ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/61yylgd?d=n&ui=v64j8rk&e1=cശിക്ഷാർഹം - പാർട്ട് 18 കാഷ്വാലിറ്റിയിലേക്ക് പ്രവേശിക്കുംമുൻപ് തന്നെ ആൽബി ഹോസ്പിറ്റലിൽ വിളിച്ച് വിവരമറിയിച്ചിരുന്നു. ബൊലേറോ, ഹോസ്പിറ്റൽ കോമ്പൗണ്ടിലേക്കു കയറിയതും സ്ട്രെച്ചറുമായി ഓടിയെത്തിയ അറ്റൻഡർമാർ അവരുടെ ജോലി ആരംഭിച്ചു. പോത്തൻ പൂർണ്ണമായും അബോധാവസ്ഥയിലാണിപ്പോൾ. കാഷ്വാലിറ്റിയിൽ അവർ എല്ലാ സജ്ജീകരണങ്ങളും തയ്യാറാക്കി വെച്ചിരുന്നു. അവരുടെ പെരുമാറ്റത്തിൽ നിന്നു തന്നെ, ഇത് പോത്തന്റെ സ്ഥിരമുള്ള ആശുപത്രി സന്ദർശനമാണെന്ന് ആൽബിക്കു മനസ്സിലായി. സമയം കടന്നു പോയി.ആൽബി ഇതികർത്തവ്യാമൂഢനായി കാഷ്വാലിറ്റിക്കു വെളിയിൽ നില്ക്കുകയാണ്‌. ആരെയെങ്കിലുമൊന്ന് വിളിച്ചറിയിക്കണമെന്നുണ്ടായിരുന്നു അയാൾക്ക്. പക്ഷേ ആരെ ? പോത്തനുമായി ബന്ധപ്പെട്ട ഒരു മനുഷ്യനെപ്പോലും തനിക്കു പരിചയമില്ല. ഏതാണ്ട് ഒരു മണിക്കൂറിനു ശേഷം ഒരു ഡോക്ടർ വാതിൽ തുറന്ന് വെളിയിലേക്കിറങ്ങി വരുന്നതു കണ്ട് ആൽബി ഓടിച്ചെന്നു. “പോത്തന്റെ കൂടെ വന്നതല്ലേ ? ” ഡോക്ടറുടെ സ്വരത്തിന്‌ യാതൊരു മയവുമില്ലായിരുന്നു. “യെസ്. ഡോക്ടർ. ഞാൻ ആൽബർട്ട്” ആൽബി ഹസ്തദാനത്തിനായി കൈ നീട്ടി. “ഉം... ഞാൻ ഡോക്ടർ ജോസഫ് വർക്കി . തന്നെ എനിക്കറിയാഡോ. ഇതെങ്ങനാ നിങ്ങൾ ഒരുമിച്ച് വന്നെ ? പോത്തൻ ക്രൈം ബ്രാഞ്ചിലല്ലേ ? ” ഡോക്ടർ ചോദ്യം ചോദിക്കുന്നുണ്ടെങ്കിലും, ഉത്തരം കേൾക്കാൻ തീരെ താല്പ്പര്യമില്ലെന്ന് മുഖഭാവത്തിൽ നിന്നറിയാം. “താല്ക്കാലികമായി, ഒരു കേസിന്റെ കാര്യത്തിന്‌ പരിചയപ്പെട്ടതാണ്‌.” “ഓക്കേ! അയാൾ സ്റ്റേബിളായിട്ടുണ്ട്. ഇപ്പൊ റൂമിലേക്കു മാറ്റും. എൽസിയെ വിളിച്ചാൽ മതി. അതു കഴിഞ്ഞ് തനിക്കു പോകാം.” “അപ്പോ ഐസീയൂ വിലേക്ക് മാറ്റുന്നില്ലേ ഡോക്ടർ ? ഒത്തിരി ബ്ലഡ് ഒക്കെ വൊമിറ്റ് ചെയ്തിരുന്നു.” ആൽബി അമ്പരന്നു. “അതു പോലെ, ആരാ ഈ എൽസി ? ” “എൽസി അയാൾടെ വൈഫ്. ഇതെന്താ നിങ്ങളു തമ്മിൽ പരിചയമൊന്നുമില്ലേ ? ” ഡോക്ടർക്ക് ദേഷ്യമായിരുന്നു. “ഞാൻ പറഞ്ഞല്ലോ ഡോക്ടർ... ഇന്നു രാവിലെയാണ്‌ ഇയാൾ ഒരു കേസിന്റെ ആവശ്യത്തിനായി-” “ഓക്കേ! തല്ക്കാലം, എൽസി വരുന്നതു വരെ ഇവിടെ ഉണ്ടാകണം. എനിക്ക് അയാളുടെ മുഖം പോലും കാണണ്ട ഇനി. നമുക്ക് ഒരു പട്ടീടെ വില പോലും തരാത്തോരോട് എന്തു പറഞ്ഞിട്ടെന്താ കാര്യം ? ഐസീയു ഒക്കെ ഇങ്ങനെ ചാവാൻ കച്ച കെട്ടിയിറങ്ങിയിട്ടുള്ളവർക്കു വേണ്ടി വേസ്റ്റ് ചെയ്യാൻ പറ്റില്ല. റൂമിലേക്ക് മാറ്റാൻ ഞാൻ പറഞ്ഞിട്ടുണ്ട്.” “അതെന്തു സംസാരമാണ്‌ ഡോക്ടർ! ” ആൽബി ഗൗരവത്തിലായി. “താൻ ഇന്നു പരിചയപ്പെട്ടല്ലേ ഉള്ളൂ. നല്ലോരു മനുഷ്യനാ. വിടണ്ട. കൂടെ കൂട്ടിക്കോ.” ഡോക്ടർ ആൽബിയെ തള്ളിയകറ്റിക്കൊണ്ട് പറഞ്ഞു. അവർക്കിടയിലൂടെ പോത്തനുമായി സ്ട്രെച്ചർ പുറത്തേക്കിറങ്ങി വന്നു. മലർന്നു കിടന്ന പോത്തന്റെ മുഖത്ത് നിറഞ്ഞ ചിരിയായിരുന്നു. ഡോക്ടറേയും, ആൽബിയേയും മാറി മാറി നോക്കി അയാൾ പല്ലിളിച്ചു ചിരിച്ചു. ചമ്മൽ മറക്കാനാണ്‌ അയാൾ ശ്രമിക്കുന്നതെന്ന് ആൽബിക്കു മനസ്സിലായി. പക്ഷേ ഡോക്ടറുടെ മുഖത്ത് തികഞ്ഞ അവജ്ഞയായിരുന്നു. “ഇളിച്ചോ ഇളിച്ചോ... തീർന്നു കഴിയുമ്പൊ ബോഡി മെഡിക്കൽ കോളേജിനു തന്നേക്കണം കേട്ടോ. അത്രേം മെനക്കെട്ടിട്ടുണ്ട് ഞാൻ.” ഡോക്ടർ തിരിഞ്ഞു നടക്കാനൊരുങ്ങി. “തനിക്കറിയാവോ ? ” പോത്തൻ തളർന്ന സ്വരത്തിൽ ആൽബിയോട് സംസാരിച്ചു തുടങ്ങി. “ഈ കക്ഷിക്ക് ഇതിനെപ്പറ്റി വലിയ ധാരണയൊന്നുമില്ല. ചുമ്മാ കോട്ടുമിട്ട് നടക്കുന്നെന്നേയുള്ളൂ.” ഡോക്ടർ തിരിഞ്ഞു നിന്നു. പോത്തൻ ചിരിയോടെ തുടരുകയാണ്‌. “അല്ലെങ്കി പിന്നെ, കഴിഞ്ഞ വട്ടം ഞാൻ പോകാൻ നേരത്ത് നിങ്ങളെന്താ പറഞ്ഞത് ? ഒരൊറ്റ പെഗ്ഗ് കൂടി. അതോടെ ഞാൻ തട്ടിപ്പോകുമെന്ന് ഭീഷണിപ്പെടുത്തി ഇറക്കി വിട്ടതാ എന്നെ. മൂന്നാലു മാസം മുൻപ്. എന്നട്ടോ ? ഡെയ്‌ലി ഞാൻ ആവെറേജ് അര ലിറ്റർ വെച്ച് അകത്താക്കുന്നുണ്ട്. നിങ്ങളു പറഞ്ഞ പ്രകാരം ഞാനിപ്പൊ എത്ര വട്ടം ചാകേണ്ടതാ ? ” “വല്യ മിടുക്കായിപ്പോയി. എന്തായാലും ഞാൻ പറഞ്ഞത് മറക്കണ്ട. ബോഡി ഞങ്ങൾക്കു വേണം. തന്റെ കരളൊക്കെ ശരിക്കും സിലബസിൽ ഉൾപ്പെടുത്തേണ്ടതാ.” പല്ലു കടിച്ചു പിടിച്ചാണ്‌ ഡോക്ടറുടെ സംസാരം. “ആ സ്കാനിങ്ങിന്റെ റിസൾട്ട് ഒന്നു വന്നോട്ടെ കേട്ടോ. ബാക്കി ഞാൻ എന്നിട്ട് പറഞ്ഞു തരാം. മിക്കവാറും, ലിവർ ട്രാൻസ്പ്ലാന്റ് അല്ലാതെ ഇനി ഒരു വഴിയും കാണില്ല. മൊത്തം ദ്രവിച്ചു തീർന്നു കാണും. ഉറപ്പാ.” “ഓ... കരളിന്റെ കാര്യം പറഞ്ഞപ്പളാ ഓർത്തെ. എൽസിയെ ഒന്നു വിളിക്ക്. അല്ലെങ്കി പാവം ആൽബി ഇവിടെ കുടുങ്ങും. അയാൾക്കാണെങ്കി എന്നെ കാണുന്നതു തന്നെ വെറുപ്പാ.“ പോത്തന്റെ മുഖത്ത് അപ്പോഴും ചിരിയായിരുന്നു. മുറിക്കുള്ളിലേക്ക് പോകുന്ന വഴിയിലെല്ലാം, പോത്തൻ വളരെ നിസ്സാരമായി തമാശകൾ പറഞ്ഞ് സ്വയം ചിരിക്കുന്നത് അത്ഭുതത്തോടെയാണ്‌ ആൽബി നോക്കിക്കണ്ടത്. മരണം തൊട്ടു പുറകിൽ നില്ക്കുമ്പോഴും ഇങ്ങനെ നിസംഗതയോടെ ഒരു മനുഷ്യനെങ്ങനെ പെരുമാറാനാകും ? പോത്തന്റെ ഫോൺ താഴെ കാഷ്വാലിറ്റിയിൽ ഏല്പ്പിച്ചിരുന്നു. അതുകൊണ്ട് ആൽബിയാണ്‌ എൽസിയെ വിളിച്ചത്. പോത്തൻ പറഞ്ഞു കൊടുത്ത നമ്പർ ഡയൽ ചെയ്ത് ഫോൺ ഏല്പ്പിക്കാൻ ശ്രമിച്ചതും, അയാൾ കയ്യുയർത്തി തടഞ്ഞു. ”തനിക്ക് ഇവിടെ നിന്ന് രക്ഷപ്പെടണമെങ്കിൽ, താൻ തന്നെ അവളോട് വരാൻ പറയൂ. ഞാൻ സംസാരിച്ചാൽ ചിലപ്പൊ വഷളാകും. അവളു ചിലപ്പൊ വന്നില്ലെന്നും വരും. എന്റെ കൂടെ ഒരു രാത്രി മുഴുവൻ ബൈസ്റ്റാൻഡറായി നില്ക്കേണ്ടി വരുന്നത് ആൽബി സാറൊന്നാലോചിച്ചു നോക്കിക്കേ.