💥💤🌟

. #Government_of_UP

#📙 നോവൽ #🧟 പ്രേതകഥകൾ! #✍ തുടർക്കഥ #✍️ വട്ടെഴുത്തുകൾ #💥💤🌟 സിജി- The Sound Killer ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) ……………………………………. കേരളത്തിലെ ഓരോ റെയിൽവേ സ്റ്റേഷനിലും ഇപ്പോൾ അനൗൺസ്‌മെന്റ് കഴിഞ്ഞാൽ കേൾക്കുന്ന ആ പതിവ് റെക്കോർഡിംഗിന് ഒരു പ്രത്യേകതയുണ്ട് "യാത്രക്കാരുടെ ശ്രദ്ധയ്ക്ക്... ശബ്ദം കുറച്ചു സംസാരിക്കുക, ജീവൻ പോകാതെ സൂക്ഷിക്കുക" ട്രെയിനിലെ ജനറൽ കംപാർട്ട്‌മെന്റുകളിൽ മുൻപൊക്കെ ഉണ്ടായിരുന്ന ആ ചന്തപ്പറമ്പിന്റെ പ്രതീതി പോയി. ഇപ്പോൾ ആളുകൾ ശ്വാസം വിടാൻ പോലും പേടിക്കുന്നു.അതിന് കാരണം, സിജി എന്ന ആ അജ്ഞാത യുവതി അവളുടെ കയ്യിലെ സ്ലീപ്പിംഗ് സ്പ്രേ ലാവെൻഡർ മണമുള്ളതാണ്. ആ മണം അടുത്തറിയുന്നവർ പിന്നെ ഉണരുന്നത് സംഗീതത്തിന്റെ നരകത്തിലായിരുന്നു സിജി ഒരു പാട്ടുകാരി ആയിരുന്നു എന്നാൽ സിജിയെ സംബന്ധിച്ചിടത്തോളം ശബ്ദം എന്നത് കേവലം ഒരു ഭൗതിക പ്രതിഭാസമല്ല, മറിച്ച് മറ്റൊരാളുടെ സ്വകാര്യതയിലേക്കും സമാധാനത്തിലേക്കും അനുവാദമില്ലാതെ ഇരച്ചുകയറുന്ന ഒരു അദൃശ്യമായ ആയുധമാണ്. നിശബ്ദതയെ ഒരു മഹത്തായ മര്യാദയായും വിശുദ്ധിയായും കണ്ടിരുന്ന അവൾക്ക്, പൊതുസ്ഥലങ്ങളിലെ അനാവശ്യമായ ഹോണടികളും മൊബൈൽ ഫോണിലെ ഉച്ചത്തിലുള്ള അലർച്ചകളും സ്വന്തം ആത്മാവിനേൽക്കുന്ന ആഴത്തിലുള്ള മുറിവുകളായിരുന്നു. ഉറക്കം നഷ്ടപ്പെടുന്ന പിഞ്ചുകുഞ്ഞുങ്ങളുടെ നടുക്കവും, കാതുപൊത്തി വിറയ്ക്കുന്ന വൃദ്ധരുടെ നിസ്സഹായതയും കണ്ടു വളർന്ന അവൾക്ക്, സമൂഹത്തിന്റെ "ഇതൊക്കെ ചെറിയ കാര്യമല്ലേ" എന്ന പരിഹാസം സഹിക്കാവുന്നതിലും അപ്പുറമായിരുന്നു. തന്റെ അപേക്ഷകളും പരാതികളും അവഗണിക്കപ്പെട്ടപ്പോൾ, നിശബ്ദതയ്ക്കായുള്ള അവളുടെ ദാഹം ഒരു വന്യമായ പ്രതികാരമായി മാറി മറ്റുള്ളവർ മറ്റുള്ളവരുടെ മേൽ അടിച്ചേൽപ്പിക്കുന്ന ശബ്ദത്തെ അവൾ ഒരു അധികാരപ്രയോഗമായി കാണുകയും, ആ അധികാരത്തെ അതേ നാണയത്തിൽ നേരിടാൻ തീരുമാനിക്കുകയും ചെയ്തതോടെ സിജിയുടെ ലോകത്ത് സമാധാനം എന്നത് ഭയത്തിലൂടെ മാത്രം നേടേണ്ട ഒന്നായി പരിണമിച്ചു. ………. അന്ന് രാത്രി തന്റെ കറുത്ത വാനിൽ വേണു പിള്ള,റെക്സി,അൽഫോൺസാ,ഗീത, ബിജു,സജിത്ത് തുടങ്ങിയ ആറ് പേരെയും വാരി നിറയ്ക്കുമ്പോൾ സിജിക്ക് വലിയ ഉത്സാഹമായിരുന്നു. "ശബ്ദമലിനീകരണം കുറയ്ക്കാൻ സർക്കാർ പരാജയപ്പെട്ടടത്ത് ഒരു കലാകാരിക്ക് ഇടപെടേണ്ടി വരുന്നത് എത്ര കഷ്ടമാണ്!" അവൾ ബിജുവിന്റെ ടാക്സി ഹോണെടുത്ത് അവന്റെ തന്നെ പോക്കറ്റിൽ തിരുകി പരിഹസിച്ചു. …….. കാടിനുള്ളിലെ ആ ഓഡിറ്റോറിയത്തിന് 'സൈലന്റ് വാലി' എന്നാണ് സിജി പേരിട്ടിരിക്കുന്നത്. അവിടെ 1000 വാട്ട്‌സ് സ്പീക്കറുകൾക്ക് മുന്നിൽ കെട്ടിയിടപ്പെട്ട ആറ് പേരും ഉണർന്നപ്പോൾ സിജി സ്റ്റേജിൽ ഒരു വയലിൻ ട്യൂൺ ചെയ്യുകയായിരുന്നു. ആ വയലിന്റെ തന്ത്രികളിൽ നിന്ന് വരുന്ന ശബ്ദം തന്നെ അവരുടെ ചെവിയിൽ തുളച്ചുകയറുന്ന സൂചി പോലെ തോന്നി. "ഗുഡ് മോർണിംഗ് പാപികളേ," സിജി തന്റെ മൈക്കിലൂടെ മൊഴിഞ്ഞു. "നിങ്ങൾ ഓരോരുത്തരും ഓരോ വ്യത്യസ്ത തരം നോയിസ് പൊല്യൂഷന്റെ ബ്രാൻഡ് അംബാസഡർമാരാണ്. അതുകൊണ്ട് തന്നെ നിങ്ങളുടെ അന്ത്യം ഒരു മെഗാ കൺസേർട്ട് പോലെ ഗ്രാൻഡ് ആയിരിക്കണം എന്ന് എനിക്ക് നിർബന്ധമുണ്ട്." ആദ്യം അവൾ റെക്സിയുടെ അടുത്തേക്ക് ചെന്നു. “ നീ പബ്ലിക് പ്ലേസിൽ റീൽ ബേസ് ബൂസ്റ്റ്‌ വെച്ച് ആളുകളെ ശല്യം ചെയ്യുമല്ലേ എന്തായിരുന്നു ആ റീൽസിലെ പാട്ട്? 'ടാറ്റാ ബൈ ബൈ'? നമുക്കത് കുറച്ചുകൂടി ലൈവ് ആയി കേൾക്കാം." റെക്സിയുടെ ചെവിയിലെ സ്പീക്കർ വഴി അവൾ അതേ പാട്ട് 180 ഡിസിബെല്ലിൽ പ്ലേ ചെയ്തു. റെക്സി കരയാൻ ആഞ്ഞപ്പോൾ സിജി അവളുടെ വായ ടേപ്പ് വച്ച് ഒട്ടിച്ചു. "നിന്റെ കരച്ചിൽ പാട്ടിന്റെ താളം തെറ്റിക്കും മോളേ, ജസ്റ്റ് എൻജോയ് ദ മ്യൂസിക്." പത്തുമിനിറ്റ് കഴിഞ്ഞപ്പോൾ റെക്സിയുടെ കണ്ണുകളിലെ കൃഷ്ണമണി ആ ശബ്ദത്തിന്റെ പ്രകമ്പനത്തിൽ വിറയ്ക്കാൻ തുടങ്ങി. വൈകാതെ അവളുടെ കർണ്ണപടങ്ങൾ പടക്കം പൊട്ടുന്ന ശബ്ദത്തോടെ തകർന്നു. ആ ചോര സ്പീക്കറിലേക്ക് തെറിച്ചപ്പോൾ സിജി ചിരിച്ചു കൊണ്ട് പറഞ്ഞു, "ഇതാണ് ശരിക്കുമുള്ള ബേസ് ബൂസ്റ്റ്!" …….. അടുത്തത് വേണുപിള്ളയായിരുന്നു. സ്റ്റേഷനിലിരുന്ന് ബിസിനസ്സ് ഡീൽ ഉറപ്പിക്കാൻ അലറുന്ന പിള്ളയുടെ ശബ്ദം സിജി നേരത്തെ റെക്കോർഡ് ചെയ്തിരുന്നു. "ഇപ്പോൾ ശരിക്കും ഓർഡർ കിട്ടിയില്ലേ പിള്ളേച്ചാ?" സിജി ചോദിച്ചു. അവൾ ആ റെക്കോർഡിംഗ് എടുത്ത് അതിന്റെ പിച്ചും വോളിയവും കൂട്ടി പിള്ളയുടെ തലയ്ക്ക് ചുറ്റുമുള്ള സ്പീക്കറുകളിലേക്ക് വിട്ടു. സ്വന്തം ശബ്ദം തന്നെ തന്നെ കൊല്ലുന്നത് വേണുപിള്ളയ്ക്ക് വിശ്വസിക്കാനായില്ല. ഹൃദയമിടിപ്പിന്റെ താളം സ്പീക്കറിലെ താളവുമായി ഏറ്റുമുട്ടി. ഒടുവിൽ ഒരു വലിയ ഷോക്ക് ഏറ്റതുപോലെ പിള്ളയുടെ ശരീരം വിറച്ചു നിശ്ചലമായി. "പിള്ളാസ് ഡീൽ ക്ലോസ്ഡ്," സിജി ചിരിച്ചു. …….. ഗീതയുടെയും അൽഫോൻസയുടെയും അവസ്ഥ അതിലും കഷ്ടമായിരുന്നു. ഗീത സീരിയലിൽ കേൾക്കാറുള്ള ആ 'ഡിഷും ഡിഷും' ശബ്ദവുംഫോണിൽ നോക്കി ഉള്ള അൽഫോൻസയുടെ ആർട്ടിഫിഷ്യൽ ചിരിയും കലർത്തി സിജി ഒരു പുതിയ 'റീമിക്സ്' ഉണ്ടാക്കി. ആ ശബ്ദതരംഗങ്ങൾ വായുവിലെ തന്മാത്രകളെപ്പോലും വേദനിപ്പിക്കുന്നതായിരുന്നു. ഗീതയുടെ മൂക്കിലൂടെയും അൽഫോൻസയുടെ പല്ലുകൾക്കിടയിലൂടെയും രക്തം വരാൻ തുടങ്ങി. "സീരിയൽ ക്ലൈമാക്സ് എത്താറായില്ലേ ഗീതമ്മേ?" സിജി ചോദിച്ചു. അവർക്ക് മറുപടി പറയാൻ നാവുണ്ടായിരുന്നില്ല, പകരം അവരുടെ ബോധം മറഞ്ഞു. പക്ഷേ സിജി വിട്ടില്ല, ഒരു ചെറിയ ഇലക്ട്രിക് ഷോക്ക് കൊടുത്ത് അവരെ വീണ്ടും ആ നരകത്തിലേക്ക് ഉണർത്തിക്കൊണ്ടിരുന്നു. ……. ടാക്സി ഡ്രൈവർ ബിജുവിന്റെ നേരെ സിജി ചെയ്തത് ഏറ്റവും ക്രൂരമായ ഒന്നായിരുന്നു. ലോകത്തിലെ ഏറ്റവും അരോചകമായ 100 ഹോണുകളുടെ ശബ്ദം ഒരേസമയം അവൾ പ്ലേ ചെയ്തു. ബിജുവിന്റെ തലയോട്ടി ആ ശബ്ദത്തിൽ പൊട്ടിപ്പോകുമെന്ന് അവന് തോന്നി. കസേരയിൽ കെട്ടിയിട്ട അവസ്ഥയിലും അവന്റെ കൈകൾ സ്റ്റിയറിംഗിലെന്നപോലെ വായുവിൽ തപ്പി കൊണ്ടിരുന്നു. " നിനക്ക് വെറുതെ ഹോൺ അടിച്ചു ശബ്ദം ഉണ്ടാക്കുന്നത് അല്ലെ ഹോബി നിനക്ക് അതിനേക്കാൾ നല്ല ഹോൺ അടി ഞാൻ ഡെഡിക്കേറ്റ് ചെയ്യുന്നു ദേ ഇപ്പോൾ നീയൊരു സിംഫണി കേൾക്കുകയാണ്," സിജി അവന്റെ തലയിൽ തലോടിക്കൊണ്ട് പറഞ്ഞു. അവസാനം സജിത്തിന്റെ ഊഴം എത്തി. മദ്യപിച്ച് പാട്ടുപാടി മറ്റുള്ളവരുടെ ഉറക്കം കളയുന്ന സജിത്തിന് സിജി ഒരു പ്രത്യേക സമ്മാനം കരുതിയിരുന്നു. അവന്റെ തന്നെ അപശബ്ദത്തിലുള്ള പാട്ട് ഹൈ-ഫ്രീക്വൻസിയിൽ പ്ലേ ചെയ്തപ്പോൾ, അവന്റെ ആമാശയത്തിലെ ആസിഡ് പോലും പുറത്തേക്ക് തിളച്ചു വന്നു. അവന്റെ നെഞ്ചിലെ അസ്ഥികൾ ആ ശബ്ദത്തിന്റെ വൈബ്രേഷനിൽ ഓരോന്നായി പൊട്ടുന്നത് അവിടെ കേൾക്കാമായിരുന്നു. 24 മണിക്കൂർ കഴിഞ്ഞപ്പോൾ ആ ഓഡിറ്റോറിയം ഒരു ശ്മശാനം പോലെ നിശബ്ദമായി. പക്ഷേ സിജിക്ക് സന്തോഷമായില്ല. അവൾ തന്റെ മിക്സിംഗ് ബോർഡിലെ സ്വിച്ചുകൾ ഓരോന്നായി ഓഫ് ചെയ്തു. ആറ് പേരും കസേരകളിൽ വിവിധ രൂപത്തിൽ തകർന്നു കിടക്കുകയായിരുന്നു. …… പിറ്റേന്ന് കേരളം ഉണർന്നത് ഈ വാർത്ത കേട്ടുകൊണ്ടാണ്.എല്ലാ ഡെഡ് ബോഡികളുടെയും മുകളിൽ ഒറ്റ മുന്നറിയിപ്പ് (എല്ലാവരും നിശബ്ദത പാലിക്കുക ശബ്ദം ഉയർന്നാൽ നിങ്ങൾ കൊല്ലപ്പെടും). പോലീസ് അന്വേഷണം നടത്തിയെങ്കിലും ഒരു തെളിവും ലഭിച്ചില്ല പിന്നീട് 2 ദിവസം തോറും ഒരുപാട് മൃതദേഹങ്ങൾ പ്രത്യക്ഷ പെടാൻ തുടങ്ങി ജനങ്ങൾ ഭയന്നു. റോഡിൽ ആരും ഹോൺ അടിക്കുന്നില്ല. ബസ്സിൽ ആരും ഫോൺ ഉറക്കെ വെക്കുന്നില്ല. പക്ഷേ സിജിക്ക് അറിയാമായിരുന്നു, ഈ സമാധാനം അധികകാലം നിൽക്കില്ലെന്ന്. ……. അന്ന് വൈകുന്നേരം മംഗളാ എക്സ്പ്രസ്സിൽ കയറിയ സിജി തന്റെ മനോഹരമായ ചുരിദാർ ശരിയാക്കി സീറ്റിലിരുന്നു. അവളുടെ ബാഗിൽ സ്പ്രേ കുപ്പിയും പുതിയ റെക്കോർഡിംഗ് ചിപ്പുകളും തയ്യാറായിരുന്നു. അവളുടെ തൊട്ടുപിന്നിലെ സീറ്റിലിരുന്ന് ഒരു യുവാവ് തന്റെ ഐപാഡിൽ വലിയ ശബ്ദത്തിൽ ഒരു ആക്ഷൻ സിനിമ കാണാൻ തുടങ്ങി. ഇയർഫോൺ ഉപയോഗിക്കാത്ത അവന്റെ അഹങ്കാരം കണ്ടപ്പോൾ സിജിയുടെ ചുണ്ടിൽ ഒരു ചിരി വിരിഞ്ഞു. അവൾ പതുക്കെ തന്റെ ബാഗിൽ നിന്ന് ഒരു ചോക്ലേറ്റ് എടുത്ത് അവന് നേരെ നീട്ടി. "ബ്രോ, ആ സിനിമയിലെ സൗണ്ട് എഫക്റ്റ്സ് കൊള്ളാം. കുറച്ചുകൂടി ക്വാളിറ്റിയുള്ള സ്പീക്കറിൽ കേൾക്കണോ" യുവാവ് ചിരിച്ചുകൊണ്ട് ചോക്ലേറ്റ് വാങ്ങി. "പിന്നെന്താ, വേണല്ലോ!" സിജി അവന്റെ കണ്ണുകളിലേക്ക് നോക്കി തന്റെ സ്വർണ്ണാഭരണങ്ങൾ പോലെ തിളങ്ങുന്ന കണ്ണുകളുമായി പറഞ്ഞു "എങ്കിൽ വാ, നമുക്ക് എന്റെ സ്റ്റുഡിയോ വരെ പോകാം. ." അടുത്ത സ്റ്റേഷനിൽ അവർ രണ്ടുപേരും ഇറങ്ങി. സ്റ്റേഷൻ മാസ്റ്ററുടെ വിറച്ചു കൊണ്ടുള്ള അനൗൺസ്‌മെന്റ് അപ്പോഴും അന്തരീക്ഷത്തിൽ മുഴങ്ങുന്നുണ്ടായിരുന്നു "നിശബ്ദത പാലിക്കുക... അത് നിങ്ങളുടെ ജീവന് നല്ലതാണ്." സിജി ആ യുവാവിന്റെ കൈ പിടിച്ചു ഇരുട്ടിലേക്ക് നടന്നു നീങ്ങി. അവിടെ കാടിന്റെ നിശബ്ദതയിൽ അവളുടെ കറുത്ത വാൻ അവരെയും കാത്ത് കിടപ്പുണ്ടായിരുന്നു. സിജിക്ക് ഇപ്പോൾ ഒരു കാര്യം ഉറപ്പാണ്, ലോകത്ത് ശബ്ദമുണ്ടാക്കുന്നവർ തീരുന്നതുവരെ അവളുടെ കൺസേർട്ടുകൾക്ക് ടിക്കറ്റ് വിറ്റു തീർന്നുകൊണ്ടേയിരിക്കും. ….. അടുത്ത കൺസേർട്ടിൽ ഒരുപക്ഷേ നിങ്ങളും ഒരു ഗസ്റ്റ് ആർട്ടിസ്റ്റ് ഛെ ഘോസ്റ്റ് ആർട്ടിസ്റ്റ് ആയേക്കാം. ……. End

