🍃🍃🌼🍃🍃 નીડર સિદ્ધાંતવાદી સદ્. ઇશ્વરચરણદાસજી સ્વામીનું જીવન ભાગ :- 68 આ બધી હકીકત સદ્ગુરુઓ તથા બાપાશ્રી તથા મોટા મોટા હરિભક્તોએ સાંભળી તેથી સૌને એમ થયું કે આપણે શ્રીજીમહારાજે જે જે રીત બાંધી છે તે પ્રમાણે ચાલવું. એ વખતે આશરે દસ-બાર હજાર સત્સંગીઓ હાજર હતા. તે વખતે મોટા મોટા સંતો તથા હરિભક્તોની એક સભા આ અંગે ચર્ચા-વિચારણા કરવા મળી. તેમાં એમ નક્કી થયું કે આચાર્ય મહારાજશ્રીને દેવ તથા આચાર્યશ્રીની મિલ્કત જુદી પાડી આપવા તથા વહીવટની સ્કીમ કરી આપવા વિનંતી કરવી. આ દરમ્યાન, મુક્તરાજ બાપાશ્રી ૧૨ દિવસ મૂળીમાં રહ્યા ને અનેકને શ્રીજીમહારાજના મહિમાની વાતો કરી આનંદમાં ગરકાવ કરી દીધા હતા. પછી એક દિવસ સદ્દગુરુ ધનશ્યામજીવનદાસજી સ્વામીએ બાપાશ્રીને પ્રાર્થના કરી આ બાબત પૂછયું ત્યારે બાપાશ્રી કહે : “સ્વામી ! આપણે તો સૌનું સારું થાય એમ કરવાનો ઠરાવ છે, પણ શ્રીજીમહારાજની બાંધેલી પ્રણાલિકા તૂટતી હોય તો તૂટવા ન દેવી, એટલું તો રાખવું. કેમકે આપણા મંદિરોમાં શ્રીજીમહારાજની મૂર્તિઓ છે તે પ્રત્યક્ષ ભગવાન છે તે એ સૌના સામું જોઈ રહ્યા છે. કેટલાયના મનોરથો પૂરા કરે છે, દર્શન આપે છે, એથી એમનું જે કાંઈ હોય તે પોતાના ઈષ્ટદેવનું માની બગડવા દેવું નહિ. એ સેવા તમ જેવા ધર્મવાળા ને આજ્ઞા પાળનારા સંતો નહિ કરે, તો પછી બીજા કોણ કરશે?" સદ્ગુરુશ્રી કહેતા કે : “બાપાશ્રીએ મને કહ્યું છે કે ‘સૌ મહારાજનાં વચન સામૌ સુરતા રાખજો. આપણે સત્સંગમાં મૂર્તિ સિદ્ધ કરવા આવ્યા છીએ તે કામ રહી જાય ને બીજે માર્ગે ચલાય તો મોટી ખોટ આવે. શ્રીજીમહારાજની મૂર્તિ મંદિરોમાં અનેક સ્વરૂપે બિરાજે છે તે અને જે અક્ષર-ધામમાં તેજોમય મૂર્તિ રહી છે એ બેમાં રોમનો ફેર નથી, માટે સદાય પ્રત્યક્ષભાવ રાખી તેમના રાજીપાની તાણ રાખવી.’ શ્રીજીમહારાજે ગઢપુરનું મંદિર થતું હતું તે વખતે પોતે સોનેરી પાઘ ઉપર પત્થર ઉપાડી સેવાનો તથા મંદિરનો મહિમા જણાવ્યો છે. વડતાલનું મંદિર થતું હતું તે વખતે પણ એક પટેલીએ કહ્યું હતું કે 'મહારાજ! તમે આવી મહેનત કરો છો તે ઠીક નથી લાગતું. કહો તો હું દહાડિયા નથા ગાડાં મોકલાવું, પણ તમે દાખડો ન કરો.” ત્યારે શ્રીજીમહારાજે તેમને એમ કહ્યું કે ‘અમે જમીનમાંથી સોનાનાં મંદિર તૈયાર કાઢીએ એવા છીએ, પણ આ તો સૌને સેવાનો લાભ મળે તે માટે કરીએ છીએ.’ એવી જ રીતે મૂળીનું મંદિર થતું હતું, ત્યારે પત્થરની ખાણે પાણીની તાણ પડતાં મહારાજે સ.ગુ.શ્રી બ્રહ્માનંદ સ્વામીને દર્શન આપી પાણીની જગ્યા બતાવી. આમ જેટલાં મંદિર થયાં છે તેમાં મહારાજની પ્રસન્નતા બહુ હતી, કેમકે એવા સ્થાનોમાં સૌના કલ્યાણ કરવાનો સંકલ્પ હતો. સદ્દગુરુ ગુણાતીતાનંદ સ્વામી કહેતા કે ‘જેને વગર દાખડે પોતાનું કલ્યાણ જોઈતું હોય ને ઝાઝું કાંઈ જાણતો ન હોય તેણે એક એક બાઈ-ભાઈનું મંદિર બંધાવી દેવું, એટલે એનું સહેજે કલ્યાણ થાય.' આવો મોટાનો અભિપ્રાય જાણી આવા કલ્યાણકારી મંદિરોનો મમત્વ રાખવો ને બનતી સેવા કરવી, પણ પરસ્પર એક બીજાના દ્રોહ થાય નહિ તે જાળવવું. આ સત્સંગરૂપ શ્રીજીમહારાજની ફૂલવાડી છે તેનું રક્ષણ કરવું.” પછી મુક્તરાજ બાપાશ્રી મૂળીથી વૃષપુર પાછા પધાર્યા. સદ્ગુરુશ્રી બાપાશ્રીને મૂકવા વૃષપુર સુધી ગયા. આ વખતે સદ્ગુરુશ્રીને ફક્ત બે જ દિવસ રાખી રજા આપીને બાપાશ્રીએ કહ્યું: “આ ફેરે તમે વહેલા દેશમાં જાઓ ને મહારાજને સંભારીને વિક્ષેપનો સુખદ અંત આવે તેવો ઉપાય કરજો.” આ પ્રમાણે બાપાશ્રીના આશીર્વચનો અનુસાર સમા-ધાનના પ્રયાસો ચાલુ રહ્યા અને તેના પરિણામે છેવટે પરમ કૃપાળુ શ્રી સ્વામિનારાયણ ભગવાનની અસીમ કૃપા, , બાપા-શ્રીના આશીર્વાદ ને દિવ્ય પ્રભાવ તથા સદ્ગુરુશ્રી ને મોટેરા સંત-હરિભક્તોના અથાક સતત પ્રયત્નો દ્વારા વિક્ષેપનો સુખદ ઉકેલ આવી ગયો અને શ્રીજીમહારાજે બાંધેલ સર્વ-માન્ય વહીવટી પ્રણાલિકા પ્રસ્થાપિત થઈ. આમ થતાં સત્સંગના સર્વ અંગોને લાભ થયો. 🍃🍃🌼🍃🍃 #🦋😊 𝗝𝗮𝘆 𝘀𝘄𝗮𝗺𝗶𝗻𝗮𝗿𝗮𝘆𝗮𝗻 🤗 ##જય સ્વામિનારાયણ #✋ જય સ્વામીનારાયણ #અનાદિમુક્તરાજ શ્રી અબજીબાપા #🙏 સ્વામિનારાયણ મંદિર