#📙 നോവൽ #📔 കഥ #💞 പ്രണയകഥകൾ MY DOCTOR ❤️35 ആ രാത്രി ബൈക്കെടുത്തു സിറി പോയത് വൈശാഖിന്റെ വീട്ടിലേക്കായിരുന്നു. അവന്റെ വീടിന്റെ താഴെയെത്തി ഫോണിൽ വിളിച്ചതും വൈശാഖ് വന്നു ഡോർ തുറന്നു. കോളേജിലേക്കിട്ട അതെ വസ്ത്രത്തിൽ ക്ഷീണിച്ച മുഖത്തോടെ വിഷാദഭാവത്തിൽ നിൽക്കുന്ന സിറിയെ കണ്ടപ്പോഴേ നല്ലതല്ലാത്ത എന്തോ നടന്നിട്ടുണ്ടെന്നു വൈശാഖിനു മനസിലായി. കുറച്ചു മുന്നേ അഞ്ചു എന്റെ കൂടെ വീട്ടിലേക്ക് വരുന്നുണ്ടെടാ എന്നും പറഞ്ഞു മെസ്സേജ് അയച്ചിട്ടവനാണിപ്പോൾ ഇങ്ങനെ വന്ന് നിൽക്കുന്നത്. "എന്താടാ..... എന്ത് പറ്റി?" സിറിയെ നോക്കി ആവലാതിയോടെ വൈശാഖ് ചോദിച്ചു. സിറി ഒന്നും മിണ്ടാതെ വേഗത്തിൽ അവനെ പുണർന്നു. വൈശാഖിന്റെ നെഞ്ചിടിച്ചു. കാര്യമായിട്ടെന്തോ ഉണ്ടെന്ന് അവനു തീർച്ചയായി. "വാ....." സിറിയുടെ തോളിൽ കയ്യിട്ട് വൈശാഖ് അവനെ അകത്തേക്ക് കൊണ്ട് പോയി. അവനെ സോഫയിൽ ഇരുത്തി അകത്തു പോയി തണുത്ത വെള്ളത്തിന്റെ ഒരു കുപ്പിയുമായി വൈശാഖ് വന്നു അത് സിറിക്ക് നേരെ നീട്ടി. സിറിയത് വാങ്ങി ആർത്തിയോടെ മുഴുവനും കുടിച്ചു തീർത്തു. " പ്രശ്നം എന്താന്ന് പറയെടാ.... നിന്നെ ഇങ്ങനെ കാണുമ്പോൾ പേടിയാകുന്നു. "  തളർച്ചയോടെ വൈശാഖ് പറഞ്ഞു. കുറച്ചു നേരത്തെ മൗനത്തിനു ശേഷം സിറി പറഞ്ഞു തുടങ്ങിയ കാര്യങ്ങൾ കേട്ട് തലക്ക് അടി കിട്ടിയ പോലെ വൈശാഖ് ഇരുന്നു പോയി. എല്ലാം പറഞ്ഞു തീർത്തു നിസ്സഹായതയോടെ തല കുനിച്ചിരിക്കുന്നവനോട് എന്ത് പറയണമെന്ന് വൈശാഖിന് അറിയുന്നുണ്ടായിരുന്നില്ല. ഒന്നും മിണ്ടാതെയവർ അവിടിരുന്നു. " എന്തിനു വേണ്ടിയും ഞാൻ എന്റെ അപ്പനെ വിഷമിപ്പിക്കില്ലെടാ...... പക്ഷെ ഈ ഹാർട്ട്‌ ബ്രേക്ക്‌ എങ്ങനെ അതിജീവിക്കണം എന്നെനിക്ക് മനസ്സിലാവുന്നില്ല. " നെറ്റിയിൽ കൈത്താങ്ങി ഇരുന്ന് സിറി പറഞ്ഞു. " വാ വന്നു ഫ്രഷ് ആയി എന്തേലും കഴിക്ക്. എന്നിട്ട് നാളെ നമുക്ക് സംസാരിക്കാം. " അതിനൊരു മറുപടി പറയാതെ വൈശാഖ് അവനെ പിടിച്ചെണീപ്പിച്ചു. സിറി എണീറ്റു. അത് തന്നെയാണ് നല്ലതെന്നവന് തോന്നി. ഒരുറക്കം കഴിഞ്ഞാൽ ഒരുപക്ഷെ കുറച്ചു ആശ്വാസം കിട്ടിയേക്കും. " ഞാൻ ഫ്രഷ് ആയി കിടന്നോളാം. ഫുഡ്‌ വെണ്ട. വിശപ്പില്ല..... " സിറി പറഞ്ഞതിന് എതിർപ്പൊന്നും പറയാതെ വൈശാഖ് തലയാട്ടി. ഈ നേരം അവന്റെ കംഫർട് എന്താണോ അത് ചെയ്യട്ടെ എന്നാണ് അവനോർത്തത്. സിറി ഫോൺ എടുത്തു നോക്കി. ഏഥന്റെ കുറെ  മിസ്സ്ഡ് കാൾസ് ഉണ്ടായിരുന്നു. വാട്സാപ്പ് എടുത്ത് വൈശാഖിന്റെ വീട്ടിൽ ഉണ്ടെന്ന് ഏഥന് മെസ്സേജ് അയച്ചിട്ട് സിറി ഫോൺ പോക്കറ്റിലേക്കിട്ട് വൈശാഖിന്റെ റൂമിലേക്ക് പോയി. അസ്വസ്തമായ മനസിനെ കണ്ട്രോൾ ചെയ്യാൻ പാടുപെടുന്നുണ്ടെങ്കിലും എല്ലാം നന്നായി നടക്കണേ എന്നവൻ ആത്മാർത്ഥമായി തന്നെ ആഗ്രഹിക്കുന്നുണ്ടായിരുന്നു. ***************** മുഖത്തേക്ക് പ്രകാശം അടിക്കുന്നതിന്റെ അസ്വസ്ഥതയോടെ അഞ്ചു കണ്ണുകൾ പതുക്കെ തുറന്നു. ഗ്ലാസ്‌ ജനൽ മറച്ചിട്ട വെള്ള കർട്ടൻ കുറിച്ചിട്ട ഫാനിന്റെ കാറ്റിൽ പാറി നീങ്ങുന്നതിന്റെ ബാക്കി എന്നോണം സൂര്യപ്രകാശം അകത്തേക്ക് വരുന്നുണ്ടായിരുന്നു. അവളൊന്ന് പുഞ്ചിരിച്ചു. നല്ലൊരു ഉറക്കം കഴിഞ്ഞതിന്റെ എല്ലാ ഉന്മേഷവും അഞ്ജുവിന് തോന്നി. എണീക്കാൻ ശ്രമിച്ചപ്പോഴാണ് ഒരു ബലിഷ്ഠമായ കൈ തന്റെ ഉദരത്തെ വലയം ചെയ്തു കിടക്കുകയാണെന്നവൾക്ക് മനസ്സിലാകുന്നത്. അഞ്ചു വിറച്ചു പോയി പിൻ കഴുത്തിൽ പതിയുന്ന ചൂട് നിശ്വാസവും അവളന്നേരം തിരിച്ചറിഞ്ഞു. അഞ്ചു വെപ്രാളപ്പെട്ടു തല ചരിച്ചു പുറകിലേക്ക് നോക്കി. അവളെ പുറകിൽ നിന്നും പുണർന്നു അഴിഞ്ഞു കിടക്കുന്ന ആ മുടിയിഴകൾക്കുള്ളിലൂടെ പിൻകഴുത്തിലേക്ക് മുഖം പൂഴ്ത്തി ഏഥൻ സുഖമായങ്ങനെ ഉറങ്ങുകയാണ്.  ഏഥൻ തലേന്ന് കിടന്നിടത് തന്നെയാണ് ഇപ്പോഴും കിടക്കുന്നത് പക്ഷെ കട്ടിലിന്റെ മറ്റേ അറ്റത്തു കിടന്നിരുന്ന അഞ്ചു ഇപ്പോൾ കിടക്കുന്നത് ഏഥന്റെ തൊട്ടടുത്താണ്. താൻ ആണ് നീങ്ങി ഇവിടെയെത്തിയതെന്ന് അവൾക്ക് ഉറപ്പായി. പണ്ടുമുതൽക്കെ കിടന്നിടത് നിന്നും തന്നെ എണീറ്റ ചരിത്രം തനിക്കില്ലല്ലോ . അഞ്ചു എന്ത് ചെയ്യണമെന്നറിയാതെ കുഴങ്ങി. ആ കൈ എടുത്തിടാൻ അവളൊന്ന് ശ്രമിച്ചു നോക്കി. പക്ഷെ  പുണരുന്നതിന്റെ മുറുക്കം കൂടിയതല്ലാതെ മറ്റൊന്നും നടന്നില്ല.  പെട്ടന്ന് ഏഥൻ ഒന്ന് കുറുകി ഒന്നു കൂടെ അവളോട് ചേർന്ന് കിടന്നു.  അഞ്ജുവിന്റെ ഹൃദയം ശക്തമായി ഇടിച്ചു. ഇനിയും ഇങ്ങനെ കിടന്നാൽ ശരിയാവില്ലെന്ന് തോന്നി സകല ശക്തിയുമെടുത്തവൾ കുതറി നീങ്ങി. ആ കയ്യിൽ നിന്നും മോചിതയായി നീങ്ങി കിടന്നതും ഏഥൻ ഞെട്ടലോടെ കണ്ണുകൾ തുറന്നു . ഏഥൻ അഞ്ജുവിനെ മിഴിച്ചു നോക്കി. അവൾ ഒന്നും പറഞ്ഞില്ല.  " ഗുഡ് മോർണിംഗ്...." ഉറക്കം എണീറ്റുടനെയുള്ള ഹസ്‌കി വോയ്‌സിൽ ഏഥൻ പറഞ്ഞു.  അഞ്ചു ഉമിനീരിറക്കി പോയി. ഹോട്ട് എന്നൊക്കെ പറഞ്ഞാൽ കുറഞ്ഞു പോവും. അത്രത്തോളം ബ്യൂട്ടി ആയിരുന്നു ഏഥനെ ആ നേരം കാണാൻ. അവനിത്രനേരം തന്നെ കെട്ടിപിടിച്ചു കിടക്കുകയായിരുന്നെന്ന യാതൊരു ഭാവവും ഏഥനില്ലാത്തത് അഞ്ജുവിനെ കുറച്ചു അതിശയപെടുത്തി .  ഇരുവരും പരസ്പരം മുഖത്തോട് മുഖം നോക്കി കട്ടിലിന്റെ രണ്ടറ്റത്തായി അതേ കിടപ്പ് കിടന്നു. ഉറക്കം ഉണർന്ന് ആകെ അലങ്കോലമായി ഇരിക്കുന്ന അഞ്ജുവിനെ കാണും തോറും തന്റെ ഉള്ളിലുള്ള ചിന്തകൾ അതിന്റെ മറ്റു തലങ്ങളിലേക്ക് പോകുന്നതവന് വ്യക്തമായി മനസിലാവുന്നുണ്ടായിരുന്നു.  " എനിക്ക് അങ്ങനൊരു past ഇല്ലാതിരുന്നെങ്കിൽ എന്ന് ആദ്യമായി ഞാൻ ചിന്തിച്ചു പോവുകയാണ് അഞ്ചു....." ഒരു വേദനയോടെ ഏഥൻ പറഞ്ഞു.  " why? "  " ഇപ്പോൾ എന്തിനേക്കാളും നീയെന്നെ ഭ്രാന്തു പിടിപ്പിക്കുന്നു ..."   " ഞാനോ സിറിയോ എന്നൊരു സിറ്റുവേഷൻ വന്നാൽ ഏഥൻ എന്ത് ചെയ്യും ? " അഞ്ചു ശാന്തമായ ഭാവത്തിൽ ചോദിച്ച ചോദ്യം കേട്ടതും ഏഥൻ ഒന്ന് ഞെട്ടി. എങ്കിലും അവൻ പുഞ്ചിരിച്ചു. " തീർച്ചയായും ഞാൻ എന്റെ മകനെ തിരഞ്ഞെടുക്കും..... പക്ഷെ ഇത്രകാലം ജീവിച്ചത് പോലെ ഞാൻ ഇനിയും ഒറ്റക്ക് ജീവിക്കും . ഇത് വരെ ഓർമകളിൽ സൂക്ഷിക്കാൻ പോലും എനിക്കൊരു മുഖമുണ്ടായിരുന്നില്ലല്ലോ പക്ഷെ ഇനിയങ്ങോട്ട് അങ്ങനൊന്നുണ്ട്. ആ ചിന്തകൾ എനിക്കൊരു പുതിയ ഊർജം നൽകുന്നുണ്ട്......"  അഞ്ചു ഒന്നും പറയാതെ കിടക്കയിൽ നിന്നെണീറ്റു. അവളുടെ ഉള്ളിൽ എന്താണെന്ന് ഏഥനു ഒരു ധാരണയും കിട്ടിയില്ല.  