#📙 നോവൽ #🧟 പ്രേതകഥകൾ! #✍ തുടർക്കഥ #✍️ വട്ടെഴുത്തുകൾ #💥💤🌟 കറന്റ് സുര - The shocker (കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃച്ഛികം മാത്രം) ……………………………………. ചിന്നൻപള്ളി ഗ്രാമം. പുറമെ ശാന്തമെങ്കിലും, ഒരു ഈർപ്പം നിറഞ്ഞ സന്ധ്യയിൽ വൈദ്യുതി മുടങ്ങിയാൽ, ശാപം ചൊരിഞ്ഞ് അസ്വസ്ഥമാകുന്ന ഒരു ജനതയുടെ നാട്. ഈ ഗ്രാമത്തിൽ, വൈദ്യുതിയുമായി ബന്ധപ്പെട്ട എല്ലാ പ്രശ്‌നങ്ങൾക്കും ഒരു മുഖമേ ഉണ്ടായിരുന്നുള്ളൂ: ഇലക്ട്രീഷ്യൻ സുരേഷ് എന്ന കറന്റ്‌ സുര . അവൻ കെ.എസ്.ഇ.ബി.യുടെ ഔദ്യോഗിക ജീവനക്കാരനായിരുന്നില്ല, ഒരു കാഷ്വൽ കോൺട്രാക്റ്റ് തൊഴിലാളി മാത്രം. എന്നിട്ടും, ഇരുട്ട് വീണാൽ, അവൻ്റെ ഫോണിലേക്ക് ശാപങ്ങളുടെ പ്രളയമായിരുന്നു. സുരേഷിന്റെ ജീവിതം, അവൻ നേടിയ എഞ്ചിനീയറിംഗ് ഡിപ്ലോമയുടെ മൂല്യത്തേക്കാൾ, രാത്രികാലങ്ങളിൽ കേൾക്കുന്ന മൊബൈൽ ഫോൺ റിംഗിംഗുകളാൽ അളക്കപ്പെട്ടു. അവൻ ഒരു തൊഴിലാളിയായിരുന്നു, ദൈവമായിരുന്നില്ല. എന്നിട്ടും, ട്രാൻസ്ഫോർമർ കത്തിയാലും, കാറ്റിൽ ലൈൻ പൊട്ടിയാലും, ഫോണെടുത്ത് ഭീഷണി മുഴക്കാനും, വ്യക്തിപരമായ കാര്യങ്ങൾ പറഞ്ഞ് അപമാനിക്കാനും നാട്ടുകാർക്ക് മടിയില്ലായിരുന്നു. "നിനക്കൊക്കെ എന്തിനാണ് ശമ്പളം തരുന്നത്? ഓൺ ചെയ്യടാ അലവലാതി ", "നിന്റെ തറവാട്ട് വക ആണോ തെണ്ടി കറന്റ്‌ “, "നിന്റെ മുഖം കണ്ടാൽ തന്നെ കറന്റ് പോകുമല്ലോടാ ." ഇതൊക്കെ കൂടാതെ വീട്ടുകാരെ ചേർത്ത് ഉള്ള തെറിയും ഓരോ ശാപവാക്കും സുരേഷിന്റെ മനസ്സിൽ ഒരു വോൾട്ടേജ് പൾസ് പോലെയായിരുന്നു പതിഞ്ഞത്. ഈ വേദന, വൈദ്യുതിയുടെ ആഘാതത്തേക്കാൾ ശക്തമായിരുന്നു. പതിറ്റാണ്ടുകളായി അവൻ അനുഭവിച്ച ഈ മാനസിക പീഡനം അവനെ പതിയെ ഒരു പുതിയ രൂപത്തിലേക്ക് മാറ്റിമറിച്ചു. പ്രതികാരം! തൻ്റെ ജീവിതത്തിൽ ഇരുട്ട് പരത്തിയ സമനില തെറ്റിക്കുന്നവരുടെ ലോകത്ത് എന്നേക്കുമായി ഒരു ഷോർട്ട് സർക്യൂട്ട് ഉണ്ടാക്കണം. അങ്ങനെയാണ് സുരേഷ് തൻ്റെ വർക്ക്‌ഷോപ്പിൽ ആ പൈശാചിക ഉപകരണം രൂപകൽപ്പന ചെയ്യാൻ തുടങ്ങിയത്. പഴയതും ഉപേക്ഷിക്കപ്പെട്ടതുമായ ഇലക്ട്രിക്കൽ ഉപകരണങ്ങളുടെ ഒരു ശേഖരമാണ് സുരേഷിന്റെ വർക്ക്‌ഷോപ്പ്. ഉപയോഗിക്കാത്ത ഇൻവെർട്ടറുകൾ, തകർന്ന കൺവെർട്ടറുകൾ, കാലഹരണപ്പെട്ട കപ്പാസിറ്ററുകൾ. ഇവയെല്ലാം ചേർത്താണ് അവൻ 'ഷോക്കർ' എന്ന ഉപകരണത്തിന് ജന്മം നൽകിയത്. അതിൻ്റെ രൂപം കണ്ടാൽ ഒരു സാധാരണ ഹൈ-വോൾട്ടേജ് ടെസ്റ്റിംഗ് കിറ്റ് പോലെ തോന്നിക്കും. എന്നാൽ അതിനുള്ളിൽ ഒരു മരണയന്ത്രമായിരുന്നു പ്രവർത്തിച്ചിരുന്നത്. 12 Vഇൻവെർട്ടർ ബാറ്ററിയെ, കസ്റ്റമൈസ് ചെയ്ത മൾട്ടി-സ്റ്റേജ് കൺവെർട്ടർ സർക്യൂട്ട് വഴി, മനുഷ്യശരീരത്തിന് താങ്ങാനാവാത്ത 440 Vമുതൽ 1000 V വരെ, ഉയർന്ന ആമ്പിയറേജിൽ ഔട്ട്പുട്ട് നൽകാൻ കഴിയുന്ന ഒരു സംവിധാനമാക്കി മാറ്റി. സാധാരണ വൈദ്യുതി ഷോക്ക് മരണങ്ങളിൽ, കറൻ്റിൻ്റെ ഉറവിടം വ്യക്തമാകും. എങ്കിലും സുരേഷ് അതിനുള്ള മറുപടിയും കരുതിയിരുന്നു. അവൻ ഉപകരണത്തിൽ ഓട്ടോമാറ്റിക് ഡിസ്ചാർജ്, ഫിംഗർപ്രിൻ്റ് ഇല്ലാതാക്കൽ, റെസിഡ്യുവൽ കറൻ്റ് ഡെസിപ്പേഷൻ എന്നീ സംവിധാനങ്ങൾ കൂടി ചേർത്തു. ഷോക്ക് കൊടുത്തയുടൻ ഉപകരണം സ്വയം ഡിസ്ചാർജ് ചെയ്യുകയും, ഇരയുടെ ശരീരത്തിലൂടെ പ്രവഹിച്ച കറൻ്റ്, വൈദ്യുതി ലൈനിലൂടെയല്ല മറിച്ച് ഒരു ചെറിയ ബാറ്ററിയിൽ നിന്നാണ് വന്നതെന്ന് സ്ഥാപിക്കാനുമുള്ള സംവിധാനങ്ങൾ ഒരുക്കുകയും ചെയ്തു. ഇത് കാരണം ഇരയുടെ ശരീരത്തിൽ കറൻ്റ് ഉപകരണവുമായി ബന്ധിപ്പിച്ചതിൻ്റെ നേരിട്ടുള്ള പൊള്ളൽ അടയാളങ്ങളോ, വസ്ത്രത്തിൽ കത്തിയ പാടുകളോ അവശേഷിക്കില്ല. പോസ്റ്റ്‌മോർട്ടം റിപ്പോർട്ടിൽ 'വൈദ്യുതാഘാതം മൂലമുള്ള ഹൃദയാഘാതം' എന്നോ, 'അജ്ഞാത കാരണം' എന്നോ മാത്രമേ രേഖപ്പെടുത്താൻ സാധിക്കുമായിരുന്നുള്ളൂ. ഷോക്കർ പൂർണ്ണമായതോടെ, സുരേഷിന്റെ പ്രതികാരത്തിൻ്റെ വയറിങ് ആരംഭിച്ചു. അവൻ്റെ മനസ്സിലെ പകയുടെ പ്ലാനുകൾ കൃത്യമായി എക്സിക്യൂട്ട് ചെയ്യേണ്ടതിൻ്റെ കണക്കുകൂട്ടലുകൾ അവൻ നടത്തി. ആദ്യം ഇരയായത് സജിത്ത് ആയിരുന്നു. കറന്റ് പോയാൽ സുരേഷിനെ വിളിച്ച് തെറിപ്പാട്ട് പാടുന്നതിൽ ഒരു റെക്കോർഡിട്ട വ്യക്തി. രാത്രി ഒൻപത് മണിക്ക് ഒരു ഇടിമിന്നലിൻ്റെ അകമ്പടിയോടെ കറന്റ് പോയപ്പോൾ, സജിത്ത് ഫോണിൽ കോൺട്രാക്ടർമാരുമായി തമാശയ്ക്ക് മര്യാദക്ക് പണി എടുക്കാത്ത കറൻ്റ് സുരേഷിനെ കൊന്ന് കളയുന്നതിനെക്കുറിച്ച് സംസാരിക്കുകയായിരുന്നു. "അവനെ പിടിച്ച് ഏതെങ്കിലും ഒരു കറന്റ്‌ കമ്പിയുമായി ബന്ധിപ്പിക്കണം," സജിത്ത് ചിരിച്ചു. സുരേഷ് വാതിൽ തള്ളിത്തുറന്ന് അകത്ത് കടന്നു. ഇരുട്ടിൽ സജിത്തിനെ കണ്ടപ്പോൾ സുരേഷിൻ്റെ മുഖത്ത് ഒരു നിമിഷം പോലും ഭാവമാറ്റം ഉണ്ടായില്ല. "എന്നെ കൊല്ലുമെന്ന് പറഞ്ഞല്ലോ, സജിത്തേട്ടാ. പക്ഷേ അതിനുമുമ്പ് ഇതെന്താണെന്ന് അറിയേണ്ടേ? ഇതാണ് സത്യം." ഒരു നിമിഷം പാഴാക്കാതെ സുരേഷ് '440 V സ്റ്റാൻഡേർഡ് ഓവർലോഡ്' മോഡിൽ പ്രോബുകൾ സജിത്തിൻ്റെ നെഞ്ചിൽ വെച്ചു. 