ഒരുവട്ടം കൂടെ.. പാർട്ട്‌ 2 വർഷങ്ങൾക് ശേഷം... മലമുകളിലെ ശാന്തമായ കാറ്റ് ശിവാനിയുടെ മുടിയിഴകളെ തലോടി. അവൾ ദൂരേക്ക് നോക്കി നിന്നു. പെട്ടെന്നായിരുന്നു അത്—പിന്നിൽ നിന്നും "ശിവാനീ..." എന്നൊരു വിളി. ആ വിളിയിൽ നിറയെ സ്‌നേഹവും പരിഭ്രമവുമായിരുന്നു. ആദി ഓടി കിതച്ച് അവളുടെ അടുത്തേക്ക് അടുക്കുംതോറും അവന്റെ ഹൃദയം വേഗത്തിൽ മിടിച്ചു. അവൻ തൊട്ടടുത്തെത്തിയപ്പോഴേക്കും, ഒരു മിന്നൽപ്പിണർ പോലെ അവൾ കാറ്റിൽ അലിഞ്ഞില്ലാതായി! ​"ശിവാനീ!!"—ആദി ഞെട്ടിവിറച്ച്, ഉച്ചത്തിൽ നിലവിളിച്ചു കൊണ്ട് കട്ടിലിൽ എഴുന്നേറ്റു ഇരുന്നു. നെറ്റിയിൽ വിയർപ്പുതുള്ളികൾ കിനിഞ്ഞിരുന്നു. ​"ഓഹ്, ഇന്നും ഇതേ സ്വപ്‌നം തന്നെ!" മടുപ്പോടെ അവൻ പിറുപിറുത്തു. എന്നും ഒരേ ചിത്രം, ഒരേ വിളി, ഒരേ നഷ്‌ടബോധം. ​അവൻ വീണ്ടും കിടക്കാൻ പോയപ്പോയാണ് ഫോൺ ശബ്ദിച്ചത്. അലസതയോടെ അവൻ കൈ നീട്ടി ഫോൺ എടുത്തു. ​"ഡാ, നീ എവിടെയാ? മീറ്റിംഗ് തുടങ്ങാൻ നേരമായി. വേഗം വാ!" മറുതലക്കൽ അർജുന്റെ ശബ്‌ദം ദേഷ്യത്തിൽ മുഴങ്ങി. ​"മീറ്റിങ്ങോ? എന്ത് മീറ്റിംഗ്?" ഉറക്കച്ചടവ് വിട്ടുമാറാത്ത മട്ടിൽ ആദി ചോദിച്ചു. ​"വർമ്മ ഗ്രൂപ്പുമായുള്ള പ്രധാന മീറ്റിംഗ് ഇന്നല്ലേ, മണ്ടൂസാ!" ​"അതിന് ഞാനെന്തിനാ? അരവിന്ദ് പോവില്ലേ?" ​"അവൻ അത്യാവശ്യമായി ബാംഗ്ലൂർ പോയി. അങ്കിളാണ് നിന്നോട് നിർബന്ധമായും പങ്കെടുക്കാൻ പറഞ്ഞത്." ​"ഓഹ്, ശരി. ഞാൻ അത് മറന്നുപോയിരുന്നു. നീ ഫോൺ വെക്ക്, ഞാൻ ഇപ്പോഴെത്താം." ആദി ഫോൺ വെച്ച് തിടുക്കത്തിൽ ഫ്രഷ് ആകാനായി പോയി. ​റോഡിലെ കനത്ത ട്രാഫിക് ബ്ലോക്ക് കാരണം ആദി ഓഫീസിലെത്താൻ ഒരുപാട് വൈകി. സമയം പാഴാക്കാതെ അവൻ നേരെ മീറ്റിംഗ് ഹാളിന് ലക്ഷ്യമാക്കി നടന്നു. അപ്പോഴാണ് അച്ഛന്റെ പി.എ ജോർജ് (പേഴ്സണൽ അസിസ്റ്റന്റ്) അവനടുത്തേക്ക് വന്നത്. ​"സർ എന്താ ലൈറ്റ് ആയതു? നമുക്ക് കിട്ടേണ്ടിയിരുന്ന പ്രൊജക്റ്റ് ആയിരുന്നു. ഇപ്പോൾ നമ്മുടെ എതിരാളികളായ കെ.