“ അയാൾ ഉറക്കെ ചിരിച്ചു. ആൽബി ഫോൺ ചെവിയോട് ചേർത്തു. ”ഹലോ...“ അപ്പുറത്തു നിന്നും എൽസിയുടെ ശബ്ദം കേട്ടതും, ആൽബി പുറത്തേക്കിറങ്ങി നിന്നു. ”എൽസി മാഡം... എന്റെ പേര്‌ ആൽബർട്ട്. സർക്കിൾ ഇൻസ്പെക്ടറാണ്‌.“ ”ഉം...എന്താ കാര്യം ? “ പോത്തൻ പറഞ്ഞത് സത്യം. അപ്പുറത്തെ ശബ്ദത്തിന്‌ യാതൊരു മയവുമില്ല. ആൽബി ഒരു നിമിഷ നേരത്തേക്ക് നിശബ്ദനായിപ്പോയി. “ഹലോ! വിളിച്ചിട്ട് മിണ്ടാതെ നില്ക്കുന്നോ ? എന്താണു വേണ്ടത് മിസ്റ്റർ ആൽബർട്ട് ? ” എൽസി ഗൗരവത്തിലാണ്‌. “മാഡം, മിസ്റ്റർ പോത്തന്‌ പെട്ടെന്ന് ഒരു സുഖമില്ലായ്മ വന്നു. ഇവിടെ ഹോസ്പിറ്റലിലാണ്‌. മിഷൻ ഹോസ്പിറ്റലിൽ... അതൊന്നു പറയാൻ വേണ്ടിയാണ്‌.” “ആഹാ! എന്താ പറ്റിയെ പുള്ളിക്ക് ? ” നിസംഗതയോടെയുള്ള ചോദ്യം. “ഇന്ന് വൈകിട്ട് ചെറിയ ഒരു പ്രശ്നമുണ്ടായി. ആളു കുഴഞ്ഞു വീണ്ടു. ഞാൻ നേരേ ഇങ്ങോട്ടു കൊണ്ടു വന്നു. ഇപ്പൊ പ്രശ്നമില്ല. റൂമിലേക്ക് മാറ്റി. സീരിയസൊന്നുമല്ല.” “ഓക്കേ! അതൊക്കെ അങ്ങനെ കിടക്കും. നിങ്ങളതിന്റെ പുറകേ തൂങ്ങാനൊന്നും നിക്കണ്ട. അയാൾക്കിതൊക്കെ പതിവാ.” “പക്ഷേ മാഡം, മിസ്റ്റർ പോത്തൻ ഇന്ന് നൈറ്റ് ഇവിടെ അഡ്മിറ്റാണ്‌.” “അതൊക്കെ സാധാരണം. നിങ്ങൾ വറി ചെയ്യണ്ട. അയാൾ നാളെ രാവിലെ എണീറ്റിങ്ങു പോന്നോളും.” പെട്ടെന്ന് അവർക്കോർമ്മ വന്നു. “ഓ, മിസ്റ്റർ ആൽബർട്ട് അവിടെ പെട്ടു പോകും അല്ലേ ? അതാണ്‌ വിഷയം. ഞാൻ വരണമായിരിക്കും.” “യെസ് മാഡം. If you dont mind.” അപ്പുറത്തു നിന്നും ഒരു ദീർഘനിശ്വാസം കേട്ടു. “മാഡം, റൂം നമ്പർ ....” “ഓക്കെ. ഞാൻ വന്നേക്കാം. ആൽബർട്ട് എന്നു പറയുമ്പൊ, സർക്കിൾ ഇൻസ്പെക്ടർ ആൽബിയല്ലേ ഇത് ? ” “അതേ! ” അമ്പരന്നു പോയി ആൽബി. “ഉം. പോത്തൻ പറയാറുണ്ട് തന്റെ കാര്യം. ഞാനുടനെയെത്താം. പോകരുത് കേട്ടോ. നമുക്ക് ഒന്നു സംസാരിക്കാനുണ്ട്.” അപ്പുറത്ത് ഫോൺ കട്ടായി. ആൽബി കുറച്ചു നേരത്തേക്ക് അങ്ങനെ തന്നെ നിന്നു പോയി. തന്നെപ്പറ്റി പോത്തൻ ഭാര്യയോട് സംസാരിക്കാറുണ്ടെന്നോ ? അങ്ങനെ പരസ്പരം എല്ലാ കാര്യങ്ങളും തുറന്നു സംസാരിക്കുന്ന രീതിയിലുള്ള ഒരു ബന്ധമാണ്‌ അവർ തമ്മിൽ എന്ന് ആ സ്ത്രീയുടെ സംസാരം കേട്ടിട്ടു തോന്നിയില്ല. തിരിച്ച് റൂമിലെത്തിയപ്പോൾ പോത്തൻ തന്നെത്തന്നെ സാകൂതം നോക്കി ഒരു പുഞ്ചിരിയോടെ അനങ്ങാതെ കിടക്കുന്നതു കണ്ട് ആൽബിയും ഒന്നു പുഞ്ചിരിക്കാൻ ശ്രമിച്ചു. “... എൽസി വരില്ലേ ? ” പോത്തന്റെ സ്വരത്തിലെ ക്ഷീണം വളരെ കുറഞ്ഞിരിക്കുന്നു. “ഉം. ഇപ്പൊ എത്താമെന്നു പറഞ്ഞു. ഞാൻ കുഴപ്പമൊന്നുമില്ല എന്നു പറഞ്ഞിട്ടുണ്ട്.” “അവൾ അങ്ങനെ പേടിക്കുന്ന ടൈപ്പൊന്നുമല്ലഡോ. ഒടുക്കത്തെ വിൽ പവറാ.” “നിങ്ങൾ എന്റെ കാര്യം അവരോട് സംസാരിക്കാറുണ്ടോ ? ” ആൽബി അരികിലെ കസേരയിൽ ഇരുന്നു. “അവർ അങ്ങനെ പറഞ്ഞു എന്നോട്.” “പിന്നെ. താൻ എന്റെ കാര്യം തന്റെ ഭാര്യയോട് സംസാരിക്കാറില്ലേ ? “ ആൽബി മറുപടിയൊന്നും പറഞ്ഞില്ല. ”ആൽബിക്ക് ഒത്തിരി രഹസ്യങ്ങളുണ്ട്. അല്ലേ ? ഒന്നും തുറന്നു സംസാരിക്കാൻ ഇഷ്ടമല്ല. എപ്പോഴും ഈ നിഗൂഢത കൊണ്ടു നടക്കണമെന്ന വാശിയാണ്‌.“ ”നിങ്ങൾക്ക് എന്നോടെന്തോ പറയാനുണ്ടെന്നു പറഞ്ഞില്ലേ ? മാർക്കറ്റിൽ വെച്ച്. എന്താരുന്നു ? “ പോത്തൻ ആൽബിയോട് അടുത്തേക്കിരിക്കാൻ ആംഗ്യം കാട്ടി. ”ആരാരുന്നു ആൽബി ഫോണിൽ ? “ ”ഫോണിലോ ? എപ്പൊ ? “ ആൽബിക്ക് മനസ്സിലായില്ല. ”മാർക്കറ്റിൽ വെച്ച്, ഞാൻ തന്നെ അവസാനം കാണുമ്പൊ, തനിക്കൊരു കോൾ വന്നിരുന്നു. താൻ അതുമായി മാറി നിന്ന് സംസാരിക്കുന്നത് ഞാൻ കണ്ടതാണ്‌. ആരായിരുന്നു ? “ ആൽബിയുടെ മുഖം മാറി. ”എനിക്ക് നിങ്ങളെ മനസ്സിലാകുന്നേയില്ല മിസ്റ്റർ പോത്തൻ! നിങ്ങൾക്കെങ്ങനെ ഇങ്ങനെയാകാൻ പറ്റുന്നു ? എന്റെ ഫോണിൽ ഒരു കോൾ വന്നിട്ടുണ്ടെങ്കിൽ, അത് എന്റെ പേഴ്സണൽ കാര്യമല്ലേ ? എത്ര ചീപ്പാണ്‌ നിങ്ങൾ ? What is wrong with you ? “ ”മറഞ്ഞിരുന്നു ഞാൻ കേട്ടില്ലല്ലോ. ആൽബിക്ക് ഒരു കോൾ വരുന്നതു കണ്ടു. ആൽബി പെട്ടെന്ന് ചുറ്റും നോക്കി ഒരു കള്ള ലക്ഷണത്തോടെ മാറി നിന്ന് സംസാരിക്കുന്നതു കണ്ടു. അത്ര തന്നെ. സ്വാഭാവികമായും എനിക്കൊരു കൗതുകം തോന്നുമല്ലോ.ഒന്നുമില്ലേലും ഞാനൊരു പോലീസുകാരനല്ലേഡോ.“ ”പറയുന്നകൊണ്ടൊന്നും വിചാരിക്കരുത് . മറ്റുള്ളോരുടെ സ്വകാര്യ വിഷയങ്ങളിൽ ഇങ്ങനെ കൗതുകം തോന്നുന്നത് ഒരു തരം മാനസീക പ്രശ്നമാണ്‌.“ ”തന്നെ ആരെങ്കിലും ബ്ലാക്ക്മെയിൽ ചെയ്യുന്നുണ്ടോ ആൽബീ ? “ പെട്ടെന്നായിരുന്നു ആ ചോദ്യം. ”വാട്ട് ? “ ആൽബി കസേരയിൽ നിന്നെഴുന്നേറ്റു. ”തന്നെ എനിക്കൊത്തിരി ഇഷ്ടമാണ്‌ ആൽബി. സത്യമായിട്ടും. താനൊരു നല്ല ഓഫീസറാണെന്നു ഞാൻ പറയില്ല . പക്ഷേ, ചില കാര്യങ്ങളിൽ താൻ മിടുക്കനാണ്‌. അന്ന് ആ സാബു ഷൂട്ടിങ്ങ് കേസ് തന്നെ ഉദാഹരണം. താൻ അത് ഹാൻഡിൽ ചെയ്ത രീതി. എനിക്കൂഹിക്കാനാകും, ആ സമയത്ത് അങ്ങനെ ഒരു തീരുമാനമെടുക്കാനുണ്ടായ ബുദ്ധിമുട്ട്. പക്ഷേ താനതു ചെയ്തു. ഭംഗിയായി തന്നെ. തനിക്കത് ഗുണമാക്കി തീർക്കുകയും ചെയ്തു. സ്മാർട്ട് മൂവ്. പക്ഷേ, അതു കഴിഞ്ഞ് താൻ നടത്തിയ ചില നീക്കങ്ങൾ... അതിൽ തനിക്ക് പല പാളിച്ചകളും പറ്റി ആൽബി.