भन्नाट चवीची चमचमीत भरवा कारली! कडू कारलं लागेल चविष्ट आणि होईल फेवरिट... कारलं नको म्हणणारेही कारल्याच्या भाजीच्या प्रेमात पडतील, पाहा भरवा कारल्याची चमचमीत रेसिपी... कडू कारलं साखरेत घोळलं, तुपात तळलं तरी कडू ते कडूच', असं आपल्याकडे कारल्याच्या बाबतीत म्हटलं जातं. कारल्याचा कडवटपणा अनेकांना फारसा आवडत नाही. कारल्याचं नाव काढलं की अनेकांच्या कपाळावर आठ्या पडतात. कारल्याच्या कडवट चवीमुळे प्रत्येकजण नाक मुरडून नकोच म्हणतात. म्हटलं तर कडवट कारली, पण याच कारल्याला मसाल्यांची आणि खमंग फोडणीची साथ मिळाली तर कारल्याचा याहून चविष्ट पदार्थच नाही! 'भरवा कारली' ही अशीच एक कारल्याची रेसिपी आहे, जी कारल्याची मूळ कडवट चव कमी करून त्याला मसालेदार आणि चविष्ट बनवते साहित्य :- १. कारली - ४ ते ५ (गरजेनुसार) २. मीठ - चवीनुसार ३. बेसन - १ कप ४. आमचूर पावडर - १ टेबलस्पून ५. गरम मसाला - १ टेबलस्पून ६. हळद - १ टेबलस्पून ७. लाल मिरची पावडर - १ टेबलस्पून ८. धणेपूड - १ टेबलस्पून ९. कांदा - १ कप (बारीक चिरलेला) १०. आलं - लसूण - हिरव्या मिरचीची पेस्ट - १ टेबलस्पून ११. शेंगदाण्याचा कूट - १ कप १२. पांढरे तीळ - १ टेबलस्पून १३. गूळ - २ ते ३ टेबलस्पून १४. कोथिंबीर - २ टेबलस्पून १५. पाणी - गरजेनुसार १६. तेल - ३ ते ४ टेबलस्पून १७. हिंग - १/२ टेबलस्पून १. सगळ्यात आधी कारली स्वच्छ धुवून त्याची सालं काढून घ्यावीत. ही सालं बाऊलमध्ये काढून त्यावर मीठ घालून तशीच ठेवावीत. २. कारल्यातील बिया काढून घ्याव्यात. मग कारल्यावर थोडे मीठ लावून ती पाण्याने २ ते ३ वेळा स्वच्छ धुवून घ्यावीत. मग कारल्याला बरोबर मधोमध कापून घ्यावे. ३. पॅनमध्ये बेसन घालून ३ ते ४ मिनिटे हलकेच भाजून घ्यावे. भाजून घेतलेलं बेसन एका बाऊलमध्ये काढून घ्यावे. मग यात कारल्याच्या साली, आमचूर पावडर, गरम मसाला, हळद, लाल मिरची पावडर, धणेपूड, बारीक चिरलेला कांदा, चवीनुसार मीठ, आलं - लसूण - हिरव्या मिरचीची पेस्ट, शेंगदाण्याचा कूट, पांढरे तीळ, गूळ बारीक चिरलेली कोथिंबीर घालावी. या मिश्रणात हलकेसे पाणी शिंपडून घ्यावे. मग चमच्याने सगळे मिश्रण कालवून एकजीव करून घ्यावे. ४. हे तयार स्टफिंग मधोमध अर्धवट चिरलेल्या कारल्यात भरुन घ्यावे. ५. एका पॅनमध्ये तेल गरम करुन त्यात थोडे हिंग घालून त्यावर ही स्टफिंग भरलेली कारली ठेवून द्यावीत. वर झाकण ठेवून मंद आचेवर कारली व्यवस्थित ५ ते १० मिनिटे शिजवून घ्यावीत. मस्त गरमागरम भरवा कारली खाण्यासाठी तयार आहेत. मऊमुलायम फुलके किंवा चपाती सोबत आपण ही भरवा कारल्याची चमचमीत भाजी अगदी ताव मारत चवीने खाऊ शकता. #😋आम्ही खादाडी🥧