ഭദ്രകാളീപഥം ഭാഗം 7 വിഷപ്പുക ഗ്രാമത്തെ വിഴുങ്ങിക്കൊണ്ടിരുന്നു. ഉറ്റവർ കല്ലായി മാറുന്നത് കണ്ട് ഭദ്രയുടെ ഉള്ളിൽ സങ്കടവും രോഷവും അണപൊട്ടി. എന്നാൽ രുദ്രൻ ശാന്തനായി തന്റെ ത്രിശൂലം മുറുകെ പിടിച്ചു. "ഭദ്രേ, ഭയപ്പെടേണ്ട. വിഷത്തെ വിഴുങ്ങാൻ മഹാദേവന്റെ അംശത്തിന് കഴിയും," രുദ്രൻ പറഞ്ഞു… അവൻ തന്റെ ശ്വാസം ആഞ്ഞു വലിച്ചു. അന്തരീക്ഷത്തിൽ പടർന്നിരുന്ന മാരകമായ കറുത്ത വിഷപ്പുക മുഴുവൻ രുദ്രന്റെ ഉള്ളിലേക്ക് പ്രവഹിച്ചു. അവന്റെ കഴുത്ത് നീലനിറമായി ജ്വലിച്ചു. ഗ്രാമത്തിലെ വായു ശുദ്ധമായെങ്കിലും, വിഷത്തിന്റെ കാഠിന്യത്താൽ രുദ്രന്റെ ശരീരം തളരാൻ തുടങ്ങി…. ഇതുകണ്ട് കാപാലികൻ ആർത്തലച്ചു ചിരിച്ചു…. "ഇന്ന് നിന്റെ രക്ഷകൻ വീഴും ഭദ്രേ! ഇനി നിന്റെ മരണം എന്റെ കൈകൊണ്ടാണ്."... തന്റെ തുണയായി നിന്ന രുദ്രൻ തളരുന്നത് കണ്ടപ്പോൾ ഭദ്രയുടെ കണ്ണുകൾ ചുവന്നു. അവളുടെ ഉള്ളിലെ കാളീചൈതന്യം ഉണർന്നു. അവൾ തന്റെ മങ്ങിയ ഉടവാൾ നിലത്തടിച്ചു. പെട്ടെന്ന് ക്ഷേത്രത്തിനുള്ളിൽ നിന്ന് ആയിരം മണികൾ ഒരേസമയം മുഴങ്ങി. ഭദ്രയുടെ മുടി അഴിഞ്ഞുലഞ്ഞു, അവളുടെ നെറ്റിയിൽ ഒരു അഗ്നിബിന്ദു തെളിഞ്ഞു….. അവൾ കാപാലികന് നേരെ പാഞ്ഞടുത്തു. ഓരോ ചുവടിലും ഭൂമി വിറച്ചു. കാപാലികൻ തന്റെ മന്ത്രദണ്ഡ് കൊണ്ട് പ്രതിരോധിക്കാൻ ശ്രമിച്ചെങ്കിലും, രൗദ്രഭാവം പൂണ്ട ഭദ്രയുടെ മുന്നിൽ അത് കരിഞ്ഞുപോയി…. മരണം മുന്നിൽ കണ്ട കാപാലികൻ തന്റെ അവസാനത്തെ ആഭിചാരക്രിയ നടത്തി. അവൻ ഭദ്രയ്ക്ക് ചുറ്റും ഒരു 'മായ ലോകം' സൃഷ്ടിച്ചു. ഭദ്രയുടെ മുന്നിൽ അവളുടെ മരിച്ചുപോയ മാതാപിതാക്കളുടെ രൂപങ്ങൾ പ്രത്യക്ഷപ്പെട്ടു….. "മകളേ, ആയുധം താഴെ വെക്കൂ... ഞങ്ങൾ നിന്നെ വിളിക്കുന്നു," ആ മായരൂപങ്ങൾ വിതുമ്പിക്കൊണ്ട് പറഞ്ഞു…. ഭദ്ര ഒരു നിമിഷം പകച്ചുപോയി. അവളുടെ കയ്യിലെ വാൾ താഴെ വീഴാൻ തുടങ്ങി…. കാപാലികൻ പിന്നിൽ നിന്ന് അവൾക്ക് നേരെ തന്റെ വിഷക്കത്തി ഉയർത്തി…. തളർന്നു വീണ രുദ്രൻ ആ നിമിഷം തന്റെ കണ്ണുകൾ തുറന്നു. മായയിൽ കുടുങ്ങിയ ഭദ്രയെ രക്ഷിക്കാൻ അവൻ തന്റെ പരമാവധി ശക്തി സംഭരിച്ചു….. "ഭദ്രേ... ഉണരൂ! കാണുന്നത് സത്യമല്ല, കാണാത്തതാണ് പരമസത്യം"... രുദ്രന്റെ ശബ്ദം ഒരു ഇടിമുഴക്കം പോലെ ഭദ്രയുടെ കാതുകളിൽ പതിച്ചു. സത്യം തിരിച്ചറിഞ്ഞ ഭദ്ര തന്റെ ഉടവാൾ ചുഴറ്റി ആ മായരൂപങ്ങളെ വെട്ടിപ്പിളർന്നു. മായ മാഞ്ഞപ്പോൾ, തനിക്ക് തൊട്ടടുത്തെത്തിയ കാപാലികനെ അവൾ കണ്ടു. ഭദ്ര തന്റെ വാൾ കാപാലികന്റെ നെഞ്ചിന് നേരെ വീശി. അതേസമയം തന്നെ, രുദ്രൻ തന്റെ ത്രിശൂലത്തിൽ നിന്ന് ഒരു അഗ്നിബാണത്തെ തൊടുത്തു…. വാളും ത്രിശൂലവും ഒരേസമയം കാപാലികന്റെ ശരീരത്തിൽ പതിച്ചു. ഒരു ഭീകരമായ നിലവിളിയോടെ അവൻ ചാരമായി മാറി. അവൻ കയ്യിലുണ്ടായിരുന്ന രക്തബലി പാത്രം തകർന്നു വീണു. അതിൽ നിന്ന് ഒഴുകിയ ദിവ്യമായ ജലം ഗ്രാമത്തിലാകെ പടർന്നു…. അത്ഭുതമെന്നു പറയട്ടെ, ആ ജലം സ്പർശിച്ചതും കല്ലായി മാറിയ ഗ്രാമവാസികളെല്ലാം ജീവൻ തിരിച്ചു കിട്ടി എഴുന്നേറ്റു….. തുടരും…. ✍️സന്തോഷ്‌ ശശി… #📔 കഥ #✍ തുടർക്കഥ #💞 പ്രണയകഥകൾ #കഥ,ത്രില്ലെർ,ഹൊറർ #📙 നോവൽ