440 V പവറിൽ സജിത്തിൻ്റെ ഹൃദയം ഒരു നിമിഷം ചുരുങ്ങി നിന്നു. അയാൾ കസേരയിലേക്ക് തളർന്നു, കണ്ണുകളിൽ ഭയം നിറഞ്ഞു, നിലവിളി പുറത്തുവന്നില്ല. പേശികൾ ലോക്ക് ആയി. സുരേഷ് ഡിസ്ചാർജ് ബട്ടൺ അമർത്തി, ശാന്തനായി മുറിയിൽ നിന്ന് പുറത്തിറങ്ങി. പോസ്റ്റ്‌മോർട്ടം റിപ്പോർട്ടിൽ 'വൈദ്യുതാഘാതം മൂലമുള്ള ഹൃദയാഘാതം' എന്ന് മാത്രമേ കണ്ടെത്താൻ കഴിഞ്ഞുള്ളു. അടുത്ത ലക്ഷ്യം ആദർശ് എന്ന യൂട്യൂബറായിരുന്നു. ലൈവിൽ വന്ന് സുരേഷിനെ അപമാനിച്ചതിലൂടെ വ്യൂസ് നേടിയ ആദർശ്, താൻ ഒരു ട്രെൻഡ് സെറ്ററാണെന്ന് വിശ്വസിച്ചു. സുരേഷിനെ "ജോലി ചെയ്യാൻ അറിയാത്ത ഒരു പാഴാണ്" എന്ന് ആദർശ് ലൈവിൽ ആക്ഷേപിച്ചിരുന്നു. ഒരു രാത്രി സുരേഷ് 'ഷോക്കർ' '950 V സെറിബ്രൽ ഫ്ലഡ്' മോഡിലേക്ക് മാറ്റി. ആദർശിന്റെ മുറിയിൽ കയറിയ സുരേഷ്, "നിൻ്റെ വൈറൽ ആവൽ ഇന്നത്തോടെ അവസാനിച്ചു, നിൻ്റെ ചകിരിച്ചോർ പോലെ ഉള്ള തലച്ചോറിലാണ് ഞാൻ കറന്റ് കയറ്റുന്നത്, ," എന്ന് മന്ത്രിച്ചു. അതിശക്തമായ ഷോക്ക് ആദർശിൻ്റെ തലയിൽ ഏൽപിച്ചു. ഷോക്കിന്റെ ആഘാതത്തിൽ ആദർശിൻ്റെ തലച്ചോറിലെ രക്തധമനികൾ പൊട്ടി, ബോധം നിമിഷം കൊണ്ട് നഷ്ടമായി. സുരേഷ് ആദർശിന്റെ കമ്പ്യൂട്ടറിലേക്കും ലൈനിലേക്കും ഒരു ചെറിയ ഹൈ-ഫ്രീക്വൻസി പൾസ് നൽകി. തുടർന്നുണ്ടായ ചെറിയ തീപിടിത്തം കാരണം, ആദർശിന്റെ മരണം ഉയർന്ന വോൾട്ടേജ് ഷോക്ക് മൂലമുള്ള അപകടമായി മാറി. സാമുവൽ എന്ന പഞ്ചായത്ത് പ്രസിഡൻ്റ്, പൊതുവേദിയിൽ വെച്ച് സുരേഷിനെ വ്യക്തിപരമായി അപമാനിച്ചു. "ഇവനെ ഒക്കെ പിരിച്ചു വിട്ട് പകരം ആളെ നിർത്തിയാൽ ചിന്നൻപള്ളിയിലെ വൈദ്യുതി പ്രശ്നങ്ങൾ അവസാനിക്കും" എന്ന് സാമുവൽ പ്രസംഗിച്ചു. രാത്രി ഉറക്കത്തിൽ സാമുവൽ, സുരേഷിൻ്റെ വിധിക്ക് വിധേയനായി. സുരേഷ് '700 V പൾമനറി ക്ലോഷർ' മോഡ് ഉപയോഗിച്ച് കാലുകളിലും കൈകളിലുമാണ് ഷോക്ക് നൽകിയത്. 700 Vപവർ ശരീരത്തിലൂടെ പ്രവഹിച്ചപ്പോൾ സാമുവലിൻ്റെ ശ്വാസകോശത്തിലെ പേശികൾ പൂർണ്ണമായി സങ്കോചിച്ചു. വായിൽ നിന്ന് നുരയും പതയും വന്ന മരണം, പരിശോദിച്ച ഡോക്ടർമാർക്ക് ശ്വാസം മുട്ടി മരിച്ചതിന് തുല്യമായ ഫലമുണ്ടാക്കി. പിന്നീട് ഇരയായത് ഗീത എന്ന ബ്യൂട്ടി പാർലർ ഉടമയായിരുന്നു.ഫ്യൂസ് ശരിയാക്കാൻ ചെന്നപ്പോൾ "ഇവൻ്റെ മുഖം കണ്ടാൽ തന്നെ കറൻ്റ് പോകുമല്ലോ " എന്ന് കസ്റ്റമേഴ്സിനോട് കളിയാക്കി ചിരിച്ച ഗീതയെ, സുരേഷ് 'ഓട്ടോ-ഫ്ലക്സ് മോഡ്' ഉപയോഗിച്ച് പാർലറിലെ കട്ടിലിൽ വെച്ച് ഷോക്ക് അടിപ്പിച്ചു. 400 Vമുതൽ 1000 V വരെ പവർ തുടർച്ചയായി പല തവണ പുറത്തുവിട്ട്, വൈദ്യുതീകരണത്തിൻ്റെ തെളിവുകൾ ഇല്ലാതാക്കി. ഇത് ഒരു തരം ബ്രോഡ്ബാൻഡ് ഷോക്ക് ആയിരുന്നു, ഇത് ആന്തരികാവയവങ്ങളെ പൂർണ്ണമായും തകർത്തു. ഗീതയുടെ മരണം ഒരു 'അജ്ഞാത രോഗം' എന്ന നിലയിൽ റിപ്പോർട്ട് ചെയ്യപ്പെട്ടു. പ്രതികാരത്തിൻ്റെ ഈ 'ലോഡ്ഷെഡിംഗ്' പിന്നെയും തുടർന്നു. പ്രകാശൻ, ഒരു ബാങ്ക് ജീവനക്കാരൻ, ഫോം തെറ്റിയതിനു സുരേഷിൻ്റെ മകനെ ബാങ്കിൽ വെച്ച് കളിയാക്കി"നിന്റെ അച്ഛനെപ്പോലെ കറന്റ് പോയവനാണോ നീ?" എന്ന് ചോദിച്ചു. പ്രകാശന് സുരേഷ് നൽകിയത് 550 V ഇമ്മൊബിലൈസർ' മോഡ് ആയിരുന്നു. ഷോക്കിൽ പേശികൾ പൂർണ്ണമായും ലോക്കാവുകയും തൽക്ഷണം മരണം സംഭവിക്കുകയും ചെയ്തു. കമലമ്മ, സുരേഷിൻ്റെ അമ്മയെ വിളിച്ച് വഴക്ക് പറഞ്ഞതിന്, 650 V മോഡിൽ കമലമ്മയുടെ കിടപ്പുമുറിയിൽ വെച്ച് ആന്തരിക രക്തസ്രാവം ഉണ്ടാക്കി സുരേഷ് പ്രതികാരം തീർത്തു. വേണു , സുരേഷിനെ കണ്ടാൽ 'കറൻ്റ് പോകുന്നേ' എന്ന് വിളിച്ച് കളിയാക്കിയിരുന്ന ചായക്കടക്കാരൻ. വേണുവിന്റെ മരണം 'കഠിനമായ ഛർദ്ദിക്ക്' ശേഷമുള്ള ഹൃദയാഘാതമായി രേഖപ്പെടുത്തി. ഇങ്ങനെ, തന്നെ വേദനിപ്പിച്ച പതിനഞ്ചോളം പേരെ, സുരേഷ് തൻ്റെ ഷോക്കർ ഉപയോഗിച്ച് ഇല്ലാതാക്കി. ഗ്രാമത്തിൽ പവർ കട്ട് ഒരു ഭീഷണിയായി മാറി. ആരും മരണ കാരണം വ്യക്തമായി പറയാനാവാതെ ഭയന്നു. പല മരണങ്ങൾ ഒരേ രീതിയിൽ, പ്രത്യേകിച്ച് വൈദ്യുതി മുടങ്ങിയ രാത്രികളിൽ സംഭവിച്ചതോടെ, ഇൻസ്‌പെക്ടർ രാഘവൻ കേസ് ഏറ്റെടുത്തു. രാഘവൻ ചിന്നൻപള്ളിക്കാരൻ അല്ലായിരുന്നു, മാത്രമല്ല, അദ്ദേഹത്തിന് വൈദ്യുതി മുടങ്ങിയാൽ ആരെയും വിളിച്ച് ശകാരിക്കുന്ന ശീലവുമുണ്ടായിരുന്നില്ല. അതുകൊണ്ട് തന്നെ സുരേഷിന്റെ പ്രതികാര ലിസ്റ്റിൽ അദ്ദേഹം ഉണ്ടായിരുന്നില്ല. രാഘവൻ ചിന്തിച്ചു: "ഇത്രയും മരണങ്ങൾ, പക്ഷേ ഒരു തെളിവുമില്ല. ഒരു പൊള്ളൽപോലുമില്ല. ഹൃദയാഘാതവും ശ്വാസംമുട്ടലും." ഒടുവിൽ രാഘവൻ ഒരു പാറ്റേൺ കണ്ടെത്തി. മരിച്ചവരെല്ലാം