#💚Ayya 💗 Vaikundar💚 #Ayya Vaikundar #அய்யா வைகுண்டர் {1008} #அய்யா வைகுண்டர் #🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 13.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== வானோர் மகிழ்ச்சி ========================= நன்றெனவே வானோர் நற்பூரணனைக் கொண்டாடிப் பேறுபெற்ற சென்மம் பிராணனிது நன்றெனவே பூருவத்தி லுள்ள பூசாந்திர மிவ்வளமை என்னதவஞ் செய்தாரோ இத்தேவன் தாய்தகப்பன் பொன்னப்ப நாரணர்க்கு பிள்ளையென வந்துதிக்க நாரண ரைப்பெறவே நல்ல தசரதரும் பூரணமாய் நின்றதவம் புகன்றிடவே கூடாது பன்னீரா யிரம்வருசம் பாரத் தவசுபண்ணி முன்னூறு வாரமதாய் உலகளந்தோர் ராமருரு கண்ணாளர் தந்தமக்கு கற்பகம்போ லித்தேவன் மதலையாகப் பிளந்து வையகத்தை ஆள்வானென்று கதலிவாய் நாதன் கற்பித்தா ரிப்படியே ஆருபெற்ற பேறும் அல்லப்பே றிப்பலன்தான் பேறுபெற்ற வரிவர்தான் பிறந்த இனமதிலே நாம்பிறந்தா லும்பெரிய நலங்கிட்டு மென்றுசொல்லித் தாம் பிறப்போமென்று சான்றோராய்த் தான்பிறந்தார் . விளக்கம் ======== மகாவிஷ்ணு தம்முடைய காரண சரீரமாகிய அவதாரத் திருமேனிக்கு, அதாவது, உபாயமாய உடலுக்குக் கொடுத்த வாக்குறுதிகளையும். அதற்கு முன்பு சம்பூரணத்தேவனோடு உரையாடியதையும் உற்றுக் கவனித்துக் கொண்டு இருந்த வானவர்களெல்லாம், சம்பூரணத்தேவனின் உயிர் மிகவும் பேறு பெற்ற உயிர். இதற்கெல்லாம் அவன் செய்த புண்ணியமே காரணமாகும். . இந்த சம்பூரணன், மகாவிஷ்ணுவின் அவதாரத் திருமேனியோடு பூலோகத்தில் பிள்ளையாகப் பிறப்பதற்கு, தேவனின் தாயும், தகப்பனும் என்ன தவம் செய்தனரோ தெரியவில்லை. . மகாவிஷ்ணுவை மகனாகப் பெறுவதற்கு, தசரதர் செய்த தவத்தைப் பற்றி முழுமையாகச் சொல்வதென்றால் அது முடியாத காரியமாகும். அத்தகைய கடுமையான தவத்தில் பன்னீராயிரம் வருடம் இருந்த தசரதருக்கே, உலகளந்தானாகிய மகாவிஷ்ணு, தம் முன்னூறில் ஒரு பாகமாகிய வராக அவதாரத்தில் எண்ணாயிரத்தில் ஒரு பாகமாக இராம அவதாரம் எடுத்துப் பிறந்தார். அதாவது, மும்மூர்த்திகளில் ஒருவரான மகாவிஷ்ணுவின் இருபத்து நான்கு லட்சத்தில் ஒரு பாகமாகவே இராம அவதாரம் எடுத்தார். . ஆனால் இந்தச் சம்பூரணத் தேவன் நமக்கெல்லாம் சிநேகிதன் மட்டுமல்ல நமக்கெல்லாம் கிடைத்த கற்பக விருட்சம் போன்றவன். ஆகவேதான் பூலோகத்தில் மானிடர்க்கு மதலையாகப் பிறந்து, வையகத்தை ஆள்வானென்று, கதலிவாய் நாதனாகிய மகாவிஷ்ணு, இப்படி நியமித்துள்ளார். இத்தகைய பேறும் பலனும் நம்மவரில் வேறு எவருக்குமே கிடைத்ததில்லை. எனவே, இத்தகு பேற்றினைப் பெற்ற சம்பூரணத் தேவன் பிறக்கும் மனித குலத்தில் நாம் பிறந்தாலும் பெரிய நன்மைகள் கிடைக்கும் என்று ஒருவருக்கொருவர் உரையாடிய வானவர்கள் எல்லாரும் பூலோகத்தில் சிறந்த மனிதர்களாகப் பிறந்தனர். . . அகிலம் ======= சம்பூரணத் தேவனைப் பூலோகத்தில் பிறவி செய்தல். ================================================= அவர்கள் பிறக்க ஆனதெய்வப் பூரணனை திவசமது பார்த்துச் செய்தார் பிறவியது செய்யச் சிவமும் சிவவேதனும் மகிழ்ந்து வைய மளந்த மாலும்பிறவி செய்தார் கர்மக்கடன் கழிக்க கலியுகத்திலே பிறக்கத் தர்மச்சம் பூரணனைத் தரணிப் பிறவிசெய்தார் செய்த சடமதையும் சுமக்கச் சடம்பார்த்து மெய்யிசையும் நாதன் மேதினியில் செய்தனராம் சடம்பிறக்க லோகம் தட்டுமிக மாறி உடன்பிறக்கச் செய்தார் உலகளந்தோர் கற்பினையால் அன்று பிறவிசெய்தார் அவனிசோ தனைக்கெனவே . விளக்கம் ======== வானோர்களெல்லாம் பூலோகத்தில் பிறந்தவுடன் நல்ல கால நேரம் பார்த்து, சிறந்த சுபவேளையில், சிவபெருமானும், பிரம்மதேவனும், மகாவிஷ்ணுவும் மகிழ்ச்சியோடு சம்பூரணத் தேவனைப் பிறவி செய்தனர். கர்மக் கடனைச் செய்து முடிப்பதற்காக, அதாவது, அன்றொருகால் சிவபெருமானிடம் கலியன் வரங்களைப் பெற்று வரும்வழியில் மகாவிஷ்ணு, கலியனிடம் வாங்கிய ஆண்டிகளுக்கு அட்டி செய்யமாட்டேன் என்ற சத்தியத்தைச் சோதித்து முடிப்பதற்காகவும், பின்பு கலிநீசனிடம் நான் இப்போது உன்னுடைய அனந்தபுரத்தை விட்டுப்போகிறேன், ஆனால் உன்னை வதைப்பதற்காகத் திருச்செந்தூரிலிருந்து ஒரு கோலமெடுத்து வருவேன் என்று, அன்று மேற்கொண்டதான காரிய கர்மக் கடன்களை முடிப்பதற்காகத் தாம் அவதாரம் எடுக்கும் நோக்கில், தம் அவதாரக் கூட்டில் சம்பூரணத்தேவனின் உயிரைப் பிணைத்துப் பூலோகத்தில் பிறவி செய்தார். . அந்த உயிரில், தமது காரணச் சரீரமாகிய உபாய மாய உடலைப் பிறவி செய்வதால், சிறப்பு மிகுந்த அந்த சரீரத்தைக் கருவறையில் தாங்கி சுமக்கும் பேறுபெற்ற மாதுவைத் தேர்ந்தெடுத்து, உண்மைக்கு உகந்த நாதனாகிய மகாவிஷ்ணு பூலோகத்தில் விறவி செய்தார். . தமது காரண சரீரப் பிறப்பு மூலமே இந்த உலகத்தை ஆக்கிரமித்துக் கொண்டிருக்கின்ற கேடான கலி என்னும் கொடுமை தட்டுத் தடுமாறி அகலும் என்ற நினைவுகளை அகமே கொண்ட மகாவிஷ்ணு, உலகத்தை பரிசோதிப்பதற்காக அன்று இவ்வாறு பிறவி செய்தார். . . தொடரும்... அய்யா உண்டு.

#🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 12.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======= நடந்து மறையோர் நல்ல மலைபார்த்துச் சடம் வீற்றிருந்த தங்கமலை மீதில்வந்தார் மலைமீதில் வந்து மலைப்புதுமை தான் பார்த்து அலைமீதில் வாழ்துவரா ஆனபதி தன்னுடைய வடவாசல் நேரே வாழு மலையிதுதான் தடவரை யிம்மலையில் தானிருக்கும் நதிகள் தங்கக்கிணர் வங்கக்கிணர் தாம்பிரக் கிணறுடனே சங்கமகி ழிம்மலையின் தடாகமிது நன்றெனவே கரைகாணாத் தேவர் காட்சியிடு மிம்மலைதான் விரைவான மாமுனிவர் வீற்றிருக்கு மிம்மலைதான் மரித்தோரைத் தானெழுப்பும் வாய்த்தசஞ்சீ விவளரும் பதித்தான மிம்மலையின் பகுத்துரைக்கக் கூடாது என்றுசொல்லித் தேவர் ஏற்றமலைக் குள்ளேகி நன்றுநன் றென்று நாடியவர் பார்க்குகையில் கண்டாரே காயாம்பூ கண்ணர்முக் கூடதையும் கொண்டாடிக் கூடதையும் குளிர்ந்தரத மீதேற்றி நடந்தார் கயிலை நாதர்திருக் கூட்டமதில் . விளக்கம் ======== மகாவிஷ்ணுவின் கட்டளையை ஏற்று விரைந்து சென்ற மறையோர், கிருஷ்ண சரீரம் தனித்து இருந்துகொண்டிருக்கும் தங்கமலை எனப் போற்றப்படுகின்ற மேரு மலைமீது வந்து சேர்ந்தனர். . மலைமீதுள்ள இயற்கை வளங்களை எல்லாம் வகைவகையாகக் கண்டு ரசித்த மறையோர், தென்பாற்கடலுக்குள் இருக்கின்ற துவரயம்பதிக்கு நேராக இருக்கும் மலை இது தான். . தங்கக் கேணிகளும், வெள்ளிக் கேணிகளும், முத்துக் கேணிகளும். ஏனைய அழகினாலும் மகிழ்விக்கும் இந்த மலையில் நல்ல நல்ல தடாகங்களும் சிறப்பாக அமைந்திருக்கின்றன. எண்ணிலடங்காத தேவர்களெல்லாம் கண்டு களிப்புறுவது இந்த மலையைத் தான். வேகமாக தவமுக்தி பெறும் மாமுனிவர்களின் இன்பமான இருப்பிடமே இந்த மலை தான். தலைமை ஸ்தானம் உடைய இந்த மலையின் சிறப்புகளைப்பற்றி எடுத்து கூறுவதென்பது யாராலும் இயலாத காரியம் என்றெல்லாம் அந்த அழகிய மலையின் பெருமைகளைப் போற்றிப் புகழ்ந்த வண்ணமாக மறையோர்களெல்லாம் மலைமீது ஏறி மகாவிஷ்ணுவின் கிருஷ்ண அவதாரக் கூட்டைத் தேடினார்கள். . தேடித் திரிந்த மறையோர் திடீரெனக் கிருஷ்ண பரமாத்மாவின் காயாம்பூமேனியைக் கண்டனர். கொண்டாடிக் குதூகலித்தனர். மகாவிஷ்ணுவின் அந்த உபாய மாய உடலைக் குளிச்சி மிகுந்த ரதத்தில் ஏற்றிக்கொண்டு சிவபெருமான் வீற்றிருக்கும் திருச்சபைக்கு வந்து சேர்ந்தனர். . . அகிலம் ======= வடந்தார மார்பன் வாய்த்த அரிநாரணரும் பார்த்துச் சடலமதைப் பதிந்தமுகத் தோடணைத்துத் தேற்றி உயிர்க்கொடுத்துச் செப்புவார் கூடுடனே எடுத்த பிறப்புக்கு எல்லாமெனைச் சுமந்து அடுத்து மூவுலகும் அங்கங்கே கொண்டேகிப் பூமி கடலும் பொருப்புப்பூ லோகமெல்லாம் நேமித் தெனைச்சுமந்து நேட்டமுடன் திரிந்தாய் நீசெய்த நன்றி நினக்குரைக்கக் கூடாது நானுனக்குச் செய்யும் நன்றி மிகக்கேளு இத்தனை நாளும் எனைச்சுமந்து பாடுபட்டாய் புத்திரனாய் நீயெனக்குப் பெரியதெய்வ உயிரில் பிறந்து புவிமீதில் பின்னுஞ்சில நாட்கழித்துச் சிறந்த முகூர்த்தமதில் சேர்த்தே உனையெடுத்து உன்றனக்குப் புத்தி உபதேசங் களுரைத்து என்றன் துயரமாற்ற யுகசோதனைக் கனுப்பி உன்றன்துயர மாற்றி உகத்துயர மும்மாற்றி என்றன்துயர மாற்றி ஈசர்துயரம் மாற்றி கலியை யறுத்துக் கனாப்பயங்கள் தானறுத்துச் சலிவில்லாத் தர்ம தங்கநவ ரத்னபதி முத்துநவ ரத்தின முடியுனக்கு நானருளி எத்திசையு மெய்க்க ஏற்றமனு அன்போர்கள் கட்டியங் கூறிக் காட்சியிட்டு வுன்றனக்கு எட்டுத்திக்கும் நின்றேத்த ஏற்றகுடை யொன்றுதந்து அரசாண்டு நீயும் அழியாத் திருவுளம்போல் வீரசான்றோர் சூழ வீரக் கொடிநிறுத்திச் செங்கோற்கு தர்ம சிவசெங்கோ லுமருளி எங்கோ லரசு என்நாமச் சக்கரத்தால் சீமையைம்பத் தாறுமுன் சொல்லொன்றுக் குள்ளாக்கிப் பூமுகச்சிங் காசனமும் பொன்முகச்சிங் காசனமும் கோமுகச்சிங் காசனமும் குணமுகச்சிங் காசனமும் மாமுகச்சிங் காசனமும் மயில்முகச்சிங் காசனமும் அன்னமுகச் சிங்கா சனமீதோ டாகவேதான் பொன்னம் பலம்போல் பெரியசிங் காசனந்தான் முப்பத்தி ரண்டும் முழுது முனக்கருளி செப்பொத்த மாணாக்கர் சேவிக்க வுன்றனக்குத் தருவேனா னுன்னுடைய தாயார்பே ராணையதாய் என்றையா நாதன் எடுத்தவர்க் கேவுரைக்க . விளக்கம் ========= மறையவர்கள் கொண்டுவந்த கிருஷ்ண அவதாரக் கூட்டைக் கண்ட மகாவிஷ்ணு மட்டிலா மகிழ்ச்சி பொங்க, தம் முகத்தோடு அந்த உபாய மாய உடலை அணைத்து, அவ்வுடலைத் தேற்றி தம் உபதேசத்தை அவ்வுடல் உணருவதற்கு உகந்தாற்போல் உயிர் கொடுத்து, அந்த உடலிடம் சொல்லுகிறார். ஊன் உடலே, நான் எடுத்த எல்லாப் பிறப்பிலும் என்னை உன் அகம் வைத்துச் சுமந்து மேலோகம், பூலோகம், பாதாளலோகம் ஆகிய அனைத்து உலகங்களுக்கும் என்னைக் கொண்டு அலைந்தாய். . கடலும், மலையும் அடங்கலாகப் பூலோகமெல்லாம் என்னைச் சுமப்பதையே வேண்டுதலாகக் கொண்டு விருப்பத்தோடு திரிந்தாய். நீ எனக்குச் செய்த நன்றியை உன்னிடமே சொல்லதென்பது முடியாத காரியம். நான் உனக்கு மிகவும் நன்றிக் கடன்பட்டுள்ளேன். ஆதலால், நான் உனக்குச் செய்யப்போகும் நன்றியைப் பற்றி கவனமாகக் கேட்டுக்கொள். . இத்தனை காலமும் என்னைச் சுமந்து பாடுபட்ட நீ. இப்போது பூலோகத்தில் என் மகவாகப் பிறந்திருக்கும் தெய்வ லோகத்தாரின் வம்சாவழியில், சம்பூரணத்தேவனின் உயிரோடு பிறக்க வேண்டம். . நீ பூலோகத்தில் பிறந்து சில காலம் கழிந்ததும் சிறந்த சுபவேளையில் உன்னை என்னோடு சேர்த்தெடுத்து, உனக்கு புத்தி உபதேசங்கள் சொல்லி, உன்னுடைய துயரங்கள் யாவையும் மாற்றுவதற்காக உன்னை யுகச்சோதனைக்கு அனுப்பி, உன்னுடைய துயரத்தையும், இந்த கலியுகத்தின் துயரத்தையும் மாற்றி, என்னுடைய துயரத்தையும், சிவபெருமானின் துயரத்தையும் மாற்றி, கலியுகத்தை முடித்து, அந்தக் கலியில் இருந்து விடுபடும்பொது, தொய்வே இல்லாத தர்மம் தழைத்திருக்கும், தங்க நவரத்தினத்தால் உண்டான தர்மபதியையும், அதை ஆளுவதற்கான முத்து நவரத்தினத் திருமுடியையும் உனக்கு நான் அருளுவேன். . அது மட்டுமல்ல, எந்தத் திசையில் உள்ள தேசத்தாரும், மொழியாரும் மெச்சுகின்ற அளவில், ஏற்புடைய மாந்தர்களில் அன்புள்ளோர்கள் எல்லாம் உன் புகழைப் போற்றுகின்ற வகையில் பற்பல காட்சிகளை நடத்துவிப்பேன். . அத்துடன், எட்டுத்திசையில் வாழுகின்ற மக்களும் உன்னைப் பொற்றுவதற்கு உகந்த ஒற்றைக் குடையை நான் உனக்கு அருள்வென். ஒற்றைக் குடையின் கீழ் உலகை அரசாண்டு என்றும் அழியாத இறைவனைப் பொல் வீரம் மிகுந்த ஒழுக்கசீலர்கள் எல்லாரும் உன்னைச் சூழ்ந்திருக்க நீ வீரக் கொடியை நிலைநிறுத்திச் செங்கோல் செலுத்துவதற்காகத் தர்மச் சிவ செங்கோலும் அருள்வேன். . அதோடு, என்னுடைய அருளாட்சியையும், என்னுடைய நாச்சக்கதரத்தின் மூலமாக ஐம்பத்தாறு சீமையையும் உன்னுடைய சொல் ஒன்றுக்குள்ளாக்கி, பூமுகச் சிங்காசனமும், பொன் முகச் சிங்காசனமும், கோமுகச் சிங்காசனமும், குணமுகச் சிங்காசனமும், மாமுகச் சிங்காசனமும் இவை அனைத்தோடும் சேர்த்து பொன்னம்பலம் போன்ற பெரிய சிங்காசனமும், முப்பத்து இரண்டு தர்மங்களையும் முழுமையாக உனக்கே அருளிச் செய்து, உன்னுடைய உத்தரவிற்கேற்ப செயல்படும் சீடர்களை உனக்குப் பணிவிடை புரிவதற்காகப் பணிப்பேன். இவை யாவும் உன் அன்னையின் மீது சத்தியம் என்று மகாவிஷ்ணு தம் முன் அவதாரங்களுக்குப் பயன்படுத்திய உபாயமாய உடலிடம் உறுதியளித்தார். . . தொடரும்... அய்யா உண்டு. #அய்யா வைகுண்டர் #அய்யா வைகுண்டர் {1008} #💚Ayya 💗 Vaikundar💚 #Ayya Vaikundar

#Ayya Vaikundar #அய்யா வைகுண்டர் #அய்யா வைகுண்டர் {1008} #💚Ayya 💗 Vaikundar💚 #🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 11.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== என்ன இனிப்பிறக்க ஏதுனக்குச் சங்கடங்கள் என்றுரைக்க நாதன் இசைந்ததே வனுரைப்பான் அய்யாவே யென்னுடைய ஆதித் திருவுளமே பொய்யா னகலியில் போய்ப்பிறக்கச் சொன்னீரே சாதி பதினெண்ணாய்த் தான்பிரித்தா னேநீசன் ஆதித்தா திதனிலே அமையுமையா என்கோவே அல்லாம லுன்றனக்கு ஆதிவரை யெந்நாளும் நல்லாகத் தொண்டுபண்ணி நவ்வியிருக்கு மனுவில் படையுமையா யென்றன் பிதாவே யெனப்பணிந்தான் . விளக்கம் ======== சம்பூரணத் தேவனின் பணிவான வேண்டுகோளுக்கு இணங்கி, வைகுண்ட அவதார காலநிலைகளைச் சம்பூரணத் தேவனுக்கு எடுத்துக்கூறிய மகாவிஷ்ணு, இதற்கு மேலும் உனக்கு ஏதேனும் சங்கடங்கள் உள்ளனவா என்று கேட்டார். . மகாவிஷ்ணு சொன்ன செய்திகள் யாவையும் மிகவும் கவனமாகக் கேட்டுக்கொண்டிருந்து சம்பூரணத்தேவன் அவ்வுரைகள் யாவையும் அகம் ஏற்றுக்கொண்டு மகாவிஷ்ணுவைப் பார்த்து, அய்யா, என் ஆதித் திருவுளமே, போலியுகமாகிய இந்த கலியுகத்தில் என்னைப் பிறக்கப் போ என்று சொல்லுகிறீர்களே, தாங்கள் படைத்த மக்களைச் சாதி என்னும் பெயரால் பதினெட்டுப் பிரிவுகளாகக் கலிநீசன் பிரித்து வைத்திருக்கிறானே, அதில் முதன்மையான பிரிவில் தங்களுக்குக் காலங்காலமாக நறிதொண்டு செய்து, அத்தொண்டு செய்வதிலேயே பேரானந்தம் அடைந்து கொண்டு இருக்கும் மானிடர் வயிற்றுப் பிள்ளையாக என்னைப் பிறவி செய்யுங்கள் எனையாளும் ஆண்டவனே ! பிதாவே ! என்று சொல்லி பணிவோடு வணங்கினான். . . அகிலம் ======= குடையொன் றாற்பெரிய குருவு மகிழ்ந்துரைப்பார் நல்லதுகாண் தேவாநீ நம்மக்கள் ஏழ்பேரில் வெல்லமர் கோன்வாழும் வெற்றிதெய்வ லோகவித்தாய் அவ்வழியி லம்மனுவில் ஆனசான் றோர்குலத்தில் மெய்வழியி லங்கே மிகப்பிறக்கப் போநீயென்றார் நல்லதுதா னென்று நவிலுவான் தேவனுமே வல்லவரே மூவருக்கும் மைத்துனராய் நிற்போரே என்னைப் பிறவி இப்போது செய்யுமென்று வன்னத் தேவாதி வணங்கிநின்றான் மாயவரை . விளக்கம் ======== உலகம் யாவையும் ஒரு குடைக்குள் வைத்து ஆளுகின்ற மகா குருவான மகாவிஷ்ணு, மிகவும் சந்தோசத்தோடு சம்பூரணத்தேவனைப் பார்த்துச் சொல்லுகிறார். சம்பூரணத்தேவா, உன்னுடைய இந்த நல்ல நோக்கத்தை நான் ஏற்றுக் கொள்ளுகிறேன். . மேலோக வித்துக்களான ஏழுபேர் என் மக்களாகப் பூலோகத்தில் பிறந்துள்ளனரே, அவர்களில் வெற்றி வேந்தனாகிய தேவேந்திரனின் தேவலோகத்திலிருந்து ஒரு வித்தின் மூலமாகப் பெற்றுப் பெருகியிருக்கும் மனுவழியில் உண்டான, அறிவிற்சிறந்த குடும்பத்தில் உள்ள ஒரு உடல் வழியாகச் சிறப்போடு பிறப்பதற்கு செல்லு என்றார். . மகாவிஷ்ணுவின் அவ்வுரையால் மகிழ்ச்சி அடைந்த சம்பூரணத்தேவன், வல்லோனே, மும்மூர்த்திகளுக்கும் சினேகமாக இருக்கும் பரம்பொருளே, என்னை உடனே பூலோகத்தில் பிறவி செய்யுங்கள் என்று சம்பூரணத்தேவன் மகாவிஷ்ணுவை வேண்டி வணங்கி நின்றான். . அகிலம் ======== ஆத்ம ஜெயம் ============= அப்பொழுது அய்யா நாராயணர் மகிழ்ந்து முப்பொழுது வுள்ள முறைமையது கூறலுற்றார் ஆறுதரம் நம்மை அகம்வைத்துக் கொண்டசடம் பேதுபெற்ற தில்லையே பேறுநா மீந்திலையே அச்சடல மம்மலையில் அருந்தவசு பண்ணினதே இச்சடல மீடேற இந்தநாள் வந்துதென்று தேவன் சடலமதைத் திக்கென் றழித்துவிட்டு மூவர் நடுவருட முச்சடலக் கூடதையும் வரவழைத்து வாருமென்று மறையோரைத் தானேவி விரைவாக வாருமென்று விடைகொடுத்தா ரெல்லோரும் . விளக்கம் ========= அதனால் மகிழ்ச்சியுற்ற மகாவிஷ்ணு கழிந்த காலத்தில் அவர் எடுத்துள்ள அவதார முறைமைகளைப் பற்றி நினைவுகூர்ந்துப் பேசலானார். கலியுகத்திற்கு முன்புள்ள ஆறு யுகங்களிலும் தம்மை அகம் வைத்துச் சுமந்த உடல் ஒன்று உள்ளனவே, அந்த உடல் இதுவரை வீடுபேறு அடையவில்லையே. நாமாக அந்த உடலுக்கு எவ்வகைப் பேறும் கொடுக்கவும் இல்லையே. அந்த உடல் கிருஷ்ண அவதார நிறைவில் நாம் உகுத்து வைத்த அந்த மலையில் அருமையாகத் தவம் செய்து கொணடல்லவா இருக்கிறது. என்றெல்லாம் நினைத்துப் பார்த்த மகாவிஷ்ணு, அந்த உடலைக் கடைத்தேறச் செய்ய வேண்டும் எனத் தீர்மானித்தார். . அந்த காரணச் சரீரத்தைக் கடைத்தேறச் செய்வதற்கு உற்றநாள், உகந்த தருணம் இதுதான் என்றெண்ணி, சம்பூரணத் தேவனின் இயல்பான உடலை திடீரென்று அழித்துவிட்டு, சிவன், விஷ்ணு, பிரம்மா என மும்மூர்த்திகளுக்கும் நடுவராகிய தம்முடைய முன் அவதாரக் கிருஷ்ண சரீரத்தை உடனே வரவழைத்து வாருங்கள் என்று அங்கிருந்த மறையோர் அனைவரையும் அழைத்து உத்தரவிட்டு அனுப்பிவைத்தார். . . தொடரும்... அய்யா உண்டு.

#🚩அய்யா வைகுண்டர் 🚩 #💚Ayya 💗 Vaikundar💚 #அய்யா வைகுண்டர் {1008} #Ayya Vaikundar #அய்யா வைகுண்டர் கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 10.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======= மாமோக ஆசையினால் மாசண்டை யாகிவரும் காமோக வெறியால் கனபழிக ளுண்டாகும் மாதாவைப் பிள்ளை வைப்பு நினைத்துநிற்கும் தாதாவை வேலை சந்ததிகள் கொண்டிடுவார் மாடாடு தன்வயிற்றில் மனிதர்போல் தான்பிறக்கும் கோடா னதுபெருத்துக் கொல்வார் சிலபேரை காணிக்கை வேண்டல் கைக்கூலி தான்மீறும் மாணிக்கத் தங்கம் வையிர மிகமறையும் நீணிலத்தில் பேய்கள் நிரந்துமிகக் கோட்டிசெய்யும் மாநிலத்தில் வேளாண்மை மழையில் மிகக்கேடுவரும் பேதையர்கள் பிள்ளை பிறக்கு மதிசயம்போல் கோதையர்கள் கொங்கை கூடாம லேவாழ்வார் கூடப் பிறப்பைக் கொடும்பகைபோ லெண்ணிடுவார் வான முறுமும் மழைகீழ்ச் சொரியாது தான மழியும் சாஸ்திரங்கள் பொய்யாகும் . விளக்கம் ======== பொன், பொருள், மண், பதவி, புகழ் போன்றவற்றில் ஏற்படும் மோகத்தாலும், பேராசையாலும் பெரும் பகைகளும், சண்டைச் சச்சரவுகளும் ஏற்படும். காமவெளியின் காரணமாக அதிக அளவில் பழிபாவங்கள் நடைபெறும். பெற்ற தாயை மகன் தன் ஆசை நாயகியாக்க எண்ணுவான். தந்தையைப் பிள்ளைகள் தம் வேலைகளைச் செய்யும்படி கட்டளையிட்டு வேலை வாங்குவர். . பசுமாட்டின் வயிற்றில் மனிதவடிவில் கன்று பிறக்கும், உலகில் வஞ்சகம் மலிந்துவிடும். அதனால் சிலர் கொலை செய்யப்படுவர். தெய்வங்களின் பெயரை முன்னிலைப்படுத்திக் காணிக்கை வாங்கலும் கையூட்டுப் பெறுதலும் கட்டுக்கடங்காமல் அதிகரிக்கும். . மாணிக்கம், தங்கம், வைரம் ஆகியவை பயன்படுத்தும் வகையில் இல்லாத அளவில் மறைந்து போகும். தொன்மை வாய்ந்த இந்த உலகில் மதிகேடர்களின் பிசாசப் பிதற்றல்கள் பரவலாகி துன்பங்களை உண்டாக்கி ஒற்றுமையைச் சிதைக்கும். . உலகில் மழையின்மையால் பயிரிடும் காலத்தில் பயிரிட முடியாமலும், மழை மிகுதியால் விளைந்த மகசூலைப் பயன்படுத்த முடியாமலும் வேளாண்மை நலிந்து போகும். ஏழுவயதுப் பெண்கள் குழந்தை பெறும் அதிசயம் நடைபெறுவதோடு அறிவிலிகளான தம்பதியருக்கு உலகமே அதிசயிக்கும் வகையிலான அறிவுத் திறனுடைய பிள்ளைகளும் பிறக்கும். . மங்கையர்கள் மார்பு கும்பிக்காமலே வாழ்வார்கள். ஒரு தாயின் வயிற்றில் பிறந்த உடன்பிறப்புகள் ஒருவருக் கொருவர் பெரும் பகைவர்களைப் போல் நினைத்துக் கொணடிருப்பார்கள். வானம் முழங்கும். அதனால் மழைவருவது போல் தோன்றும். ஆனால் மழை பெய்யாது. எவ்வித