രുദ്രദൃഷ്ടി: ഭാഗം 5 രുദ്രാവതിയുടെ ദേഹത്തുനിന്നും പുറപ്പെട്ട നീലജ്വാലകൾക്ക് മരണത്തിന്റെ ഗന്ധമായിരുന്നു. രക്തരക്ഷസ്സിന്റെ മന്ത്രശക്തിയാൽ അവളുടെ ഉള്ളിലെ 'ഹാലാഹല' അംശം ഉണർന്നതോടെ, പ്രപഞ്ചം മുമ്പെങ്ങും കണ്ടിട്ടില്ലാത്ത ഒരു വിനാശത്തിന് സാക്ഷ്യം വഹിച്ചു….. ദേവലോകത്തെ സ്വർണ്ണ ഗോപുരങ്ങൾ ഉരുകി ഒലിക്കാൻ തുടങ്ങി. ആ നീല വിഷപ്പുക തട്ടിയ ഇടങ്ങളിലെല്ലാം ജീവൻ കരിഞ്ഞുപോയി. ഭൂമിയിൽ, ഗംഗാനദിയിലെ ജലം കറുത്ത നിറമായി മാറി തിളച്ചു മറിഞ്ഞു. ആകാശം ചുവപ്പിൽ നിന്ന് മാറി ഭീകരമായ നീലനിറമായി. പക്ഷികൾ ആകാശത്തുനിന്ന് കരിഞ്ഞു വീണു. സമുദ്രങ്ങൾ അതിരുകൾ ലംഘിച്ച് കരയിലേക്ക് ഇരച്ചുകയറി….. "ഞാൻ... ഞാൻ എന്ത് പിഴച്ചു!" രുദ്രാവതി വേദനകൊണ്ട് പിടഞ്ഞു. അവളിൽ നിന്ന് പുറപ്പെടുന്ന വിഷം നിയന്ത്രിക്കാൻ അവൾക്ക് കഴിയുന്നില്ലായിരുന്നു. അവളുടെ ഓരോ ശ്വാസവും പ്രപഞ്ചത്തിന് അന്ത്യശാസനമായി മാറി….. ഭൈരവി തന്റെ കപാലം ഉപയോഗിച്ച് ആ വിഷപ്പുകയെ തടയാൻ ശ്രമിച്ചെങ്കിലും അവളുടെ കൈകൾ കരിയാൻ തുടങ്ങി… "ഇന്ദ്രജിത്ത്! ഇത് സാധാരണ അസുരശക്തിയല്ല. ഇത് മഹാദേവൻ പണ്ട് കുടിച്ച അതേ വിഷമാണ്. ഇതിനെ തടയാൻ കഴിഞ്ഞില്ലെങ്കിൽ ഭൂമിയും സ്വർഗ്ഗവും ഇല്ലാതാകും!"... ഇന്ദ്രജിത്ത് തന്റെ കാലഭൈരവ ദൃഷ്ടിയിലൂടെ നോക്കി. കാലനേമിയും രക്തരക്ഷസ്സും ആ വിഷത്തിന്റെ പ്രഭയിൽ നിന്ന് രക്ഷപ്പെടാൻ മാന്ത്രിക കവചങ്ങൾ തീർത്ത് ദൂരെ മാറി നിൽക്കുകയാണ്….. അവർക്ക് വേണ്ടത് പ്രപഞ്ചം നശിച്ചാലും രുദ്രാവതിയുടെ ആത്മാവ് മാത്രമാണ്. വിഷം ഭൂമിയിൽ പടർന്നതോടെ ശ്മശാനങ്ങളിലെ ആത്മാക്കൾ കൂട്ടത്തോടെ ഉണർന്നു. അവ ശാന്തി കിട്ടാതെ ആകാശത്തേക്ക് ഉയർന്നു…. വാരണാസി നഗരത്തിൽ ജീവിച്ചിരിക്കുന്നവർ ശ്വാസം കിട്ടാതെ പിടയുന്നത് ഇന്ദ്രജിത്ത് തന്റെ ദിവ്യദൃഷ്ടിയിലൂടെ കണ്ടു. തന്റെ പ്രണയിനിയുടെ ശരീരത്തിൽ നിന്ന് വരുന്ന വിഷം തന്റെ നാടിനെ നശിപ്പിക്കുന്നത് അവന് സഹിക്കാനായില്ല…. "രുദ്രാവതീ..." ഇന്ദ്രജിത്ത് അവളുടെ അടുത്തേക്ക് ഓടിച്ചെന്നു…. "വന്നടുക്കരുത് ഇന്ദ്രജിത്ത്! നീയും ഇല്ലാതാകും!" അവൾ നിലവിളിച്ചു. തന്റെ പ്രണയിനിയെയും പ്രപഞ്ചത്തെയും രക്ഷിക്കാൻ ഒരേയൊരു വഴിയേയുള്ളൂ എന്ന് ഇന്ദ്രജിത്ത് തിരിച്ചറിഞ്ഞു. മഹാദേവൻ ചെയ്തതുപോലെ ആ വിഷം ആരെങ്കിലും ഏറ്റുവാങ്ങണം. പക്ഷേ ഒരു സാധാരണ മനുഷ്യനോ ദേവനോ അതിന് കഴിയില്ല. കാലഭൈരവന്റെ പൂർണ്ണ ശക്തിയുള്ള ഒരാൾക്ക് മാത്രമേ അതിന് സാധിക്കൂ…. ഇന്ദ്രജിത്ത് തന്റെ ശൂലം നിലത്ത് കുത്തി. അവൻ തന്റെ ഇടതുകണ്ണിലെ ജ്വാലയെ ഹൃദയത്തിലേക്ക് ആവാഹിച്ചു… "മഹാദേവാ... കാലഭൈരവാ... നീ എനിക്ക് തന്ന ഈ ശക്തി നിനക്ക് തന്നെ സമർപ്പിക്കുന്നു. ഈ വിഷം ഞാൻ ഏറ്റെടുക്കുന്നു!".... ഇന്ദ്രജിത്ത് രുദ്രാവതിയെ ആലിംഗനം ചെയ്തു. അവളുടെ ശരീരത്തിൽ നിന്ന് പുറപ്പെടുന്ന നീല വിഷപ്പുക ഇന്ദ്രജിത്തിന്റെ ശരീരത്തിലേക്ക് പ്രവേശിക്കാൻ തുടങ്ങി. അവന്റെ കറുത്ത ചർമ്മം നീലയായി മാറി. അവന്റെ സിരകൾ വീർത്ത് പൊട്ടാൻ തുടങ്ങി. അസഹനീയമായ വേദനയിൽ അവൻ അലറി. അവന്റെ അലർച്ചയിൽ ദേവലോകം കുലുങ്ങി….. ഇന്ദ്രജിത്ത് വിഷം സ്വീകരിച്ച് തളരുന്നത് കണ്ട രക്തരക്ഷസ്സ് ചിരിച്ചു. "ഇതാണ് സമയം! വിഷം സ്വീകരിച്ച ഇന്ദ്രജിത്ത് ഇപ്പോൾ ദുർബലനാണ്. അവനെ കൊന്ന് ആ വിഷം കലർന്ന രക്തം എനിക്ക് വേണം. അത് കുടിച്ചാൽ ഞാൻ പ്രപഞ്ചത്തേക്കാൾ വലിയവനാകും!"... രക്തരക്ഷസ്സും കാലനേമിയും ഒരേസമയം ഇന്ദ്രജിത്തിന് നേരെ തങ്ങളുടെ മാരകായുധങ്ങൾ എറിഞ്ഞു. തുടരും…. ✍️സന്തോഷ്‌ ശശി…. #കഥ,ത്രില്ലെർ,ഹൊറർ #✍ തുടർക്കഥ #📔 കഥ #💞 പ്രണയകഥകൾ #📙 നോവൽ