Part 13 a അന്തമില്ലാത്ത വരികൾ - സഖിയുടെ സഖാവ് - ലക്ഷ്മി രണ്ടും കൽപ്പിച്ച് പാർട്ടി ഓഫീസിനരികിലേക്ക് നടന്നു. ചാരിവെച്ചിരുന്ന വാതിൽ പതിയെ തുറന്ന് അവൾ അകത്തേക്ക് എത്തിനോക്കി. ആരുമില്ല… ആ നിമിഷം അവളുടെ ഉള്ളിൽ എന്തെന്നില്ലാത്ത ഒരു ആശ്വാസം നിറഞ്ഞു. അവൾ പതിയെ അകത്തേക്ക് കയറി. ഓരോ ചുവടും നേരെ ചെന്നെത്തിയത്… അന്തമില്ലാത്ത വരികൾ” എന്ന പുസ്തകത്തിനരികിലായിരുന്നു. അവൾ പുസ്തകം പതിയെ തുറന്നു. ഇന്നലെ വായിച്ച അതേ താൾ… അതേ ചുവന്ന മഷി… അതേ അക്ഷരങ്ങൾ… ആ വരികളിലേക്ക് കണ്ണുകൾ പതിഞ്ഞ നിമിഷം, രാത്രിയിൽ കണ്ട സ്വപ്നം അവളുടെ മനസ്സിലൂടെ മിന്നിമറഞ്ഞു. ആ ചുണ്ടിലുണർന്നിരുന്ന മൃദു പുഞ്ചിരി… കവിളിൽ തെളിഞ്ഞ ആ ചെറിയ നുണക്കുഴികൾ…അറിയാതെ അവളുടെ വിരലുകൾ ആ അക്ഷരങ്ങളിലൂടെ മെല്ലെ സഞ്ചരിച്ചു. ആരായിരിക്കും…?” അവൾ മനസ്സിൽ ചോദിച്ചു. ഒരു നിമിഷം അവൾ ചുറ്റും നോക്കി. നിശ്ശബ്ദത മാത്രം. പുറത്ത് മരച്ചില്ലകളിലൂടെ വീശിയെത്തിയ കാറ്റ് ജനലുകളെ മെല്ലെ തഴുകി. ആ ശബ്ദം പോലും ആ നിശ്ശബ്ദതയെ ഭംഗപ്പെടുത്താൻ മടിക്കുന്നതുപോലെ തോന്നി. അവൾ വീണ്ടും പുസ്തകത്തിലേക്ക് നോക്കി. എന്തോ പറയാൻ കാത്തിരിക്കുന്നതുപോലെ ആ ശൂന്യമായ താൾ അവളെ നോക്കി നിൽക്കുകയായിരുന്നു. ബാഗിൽ നിന്ന് ചുവന്ന മഷിപ്പേന അവൾ മെല്ലെ പുറത്തെടുത്തു. ഒരു നിമിഷം കണ്ണുകളടച്ച് നിന്ന ശേഷം, പുസ്തകത്തിന്റെ താളിലേക്ക് അവൾ പതിയെ കുറിച്ചു… എന്നും സ്വപ്നങ്ങളിൽ വന്ന്, എന്നോട് കഥകൾ പറഞ്ഞുപോകുമ്പോൾ… തെളിയുന്ന ആ നുണക്കുഴികൾ മാത്രമാണ്, സഖാവേ… എനിക്ക് നിന്നെക്കുറിച്ചുള്ള ഏക രൂപം.” അവസാന വാക്കും കുറിച്ചുതീർന്നപ്പോൾ അവളുടെ ചുണ്ടിൽ ഒരു മൃദുപുഞ്ചിരി വിരിഞ്ഞു. അതേ നിമിഷം, പുറത്തുനിന്ന് മെല്ലെ അടുത്തുവരുന്ന കാൽച്ചുവടുകളുടെ ശബ്ദം കേട്ടു. തുടരും part 13 b കാത്തിരിക്കൂ എസി#💞 പ്രണയകഥകൾ #📙 നോവൽ #📔 കഥ #📝 ഞാൻ എഴുതിയ വരികൾ #തുടർകഥ