“ ”കാടടച്ചു വെടി വെക്കുകയാണല്ലേ ? “ ആൽബി പുച്ഛത്തിൽ ഒന്നു ചിരിച്ചു. ”എന്തെങ്കിലുമൊക്കെ വിളിച്ചു പറഞ്ഞാൽ ഞാനങ്ങ് സമ്മതിച്ചു തരുമെന്നൊരു തോന്നൽ. കാരണം, താനൊരു ബുദ്ധിരാക്ഷസനാണല്ലോ. ക്രൈംബ്രാഞ്ചല്ലേ. വെറുതെയാണ്‌ മിസ്റ്റർ പോത്തൻ. ഇങ്ങനെയൊന്നും കുലുക്കിയാൽ വീഴുന്നയാളല്ല ഞാൻ. തനിക്കത് പണ്ടേ മനസ്സിലായിക്കാണുമെന്നാണ്‌ ഞാൻ കരുതിയത്. പക്ഷേ-“ ”സോ... ആരും തന്നെ ബ്ലാക്ക്മെയിൽ ചെയ്യുന്നില്ല.“ ”ഇല്ല.“ ”ഓക്കേ! “ പോത്തൻ ദീർഘനിശ്വാസത്തോടെ ബെഡിൽ എഴുന്നേറ്റിരുന്നു. ”ഇനി ഞാൻ ഒരു ചോദ്യം കൂടി ചോദിക്കുകയാണ്‌. ആൽബി അപ്സറ്റാകുമെന്നെനിക്കറിയാം. പക്ഷേ ഈ ചോദ്യം ഞാൻ തന്നോട് ഇപ്പോൾ ചോദിച്ചില്ലെങ്കിൽ, ഭാവിയിൽ തന്റെ ഭാര്യയായിരിക്കും ഇത് ചോദിക്കുക. അയാം സോറി. എനിക്കിത് അറിഞ്ഞേ തീരൂ. ആൽബിക്ക്, ഡെയ്സി സെബാസ്റ്റ്യൻ എന്ന സ്ത്രീയുമായി എന്താണ്‌ ബന്ധം ? Are you having an affair with her ? “ ”വാട്ട്! ! “ ആൽബി നടുങ്ങിപ്പോയി. ”മതി ആൽബി. തന്റെ മറുപടി എനിക്കു കേൾക്കണ്ട. ഇപ്പൊ തന്റെ മുഖത്തുണ്ടായ ഈ എക്സ്പ്രെഷൻ മാത്രം മതി എനിക്ക് കാര്യങ്ങൾ മനസ്സിലാകാൻ.“ ”You are a sick sick man... you know that ? " ആൽബി കിതക്കുകയായിരുന്നു. “How Dare you ask me something like that ? എനിക്കൊരു കുടുംബമുണ്ട്. അഞ്ചു വയസ്സായ ഒരു മോളുണ്ട്. how could you ... I mean...” അയാളുടെ ചുണ്ടുകൾ വിറച്ചു. “ഓക്കെ. വിട്ടേക്കൂ...” പോത്തന്റെ നോട്ടം താഴെ തറയിലേക്കായി. “ഒരു കാര്യം ആൽബിക്ക് ഞാൻ ഉറപ്പു തരാം. എത്ര വലിയ ഊരാക്കുടുക്കിലേക്കാണ്‌ നിന്റെയീ പോക്കെന്ന് നിനക്കറിയില്ല ആൽബി. ഇനിയും വൈകിയിട്ടില്ല. നിനക്കറിയാവുന്നതെല്ലാം എന്നോട് തുറന്നു പറഞ്ഞ് നീ മുൻപോട്ടു വരാൻ തയ്യാറായാൽ... എന്തു വില കൊടുത്തും ഞാൻ തന്റെ കൂടെ നില്ക്കും. I'm very resourceful albi. ഞാൻ ഒരാളെ ഹെല്പ് ചെയ്യാമെന്ന് വെറും വാക്കു പറയുന്ന ആളല്ല.“ ”ഞാൻ തിരിച്ചൊന്നു ചോദിക്കട്ടെ ? “ആൽബി പല്ലു ഞെരിച്ചുകൊണ്ടാണ്‌ തിരിച്ചു സംസാരിച്ചത് “ ആ സാബു ഷൂട്ടിങ്ങ് കേസ് അന്വേഷിക്കാൻ വന്ന ക്രൈം ബ്രാഞ്ച് ഉദ്യോഗസ്ഥന്‌ ഈ കേസിൽ എന്താ കാര്യം ? അതാദ്യം പറഞ്ഞു തരൂ പ്ലീസ്. താനെന്തിനാ ഈ ആവശ്യമില്ലാത്തിടത്ത് തലയിട്ട് വെറുതേ പുലിവാലു പിടിക്കുന്നത് ? “ പോത്തൻ പുഞ്ചിരിച്ചു. ” ഞാൻ ചോദിക്കട്ടെ ? ഈ സാബു കേസ്... തന്റെ ഫ്രണ്ട് ജയകുമാറിന്റെ മരണം - ഡ്രൈവർ സന്തോഷിന്റെ ആത്മഹത്യ... ഇതൊക്കെ ഒരൊറ്റ കേസു തന്നെയല്ലേ എന്റെ ആൽബി സാറേ ? തനിക്കത് നന്നായി അറിയാം എന്നെനിക്കുറപ്പുണ്ട്. കാരണം, ഉറങ്ങുന്നവനേയും, ഉറക്കം നടിക്കുന്നവനേയും കണ്ടാൽ തിരിച്ചറിയാനുള്ള മിനിമം ബുദ്ധിയെങ്കിലും എനിക്കുണ്ട് എന്നു തന്നെയാണെന്റെ വിശ്വാസം.