லாபத்தையும் பெயரையும், புகழையும் விளம்பரத்தையும் எதிர்பார்க்காமல் அதாவது, உள் நோக்கம் இல்லாமல் செய்யப்படும் தருமங்கள் மறைந்து போகும். சாஸ்திரங்கள் கூறுகின்ற நெறிமுறைகளை அனுசரிக்க மறுக்கப்படும். . . அகிலம் ======== ஈனருக்குக் காலம் ரெம்பரெம்ப வுண்டாகும் வீணர் பெருப்பார் வீடதனைக் கெடுப்பார் தாணருட வேதம் தலையழிய விட்டிடுவார் பொய்வேதம் பூமிதனில் பெருத்துமிக வுண்டாகும் மெய்வேதந் தன்னை விரும்பா திகழ்ச்சிசெய்வார் கள்ளர் பெருப்பார் கறியுப்பு மேமலியும் கொள்ளையாய்ச் சம்பை கோடாமுக் கோடியுமாய் நாணி யிறப்பார் நஞ்சித்தின் றேயிறப்பார் கேணிக்குள் ளேயிறப்பார் கீறிக்கொண் டேசாவார் வயிர முழுங்கி மாள்வார் சிலபேர்கள் துயரம் பொறுக்காமல் தோயமதி லேவிழுவார் ஈக்கள் பெருகும் எறும்பு மிகப்பெருகும் காய்கள் பெருகும் கஞ்சா அபின்பெருகும் சன்னாசி நிஷ்டை தவறி யலைவார்கள் ஒன்னாமது சாதி உலைமெழுகு போலலைவார் கட்டழிந்து பெண்கள் கற்பு மிகத்தவறும் சட்ட மழியும் சந்தியம்பல மிடியும் கூட்டங் குலையும் குடும்பம் பகையாகும் நாட்டை யரசாங்கம் நாலுரண்டு மூன்றாகும் கோட்டை யழியும் குச்சிக்கட் டைமதிலாம் சீவசெந் தெல்லாம் தீனில்லாத் தட்டழியும் சூவை பெருக்கும் சூறா வளிமீறும் அக்கினியால் தண்ணீரால் அநேக சீமையழியும் முக்கியமாய் லோகமதில் வாந்தி மிகமீறும் இப்படித்தா னல்லாமல் இன்னு மநேகவளம் செப்பத் தொலையாது செப்புவேன் பின்னுனக்கு நீகேட் டதற்கு நிலையாக இத்தனையும் நான்தேட் டமாக நாடியுன் னோடுரைத்தேன் உன்பேரால் நானும் உள்ளாசை கொண்டிருந்துன் தன்பேரா லென்றனக்குத் தலைச்சிறைதான் மாறுமென்று சொன்னே னுனக்குச் சொல்லுவே னின்னமுமே . விளக்கம் ========= கீழான புத்தியும் இழிவான செயலுமுள்ள ஈனர்களுக்கெல்லாம் மிக மிகச் சுதந்திரமான வாழ்க்கை அமைந்திருக்கும். அதாவது, கெட்டவர்களுக்கு மட்டுமே அது ஏற்ற காலமாக அமையும். பயனற்ற வீணர்கள் அதிகரிப்பர். அவர்கள் பல குடும்பங்களையும், கூட்டமைப்புகளையும் சிதைத்துச் சின்னா பின்னமாக்குவர். சிவ ஞானத்தைப் பெற்றுப் பேரானந்தம் அடைவதற்கான வேதங்கள் யாவையும் இகழ்ந்துரைத்து அவற்றை தலை நிமிராமல் செய்து விடுவர். பொய்யான செய்திகளை வேதம் இதுவே எனவாக்கி உலகமெல்லாம் பறைசாற்றிப் பரப்புவர். எங்கேனும் திருடர்களின் பெருக்கம் அதிகரித்திருக்கும். உப்பின் விலை மலியும். ஒரு விதமான நரகத்தை அனுபவிப்பதற்குரியோர் கோடானகோடி பேர் என்ற அளவில் எண்ணிக்கையில் உயர்வர். அவர்கள் கொள்ளை நோயிலும் நடைமுறை பேதத்தால் நாணமுற்றும், சஞ்சு தின்றும், கிணறுகளில் விழுந்தும், தன்னைத் தானே கத்தியால் கீறிக் கொண்டும் வயிரத்தைப் பொடித்து விழுங்கியும், தம் துயரத்தை பொறுக்க முடியாமல் நீர் நிலைகளில் விழுந்தும் இறப்பார்கள். . ஈக்களும். எறும்புகளும் பெருமளவில் உற்பத்தியாகும். சூது பெருகும். கஞ்சா, அபின் போன்ற போதை வஸ்த்துக்கள் பெருகும். சன்னாசிகளெல்லாம் ஆசை மயக்கத்தினால் தவநிலை தவறி அலைவார்கள். உயர்ந்த தன்மைகளை உடைய உத்தமர்களெல்லாம் உலையில் அகப்பட்ட மெழுகைப் போல் மனதாலும் உடலாலும் கரைந்து கொண்டே இருப்பர். . பெண்கள் கட்டுப்பாடற்ற வாழ்க்கையால் கற்பு நிலை தவறுவர். சட்டதிட்ட ஒழுக்க முறைகளுக்கு அழிவு ஏற்படும். கிராமங்களில் அமைந்திருக்கும் சந்தி அம்பலங்களெல்லாம் பயன்படுத்துவோர் இல்லாமல் அழிந்து போகும். மக்களிடையே உண்டான ஒற்றுமை சிதையும். குடும்பத்திற்குள் பெரும் பகைகள் ஏற்படும். . ஆட்சி என்ற பெயரால் அரசாங்கம், நாட்டைப் பல கூறுகளாகப் பங்கிடும். பெரிய கூட்டத்தையே சிறப்போடு கட்டிக் காப்பாற்றுகின்ற கற்கோட்டை போன்றோரின் அரவணைப்புகள் அகற்றப்பட்டு அந்த இடத்தில் குச்சிக்கட்டைப் போன்றோர் அமர்தப்படுவர். உயிரினங்களெல்லாம் உணவின்றி நிலை குலையும். வேசித்தனம் அதிகரிக்கும். சூழல் காற்றினால் பேரழிவு ஏற்படும். தீயினாலும். தண்ணீராலும் பல நாடுகள் அழியும். முக்கியமாக உலகில் பெருமளவில் வாந்தி நோய் உண்டாகும். . இப்படி மட்டுமின்றி இன்னும் பலவிதமான காரியங்கள் உள்ளன. அவற்றை எல்லாம் இப்போது சொல்லி முடிக்க இயலாது. பின்பு உனக்கு இன்னும் தெளிவாகச் சொல்லுகிறேன். நீ கேட்டதற்காக இத்தனை நிலைப்பாடுகளையும் சொல்லத் தோன்றியதால் சொல்லிவிட்டேன். உன்னிடம் நான் அகத்தளவில் அன்பு கொண்டுள்ளேன். உன் வாயிலாக எனக்கு பல்வேறு துன்பங்கள் மாறும் என்று ஏற்கெனவே சொல்லியிருக்கிறேன். இன்னும் சொல்லுவேன். . . தொடரும்... அய்யா உண்டு.

#Ayya Vaikundar #அய்யா வைகுண்டர் #அய்யா வைகுண்டர் {1008} #💚Ayya 💗 Vaikundar💚 #🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 09.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======= என்றுமா கிருஷ்ணர் இப்படியே சொல்லிடவே அன்றந்தத் தேவன் அவரடியைத் தான்போற்றி அய்யாவே பூமிதனில் அவதரிபோ என்றீரே பொய்யா னகலியன் பூமிதனி லேபிறந்தால் பிறந்த வழியும் பிதிருமந் தக்குலமும் அறந்தழைக்கு மாலே அதுவுமென் னாற்கெதிதான் பெற்றுக்கொள் ளும்படியாய்ப் புத்தி கொடுத்தருளிப் பற்றுத லாகப் பலன்கொடுப்போ மென்றுசொல்லும் அல்லாம லென்னைவந்து ஆட்கொள்ளும் நாளதுதான் எல்லாம் விவரமதாய் இயம்பி யனுப்புமையா . விளக்கம் ======== மகாவிஷ்ணு இவ்வண்ணமாகச் சொன்னவுடன் சம்பூரணத் தேவன் மகாவிஷ்ணுவின் மலரடியை வணங்கியவாறு, அய்யா, என்னைப் பூலோகத்தில் பிறக்கப்போ என்று சொல்லுகிறீர்களே அந்த பூலோகம் இப்போது கலியர்களின் கபடமான பிடியில் அல்லவா சிக்கித் தவித்துக் கொண்டிருக்கிறது. தர்மத்தின் பிறப்பிடமே, பொய்யான கலி உலவும் பூலோகத்தில் நான் போய்ப் பிறந்தால், நான் பிறந்த வழியும், அவ்வழியின் முன்னோரும், அக்குலமும் என் மூலமாக உயர்வு பெறும்படியாக அறிவைக் கொடுத்தருள்வதோடு, அவர்களோடு தாங்கள் எப்பொழுதும் இசைவோடு இருந்து நற்பலன் கொடுப்பேன் என்று தாங்கள் எனக்கு வாக்குறுதி தரவேண்டும். அதுமட்டுமின்றி தாங்கள் வந்து என்னை ஆட்கொள்ளும் நாளையும் விவரமாகச் சொல்லி அனுப்புங்களய்யா என்று வேண்டினான். . . அகிலம் ======== அப்பொழு தந்த ஆதிநா ராயணரும் செப்புகிறா ரந்தத் தேவன் தனக்குத்திடம் தெச்சணா பூமிதனில் தேசபர சோதனைக்கு நிச்சயமாய் நான்வருகும் நிசத்துக் கடையாளம் பூமியி லோர்திக்குப் பொருந்தி மிகவாழும் சாமிவே தமறந்து சுழல்வேத முண்டாகும் சாதி வரம்பு தப்பி நிலைமாறும் பாரிகட்கு மூப்புப் பார்மீதி லுண்டாகும் நீசக் குலங்கள் நெளுநெளெனப் பூமிதனில் தூசியிடத் தெண்டம் தொடர்ந்து பிடிப்பார்கள் வானத் திடிகள் வருடவரு டந்தோறும் நீணிலத்தில் வீழும் நின்று மலைமுழங்கும் சீமை தென்சோழன் சீர்பயிரு மேவிவரும் இலைகள் கருகும் இருவேதம் பொய்யாகும் தலைக்கண் படலம் தட்டழிய ஓடிநிற்கும் நச்சேத் திரமுதிரும் நடக்கும் வழிகுறுகும் பொய்ச்சேத் திரக்குருக்கள் பூமிதனில் மேவிவரும் நவ்வா துலுக்கு நாட்டில் கலசல்வரும் சிவ்வா லயங்கள் தேய்ந்து சுவரிடியும் கிணறு பாழாகும் கீழூற்றுப் பொய்யாகும் இணறு பெருத்து ஏங்குவாரே மனுக்கள் மனுக்கள் தங்களுக்கு மாகலச லுண்டாகும் . விளக்கம் ======== சம்பூரணத்தேவனின் அவ்வுரையைக் கேட்ட மகாவிஷ்ணு, சம்பூரணத்தேவனுக்கு நம்பிக்கையை ஊட்டும் வகையில், வைகுண்ட அவதார உதயம் ஏற்படும் காலகட்டத்தில் நிகழவிருக்கும் உலக நியதிகளைப் பற்றி எடுத்து உரைக்கிறார். . உலகத்தைப் பரிசோதிப்பதற்காக