സുരേഷിനെ വിളിച്ച് അസഭ്യം പറയുന്നതിലും, ശകാരിക്കുന്നതിലും മുൻപന്തിയിലായിരുന്നവർ. സുരേഷ് ചോദ്യം ചെയ്യലിന് വിധേയനായി. അവൻ ശാന്തനായിരുന്നു. അവന്റെ കൈയ്യിലുണ്ടായിരുന്ന ടെസ്റ്റിംഗ് കിറ്റ് രാഘവൻ പരിശോധിച്ചു, പക്ഷേ ഒരു സാധാരണ ഉപകരണമായി മാത്രമേ അതിനെ കാണാൻ കഴിഞ്ഞുള്ളൂ ഇതിനിടയിൽ, ആദ്യ കേസന്വേഷണം നടത്തിയ സുരേഷിനെ ഭീഷണിപ്പെടുത്തിയിരുന്ന ഇൻസ്‌പെക്ടർ ബിജുവിനെ രാഘവൻ അന്വേഷണത്തിൽ നിന്ന് മാറ്റിനിർത്തി. ബിജു, രാഘവനെ വിളിച്ച് ദേഷ്യത്തോടെ സുരേഷിനെക്കുറിച്ച് മോശമായി സംസാരിച്ചു. " “രാഘവൻ സാറേ. സുരേഷിനെ ഞാൻ ലോക്കപ്പിലിട്ട് തലകീഴായി നിർത്തും. അപ്പോൾ അവൻ സത്യം പറയും " അത് സുരേഷിനുള്ള അവസാനത്തെ ക്ഷണം ആയിരുന്നു. ഒരു കാറ്റുള്ള രാത്രി. വൈദ്യുതി പോയി. സുരേഷ് ഷോക്കറുമായി ബിജുവിൻ്റെ വീട്ടിലെത്തി. സുരേഷ് 'ഡ്യുവൽ ഷോക്ക് മോഡിൽ' 750 V പ്രോബുകൾ ബിജുവിൻ്റെ നെഞ്ചിലും,അത് കണ്ടു അലറി വിളിച്ച ഭാര്യയുടെ കൈകളിലും വെച്ചു. 750 V പവറിൽ രണ്ട് പേരുടെയും ശരീരത്തിലൂടെ ഒരേ സമയം വൈദ്യുതി പ്രവഹിച്ചു. ഷോക്ക് നൽകിയ ശേഷം, സുരേഷ് വീടിനുള്ളിലെ പഴയ വയറിങ്ങുകൾ വിദഗ്ദ്ധമായി ഷോർട്ട് ചെയ്തു. സംഭവം വൈദ്യുതിയുടെ അമിതഭാരം മൂലമുള്ള അപകടമായി രേഖപ്പെടുത്തപ്പെട്ടു. ഈ മരണത്തോടെ രാഘവൻ്റെ അന്വേഷണം വീണ്ടും വഴിമുട്ടി. സുരേഷ് ഇപ്പോൾ സംശയത്തിൻ്റെ നിഴലിലായിരുന്നില്ല. ………. ചിന്നൻപള്ളി നിശ്ശബ്ദമായി. കറൻ്റ് പോയാൽ ആരും മൊബൈൽ എടുക്കില്ല. ഭയം വൈദ്യുതിയെക്കാൾ ശക്തമായി. സുരേഷ്, തൻ്റെ പ്രതികാരത്തിൻ്റെ വിജയം കണ്ടിട്ടും, സന്തോഷമില്ലാത്തവനായി. കാരണം അവന് ഒരു തരത്തിൽ ആ ശാപവാക്കുകൾ ഒരു ലഹരിയായിരുന്നു. ആ ശബ്ദം കേൾക്കാനില്ലാത്തത് അവനെ വിഷമിപ്പിച്ചു. അവന് പുതിയ ഫീഡ്‌ബാക്ക്ആവശ്യമായിരുന്നു. ഒരു വലിയ ലോഡ്ഷെഡിംഗ് രാത്രി. സുരേഷ് തൻ്റെ വർക്ക്‌ഷോപ്പിലിരുന്ന് 'ഷോക്കർ' തുടച്ചു വൃത്തിയാക്കി. തൻ്റെ ഫോണിൽ ഒരു ഓട്ടോ-കോളിംഗ് പ്രോഗ്രാം ഉണ്ടാക്കി. അവൻ്റെ ഫോൺ സ്വയം അവന്റെ തന്നെ നമ്പറിലേക്ക് വിളിച്ചു. റെക്കോർഡഡ് ശാപവാക്കുകൾ കേട്ട് സുരേഷ് കണ്ണടച്ച് ചിരിച്ചു "ഡാ സുരേ നീ എവിടെ പോയി കിടക്കുന്നെടാ നാറി ? കറന്റ് പോയിട്ട് രണ്ട് മണിക്കൂർ! നിന്നെ ഒക്കെ തല്ലി കൊല്ലണം! നിൻ്റെ കഴിവില്ലായ്മ കാരണം ഞങ്ങൾ ഇരുട്ടിൽ ഇരിക്കുന്നു!" സുരേഷ് ഫോണിലേക്ക് ശാന്തമായി ചിരിച്ചു സംസാരിച്ചു “ഹലോ, കറൻ്റ് സുരേഷ് സ്പീക്കിംഗ്. സർവീസ് ചാർജ് 440 Vമുതൽ 1000 V വരെയാണ്. കോൾ ചെയ്ത നമ്പർ ഉടനടി ലൊക്കേഷൻ ട്രേസ് ചെയ്തിട്ടുണ്ട്. ട്രേസിംഗ് പൂർണ്ണമായി. പുതിയ ലക്ഷ്യം സ്ഥിരീകരിച്ചു. നിങ്ങളുടെ ശബ്ദം എൻ്റെ സർവീസിനുള്ള ക്ഷണം ആണ്. നന്ദി, ഉടനെ ഹോം സർവീസ് എത്തുന്നതാണ്. ഹ ഹ ഹ ” ചിരിച്ചു കൊണ്ട് ഷോക്കർ തോളിലിട്ടു. കറുത്ത റെയിൻകോട്ട് ധരിച്ച് സുരേഷ് ഇരുട്ടിലേക്കിറങ്ങി. അവൻ തൻ്റെ കെ.എസ്.ഇ.ബി.യിലെ ട്രാൻസ്ഫറിനുള്ള അപേക്ഷ മുൻപേ നൽകിയിരുന്നു. ചിന്നൻപള്ളിയിലെ പ്രതികാരത്തിൻ്റെ അധ്യായം അവസാനിച്ചു. "ചിന്നൻപള്ളിയിൽ ഇനി ശാപമില്ല. പക്ഷേ കേരളത്തിൽ ഇവിടെ മാത്രമല്ലല്ലോ ലോഡ്ഷെഡിംഗ് ഉള്ളത്? ഷോക്കർ പ്രവർത്തിച്ചുകൊണ്ടിരിക്കും." സുരേഷ് താമസിയാതെ അവിടെ നിന്നും ട്രാൻസ്ഫർ വാങ്ങി കേരളത്തിലെ മറ്റൊരു ജില്ലയിലേക്ക്, തീവ്രമായ ലോഡ്ഷെഡിംഗ് ഉള്ള ഒരു ഗ്രാമത്തിലേക്ക് പോയി. ……… അവൻ ഇപ്പോഴും കേരളത്തിലെ ലോഡ്ഷെഡിംഗ് ഉള്ള രാത്രികളിൽ അലഞ്ഞുനടക്കുന്നുണ്ടാവാം. ഇനി ഒരുപക്ഷേ, അയൽ സംസ്ഥാനങ്ങളിലെ വൈദ്യുതി വിതരണ കമ്പനികൾക്ക് കീഴിൽ ഒരു പുതിയ ഐഡന്റിറ്റിയിൽ അവൻ ഉണ്ടാവാം. ഇരുട്ട് വീഴുമ്പോൾ, വൈദ്യുതി മുടങ്ങുമ്പോൾ, ഭയത്തോടെ മൊബൈൽ ഫോൺ എടുത്ത് കംപ്ലയിൻ്റ് വിളിക്കുന്നവരെ കാത്ത്. ……… നിങ്ങളുടെ നാട്ടിൽ ഇപ്പോൾ കറന്റ് പോയോ? ശ്രദ്ധിക്കുക,ദേഷ്യത്തിൽ kseb കാരെ തെറി വിളിക്കാൻ വേണ്ടി ഫോൺ വിളിച്ചാൽ എടുക്കുന്നത് ചിലപ്പോൾ കറന്റ് സുര ആയിരിക്കും. ……. End

#🧟 പ്രേതകഥകൾ! #📙 നോവൽ #✍ തുടർക്കഥ #✍️ വട്ടെഴുത്തുകൾ #💥💤🌟 കരിഞ്ഞ പപ്‌സ് - ദി കൺക്ലൂഷൻ (The Burnt Puff - The Conclusion) (sequel of haunted chicken fry, haunted tapioca, haunted snacks, and Yaman’s Yamaha) (കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃച്ഛികം മാത്രം) ……………………………………. കൊച്ചുവേലൂർ ഗ്രാമത്തിലെ ദുരിതപർവ്വം താണ്ടി, സുരേഷിന്റെയും സന്ധ്യയുടെയും കുടുംബം നഗരത്തിലെ ഒരു സാധാരണ അപ്പാർട്ട്‌മെന്റ് സമുച്ചയത്തിന്റെ മൂന്നാം നിലയിൽ പുതിയ ജീവിതം തുടങ്ങിയിട്ട് ഒരു മാസത്തിലേറെയായിരുന്നു. യമഹ ഫാസിനോ സ്കൂട്ടറിന്റെ പേടിപ്പെടുത്തുന്ന അദ്ധ്യായം