గ్యాస్ పొయ్యి చాలా పాతది కావడం.. అది సరిగా పనిచేస్తోందో లేదో పట్టించుకోకపోవడం..‌ పైపైన శుభ్రం చేసుకుంటూ అదే శుభ్రత అదే మెయింటెనెన్స్ అనుకుంటూ సమస్యలున్నప్పటికీ రిపేర్లు చేయించుకునేంత ఓపిక సమయం అవగాహన లేకపోవడంలాంటివి ఇలా ఫైర్ ప్రమాదాలకు కారణాలవుతుంటాయి. ఇవాళ ఉదయం ఒకరింట్లో జరిగిన ప్రమాదం తాలూకు సాక్ష్యాలివి. గ్యాస్ స్టవ్ ఆన్ చేసి వెలిగించే సమయంలో బర్నర్లకు గ్యాస్ సప్లై సరిగా జరగక ఎక్కడో బ్లాకైపోయి తద్వారా రెగ్యులేటర్ నుండి ప్రవహించే గ్యాస్ కు దారి మూసుకుపోవడంతో రెగ్యులేటర్ వద్దనే బయటకు ఎగదన్ని నిప్పు అంటుకుంది. గ్యాస్ ప్రవాహశక్తి ముందు ఆ రెగ్యులేటర్ కూడా తాళలేక పైకి కదిలిపోవడంతో ఈ ప్రమాదం జరిగింది. అదృష్టవశాత్తూ ఎవరికీ ఎటువంటి హానీ కలగలేదు. ఎటువంటి నష్టమూ వాటిల్లలేదు.అంతగా నడవలేని స్థితిలో ఉండే వయోవృద్ధురాలు కావడంతో ఆ మంటలు చెలరేగిన వెంటనే భయంతో మంటలనుండి అలానే నడవలేక నడవలేక ఎలానో తప్పించుకుని కేకలు వేస్తూ బయటకు వచ్చేసింది. పక్కింటివాళ్ళు వెంటనే అప్రమత్తమై బయటనుండే నీటితో మంటలను ఆర్పే ప్రయత్నం చేసారు. కానీ ఆ ప్రయత్నాలేవీ ఫలించలేదు. రెగ్యులేటర్ కింద సిలిండర్ని పట్టి ఉంచే ప్లాస్టిక్ రింగ్ కాలిపోవడంతో రెగ్యులేటర్ పట్టు వదిలేసి ఆటోమేటిగ్గా గ్యాస్ సరఫరా నిలిచిపోయి మంట ఆరిపోయింది. ఆ తర్వాతే నాకు విషయం తెలియడంతో వెంటనే పరుగెత్తి పోయి తడిపిన గోనె సంచీ తీసుకుని కిచెన్ లోకి వెళ్ళి సిలిండర్ మీద కప్పి రెగ్యులేటర్ ని విడదీసి సిలిండర్ని బయటకు తెచ్చేసాను. గ్యాస్ ఏజెన్సీ వాళ్ళకి కాల్ చేసి ప్రమాద విషయం తెలియజేసాను. వాళ్ళు మనిషిని పంపి రెగ్యులేటర్, పైప్ , సిలిండర్ మార్చాడు. ఈ పాత పొయ్యిని వెంటనే మార్చేసుకొమ్మని గట్టిగా చెప్పి వెళ్ళిపోయాడు. పైపూ రెగ్యులేటర్ కి రుసుము వసూలు చేసారు. సిలిండర్ వల్ల ప్రమాదం జరిగి ఉంటే ఎటువంటి రుసుమూ వసూలు చేసేవారు కాదు. గ్యాస్ పొయ్యి వల్ల వచ్చిన సమస్య కావడంతో తప్పలేదు. సిలిండర్ కి మాత్రం ఎటువంటి చార్జీ తీసుకోలేదు. సిలిండర్ మీద మాకు అనుమానంగా ఉంది అనడంవల్లే మార్చారు కానీ సిలిండర్ బానే ఉంది. దాంట్లో ఏ ప్రాబ్లం లేదు. అలవాట్లో పొరపాటులా ఏమరుపాటుగా ఉండకండి. చిన్న పామునైనా పెద్ద కర్రతో కొట్టాలన్నట్టు గ్యాస్ పొయ్యిల సమస్యలను మొదట్లోనే గుర్తించి తగిన మెయిన్టెనెన్స్ చేసుకుంటూ ఉండండి. ఒక చిన్న పొరపాటువల్ల జీవితాలనే కోల్పోవచ్చు.. అన్నిసార్లూ సమయం మనకు అనుకూలంగానే ఉంటుందనుకోవద్దు. జాగ్రత్త. #తెలుసుకుందాం #తస్మాత్ జాగ్రత్త😳 #తస్మాత్ జాగ్రత్త #తస్మాత్ జాగ్రత్త