ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6zbxAD6?d=n&ui=v64j8rk&e1=c💞ദേവനന്ദിനി... Part 64💞 "ദേവേട്ടാ…നമ്മളിനി എവിടെയെങ്കിലും നിർത്തുന്നുണ്ടോ.. എന്താ ദേവേട്ടന്റെ പ്ലാൻ"…? പിൻഡ്വാര കഴിഞ്ഞു കുറെ ദൂരം മുന്നോട്ട് പോയപ്പോൾ ഗൗരി രുദ്രനോട് ചോദിച്ചു… "ഞാനിനി നിർത്താൻ ഉദ്ദേശിക്കുന്നത് പാലിയിൽ ആണ്. അപ്പോഴേക്കും നമ്മൾ നമുക്ക് പോകാനുള്ള പകുതിയോളം ദൂരം പിന്നിട്ട് കഴിയും"…രുദ്രൻ മറുപടി നൽകി… "പാലി"…! "അത് ചരിത്രപ്രാധാന്യമുള്ള സ്ഥലമാണോ"…? ഗൗരി ആദ്യമായി അങ്ങനൊരു സ്ഥലത്തിന്റെ പേര് കേട്ടതിന്റെ അതിശയത്തിൽ ചോദിച്ചു… "ചരിത്രപ്രാധാന്യമുള്ള സ്ഥലമാണോന്ന് ചോദിച്ചാൽ കൂടുതലൊന്നും എനിക്കുമറിയില്ല പക്ഷേ ഒരുപാട് യുദ്ധങ്ങൾക് സാക്ഷ്യം വഹിച്ചിട്ടുണ്ട് ഇന്നത്തെ പാലി ജില്ലയുടെ ഭാഗങ്ങളായ പല പ്രദേശങ്ങളും. ചാലുക്യരുടെയും കുശാനന്മാരുടെയുമൊക്കെ കാലം തൊട്ടേ ഒരു കച്ചവട കേന്ദ്രമാണ് പാലി. രാജസ്ഥാൻ സംസ്ഥാനത്തിലെ ഒരു ഇൻഡസ്ട്രിയൽ സിറ്റി കൂടിയാണിത്. തുണി വ്യവസായത്തിന് പ്രശസ്തമാണ് പാലി…അങ്ങനെയൊക്കെ കുറച്ചു കാര്യങ്ങൾ മാത്രമേ എനിക്കറിയൂ…" "ഈ റൂട്ടിലൂടെ തിരിച്ചു പോകുമ്പോൾ ആ സിറ്റിയിൽ ഞാൻ കുറച്ചു നേരം വിശ്രമിക്കുമെന്നല്ലാതെ കൂടുതൽ പ്രാധാന്യം കൊടുത്തിട്ടില്ല. ഈ റൂട്ടിലൂടെ പോകുമ്പോൾ എത്രയും പെട്ടെന്ന് ബേബേയുടെയും പാജിയുടെയും അടുത്തെത്തുക എന്നുള്ളതാണ് എന്റെ പ്രധാന ലക്ഷ്യം. ആദ്യമായിട്ടാണ് ഞാനീ റൂട്ടിലൂടെ അജ്മീറിലോട്ട് പോകുന്നത് "…രുദ്രൻ തനിക്കറിയാവുന്ന കാര്യങ്ങൾ പറഞ്ഞു നിർത്തി… "ദേവേട്ടനിപ്പോൾ പറഞ്ഞില്ലേ ഈ പാലി എന്ന സ്ഥലം ഒരുപാട് യുദ്ധങ്ങൾക്ക് സാക്ഷ്യം വഹിച്ചിട്ടുണ്ടെന്ന്…അതിൽ പ്രധാനപ്പെട്ട യുദ്ധങ്ങൾ വല്ലതുമുണ്ടോ"…? പാലിയെ കുറിച്ചുള്ള രുദ്രന്റെ വിവരണം കേട്ടപ്പോൾ ഗൗരിയ്ക്ക് കൂടുതലറിയാൻ ആകാംക്ഷയേറി… ഈ കള്ളിയങ്കാട്ടു നീലിയ്ക്ക് എവിടുന്നാണാവോ ഇതേയ്ക്ക് സംശയം.. ഒരു സംശയത്തിന് മറുപടി കൊടുത്ത് കഴിഞ്ഞാൽ പിന്നാലെ അടുത്ത സംശയം. ഇവൾ സംശയം സ്റ്റോക്ക് ചെയ്തു വച്ചേക്കുവാണോ….ഗൗരിയുടെ ഇടയ്ക്കിടെക്കുള്ള സംശയങ്ങളെ കുറിച്ചോർത്ത രുദ്രന്റെ ചുണ്ടിലൊരു ചിരിയൂറി…. മിററിലെ ഒരു വശത്തു കൂടെ രുദ്രൻ ചിരിക്കുന്നത് ഗൗരിയുടെ കണ്ണിൽപ്പെട്ടു…. രുദ്രൻ തന്നെ സംബന്ധിച്ചുള്ള എന്തോ ആലോചിച്ചു ചിരിക്കുകയാണെന്ന് ഗൗരിയ്ക്ക് മനസ്സിലായെങ്കിലും അവളത് അറിഞ്ഞ ഭാവം നടിച്ചില്ല… "ദേവേട്ടാ…അറിയുമെങ്കിൽ പറ"…ഗൗരി രുദ്രനെ നിർബന്ധിച്ചു… "പ്രധാനപ്പെട്ട യുദ്ധങ്ങളിലൊന്ന് മഹാറാണ പ്രതാപും അക്ബറും കൂടി നടന്നതാണ്. ഇന്നത്തെ പാലി ജില്ലയിലെ ഗോർവർ പ്രദേശത്ത് ഒരുപാട് തവണ അക്ബറിന്റെ മുഗൾ സൈന്യവും റാണ പ്രതാപിന്റെ രജപുത്ര സൈന്യവും തമ്മിലേറ്റ് മുട്ടിയിട്ടുണ്ട്. പിന്നെ പാലി മാർവാർ സാമ്രാജ്യത്തിന്റെ ഭാഗമായിരുന്നപ്പോൾ പാലിയിലെ ജയ്തരൻ പ്രവിശ്യയിൽ വച്ചു ഷേർഷാ സൂരിയും രജപുത്ര സൈന്യവും തമ്മിൽ നടന്ന സമ്മേൽ യുദ്ധം…അങ്ങനെ ഒരുപാട് യുദ്ധങ്ങൾക്ക് സാക്ഷിയായിട്ടുണ്ട് ആ പ്രദേശം"…. രുദ്രൻ ഗൗരിയ്ക്ക് വിവരിച്ചു കൊടുത്തു… രുദ്രൻ ബൈക്ക് അത്യാവശ്യം വേഗത്തിലായിരുന്നു ഓടിച്ചു കൊണ്ടിരുന്നത്. ദാബ നിന്ന കിവർലിയിൽ നിന്നും അജ്മീർ വരെ ഏകദേശം അഞ്ചര മണിക്കൂർ പോകാനുണ്ട്. ഇപ്പോൾ ഒരു മണിക്കൂറിനടുത്ത് സമയമായിരിക്കുന്നു. രുദ്രൻ നിർത്താൻ ഉദ്ദേശിക്കുന്ന പാലിയിലേക്ക് പിൻഡ്വാരയിൽ നിന്നും രണ്ട് മണിക്കൂറിൽ കൂടുതൽ പോകാനുണ്ട്. ഹൈവേയിൽ തിരക്ക് കുറച്ചു കുറഞ്ഞത് കൊണ്ട് പോകാൻ ഇപ്പോൾ അത്രയ്ക്ക് ബുദ്ധിമുട്ടില്ല. എന്നാലും ഹെവി കണ്ടെയ്നർ ട്രക്കുകൾ ഒരുപാട് ഓടുന്നുണ്ട് ഹൈവേയിലൂടെ… കാണാൻ അത്ര ഭംഗി തോന്നുന്നില്ലെങ്കിലും റോഡിന്റെ സൈഡിലെ ഭൂപ്രദേശവും ട്രക്കുകളെ ചേസ് ചെയ്തു രുദ്രൻ ബൈക്ക് ഓടിക്കുന്നതുമൊക്കെ ഗൗരി ആസ്വദിച്ചുകൊണ്ടിരുന്നു. കണ്ണെത്താത്ത അകലത്തിലെവിടെയോ മലനിരകൾ നിറഞ്ഞു നിൽക്കുന്നു… ആ മലനിരകൾ ആരവല്ലി മലനിരകളാവും…ഗൗരി മനസ്സിൽ ചിന്തിച്ചു… "ദേവേട്ടാ…രാജസ്ഥാൻ മുഴുവൻ മരുഭൂമി പോലെയുള്ള ഭൂപ്രകൃതിയാണോ"…? ഗൗരി രുദ്രനോട് ചോദിച്ചു.. "മിക്കവാറും അങ്ങനൊക്കെ തന്നെ. പടിഞ്ഞാറു ഭാഗത്തേക്ക്‌ പോകുന്തോറും മരുഭൂമി പോലെയുള്ള പ്രകൃതമാണ്. പിന്നെ ഇവിടുത്തെ മണ്ണിന്റെ നിറവും അത്തരത്തിലാണ്. പിന്നെ വെള്ളവും കുറവാണ് ഈ ഭാഗങ്ങളിൽ"…രുദ്രൻ ചിരിച്ചു കൊണ്ട് മറുപടി നൽകി… "അപ്പോൾ ഈ സംസ്ഥാനത്ത് കൃഷിയൊന്നുമില്ലേ"…? (ഗൗരി) "ഉണ്ട്…പിന്നെ ജലലഭ്യതയുടെ കുറവ് കാരണം പ്രധാനപ്പെട്ട നദികളിൽ നിന്നൊക്കെ കനാൽ വഴിയുള്ള ജലസേചനം വഴിയാണ് കൃഷി നടത്തുന്നത് "… (രുദ്രൻ) വീണ്ടും ഗൗരി പലതും ചോദിച്ചതിനൊക്കെ രുദ്രൻ മറുപടി കൊടുത്തു കൊണ്ടിരുന്നു… അപ്പോഴേക്കും ഒന്നര മണിക്കൂറോളം ദൂരമോടിക്കഴിഞ്ഞിരുന്നു…. "ദേവേട്ടാ…എവിടെയെങ്കിലും കുറച്ചു നേരം ഒന്ന് നിർത്തി ഒരു സ്നാക്ക്സ് ഒക്കെ കഴിച്ചു എത്തിയാൽ പോരെ ദേവേട്ടൻ പറഞ്ഞ പാലിയിലോട്ട് നമുക്ക് "…? ഗൗരി കുറച്ചു മടിയോടെ ചോദിച്ചു… "മുന്നോട്ട് പോയിക്കഴിയുമ്പോൾ ഏതെങ്കിലും പെട്രോൾ പമ്പ് ഉണ്ടെങ്കിൽ അവിടെ കയറി ഫ്രഷ് ആവാം. അതിനടുത്തോ കുറച്ചു വിട്ടിട്ടോ വല്ല സ്ട്രീറ്റ് ഫുഡും കിട്ടുന്ന സ്ഥലം നോക്കി എന്തെങ്കിലും ചെറുതായി അകത്താക്കാം.. പോരെ"… രുദ്രൻ ഒന്ന് മന്ദഹസിച്ചു കൊണ്ട് മറുപടി