वासिंद: विश्वरत्न, भारतरत्न, बोधिसत्व, प्रज्ञासुर्य,भारतीय संविधानाचे निर्माते, महामानव डॉ. बाबासाहेब आंबेडकर यांच्या १३५ व्या जयंती निमित्ताने अभिवादन कार्यक्रमाचे आयोजन करण्यात आले आहे. सिध्दार्थ फाऊंडेशन वासिंद आयोजीत "एक वही एक पेन" व शैक्षणिक साहीत्य संकलन उपक्रमात दि.१३ व १४ एप्रिल २०२६ रोजी सर्व समाजातील बंधू-भगिनींनी सहभागी होऊन गरजू-वंचित घटकातील विद्यार्थ्यांना शैक्षणिक साहीत्याचे सहकार्य करून, सिध्दार्थ फाऊंडेशन संस्थेच्या स्टॉलला प्रत्यक्ष भेट देऊन तसेच ज्यांना प्रत्यक्ष भेट देणे शक्य होणार नाही अशा बंधू -भगिनींनी संस्थेने दिलेल्या मोबाईल नंबरवर गुगल पे/फोन पे/ इतर माध्यमातून ऑनलाईन धम्मदान /देणगी पाठवू शकता. सदर धम्मदान व शै. साहीत्याच्या रुपाने महामानव डॉ. बाबासाहेब आंबेडकर यांना अभिवादन करु या.

क्रांतीसूर्य महात्मा ज्योतिबा फुले जयंती जिल्हा परिषद शाळा कांदळी येथे संपन्न भिवंडी प्रतिनिधी भिवंडी: भारतरत्न डॉक्टर बाबासाहेब आंबेडकर समता सप्ताह उपक्रमांतर्गत क्रांतीसूर्य महात्मा ज्योतिबा फुले जयंती जिल्हा परिषद शाळा कांदळी, भिवंडी येथे उत्साहात संपन्न झाली. विद्यार्थ्यांच्या हस्ते क्रांतीसूर्य, शिक्षणाचे उद्धार कर्ते समाजसुधारक महात्मा ज्योतिबा फुले यांचे प्रतिमेला पुष्पहार अर्पण व दीप प्रज्वलन करून अभिवादन करण्यात आले. सर्व विद्यार्थ्यांनी पुष्प अर्पण करून अभिवादन केले. क्रांतीसूर्य महात्मा ज्योतिबा फुले यांच्या शैक्षणिक कार्यावर शिक्षक अशोक गायकवाड यांनी प्रबोधन पर मार्गदर्शन केले. विद्यार्थ्यांनी महात्मा ज्योतिबा फुले यांच्या जीवन कार्यावर भाषणे सादर केली. यावेळी मुख्य शिक्षिका जयश्री पष्टे, शिक्षक अशोक गायकवाड, अंगणवाडी कार्यकर्ती कविताताई जाधव, मदतनीस गोदावरी ताई व विद्यार्थी उपस्थित होते

पत्रकार भवनासमहापौरांची सदिच्छा भेट नागपूर - टिळक पत्रकार भवनाला महापौर नीता ठाकरे यांनी सदिच्छा भेट दिली. त्यावेळी टिळक पत्रकार भवनाचे उपाध्यक्ष प्रभाकर दुपारे आणि ज्येष्ठ पत्रकार श्यामकांत पात्रीकर यांनी त्यांचे स्वागत केले. यावेळी मनपा स्थायी समिती अध्यक्ष शिवानी दाणी, सभापती अश्विनी जिचकार, मीडिया प्रमुख पवन तिवारी उपस्थित होते. 👆🏾

चंद्रपूर: जिल्ह्यात नेहेमीच रक्ताचा तुटवडा असतो आणि आता चंद्रपूर जिल्ह्यातील उन्हाळा तर सर्वांनाच सुपरिचित आहे. रक्ताची डिमांड खूप आहे आणि सप्लाय कमी असल्यामुळे आपण स्वयंप्रेरणेने रक्तदान करा व इतरांना सुद्धा रक्तदान करण्यास सांगा. रक्तदान करणे हे आरोग्यासाठी खूप फायदेशीर व महत्वाचे आहे त्यामुळे आपण सर्वांनी रक्तदानाला एक चळवळ बनवूया .