தெச்சணா பூமியில் நிச்சயமாக நான் அவதரிப்பேன். நான் அவதரிக்க இருக்கும் அந்தக் காலகட்டத்தை உணர்வதற்கான நிதர்சனமான அடையாளம் யாதெனில், உலகில் ஒரே ஒரு பகுதியில் மட்டுமே மக்களெல்லாம் மன ஒருமைப்பாட்டுடன் வாழ்வார்கள். . இறைவனைப் போற்றிப் புகழ்ந்து வழிபடுவதற்கு வகை செய்கின்ற வேதாகமக் கருத்துக்களைப் போதிக்கின்ற நிலையை மக்கள் மறந்து விடுவார்கள். ஆகவே, தெய்வ நம்பிக்கை நாளுக்கு நாள் குறைந்து, உலகில் கட்டுப்பாடற்ற வாழ்க்கை முறை மேலோங்கி வரும். . ஆண், பெண் ஆகிய இரு இனத்தாரும் அவரவருக்கான எல்லையை மீறுவர். ஆதனால் நிலை தடுமாற்றம் ஏற்படும். உலகில் இல்லத்தரசிகளின் அதிகாரம் மேலோங்கும். கெட்ட புத்தியுடைய கொடிய நிசர்கள் உலகெங்கும் கொடிப்படைபோல் படர்ந்து இருப்பார்கள். அவர்கள் ஒழுக்கத்திலும், பழக்க வழக்கத்திலும் மேன்மையுடையோரை எல்லாம் தொல்லைப்படுத்தி புண்படச் செய்து புறக்கணிப்பார்கள். . வருடா வருடந்தோறும் வானத்து இடிகள் வையகத்தில் விழும். அதனால் மலைகள் குமுறும், எனவே பூமி அதிரும். ஆகவே சூரியன் சற்று சாய்ந்தே வரும். . சோழ நாட்டின் தென்பகுதிகளிலெல்லாம் செழிப்பாக வளர்ந்த பயிர்களைக் கூட மண்ணோடு மண்ணாக நிரவ வேண்டிய நிலைமை ஏற்படும். தாவரங்களின் இலைகள் யாவும் கரிந்து போகும். ரிக், யசூர், சாம, அதர்வண ஆகிய நான்கு வேதங்களில் இரண்டு வேதங்கள் பொய்யாகிவிடும். ஜனத்தொகைப் பெருக்கத்தின் காரணமாக மக்கள் எங்கே போவது என்ன செய்வது என்றறிய இயலாமல் தடுமாற்றம் அடைவார்கள். . வானத்திலுள்ள நட்சத்திரங்கள் உதிர்ந்து பூமியில் விழும். வண்டி, வாகன அதிகரிப்பினால் நடந்து செல்லும் பயணங்கள் குறையும். அதனால் மிகத் தூரமான ஊர்கள் கூட சமீபமாகவே தோன்றும். பொய்யான பூசாரிகள் கோயில்களில் பெருக்கமாக இருப்பார்கள். . நவ்வா துலுக்கர் நாடுகளிலெல்லாம் போராட்டம் யுத்தம் போன்றவற்றால் பெருங்குழப்பம் ஏற்படும். வழிபாட்டு ஆலயங்களெல்லாம் பராமரிப்பாரற்றுப் பாழாகும். நிலத்தடி நீரற்றுக் கிணறுகளெல்லாம் மூடப்படும். பிள்ளைப் பேறு அதிகரிப்பால் மக்கள் மிக இன்னல்களுக்குள்ளாவார்கள். அதனால் மிகப்பெரிய குழப்பம் உண்டாகும். மதக் குரோதப் பகையினால் உலகில் துரோகச் செயல்கள் மிகுந்து நடைபெறும். . . தொடரும்... அய்யா உண்டு.

#🚩அய்யா வைகுண்டர் 🚩 #💚Ayya 💗 Vaikundar💚 #அய்யா வைகுண்டர் {1008} #Ayya Vaikundar #அய்யா வைகுண்டர் கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 08.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======= போற்றியென் றேத்தித் தேவன் பொற்பதம் வணங்கி நிற்க ஆத்தியே சூடும் வேதன் ஆகமே மகிழ்ச்சை கூர்ந்து தீத்திய ஆய னோடு செய்தியே தெனவே கேட்க நாற்றிசை புகழுந் தெய்வ நாரண ருரைக்கின் றாரே . விளக்கம் ========= சம்பூரணத்தேவன் தம் தவறை உணர்ந்து ஒப்புக்கொண்டு சிவபெருமானையும், மகாவிஷ்ணுவையும் வணங்கி, வருந்தி வேண்டியதால், கொன்றைவாவை மலரைக்கூட மனமுவந்து சூடுகின்றவரும், வேதங்களுக்கெல்லாம் நாயகனுமாகிய சிவபெருமான், சம்பூரணத்தேவன் மீது ஆற்றொணா விருப்பத்தோடு, அழகுப் பிரகாசனும், மும்மூர்த்திகளின் நடுவனுமாகிய மகாவிஷ்ணுவைப் பார்த்து மாயவா, இந்த சம்பூரணத் தேவனுக்கு நிறைவாக என்ன செய்யலாம் என்று யோசனை கேட்டார். அதற்கு நான்கு திசைகளும் புகழுகின்ற தெய்வமாகிய மகாவிஷ்ணு, சம்பூரணத்தேவனின் பூலோகப் பிறப்பு பற்றிச் சொல்ல முனைகிறார். . . அகிலம் ======== சம்பூரணத் தேவனுக்குப் பூலோகப்பிறவி ===================================== தேவன் வணங்கித் திருப்பாதம் போற்றிடவே ஆயனோ டந்த ஆதிசிவ மேதுரைக்கும் அச்சுதரே தேவனுக்கு ஆன வளமையது நிச்சயமாய்ச் சொல்லி நீரனுப்பு மென்றுரைத்தார் அப்போது நாரா யணரு மகமகிழ்ந்து செப்புகிறோ மென்று தேவனுக்கங் கேதுரைப்பார் கேளாய்நீ தேவா கீழான மங்கையரைத் தாழாத மேல்வகையில் சரியாக்க வேணுமென்று நின்றாய் தவத்தில் நினைவொன்றைத் தானாட்டி சண்டாளா நீநினைத்த நினைவுதவத் தொத்திடுமோ சூழ வினையறுத்துச் சுருதிநே ருள்ளாக்கி நீளநூ லிட்டு நீதவசு நிற்கையிலே ஆசை நினைவாமோ அறிவுகெட்ட மாதேவா பாச மறுத்தல்லவோ பரகெதியைக் காணுவது ஏதுகா ணுன்றனக்கு இந்நினைவு வந்ததினால் மாது பிறந்ததுபோல் வையகத்தில் நீபிறந்து இந்த நினைவதற்கு இனிப்பிறந்து நீசிலநாள் தொந்துயர மெல்லாம் தொல்புவியி லேதொலைத்துக் கண்டந்த மங்கையரைக் கருவால் வசமாக்கிக் கொண்டு திரிந்து கோதையரின் தன்னாலே நஞ்சுதின் றானாலும் நாண்டுகொண் டானாலும் உன்சீவன் மாய்க்க உனக்கு மனதாகிப் பின்னுஞ்சில நாள்கழித்துப் பெண்ணோ டுறவாடித் தன்னோவியம் போல் தானிருக்கும் நாளையிலே உன்துயரந் தீர்த்து உன்னையெடுத் தென்மகவாய் என்துயர மெல்லாம் யானேநீ மாற்றல்செய்து என்வரிசை தானம் எல்லாமுனக் களித்துப் பொன்னரசு தந்து புவியாள வைத்திடுவேன் . விளக்கம் ========= சம்பூரணத்தேவன் சிவபெருமானையும், மகாவிஷ்ணுவையும் போற்றிப் புகழ்ந்து பாடி வணங்குவதைப் பார்த்து மகிழ்ந்த சிவபெருமான், மகாவிஷ்ணுவைப் பார்த்து, அச்சுதரே, சம்பூரணத் தேவனுக்கு என்ன சொல்ல வேண்டுமோ அதை உறுதியாகச் சொல்லி அனுப்பும் என்றார். அதைக் கேட்ட மகாவிஷ்ணு, சொல்லுகிறேன் என்று மன மகிழ்ச்சியோடு சிவபெருமானிடம் சொல்லிவிட்டு, உடனே சம்பூரணத்தேவனை நோக்கிச் சொல்லுகிறார். சம்பூரணத்தேவா, நான் சொல்லுவதைக் கவனமாகக் கேள். நீ விரும்பிய பரதேவதை என்னும் பெண் ஏற்கெனவே இன்னொருவனின் மனைவி, தன்னுடைய கணவன் இருக்கும்போது இன்னொருவனை இச்சிக்கும் அவள் கீழான மங்கை என்று பொருள். . அத்தகு கீழான அந்தப் பெண்ணை இன்னும் தாழ்வு நிலையை அடையவிடாதபடி மேல் நிலைக்கு உயர்த்த வேண்டும் என்று ஒரே நினைவாகத் தவத்தில் நின்றாய். நீ நின்ற தவம் நிறைவேறும் வேளையில் தேவேந்திரனின் திருமுடிமேல் இச்சை கொண்டாயே, அது நீ செய் தவத்திற்கு ஒத்து வருமா? . உன்னைச் சூழ்ந்திருக்கும் வினைகள் யாவையும் அகற்றி மந்திர ஒலியை உன்னுள் வசப்படுத்தி, உள்முகமாய் ஒலித்து, சுவாசத்தைச் சுழுமுனையிலிட்டு நீ தவசு நிற்கும்போது ஆசை அலைகள் உன்னை அடிமையாக்கலாமா? . அறிவுகெட்ட சம்பூரணத்தேவா ஆசாபாசங்களை அகற்றினால்தானே பரகதியாகிய முக்தியை அடையமுடியும் என்பது உனக்கு ஏன் தெரியாமல்போனது. தவம் செய்து கொண்டிருக்கும்போது உனக்கு இத்தகு எண்ணம் ஏற்பட்டதால் நீ விரும்பிய பரதேவதை என்ற பெண் பூலோகத்தில் பிறந்தது போலவே நீயும் பூலோகத்தில் பிறந்து, உன்னுடைய வாழ் வினைகளையெல்லாம் சிலகாலம் பழமை வாய்ந்த அப்பூவுலகில் அனுபவித்து முடித்தபின்பு, பூலோகத்தில் பிறந்துள்ள பரதேவதையைக் கண்டு, முன்வினைப் பயனால் நீ அவளை உன்மேல் இச்சைபடச் செய்து, அவளுடைய நினைவை நெஞ்சிலே சுமந்து கொண்டு அலையும் உனக்கு, அவளின் ஏதுவால் நஞ்சு தின்றோ, நாண்டுகொண்டோ என் உயிரை மாய்த்துக்கொண்வதற்கு உனக்கு எண்ணம் ஏற்படும். . அதன்பிறகு, சிலநாள் சென்ற பின்பு அந்தப் பெண்ணோடு நட்புகொண்டு, அவளை உன்னுடைய சொந்த ஓவியமாகவே நீ நினைத்துக்கொண்டிருக்கும் காலகட்டத்தில், உன்னுடைய துயரங்கள் யாவையும் தீர்த்து உன்னை என்னுடைய பிள்ளையாக எடுத்து, உன் துயரங்கள் யாவையும் என்னால் நீ மாற்றல் செய்து, என்னுடைய சிறப்பையும், ஈகையையும் உனக்குத் தந்து, உன்னைப் பொன்னரசுபுரிந்து புவியாள வைப்பேன் என்றார். . . தொடரும்... அய்யா உண்டு.