നൽകി… "അത് മതി… ദേവേട്ടന്റെ പ്ലാനിനു ഭംഗം വരരുത് എന്നെ എനിക്കുള്ളൂ"… ഗൗരി രുദ്രന്റെ ചുമലിലേക്ക് താടി വച്ചു കൊണ്ട് മൊഴിഞ്ഞു.. "നന്ദു… താൻ പ്ലാനിന്റെ കാര്യമൊന്നും നോക്കേണ്ട. ഈ യാത്ര തുടങ്ങുമ്പോൾ തന്നെ ഞാൻ പറഞ്ഞിട്ടുണ്ട് തനിക്ക് പ്രാഥമിക കാര്യങ്ങൾ എന്തെങ്കിലു ചെയ്യാനൊക്കെ ഉണ്ടാവുമ്പോൾ പറയണമെന്ന്. അതെന്തായാലും ഉണ്ടാവുമല്ലോ. ഞങ്ങൾ ആണുങ്ങൾക്ക് വണ്ടി ഏതെങ്കിലും തിരക്കില്ലാത്തയിടം നോക്കി നിർത്തിയേച്ചു സാധിക്കാം അതൊക്കെ നിങ്ങൾ സ്ത്രീകൾക്ക് അങ്ങനെയല്ലല്ലോ. അത് കൊണ്ട് എവിടെയെങ്കിലും നിരത്താൻ പറയാൻ എന്റെ നന്ദു മോൾ ഒരു കാരണവശാലും മടിക്കേണ്ട"…. രുദ്രന്റെ വാക്കുകളിൽ അവളോടുള്ള കരുതലും വാത്സല്യവുമൊക്കെ നിറഞ്ഞു നിന്നു… ഗൗരി പ്രണയപുരസരം അവനെയൊന്ന് കൂടി കെട്ടിപ്പിടിച്ചിരുന്നു… 🌸🌸🌸🌸🌸🌸🌸🌸🌸🌸🌸🌸🌸🌸🌸 കാൽ മണിക്കൂറോളം മുന്നിട്ടപ്പോൾ അരികിൽ കണ്ട പെട്രോൾ പമ്പിൽ കയറി രുദ്രനും ഗൗരിയുമൊന്നു ഫ്രഷായി. രുദ്രൻ വണ്ടിയുടെ ടയറിലെ എയർ കൂടെ ചെക്ക് ചെയ്തു… പെട്രോൾ പമ്പിൽ നിന്നും പുറത്തേക്കിറങ്ങി കുറച്ചു ദൂരം കൂടി മുന്നോട്ട് പോയപ്പോൾ വഴിയരികിൽ കണ്ട ടീ സ്നാക്ക്സ് ഷോപ്പ് കണ്ടപ്പോൾ രുദ്രൻ വണ്ടിയൊന്നൊതുക്കി… ഷീറ്റ് കൊണ്ട് ചായ്ച്ച് കെട്ടിയ ചെറിയൊരു ഷോപ്പ്.പുറത്തു ഒന്ന് രണ്ട് മേശയിട്ടിട്ടുണ്ട്. ഷോപ്പിന് മുമ്പിൽ അത്യാവശ്യം തിരക്കുണ്ട്. രുദ്രൻ ചായയുടെ കൂടെ കഴിക്കാൻ എന്തോ ഓർഡർ ചെയ്യുന്നത് ഗൗരി കേട്ടു. അതെന്താണെന്ന് അറിയാനുള്ള ആകാംക്ഷയിൽ അവളൊന്ന് ഏന്തി നോക്കി… ഒരു വട മുറിച്ചു കഷണങ്ങളാക്കി ഒന്ന് കൂടി ഫ്രൈ ചെയ്തു പ്ലേറ്റിലേക്ക് പകരുന്നത് അവൾ ശ്രദ്ധിച്ചു. ആ വട കണ്ടപ്പോൾ പരിപ്പ് വടയാണോയെന്ന് ഗൗരി സംശയിച്ചു… ഗൗരിയുടെ സംശയങ്ങൾ നീണ്ടു നിൽക്കുമ്പോഴേക്കും ഷോപ്പിലെ ഒരാൾ രണ്ട് പ്ളേറ്റിലാക്കി അവരിരുന്ന മേശയ്‌ക്കരികിലേക്ക് കൊണ്ടു വന്നു. പ്ളേറ്റ് മേശയിൽ വച്ചതിനു ശേഷം അയാൾ രണ്ട് മൺ ഗ്ലാസിൽ ചായയും കൊണ്ടു വന്നു… "ദേവേട്ടാ…ഇത് നമ്മുടെ നാട്ടിലെ പരിപ്പ് വടയാണോ"…? ആവി പറക്കുന്ന കഷണങ്ങളാക്കി ഫ്രൈ ചെയ്ത് വിളമ്പിയ വടകൾ കണ്ട് സംശയം തോന്നിയ ഗൗരി രുദ്രനോട് ചോദിച്ചു… "താൻ കഴിച്ചു നോക്ക്".. രുദ്രന്റെ മുഖത്തൊരു കള്ളച്ചിരി വിടർന്നു… "എന്താ ഇതിന്റെ പേര് "….? ഗൗരി പ്ളേറ്റിലേക്ക് നോക്കികൊണ്ട് ചോദിച്ചു.. "കൽമി വട"…. രുദ്രൻ മന്ദഹസിച്ചു കൊണ്ട് മറുപടി നൽകി.. ഗൗരിയുടനെ കൽമി വടയുടെ കഷണങ്ങളിൽ ഒന്നെടുത്ത് ചട്ട്ണിയിൽ മുക്കി കടിച്ചു നോക്കി.. "ദേവേട്ടാ… ഇത് നമ്മുടെ നാട്ടിലെ പരിപ്പ് വടയാണല്ലോ. ദുഷ്ടാ ഇത്രയും ഐറ്റംസ് ഇവിടെയുണ്ടായിട്ട് ഈ പരിപ്പ് വട മാത്രമേ കണ്ടുള്ളോ ഓർഡർ ചെയ്യാൻ"…ഗൗരിയുടെ വാക്കുകളിൽ അല്പം പരിഭവം നിറഞ്ഞു… "എടോ…താനാദ്യമതൊന്ന് മുഴുവൻ കഴിയ്ക്ക്…എന്നിട്ട് വ്യത്യാസം വലതുമുണ്ടോന്ന് പറ "… രുദ്രൻ ഗൗരിയോട് നിർദേശിച്ചു… രുദ്രന്റെ നിർദേശപ്പ്രകാരം ഗൗരി ഒന്ന് കൂടി ചട്ട്ണിയിൽ മുക്കി ചവച്ചു തിന്നാൻ തുടങ്ങി… നാട്ടിലെ പരിപ്പ് വട തന്നെ.. എന്നാൽ കടുകെണ്ണയിൽ പാകം ചെയ്തതിനാലും മധുരമുള്ള ചട്ട്ണിയും ചേരുമ്പോൾ വേറൊരു രുചി തോന്നുന്നു. എന്നാലും കുഴപ്പമില്ല. ടേസ്റ്റ് ഉണ്ട്… കൽമി വട കഴിച്ചിറക്കുമ്പോൾ ഗൗരി ചിന്തിച്ചു… "എങ്ങനെയുണ്ട്"…? രുദ്രൻ ചിരിച്ചു കൊണ്ട് ഗൗരിയോട് ചോദിച്ചു.. "നമ്മുടെ പരിപ്പ് വട തന്നെ…പിന്നെ എണ്ണ വേറെയായതിനാലും ഈ ചട്ട്ണിയും കൂടി ചേരുമ്പോൾ ഒരു പ്രത്യേകത തോന്നുന്നു"...