ആദ്യ ഭാഗങ്ങൾ ലിങ്കിൽ ഉണ്ട് Part 12 തുടർച്ച https://sharechat.com/post/6aaG30Bd?d=n&ui=v64j8rk&e1=cആൽബിക്ക് ഒരു ഡെയ്സിയെ അറിയുമോ ? ഡെയ്സി സെബാസ്റ്റ്യൻ ? ” ആൽബിയുടെ നടുക്കം നന്നായി ആസ്വദിച്ചു കൊണ്ടാണ് പോത്തൻ തുടർന്നത് “തെറ്റിദ്ധരിക്കരുത്. താൻ അന്ന് അവരുടെ വീട്ടിലേക്ക് കയറിപ്പോകുന്ന സമയത്ത് ഞാൻ ആ പരിസരത്തുണ്ടായിരുന്നു. പബ്ലിക്ക് റോഡിൽ. അവിചാരിതമായി കണ്ടതാണ്. ഫോളോ ചെയ്തതല്ല.” ആൽബിയുടെ മുഖഭാവം കണ്ടിട്ട് ഒരു പക്ഷേ തന്നെ കയ്യേറ്റം ചെയ്തേക്കുമെന്നു തോന്നിയ പോത്തൻ കരുതലോടെയാണ് നിന്നത്. “താനൊരു ചെറ്റയാഡോ! ” ആൽബിയുടെ സകല നിയന്ത്രണങ്ങളും നഷ്ടപ്പെട്ടിരുന്നു. “തനിക്ക് എന്നെ എങ്ങനെയെങ്കിലും ഏതെങ്കിലുമൊരു കേസിൽ കുടുക്കിയേ തീരൂ. ഒബ്സെസ്സ്ഡാണ് താൻ. എന്തു കാരണമാണെന്നറിയില്ല. തന്റെ ഈഗോ ഹർട്ട് ചെയ്യുന്ന വിധത്തിൽ ഞാനെന്തെങ്കിലും ചെയ്തിരിക്കണം. അതിനേ സാധ്യതയുള്ളൂ. തന്നെപ്പോലൊരു ക്രീപ്പിനോട് ഇനി യാതൊരു വിധ ഇടപെടലിനുമില്ല ഞാൻ! ഗുഡ് ബൈ! ” ആൽബി നിന്നു ജ്വലിക്കുകയായിരുന്നു. “ഇനി മേലിൽ താനെന്നെ കാണുകയോ ബന്ധപ്പെടുകയോ ചെയ്താൽ…ആൽബർട്ട് ആരാണെന്നു താനറിയും.” ““ഹോ! എന്തൊരു ഭീഷണി! ! ഞാനങ്ങ് ഇല്ലാതായിപ്പോയി. എന്റെ മാൻ ചെല്ല്. അവിടെ ചടങ്ങുകൾ തീരാറായി. ഇങ്ങനെ മാറി നില്ക്കുന്നതു കണ്ടാൽ ആളുകൾ തെറ്റിദ്ധരിക്കും. എന്തോ കുറ്റബോധം കൊണ്ട് മാറി നില്ക്കുന്നതാണെന്നു കരുതും.” തിരിഞ്ഞ് രണ്ടു ചുവടു വെച്ചിട്ട് ആൽബി തിരിഞ്ഞു നിന്നു. അവസാനിപ്പിച്ച രീതി ശരിയായില്ലെന്നൊരു തോന്നൽ. “ഡെയ്സിയുടെ വീട്ടിൽ ഒരു മോഷണ ശ്രമം ഉണ്ടായത് അന്വേഷിക്കാൻ പോയതാണ് ഞാൻ. ഒരു സുഹൃത്താണവർ. അല്ലാതെ...” ആൽബി പല്ലുകൾ ഞെരിച്ചു. “ഓ... ഒരു സർക്കിൾ ഇൻസ്പെക്ടർ, വെറുമൊരു മോഷണക്കേസ് അന്വേഷിക്കാനായി അവരുടെ വീട്ടിലേക്ക് ചെന്നോ ? ” പോത്തന്റെ മുഖത്തൊരു പരിഹാസ ചിരി വിടർന്നു. “ഞാൻ പറഞ്ഞല്ലോ. ഒരു സുഹൃത്താണവർ. കൂടാതെ എനിക്കവരോട് ചില കടപ്പാടുകളുമുണ്ട്.” “ആഹാ... ഔദ്യോഗിക പദവി ദുരുപയോഗം. എന്നോട് തന്നെ ഇതൊക്കെ പറയണം താൻ.” “ദാ ഇതാണ് പ്രശ്നം. തന്നോട് ഒന്നും പറയാൻ നിവൃത്തിയില്ല. എന്നെ ഒരു കുറ്റവാളിയാക്കി അങ്ങ് സെറ്റ് ചെയ്തു വെച്ചിരിക്കുവല്ലേ തന്റെ തലക്കകത്ത്. താൻ എന്തു വിചാരിച്ചാലും വേണ്ടില്ല! സത്യമാണ് ഞാൻ പറഞ്ഞത്. നിങ്ങൾക്കന്വേഷിക്കാം.” “എവിടെ ചെന്നന്വേഷിക്കാൻ ? ഈ പറഞ്ഞ മോഷണ ശ്രമം കേസാക്കിയിരുന്നോ ? ” “ഇല്ല. അവർക്കു താല്പ്പര്യമുണ്ടായിരുന്നില്ല.” “വണ്ടർഫുൾ! എന്നിട്ടെന്തായി ? കണ്ടു പിടിച്ചോ മോഷ്ടാവിനെ ? ” “സുഹൃത്തേ... അവരൊരു പാവം സ്ത്രീയാണ്. എന്റെ ലൈഫിൽ കേറി ഈ കളിക്കുന്ന പോലെ അവരെ ഉപദ്രവിക്കരുത്. ഒരു റിക്വസ്റ്റാണ്. ഒരു മനുഷ്യനു താങ്ങാനാകുന്നതിന്റെ പരമാവധി അനുഭവിച്ചു കഴിഞ്ഞു ആ പാവം. ഒറ്റക്ക് കെട്ടി പടുത്തതാണ് ഈ കാണുന്നതൊക്കെ. വെറുതേ ഒരു കോൺഫ്ലിക്റ്റുണ്ടാക്കി അവരെക്കൂടി ഇതിനകത്തേക്ക് വലിച്ചിഴക്കരുത്. പ്ലീസ്.” “യെസ്! അവർ പാവമാണ്. ഞാൻ നേരിട്ടു കണ്ടിട്ടുണ്ട് ആ പാവത്തിനെ. വല്ലാതെ സഹതാപം തോന്നിപ്പോകുന്ന ശരീരഘടനയാണ്.” പോത്തൻ കീഴ്ച്ചുണ്ട് കടിച്ചു പിടിച്ച് ഒരു വല്ലാത്ത ചിരി ചിരിച്ചു. ആൽബി ആ ചിരി നോക്കി ഒരു നിമിഷം നിശബ്ദനായി നിന്നു. എന്നിട്ട് സാവധാനം തിരിഞ്ഞു നടന്നു. പോത്തൻ ഈ ജന്മം തന്നെ വിട്ടു പോകില്ലെന്ന് അയാൾക്കു മനസ്സിലായി. വളരെ അപകടകാരിയാണിയാൾ. ഉദ്ദേശിക്കുന്നത് കിട്ടാനായി എന്തു തറ വേലയും കാണിക്കുന്ന വളരെ അൺ പ്രൊഫഷണലായൊരു പോലീസുകാരൻ! ദഹനാനന്തരമുള്ള ചടങ്ങുകൾ കഴിഞ്ഞിരുന്നില്ല. പ്രവീണ തളർന്ന് അച്ഛന്റെ മടിയിൽ തല ചേർത്ത് മയങ്ങുന്നത് കാണാമായിരുന്നു. അല്ഷിമേഴ്സ് രോഗിയായിരുന്ന പ്രവീണയുടെ അച്ഛൻ ശ്രീകുമാർ മേനോൻ ചുറ്റും നോക്കി എന്തൊക്കെയോ അർത്ഥമില്ലാത്ത വാക്കുകൾ ഉച്ചത്തിൽ വിളിച്ചു പറയുന്നത് കാണാമായിരുന്നു. എന്തോ അപകടം സംഭവിച്ചിരിക്കുന്നു എന്ന് അദ്ദേഹത്തിനു മനസ്സിലായിക്കാണണം. കുളിച്ചീറനായി ചിതക്കു മുൻപിൽ നില്ക്കുന്ന ജയന്റെ സഹോദരനെ കണ്ടതും ആൽബി മുഖം തിരിച്ചു കളഞ്ഞു. ഇനി ജയൻ എന്ന ഒരുത്തൻ തന്റെ ജീവിതത്തിൽ ഇല്ല! ചിന്തിക്കാനേ കഴിയുന്നില്ല. എത്ര പെട്ടെന്നാണ് ഒരു മനുഷ്യ ജീവൻ അപ്രത്യക്ഷമായിപ്പോയത് ? കത്തിയമർന്നില്ലാതെയായിപ്പോയത് ? ആൽബി കണ്ണുകൾ തുടച്ചു കൊണ്ട് തന്റെ കാറിന്റെ മുകളിലേക്ക് മുഖം ചേർത്ത് ചാരി നിന്നു. ധിലീഷ് പോത്തൻ ദൂരെ നിന്ന് അയാളുടെ ഓരോ ചെയ്തികളും കണ്ണിമക്കാതെ നോക്കി നില്ക്കുന്നുണ്ടായിരുന്നു. പിറ്റേന്ന് രാവിലെ ലീവ് കഴിഞ്ഞ് തിരിച്ച് ജോയിൻ ചെയ്യുകയാണ്. ആൽബി നേരത്തെ തന്നെ സ്റ്റേഷനിലെത്തി. കൊച്ചി നോർത്ത് സീ ഐ മാത്യൂസ് തരകനെയാണ് താൽക്കാലിക ചാർജ്ജ് ഏൽപ്പിച്ചിരുന്നത്. പക്ഷേ അയാൾക്ക് തന്റെ സ്റ്റേഷനുകളിലെ തിരക്കു കാരണം ഒരിക്കൽ പോലും വരാനായിരുന്നില്ല. എങ്കിലും എല്ലാം ചട്ടപ്പടി നടന്നോട്ടെ എന്നു കരുതി ആൽബി വന്നയുടൻ തന്റെ പേപ്പർ വർക്കുകൾ പൂർത്തിയാക്കി. മാത്യൂസിന് താൻ ഡ്യൂട്ടി ഏറ്റെടുത്തതായി അറിയിച്ചു കൊണ്ട് ഒരു മെയിലയച്ചു. ഇനി ഇനിയാണ് ജോലി തുടങ്ങേണ്ടത്. ശിവകുമാറിനെ വിളിച്ച് അത്യാവശ്യമായി തന്റെ മുറിയിലെത്താൻ പറഞ്ഞ് മേശപ്പുറത്തിരുന്ന ചൂടു ചായ ചുണ്ടോടു ചേർത്തതും "ഗുഡ് മോർണ്ണിംഗ് മിസ്റ്റർ ഇൻസ്പെക്ടർ! ! " വാതില്ക്കൽ നിന്നും ഘന ഗംഭീരമായ ആ ശബ്ദം മുഴങ്ങി. ആൽബി കണ്ണുകൾ ഇറുക്കിയടച്ചു. നാശം പിടിക്കാൻ ! ! ഈ മനുഷ്യനും ഇവിടെയുണ്ടാകുമെന്ന് മറന്നു. "കോൽക്കളി തുടങ്ങാം നമുക്ക് ? " പോത്തൻ നല്ല മൂഡിലാണെന്നു തോന്നി. ഒരൽപ്പം മദ്യപിച്ചിട്ടുണ്ടോ ? ആൽബിക്ക് സംശയം