“ ആൽബിക്ക് മറുപടിയുണ്ടായിരുന്നില്ല. ”സീ ആൽബി, ഈ മൂന്നു കേസുകളിലും ഒരു കോമൺ എലമെന്റ് ഉണ്ട്. നീ ശ്രദ്ധിച്ചു കാണുമല്ലോ. ഇതിൽ മൂന്നിലും, നിന്നെ ഫ്രെയിം ചെയ്യാനൊരു ശ്രമം നടന്നിട്ടുണ്ട്. ശരിയല്ലേ ? സാബുവിന്റെ മരണം, അത് നിന്റെ തലയിൽ വന്നു പെട്ടതാണ്‌. ജയകുമാർ... നീയുമായി വഴക്കിട്ടു പോയ വഴിയിലാണ്‌ അവന്റെ മരണം. അതു പോലെ, സന്തോഷിന്റെ ആത്മഹത്യാ കുറിപ്പ്... അതിലും നിന്നെ പ്രതിയാക്കാൻ ശ്രമമുണ്ട്. ശരിയല്ലേ ? “ ആൽബി നെറ്റിയിലെ വിയർപ്പു തുടച്ചു. “നീ നിനക്കറിയാവുന്നതെല്ലാം തുറന്നു പറയൂ. ഞാൻ ചോദിച്ച രണ്ടു കാര്യങ്ങൾക്കുള്ള ആത്മാർത്ഥമായ മറുപടി തരൂ. അപ്പോ ഞാൻ ഈ കേസിന്റെ ചരിത്രം നിനക്കും പറഞ്ഞു തരാം. നിന്റെ ഊഹം ശരിയാണ്‌. എനിക്കീ കേസിൽ പേഴ്സണലായ മറ്റൊരു താല്പ്പര്യമുണ്ട്. പക്ഷേ അത് തന്നോട് തുറന്നു പറയണമെങ്കിൽ, താൻ ആദ്യം എന്നോട് സഹകരിക്കണം. സോ, ചോദ്യം ഒന്ന്. ആൽബിയെ ആരെങ്കിലും ബ്ലാക്ക്മെയിൽ ചെയ്യുന്നുണ്ടോ ? ഉണ്ടെങ്കിൽ ആര്‌. ചോദ്യം രണ്ട്. ഡെയ്സി സെബാസ്റ്റ്യൻ എന്ന സ്ത്രീയുമായി ആൽബിക്ക് എന്തെങ്കിലും അവിശുദ്ധ ബന്ധമുണ്ടോ ? നന്നായി ആലോചിച്ച് മറുപടി പറഞ്ഞാൽ മതി. പക്ഷേ... നീ ഓർക്കണം. ഇതുവരെ ഉണ്ടായിട്ടുള്ളതും, ഇനിയുണ്ടാകാൻ പോകുന്നതുമായിട്ടുള്ള എല്ലാ കുറ്റകൃത്യങ്ങളിലും, സർക്കിൾ ഇൻസ്പെക്ടർ ആൽബി നിരപരാധിയാണെന്നും, ആയിരിക്കുമെന്നും എനിക്കറിയാം. പക്ഷേ, ഭാവിയിൽ, അതറിയാവുന്ന ഏക വ്യക്തി ഞാൻ മാത്രമായിത്തീരും. നീ ഒരിക്കലും ഊരിപ്പോരാനാകാത്ത ഒരു കുരുക്കിൽ ചെന്നു വീഴുകയും ചെയ്യും. അതുപോലെ... മൂന്നു പേരുടെ ജീവനെടുത്ത കളിയാണിത് ആൽബി. ഇനിയും ആരുടേയും ജീവൻ നഷ്ടപ്പെടാതിരിക്കാൻ കൂടിയാണ്‌ ഞാനിതു പറയുന്നത് എന്നു കൂടി ഓർത്തോളൂ.” കുറേ സമയത്തെ നിശബ്ദതക്കു ശേഷമാണ്‌ ആൽബി സംസാരിച്ചു തുടങ്ങിയത്. “ഞാൻ എന്റെ വൈഫിനെ വഞ്ചിച്ചുകൊണ്ട് മറ്റൊരു പെണ്ണിന്റെ അടുത്തു പോയി എന്നാണ്‌ നിങ്ങൾ പറഞ്ഞത്... ഞാൻ നിങ്ങളെപ്പറ്റി ഇങ്ങനെ ഒരു അപവാദം പറഞ്ഞാൽ നിങ്ങൾ എങ്ങനെ പ്രതികരിക്കും മിസ്റ്റർ പോത്തൻ ? നിങ്ങളും ഒരു മാരീഡ് മാൻ അല്ലേ ? ” പോത്തൻ ആൽബിയുടെ മുഖത്തേക്ക് തന്നെ സൂക്ഷിച്ചു നോക്കി ഇരിക്കുകയാണ്‌. കണ്ണുകൾ സാവധാനം കൂർത്തു വന്നു. ആൽബിക്ക് അത് ശ്രദ്ധിക്കാതിരിക്കാനായില്ല. കാരണം ഇതിനു മുൻപ് അയാളത് കണ്ടിട്ടുള്ളതാണ്‌. പോത്തൻ ഫെലിക്സിനെ കൈകാര്യം ചെയ്യുന്നതിനു തൊട്ടു മുൻപ്. “Get out Albi...! ” അതീവ ഗൗരവത്തിലായിരുന്നു പോത്തനത് പറഞ്ഞത്. “തന്റെ കുടുംബത്തെപ്പറ്റി പറയുമ്പൊ വിഷമമുണ്ടല്ലേ ? ” “Get the fuck out of