കോട്ടെ. കൂടെ നല്ല മഴയും. " " എന്താന്ന് വെച്ചാൽ കാണിക്ക്. " " അല്ലേലും എന്റെ ചേച്ചിപെണ്ണ് പാവമാ. ഉമ്മാ.. " തന്റെ കവിളിൽ ഉമ്മ വെച്ച്, അകത്തേക്ക് ഓടിയവനെ കണ്ടവൾ ചെറുചിരിയോടെ പണികളിലേക്ക് തിരിഞ്ഞു. " ഇന്നിപ്പോൾ എന്തോ കാട്ടിക്കൂട്ടാനാ.. ഇതെല്ലാം കൂടി ഗ്യാസിൽ ആക്കിയാൽ അത്‌ തീരുന്ന വഴി അറിയില്ല. " സ്വയം പറഞ്ഞുകൊണ്ടവൾ ഗ്യാസ് ഓണാക്കി ചായ തിളപ്പിച്ചു. അത്‌ വാങ്ങിയതിനു ശേഷം അതേ അടുപ്പിലേക്ക് ചോറിനായി വെള്ളം തിളപ്പിക്കാൻ വെച്ചു. അത്‌ തിളയ്ക്കുന്ന സമയം കൊണ്ട് പയറെടുത്ത് മെഴുക്കുവരട്ടിയ്ക്ക് അരിഞ്ഞു. " യാമിയേ... " കുട മടക്കി അടുക്കളയിലേക്ക് കയറിക്കൊണ്ട് രമ്യ വിളിച്ചതും അവൾ വേഗം ശ്രദ്ധ അവിടേക്കാക്കി. " രണ്ട് മുട്ട എടുക്കാൻ ഉണ്ടോടി. രാവിലെ മുട്ടക്കറിയാ ഉണ്ടാക്കിയത്. അപ്പോഴുണ്ട് സേതുവേട്ടന്റെ അമ്മയും അച്ഛനും വരുന്നുണ്ടെന്ന്. അവർക്ക് കൂടി ഉള്ളത് എടുക്കാൻ ഇല്ലാ. അതാ ഈ മഴയത്തും ഞാൻ ഇവിടേക്ക് ഓടിയത്. " ( രമ ) " രണ്ടെണ്ണം മതിയോ ചേച്ചി.. " മുട്ട അടുക്കി വെച്ച കുട്ടയിൽ നിന്നും രണ്ടെണ്ണം എടുക്കുന്നതിനിടയിൽ അവൾ ചോദിച്ചു. " നീ ഒരു പത്തെണ്ണം എടുത്തോടി. കടയിൽ കൊടുക്കാൻ വെച്ചേക്കുന്നത് വല്ലതും ആണോ. അല്ലേൽ മതി കേട്ടോ. " " കടയിലേക്കുള്ളത് ഇന്നലെ വൈകിട്ട് തന്നെ കൊടുത്തു. ഇത് വേറെയാ. " " എന്നാൽ എടുത്തോ.. അല്ല രാവിലെ പയറാണോ.. തോരൻ ആണോടി. " " അല്ല മെഴുക്കുവരട്ടിയാ. യദു ആകെ കൂട്ടുന്നത് ബീറ്റ്റൂട്ട് തോരനാ. വേറെയൊന്നും അവന് വേണ്ട. പിന്നെ ഞാൻ എന്തിനാ വെറുതെയെല്ലാം വെച്ച് കളയുന്നത്. ഇതാകുമ്പോൾ ഞങ്ങൾക്ക് രണ്ടും ഇഷ്ടമാ. " " എന്നിട്ട് അവനെന്തിയേ.. എഴുന്നേറ്റില്ലേ.. " " എണീറ്റിട്ട് മഴ ആയത്കൊണ്ട് വീണ്ടും കിടന്നു. ദാ.. ചേച്ചീ.. " മുട്ട വാങ്ങി കൈയിലേക്ക് വെച്ചവർ കൈയിൽ ഇരുന്ന പൈസ അവൾക്ക് കൊടുത്തു. " കഴിഞ്ഞ വട്ടത്തെ ആറ് മുട്ടയുടേം ഇന്നത്തേതും ചേർത്തുണ്ട്. നീ ചോദിക്കില്ലെന്ന് അറിയാം. " അതിനവൾ വെറുതെ ചിരിച്ചു. " ഞാൻ എട്ടര കഴിയുമ്പോൾ ഇറങ്ങും. ഇവിടെ അവൻ തനിച്ചേ കാണൂ. ശ്രദ്ധിച്ചേക്കണേ ചേച്ചി. " " അത്‌ പ്രത്യേകം പറയണോടി. നീ പറഞ്ഞില്ലേലും ഞാൻ നോക്കും. അല്ലേലും അവൻ ചന്തുവിന്റെ കൂടെ അവിടെ തന്നെ ആണല്ലോ. എന്നാൽ പിന്നെ നിന്റെ പണി നടക്കട്ടെ. എനിക്കും കിടക്കുന്ന് ഒരു കുന്ന് പണി. ചെന്നിട്ട് വേണം എല്ലാം ആക്കാൻ. " രമ്യ പോയതും അവൾ വാതിൽ അടച്ചു വീണ്ടും പണികളിലേക്ക് തിരിഞ്ഞു. ********************** ആദ്യം അടികൊണ്ടവനെ പരിചയപ്പെടാം. അവനാണ് യദുവെന്ന യദ്രൂപ്. ആളിപ്പോൾ അഞ്ചാം ക്ലാസിൽ ആണ്. സ്വഭാവം പറയുക ആണെങ്കിൽ ദാ ഇപ്പോൾ കണ്ടത് തന്നെ. കുരുത്തക്കേട് ഒരുപാടുള്ള ഒരു കുറുമ്പൻ ചെറുക്കൻ. അവനെ ചൂരലിനടിച്ചെഴുന്നേൽപ്പിച്ചില്ലേ അതാണവന്റെ മാത്രം ചേച്ചിപെണ്ണ്.. യാമികയെന്ന യാമി. നിങ്ങൾ ഇപ്പോൾ കണ്ടത് പോലെ ഇത് അവരുടെ മാത്രം ലോകമാണ്. അവർ രണ്ടാളും മാത്രമുള്ള ചെറിയ സ്വർഗം. യാമിയ്ക്ക് പതിനാറ് വയസ്സുള്ളപ്പോഴാണ് യദുവിനെ അവൾക്ക് കിട്ടുന്നത്. അനിയനെന്ന് പറയുന്നതിനേക്കാൾ ഉപരി സ്വന്തം കുഞ്ഞായി തന്നെ അവൾ അവനെ നെഞ്ചോട് ചേർത്തു. അവന് ആറ് വയസുള്ളപ്പോൾ അതായത് നാല് വർഷങ്ങൾക്ക് മുൻപാണ് ആക്‌സിഡന്റിൽ ഇരുവർക്കും അച്ഛനെയും അമ്മയേയും നഷ്ടപെടുന്നത്. കാര്യമായി സ്വത്തോ പണമോ ഇല്ലാത്തത് കൊണ്ടും വളർന്നു വരുന്നതൊരു പെൺകുട്ടി ആയത് കൊണ്ടും ബന്ധുക്കൾ ആരും അവരെ കൂട്ടികൊണ്ട് പോകാനോ സഹായിക്കാനോ നിന്നില്ല. ആരുടെയും സഹായം ഞങ്ങൾക്ക് വേണ്ടെന്ന് പറഞ്ഞു അനിയനുമായി അതേ വീട്ടിൽ തന്നെ അവൾ താമസിച്ചു. ചേച്ചിയെന്ന് പറഞ്ഞാൽ ജീവനാണ് യദുവിന്. തിരിച്ചും അങ്ങനെ തന്നെ. ബുദ്ധിമുട്ടുകൾക്കിടയിലും തന്റെ ഡിഗ്രി