തോന്നി. അയാൾ മറുപടിയൊന്നും പറയാതെ മേശപ്പുറത്തെ ബെൽ മൂന്നു നാലു വട്ടം തുടർച്ചയായി അടിച്ചു. വാതിൽക്കൽ കോൺസ്റ്റബിൾ മാണി പ്രത്യക്ഷപ്പെട്ടു. "മാണീ ഇത് മിസ്റ്റർ ധിലീഷ് പോത്തൻ. കുറച്ചു ദിവസം ഇവിടെ ഉണ്ടാകും. ഇദ്ദേഹത്തിന് എന്താ വേണ്ടേന്നു വെച്ചാ എടുത്ത് കൊടുത്ത് കൂടെ നിക്കണം. ക്രൈം ബ്രാഞ്ചിലെ വല്യ പുള്ളിയാ. ആ സ്റ്റോറിൽ കിടക്കുന്ന മേശേം കസേരേം ഇവിടെ കൊണ്ടിട്ട് കൊട്. സർ അന്വേഷിക്കട്ടെ. പഴയ ഫയലുകളു തപ്പാൻ വന്നതാ. " പോത്തൻ രണ്ടു വിരലുകൾ ചുണ്ടിനോടു ചേർത്തു പിടിച്ച് ശബ്ദമുണ്ടാക്കാതെ ചിരിച്ചുകൊണ്ട് നില്പ്പാണ്. ആൽബിയുടെ പെരുമാറ്റം ഒരു തമാശായിട്ടാണ് കക്ഷിക്ക് തോന്നിയതെന്നു വ്യക്തം. “സർ... എന്താ വേണ്ടേന്നാ പറഞ്ഞാൽ മതി സർ” കോൺസ്റ്റബിൾ മാണി ഉപചാരപൂർവ്വം പോത്തനെ നോക്കി. “തന്നെ കണ്ടിട്ട് കുറേ കാലമായല്ലോഡേ. അന്ന് ഫിറ്റായി വീണിട്ട് പിന്നിന്നാണോ എണീറ്റത് ? ” മാണി പരുങ്ങലോടെ ഒന്നു ചിരിച്ചു. “സാറിനു പഴയ ഫയലൊക്കെ വേണെങ്കി ഞാൻ എടുത്തോണ്ടു വരാം. കഴിഞ്ഞ ആറു മാസം വരെ പക്കാ ആണ് സർ. അതിനു മുന്നത്തെ ഫയലൊക്കെ ഇവിടെ രവികുമാരൻ എന്നൊരു പുള്ളിയാ എഴുതിയത്. നല്ല എഴുത്താ. പക്ഷേ കയ്യക്ഷരം വളരെ മോശം. വായിക്കാൻ സാറു പാടുപെടും. ഞാൻ ഓരോന്നായി എടുത്തോണ്ടു വരാം. റെജിസ്റ്റർ നോക്കി സർ പറഞ്ഞാ മതി. പുതിയ കേസൊക്കെ കാമ്പ്യൂട്ടറിലാ. പ്രിന്റെടുക്കാം. അതും സർ റെജിസ്റ്റെർ നോക്കി- ” “പഴയ ഫയലൊക്കെ ആർക്കു വേണം എന്റെ മാണി. അതൊക്കെ എന്റെ ഓരോ അടവല്ലേ. എനിക്ക് നമ്മടെ ആൽബി സാറിനെ ഒന്ന് വാച്ചു ചെയ്യാൻ.” പോത്തൻ കണ്ണുകളിറുക്കി ഒരു കുസൃതിച്ചിരി ചിരിച്ചു. “തല്ക്കാലം എനിക്ക് മൂന്ന് കാര്യങ്ങൾ വേണം. ഒന്ന്. അരഗ്ലാസ് കട്ടൻ ചായ. അതിൽ ബാക്കി അര ഗ്ലാസ്സ് പഞ്ചസാര ഇട്ടോ. നന്നായി കുറുക്കിയെടുക്ക്. രണ്ട്, ആൽബി പറഞ്ഞ ആ മേശേം കസേരേം. പിന്നെ മൂന്ന്. ഈ കഴിഞ്ഞ ദിവസം റെക്കോർഡ് ചെയ്ത ആക്സിഡന്റ് കേസ് ഫയൽ. അഡ്വൊക്കേറ്റ് ജയകുമാർ മേനോന്റെ. വേഗായ്ക്കോട്ടെ. “ ”ഓക്കെ സർ! “ മാണി സംശയത്തോടെ തിരിഞ്ഞു. ”ഈ അര ഗ്ലാസ്സ് പഞ്ചസാര...“ ”താൻ കലക്കിക്കൊണ്ടു വാഡോ. നോക്കട്ടെ. ഞാനല്ലേ കുടിക്കുന്നെ. “ പോത്തൻ അയാളെ തോളിൽ തട്ടി യാത്രയാക്കി. ”ലിവർ പോയി. ഇനി ബാക്കിയുള്ളതും കൂടി എങ്ങനെയെങ്കിലും നശിപ്പിക്കണം. അതിനാ.“ “എല്ലാം ശരി. പക്ഷേ എന്തൊക്കെ പേപ്പറു കയ്യിലുണ്ടെന്നു പറഞ്ഞാലും ജയന്റെ കേസിൽ താനിടപെടണ്ട തല്ക്കാലം. അത് ക്രൈം ബ്രാഞ്ചിനെ ഏല്പ്പിക്കുന്ന കാലത്ത് ഞാൻ പറയാം. അതെന്നല്ല, എന്റെ ഒരു ഓൺ ഗോയിങ്ങ് ഇൻവെസ്റ്റിഗേഷനിലും താൻ ഇടപെടണ്ട.” ആൽബി അതീവ ഗൗരവത്തിലായിരുന്നു. “അങ്ങനെ പറയല്ലേ ആൽബി... നമുക്ക് ഒന്നിച്ച് ഒരു ടീം പോലെ വർക്കു ചെയ്യാനുള്ള അവസരമാണ്. കളഞ്ഞു കുളിക്കരുത്.” പോത്തൻ ഓരോ വാക്കുകളിലും ആൽബിയെ പരമാവധി കൊള്ളിച്ചുകൊണ്ടാണ് സംസാരിക്കുന്നത്. അപ്പോഴേക്കും എസ്. ഐ. ശിവകുമാർ അങ്ങോട്ടു കയറി വന്ന് രണ്ടു പേരെയും സല്യൂട്ട് ചെയ്തു. “ഓക്കേ! ശിവ, ജയന്റെ ഫയലെടുത്തില്ലേ ? കേസ് പൊളിച്ചെഴുതണം. ഇരിക്ക്.” ആൽബി മുന്നിലെ കസേര ചൂണ്ടി. “സോറി സർ. ഇത് മുഴുവനായിട്ടും എന്റെ മിസ്റ്റേക്കാണ്. ഞാനാണ് ആക്സിഡന്റായി ഫയൽ ചെയ്യാൻ സാറിനെ നിർബന്ധിച്ചത്. റിയലി സോറി സർ.” ആൽബിയുടെ ശകാരം പ്രതീക്ഷിച്ചാണ് ശിവകുമാർ വന്നത്. പക്ഷേ പോത്തൻ ഇരിക്കുന്നതു കൊണ്ടാകണം, തികച്ചും ശാന്തനായിട്ടാണ് ആൽബി ഇടപെട്ടത്. “റീ ഡ്രാഫ്റ്റ് ചെയ്തിട്ട് നമുക്ക് മജിസ്ട്രേറ്റിനെ കണ്ട് സന്തോഷിനെ ഒന്നു കൂടി പൊക്കണം. അവനെ നന്നായിട്ടൊന്ന് ചോദ്യം ചെയ്താൽ തീരാവുന്നതേയുള്ളൂ ഇത്.” ആൽബി കമ്പ്യൂട്ടർ ഓൺ ചെയ്ത് പുതിയൊരു കേസ് ഫയൽ ഓപ്പൺ ചെയ്തു. “ആ ടിപ്പറിന്റെ ഓണറെയും