#அய்யா வைகுண்டர் #Ayya Vaikundar #அய்யா வைகுண்டர் {1008} #💚Ayya 💗 Vaikundar💚 #🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 07.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== மாது புவியில் வளரப் பிறந்தபின்பு தாது கரமணிந்த சங்கு சரத்தாமன் தேவன் தனைப்பார்த்துச் செப்புவா ரெம்பெருமாள் பூவுலகி லுன்றனுட பெண்பிறக்கப் போனதல்லோ ஏதுநீ தேவா இனியுனது செய்தியென்ன சீரொத்தத் தேவன் திருப்பாட்டு ஓதலுற்றான் . விளக்கம் ========= பரதேவதை பூலோகத்தில் பிறந்த பின்பு, பூவிதழ் போன்ற தம் கரத்தில் சங்கு சக்கராயுதங்களை ஏந்திக்கொண்டிருக்கும் மகாவிஷ்ணு, சம்பூரணத்தேவனைப் பார்த்து, சம்பூரணா, நீ விரும்புகின்ற பரதேவதை பூலோகத்தில் பிறக்கப்போய்விட்டாள். இனியாவது நீ பூலோகத்தில் பிறக்க இசைகிறாயா? அல்லது இன்னும் ஏதேனும் கோரிக்கை வைத்திருக்கிறாயா? என்று கேட்டார். உடனே சம்பூரணத் தேவன் சிவபெருமானையும், மகாவிஷ்ணுவையும் போற்றிப் புகழ்ந்து பாடி வணங்கலானான். . அகிலம் ======== விருத்தம் ========= ஆறுசெஞ்சடை சூடிய ஐயனே அலையிலேதுயி லாதி வராகவா நீறுமேனி நிரந்தரம் பூசிவா நீசிவாசிவ மைத்துன ராகவா வீறுசத்தி மணவாள ரானவா வீரலட்சுமி மன்னரரி ராகவா ஏறுமீதினி லேறிடு மீஸ்வரா எமையாட்கொள் ளும்நாரணா போற்றியே . விளக்கம் ========= தீபவதியையும், தீர்த்த நதியையும் சடையினில் சூடிய சங்கரா, அலைகடலைப் படுக்கையாகக் கொண்டு அறிதுயில் புரியும் மூலமுதற் பரவெளியே, . உடல் நிலையானதில்லை, இறுதியில் அது சாம்பல் என்பதை உணர்த்துகின்ற பூவுடலோனாகிய சிவபெருமானே, சிவா எனும் உமையோடு உதித்து சிவ மைத்துனராகிய மாயவா. . வேகமிகு உமயவளின் நாயகனாக சிவனே, வீரலட்சுமியின் மன்னராகிய மகாவிஷ்ணுவே, இராம அவதாரனே, காளை வாகனாதிபதியாகிய ஈஸ்வரா, எமை ஆட்கொள்ளும் நாராயணா, உங்களைப் போற்றித் துதிக்கிறேன். . . அகிலம் ======== விருத்தம் ========= சீதமாங்குணச் செல்வனே போற்றி சிவசிவா சிவனே போற்றி நீதவா நட்பெய்துவா போற்றி நீசிவா சிவராகவா போற்றி மாதவா அரிகேசவா போற்றி வல்லனே அரிசெல்லனே போற்றி ஆதவா அரிநாரணா போற்றி அனாதியேயுன் றன்போற்றிப் போற்றியே . விளக்கம் ========= குளிர்ச்சியான தன்மைகளையுடைய ஐஸ்வரியமே, அம்மையும் அப்பனுமாகிய சிவபெருமானே, நீதியின் தலைவா, சினேகத்திற்கு இசைவோனே, நீயே சிவனும் விஷ்ணுவும் ஆகி நிற்கிறாய். உம்மை நான் போற்றித் துதிக்கிறேன். . குறோணியை வதைக்க வேண்டி ஆதியில் மாதவம்புரிந்த மாதவா, அரியதோர் வெற்றியாளனே, எல்லார்க்கும் வல்லவனே, ஆயவை அனைத்திற்கும் செல்வனே, கதிரவன் நின்றியங்கக் காரணமான நாராயணா, முதன் முதலே, முதலும் முடிவும் இல்லாதவரே, உம்மைப் போற்றித் துதிக்கிறேன். . . அகிலம் ======== விருத்தம் ======== அய்யனேதவம் யானிற்கும் போதிலே அந்திராணி மன்னனிந்திர னானவன் பொய்யின் மாய்கைநினை வதினாலவன் பொற்பக்கிரீடமீ துற்பனத் தாசையால் மெய்யின்ஞா னத்தவம் விட்டுவாடினேன் வித்தகாவுன் சித்த மிரங்கியே செய்யும் பாவவினை தவிர்த்தாண்டருள் சிவசிவா சிவசிவா சிவாபோற்றியே . விளக்கம் ========= எல்லை இல்லாது உயர்ந்தோனே, அடியேன் தவம் செய்து கொண்டிருக்கும் வேளையில் இந்திராணியின் கணவனாகிய தேவேந்திரனுடைய சங்கு சரத்தங்க நவரத்தினத் திருமுடியைக் கண்டதினால் போலியுகமாகிய கலியின் மாய்கை என்னுடைய நினைவினுள் புகுந்து விட்டது. எனவே தேவேந்திரனுடைய திருமுடியின் மீது ஆசைகொண்டது உண்மைதான். . அந்த அர்ப்ப ஆசையினால் இப்போது நான் செய்துகொண்டிருந்த உயர்கதி அடைவதற்கான தவத்தை தவற விட்டுவிட்டு வாடி வதங்குகிறேன். சகலவிதமான சம்பிரதாயங்களுக்கும் நாயகா, அடியேனுக்காகத் தாங்கள் திருவுள்ளம் கசிந்து யாம் செய்த பாவச் செயலைப் பெரிதெனக் கருதாமல் அதைவிலக்கி வைத்து ஆட்கொண்டருளுங்கள் என் அம்மையும் அப்பனுமாகிய சிவசிவா உங்களைப் போற்றித் துதிக்கிறேன் என்று சிவபெருமானையும், மகாவிஷ்ணுவையும் சம்பூரணத் தேவன் சாஸ்டாங்கமாக விழுந்து வணங்கினான். . . தொடரும்... அய்யா உண்டு.