അവസാനിച്ചുവെന്ന് അവർ ഉറച്ചുവിശ്വസിച്ചു. ഡോക്ടർ സാമുവലിന്റെ പ്രേതം സ്വയം ബലിയായിക്കൊണ്ട് ശാപം നശിപ്പിച്ച ആ ഭീകര രാത്രി, ഒരു നീണ്ട പേടിസ്വപ്നം പോലെ പതിയെ മാഞ്ഞുപോവുകയായിരുന്നു. പഴയ സംഭവങ്ങളുടെ ശാരീരികമായ അടയാളങ്ങൾ പോലും മാഞ്ഞുതുടങ്ങി. സുരേഷിന്റെ കൈയിലെ മുറിവിന്റെ പാട് നേർത്തു, മനുവിന്റെ കാലിലെ നീര് പൂർണ്ണമായും മാറി, സിജിയുടെ തലവേദന വല്ലപ്പോഴും മാത്രം ഒരലയടിപോലെ വന്നുപോയിരുന്നു. സന്ധ്യ, മനസ്സിലെ ഭാരം ഒഴിഞ്ഞപ്പോൾ, തന്റെ പഴയ പാചകത്തിലെ ആനന്ദം വീണ്ടെടുത്തു. അടുക്കള വീണ്ടും കറിവേപ്പിലയുടെയും ഉണക്കമീനിന്റെയും സുഗന്ധങ്ങളാൽ നിറഞ്ഞു. എട്ടാം ക്ലാസ്സുകാരനായ മനു, തന്റെ ചുവന്ന ഹെർക്കുലീസ് സൈക്കിളിൽ അപ്പാർട്ട്‌മെന്റിന്റെ മുറ്റത്തും സമീപത്തെ ഇടറോഡുകളിലും ആവേശത്തോടെ ചീറിപ്പാഞ്ഞു. പതിനഞ്ചുകാരിയായ സിജി, തന്റെ പഠനത്തിൽ ശ്രദ്ധ കേന്ദ്രീകരിച്ചു. വൈകുന്നേരങ്ങളിൽ, ടൗണിലെ ഒരു ഇലക്ട്രിക്കൽ ഷോപ്പിൽ പുതിയ ജോലി കണ്ടെത്തിയ ശേഷം സുരേഷ് തിരിച്ചെത്തുമ്പോൾ, അവർ നാലുപേരും ചെറിയ ബാൽക്കണിയിലിരുന്ന് പാട്ടുകൾ കേട്ട്, ചായയും പലഹാരങ്ങളും കഴിച്ചു. എല്ലാം സാധാരണ നിലയിലേക്ക് മടങ്ങിയെന്ന് അവർ പരസ്പരം വിശ്വസിച്ചു. പക്ഷേ, ചില ദുശ്ശകുനങ്ങൾ, മറഞ്ഞിരുന്ന നിഴലുകൾ പോലെ, അവശേഷിച്ചിരുന്നു. രാത്രികാലങ്ങളിൽ, സന്ധ്യ ഉറക്കത്തിൽ ഞെട്ടിയുണരുമ്പോൾ, അകലെ എവിടെയോ ഒരു ലോഹക്കഷ്ണം ഉരസുന്ന നേർത്ത ശബ്ദം കേൾക്കുന്നതുപോലെ തോന്നി. മനു, പുതിയ സൈക്കിളിന്റെ ഹാൻഡിലിൽ ചിലപ്പോൾ ഐസ് പോലുള്ള അകാരണമായ തണുപ്പ് അനുഭവപ്പെട്ട് അസ്വസ്ഥനാകും. ശാപം അവരുടെ പിന്നാലെ, ഒരു ഇഴയുന്ന പാമ്പിനെപ്പോലെ, നഗരത്തിന്റെ വെളിച്ചത്തിൽ പോലും ഒളിച്ചിരിപ്പുണ്ടായിരുന്നു. ……. നഗരം തണുപ്പിന്റെ പിടിയിലമർന്ന ഒരു ഡിസംബർ രാത്രി. പുറത്ത് നേരിയ മഞ്ഞുണ്ടായിരുന്നു. രാത്രി ഏകദേശം ഒൻപത് മണി. അപ്പാർട്ട്‌മെന്റ് ശാന്തമായിരുന്നു. സിജി, തന്റെ ചെറിയ മേശയ്ക്ക് മുന്നിലിരുന്ന്, ബയോളജി പുസ്തകത്തിലെ ചിത്രങ്ങൾ വരയ്ക്കുകയായിരുന്നു. അമ്മയും അച്ഛനും ടിവി കാണുന്നു, മനു തന്റെ ഹോംവർക്ക് ചെയ്യുന്നു. പെട്ടെന്ന്, സിജിയുടെ കൈയിലെ പെൻസിൽ താഴെ വീണു. അവളുടെ കണ്ണുകൾക്ക് ചുറ്റും ഒരു വല്ലാത്ത ഭാരം അനുഭവപ്പെട്ടു. മുറിയിലെ വിളക്കുകൾ, ഒരു നിമിഷം, മിന്നിമാഞ്ഞു. കരിഞ്ഞ തുണിയുടെയും, തുരുമ്പിച്ച ഇരുമ്പിന്റെയും, പണ്ടത്തെപ്പോലെ, ആ പഴയ, ഓക്കാനം വരുന്ന ഗന്ധം—അത് നേരിട്ട് അവളുടെ മനസ്സിലേക്കാണ് വന്നത്. ശരീരം നിയന്ത്രണം വിട്ട് വിറയ്ക്കാൻ തുടങ്ങി. സിജിയുടെ പേടിപ്പെടുത്തുന്ന രൂപമാറ്റം സന്ധ്യയെ ഞെട്ടിച്ചു . “സിജി, എന്താ പറ്റിയെ? മോൾക്കെന്താ?" എന്ന് സന്ധ്യ വിളിച്ചെങ്കിലും മറുപടിക്ക് പകരം, അവളുടെ മുഖത്തെ പേശികൾ വലിഞ്ഞു മുറുകി, കണ്ണുകൾ ചുവന്നു, ഒരു പൈശാചികമായ തിളക്കം ആ കണ്ണുകളിൽ നിറഞ്ഞു. അവളുടെ ശബ്ദം, സ്വന്തമല്ലാത്ത, പരുപരുത്ത, ഒരു പുരുഷന്റെ അലർച്ചയായി പുറത്തുവന്നു. "ഇനി ഒളിച്ചോടാൻ നോക്കണ്ട! നിന്റെ കുടുംബം... ഈ ശാപം പൂർത്തിയാകാൻ ഇനി നീ മാത്രമേ ബാക്കിയുള്ളൂ! നിന്റെ കുടുംബം ഞാൻ നശിപ്പിക്കും ! നീയാണ് അവസാന വാഹകം!" സിജിയുടെ കൈകൾ മേശപ്പുറത്ത് ആഞ്ഞു, പാത്രങ്ങളും പുസ്തകങ്ങളും നിലത്തേക്ക് വലിച്ചെറിഞ്ഞു. മുറിയിൽ ഒരു ചെറിയ കൊടുങ്കാറ്റിന്റെ ശബ്ദം പോലെ വായു ചുഴറ്റിയെടുത്തു. ഭയന്നുപോയ സന്ധ്യ പിന്നോട്ട് നീങ്ങി, ഭയം അവളുടെ വാക്കുകളെ തടഞ്ഞു. മനു, നിലവിളിച്ചുകൊണ്ട് മുറിയിലേക്ക് ഓടി വന്നപ്പോൾ, സിജിയുടെ ദേഹത്ത് നിന്ന് ഒരു അദൃശ്യമായ ശക്തി അവനെ തള്ളിമാറ്റി. അവൻ വാതിലിൽ തട്ടി നിലത്തുവീണു. ……. പേടിച്ചു പോയ സുരേഷ്, ഭ്രാന്തമായി, പഴയ ഫോൺ എടുത്ത്, കൊച്ചുവേലൂരിലെ ആദർശൻ തിരുമേനിയെ വിളിച്ചു. മണിക്കൂറുകൾക്കകം തിരുമേനി അപ്പാർട്ട്‌മെന്റിൽ എത്തി. സിജിയുടെ മുറിക്ക് പുറത്ത് നിന്നുകൊണ്ട് തിരുമേനി മന്ത്രങ്ങൾ ഉരുവിട്ടു. സിജിയുടെ ശരീരത്തിൽ നിന്നും ഉയർന്നുവന്ന അലർച്ച, തിരുമേനിയുടെ മന്ത്രങ്ങളെ ശക്തിയായി ചെറുത്തു. മുറിയുടെ വാതിൽ പോലും വിറച്ചു. തിരുമേനിയുടെ നെറ്റിയിൽ വിയർപ്പു തുള്ളികൾ പ്രത്യക്ഷപ്പെട്ടു . "ഇത്... ഇത് വളരെ പഴക്കമുള്ള ഒരു കെട്ടുപാടാണ്," തിരുമേനി കിതച്ചുകൊണ്ട് പറഞ്ഞു. "ഈ ശക്തിക്ക് ഒരു വാഹകനെ കിട്ടിയിരിക്കുന്നു. എന്റെ മന്ത്രങ്ങൾക്ക് ഇതിനെ താൽക്കാലികമായി ബന്ധിക്കാൻ മാത്രമേ കഴിയൂ, പുറത്താക്കാൻ കഴിയില്ല. ഇത് ഒരു വ്യക്തിയുടെ ദുർമന്ത്രവാദത്തിന്റെ ശക്തി മാത്രമല്ല. ഇതിന്റെ മൂലകാരണം, ഒരു പുണ്യനദിയിൽ മാത്രമേ ശുദ്ധീകരിക്കാൻ കഴിയൂ. നിങ്ങളെ രക്ഷിക്കാനുള്ള ഏക മാർഗ്ഗം, ശാപത്തിന്റെ ഉറവിടം കണ്ടെത്തി നശിപ്പിക്കുക എന്നതാണ്. നിങ്ങൾ എത്രയും പെട്ടെന്ന് വാരാണസിയിലേക്ക് പോകണം. ഗംഗയുടെ തീരത്ത്, നിങ്ങൾക്കൊരു അഘോരിയെ കണ്ടെത്താൻ കഴിഞ്ഞാൽ, ഈ ശാപത്തിന്റെ യഥാർത്ഥ ഉറവിടവും, അത് എന്തുകൊണ്ടാണ് നിങ്ങളെ വിടാത്തതെന്നും അയാൾക്ക് വെളിപ്പെടുത്താൻ കഴിയും." …….. ഡിസംബർ 15, 2025. കടുത്ത തണുപ്പിൽ സുരേഷും സന്ധ്യയും, മനുവും, ബോധം മങ്ങിയ, ഇടയ്ക്ക് അലറുന്ന സിജിയുമായി വാരാണസിയിലേക്കുള്ള ട്രെയിനിൽ യാത്ര തിരിച്ചു. സിജിയെ ബന്ധിച്ചിരുന്ന ദുഷ്ടശക്തി, ഇടയ്ക്കിടെ അവളുടെ ദേഹത്ത് വന്ന് അവരെ ഭയപ്പെടുത്തിക്കൊണ്ടിരുന്നു. ട്രെയിൻ യാത്ര ഒരു ദുരിതമായിരുന്നു. അവളുടെ കഠിനമായ അലർച്ചകളും വിറയലും കാരണം കൂടെ യാത്ര ചെയ്തവർ പോലും ഇവരെ ഭീതിയോടെ നോക്കി മാറി നിന്നു. ഒടുവിൽ, പുരാതനമായ വാരാണസി നഗരത്തിൽ, ഗംഗാ നദിയുടെ തീരത്ത്, ചിതകളുടെ പുകയും മന്ത്രങ്ങളും നിറഞ്ഞ ദശാശ്വമേധ് ഘാട്ടിൽ അവർ എത്തിച്ചേർന്നു. ദിവസങ്ങൾ നീണ്ട അന്വേഷണത്തിനൊടുവിൽ, അവർക്ക് ഒരു അഘോരി ബാബയെ കണ്ടെത്താൻ കഴിഞ്ഞു. വെളുത്ത ഭസ്മം മുഖത്തും ശരീരത്തിലും പൂശി, കറുത്ത വസ്ത്രം ധരിച്ച്, തലയിൽ ജടയും കഴുത്തിൽ വലിയ രുദ്രാക്ഷമാലയും അണിഞ്ഞ, തീക്ഷ്ണമായ കണ്ണുകളുള്ള ഒരു യോഗി. അഘോരി, സിജിയെ ഒരു നോക്ക് നോക്കി. അവൻ്റെ കണ്ണുകളിൽ ശാന്തമായ ഒരു തീവ്രതയുണ്ടായിരുന്നു. "നിന്റെ കുടുംബം... ഒരു വൃത്തത്തിൽ കുടുങ്ങിയിരിക്കുന്നു," അഘോരി പരുപരുത്ത ശബ്ദത്തിൽ പറഞ്ഞു . "ഈ കുട്ടിയുടെ ശരീരത്തിൽ, ഒരു ദുഷ്ടശക്തി കുടികൊള്ളുന്നു. ഇത് വെറുമൊരു മന്ത്രവാദമല്ല, മറിച്ച്, ദീർഘകാലമായുള്ള കർത്തവ്യബന്ധനം ആണ്. ഈ ശാപം, നിന്റെ കുടുംബത്തിന്റെ ഒരു പാപത്തിന്റെ ഫലമാണ്. നിങ്ങൾ ഒരു ചങ്ങലയുടെ ഭാഗമാണ്. ഒരു ബലികൊണ്ട് അവസാനിക്കുന്നതല്ല ഈ ദുരിതം." സന്ധ്യ, ഭയവും കുറ്റബോധവും കലർന്ന സ്വരത്തിൽ ചോദിച്ചു: "ഞങ്ങളുടെ പാപം? ഞങ്ങൾ എന്ത് പാപമാണ് ചെയ്തത്? ഞങ്ങൾ മനപ്പൂർവം ആരെയും ദ്രോഹിച്ചിട്ടില്ല!" ………. അഘോരി, ഗംഗയുടെ തീരത്ത്, ഒരു ചെറിയ ഹോമകുണ്ഡം തയ്യാറാക്കി. ചന്ദനവും വിഭൂതിയും പ്രത്യേക ഔഷധസസ്യങ്ങളും ചേർത്ത്, ഒരു ഭീഷണമായ മന്ത്രം ജപിച്ചു. സിജിയെ മെല്ലെ നിലത്തിരുത്തി, അവളുടെ നെറ്റിയിൽ ഭസ്മം പുരട്ടി. സിജിയുടെ ശരീരം വിറച്ചു, ഒരു അലർച്ച അവളുടെ വായിൽ നിന്ന് പുറത്തുവന്നു, എന്നാൽ അഘോരിയുടെ മന്ത്രങ്ങൾ ആ ശക്തിയെ പിടിച്ച് കെട്ടി. "നിന്റെ പാപം, സന്ധ്യ, മൂന്ന് വർഷങ്ങൾക്ക് മുമ്പ്, ഒരു നിഷ്കളങ്കന്റെ ജീവിതം തകർത്തതാണ്," അഘോരി പറഞ്ഞു. "നീ, ഒരു ബേക്കറിയുടെ ഭക്ഷണത്തെക്കുറിച്ച്, വീഡിയോ എടുത്ത്, അത് ഓൺലൈനിൽ പോസ്റ്റ് ചെയ്തു. ആ വീഡിയോ, പകുതി സത്യമായിരുന്നെങ്കിലും, അതിന്റെ അവതരണം ഒരു ബേക്കറി ഉടമയുടെ ബിസിനസ്സ് തകർക്കാൻ മാത്രം ശക്തമായിരുന്നു. അവന്റെ ദേഷ്യവും, ബിസിനെസ്സ് തകർന്നതിലുള്ള ശാപവും, ഒരു മന്ത്രവാദിയുടെ സഹായത്തോടെ, നിന്റെ കുടുംബത്തെ തുടർച്ചയായി വേട്ടയാടി. ആ ചെറുപ്പക്കാരനാണ് ഈ ശാപത്തിന്റെ ഉറവിടം. അവന്റെ ദേഷ്യം ആത്മാവായ ഡോക്ടർ സാമുവലിന്റെ ബലിയെപ്പോലും മറികടന്ന് നിങ്ങളെ പിന്തുടർന്നു ചിലരുടെ പക ഭീകരമാണ് സന്ധ്യ മഹാഭാരതത്തിലെ അശ്വത്ഥാമാവിന്റെ പക പോലെ മറ്റൊന്ന് ." സന്ധ്യ, ഞെട്ടലോടെ, തലയിൽ കൈവെച്ച് നിലവിളിച്ചു. മൂന്ന് വർഷങ്ങൾക്ക് മുമ്പ്, 'സ്നേഹ വലയം ബേക്കറി'യിൽ നിന്ന് വാങ്ങിയ ഒരു പപ്സ് കുറച്ച് കരിഞ്ഞത് കണ്ട്, തമാശയ്ക്ക് തുടങ്ങിയ ഒരു വീഡിയോയായിരുന്നു അവൾ തലക്കെട്ട് നൽകിയത് "ഇവിടുത്തെ കരിഞ്ഞ പപ്‌സ്, ഒരിക്കലും വാങ്ങരുത്!" ആ വീഡിയോവൈറൽ ആയി , ആ ബേക്കറിയുടെ പ്രശസ്തിയെ പൂർണ്ണമായും തകർത്തിരുന്നു. താൻ ഒരു നിമിഷത്തെ ദേഷ്യത്തിൽ ചെയ്ത പ്രവൃത്തി ഇത്രയും വലിയ ദുരിതങ്ങൾ വരുത്തിവെച്ചതോർത്ത് അവൾ ഗദ്ഗദകണ്ഠയായി. "ഞാൻ... ഞാൻ ഒരു തമാശക്ക് ചെയ്തതാണ്. അറിഞ്ഞിട്ടല്ല, ബാബ," സന്ധ്യ കണ്ണീരോടെ നിലത്തു വീണു. "എനിക്ക് അവനോട് ക്ഷമ ചോദിക്കാൻ കഴിയുമോ? ഈ ശാപം മാറാൻ എന്ത് ചെയ്യണം?" അഘോരി, ഗംഗയിൽ ഇറങ്ങി, അവിടെനിന്ന് ഒരു ചെമ്പ് പാത്രത്തിൽ വെള്ളം കോരിയെടുത്തു. അദ്ദേഹം മന്ത്രങ്ങൾ ജപിച്ച്, സിജിയുടെ നെറ്റിയിൽ ഭസ്മം വീണ്ടും പുരട്ടി. ഗംഗയുടെ തീവ്രമായ ശുദ്ധീകരണ ശക്തിയും അഘോരിയുടെ മന്ത്രങ്ങളും ഒത്തുചേർന്നപ്പോൾ, ഒരു ഭയാനകമായ ശബ്ദത്തോടെ, ആ ദുഷ്ടശക്തി, കറുത്ത കട്ടിയുള്ള പുകയായി, സിജിയുടെ ശരീരത്തിൽ നിന്ന് പുറത്തുവന്ന്, ഗംഗാ നദിയിൽ അലിഞ്ഞുചേർന്നു. സിജി ബോധം വീണ്ടെടുത്ത്, "അമ്മേ..." എന്ന് വിളിച്ച്, സന്ധ്യയെ കെട്ടിപ്പിടിച്ചു. "നിന്റെ കുടുംബത്തിലെ ദുഷ്ടശക്തിയുടെ ബന്ധനം ഇപ്പോൾ നീങ്ങിയിരിക്കുന്നു," അഘോരി