ഭദ്രകാളീപഥം ഭാഗം 10 അസുരരക്തന്റെ അന്ത്യത്തിന് പിന്നാലെ ആകാശം പുകപടലങ്ങളാൽ മൂടപ്പെട്ടു. ധർമ്മപുരിയുടെ മണ്ണിൽ നിന്ന് പടർന്ന ആ പുകയ്ക്ക് ചീഞ്ഞളിഞ്ഞ മൃതദേഹങ്ങളുടെ ഗന്ധമായിരുന്നു. അന്ധകാരത്തിന്റെ അധിപനായ കാലനേമി വെറുമൊരു മന്ത്രവാദിയല്ല, യുഗങ്ങളായി ഉറങ്ങിക്കിടന്നിരുന്ന ഒരു പുരാതന രാക്ഷസശക്തിയായിരുന്നു…. ധർമ്മപുരിയുടെ കൊട്ടാരത്തിന് മുകളിൽ കറുത്ത മിന്നലുകൾ വെട്ടി. പുകയ്ക്കുള്ളിൽ നിന്ന് പത്തടിയോളം ഉയരമുള്ള, നീളൻ നഖങ്ങളും തീക്കണ്ണുകളുമുള്ള കാലനേമി പ്രത്യക്ഷപ്പെട്ടു. അവന്റെ ചിരി കേട്ടപ്പോൾ ഗ്രാമവാസികളുടെ കാതുകളിൽ നിന്ന് ചോര പൊടിഞ്ഞു…. "രുദ്രാ..." കാലനേമി അലറി. "പതിനായിരം വർഷങ്ങൾക്ക് മുൻപ് കൈലാസത്തിൽ വെച്ച് നിന്റെ ഗുരു എനിക്ക് നൽകിയ ശാപം ഇന്ന് തീരുകയാണ്. നിന്റെ ഈ മാനുഷിക രൂപം എന്നെ തടയാൻ പോന്നതല്ല".... ആദ്യമായി ഭദ്ര രുദ്രന്റെ കണ്ണുകളിൽ ഒരു നിഴൽ കണ്ടു.. ഭയമല്ല, മറിച്ച് തന്റെ ഭൂതകാലത്തെക്കുറിച്ചുള്ള വലിയൊരു വേദനയായിരുന്നു അത്…. "ഭദ്രേ," രുദ്രൻ തളർന്ന സ്വരത്തിൽ പറഞ്ഞു. "കാലനേമി എന്റെ പഴയ ശത്രുവാണ്. ഇവനെ കൊല്ലാൻ സാധാരണ ദിവ്യശക്തികൾ പോരാ. എന്റെ ഈ ശരീരം ഒരു പരിധിക്കപ്പുറം അവന്റെ ശക്തിയെ പ്രതിരോധിക്കില്ല. നീ നിന്റെ ഉള്ളിലെ കാളീചൈതന്യത്തിന്റെ പരമമായ രൂപം പുറത്തെടുക്കേണ്ടി വരും."..... കാലനേമി തന്റെ വിരലുകൾ വായുവിൽ ചലിപ്പിച്ചു. പെട്ടെന്ന് ഭദ്രയും രുദ്രനും ഒരു രക്ത പത്മവ്യൂഹത്തിനുള്ളിൽ അകപ്പെട്ടു… ആ വ്യൂഹത്തിനുള്ളിൽ സമയം നിലച്ചുപോയി. ഭദ്രയ്ക്ക് അവളുടെ വാൾ ഉയർത്താൻ പോലും കഴിയാത്തവിധം ശരീരം തളർന്നു. ഓരോ നിമിഷവും അവളുടെ ഓർമ്മകൾ മാഞ്ഞുപോകാൻ തുടങ്ങി….. "നിന്റെ ഭക്തിയും നിന്റെ വാളും ഇവിടെ ഉപയോഗശൂന്യമാണ് പെണ്ണേ" കാലനേമി പരിഹസിച്ചു…… ഭദ്ര പൂർണ്ണമായും മായയിൽ അകപ്പെട്ടുവെന്ന് കണ്ടപ്പോൾ രുദ്രൻ ഒരു കഠിനമായ തീരുമാനമെടുത്തു. അവൻ തന്റെ ത്രിശൂലം നെഞ്ചോട് ചേർത്ത് പിടിച്ച് ധ്യാനിച്ചു. അവന്റെ നെറ്റിയിലെ മൂന്നാം കണ്ണ് പതുക്കെ തുറക്കാൻ തുടങ്ങി….. "ഭദ്രേ... നിനക്ക് വഴികാട്ടാൻ ഞാൻ എന്റെ പ്രാണശക്തിയെ പ്രകാശമാക്കി മാറ്റുന്നു. ആ പ്രകാശത്തിൽ നീ സത്യം കാണുക"... രുദ്രന്റെ ശരീരത്തിൽ നിന്ന് ഒരു വലിയ തേജസ്സ് പുറപ്പെട്ടു. ആ പ്രകാശം രക്ത പത്മവ്യൂഹത്തെ തകർത്തു തരിപ്പണമാക്കി. മായ മാഞ്ഞപ്പോൾ ഭദ്ര കണ്ടത് കാലനേമി രുദ്രനെ തന്റെ ഇരുമ്പ് കൈകൾ കൊണ്ട് വരിഞ്ഞുമുറുക്കുന്നതാണ്. രുദ്രന്റെ പ്രഭ മങ്ങാൻ തുടങ്ങിയിരിക്കുന്നു…. തന്റെ പ്രിയപ്പെട്ട വഴികാട്ടിയും പോരാളിയുമായ രുദ്രൻ മരണത്തോടടുക്കുന്നത് കണ്ട ഭദ്രയുടെ ഉള്ളിൽ നടുക്കം മാറി രൗദ്രം നിറഞ്ഞു. അവൾ തന്റെ വാൾ ആകാശത്തേക്ക് ഉയർത്തി നിലവിളിച്ചു….. ഭൂമി പിളർന്നു. കാളിക്ഷേത്രത്തിലെ സർവ്വ മണികളും ഒരേസമയം മുഴങ്ങി. ഭദ്രയുടെ രൂപം മാറാൻ തുടങ്ങി. അവളുടെ നിറം കടുംനീലയായി മാറി, എട്ടു കൈകളിൽ വിവിധ ആയുധങ്ങൾ പ്രത്യക്ഷപ്പെട്ടു. അവൾ വെറുമൊരു ഭദ്രയല്ല, മഹാകാളി ആയി മാറി….. മഹാകാളി രൂപം പൂണ്ട ഭദ്രയുടെ മുന്നിൽ കാലനേമി വിറച്ചുപോയി. അവൾ തന്റെ വാൾ കൊണ്ട് കാലനേമിയുടെ ഒരു കൈ വെട്ടിമാറ്റി. പക്ഷേ ആ മുറിവിൽ നിന്ന് ചോരയ്ക്ക് പകരം കറുത്ത സർപ്പങ്ങൾ പുറത്തുവന്നു…… രുദ്രൻ തളർന്ന് വീണുകൊണ്ടു പറഞ്ഞു… "അവന്റെ ഹൃദയത്തിലെ 'കാലബിന്ദു' തകർക്കൂ ഭദ്രേ... എങ്കിൽ മാത്രമേ ഈ അന്ധകാരം നീങ്ങൂ"..... തുടരും…. ✍️സന്തോഷ്‌ ശശി…. #📔 കഥ #✍ തുടർക്കഥ #💞 പ്രണയകഥകൾ #കഥ,ത്രില്ലെർ,ഹൊറർ #📙 നോവൽ