അഞ്ചു നേരെ ബാത്റൂമിലേക്ക് കയറി. ഏഥനും എണീറ്റു. ക്ലോക്കിലേക്ക് നോക്കിയ ഏഥൻ ഞെട്ടി പോയി സമയം 9 മണി കഴിഞ്ഞിട്ടുണ്ട്. എത്രയോ വർഷങ്ങളായി 6 മണിക്ക് മുന്നേ എണീക്കാറുള്ളതായിരുന്നു ഏഥൻ. ഇന്ന് ഇത്രയും നേരം കിടന്നുറങ്ങിയതിൽ അവൻ അതിശയിച്ചു പോയി.  ഫോൺ എടുത്തു നോക്കിയപ്പോൾ സീമേച്ചിയുടെയും ഹോസ്പിറ്റലിൽ നിന്നുള്ളതുമായ ഒരുപാടു മിസ്സ്ഡ്കാളുകൾ കിടപ്പുണ്ടായിരുന്നു. സീമേച്ചി വന്നു കാണണം .  വാതിൽ തുറക്കുന്നത് കാണാഞ്ഞു തിരിച്ചു പോയി കാണും. ജീവിതത്തിൽ വർക്കിന് കേറിയിട്ട് ആദ്യമായിട്ടാണ് ലേറ്റ് ആയതിന് ഹോസ്പിറ്റലിൽ നിന്നും വിളിക്കുന്നത്. ആദ്യം സീമേച്ചിയെ വിളിച്ചു വരേണ്ടെന്ന് പറഞ്ഞു. പിന്നെ ഹോസ്പിറ്റലിൽ വിളിച്ചു ലീവും പറഞ്ഞു. ഇന്ന് ഹോസ്പിറ്റലിൽ പോയാൽ മനസമാധാനത്തോടെ ജോലി ചെയ്യാൻ കഴിയില്ലെന്നവന് ഉറപ്പാണ്. ഈയൊരു  ദിവസം  എന്തൊക്കെയോ കാര്യങ്ങളിൽ കാര്യമായ മാറ്റങ്ങൾ വന്നു എന്നോർത്തു ഏഥൻ വാതിൽ തുറന്നു പുറത്തിറങ്ങി. മുൻവാതിലും തുറന്നു സിറ്റ്ഔട്ടിലേക്ക് ചെന്നു. മുറ്റത്തു കിടക്കുന്ന പത്രം എടുത്തു ഉമ്മറത്തേക്ക് വച്ചു. ടീഷർട്ട് ഊരി മുറ്റത്തിട്ടിരിക്കുന്ന ഒരു ചെയറിലേക്ക് ഇട്ട് ബോഡി മുഴുവനായി ഒന്ന് സ്ട്രെച്ച് ചെയ്തു. ബലിഷ്ടമായ ആ ശരീരത്തിലേക്ക് അധികം ചൂടില്ലാത്ത സ്വർണവർണമുള്ള വെയിലടിച്ചു.  മുറ്റത്തുള്ള മാവിൽ നിന്നും മാവിലയും മാങ്ങയും നിലം മുഴുവൻ കൊഴിഞ്ഞു കിടക്കുകയായിരുന്നു. അതിനൊരു പ്രത്യേക ഭംഗിയുണ്ടെന്നവന് തോന്നി. മുറ്റത്തിന്റെ സൈഡിലുള്ള ചെറിയ ഗാർഡനിൽ പല വിലകൂടിയ ചെടികളിലും പൂക്കൾ വിരിഞ്ഞു നിൽക്കുന്നു. ഗേറ്റിനു സൈഡിലായുള്ള പലനിറത്തിലുള്ള കടലാസ് പൂക്കളും പുതിയ പുലരിക്ക് പല വർണങ്ങൾ നൽകി പൂത്തു വിടർന്ന് ആരെയും ആകർഷിക്കും വിധം അങ്ങനെ നിൽക്കുകയാണ് . എല്ലാം ആദ്യമായി കാണുന്ന പോലെ ഏഥൻ സസൂക്ഷ്മം വീക്ഷിച്ചു. മനസിപ്പോൾ അതിന്റെ ഏറ്റവും ശാന്തമായ അവസ്ഥയിലായിരുന്നു . ആരോടും ഒരു രഹസ്യങ്ങളുമില്ലാതെ ശൂന്യമാണിപ്പോൾ . ആ ശൂന്യത തരുന്നൊരു ശാന്തത.... ഓരോന്നോർത്തു കുറച്ചു നേരം മുറ്റത്തൂടെ ഏഥൻ നടന്നു. അതിനു ശേഷം നേരെ അകത്തേക്ക് കയറി.  