महाराष्ट्राला स्टार्टअपचे अग्रगण्य केंद्र बनवण्यास सरकार कटिबद्ध -राज्यमंत्री डॉ. पंकज भोयर यांचे प्रतिपादन -'विकसित भारत स्टार्ट-अप कॉन्क्लेव्ह'चा समारोप -टॉप कॅटेगिरी अवार्ड १ लाख रुपयांचा प्रथम नागपूर येथील उत्कर्ष पांडे यांना नागपूर :- महाराष्ट्राला स्टार्टअपचे अग्रगण्य केंद्र बनवण्यास सरकार कटीबद्ध असल्याचे प्रतिपादन शालेय शिक्षण आणि गृह विभागाचे माननीय राज्यमंत्री डॉ. पंकज भोयर यांनी केले. राष्ट्रसंत तुकडोजी महाराज नागपूर विद्यापीठ इंक्युबॅशन सेंटर, विदर्भ इकॉनोमिक डेव्हलपमेंट कौन्सिल (VED) आणि लेमन आयडियाज' (Lemon Ideas) यांच्या संयुक्त विद्यमाने आयोजित 'विकसित भारत स्टार्ट-अप कॉन्क्लेव्ह'चा समारोपिय कार्यक्रम शनिवार, दि. ११ एप्रिल २०२६ रोजी पार पडला. यावेळी प्रमुख अतिथी म्हणून राज्यमंत्री डॉ. भोयर बोलत होते. अंबाझरी मार्गावरील गुरुनानक भवन येथे आयोजित कार्यक्रमाला प्रमुख अतिथी म्हणून महाराष्ट्र राज्याचे शालेय शिक्षण आणि गृह विभागाचे माननीय राज्यमंत्री डॉ. पंकज भोयर, माननीय कुलगुरू डॉ. मनाली क्षीरसागर, महाराष्ट्र स्टेट इनोव्हेशन सोसायटीचे मुख्य कार्यकारी अधिकारी डॉ. श्रीकांत पाटील, वेदच्या अध्यक्ष डॉ. रीना सिन्हा, लेमन आयडियाजचे संस्थापक दीपक मिनारिया, उद्योजक श्रीयांश उगेमुगे यांची उपस्थिती होती. देशामध्ये आणि महाराष्ट्रामध्ये स्टार्टअप संस्कृती निर्माण व्हावी यासाठी प्रधानमंत्री श्री. नरेंद्र मोदी आणि मुख्यमंत्री श्री. देवेंद्र फडणवीस अधिक महत्त्व देत असल्याचे समारोप समारंभाला संबोधित करताना, शालेय शिक्षण आणि गृह विभागाचे राज्यमंत्री डॉ. पंकज भोयर यांनी सांगितले. प्राचीन भारतीय कौशल्याचा विकास करीत महाराष्ट्र नवोन्मेष आणि औद्योगिक क्षेत्रात जगात अग्रेसर बनेल, असे डॉ. भोयर म्हणाले. मागील दहा वर्षांपासून नागपूर शहराने विकसित शहराच्या दिशेने वाटचाल सुरू केली आहे. आज नवीन नागपूर विकसित होत असल्याचे डॉ. भोयर म्हणाले. माननीय कुलगुरू डॉ. मनाली क्षीरसागर यांनी मार्गदर्शन करताना या महोत्सवातून अव्वल ठरणाऱ्या १० स्टार्ट- अपला प्रत्यक्ष मार्गदर्शनासह सर्वतोपरी सहकार्य विद्यापीठाच्या वतीने केले जाईल, असे सांगितले. या स्टार्टअपला विद्यापीठाच्या इंक्युबॅशन केंद्रात अधिक संशोधन करता येईल. सोबतच विद्यापीठाने निश्चित केलेल्या निधी मधून आर्थिक मदत देखील केली जाणार असल्याचे कुलगुरू डॉ. क्षीरसागर यांनी सांगितले. स्टार्टअप संस्कृती निर्माण व्हावी, या उद्देशाने विद्यापीठाने निधीची तरतूद केली असून आपण सर्वांनी एकत्र येत स्टार्टअप संस्कृतीला मिशन मोडवर न्यावे, असे आवाहन त्यांनी