പഠിത്തം അവൾ പൂർത്തിയാക്കി. പഠിത്തത്തിനൊത്ത ജോലിയ്ക്ക് കാത്തിരുന്നാൽ നടപടി ആവില്ലെന്ന് തിരിച്ചറിഞ്ഞതും ടൗണിലുള്ള തുണിക്കടയിൽ ജോലിയ്ക്ക് കയറി. കൂടാതെ വീട്ടിൽ കുറച്ച് കോഴികളെ വളർത്തുന്നുണ്ട്. അതിന്റെ മുട്ട അടുത്തുള്ള കടയിലും വീടുകളിലും കൊടുക്കുന്നുണ്ട്. യദുവിന്റെ പഠിത്തവും വീട്ടിലെ കാര്യങ്ങളും അവൾ മുന്നോട്ട് കൊണ്ട് പോകുന്നത് ഇതിലൂടെയാണ്. " രാഖി.... " " ഞാൻ ഇപ്പൊ വിചാരിച്ചതെ ഒള്ളു. ഏട്ടത്തിയ്ക്കുള്ള വിളി വന്നില്ലല്ലോയെന്ന്. " പുട്ടിനുള്ള പൊടി കുഴക്കുന്നതിനിടയിൽ സുധർമ രാഖിയോടായി പറഞ്ഞു. രാഖി ഒരു ചിരിയോടെ പാത്രത്തിൽ നിന്നും ചായ കപ്പിലേക്ക് ഒഴിച്ചു. " ഞാനിത് കൊടുത്തിട്ട് വരാം. നീ ആ കറിയൊന്ന് നോക്കിയേക്കണെ. " " വേഗം ചെല്ല്. അല്ലെങ്കിൽ അടുത്ത വിളി വരും. " ****************** " ചായ.. " തന്റെ മുന്നിലേക്ക് നീണ്ട കൈയിൽ നിന്നും അയാൾ കപ്പ് വാങ്ങി ചുണ്ടോട് അടുപ്പിച്ചു. അയാളുടെ അപ്പുറത്തായി അവരും ഇരുന്നു. " അവൻ വിളിച്ചോ.. എപ്പോഴത്തേക്ക് എത്തുമെന്ന് വല്ലോം പറഞ്ഞാരുന്നോ. " " ഇന്നലെ വിളിച്ചതെ ഒള്ളു. വണ്ടി ഒന്നും വിടേണ്ട. നേരെ ഇവിടേക്ക് വന്നോളാമെന്നാ പറഞ്ഞത്. " " മ്മ്.. ഒറ്റയ്ക്കേ ഒള്ളോ.. അതോ.. " " ആ കുട്ടി കൂടി കാണുമെന്നാ പറഞ്ഞത്. " അയാൾ ദീർഘമായി ഒന്ന് മൂളി അവിടെ നിന്നും എഴുനേറ്റു. ചായ കപ്പ് അവരുടെ കൈയിലേക്ക് കൊടുത്തു. " അതേ.. അവൻ വരുമ്പോൾ ഒന്നും പറയാനൊന്നും നിക്കേണ്ട. അവന്റെ ഇഷ്ടമല്ലേ നമുക്ക് വലുത്. " " ഇതുപോലെ അവന് മറ്റൊരിഷ്ടം ഉണ്ടായിരുന്നു. അന്നും നീ ഇത് തന്നെയാ പറഞ്ഞത്. മറന്നോ എല്ലാം. " അതിനുള്ള മറുപടി ആ അമ്മയ്ക്ക് ഇല്ലായിരുന്നു. " മക്കളോട് സ്നേഹമൊക്കെ ആകാം. എന്ന് കരുതി അവര് ചെയ്യുന്ന എല്ലാത്തിനും കൂട്ട് നിന്നാൽ അവസാനം കരയാൻ കൂടി ഒരുങ്ങി ഇരുന്നോണം. " അതും