this room man ! ! " മുൻപോട്ടാഞ്ഞ പോത്തന്റെ കണ്ണുകളിൽ നിന്നും തീപ്പൊരികൾ ചിതറുന്നതു പോലെ തോന്നി ആൽബിക്ക്. ” എല്ലാം കയ്യീന്നു പോയീന്നു നിനക്കു മനസ്സിലായി. എന്നിട്ടും നീ അഭിനയിക്കുവാണ്‌! സൈക്കളോജിക്കൽ അപ്പ്രോച്ച്! അതും എന്നോട്! ! ഒരിത്തിരിയെങ്കിലും ബുദ്ധി നിനക്കുണ്ടായിരുന്നെങ്കിൽ, മന്ദബുദ്ധി എന്നെങ്കിലും വിളിക്കാമായിരുന്നു. എല്ലാമറിഞ്ഞുകൊണ്ടാണ്‌ ഞാൻ നിന്റെ മുൻപിലിരിക്കുന്നതെന്ന് നിനക്ക് പൂർണ്ണ ബോധ്യമുണ്ട്. എന്നിട്ടും നീ ആളെ പൊട്ടനാക്കാൻ നോക്കുന്നു! എന്തൊരു ദുരന്തമാടാ നീ! “ ആൽബി മറുപടിയൊന്നും പറയാതെ വാതിലിനെ ലക്ഷ്യമാക്കി തിരിഞ്ഞു. അവന്റെ മുഖം മുറുകിയിരുന്നു. ” മോനേ ആൽബീ... “ പോത്തൻ നിർത്താൻ ഉദ്ദേശമുണ്ടായിരുന്നില്ല. ” 21 കൊല്ലമായി ഞാൻ ഈ കയിലുകുത്തു തുടങ്ങിയിട്ട്. നിന്നോടൊക്കെ ഒരു ചോദ്യം ചോദിച്ച് അതിന്റെ ഉത്തരം നോക്കിയിരിക്കണ്ട കാര്യമില്ല എനിക്ക്. നിന്റെയൊക്കെയൊണ്ടല്ലോ, കണ്ണിമ ഒന്നു ചിമ്മിയാൽ എനിക്കു മനസ്സിലാകും കള്ള ലക്ഷണം. ഇനിയങ്ങോട്ട് നീ നോക്കിക്കോ മോനേ! പോത്തൻ എന്നൊരു ഫ്രണ്ടുണ്ടാകില്ല നിനക്ക്. ഉണ്ടാകുന്നതെല്ലാം ഒറ്റക്കനുഭവിക്കാം നിനക്ക്. നീ ചെല്ല്.“ പോത്തൻ അവസാനം പറഞ്ഞ വാചകം കേട്ടുകൊണ്ടാണ്‌ എൽസി മുറിക്കുള്ളിലേക്ക് കയറി വന്നത്. “കൊള്ളാല്ലോ! ” അവർ ആൽബിയെ നോക്കി ഒന്നു പുഞ്ചിരിച്ചു. “ഹായ്” ആൽബി ഉപചാരപൂർവ്വം അവരെ അകത്തേക്കു ക്ഷണിച്ചു. “ഞാനിറങ്ങാൻ തുടങ്ങുവാരുന്നു മാഡം. ഡോക്ടർ പറഞ്ഞത് നാളെ രാവിലെ ഡിസ്ചാർജ്ജ് ചെയ്യുമെന്നാണ്‌. ഇപ്പൊ പറയത്തക്ക പ്രശ്നമൊന്നുമില്ല.” “അതവടെ നിൽക്കട്ടെ. നിങ്ങളു തമ്മിലെന്താ പ്രശ്നം ? ” അവരുടെ ചുണ്ടിന്റെ കോണിലൊരു ചിരിയുണ്ടായിരുന്നു. “എൽസി... അയാളു പൊയ്ക്കോട്ടെ. നന്നാവാൻ ഉദ്ദേശമില്ലാത്തവരോട് നമ്മൾ സംസാരിച്ചിട്ടെന്തു പ്രയോജനം.” പോത്തനാണ്‌ പറഞ്ഞത്. “നന്നാവാൻ ഉദ്ദേശമുള്ള ആൾക്കാരായിരുന്നെങ്കിൽ ഇപ്പൊ ഈ കെടപ്പു കെടന്നോണ്ട് പ്രസംഗിക്കില്ലായിരുന്നല്ലോ. ആരും അങ്ങനെ മിടുക്കനാകാൻ നോക്കണ്ട! ” പോത്തന്റെ ടോണിനൊപ്പിച്ചു തന്നെയായിരുന്നു എൽസിയുടെ മറുപടി. “സോറി... ഞാനിറങ്ങുന്നു. നിങ്ങൾ സംസാരിക്കൂ മാഡം.” ആൽബി ശബ്ദം താഴ്ത്തി പറഞ്ഞുകൊണ്ട് വാതിലിന്റെ ഹാൻഡിലിൽ പിടിച്ചു. “ആൽബർട്ട്! ” എൽസിയുടെ വലതു കൈ അയാളുടെ തോളിലമർന്നു. “നമുക്കൊന്നു സംസാരിക്കണം. പോകാൻ വരട്ടെ. ഒരു 10 മിനിറ്റ്.” തുടർന്ന് അവർ അവനോടൊപ്പം പുറത്തെ കോറിഡോറിലേക്കിറങ്ങി. ആൽബിയുടെ നെറ്റി ചുളിഞ്ഞിരുന്നു. “പോത്തൻ ഇനി എത്ര കാലം ജീവിച്ചിരിക്കും എന്നറിയാമോ തനിക്ക് ? ” വളരെ സാധാരണ മട്ടിലാണ്‌ അവരതു ചോദിച്ചതെങ്കിലും, അവരുടെ ഉള്ളിൽ തിളയ്ക്കുന്ന വേദന ആ കണ്ണുകളിൽ പ്രതിഫലിക്കുന്നുണ്ടായിരുന്നു. “ഞാൻ ഒരു കഥ പറഞ്ഞു തരാം തനിക്ക്.” ആ സ്ത്രീ, ദീർഘനിശ്വാസത്തോടെ അവിടെ കിടന്ന ഒരു ബെഞ്ചിലേക്കിരുന്നു. “12 വർഷങ്ങൾക്കു മുൻപാണ്‌ ഞങ്ങൾക്ക് ഞങ്ങടെ മോനെ നഷ്ടമായത്. ഒരു ആക്സിഡന്റിൽ. 5 വയസ്സായിരുന്നു അവന്‌.