പറഞ്ഞു. "എന്നാൽ, ഈ ശാപത്തിന്റെ മൂലകാരണം, ആ ബേക്കറി ഉടമയുടെ ദേഷ്യമാണ്. നീ അവനെ കണ്ടെത്തി, ആത്മാർത്ഥമായി ക്ഷമ ചോദിക്കണം. അവന്റെ ഹൃദയം ശുദ്ധമായാൽ മാത്രമേ, ഈ ശാപം പൂർണ്ണമായും മാറുകയുള്ളൂ. അതാണ് നിന്റെ കർത്തവ്യ ബന്ധനം. ഒരു മനുഷ്യന്റെ ഉപജീവനമാർഗ്ഗം തകർത്തതിൻ്റെ പാപം, അവനോടുള്ള ക്ഷമാപണം കൊണ്ട് മാത്രമേ ശുദ്ധീകരിക്കാൻ കഴിയൂ. അവൻ നിനക്ക് മാപ്പ് നൽകണം." …….. കേരളത്തിൽ തിരിച്ചെത്തിയ സന്ധ്യ, ഭയവും പ്രതീക്ഷയും കലർന്ന മനസ്സോടെ, "സ്നേഹ വലയം ബേക്കറി" സ്ഥിതി ചെയ്തിരുന്ന പഴയ കെട്ടിടത്തിലേക്ക് പോയി. വിബിൻ, ഇപ്പോഴും ആ പഴയ ബേക്കറിയിൽ, എങ്കിലും ഉപഭോക്താക്കൾ കുറഞ്ഞ്, ഒരു മങ്ങിയ മുഖത്തോടെ, കൗണ്ടറിൽ നിന്നു. ആ പഴയ തിളക്കം ആ മുഖത്ത് നിന്ന് മാഞ്ഞുപോയിരുന്നു. സന്ധ്യ, വിബിന്റെ അടുക്കലെത്തി, കൈകൾ കൂപ്പി, കണ്ണുകൾ നിറഞ്ഞു "വിബിൻ, എന്റെ തെറ്റിന് ഞാൻ ക്ഷമ ചോദിക്കുന്നു. മൂന്ന് വർഷങ്ങൾക്ക് മുമ്പ്, ഞാൻ ഇട്ട ആ വീഡിയോ... അത് നിന്റെ ബിസിനസിനെ തകർത്തു. . അതിന്റെ പേരിലുള്ള ശാപമാണ് എന്റെ കുടുംബത്തെ തുടർച്ചയായി വേട്ടയാടിയത്. ഞങ്ങളുടെ ദുരിതത്തിന് കാരണം ഞാനാണ്. ഡോക്ടർ സാമുവലിന്റെ പ്രേതം ഞങ്ങളെ രക്ഷിച്ചെങ്കിലും, ശാപം ഇപ്പോഴും എന്റെ മകളെ വേട്ടയാടി. ദയവായി, ഞങ്ങൾക്ക് മാപ്പ് നൽകൂ. നിന്റെ ദേഷ്യം മാറിയാൽ മാത്രമേ ഈ ശാപം പൂർണമായി മാറുകയുള്ളൂ." വിബിൻ, സന്ധ്യയെ നോക്കി. അവന്റെ കണ്ണുകളിൽ, ദേഷ്യത്തിന് പകരം, കടുത്ത വേദനയുടെയും നിരാശയുടെയും ഒരു നിഴൽ മാത്രം. ഒരു നിമിഷം അവൻ നിശബ്ദനായി നിന്നു. പിന്നെ, ഒരു നെടുവീർപ്പോടെ, അവൻ മനസ്സ് തുറന്നു: "സന്ധ്യ ചേച്ചി നിങ്ങളുടെ വീഡിയോ എന്റെ ബിസിനസിനെ തകർത്തു. ഞാൻ ദേഷ്യപ്പെട്ടു, എന്റെ സുഹൃത്ത് ശിവശങ്കരൻ പോറ്റിയെ കണ്ട്, നിങ്ങളുടെ കുടുംബത്തിനെതിരെ ഒരു ദുർമന്ത്രവാദം ചെയ്യിപ്പിച്ചു. അതായിരുന്നു ആദ്യ ശാപത്തിന്റെ തുടക്കം. തുടർന്ന് ഞാൻ തന്നെയാണ് യമഹ സ്കൂട്ടറിന്റെ പഴയ ഡീലറെ കണ്ട്, അതിൽ പുതിയൊരു ഭൂതകീലം വയ്പ്പിച്ചത്. പക്ഷേ... ഇപ്പോൾ, നിങ്ങളുടെ ക്ഷമാപണം കേട്ടപ്പോൾ, എന്റെ ഹൃദയം ശാന്തമായി. ഞാനുമിപ്പോൾ ഇതിൽ നിന്നൊരു മോചനം ആഗ്രഹിക്കുന്നു. എന്റെ ദേഷ്യമാണ് നിങ്ങൾക്ക് ഈ ദുരിതങ്ങൾ നൽകിയത്. അന്ന് ഈ മാപ്പ് പറഞ്ഞിരുന്നു എങ്കിൽ ഒരിക്കലും ഇത്രയും പ്രശ്നം സങ്കീർണ്ണം ആവില്ലായിരുന്നു ." വിബിൻ, കൗണ്ടറിന് പിന്നിൽ നിന്ന്, പുതുതായി തയ്യാറാക്കിയ, ചൂടുള്ള, കുറച്ചു പപ്സ് പ്ലേറ്റിലെടുത്ത്, സന്ധ്യയ്ക്കും കുടുംബത്തിനും നൽകി. "ഇത് എന്റെ വക,. സൗജന്യമാണ്. ചേച്ചി ഇനി ഒരിക്കലും തമാശക്ക് ഫുഡ് റേറ്റിംഗ് വീഡിയോ എടുക്കരുത്. നിങ്ങൾ ജീവിക്കു , മറ്റുള്ളവരെ ജീവിക്കാൻ അനുവദിക്കൂ. എന്റെ ദേഷ്യം ഇന്നത്തോടെ മാറിയിരിക്കുന്നു." സന്ധ്യ, സന്തോഷത്തോടെ, പപ്സ് എടുത്ത്, മനുവിനും സിജിക്കും സുരേഷിനും നൽകി. മനു, ഒരു കഷ്ണം കഴിച്ചു: "അമ്മേ, ഇത് ശരിക്കും സൂപ്പർ! ഇതുപോലെ ഒരു പപ്സ് ഞാൻ കഴിച്ചിട്ടില്ല!" എന്ന് ആവേശത്തോടെ പറഞ്ഞു. സിജി, ചിരിച്ചുകൊണ്ട്: "ഇനി എനിക്ക് തലവേദന വരില്ലഅല്ലെ അമ്മേ “ “ പപ്സ് സൂപ്പർ വിബിനെ “ സുരേഷ് പറഞ്ഞു ……. വിബിന്റെ ക്ഷമാപണവും ക്ഷമിക്കാനുള്ള മനസ്സും ശാപത്തിന്റെ അവസാന അവശിഷ്ടത്തെയും ഇല്ലാതാക്കി. സുരേഷിന്റെ കുടുംബം, കർത്തവ്യ ബന്ധനത്തിൽ നിന്ന് മോചിതരായി, ഒരു പുതിയ സന്തോഷത്തോടെ, അപ്പാർട്ട്‌മെന്റിലേക്ക് മടങ്ങി. വിബിൻ, തന്റെ ബേക്കറിയിൽ, പഴയതിലും വലിയ ആവേശത്തോടെ ജോലി തുടങ്ങി. ഉപഭോക്താക്കൾ വീണ്ടും എത്തിത്തുടങ്ങി. ശിവ ശങ്കരൻ പോറ്റി, തന്റെ മന്ത്രപുസ്തകവുമായി മറ്റൊരു ഗ്രാമത്തിലേക്ക് യാത്ര തിരിച്ചു. നഗരത്തിലെ താൽക്കാലിക ജീവിതം മതിയാക്കി, അവർ നാലുപേരും, ശാപത്തിന്റെ ദുരിതപർവ്വം താണ്ടി, കൊച്ചുവേലൂരിലെ തങ്ങളുടെ പഴയ വീട്ടിലേക്ക് ഒരു പുതിയ പ്രതീക്ഷയോടെ മടങ്ങിപ്പോയി. അവിടെ, ശാപത്തിന്റെ നിഴലില്ലാതെ, അവർ സന്തോഷത്തോടെ ഒരുമിച്ച് ജീവിച്ചുതുടങ്ങി ഒരു സന്ധ്യാ നേരം മങ്ങിയ വെളിച്ചത്തിൽ, സുരേഷിന്റെ കൈ പിടിച്ച്, സന്ധ്യ സന്തോഷത്തോടെ ചോദിച്ചു. "ഇനി പ്രശ്നം ഒന്നും വരില്ല , അല്ലേ, ചേട്ടാ? നമ്മൾ സന്തോഷത്തോടെ ജീവിക്കും." സുരേഷ്, ചിരിച്ചുകൊണ്ട്, അവളെ കളിയാക്കി: "അതേ, പക്ഷേ, ഇനി വീണ്ടും ഒരു വാഹനം വാങ്ങേണ്ട! പിന്നെയൊരു കാര്യം, റേറ്റിംഗ്നു വേണ്ടി ഓരോ വീഡിയോ ഉണ്ടാക്കി ഇട്ടാൽ നീ അടി മേടിക്കും !" “ അയ്യോ എനിക്ക് മതിയായേ “ സന്ധ്യ പറഞ്ഞു മനുവും സിജിയും അത് കേട്ട് ചിരിച്ചു, ഒരു പഴയ മലയാളം ഗാനം, "മഴവിൽക്കൊടിയിൽ..." കൊച്ചുവേലൂരിലെ അവരുടെ വീടിന്റെ ഉമ്മറത്ത് ശാന്തമായി മുഴങ്ങി. …….. End