#🚩அய்யா வைகுண்டர் 🚩 #அய்யா வைகுண்டர் #அய்யா வைகுண்டர் {1008} #💚Ayya 💗 Vaikundar💚 #Ayya Vaikundar கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 28.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== எறும்புகடை யானைமுதல் எண்பத்துநான் குயிர்கள் எழுகடல் பதினாலு புவிகளும் இரதிமதி சூரியர்கள் பருதி பாலாழியும் இயல்வானம் வாயு முதலாய் தெறும்பு மாமலை மாமரச் சோலையும் சேடனுந் தலைமோடனு மறியவே தென்கீழத் தேவரு மிங்குள்ள மூவரும் தேசதெய் வேந்திர னறியவே வாச முனிவோர்களும் வேதசன் னாசியும் மறையாறு சாஸ்திர மறியவே மண்டல மளந்தகை கொண்டெழுதும் வாசகம் மண்டலர்க ளெவரு மறியவே வறும்பகல் தொளாயிரத்து தொண்ணூற் றெட்டாண்டினில் வளர்ஸ்ரீ சாம்பசிவ மூர்த்தியும் பராபர ஸ்ரீராமரும் பதியேறும் மூர்த்தியும் பார்த்திந் தக்கலி யுகத்தில் படூரநீ சக்கலியால் வரும்வாறு வண்மையாய்ப் பகர்ந்து திருவாசக மெழுதிப் பலநூ லறிந்தவ ரெவர்க ளாயினும் பக்தியுட னெக் காலமும் பணிந்துதிரு வாசகத்தை முத்தியணைந் தோர்க்கு மிகுபல னுண்டாம் பகரக்கேளு நத்தியுடன் பூலோகக் கலியுகா தேசத்தில் நடக்கு முறைதானுங் கேளீர் . விளக்கம் ========= எறும்பு முதல் யானைவரை எண்பத்து நான்கு லட்சம் வகையான உயிரினங்களும். உப்பு, தேன், கருப்பஞ்சாறு, தயிர், நெய், பால், சுத்தோதகம் என்னும் ஏழு வகையான கடல்களும. பூலோகம், புவலோகம், சுவலோகம், சனலோகம். தபோலோகம், மகலோகம். சத்தியலோகம் என்னும் ஏழு மேலோகங்களும் அதலம், சுதலம், தராதலம், இரசாதலம், மகாதலம், பாதலம் என்னும் ஏழு கீழ் லோகங்களும். ஆசைகளுக்குக் காரணாதிபதிகளாகிய சந்திர சூரியக் குடும்பங்களும். மகாவிஷ்ணுவின் சக்கராயுதத்தினால் கலியுகத்திற்கு உண்டாக்கப்பட்ட காசு பணங்களும், தீர்த்த நீர்த்தேம்பல்களும். இயல்பான நீர், நலம், நெருப்பு, காற்று, ஆகாயம் ஆகிய ஐம்பூதங்களும். துரும்பு முதல் மிகப்பெரிய மலைகளும், அடர்ந்த மரச்சோலைகளும், அடிமைப்படுத்தப்பட்டவர்களும், அடிமைப்படுத்துகின்ற ஆங்காரக்காரர்களும், அறிவதற்காககவும், . மண்ணுலகில் பிறந்து இருக்கின்ற விண்ணத்தோர்களும். விண்ணகத்தில் இருக்கின்ற சிவன், விஷ்ணு, பிரம்மா ஆகிய மூன்று மூர்த்திகளும், தேவலோகாதிபதியாகிய தெய்வேந்திரனும் வேகமான முனிவர்களும், வேதம் உணர்ந்த சன்னாசிகளும். நான்கு வேதங்களும், ஆறு சாஸ்திரங்களும் அறிவதற்காகவே, உலகத்தை அளந்த வரும், மண்டலங்கள் அனைத்துக்கும் படி அளப்பவருமாகிய மகாவிஷ்ணுவின் திருக்கரங்களால் எழுதப்படும் இந்த திருவாசகச் செய்திகள் யாவையும், சர்வ மண்டலங்களிலும் உள்ள சகலோரும் அறிந்துகொள்ள வேண்டும் என்றே நிகழும் 998 ஆம் ஆண்டில் உயர்வு பொருந்திய சாம்பசிவ மூர்த்தியாகிய சிவபெருமானும், ஸ்ரீராமனாக அவதரித்தவரும், பதியேறும் மூர்த்தியுமாகிய மகாவிஷ்ணுவும் ஆராய்ந்து பார்த்து, அதை சகித்துக் கொள்ள முடியாமல் அச்சமுறுத்தும் அந்த நீசக் கலியினால் ஏற்பட்டுள்ள சொல்லித் தொலையாத வஞ்சகமான கொடுமைகளைப் பற்றியெல்லாம் இந்தத் திருவாசகத்தில் எழுதப்படுகிறது. . பல நூல்களைக் கற்றுத் தேர்ந்த பண்டிதர்களாக இருந்தாலும் இத்திருவாசகத்தை