#📙 നോവൽ #🧟 പ്രേതകഥകൾ! #✍️ വട്ടെഴുത്തുകൾ #✍ തുടർക്കഥ #💥💤🌟 ബിരിയാണി ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) ……………………………………. സന്ധ്യയുടെ കണ്ണുകൾ ഉമ്മറത്തെ ഗേറ്റിൽ തറഞ്ഞുനിൽക്കുകയായിരുന്നു. ഉച്ചമുതൽ അവൾ ഒന്നും കഴിച്ചിട്ടില്ല. വിശപ്പ് അവളുടെ വയറ്റിൽ ഒരു തേളായി ഇഴയുന്നുണ്ടായിരുന്നു. പക്ഷേ, ആ വേദനയേക്കാൾ അവളുടെ ഉള്ളിൽ പുകഞ്ഞുകൊണ്ടിരുന്നത് ഒരുതരം അസ്വാഭാവികമായ വാശിയായിരുന്നു. കുട്ടിക്കാലം മുതലേ സന്ധ്യയ്ക്ക് ഒരു പ്രത്യേകതയുണ്ട്; ആഗ്രഹിച്ച സാധനം അപ്പോൾ തന്നെ കിട്ടിയില്ലെങ്കിൽ അവളുടെ നിയന്ത്രണം തെറ്റും. ചെറിയ കാര്യങ്ങൾക്ക് പോലും വീട്ടുസാമാനങ്ങൾ അടിച്ചുതകർക്കുന്ന സന്ധ്യയുടെ ഈ സ്വഭാവം ഒരുതരം ഇന്റർമിറ്റന്റ് എക്സ്പ്ലോസീവ് ഡിസോർഡർ (IED) ആണെന്ന് ആരും തിരിച്ചറിഞ്ഞില്ല. കല്യാണം കഴിഞ്ഞിട്ടും ആ സ്വഭാവത്തിന് മാറ്റമുണ്ടായില്ല ……. ഇന്ന് സന്ധ്യ യുടെ ഭർത്താവായ ആദർശിന് ശമ്പളം കിട്ടുന്ന ദിവസമാണ്. മലബാറിലെ ആ സ്പെഷ്യൽ ദം ബിരിയാണി പാഴ്സൽ വാങ്ങി വരാമെന്ന് ആദർശ് രാവിലെ ഇറങ്ങുമ്പോൾ സത്യം ചെയ്തതാണ്. ആ വാഗ്ദാനത്തിലായിരുന്നു സന്ധ്യയുടെ ഏക പ്രതീക്ഷ. ബിരിയാണിയുടെ നെയ്യും, മസാലയും, മൊരിഞ്ഞ ഇറച്ചിക്കഷണങ്ങളും അവൾ മനസ്സിൽ ഭാവന കണ്ടു. ആ ഗന്ധം പോലും തന്റെ ചുറ്റും ഒഴുകി നടക്കുന്നത് പോലെ അവൾക്ക് തോന്നി. നേരം സന്ധ്യ മയങ്ങി. ദൂരെയുള്ള പള്ളിയിൽ നിന്നുള്ള ബാങ്ക് വിളി കേട്ടതോടെ സന്ധ്യയുടെ അക്ഷമ ഇരട്ടിയായി. പെട്ടെന്നാണ് റോഡിൽ ബൈക്കിന്റെ ഇരമ്പൽ കേട്ടത്. അവൾ ഉമ്മറത്തേക്ക് ഓടി. പക്ഷേ, ആദർശ് ബൈക്ക് സ്റ്റാൻഡ് ഇട്ട് ഇറങ്ങിയപ്പോൾ അവന്റെ കയ്യിൽ ഒരു ഹെൽമെറ്റ് അല്ലാതെ വേറെ ഒന്നുമുണ്ടായിരുന്നില്ല. "സന്ധ്യേ... ആ കടയിൽ ഭയങ്കര തിരക്കായിരുന്നു. പിന്നെ ലേറ്റ് ആയപ്പൊ ഭയങ്കര മടുപ്പ് തോന്നി, പിന്നെ ഈ ബിരിയാണി ഒന്നും ആരോഗ്യത്തിന് അത്ര നല്ലത് അല്ല ശരിക്കും ഹാനികരം ആണ്.നമുക്ക് കഞ്ഞി കുടിക്കാം. അതല്ലേ രാത്രി വയറിന് നല്ലത്?" ആദർശ് വളരെ നിസ്സാരമായി പറഞ്ഞു. അവൻ ഷർട്ടിന്റെ ബട്ടൺ അഴിച്ചുകൊണ്ട് അകത്തേക്ക് നടന്നു. സന്ധ്യയുടെ ഉള്ളിൽ ആ നിമിഷം ഒരു അഗ്നിപർവ്വതം ലാവ പുറപ്പെടുവിച്ചുതുടങ്ങി. തന്റെ വിശപ്പിനെയും ആഗ്രഹത്തെയും ആദർശ് എത്ര നിസ്സാരമായാണ് കണ്ടത്! "അവന്റെ ഒരു കഞ്ഞി! അലവലാതി ചെറ്റ" അവൾ പല്ലു കടിച്ചു. ആദർശിന്റെ ആ അശ്രദ്ധ അവളിലെ മൃഗത്തെ ഉണർത്തി. അവൾ അടുക്കളയിലേക്ക് പാഞ്ഞു. അവിടെ സിങ്കിനടുത്ത് വെച്ചിരുന്ന മൂർച്ചയുള്ള വലിയ വെട്ടുകത്തി അവളുടെ കയ്യിൽ തടഞ്ഞു. മാരകമായ ഒരു നിശബ്ദതയോടെ അവൾ ബെഡ്റൂമിലേക്ക് നടന്നു. ഷർട്ട് അഴിച്ചുമാറ്റാൻ തുടങ്ങിയ ആദർശിന്റെ കഴുത്തിന് നേരെ ആ കത്തി മിന്നിമറഞ്ഞു. "സന്ധ്യേ..!" ആദർശ് ഞെട്ടലോടെ ഒന്ന് പിടഞ്ഞു. നിലവിളിക്കാൻ പോലും സമയം കിട്ടിയില്ല. “ബിരിയാണി ഇല്ലാത്തത് ആണ് നിന്റെ ആരോഗ്യത്തിന് ഹാനികരം” പിടയുന്ന ആദർശിനെ നോക്കി സന്ധ്യ അലറി തറയിൽ വീണ അവന്റെ ശരീരത്തിൽ നിന്ന് ചോര ചീറ്റിത്തെറിച്ചു. തറയിലെ ആ ചുവപ്പ് നിറം കണ്ടപ്പോൾ അവൾക്ക് ബിരിയാണിയിലെ ആ മസാലക്കൂട്ടിന്റെ നിറമാണ് ഓർമ്മ വന്നത്. പക്ഷേ അവളുടെ വയറ്റിലെ വിശപ്പിന്റെ തേൾ വീണ്ടും കടിച്ചു. ആദർശ് മരിച്ചതിനേക്കാൾ വലിയ സങ്കടം അവൾക്ക് ബിരിയാണി കിട്ടാത്തതായിരുന്നു. …… “എന്തായാലും ഇന്ന് ബിരിയാണി തിന്നിട്ടെ ഉള്ളു” സന്ധ്യ പിറുപിറുത്തു അവൾ തീരുമാനിച്ചുറച്ച പോലെ വെട്ടുകത്തിയുമായി വീടിന് പുറത്തേക്ക് ഓടി. ഇരുട്ടിലൂടെ കുറച്ചു ദൂരം ഓടിയപ്പോൾ ഒരു വീടിന്റെ ഉമ്മറത്ത് നിന്ന് ആ മണം അവളെ തേടിയെത്തി. ബിരിയാണി! ആ മണം അവളെ ഭ്രാന്തുപിടിപ്പിച്ചു. ആ വീട്ടിൽ എന്തോ സൽക്കാരം നടക്കുകയായിരുന്നു. ബിജുവും സിജിയും റെക്സിയും ചേർന്ന് ഡൈനിങ്ങ് ടേബിളിൽ വലിയൊരു ചെമ്പ് വെച്ച് ബിരിയാണി വിളമ്പുന്നു. ചോര പുരണ്ട കത്തിയുമായി ഒരു സ്ത്രീ അകത്തേക്ക് പാഞ്ഞു വരുന്നത് കണ്ട് അവർ ഞെട്ടി. "മാറിക്കോ ബിരിയാണിയുടെ അടുത്തുനിന്ന്!" സന്ധ്യയുടെ അലർച്ച ആ വീടിനെ നടുക്കി. “ എന്താ എന്താ പ്രശ്നം “ തടയാൻ വന്ന ബിജുവിന്റെ നെഞ്ചിലേക്ക് അവൾ ആഞ്ഞു വെട്ടി. സിജിയും റെക്സിയും ഭയന്നുവിറച്ച് പിന്മാറാൻ നോക്കിയെങ്കിലും സമയം കിട്ടിയില്ല.സന്ധ്യയുടെ വേഗതയും വിശപ്പിന്റെ ശക്തിയും അവർക്ക് താങ്ങാവുന്നതിനും അപ്പുറമായിരുന്നു അവൾ അവരെ ചറ പറാന്നു വെട്ടിക്കൂട്ടി. അവളുടെ കണ്ണുകളിൽ വിശപ്പും പകയും മാത്രമേ ഉണ്ടായിരുന്നുള്ളു. നിലവിളി കേട്ട് അടുത്ത മുറിയിൽ നിന്ന് ഓടിവന്ന സാമുവലിനെയും സെബാസ്റ്റ്യനെയും അവൾ നിമിഷനേരം കൊണ്ട് നിലത്തു വെട്ടിയിട്ടു. മുറിയിലെ ആഡംബര വെളിച്ചത്തിൽ തറയിൽ ചോര കായൽ പോലെ പടർന്നു. ……… അന്തരീക്ഷം ഭീകരമായിരുന്നു. നിന്ന് മരിച്ചവരുടെ ശരീരത്തിൽ നിന്നുള്ള ചോരയുടെ ലോഹഗന്ധം ഉയരുന്നു. പക്ഷേ, സന്ധ്യയ്ക്ക് അറിയാൻ കഴിഞ്ഞത് ആവി പറക്കുന്ന ബിരിയാണിയുടെ മണം മാത്രമാണ്. അവൾ ആ കൈകൾ തുടച്ചതുപോലുമില്ല. ആ ബിരിയാണി ചെമ്പ് അവൾ തറയിലേക്ക് വലിച്ചിട്ടു. മരിച്ചുകിടക്കുന്നവരുടെ മൃതദേഹങ്ങൾക്ക് നടുവിൽ ഇരുന്ന് അവൾ ആർത്തിയോടെ ബിരിയാണി വാരി തിന്നാൻ തുടങ്ങി അവിടെ ഉണ്ടായിരുന്ന സലാഡും അച്ചാറും ഉപയോഗിക്കാതെ അവളുടെ വിരലുകളിൽ പറ്റിപ്പിടിച്ച ചോരയും ബിരിയാണിയുടെ മസാലയും തമ്മിൽ കലർന്നു. ചിക്കൻ കാലുകൾ കടിച്ചു വലിച്ചു പൊട്ടിക്കുമ്പോൾ അവളുടെ മുഖത്ത് കണ്ട തൃപ്തി ഒരു മനുഷ്യന്റേതു പോലെ ആയിരുന്നില്ല …….. നിമിഷങ്ങൾക്കുള്ളിൽ വീടിനു ചുറ്റും നീലയും ചുവപ്പും വെളിച്ചങ്ങൾ മിന്നി. ഇൻസ്പെക്ടർ നിസാറും സംഘവും തോക്കുമായി അകത്തേക്ക് തള്ളിക്കയറി. അവിടെ കണ്ട കാഴ്ച കണ്ട് തല മരവിച്ച ഇൻസ്പെക്ടറുടെ കയ്യിലെ തോക്ക് താഴെ വീഴാൻ പോയി. മൃതദേഹങ്ങൾക്ക് ഇടയിൽ ഇരുന്ന് സന്തോഷത്തോടെ ബിരിയാണി കഴിക്കുന്ന സന്ധ്യ! "സന്ധ്യേ... എന്തിനാ നീ ഈ ക്രൂരത ചെയ്തത്?ഭർത്താവിനെ എന്തിനാ കൊന്നത് ഈ പാവങ്ങൾ നിന്നോട് എന്ത് തെറ്റാണ് ചെയ്തത്?" ഇൻസ്പെക്ടർ നിസാർ ചോദിച്ചു. സന്ധ്യ മെല്ലെ തലയുയർത്തി. അവളുടെ ചുണ്ടിലും കവിളിലും മസാലയും ചോരയും പറ്റിയിട്ടുണ്ട്. അവൾ ബിരിയാണി ചെമ്പിലേക്ക് വിരൽ ചൂണ്ടി ശാന്തമായി പറഞ്ഞു "എല്ലാം ഇതിനു വേണ്ടിയായിരുന്നു സാർ... എനിക്കൊരു ബിരിയാണി കഴിക്കണമായിരുന്നു ഞാൻ ഇതൊന്ന് തീർക്കട്ടെ. " സന്ധ്യ മുരണ്ടു ഇൻസ്പെക്ടർ നിസാർ അവളുടെ കണ്ണുകളിലെ ആ ശൂന്യത കണ്ടു. അയാൾ ദീർഘശ്വാസം വിട്ടു. ഇപ്പോൾ സന്ധ്യ യെ എഴുന്നേൽപ്പിച്ചാൽ അടുത്ത വെട്ട് തന്റെ കഴുത്തിൽ വീഴുമെന്ന് അയ്യാൾ പേടിച്ചു " ആയിക്കോട്ടെ.. പതുക്കെ കഴിച്ചാൽ മതി… ഡോണ്ട് വറി ജയിലിൽ ബിരിയാണിക്ക് ജീവിതകാലം ക്ഷാമം ഉണ്ടാവില്ല. ." പോലീസ് വണ്ടിയിൽ കയറുമ്പോഴും സന്ധ്യ ശാന്തയായിരുന്നു. വണ്ടി നീങ്ങുമ്പോൾ അവൾ നാവുകൊണ്ട് ചുണ്ടിലെ മസാലയുടെ രുചി നുണഞ്ഞുകൊണ്ടിരുന്നു. ആ രുചി അവളുടെ നാവിലും മനസ്സിലും ഒരു ലഹരിയായി അപ്പോഴും പടരുന്നുണ്ടായിരുന്നു. ……. പിറ്റേ ദിവസം ബിരിയാണിക്ക് വേണ്ടി ഭർത്താവിനെയും 5 പേരെയും കൊലപെടുത്തിയ യുവതി യെ കുറിച്ചുള്ള വാർത്ത വൈറൽ ആയിമാറി ……. End