தெலங்கானா மாநிலத்தில், கணவன் மற்றும் மாமியாரின் கடுமையான மன உளைச்சலுக்கு ஆளாகி, 5 மாத கர்ப்பிணியான 23 வயது இளம்பெண் சுஷ்மிதா தற்கொலை செய்துகொண்ட சம்பவம் ஒட்டுமொத்த சமூகத்தையும் உலுக்கியுள்ளது. திருமணமான வெறும் 18 மாதங்களிலேயே ஒரு பெண்ணின் வாழ்வு இப்படி வன்முறையால் முடிவுக்கு வந்திருப்பது, குடும்ப அமைப்புகளுக்குள் மறைந்திருக்கும் கொடூர முகத்தை மீண்டும் வெளிச்சமிட்டுக் காட்டியுள்ளது. மேதக் மாவட்டம் கடிபெத்தபூர் கிராமத்தைச் சேர்ந்த சுஷ்மிதாவிற்கும், அபிலாஷ் என்பவருக்கும் ஒன்றரை வருடங்களுக்கு முன்பு திருமணம் நடந்துள்ளது. சுஷ்மிதா 5 மாத கர்ப்பிணியாக இருந்த நிலையில், அவரது நடத்தையில் சந்தேகப்பட்ட கணவனும் மாமியாரும், “வயிற்றில் வளரும் குழந்தை யாருடையது?” என்ற கொடூரமான கேள்வியை எழுப்பியுள்ளனர். அதோடு நிறுத்தாமல், பிறக்கப்போகும் குழந்தைக்கு டி.என்.ஏ பரிசோதனை செய்து நிரூபிக்க வேண்டும் என்று சுஷ்மிதாவை உடலளவிலும் மனதளவிலும் சித்திரவதை செய்துள்ளனர். ஒரு பெண்ணின் கற்பின் மீதும் தாய்மையின் மீதும் சுமத்தப்பட்ட இந்த அவதூறு, அவரை தற்கொலை விளிம்பிற்கு தள்ளியுள்ளது. கடந்த ஜூன் 23 அன்று, சுஷ்மிதாவின் வளைகாப்பு விழா ஏற்பாடுகள் குறித்து பேசுவதற்காக அவரது பெற்றோர் மகளின் வீட்டிற்குச் சென்றுள்ளனர். அப்போது, இரு குடும்பத்தினரின் முன்னிலையிலும் கணவர் அபிலாஷ் டி.என்.ஏ பரிசோதனை செய்யக் கோரி பெரும் தகராறில் ஈடுபட்டுள்ளார். பெரியவர்கள் தலையிட்டு அதைத் தற்காலிகமாகத் தீர்த்து வைத்த போதிலும், பெற்றோர்கள் சென்ற பிறகு சுஷ்மிதா மீதான குடும்ப வன்முறை குறையவில்லை. இந்தத் தொடர் துன்புறுத்தலைத் தாங்க முடியாத சுஷ்மிதா, இரண்டு நாட்களுக்குப் பிறகு தனது இல்லத்தில் தூக்கில் தொங்கிய நிலையில் சடலமாகக் கண்டெடுக்கப்பட்டார். பாதிக்கப்பட்ட பெண்ணின் தாய் ஜனாபாய் அளித்த புகாரின் பேரில், அல்லாதுர்க் காவல் துறையினர் வழக்குப் பதிவு செய்து தீவிர விசாரணை நடத்தினர். சுஷ்மிதாவின் மரணத்திற்குக் காரணமான கணவர் ஜி. அபிலாஷ் மற்றும் அவரது தாயார் ஆகிய இருவரையும் போலீசார் உடனடியாகக் கைது செய்து நீதிமன்றக் காவலில் அடைத்துள்ளனர். அவர்கள் மீது பாரதிய நியாய சம்ஹிதாவின் கீழ், கணவன் அல்லது உறவினர்களால் கொடுமைப்படுத்துதல் (பிரிவு 85), தற்கொலைக்குத் தூண்டுதல் (பிரிவு 108) உள்ளிட்ட கடுமையான பிரிவுகளின் கீழ் வழக்குப் பதிவு செய்யப்பட்டுள்ளது. சட்டம் தன் கடமையைச் செய்தாலும், சந்தேகப் பேய்களால் ஒரு இளம் தாயின் உயிரும், பிறக்காத மழலையின் வாழ்வும் பறிபோனதுதான் ஈடுசெய்ய முடியாத சோகம். #ஜூன் 29 முக்கியச் செய்திகள் #இன்றைய ட்ரெண்டிங் நியூஸ்