നാഗമുദ്ര: (ഭാഗം - 15) 🪱🪱🪱🪱🪱🪱🪱🪱🪱 ബാലഗണപതിയുടെ അംശമായ ആ ബാലൻ നൽകിയ സൂചന അനന്തയെ ആഴത്തിൽ ചിന്തിപ്പിച്ചു. നാഗദണ്ഡ് എന്നത് കേവലം ഒരു ആയുധമല്ലെന്നും, അത് ആത്മശക്തിയുടെ പ്രതീകമാണെന്നും അവൾ തിരിച്ചറിഞ്ഞു. എന്നാൽ സമയം അവർക്ക് എതിരായിരുന്നു…. അനന്തയും മണികണ്ഠനും ഹിമാലയത്തിന്റെ മുകൾത്തട്ടിലെ നീരദ താഴ്‌വരയിലെത്തി. അവിടെ കഠിനമായ മഞ്ഞുവീഴ്ചയായിരുന്നു….. നാഗശരീരമുള്ളവർക്ക് അതിശൈത്യം മാരകമാണ്. അനന്തയുടെ ശരീരം തണുത്തുറയാൻ തുടങ്ങി. മണികണ്ഠൻ തന്റെ ഉടുപ്പും കൈകളിലെ ചൂടും നൽകി അവളെ സംരക്ഷിക്കാൻ ശ്രമിച്ചു. പെട്ടെന്ന് അവർക്ക് മുന്നിൽ ആദിത്യന്റെ രൂപം പ്രത്യക്ഷപ്പെട്ടു…. "മകളേ നീയിനി മുന്നോട്ട് പോകണ്ട. കാലാന്തകൻ കീഴടങ്ങിയിരിക്കുന്നു. തിരികെ വരൂ," ആ രൂപം കൈനീട്ടി വിളിച്ചു. അനന്ത സന്തോഷത്തോടെ മുന്നോട്ട് നീങ്ങിയെങ്കിലും മണികണ്ഠൻ അവളെ തടഞ്ഞു…. "റാണി നിൽക്കൂ ഇത് നിന്റെ അച്ഛനല്ല. ആദിത്യൻ ഒരിക്കലും നാഗദണ്ഡ് നേടാതെ മകളെ പിന്തിരിപ്പിക്കില്ല. ഇത് കാലാന്തകന്റെ മായയാണ്".... മണികണ്ഠന്റെ വാക്കുകൾ കേട്ട് അനന്ത ശ്രദ്ധിച്ചു. ആ രൂപത്തിന് നിഴലില്ലായിരുന്നു. അവൾ തന്റെ തൃതീയ നേത്രം ജ്വലിപ്പിച്ചു….. ഒരു വലിയ സ്ഫോടനത്തോടെ ആ കപടരൂപം അപ്രത്യക്ഷമായി. പകരം ഭീകരനായ ഒരു പുകരൂപം അവിടെ തെളിഞ്ഞു. കാലാന്തകന്റെ പ്രധാന സേനാനായകൻ ധൂമകേതു ആയിരുന്നു അത്… "നിങ്ങൾ എത്ര ശ്രമിച്ചാലും നാഗദണ്ഡിലേക്ക് എത്താൻ ഞാൻ അനുവദിക്കില്ല" ധൂമകേതു അലറി….. ധൂമകേതുവിന്റെ സൈന്യം അവരെ വളഞ്ഞു. മണികണ്ഠൻ തന്റെ നീലകണ്ഠ ശംഖ് മുഴക്കി. അവൻ ഭൂമിയിലെ സർവ്വ സൈന്യാധിപനായി മാറി പോരാടി. മഞ്ഞിനെ പിളർത്തുന്ന അഗ്നിബാണങ്ങൾ അവൻ തൊടുത്തു. "റാണി നീ ആ ഗുഹയ്ക്കുള്ളിലേക്ക് പോകൂ. ഈ അസുരന്മാരെ ഞാൻ തടയാം. ദണ്ഡ് നേടാതെ നീ പുറത്തുവരരുത്".... മണികണ്ഠന്റെ ദൃഢനിശ്ചയത്തിന് മുന്നിൽ അനന്ത തലയാട്ടി. അവൾ ഗുഹയുടെ ആഴങ്ങളിലേക്ക് നീങ്ങി…. ഗുഹയ്ക്കുള്ളിൽ ഭയങ്കരമായ നിശബ്ദതയായിരുന്നു. അവിടെ ഒരു വലിയ പാറയിൽ സർപ്പരൂപത്തിൽ ചുറ്റിക്കിടക്കുന്ന ഒരു ദണ്ഡ് അനന്ത കണ്ടു. പക്ഷേ അതിൽ തൊടാൻ ശ്രമിച്ചപ്പോൾ ആയിരക്കണക്കിന് തേളുകളും പാമ്പുകളും അവളെ ആക്രമിക്കാൻ വന്നു. അത് അവളുടെ ഉള്ളിലെ ഭയത്തെ പരീക്ഷിക്കുകയായിരുന്നു… അനന്ത കണ്ണുകളടച്ചു ധ്യാനിച്ചു… "ഞാൻ നാഗലോകത്തെ റാണിയാണ്, പക്ഷേ അതിലുപരി ഞാൻ പദ്മയുടെയും ആദിത്യന്റെയും മകളാണ്. സ്നേഹത്തിന് മുന്നിൽ ഭയത്തിന് സ്ഥാനമില്ല.".... അവൾ ശാന്തമായി ദണ്ഡിൽ കൈവെച്ചു. ആ നിമിഷം തേളുകളെല്ലാം പൂക്കളായി മാറി. സുവർണ്ണ പ്രഭയോടെ നാഗദണ്ഡ് അനന്തയുടെ കൈകളിൽ അലിഞ്ഞുചേർന്നു. അവളുടെ നെറ്റിയിൽ അപ്പോഴാണ് ആ അത്ഭുതം സംഭവിച്ചത് യഥാർത്ഥ രുദ്രനാഗ മുദ്ര അവിടെ തെളിഞ്ഞു..... അനന്ത ദണ്ഡ് കൈക്കലാക്കിയ നിമിഷം പാതാളത്തിന്റെ ഏഴാം ലോകത്ത് തടവിലായിരുന്ന കാലാന്തകൻ വേദനയോടെ ഗർജ്ജിച്ചു. അവന്റെ ശക്തിയുടെ ഒരു ഭാഗം ക്ഷയിച്ചു തുടങ്ങി…. ഹിമാലയത്തിലെ യുദ്ധക്കളത്തിലേക്ക് അനന്ത തിരിച്ചെത്തി. അവളുടെ കയ്യിലെ ദണ്ഡിൽ നിന്നും പുറപ്പെട്ട പ്രകാശത്തിൽ ധൂമകേതുവും സൈന്യവും കരിഞ്ഞുപോയി. എന്നാൽ മണികണ്ഠൻ തളർന്ന് മണ്ണിൽ വീണിരുന്നു. അവന്റെ ശരീരം വിഷം പടർന്ന് നീലനിറമായി മാറുകയായിരുന്നു… തുടരും… ✍️ സന്തോഷ്‌ ശശി… #📙 നോവൽ #💞 പ്രണയകഥകൾ #📔 കഥ #✍ തുടർക്കഥ #കഥ,ത്രില്ലെർ,ഹൊറർ