ലോകത്തിലെ ഏറ്റവും വലിയ ജനാധിപത്യ രാജ്യത്തിന്റെ പരമാധികാര സഭയായ ഇന്ത്യൻ പാർലമെന്റിൽ പറയുന്ന ഓരോ വാക്കിനും ചരിത്രത്തിന്റെ മുമ്പിൽ ഉത്തരവാദിത്തമുണ്ട്. എന്നാൽ രാജ്യരക്ഷയുടെ പേരിൽ പാർലമെന്റിൽ പറഞ്ഞ വാക്കുകളും പിന്നീട് പുറത്തുവന്ന വിവരങ്ങളും തമ്മിലുള്ള വൈരുദ്ധ്യം അതീവ ഗൗരവമുള്ള ചോദ്യങ്ങളാണ് ഉയർത്തുന്നത്. 2025 ജൂലൈ 28-ന് രാജ്യരക്ഷാമന്ത്രി രാജ്‌നാഥ് സിംഗ് പാർലമെന്റിൽ "ഓപ്പറേഷൻ സിന്ധൂരിൽ" ഒരു ജവാനെപ്പോലും നഷ്ടപ്പെട്ടിട്ടില്ലെന്ന് പ്രഖ്യാപിച്ചു. എന്നാൽ പിന്നീട് പുറത്തുവന്ന വിവരങ്ങൾ പ്രകാരം ആ ദൗത്യത്തിൽ ആറു വീരജവാന്മാർ ജീവൻ ബലിയർപ്പിച്ചെന്നാണ് വ്യക്തമാകുന്നത്. അങ്ങനെയെങ്കിൽ രാജ്യം അറിയേണ്ട ചില ചോദ്യങ്ങളുണ്ട്. ആറ് സൈനികർ ജീവൻ നൽകിയിട്ടും പാർലമെന്റിനെ അറിയിക്കാതിരുന്നതെന്തിന്? അവരുടെ കുടുംബങ്ങൾക്ക് അർഹിക്കുന്ന ആദരവും അംഗീകാരവും നൽകാൻ ഇത്രയും വൈകിയത് എന്തുകൊണ്ട്? രാജ്യത്തിന് വേണ്ടി മരിച്ച ജവാന്മാരുടെ ത്യാഗം മറച്ചുവെക്കേണ്ട സാഹചര്യം എന്തായിരുന്നു? പാർലമെന്റിൽ പറഞ്ഞത് സത്യമാണെങ്കിൽ പിന്നീട് പുറത്തുവന്ന വിവരങ്ങൾ തെറ്റാണോ? പിന്നീട് പുറത്തുവന്ന വിവരങ്ങളാണ് സത്യമെങ്കിൽ പാർലമെന്റിൽ പറഞ്ഞത് എന്തായിരുന്നു? ഇത് ഒരു സാധാരണ രാഷ്ട്രീയ വിവാദമല്ല. ജനാധിപത്യത്തിന്റെ ഹൃദയഭാഗമായ പാർലമെന്റിനോടുള്ള ഉത്തരവാദിത്തത്തിന്റെ പ്രശ്നമാണ്. രാജ്യസുരക്ഷയുടെ പേരിൽ സത്യം മറച്ചുവെക്കുന്നത് ദേശസ്നേഹമല്ല; അത് ജനങ്ങളോടും പാർലമെന്റിനോടും കാണിക്കുന്ന അനാദരവാണ്. സ്വന്തം ജീവൻ രാജ്യത്തിന് സമർപ്പിച്ച സൈനികരുടെ ബലിദാനത്തെ പോലും രാഷ്ട്രീയ സൗകര്യത്തിനായി മറച്ചുവെച്ചിട്ടുണ്ടെങ്കിൽ അത് രാജ്യത്തോടുള്ള ഏറ്റവും വലിയ വഞ്ചനകളിലൊന്നായി ചരിത്രം രേഖപ്പെടുത്തും. ജനങ്ങളെ തെറ്റിദ്ധരിപ്പിച്ചിട്ടില്ലെന്ന് തെളിയിക്കേണ്ട ബാധ്യത സർക്കാരിനും രാജ്യരക്ഷാമന്ത്രിക്കുമാണ്. അല്ലാത്തപക്ഷം പാർലമെന്റിനോടും രാജ്യത്തോടും മാപ്പുപറഞ്ഞ് ഉത്തരവാദിത്തം ഏറ്റെടുക്കേണ്ട സമയമാണിത്. . . . . . #🗳️ രാഷ്ട്രീയം #🔴 എൽഡിഎഫ് #💪🏻 സിപിഐഎം #🟥 സിപിഐ #🔶 BJP