எப்பொழுதும் நம்பிக்கையோடும். பக்திப் பெருக்கோடும் எடுத்துப் பணிவோடு முத்தமிட்டு, கண்களில் ஒற்றிக்கொண்டால் மிகப் பெருமளவில் நன்மைகளை அடைவார்கள் என்பதையும் மனதில் கொள்ளுங்கள். இனி பூலோக கலியுக தேசத்தில் நடக்கும் முறைகளைக் கூறுகிறோம் கேளுங்கள். . . அகிலம் ======== சரசுவதி சொல்ல மகாவிஷ்ணு எழுதிய திருவாசகம். ---------------------------------------------------------------------------------- திருவாசம் - 1 ------------ நல்ல வீரபுரந்தரத் தர்மராசா வங்கிசத்திலே நாடும் ஒரு மதலை பிறந்து வந்தவுடன் நல்ல அருணாசலத்திலே வாலிபப் பிள்ளையாயிருக்கிறார். . விளக்கம் ========= நல்லவைகளில் மட்டும் நாட்டம் உடையவரும், மாயைக்குள் அகப்படாத வலிமையான ஆற்றலை உடையவரும், நெறிபிறழாதவரும், நீதியைத் தமதாக்கிக் கொண்டிருப்பவருமாகிய மகாவிஷ்ணு, அயோக வனத்திலுள்ள அமிழ்த கங்கை அருகில் ஏழு தேவமாதர்கள் மூலமாகப் பெற்றெடுத்த ஏழு பிள்ளைகளின் சந்ததியில் யாவரும் விரும்புகின்ற குண நலன்களுடன் ஒரு குழந்தை பிறந்து வளர்ந்ததும், என்றென்றும் இளமை மாறாதவராகிய பரம்பொருள் இந்தக் கலியுகத்தில் அவதரித்துப் பரிபாலனம் செய்து, தர்மயுகமாக மாற்றுவதற்காக பரலோகத்தில் ஆயத்தமாக இருக்கிறார். . அகிலம் ======== அந்தப் பூலோகக் கலியுகத்திலே ஆசாரமாயிருக்கிற பேர்களும் அழுக்கான புத்திமதியா யிருக்கிற பேர்களும் அவரவர் ஆங்காரமாகியே அழிந்து போவார்கள். . விளக்கம் ========= அந்தப் பரம்பொருளின் வருகையினால் பூலோகக் கலியுகத்தில் சுத்தம், பக்தி போன்ற நல்லொழுக்கங்களைக் கடைப் பிடிநத்து வாழ்ந்து கொண்டு இருந்தாலும், அவர்கள் தம்முடைய பேத புத்தியினால் ஆசாரம் அனுஷ்டானம் போன்ற செயல்களை ஆதாரமாக வைத்துக் கொண்டு நாங்கள் தான் பிறப்பாலும் செயலாலும் உயர்ந்தவர்கள் என்று போலித்தனமாக அகந்தைக்கு ஆளானால் அழிந்து போவார்கள். . அதுபோல், கலி என்பது கபடம் நிறைந்த மாய்கை என்பதை உணராமல், அந்தக் கலியோடு தம்மை ஐக்கியப் படுத்திக்கொண்டு மனதை அழுக்குப் படிய வைத்து அந்தக் கலிக்கு அடிமையாகிப் பணம், பகட்டு, பதவி, சுகபோகம் போன்று நிலையற்ற காரியங்களுக்காகப் பாதகங்கள் புரிய பயப்படாத ஈனர்களும் அவரவரே ஆங்காரமாகித் தன்னந்தன்னால் அழந்து போவார்கள். . . அகிலம் ======== அதின்மேல் பதினெட்டுத் துர்க்கையம்மாள் பிறந்து அந்தக் கலியுகப் பஞ்சமிர்த ராச்சியத்திலே வருகிறார்கள். வந்தவுடனே மூன்றுநாள் இருள்மூடி ஆனைத் துதிக்கைபோல் மழைபெய்யும். அதிலே சில துர்ச்சனர்களெல்லாம் மாண்டு போவார்கள். . விளக்கம் ========= அதன் பிறகு அறிவியல் ஆராய்ச்சியாளர்களின் மூலமாகப் பதினெட்டு வகையான அதி நவீன சாதனங்கள் கண்டுபிடிக்கப்படும். அவற்றை உலகோர் கையாளவதன் பயனாக பஞ்ச பூதங்களில் சிலவற்றின் இயல்பு நிலையில் சீர் செய்ய முடியாத மாற்றங்கள் ஏற்படும். அதனால் இந்தக் கலியுகம் இயற்கையின் சீற்றத்திற்கு இலக்காகும். அதன் காரணமாக இந்த உலகமே மூன்று நாட்கள் இருளாகிப் போய்விடும். அப்போது யானையின் துதிக்கை அளவிலான மழைத்துளிகள் மண்ணில் விழும். அந்த மழையினால் துஷ்டர்களெல்லாம் மாண்டுபோவார்கள். . தொடரும்... அய்யா உண்டு.