പറഞ്ഞയാൾ അകത്തേക്ക് കയറിപ്പോയി. രാഖി അപ്പോഴും അവിടെ തന്നെ നിന്നു. " അമ്മ ഇവിടെ നിന്ന് സ്വപ്നം കാണുവാണോ. ഞാൻ നീതുവിന്റെ വീട്ടിൽ പോവാണേ. വൈകിട്ടെ വരൂ. " " ഇന്ന് എവിടെയും പോകേണ്ട. അനി വരുന്നത് അറിയാലോ. " " അതിന് എനിക്കെന്താ. പണ്ട് എല്ലാവരെയും ഇഷ്ടമുള്ള ഒരേട്ടൻ ഉണ്ടായിരുന്നു. അതെല്ലാം ഒറ്റ അടിക്ക് വേണ്ടെന്ന് വെച്ച് പോയതല്ലേ. ഇപ്പൊ പുതിയ ബന്ധങ്ങളുമായി. എന്നെ വേണ്ടാത്ത ആളെ ഈ അനുപമയ്ക്കും വേണ്ട. " " മോളെ.. അവൻ നിന്റെ ഏട്ടനാണ്. " " അതേയോ.. വരുമ്പോൾ അമ്മ അത്‌ മോനെ ഒന്ന് ഓർമിപ്പിച്ചേക്ക്. ഞാൻ പോവാ. അച്ഛനോട് പറഞ്ഞിട്ടുണ്ട് ഞാൻ. അച്ഛൻ പൊക്കോളാനും പറഞ്ഞു. " അവൾ തന്റെ ബാഗ് സ്കൂട്ടറിലേക്ക് വെച്ച് അമ്മയെ ഒന്ന് നോക്കി വണ്ടി സ്റ്റാർട്ട്‌ ചെയ്തു. " ഇനി ഞാൻ പറഞ്ഞതോർത്ത് വിഷമിച്ചു നിൽക്കേണ്ട. പോയി മോന് ഇഷ്ടപ്പെട്ടതൊക്കെ ഉണ്ടാക്കി വെക്ക്. " അനുപമയുടെ സ്കൂട്ടർ ഗേറ്റ് കടന്ന് പോയതും രാഖി അകത്തേക്ക് നടന്നു.. ***************** " യദൂ.. ഞാൻ ഇറങ്ങുവാണേ.. കഴിക്കാൻ ഉള്ളത് ഇവിടെ അടച്ചു വെച്ചിട്ടുണ്ട്. വൈകുന്നേരം വരുമ്പോഴും ഇത് ഇതുപോലെ ഇരുന്നാൽ.. " " ഞാൻ കഴിച്ചോളാം. " " കോഴിയെ ഞാൻ വന്നിട്ട് തുറന്ന് വിട്ടോളം. ചന്തുവിനെ കൂട്ടി വെറുതെ തുറന്ന് വിട്ടേക്കരുത്. മൂന്നെണ്ണത്തിനെയാ പട്ടി കൊണ്ട് പോയത്. " " തുറന്ന് വിടില്ല.. " " ഇടിയും മിന്നലും ഉണ്ടേൽ മഴയത്തിറങ്ങിയേക്കരുത്. ഇല്ലാത്ത അസുഖം ഉണ്ടാക്കി വെച്ചാൽ ഞാൻ കൊണ്ട് പോകില്ല ആശുപത്രിയിൽ. " " ഓ എന്റെ പോന്നോ. ഞാൻ എല്ലാം അനുസരിച്ച് നല്ല കുട്ടിയായി ഇവിടെ ഇരുന്നോളാം. പോരെ. " യദു കട്ടിലിൽ നിന്ന് എഴുനേറ്റിരുന്ന് കൊണ്ട് പറഞ്ഞു. " അതെനിക്കറിയാലോ. അതാ ഇങ്ങനെ പറയേണ്ടി വന്നത്. " യാമി അവന്റെ തലയ്ക്കിട്ടൊരു കൊട്ട് കൊട്ടി ബാഗും എടുത്ത് പോകാനായി