ടോയ്‌ലെറ്റിൽ പോയി, അവിടിരിക്കുന്ന പുതിയ ബ്രഷ് പാക്കറ്റ് ഒന്ന് പൊട്ടിച്ചു പല്ല് തേച്ചു മുഖവും കഴുകി അഞ്ചു പുറത്തിറങ്ങി. ഏഥൻ പുറത്തു പോയെന്നവൾക്ക് മനസിലായി. ടേബിളിൽ ഇരിക്കുന്ന ബാഗ് തുറന്ന് അതിൽ നിന്നും ഫോൺ എടുത്തു. ആരുടെയൊക്കെയോ മിസ്സ്ഡ് കാൾ ഉണ്ട്. ഐഷുവിന്റെതാണ് കൂടുതൽ. തിരിച്ചടിക്കാൻ തുനിഞ്ഞെങ്കിലും അഞ്ചു വേണ്ടെന്ന് വച്ചു. അതവളോടുള്ള ദേഷ്യം കൊണ്ടോ പരിഭവം കൊണ്ടോ അല്ല. അതൊന്നും ഇപ്പോൾ മനസിൽ പോലുമില്ല . നേരിട്ട് കണ്ടു സംസാരിക്കുന്നതായിരിക്കും നല്ലതെന്നവൾക്ക് തോന്നി.  ക്ലാസ് ഗ്രൂപ്പിലെ ചർച്ച മുഴുവൻ ഇന്നലത്തെ ഇഷ്യൂ ആണ്. ഓരോരുത്തരുടേയും അഭിപ്രായങ്ങൾ വായിച്ചവൾക് ഭ്രാന്തു പിടിച്ചു. അമ്മയെ തല്ലിയാലും രണ്ടു വശം എന്നത് പോലെ അഞ്ജുവിനൊപ്പം നിൽക്കുന്നവരും അവളെ എതിർക്കുന്നവരും രാത്രി മൊത്തം അതിൽ തർക്കിച്ചു തകർത്തിരുന്നു.  ലോകത്തിന്റെ ഏതോ ഒരു മൂലയിൽ ആർക്കും ഒരു സംസാരത്തിനും ഇടകൊടുക്കാതെ ഒതുങ്ങി ജീവിച്ചിരുന്ന താൻ ആണിപ്പോൾ ആരുടെയൊക്കെയോ ജഡ്ജ്മെന്റിന് വിധേയയായി നിൽക്കുന്നതെന്ന് ഒരു നെടുവീർപ്പോടെയവൾ ഓർത്തു.  ഇനി ആരെന്തു പറഞ്ഞാലും അതൊന്നും തന്നെ ബാധിക്കില്ലെന്നവൾ ഉറപ്പിച്ചു. ഇനി സിറിയെ ഒന്നിലേക്കും വലിച്ചിഴക്കരുതെന്നും ഉറപ്പിച്ചു.  ഫോൺ ഓഫ് ചെയ്തു ബെഡിലേക്കിട്ടവൾ റൂമിനു പുറത്തേക്കു നടന്നു. കണ്ണുകൾ കൊണ്ട് ആ വലിയ വീടുമുഴുവൻ അവൾ ഏഥനെ തിരഞ്ഞു. അപ്പോഴാണ് അടുക്കളയിൽ നിന്നെന്തൊക്കെയോ ശബ്ദം കേൾക്കുന്നത് അഞ്ചു ശ്രദ്ധിച്ചത്. സീമേച്ചി വന്നോ എന്ന ചിന്തയോടെയാണ് അഞ്ചു അങ്ങോട്ട് നടന്നത്.  പക്ഷെ അവിടെ സീമേച്ചി ആയിരുന്നില്ല. രാത്രി ഇട്ടിരുന്ന ട്രാക്ക് പാന്റ് മാത്രം ധരിച്ചു കോഫി മേക്കറിൽ എന്തൊക്കെയോ ചെയ്യുകയായിരുന്നു ഏഥൻ. ടീഷർട്ട് ധരിക്കാതെ പിന്തിരിഞ്ഞു നിൽക്കുന്ന ആ മനോഹരമായ ശരീരം കണ്ടതും അഞ്ചു ഞെട്ടി പോയി. വേഗം തിരിഞ്ഞു നടക്കാൻ ഒരുങ്ങിയതും കൈതട്ടി ചുമരിലെ സ്റ്റാൻഡിൽ ഉണ്ടായിരുന്നൊരു ഫ്ലവർപോട്ട് വലിയ ശബ്ദത്തോടെ താഴെ വീണുടഞ്ഞു.  