#🚩அய்யா வைகுண்டர் 🚩 #💚Ayya 💗 Vaikundar💚 #அய்யா வைகுண்டர் {1008} #அய்யா வைகுண்டர் #Ayya Vaikundar கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 06.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== இப்படியே கன்னி ஏற்றபர தேவதையும் அப்படியே ஆசிரிய விருத்தமொன்று பாடிடவே கேட்டு அரிநாரணரும் கிளிமொழியைத் தான்பார்த்து மெட்டுக் கொடியிடையே மின்னிடையே நீகேளு உன்புருஷ னங்கே உற்றஎம லோகமதில் இன்புருகி வாடி ஏங்கித் தவிப்பதினால் அவனைநீ மறந்து ஆனதெய்வப் பூரணனை இவனை மிகத்தாவி இருந்த தவமதிலும் நிறைவேற மாட்டாமல் நினைத்தகே டித்தனையால் பிறபோநீ பூமிதனில் பெரியசான் றோர்வழியில் எமவழியி லோர்பிறவி என்மகவா யங்கிருக்க அமைப்பா னதற்கு அவ்வழிதா னாயிழையே இந்தத் தவக்குறைக்கு இன்னமங்கே நீபிறந்து முந்தப் புருஷனுக்கு முன்வேலையுங் கழித்து அழுந்தத் துயரப்பட்டு அவனூழியங்கள் செய்து குளிர்ந்த மொழியற்றுக் கூடுஞ் சரசமற்று எந்நேர முன்றனக்கு ஏக்கமுட னழுந்தி மின்னேகே ளிந்த மிகத்தேவ னுன்வழியில் கொண்டபச்சத் தாலே கோதைய ரேயுனையும் கண்டிச்சை கூர்ந்து கர்மக் கடுவினையால் கருவா லுருவைக் கைக்குள் வசமாக்கிப் பருவா பருவமதில் பாவையேநீ யிவனோடு இருவ ரொருவரென இச்சைமிகக் கூர்ந்து குருவை மறந்து கொண்டவனைத் தான்மறந்து தாய்தகப்பன் மாமன் தமையன் தனைமறந்து வாயிற் படிமறந்து வாழ்வை மிகமறந்து சொந்த மனைமறந்து சுகசோபன மறந்து சந்தோச மற்று சகலோர்க்கும் நாணமுற்று முற்புரு ஷன்தனக்கு மூலக்கருக் கேடணைத்து இப்புருஷன் தானெனவே எவ்வுலகுந் தானறியக் கட்டிய மங்கிலியம் காசினியோர் தாமறியக் கெட்டினாற் போலே கீர்த்தி மிகப்பிறந்து மேலும்பல தொந்தரவு மிகுநாள் வழிதோறும் கேலி மிகவாகிக் கிலேச மிகவடைந்து உதிர வெளியாகி உட்செருமல் விக்கலுமாய்த் தீனறா மந்தச் செடியேற்பச் செய்கையினால் வீட்டை விரித்து மேலேதெய்வ வழியாய் நாட்டை யரசாண்டு நாச்சியார் போலிருப்பாய் என்று சிவனாரும் எம்பெருமாளு முரைத்து அன்று ஏமச்சண்டன் அவ்வழியி லேயமைத்தார் அமைக்க அணங்கும் அவனிதனி லேபிறக்க எமக்குலத்தில் வந்து இயல்பாய்ப் பிறந்தனளாம் . விளக்கம் ========= எங்கள் பிழையைப் பொறுத்து அருள்வது உம் செயல்தான் என்று சிவபெருமானும், மகாவிஷ்ணுவும் மனம் மகிழ்ந்து இரங்கும் படியாக சம்பூரணதேவனும், பரதேவதையும் அருமையான விருத்தம் ஒன்று பாடினார்கள். . அதைக் கேட்ட மகாவிஷ்ணு, கிளிபோன்று மொழி பேசும் பரதேவதையைப் பார்த்து மெட்டுக் கொடி இடையே மின்னிடையே நான் சொல்லுவதைக் கவனமாகக் கேட்டுக்கொள். உன்னுடைய கணவன் எமலோகத்தில் உன் நினைவாகவே ஏங்கித் தவித்துக் கொண்டேயிருக்கிறான். . நீயோ, அவனை மறந்துவிட்டு, தெய்வலோகத்தானாகிய சம்பூரணத்தேவனை விரும்பி, இருவருமாய் இணக்கமுற்று எப்போதும் வாழவேண்டும் என்ற நோக்கத்தோடு இந்தத் தவத்தை மேற்கொண்டீர்கள். அந்தத் தவமும் உங்களுடைய எண்ணத்தால் ஈடேறாமல் போய்விட்டது. . எனவே, பூலோகத்தில் என் மகவாகப் பெற்றுப் பெருகி இருக்கின்ற சான்றோர் இனத்தில், எமலோகத்தாரின் வாரிசாக நீ பிறக்கவேண்டும். அதுதான் உனக்கு அமைத்த அமைப்பாகும். . இந்தத் தவத்தில் நீங்கள் இருவரும் மனதால் செய்த பிழைக்காக, நீ பூலோகத்தில் மானிடப் பெண்ணாகப் பிறந்தாலும் அங்கேயும் உன்னுடைய எமலோகக் கணவனும் பிறப்பான். அவனை நீ திருமணம் செய்து எமலோகத்தில் அவனுக்கு நீ செய்யாமல் விட்ட அத்தனை கடமைகளையும் செய்து, வருந்தித் துயரமுற்று அந்தக் கணவனுக்கு முறைப்படி செய்ய வேண்டிய தொண்டுகள் யாவையும் செய்தும் இனிமையான பேச்சோ, தாம்பத்திய நளினமோ இல்லாமல், எப்பொழுதுமே நீ ஏக்கத்தோடு வருத்தமுற்று இருக்கும் காலத்தில, இந்த சம்பூரணத்தேவன் எமலோகத்தில் உன்மேல் நட்புற்றதால் பூலோகத்தில் பிறந்து, முன் ஜென்ம வாசனையால் உன்னைக் கண்டு உன்மீது இச்சைகொண்டு, விதிப்பயனால் ஒருவரோடொருவர் உற்ற நட்பு கொண்டு, அவனுடைய இளமைப் பருவத்தில் இருவரும் ஒருவரெனக் கருத்தொருமித்திருப்பீர்கள். . அதனால் நீ உணவை மறந்து, கணவன், தாய், தந்தை, மாமன், அண்ணன், ஆகிய அனைத்து உறவுகளையும், வாழ்க்கை முறைகளையும், வாழ்வையுமே மறந்து, சொந்த வீட்டையும், சுகசோபனங்களையும் மறந்து, சந்தோசம் என்பதே இல்லாமல், எல்லாரைக் கண்டும் வெட்கப்படும் நிலையில் உன்னுடைய கணவனுக்கு முற்பிறப்பில் செய்த துரோகத்திற்கான தண்டனைகளையும் சேர்த்து அனுபவிப்பாய். . பிறகு அக்கம் பக்கத்தார் யாவரும் அறியும்படியாகச் சம்பூரணத்தேவனையே கணவனாக நினைத்துக்கொண்டிருப்பாய். அப்போதும் உன் கணவன் கட்டிய மாங்கல்யம் உலகறிய உன்னுடைய கழுத்தில்தான் இருக்கும். அந்தத் தருணத்தில் எனக்குப் பலவிதமான உபத்திரவங்கள் உண்டாகும். அதை நாள்வழியே பலர் கேலி செய்வர். அதனால் உனக்குப் பெரிய உனக்குப் பெரிய கவலையுண்டாகும். அந்தக் கவலையினால் மேலும் பல துன்பங்களை நாள்தோறும் அனுபவிப்பாய். அதனால் உனக்கு இரத்தப்போக்கு என்னும் பெரும்பாடு நோய் உண்டாகும். நாளடைவில் அதனால் சயரோகம் உண்டாகும். ஓயாமல் புரையேற்றமும் விக்கலும் ஏற்பட்டு தீராத நோயாளியாகவே இருப்பாய். இவை யாவும் உன் கணவனுக்கு நீ செய்த பாவத்திற்கான சம்பளமேயாகும். . இத்தனை சோதனையும் நீ அனுபவிப்பதின் மூலம் உனக்கு இறை நாட்டம் ஏற்படும். அதனால் உன்னுடைய சிந்தனை விரிவடையும், அப்போது நீ மகாலட்சுமியைப் போன்ற மகிமையினை அடைவாய் என்று சிவபெருமானும், மகாவிஷ்ணுவும் பரதேவதையிடம் சொல்லி, அப்பொழுதே பரதேவதையை எமகுலத்தார் வழியில் பிறவி செய்தனர். அதன்படி பரதேவதை எமகுலத்தில் வந்து இயல்பாகப் பிறந்தாள். . . தொடரும்... அய்யா உண்டு.

#Ayya Vaikundar #அய்யா வைகுண்டர் #அய்யா வைகுண்டர் {1008} #💚Ayya 💗 Vaikundar💚 #🚩அய்யா வைகுண்டர் 🚩 கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 05.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== தேவ னதைக்கேட்டுச் சிந்தை மிகக்கலங்கி ஆவி மறுகி அவனேது சொல்லலுற்றான் காரணரே நாங்கள் கருத்தில் நினைத்ததெல்லாம் பூரணமா யங்கே புகுந்துதோ யென்சிவனே ஐயோநான் சொன்னேனென் ஆயிழையோ டல்லாது கையோ கண்ணாலே காணேனே மற்றொருவர் ஊமை மொழிபோல் ஒதுக்கி லுரைத்தாற்போல் நாமறியப் பெண்ணறிவாள் நாடறியா தென்றிருந்தோம் இவர்க ளறிவதற்கு யார்சொல்லிப் போட்டாரோ எவர்களும் நாம்பேசுகையில் இங்குவரக் காணோமே ஆர்சொல்லிப் போட்டாரோ அறியோமே யென்சிவனே தார்சிறந்த என்சிவனே சர்வ தயாபரனே பூரணனே வாசவனே பொறுத்தினிக் கொள்ளுமையா நாரணரே என்சிவனே நாடிப் பொறுவுமையா என்றுசொல்லித் தேவன் ஏற்ற விருத்தமதாய் நன்றினிய முப்பொருள்மேல் நற்போற்ற லேபடிக்கப் பரதே வதையான பைங்கிளியு மப்போது திரமான தாயார் சிவசக்தி பேரதிலும் சிவநாமப் பேரதிலும் ஸ்ரீகிருஷ்ணர் பேரதிலும் விவமான ஆசிரிய விருத்தம்போல் போற்றலுற்றாள் . விளக்கம் ========= சிவபெருமானின் அந்த வார்த்தைகளால் சம்பூரணத் தேவனின் சிந்தை கலங்கி, மனம் குழம்பிய நிலையில் சொல்லுகிறான். உலக இயக்கத்திற்கு உற்ற காரண கர்த்தாவே, நாங்கள் மனதில் நினைத்தவைகளும், எங்களுக்குள் பேசிக்கொண்டதும் பூரணமாக