यावेळी केले. प्राथमिक शिक्षणापासून विद्यार्थ्यांमध्ये स्टार्टअप संस्कृती रुजविण्यावर त्यांनी अधिक भर दिला. महाराष्ट्र स्टेट इनोव्हेशन सोसायटीचे मुख्य कार्यकारी अधिकारी डॉ. श्रीकांत पाटील यांनी राज्यातील शाळा आणि महाविद्यालयांमधील पारंपारिक प्रयोगशाळांचे रूपांतर 'नवोन्मेष आणि कौशल्य विकास प्रयोगशाळा' व्हाव्यात असे सांगितले. उद्योगांना पूरक असेल अशी शिक्षण व्यवस्था निर्माण करणे तसेच त्या प्रकारे मानसिकता निर्माण करणे गरजेचे असल्याचे सांगितले. महाराष्ट्र देशाची स्टार्टअप राजधानी ठरेल, असे देखील डॉ. पाटील म्हणाले. आपल्या प्रास्ताविक भाषणात रीना सिन्हा यांनी VED च्या ३० वर्षांच्या वाटचालीचा आणि प्रादेशिक विकासातील संस्थेच्या योगदानाचा विशेषत्वाने उल्लेख केला. दीपक मिनारिया यांनी 'लेमन आयडियाज'ची (Lemon Ideas) स्टार्ट-अप्सच्या जडणघडणीतील भूमिका स्पष्ट केली. यावेळी उद्योजक श्रीयांश उगेमुगे यांनी मनोगत व्यक्त केले. पुरस्कारांचे वितरण या कार्यक्रमात प्रमुख अतिथींच्या हस्ते विविध पुरस्कारांचे वितरण करण्यात आले. जूनियर कॅटेगिरी मध्ये प्रथम पुरस्कार अमृतसर येथील गुरान सिंह या विद्यार्थ्याने 'गोल्डन इयर्स' या स्टार्टअपसाठी प्राप्त केला. द्वितीय पुरस्कार ग्रेटर नोएडा येथील आर्यत सहाय व वत्सल गर्ग यांनी डीजीरक्षक या स्टार्टअपकरिता, तृतीय पुरस्कार नागपूर येथील अंश मुलमुले यांनी स्मार्ट साईट स्टार्टअप करिता प्राप्त केला. प्रोत्साहनपर पुरस्कार मुंबई येथील अवित चड्डा या विद्यार्थ्यांने अविर आर्ट चॅम्पियन स्टार्टअपसाठी प्राप्त केला. इनोव्हेशन ट्रॅक कॅटेगिरीत प्रथम पुरस्कार दीप नंदा व सुधाकर जैन यांनी इको ईटी टेक्नॉलॉजी प्रायव्हेट लिमिटेड नवी दिल्ली या स्टार्टअप, द्वितीय पुरस्कार मनोज परमार व दिनेश सोनी यांनी व्हिजन फोर्ज वेंचर्स प्रायव्हेट लिमिटेड संचेर राजस्थान स्टार्टअप तर तृतीय पुरस्कार ऍव्स लाईफ सायन्स प्रायव्हेट लिमिटेड बेंगलोरने प्राप्त केला. पॉपुलर चॉईस अवार्ड अवयाय राठी, रोहीन वाधवा, अर्जुन तावरे या विद्यार्थ्यांनी रिफाइन टेक्नॉलॉजी (एआय कंडीशनर) या स्टार्टअप करिता प्राप्त केला. नागपूर स्टार्टअप अवॉर्ड शुकल सोल्युशन्स प्रायव्हेट लिमिटेड या स्टार्टअप करिता डॉ. सुमती राव, तनुश्री ठाकरे, साहु यांनी प्राप्त केला. टॉप कॅटेगिरी अवार्ड १ लाख रुपयांचा प्रथम पुरस्कार नागपूर येथील उत्कर्ष पांडे यांनी टेकास फुटकेअर प्रायव्हेट लिमिटेड नागपूर, द्वितीय पुरस्कार तेजा राणी यांनी अलर्ट २४ या स्टार्टअप करिता तर तृतीय पुरस्कार चेतन बोहरा यांनी काॅर्डीफार्म प्रायव्हेट लिमिटेड पुणे यांनी प्राप्त केला.