ഗൗരി മറുപടി നൽകി… "നന്ദു… അതാണ് നമ്മൾ ശ്രദ്ധിക്കേണ്ടത്. ഒരേ ഐറ്റം ആണെങ്കിലും എണ്ണ മാറുമ്പോൾ അതിന്റെ രുചി മാറും. അതിലെ ആ രുചി ആസ്വദിക്കുകയാണ് നമ്മൾ ചെയ്യേണ്ടത്…." "ഉദാഹരണത്തിന് നമ്മുടെ നാട്ടിൽ തന്നെ തെക്കൻ കേരളത്തിലെയും വടക്കൻ കേരളത്തിലെയും സാമ്പാർ ഉണ്ടാക്കുന്ന രീതി രണ്ടല്ലേ. ആ സാമ്പാറിന് നമ്മുടെ നാട്ടിലെ രുചിയല്ലെന്നും പറഞ്ഞു പരിഹസിക്കുകയും കുറ്റം പറയുകയും ചെയ്യാതെ ആ രുചിയിലുള്ള വ്യത്യാസത്തെ ആസ്വദിക്കുവാൻ എന്ത് കൊണ്ട് ശ്രമിച്ചു കൂടാ. എന്നാൽ പലരും സ്വന്തം നാട്ടിലെ രുചി അല്ലെങ്കിൽ ആ രീതിയല്ലെന്നും പറഞ്ഞു അതിനെ പരിഹസിക്കുവാനും കുറ്റം പറയുവാനും തുടങ്ങും. ഓരോ നാട്ടിലും ഓരോ രുചിയായിരിക്കും അത് ആ രീതിയിൽ ആസ്വദിച്ചു കഴിക്കുക അത്ര മാത്രം. പക്ഷേ മലയാളികൾ ആക്കാര്യത്തിൽ വളരെ മോശമാണ്. കേരളത്തിലെ സമൂസ പോലെയല്ല മറ്റുള്ള നാട്ടിലേതെന്ന് ഒക്കെ പറഞ്ഞു ആ വ്യത്യാസം അംഗീകരിക്കാൻ കൂട്ടാക്കാതെ പരിഹസിക്കുവാനും കുറ്റം പറയുവാനുമാണ് നമ്മുടെ നാട്ടിലുള്ളവർക്ക് തിടുക്കം…." രുദ്രൻ തന്റെ അഭിപ്രായം പറഞ്ഞു നിർത്തി.. ഗൗരി രുദ്രൻ പറയുന്നതൊക്കെ ഒരന്താളിപ്പോടെ കേട്ടിരുന്നു… "ദേവേട്ടാ… ഇത് ഞാൻ നമ്മുടെ നാട്ടിലെ പരിപ്പ് വടയാണെന്ന് പറഞ്ഞതിനാണോ കലിപ്പനിത്രയും വലിയ പ്രഭാഷണം നടത്തിയത് "…? ഗൗരിയൊരമ്പരപ്പോടെ രുദ്രനോട് ചോദിച്ചു.. "എടീ പൊട്ടിക്കാളി.. വിവിധ സ്ഥലങ്ങളിലെ വിവിധരീതിയിൽ, വിവിധ കൂട്ടിൽ തയ്യാറാക്കുന്ന ഭക്ഷണം നമ്മൾ ആ രീതിയിൽ ആസ്വദിക്കണമെന്നാണ് ഞാൻ ഉദേശിച്ചത്‌. ചുരുക്കിപ്പറഞ്ഞാൽ മലബാറി ബിരിയാണി തിന്നിട്ട് ആ മനോഭാവത്തോടെ ഹൈദരാബാദി ബിരിയാണി തിന്ന് രണ്ടും രണ്ട് തരത്തിൽ ആണെന്ന് ചിന്തിക്കാതെ കുറ്റം പറയരുതെന്ന്….മനസ്സിലായോ!"