പ്രതി ചേർക്കണം. കാരണം അയാളറിയാതെ സന്തോഷ് ലോറിയുമെടുത്ത് ഇറങ്ങില്ലല്ലോ. പിന്നെ, ആക്സിഡന്റ് മാത്രമല്ല കാര്യം. ജയന്റെ ഉള്ളിൽ ഇത്രയും മദ്യം എങ്ങനെ എത്തി എന്നതും ഒരു വിഷയമാണ്. നല്ലൊരു ഗൂഢാലോചനയുണ്ട് പുറകിൽ. നമുക്കൊന്ന് റഫായി ഡിസ്ക്കസ് ചെയ്തിട്ട് ആ മാണിയെക്കൊണ്ട് നന്നായിട്ടൊന്ന് എഴുതിക്കണം. സകല പോയിന്റുകളും വെച്ച്. ഇല്ലെങ്കിൽ ആ മജിസ്ട്രേറ്റ് സമ്മതിക്കില്ല. “ ”സർ... മജിസ്ട്രേറ്റ് ഇനി എന്തു പറയുമോ ആവോ. അയാളൊരു വല്ലാത്ത മനുഷ്യനാ. നമ്മളെ കൊന്നു കൊല വിളിക്കും.“ ശിവകുമാറിന്റെ വിഷമം അതായിരുന്നു. “അതേ... ഞാൻ കുറച്ചു കാര്യങ്ങളു പറയട്ടെ ആദ്യം.” വീണ്ടും പോത്തൻ ഇടപെട്ടു. “ഇനി താൻ മജിസ്ട്രേറ്റിന്റെ അടുത്തേക്കു പോകുമ്പൊ നല്ലൊരു കഥയുമായി വേണം പോകാൻ. അയാൾ ഞെട്ടണം. അല്ലെങ്കിൽ ചിലപ്പൊ ഒന്നും നടക്കാണ്ടു വരും. സോ... നമുക്ക് അന്നു നടന്ന സംഭവങ്ങൾ, നമ്മുടെ തിയറികൾ ഒക്കെ ഒന്നു പറഞ്ഞു വെക്കാം.” ആൽബി നിരായുധനെപ്പോലെ അവിടെയിരുന്നു. പോത്തൻ വളരെ ആധികാരികമായിട്ടാണ് ശിവനുമായി സംസാരിച്ചു തുടങ്ങിയത്. “സംഭവം നടന്ന അന്ന്, അതായത് കഴിഞ്ഞ വെള്ളിയാഴ്ച്ച വൈകിട്ട് കൃത്യം 5:00 മണിക്ക് അഡ്വക്കേറ്റ് ജയകുമാർ ഓഫീസിൽ നിന്നിറങ്ങിയതാണ്. ഞാൻ അന്വേഷിച്ചിരുന്നു. ജോലിയൊക്കെ തീർത്ത് എന്നും കൃത്യ സമയത്തിറങ്ങുന്ന പ്രകൃതക്കാരനാണ് ജയകുമാർ. പിന്നീടുണ്ടായ സംഭവങ്ങളിൽ നമുക്കറിയാവുന്ന കാര്യങ്ങൾ നമുക്ക് നോക്കാം. അവിടെ നിന്നും ഇറങ്ങിയ അയാൾ നേരെ ചെന്നത് ഗാന്ധി പാർക്കിലേക്കാണ്. ദാ ഈയിരിക്കുന്ന സി. ഐ. ആൽബർട്ട് സാമുവലിനെ കാണാൻ. ശരിയല്ലേ ആൽബി ? ” ആൽബിയും ശിവകുമാറും ഒരേ സമയം ഞെട്ടി പോത്തന്റെ മുഖത്തേക്ക് നോക്കി. “തുടർന്ന് അവർ രണ്ടു പേരും പാർക്കിനുള്ളിലിരുന്ന് ഏതാണ്ട് 20 മിനുട്ടോളം സംസാരിച്ചു. എന്താണ് വിഷയം