नागपूर -क्रांतीसुर्य ज्योतिबा फुले द्विजन्म शताब्दी निमित्ताने अभिवादन करण्यासाठी नागपुरतील कॉटन मॉर्केट मधील महात्मा फुले यांच्या पुतळ्याला हार अर्पण करण्याकरिता परिवर्तन विचार मंचाचे अध्यक्ष तसेच बहुजन सौरभचे कार्यकारी संपादक विलास गजभिये यांनी अभिवादन करून या कार्यक्रमासाठी विशेष करून आदरणीय भंदत नागदिपंकर भन्तेजी यांनी आपले विचार माडले तसेच या कार्यक्रमा करिता विशेष करून नाटककार रंगराज गोस्वामी महात्मा फुले यांच्या वेशभूषा मध्ये आणि डाँ विणा राऊत यांनी क्रांती ज्योति सावित्रीबाई यांच्या वेषभूषा सादर करून अभिवादन केले . या कार्यक्रमासाठी परिवर्तन विचार मंचाचे सर्वच कार्यकर्ते उपस्थित होते आणि इतर संघटनाचे नागरिक सम्मलित झाले .

प्रतिनिधी हिंगणा/ उत्खननात मोठ्या प्रमाणात अनियमितता आणि भ्रष्टाचार होत असल्याच्या तक्रारी राज्य सरकारकडे येत आहे. लहान उत्खननासाठी तहसीलदार किंवा प्रांत अधिकारी यांच्याकडून परवानगी दिली. मात्र मोठ्या प्रमाणात भ्रष्टाचार होत असल्याच्या तक्रारी राज्य सरकारकडे येत आहे. यामुळे सर्व अधिकार जिल्हा अधिकारी यांच्याकडे वर्ग करण्याचा निर्णय घेण्यात आला. तसेच गैरप्रकारात सहभागी असलेल्या तहसीलदार आणि प्रांत अधिकारी यांची चौकशी करून दोषींवर कारवाईची तरतूद करण्यात आली आहे. पुणे जिल्हा प्रशासनाने राबविलेल्या डिजिटल ट्रॅकिंग ( GPS ) संपुर्ण राज्यात लागू करण्याचा निर्णय घेण्यात आला आहे.

संपादकीय: दीक्षाभूमीच्या साक्षीने... ज्ञानाच्या महासूर्याचा जन्मोत्सव! "शिका, संघटित व्हा आणि संघर्ष करा!" हा महामंत्र देणारे विश्वरत्न बोधिसत्व डॉ. बाबासाहेब आंबेडकर यांची १३५ वी जयंती आपण साजरी करत आहोत. नागपूर ही केवळ एक शहर नसून ती 'धम्मक्रांतीची' आणि 'दीक्षाभूमीची' पवित्र भूमी आहे. याच भूमीवर बाबासाहेबांनी लाखो अनुयायांना धम्माची दीक्षा देऊन गुलामीच्या शृंखला तोडल्या होत्या. आज 'डॉ. बाबासाहेब आंबेडकर विद्यार्थी संघ, नागपूर' च्या माध्यमातून त्यांच्या अफाट ग्रंथसंपदेचा जागर होणे, हा या जयंतीचा सर्वात मोठा बहुमान आहे. १. दीक्षाभूमीचा वारसा आणि ग्रंथसंस्कृती नागपूरशी बाबासाहेबांचे नाते रक्ताचे आणि विचारांचे आहे. १९५६ च्या धम्मचक्र प्रवर्तनावेळी त्यांनी दिलेला 'भगवान बुद्ध आणि त्यांचा धम्म' हा ग्रंथ आजही आपल्यासाठी जगण्याचा मार्गदर्शक आहे. बाबासाहेबांचे ग्रंथांवरचे प्रेम इतके उत्कट होते की, त्यांनी स्वतःच्या निवासासाठी 'राजगृह' नावाचे भव्य ग्रंथालय उभारले. एका बाजूला 'रुपयाची समस्या' लिहून देशाच्या अर्थव्यवस्थेचा (RBI) पाया रचणारे बाबासाहेब, तर दुसऱ्या बाजूला 'भारतीय राज्यघटना' लिहून जगातील सर्वात मोठ्या लोकशाहीला दिशा देणारे शिल्पकार! २. नागपूरच्या मातीत घुमलेला समतेचा आवाज जयंतीच्या निमित्ताने जेव्हा आपण नागपूरच्या रस्त्यांवर भीमगर्जना ऐकतो, तेव्हा आपल्याला त्यांच्या 'जातींचा निर्मूलन' (Annihilation of Caste) आणि 'शूद्र पूर्वी कोण होते?' या ग्रंथांची आठवण येते. त्यांनी केवळ भाषणे दिली नाहीत, तर ऐतिहासिक पुराव्यानिशी दलितांना, शोषितांना आणि महिलांना 'माणूस' म्हणून जगण्याचा अधिकार मिळवून दिला. 'हिंदू कोड बिल' मांडून त्यांनी भारतीय स्त्रियांना खऱ्या अर्थाने स्वतंत्र केले. ३. स्थानिक उत्साह आणि वैचारिक क्रांती आज नागपूरच्या घराघरातून भीमजयंतीचा उत्साह ओसंडून वाहत आहे. दीक्षाभूमीवर होणारी गर्दी आणि बुद्ध विहारांमधील प्रार्थना ही त्यांच्या विचारांच्या जिवंतपणाची साक्ष आहे. परंतु, खऱ्या अर्थाने जयंती साजरी करणे म्हणजे बाबासाहेबांनी लिहिलेले हे ३७ ग्रंथ वाचणे आणि ते आचरणात आणणे होय. "वाचाल तर वाचाल" हा त्यांचा संदेश आजच्या पिढीने शिरसावंद्य मानला पाहिजे. ४. विद्यार्थी संघाचा संकल्प नागपूरच्या तरुण विद्यार्थ्यांनी बाबासाहेबांच्या साहित्याचा हा जो अनमोल ठेवा संकलित केला आहे, तो कौतुकास्पद आहे. हा केवळ आकडा नसून ही क्रांतीची ३७ शस्त्रे आहेत. आजच्या जयंतीदिनी आपण संकल्प करूया की, आपण केवळ मिरवणुकीत सामील होणार नाही, तर बाबासाहेबांच्या विचारांचे 'चालते-बोलते ग्रंथ' बनू. निष्कर्ष: बाबासाहेब म्हणत, "ग्रंथ माझे खरे मित्र आहेत." या जयंतीला आपणही या 'मित्रांशी' मैत्री करूया. प्रज्ञा, शील आणि करुणेचा हा वारसा पुढे नेणे हीच त्या महामानवाला खरी मानवंदना ठरेल. विश्ववंद्य महामानवास जयंतीनिमित्त कोटी कोटी प्रणाम! डॉ बाबासाहेब आंबेडकर विद्यार्थी संघ नागपूर 7722022817