…രുദ്രൻ ഗൗരിയെ കളിയാക്കിക്കൊണ്ട് അവൾക്ക് മറുപടി നൽകി... "ശരി രാജാവേ…ഇനി ഞാൻ പറയില്ല പോരെ"… ഗൗരിയും അതേ ടോണിൽ അവനോട് മൊഴിഞ്ഞു… രുദ്രൻ പിന്നൊന്നും പറയാൻ നിന്നില്ല… മൺഗ്ലാസിൽ പകർന്ന ചായ കുടിക്കുമ്പോൾ ഗൗരിയ്ക്ക് വേറെയൊരു രുചി അനുഭവപ്പെട്ടു. അതവൾ രുദ്രനോട് പറഞ്ഞു… "ചായ ഇത് പോലെയുള്ള മണ്ണിന്റെ ഗ്ലാസിൽ കുടിക്കുമ്പോൾ അതിന്റെ രുചി വേറെയായിരിക്കും. മീൻകറി മൺചട്ടിയിലും അല്ലാത്ത ചട്ടിയിലും പാകം ചെയ്യുമ്പോഴുള്ള വ്യത്യാസം പോലെ"… രുദ്രനൊരു ചെറുപുഞ്ചിരിയോടെ മൊഴിഞ്ഞു… അൽപനേരത്തിനകം അവർ ചായ കുടിച്ചു അവിടെ നിന്നുമിറങ്ങി തങ്ങളുടെ യാത്ര തുടർന്നു…. 🌸🌸🌸🌸🌸🌸🌸🌸🌸🌸🌸🌸🌸🌸🌸 ഏകദേശം ഒന്നര മണിക്കൂർ വീണ്ടുമെടുത്ത് രുദ്രന്റെ ബൈക്ക് പാലി ടൗണിനു അടുത്തെത്തി. രുദ്രൻ ഹൈവേയിൽ നിന്നും സർവീസ് റോഡിലേക്ക് വണ്ടിയെടുത്തു. കുറച്ചു മുന്നോട്ട് പോയൊരു ജംഗ്ഷനടുത്തു കണ്ട റെസ്റ്റോറന്റിലേക്ക് രുദ്രൻ വണ്ടി കയറ്റി പാർക്ക് ചെയ്തു. ഇരുവരും ബൈക്കിൽ നിന്നുമിറങ്ങി റെസ്റ്റോറന്റിനുള്ളിലേയ്ക്ക് കയറി. ഫാമിലി റൂമിൽ കയറിയിരുന്നതിന് ശേഷം രുദ്രൻ മെനു നോക്കി ഓർഡർ കൊടുത്തു. ഭക്ഷണം വരാനായി അവർ കാത്തിരുന്നു… "ദേവേട്ടാ…ഇനി അജ്മീറിലോട്ട് എന്ത് ദൂരമുണ്ട് "…? ഗൗരി രുദ്രനോട് ചോദിച്ചു… "ഇനി നൂറ്റിയറുപത്തഞ്ച് കിലോമീറ്റർ ഉണ്ടാകും. ഏകദേശം രണ്ടേ മുക്കാൽ മണിക്കൂർ"… രുദ്രൻ മറുപടി കൊടുത്തു.. "അങ്ങനെ നമ്മൾ ആദ്യമായി ഒരുമിച്ച് പോകാനാഗ്രഹിച്ച അജ്മീറിലോട്ട് ഇനി വെറും രണ്ടേ മുക്കാൽ മണിക്കൂറിന്റെ ദൂരം മാത്രം…അല്ലെ ദേവേട്ടാ"….? ഗൗരി സംതൃപ്തി നിറഞ്ഞൊരു മന്ദഹാസത്തോടെ ചോദിച്ചു… "അതെ നന്ദു….