ജെ. ഗ്രൂപ്പ്‌ അത് തട്ടിയെടുത്തു," പി.എ. നിരാശയോടെ പറഞ്ഞു. ​അവൻ ആ വാക്കുകൾ ശ്രദ്ധിക്കുന്നതിനിടയിൽ, ഒരു യുവതി അവരെ കടന്നുപോയിരുന്നു. ആദിയുടെ കണ്ണുകൾ പെട്ടെന്ന് വിടർന്നു—ശ്വാസം നിലച്ചതുപോലെ അവൻ നിന്നുപോയി. ​"ശിവാനീ... അ..അവളല്ലേ അത്?" ആകാംഷയും അവിശ്വസനീയതയും കലർന്ന സ്വരത്തിൽ അവൻ ചോദിച്ചു. ​ആദി കൈചൂണ്ടിയ ഭാഗത്തേക്ക് നോക്കിക്കൊണ്ട് പി.എ. പറഞ്ഞു: "അതെ, അവളാണ്. ഇന്ന് പ്രൊജക്റ്റ് അവതരിപ്പിച്ചത് അവളായിരുന്നു. കെ.ജെ. ഗ്രൂപ്പിന്റെ പുതിയ സി.ഇ.ഒ.യാണ്." ​പി.എ. പറയുന്നത് ഒന്നും ആദി കേൾക്കുന്നുണ്ടായിരുന്നില്ല. അവന്റെ കണ്ണുകൾ തനിക്കരികിലേക്ക് നടന്നു വരുന്ന ശിവാനിയിൽ തറഞ്ഞിരുന്നു. വർഷങ്ങൾക്കു മുമ്പ് നഷ്‌ടപ്പെട്ട നിധി തിരികെ കിട്ടിയ ഒരാളുടെ ആഹ്ലാദമായിരുന്നു അവന്റെ മുഖത്ത്. കണ്ണുകൾ വിടർന്നു, അവനറിയാതെ ഒരു മനോഹരമായ പുഞ്ചിരി അവന്റെ ചുണ്ടുകളിൽ വിരിഞ്ഞു. ​എന്നാൽ, അവനെ പൂർണ്ണമായും തകർത്തു കൊണ്ട്, ഒരൊറ്റ നോട്ടം കൊണ്ടുപോലും അവൾ ആദിയെ ശ്രദ്ധിച്ചില്ല. ഒരു അന്യനെപ്പോലെ അവഗണിച്ചു കൊണ്ട് അവൾ വേഗത്തിൽ നടന്നു നീങ്ങി. അത് അവനിൽ പറഞ്ഞറിയിക്കാനാവാത്ത ഒരു വേദനയുടെ വേലിയേറ്റം ഉണ്ടാക്കി. ​"അവൾ എന്താ എന്നെ മൈൻഡ് ചെയ്യാതെ പോയത്?" അവന്റെ ശബ്‌ദം ഇടറി. ​"ഓ, നിങ്ങൾ ഒരുമിച്ച് പഠിച്ചതാണല്ലോ. ഞാൻ സാറിനെക്കുറിച്ച് സൂചിപ്പിച്ചപ്പോൾ, 'ഓർമ്മയില്ല' എന്നാണ് ആ സി.ഇ.ഒ. പറഞ്ഞത്," പി.എ. മറുപടി പറഞ്ഞു. ​ആ വാക്കുകൾ ആദിയെ ഞെട്ടിച്ചു. ശിവാനി തന്നെ മറന്നു എന്ന് കേട്ട ഞെട്ടലിൽ അവൻ ഒന്നും പറയാതെ പുറത്തേക്ക് നടന്നു. ​"സാറിന് ഇത് എന്ത് പറ്റി?" പി.എ. അത്ഭുതത്തോടെ അവൻ പോകുന്നതും നോക്കി അവിടെത്തന്നെ നിന്നു. #📝 ഞാൻ എഴുതിയ വരികൾ #📔 കഥ #📙 നോവൽ #💞 പ്രണയകഥകൾ