मा. पंतप्रधान नरेंद्र मोदी जी यांच्या अध्यक्षतेखाली विविध राज्यांच्या मुख्यमंत्र्यांसोबत झालेल्या बैठकीत सहभागी झालो. या बैठकीस मा केंद्रीय गृहमंत्री अमितभाई शाह, मा केंद्रीय रक्षा मंत्री राजनाथ सिंहजी, केंद्रीय मंत्रिमंडळ सचिव तसेच केंद्रशासित प्रदेशांचे नायब राज्यपाल उपस्थित होते. देशातील 15 राज्यांच्या मुख्यमंत्र्यांनी आपल्या राज्यातील तयारी व उपाययोजनांची माहिती दिली. जागतिक युद्धजन्य परिस्थितीच्या पार्श्वभूमीवर देशाची तयारी, केंद्र-राज्य समन्वय मजबूत ठेवणे आणि सामान्य नागरिकांवर कोणताही अतिरिक्त भार पडू न देणे, यावर बैठकीत महत्त्वपूर्ण दिशा ठरवण्यात आली. या बैठकीत सहभागी होत महाराष्ट्राच्यावतीने आमची भूमिका मांडली.
‘टीम इंडिया’च्या भावनेतून सातत्यपूर्ण समन्वय, माहितीची देवाणघेवाण आणि एकत्रित प्रतिसाद आवश्यक असल्याचे मा पंतप्रधान मोदीजी यांनी अधोरेखित केले.
या कठीण काळात मा. पंतप्रधान नरेंद्र मोदीजी यांनी दिलेल्या सक्षम नेतृत्वाबद्दल मी त्यांचे मनःपूर्वक आभार मानतो. अनेक देशांमध्ये निर्बंध, आपत्कालीन स्थिती आणि आर्थिक ताण वाढत असताना भारतात सामान्य परिस्थिती राखण्यात यश आले आहे.
इंधनावरील उत्पादन शुल्कात केलेली कपात ही सामान्य नागरिकांसाठी मोठा दिलासा ठरली आहे. इतर देशांमध्ये 20-30% दरवाढ होत असताना केंद्र सरकारने हा भार स्वतः उचलत नागरिकांवर बोजा वाढू दिला नाही, याबद्दल मा. पंतप्रधान मोदीजी यांचे विशेष आभार मानतो. ‘राष्ट्र प्रथम, भारतीय प्रथम’ या तत्त्वाचा यामध्ये प्रत्यय येतो.
गेल्या 11 वर्षांत ऊर्जा स्त्रोतांचे विकेंद्रीकरण, 27 ऐवजी 41 देशांतून आयात, सौर ऊर्जा आणि ई-बसेस यांसारख्या उपक्रमांमुळे देश अधिक सक्षम झाला आहे. एलपीजी पुरवठा सुरळीत असून आत्मनिर्भर भारत अभियानाचे सकारात्मक परिणाम दिसून येत आहेत.
राज्यात खतांची पुरेशी उपलब्धता असून खरीप हंगामात शेतकऱ्यांना कोणतीही अडचण येणार नाही यासाठी आम्ही सातत्याने आढावा घेत आहोत. साठेबाजी व काळाबाजार करणाऱ्यांवर कठोर कारवाई सुरू असून अॅग्रीस्टॅकद्वारे पारदर्शकता वाढवत आहोत.
पीएनजी विस्तारासाठी गती देत असून ‘Ease of Doing Business’च्या माध्यमातून प्रक्रिया वेळेत पूर्ण करण्यावर भर देत आहोत. केंद्र सरकारकडून येणाऱ्या सर्व सूचनांचे काटेकोर पालन करत राज्याच्या हितासाठी समन्वित व जबाबदार कृती करण्यास आम्ही कटिबद्ध आहोत.
#महाराष्ट्र #देवेंद्र फडणवीस