तालुका : कोरची दिनांक १२ एप्रिल २०२ कोरची: शिकारीटोला येथे आमदार श्री रामदासजी मसराम यांनी भेट देऊन गावकऱ्यांशी संवाद साधला. यावेळी ग्रामस्थांनी पाणी, रस्ते व इतर मूलभूत सुविधांबाबतच्या विविध समस्या मांडल्या. आमदार मसराम यांनी त्या समस्यांची दखल घेत संबंधित विभागाशी समन्वय साधून लवकरात लवकर निराकरण करण्याचे आश्वासन दिले. त्या प्रसंगी सोबत काँग्रेस कमिटी तालुकाध्यक्ष कोरची मनोज अग्रवाल, माजी जिल्हा परिषद सदस्य रामसुराम काटेंगे, काँग्रेस कमिटी जिल्हा उपाध्यक्ष सदरूभाई भामानी उपस्थित होते

कैमुल (ता. कोरची) येथे समस्या निवारणासाठी चर्चा सत्र; आमदार रामदास मसराम यांची उपस्थिती जिल्हा प्रतिनिधी गडचिरोली कोरची, (दि. १२ एप्रिल २०२६):तालुक्यातील कैमुल येथे विविध स्थानिक समस्यांवर तोडगा काढण्यासाठी चर्चा सत्राचे आयोजन करण्यात आले होते. या सत्राला आमदार श्री रामदासजी मसराम यांनी उपस्थित राहून नागरिकांशी थेट संवाद साधला. यावेळी कैमुल परिसरातील रस्ते, पाणीपुरवठा, वीज, आरोग्य व इतर मूलभूत सुविधांशी संबंधित अनेक समस्या नागरिकांनी आमदार रामदास मसराम यांनी निदर्शनास आणून दिल्या. गावकऱ्यांच्या वतीने विविध मागण्यांचे निवेदनही आमदार श्री रामदासजी मसराम यांना सादर करण्यात आले. आमदार मसराम यांनी सर्व समस्या लक्षपूर्वक ऐकून घेत संबंधित विभागांमार्फत तात्काळ पाठपुरावा करून समस्यांचे निराकरण करण्याचे आश्वासन दिले. तसेच शासनाच्या विविध योजनांचा लाभ नागरिकांपर्यंत पोहोचविण्यासाठी प्रशासनाला सूचना देण्यात येतील, असेही त्यांनी यावेळी सांगितले. या कार्यक्रमाला स्थानिक नागरिक मोठ्या संख्येने उपस्थित होते.