എന്നറിയില്ല, രണ്ടു പേരും തമ്മിൽ അത്ര രസത്തിലല്ല അവിടെ നിന്നും പിരിഞ്ഞത്.” “ഇതൊക്കെ സാറിനെങ്ങനെ അറിയാം ? ” അമ്പരന്നു നില്ക്കുകയാണ് എസ്. ഐ. ശിവകുമാർ. “ഞാൻ ആ സമയത്ത് പാർക്കിലുണ്ടായിരുന്നെഡോ. ഞാൻ പറയുന്നത് സത്യമാണോ അല്ലയോ ആൽബി ? ” ആൽബി ശിവകുമാറിനെ നോക്കി ശരിയാണെന്ന അർത്ഥത്തിൽ തലയാട്ടി കാണിച്ചു. “അതാണ്! സോ, അവിടെ നിന്നും ആൽബിയുമായി പിണങ്ങി ഇറങ്ങിയ ജയൻ-” “സർ.. ഒരു മിനിറ്റ്. ഈ പാർക്ക് ഇൻസിഡന്റ് നമ്മൾ റിപ്പോർട്ടിൽ കാണിക്കണോ ? “ ശിവകുമാറിന്റെ മുഖം വിവർണ്ണമായിരുന്നു. ”അങ്ങനെ ചെയ്താൽ ഒരു വല്യ പ്രശ്നമുണ്ട്.“ ”എന്തു പ്രശ്നം ? ഒരു പ്രശ്നവുമില്ല. താൻ ധൈര്യമായിട്ട് ചേർക്ക്.“ പോത്തന്റെ മുഖത്ത് അപ്പോഴും ചിരിയായിരുന്നു. “ഞാൻ ബാക്കി കൂടി പറയട്ടെ. അവിടെ നിന്നും ഏതാണ്ട് 5:35ന് ഇറങ്ങിയ ജയകുമാർ പിന്നീട് മിസ്സിങ്ങ് ആയിരുന്നു എന്നു വേണമെങ്കിൽ പറയാം. അയാളുടെ വൈഫ് വൈകിട്ട് 7.00 മണി മുതൽ വിളിക്കുന്നുണ്ടായിരുന്നു. അപ്പോഴെല്ലാം ഫോൺ ഓഫായിട്ടാണ് കാണിച്ചത്. ഇത് എന്നോട് അയല്പക്കക്കാർ പറഞ്ഞതാണ്. സത്യമാകാനാണ് സാധ്യത. സോ, പാർക്കിൽ നിന്നുമിറങ്ങി അധികം വൈകാതെ തന്നെ ജയകുമാർ ആരുടെയോ പിടിയിലകപ്പെട്ടിരിക്കണം. നിങ്ങളുടെ എഫ് ഐ ആർ അനുസരിച്ച്, രാത്രി 11:55നാണ് ആക്സിഡന്റ് നടന്നിരിക്കുന്നത്. ടിപ്പർ ഡ്രൈവറുടെ മൊഴി. അത് ശരിയാണെങ്കിൽ, 5:35 മുതൽ 11:55 വരെ ഏതാണ്ട് ആറ് ആറര മണിക്കൂറുകൾക്കുള്ളിൽ ഈ കൊലപാതകത്തിലേക്കെത്തിയ സംഭവങ്ങൾ നടന്നു എന്നു കരുതാം. എന്താണ് നടന്നിരിക്കുക ? ഞാൻ എന്റെ ഒരു ഊഹം പറയാം. ജയകുമാറിനെ തട്ടിക്കൊണ്ടു പോയവർ പ്രൊഫഷണൽസ് ആകാനാണ് സാധ്യത. കാരണം വളരെ വിദഗ്ധമായൊരു ആസൂത്രണം നമുക്ക് കാണാനാകും. അയാളുമായി മുൻ വൈരാഗ്യമുള്ള ഏതെങ്കിലും കക്ഷികൾ ഏർപ്പെടുത്തിയതാകാം. തട്ടിക്കൊണ്ടു പോയി, അവനെ അവർ ഒരു ഫുൾ കുപ്പി മദ്യം കഴിപ്പിച്ചു. ബല പ്രയോഗത്തിലൂടെയാകാനാണ് സാധ്യത.