உங்கள் உள்ளத்தில் புகுந்து கொண்டதோ? . அய்யகோ, நான் என்னுடைய ஆசையை என் பெண்ணாளிடம் மட்டுமேதான் சொன்னேன். நான் அவளிடம் அப்படிப் பேசும்போது இங்கே யாருமே இல்லையே... ஒரு ஓரமாக இருந்த நாங்கள் மௌனமாகப் பேசியது எனக்கும் அந்தப் பெண்ணுக்கும்தான் தெரியம். உலகத்திற்குத் தெரியாது என்று நினைத்தேனே. . ஈசனும், விஷ்ணுவும் அறிந்துள்ளனரே, இவர்களுக்கு இதை யார் சொல்லியருப்பார்கள்? நாங்கள் பேசும் போது யாருமே இங்கு வந்ததாகத் தெரியவில்லையே... அப்படியிருக்க இவர்களுக்கு யார்தான் இச்செய்தியைச் சொல்லியிருக்கக் கூடும்? என்றெல்லாம் தன்மனதிற்குள்ளே வினா எழுப்பியும் விடைகாண முடியாத சம்பூரணத் தேவன் மீண்டும் அவர்களின் பாதம் பணிந்து தார்மீகச் சிறப்புடைய சிவபெருமானே, எல்லாருக்கும் இரங்குகின்ற இறையோனே, எல்லாம் முழுமையாக நிறைந்தோனே, இந்திரனுமானோனே, எம்பிழை பொறுத்து அருளுமையா. நாராயணப்பொருளே, எமையாளும் சிவமே, மன்னித்து அருளுமையா என்று சம்பூரணத்தேவன் உணர்வு்ப் பூர்வமாக மன்றாடினான். அப்போது பரதேவதையாகிய பெண்மணியும் சம்பூரணத்தேவனுடன் இணைந்து அம்மை உமையவள், சிவபெருமான், மகாவிஷ்ணு ஆகியோரைப் போற்றிப் புகழ்ந்து விருத்தம் பாடலாயினர். . . அகிலம் ======== காரணா அரிநாரணா கவிபூரணா வெகுதோரணா கவிஞோர் தொழும் வாரணா கருணகரத் தருணாவெகு தருணா கவிவருணா கவிமால் சிவாபோற்றி காயாம்பூவின் மேனிநிறமாயா சிவசிவாயா கருவா யுருவுருவா யுனைத் தினமே யருள் நியாயா குறிமத்தகா கருணாகரா போற்றி . விளக்கம் ========= பிரபஞ்ச இயக்கங்களுக்கெல்லாம் மூல கர்த்தனாகிய அரிநாராயணரே, கதை, கவி, கவிதை ஆகியவற்றிற்கெல்லாம் முதன்மையும், முழுமையும் ஆனவரே, எல்லாவற்றிற்கும் தோற்றுவாயாக இருப்பவரே, கவிஞர்களெல்லாம் வணங்குகின்ற கடலே, . கருணை அருளும் கரத்தோனே, இளமைக்கெல்லாம் இளமை ஆனவனே, கவிக்கடலே, கவிகளுக்குக் கருவான சிவபெருமானே, உம்மை வணங்குகின்றோம். மழை மேகத்தைப் போன்ற நிறமுடைய சிவடிபருமானே, உம்மையே மூலப்பொருளாகக் கொண்டு உருவேற்றித் தவம் செய்யும் எமக்கு எப்பொழுதும் உம் நினைவு மாறாத நிறைவினைத் தந்தருளுங்கள் மேன்மைமிகு கருணைக் கரத்தோனே, வணங்குகிறேன். . . அகிலம் ======== குணசீரா வெகுதீரா நலிவீரா புவிநாதா திருவோடுறு மார்பா சிறியார்மிக அறியாச்செய்த வெறியானதைச் சிறிதாக்கியே சேர்ப்பாய் முகம்பார்ப்பாய் முடிவானதை யறியாமலே மோகமாய் வெகுதாகமாய் உளறித் தவங்குளறியே உன்சொற்பதம் அஞ்சல்லென ஒஞ்சிப்பத மஞ்சினோம் உன் செயல்தந் தருள்வாயே . விளக்கம் ========= பண்பில் சிறந்தவரே, வலுவில் உயர்ந்த நல்வீரனே, லோக நாயகா, செல்வநாயகியான லட்சுமிதேவியை நெஞ்சில் நிறைத்து வைத்திருக்கும் மாயவா, சிறியவர்களாகிய நாங்கள் அறிவில்லாமல் செய்த வெறித்தனமானதைச் சிறிதாக நினைத்து எங்களுக்காக எங்கள் மீது கருணைகொண்டு எங்களுடைய வேண்டுகோளை நிறைவேற்றித் தாருங்கள். . இப்படி ஒரு முடிவு வரும் என்பதை உணருகின்ற அறிவு இல்லாமல் தேவேந்திரனின் திருமுடி மீது மோகித்து மயங்கிப் பிதற்றிவிட்டோம். ஆகவேதான் எங்களுடைய தவத்தில் குழப்பம் ஏற்பட்டுவிட்டது. . தங்களுடைய உத்தரவில்தான் எங்களுடைய எதிர்கால இன்பம் அடங்கியுள்ளது. எங்களுடைய தோல்வியை நினைத்து வெட்கப்படுவதோடு, அஞ்சிச் சரணடைகின்றோம். எங்களுக்கு நல்லருள்புரிவதெல்லாம் உம் செயலே என்றாள். . . தொடரும்... அய்யா உண்டு.

#🚩அய்யா வைகுண்டர் 🚩 #💚Ayya 💗 Vaikundar💚 #அய்யா வைகுண்டர் {1008} #Ayya Vaikundar #அய்யா வைகுண்டர் அய்யா வைகுண்டரின் 194ஆம் ஆண்டு அவதார தின நல்வாழ்த்துகள் 💐* . கர்த்தாதி கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை எட்டாம் நாள் வாசிப்பு தொடர்ச்சி - நாள் 04.03.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== அந்தப் பொழுதில் ஆதி சிவமுதலும் வந்தங்கு நின்றார் மாகிருஷ்ண மாலவரும் கண்டந்தத் தேவன் கைமறந்த நிஷ்டையோடு தண்டமிழ்சேர் பதத்தைத் தையலும்வந் தேவணங்கி இத்தனைநாள் யாங்கள் நின்றதவம் கண்டிரங்கிச் சித்த மிரங்கிச் சிவனேநீர் வந்தீரோ எந்தன் பெருமானே இறையவரே வந்தீரோ நந்தகோ பால நாரணரே வந்தீரோ குருவே அரிநாதா கோபாலா வந்தீரோ முருகக் குருபரனே முத்தாநீர் வந்தீரோ செல்வக் கடலே சீமானே வந்தீரோ கல்விக் கடலான கறைக்கண்டா வந்தீரோ அரவணிந் தத்திவுரித்(து) அணிந்தோரே வந்தீரோ பரமசிவ மான பச்சைமால் வந்தீரோ இப்படியே மானாளும் ஏற்றசம் பூரணனும் அப்படியே வந்தோர் அடிபணிந்து போற்றிடவே . விளக்கம் ========= அப்போது சிவபெருமானும், மகாவிஷ்ணுவும் அவர்கள் முன்னால் வந்து சேர்ந்தார்கள். அவர்களைக் கண்ட சம்பூரணத் தேவனும், பரதேவதையும் தாம் தவம் இருக்கிறோம் என்பதையே மறந்து, அவர்களின் பொற்பாத கமலங்களை வணங்கியவாறு, இத்தனை நாட்களாக நாங்கள் செய்த தவத்திற்கு இரங்கி இங்கே வருகை தந்தீர்களோ? சிவபெருமானே, எம்பெருமானே, இறைவா, நந்தகோபாலா, நாராயணரே, குருவே, அரிநாதா, கோபாலா, முருகக் குருபரனே, மோட்சத்தின் நாயகனே, செல்வக் கடலே, சீமானே, கல்விக் கடலே, கரைக்கண்டா, அரவத்தை ஆபரணமாக அணிந்தோனே, யானைத் தோலை உரித்து உடையாகப் போர்த்தியோனே, ஈசனும் விஷ்ணுவுமான ஏகனே எங்களுக்காக மனமிரங்கி வந்தீர்களோ என்று அடிபணிந்து போற்றினர். . . அகிலம் ======= மாய பரனும் மனமகிழ்ந்து கொண்டாடி ஆயனைப் பார்த்து அருளுவா ராதியுமே மாயவரே கேட்டீரோ வாய்த்தஇத் தேவனுந்தான் தூயவரே நின்றதவம் துலைத்தறுத்தா னில்லையிவன் முற்றுந் தவமும் முழுதும்நிறை வேறுகையில் சிற்றின்ப மாகித் திருமுடிமே லிச்சைகொண்டு வாடி யயர்ந்தான் மங்கையருந் தேவனுமே நாடி யிவன்தனக்கு நல்வளமை யேதுசொல்வீர் அப்போது நாரணரும் அகமகிழ்ந்து கொண்டாடிச் செப்புகிறா ரந்தச் சிவனோடு எம்பெருமாள் ஏது விதமாய் இருந்ததவ மேகுறைய தீதுவந்த ஞாயம் செப்பிடீ ரென்றுரைத்தார் அப்போ சிவனார் அகமகிழ்ந்து தேவனோடு இப்போ துன்சிந்தை எண்ணமெல்லாஞ் சொல்லுவென்றார் . விளக்கம் ========= சம்பூரணத் தேவனும், பரதேவதையும் அடிபணிந்து வணங்குவதைப் பார்த்து, மகாவிஷ்ணுவும், சிவபெருமானும் மனமகிழ்ச்சி அடைந்தவாறு ஒருவரை ஒருவர் உற்று நோக்கினர். அப்போது சிவபெருமான் மகாவிஷ்ணுவைப் பார்த்து, மாயவரே, இந்தச் சம்பூரணத்தேவன் மேற்கொண்ட தவத்தை முழுமையாக முடிக்கவில்லை. தவம் முழுமையாக நிறைவேறப்போகும் நேரத்தில் லௌகீக வேட்கையினால் தேவேந்திரனின் திருமுடிமேல் ஆசைப்பட்டுத் தவநிலை இழந்து, இருவரும் தவித்துக் கொண்டிருக்கின்றனர். இந்நிலையில் இவர்களுக்கு நீங்கள் என்ன உபாயத்தைச் சொல்லப் போகிறீர்கள் என்று மகாவிஷ்ணுவிடம் கேட்டார். . அதனால் அகமகிழ்ந்த மகாவிஷ்ணு, சிவபெருமானைப் பார்த்து ஈசுரரே, இவர்கள் இருவரின் தவமும் நிறைவேறாமல் போவதற்கு என்ன காரணம்? ஏதுவிதமான இடையூறு ஏற்பட்டது. தீது வந்த காரணத்தை என்னிடத்தில் சொல்லுங்கள் என்று கேட்டார். ஆகவே சிவபெருமான், சம்பூரணத் தேவனைப் பார்த்து, தேவா, இப்போது உன்னுடைய மனதில் நீ என்னவெல்லாம் நினைத்தாயோ அவற்றை அப்படியே சொல்லு என்றார். . . தொடரும்... அய்யா உண்டு.