ഏഥൻ പെട്ടന്ന് തിരിഞ്ഞ് നോക്കി. കള്ളം പിടിക്കപ്പെട്ട കൊച്ചു കുഞ്ഞിനെ പോലെ നിൽക്കുന്നവളെ കാണെ ഏഥന് അവളെ ഇറുകെ പുണരാൻ തോന്നി പോയി. അവനൊന്ന് പുഞ്ചിരിച്ചു. തിരിച്ചവളും.   ഏഥൻ രണ്ടു കയ്യിലും ഓരോ കപ്പ് കോഫിയുമായി അവൾക്കടുത്തേക്ക് നടന്നു വന്നു.  അഞ്ചു ഏഥനെ അടിമുടി നോക്കി.  ജീവിതത്തിൽ തനിക്ക് കിട്ടാൻ പോകുന്ന ഏറ്റവും hot കോഫി  ഇതായിരിക്കുമെന്നവൾക്ക് തോന്നി.  " ഇയാളിനി വല്ല കൂടോത്രവും വശമുള്ള ആളാണോ കൃഷ്ണാ......  ആയിരിക്കും അത് കൊണ്ടാണല്ലോ അയാളിൽ വീണ്ടും ഞാൻ അടിമപ്പെട്ട് കൊണ്ടിരിക്കുന്നത്...." അവൾ മനസ്സിൽ പറഞ്ഞു.  " coffee............" തൊട്ടടുത്ത് വന്നു ഏഥൻ പറഞ്ഞതും അഞ്ചു ഞെട്ടലോടെ അവനെ നോക്കി.  വിറക്കുന്ന കൈകളോടെ അഞ്ചു ആ കോഫി വാങ്ങി. പെട്ടന്നവൾ വായുവിൽ ഉയർന്നു പൊങ്ങി. ഇടത്തെ കയ്യിലെ കോഫി മുറുകെ പിടിച്ചു വലതു കൈകൊണ്ടവളുടെ ഇടുപ്പിലൂടെ പിടിച്ചു ഏഥൻ അഞ്ജുവിനെ എടുത്തുയർത്തി. കയ്യിൽ പിടിച്ചിരിക്കുന്ന ചൂട് കോഫി കാരണം ഒന്ന് കുതറാൻ പോലും പറ്റാത്തവൾ നിസ്സഹായയായി .  എടുത്തുയർത്തി കുറച്ചു അപ്പുറത്തായി ഏഥൻ അവളെ നിലത്തു നിർത്തി. " what are you doing eadhan ....." അഞ്ചു മുഖം ചുളിച്ചു ചോദിച്ചു.  ഏഥൻ കണ്ണുകൾ കൊണ്ട് നിലത്തേക്ക് കാണിച്ചു. അപ്പോഴാണവൾ അത് ശ്രദ്ധിക്കുന്നത്. ഫ്ലവർ പോട്ട് വീണു പൊട്ടിച്ചിതറിയ ചില്ലുകൾക്ക് നാടുവിലായാണ് താൻ നിന്നിരുന്നത് . ഒന്ന് അനങ്ങിയിരുന്നെങ്കിൽ ഉറപ്പായും കാലിൽ മുറിവായേനെ.... " thanks....." അഞ്ചു ചമ്മലോടെ പറഞ്ഞു.  ഏഥൻ ഒരു ചിരിയോടെ കിച്ചണിൽ ഇട്ടിരിക്കുന്ന നീണ്ട സ്റ്റൂൾ ഒന്നിൽ കയറി ഇരുന്നു. കോഫി കുടിച്ചു തുടങ്ങി. അവളിലെ മാറി മറിഞ്ഞു വരുന്ന ഭാവങ്ങളിൽ നിന്നും ഏഥൻ അത് ഉറപ്പിച്ചു കഴിഞ്ഞിരുന്നു. അവളെ ഒരിക്കലും തനിക്ക് നഷ്ട്ടപെടില്ലെന്ന്....  തുടരും............................. ഇനി കുറച്ചു സമാധാനം ആവാം 😌