കാരണം, ഒരിക്കലും ഒരു മനുഷ്യൻ സ്വബോധത്തോടെ ഇത്രയും മദ്യം ഒരുമിച്ച് കഴിക്കില്ല. അതിനു ശേഷം, കാർ വിജനമായ പുതുവേലി വളവിൽ കൊണ്ടു ചെന്നെത്തിച്ചിട്ട്, റോങ്ങ് സൈഡിൽ, സീറ്റ് ബെൽട്ടിട്ട് ഹാൻഡ് ബ്രേക്ക് വലിച്ചിട്ട് നിർത്തി. ടിപ്പർ കൊണ്ട് പല വട്ടം ഇടിപ്പിച്ച് മരണം ഉറപ്പാക്കി. അത് ചെയ്തത് ഡ്രൈവർ സന്തോഷ് ആകാൻ സാധ്യതയില്ല. അയാളെ അവസാന നിമിഷം കുറ്റമേല്ക്കാനായി കൊണ്ടു വന്നതാകാനേ തരമുള്ളൂ. ഇതിനു മുൻപ് ഇത്തരം കൃത്യങ്ങൾ ചെയ്ത് പരിചയമുള്ള ഒരു പ്രൊഫഷണൽ കില്ലർ അല്ലെങ്കിൽ കില്ലേഴ്സ് ഇതിനു പിന്നിലുണ്ട് എന്നാണ് എന്റെ ഒരു നിഗമനം. അപ്പൊ ഇതാണ് നമ്മുടെ ഫസ്റ്റ് ഇൻവെസ്റ്റിഗേഷൻ റിപ്പോർട്ട്. പോരേ ? ഇനി നിങ്ങളു പറഞ്ഞ പോലെ, മാണിയെക്കൊണ്ട് ഒന്നൂടി മസാലയൊക്കെ ചേർത്ത് എഴുതിയാൽ മജിസ്ട്രേറ്റ് ഇന്നു രാത്രി തന്നെ സന്തോഷിനെ ഇറക്കിക്കൊണ്ടു പോന്നോളാൻ പറയും.“ പോത്തന്റെ വാക്കുകളിൽ അഭിമാനം തിളങ്ങി. ശിവകുമാർ വിഷണ്ണനായി ആൽബിയേയും പോത്തനെയും മാറി മാറി നോക്കി. “എന്താഡോ ശിവാ... തനിക്കെന്തെങ്കിലും പറയാനുണ്ടെങ്കി പറയഡോ.” പോത്തൻ പ്രോൽസാഹിപ്പിച്ചു. “സർ... ആ പാർക്കിൽ വെച്ച് ആൽബി സർ ജയനെ മീറ്റ് ചെയ്തെന്ന് നമ്മളങ്ങനെ റിപ്പോർട്ടിൽ കാണിച്ചാൽ, പിന്നെ ഒബ്‌വിയസ്‌ലി ആൽബി സർ ഒരു സസ്പെക്റ്റാകും. അതോടെ പിന്നെ സാറിനെ ചോദ്യം ചെയ്തിട്ടേ നമുക്ക് മുൻപോട്ടു പോകാനാകൂ. മാത്രമല്ല, ആൽബി സർ ഈ കേസിൽ നിന്നും പുറത്താകുകയും ചെയ്യും.“ പോത്തന്റെ ചിരി ഒരു വല്ലാത്ത ഭാവത്തിലേക്ക് വഴി മാറി. കണ്ണുകളിൽ ക്രൗര്യം നിഴലിച്ചു. “ആൽബി സാറിനെ ചോദ്യം ചെയ്യാനല്ലേഡോ ഞാനിവിടിരിക്കുന്നെ ? ” തുടരും കണ്ണൂർകാരൻ ❤️❤️❤️❤️ #📚 ട്വിസ്റ്റ് കഥകൾ #✍ തുടർക്കഥ #💞 പ്രണയകഥകൾ #📙 നോവൽ #📔 കഥ