ഇനി രണ്ടേ മുക്കാൽ മണിക്കൂർ കൂടി കഴിഞ്ഞാൽ നമ്മുടെ ലക്ഷ്യസ്ഥാനമെത്തും"… മറുപടി നൽകുമ്പോൾ രുദ്രനൊന്ന് മന്ദഹസിച്ചു… "നമ്മൾ പാലി സിറ്റിയുടെ ഉള്ളിലേക്ക് പോകുന്നുണ്ടോ"…? ഗൗരി തന്റെ സംശയം പ്രകടിപ്പിച്ചു… "ഇല്ലെടോ… സിറ്റിക്കുള്ളിൽ കയറില്ല. അതിന് പുറത്തു കൂടിയുള്ള ബൈപാസിലൂടെയാണ്‌ നമ്മളിപ്പോൾ വന്നത് "…....(രുദ്രൻ) "ഇവിടെ എന്തൊക്കെയാ കാണാനുണ്ടോ വിനോദസഞ്ചാരികൾക്ക്"…? (ഗൗരി) "വിനോദസഞ്ചരികൾക്കായി ഇവിടെ ജവായ് ഡാം, രണക് പൂർ ജൈന ക്ഷേത്രം, രണക്പുർ ഡാം അങ്ങനെ പലതുമുണ്ട്. പിന്നെ ഹസ്തിനപുരി വിട്ട് നിന്ന കാലത്ത് പാണ്ഡവരുടെ മാതാവായ കുന്തി ദേവി ശിവ പൂജ നടത്തിയിരുന്ന ഒരു പ്രതിഷ്ഠ ഇപ്പോൾ ഒരു ക്ഷേത്രമായിട്ടുണ്ട് നിമ്പോ കാ നാഥ് ക്ഷേത്രമെന്ന പേരിൽ. അതും ഇപ്പോൾ ഒരു ടൂറിസ്റ്റ് സ്പോട്ടാണ് "… രുദ്രൻ ഗൗരിയുടെ ചോദ്യത്തിന് മറുപടി നൽകി… അപ്പോഴേക്കും ഭക്ഷണമെത്തിയപ്പോൾ ഇരുവരും കഴിക്കാൻ തുടങ്ങി… "ദേവേട്ടാ…പാലി എന്ന പേരിൽ മഹാരാഷ്ട്രയിൽ ഏതെങ്കിലും സ്ഥലമുണ്ടോ"..? ഹരിയണ്ണ എപ്പോഴോ പറഞ്ഞൊരു ഓർമ്മ…ഗൗരി തനിക്കു തോന്നിയ ഒരു സംശയമുന്നയിച്ചു രുദ്രനോട്…. "ഉണ്ട്….റായ്ഗഡ് ജില്ലയിൽ കൊങ്കൺ പ്രദേശത്ത് ഒരു പാലി ഉണ്ട്. ഇടയ്ക്ക് ഹരിയണ്ണ തന്റെ ട്രക്കിൽ പോകാറുണ്ട് അങ്ങോട്ട് "…. രുദ്രൻ ചിരിച്ചു കൊണ്ട് മറുപടി നൽകി.. ഇരുവരും സംസാരിച്ചു കൊണ്ട് പതിയെ ഭക്ഷണം കഴിക്കുന്നത് തുടർന്ന് കൊണ്ടിരുന്നു… അധികം വൈകാതെയവർ കഴിച്ചെഴുന്നേറ്റു. എല്ലാം കഴിഞ്ഞു പുറത്തെത്തി ബൈക്കിൽ കയറാൻ നേരം രുദ്രൻ ഗൗരിയോട് ഒന്ന് മന്ദഹസിച്ചു കൊണ്ട് മൊഴിഞ്ഞു… "അപ്പോൾ നന്ദു മോളെ….നമുക്ക് രാജാ അജയപാൽ ചൗഹാൻ നിർമ്മിച്ച അജയമേരുവിലേക്ക് തിരിക്കാം….' രുദ്രൻ പറഞ്ഞത് കേട്ട ഗൗരി തന്റെ കണ്ണും മിഴിച്ചിരുന്നു… തുടരും കണ്ണൂർകാരൻ ❤️❤️❤️❤️ #📙 നോവൽ #📚 ട്വിസ്റ്റ് കഥകൾ #✍ തുടർക്കഥ #💞 പ്രണയകഥകൾ #📔 കഥ