ഇറങ്ങി. ചേച്ചി പോയെന്ന് കണ്ടതും യദു പിന്നെയും പുതപ്പെടുത്ത് മൂടി കിടന്നു. ******************* " ദൈവമേ.. ബസ് വരാൻ സമയമായി. ഇന്നുമാ ചെറുക്കൻ കാരണം താമസിച്ചു. " പറഞ്ഞ് നിർത്തിയതും മാറി നിന്ന മഴ വീണ്ടും ഇരച്ചെത്തി കഴിഞ്ഞിരുന്നു. ബാഗിൽ നിന്ന് കുട എടുത്ത് നിവർത്തി. കുടയുടെ രണ്ട് കമ്പി പുറത്തേക്ക് തള്ളി നിൽപ്പുണ്ട്. അത്‌ പിന്നിലേക്ക് ആക്കി. ഉടുത്ത സാരി കാലിൽ നിന്നൽപ്പം ഉയർത്തി അവൾ വേഗം നടന്നു. " എല്ലാം കൊണ്ടും എനിക്കിന്ന് നല്ല ദിവസമാ. " സ്വയം പറഞ്ഞുകൊണ്ടവൾ ബസ് സ്റ്റോപ്പിലേക്ക് ഓടി കയറി. " ആയുഷ് പോയോ ചേച്ചി. " ( യാമി ) " ഞാനും അത്‌ തന്നെയാ നോക്കി നിൽക്കുന്നത്. ഇന്നിനി ഇല്ലിയോ എന്തോ. " " ദൈവമേ.. ആയുഷ് കിട്ടിയില്ലേൽ കടയിൽ എത്താൻ വൈകും. " " ദോ ബസ് വരുന്നുണ്ട്. നിറയെ ആളാണെന്ന തോന്നുന്നത്. " ദൂരെ നിന്ന് വരുന്ന ബസ് കണ്ടപ്പോഴാണ് അവൾക്കും ജീവൻ വീണത്. എന്നാൽ പ്രതീക്ഷയ്ക്ക് വിപരീതമായി ബസ് അവിടെ നിർത്താതെ പോയി. " എന്തോ പണിയാ അവന്മാർ കാണിച്ചത്.. ഇനി ആ സുൽത്താൻ വരുന്നത് വരെ നിൽക്കണം. " ആ സ്ത്രീ പറഞ്ഞതും യാമിയുടെ നോട്ടം പോയത് വാച്ചിലേക്ക് ആണ്. " ഇന്നെന്താ ചേച്ചി ബസ് കിട്ടിയില്ലേ.. " സ്കൂട്ടറിൽ നിന്നും ഇറങ്ങി ബസ് സ്റ്റോപ്പിലേക്ക് കയറിക്കൊണ്ട് അനുപമ ചോദിച്ചു. " മഴ ആയത് കൊണ്ടാവും നിർത്തിയില്ല. ഇനി അടുത്ത ബസിന് പോണം. " " ഇനി സുൽത്താൻ അല്ലേ ഒള്ളു. അത്‌ കിട്ടി കടയിൽ എത്തുമ്പോഴേക്ക് ചേച്ചി ലേറ്റ് ആവുമല്ലോ. " " മ്മ്. വേറെ വഴിയില്ലല്ലോ. " " ഞാൻ ആ വഴിക്കാ പോകുന്നത്. മഴ തോരുവാണേൽ ഞാൻ ഡ്രോപ്പ് ചെയ്യാം. " യാമിയ്ക്കപ്പോഴാണ് ആശ്വാസം ആയത്. " യദുസാറ് എന്ത് പറയുന്നു. തോട്ടത്തിലെ മാങ്ങ പൊട്ടിക്കാൻ വന്നപ്പോൾ കണ്ടതാ. പിന്നെ കണ്ടിട്ടേ ഇല്ല. " " ഞായറാഴ്ച അല്ലേ കൂടെ മഴയും. അവിടെ പുതച്ച് മൂടി കിടപ്പുണ്ട്. " " അച്ഛമ്മ എന്നോട് നിങ്ങളുടെ കാര്യം ചോദിക്കും. ഒരിക്കൽ യദുവിനെ ഞാൻ കാണിച്ചു കൊടുത്തു. അവന് കാര്യങ്ങൾ എല്ലാം അറിയാമല്ലേ. അച്ഛമ്മയെ കണ്ടപ്പോഴേ പോയി. " " എല്ലാം പറഞ്ഞിട്ടുണ്ട് ഞാൻ. അവൻ അച്ഛന്റെ തനി പകർപ്പാ. അച്ഛനെ പോലെ തന്നെ വാശിയും ദേഷ്യവും. " " ഈ പറയുന്ന ആളും ഒട്ടും മോശമല്ലല്ലോ. അന്ന് എല്ലാവരുടെയും മുന്നിൽ വെച്ചല്ലേ അനിയേട്ടന്റെ മുഖത്ത് നോക്കി ഇറങ്ങി പോകാൻ പറഞ്ഞത്. " യാമിയുടെ മുഖം കണ്ടപ്പോഴാണ് പറഞ്ഞ കാര്യത്തെ പറ്റി അനുപമ ഓർത്തത്. " സോറി ചേച്ചി. ഞാൻ പെട്ടെന്ന്. " " സാരമില്ല. അതെല്ലാം കഴിഞ്ഞതല്ലേ. " " മ്മ്.. ഇന്ന് വരുന്നുണ്ട് അനിയേട്ടൻ. കൂടെയാ പിശാശും ഉണ്ട്. " യാമി അതിന് വെറുതെ ചിരിച്ചെന്ന് വരുത്തി. പിന്നെയാ വിഷയം സംസാരിക്കാൻ താല്പര്യം ഇല്ലാത്തത് പോലെ അനുപമ മഴയിലേക്ക് നോക്കി ഇരുന്നു. മഴ തോർന്നതും അവൾ യാമിയെ കൂട്ടി അവിടെ നിന്നും ഇറങ്ങി. അവരുടെ സ്കൂട്ടർ ആ ബസ് സ്റ്റോപ്പ് കടന്നതും എതിരെ വരുന്ന ബുള്ളറ്റ് കണ്ട് അനുപമ മിററിൽ കൂടി യാമിയെ നോക്കി. " ചേച്ചിയേ.. ആ വരുന്ന മുതലിനെ കണ്ടോ.. ആ സൈഡിലേക്കേ നോക്കാൻ പോവേണ്ട കേട്ടോ. " അനു പറഞ്ഞപ്പോൾ അവൾ മുന്നിലേക്ക് നോക്കി. ബുള്ളറ്റിൽ തങ്ങൾക്ക് എതിരായി വരുന്നയാളെ കണ്ടപ്പോൾ അവൾ സംശയത്തോടെ നോക്കി. " ഓ എന്റെ പൊന്ന് ചേച്ചി.. നോക്കരുതെന്ന് പറഞ്ഞാൽ അങ്ങോട്ട് തന്നെ നോക്കണം. " " അതാരാ അനു.. " " ഏ... " അനു പെട്ടെന്നാണ് സ്കൂട്ടർ സൈഡിലേക്ക് ആക്കി നിർത്തിയത്. അപ്പോഴേക്കും ആ ബുള്ളറ്റ് അവരെ കടന്നുപോയിരുന്നു. അനു യാമിയെ തലതിരിച്ച് അവളെ നോക്കി. 📖 കഥയുടെ ബാക്കി ഭാഗങ്ങൾ ഇവിടെ വായിക്കാം: 👉 https://app.aksharathalukal.in/series/50535/view വായിച്ചിട്ട് അഭിപ്രായം പറയണേ 🥰 #💞 പ്രണയകഥകൾ #📔 കഥ #📙 നോവൽ