“ എൽസിയുടെ ചുണ്ടിന്റെ കോണിൽ ഒരു വിതുമ്പൽ വന്നു മറഞ്ഞു. ”ആക്സിഡന്റായിരുന്നു അത്. വണ്ടി യോടിച്ചിരുന്നത് പോത്തനാണ്‌. പക്ഷേ... അയാളുടെ കുറ്റമല്ല. അതൊരു ആക്സിഡന്റ് മാത്രമായിരുന്നു. ഒരു നിമിഷ നേരത്തെ അശ്രദ്ധ കൊണ്ട് സംഭവിച്ച ഒരു തെറ്റ് മാത്രം. മാനസീകമായി വല്ലാതെ തകർന്നു പോയി ആ മനുഷ്യൻ. നിനക്ക് ഊഹിക്കാവുന്നതേയുള്ളൂ. വളരെ സീരിയസായ വിഷാദ രോഗത്തിനടിമയായിപ്പോയി എന്റെ പോത്തൻ. ഏതാണ്ട് 3 വർഷക്കാലം.! പക്ഷേ ഞങ്ങൾ തോറ്റു കൊടുത്തില്ല ആൽബർട്ട്. ജീവിതം തിരിച്ചു പിടിക്കാൻ തന്നെ തീരുമാനിച്ചു. എല്ലാത്തിനും സപ്പോർട്ടായി ഞാൻ കൂടെത്തന്നെയുണ്ടായിരുന്നു. വളരെയേറെ ശ്രമിച്ചു ഞങ്ങൾ. കഴിവിന്റെ പരമാവധി. പക്ഷേ. എല്ലാം കലങ്ങി തെളിഞ്ഞു വന്നു തുടങ്ങിയപ്പോഴാണ്‌, വിധി മറ്റൊരു ആക്സിഡന്റിന്റെ രൂപത്തിൽ വീണ്ടും ഞങ്ങളെ തകർത്തു കളഞ്ഞത്. മൂന്നു കുഞ്ഞുങ്ങളുടെ ജീവനെടുത്ത അതി ക്രൂരമായ ഒരു കൊലപാതകം! “ ആൽബി ഞെട്ടി മുഖമുയർത്തി ”മൂന്നു നാലു വർഷങ്ങൾക്കു മുൻപാണതുണ്ടായത്. വയനാട് ചുരത്തിൽ വെച്ച്. ഒരു ഇന്നോവ കാറും ചരക്കു ലോറിയി കൂട്ടിയിടിച്ച്, മൂന്നു പിഞ്ചു കുഞ്ഞുങ്ങളടക്കം ഒരു കുടുംബം മുഴുവൻ മരണപ്പെട്ടു. ആൽബർട്ട് ഒരു പക്ഷേ കേട്ടിട്ടുണ്ടാകണം. വളരെ വിവാദമായൊരു കേസായിരുന്നു അത്. കൊലപാതകമായിരുന്നു. ക്രൈം ബ്രാഞ്ചാണ്‌ അന്വേഷിച്ചത്. പോത്തനായിരുന്നു അന്വേഷണത്തിന്റെ ചുമതല...“ അവർ ഒന്നു നിർത്തി ആലോചനയോടെയാണ്‌ തുടർന്നത്. ” പോത്തനെ എനിക്ക് എന്നന്നേക്കുമായി നഷ്ടപ്പെടുത്തിയ ഒരു കേസായിരുന്നു ആൽബർട്ട് അത്… ഒരിക്കലും സമാധാനമായി ജീവിക്കാൻ ഞങ്ങൾക്ക് വിധിയില്ലെന്ന് മനസ്സിലാക്കിത്തന്ന.ആ കേസ് തെളിവുകളുടെ അഭാവത്തിൽ ഇടക്കു വെച്ച് ഉപേക്ഷിക്കേണ്ടി വന്നു. അന്നു തുടങ്ങിയതാണ്‌ പോത്തന്റെ ഈ മദ്യപാനം. ആ കേസ്, ഡോർമന്റ് കാറ്റഗറിയിലേക്ക് കയറിയ അന്നാണ്‌ പോത്തനെ ഞാൻ ആദ്യമായി അത്രയധികം മദ്യപിച്ച് കാണുന്നത്. തകർന്നു പോയി അയാൾ. ആ ഒരു കേസന്വേഷിച്ച് തെളിയിച്ചാൽ, സ്വന്തം കുഞ്ഞിന്റെ മരണത്തിനൊരു ക്ലോഷർ കിട്ടുമെന്ന് കരുതിക്കാണണം, പാവം. പക്ഷേ...“ ”അയാം റിയലി സോറി മാഡം.“ ആൽബിയുടെ മറുപടി ആത്മാർത്ഥമായിരുന്നു. ”നോ... ആൽബർട്ട്. എനിക്ക് നിന്റെ സോറി അല്ല വേണ്ടത്. നിനക്കെന്നെ ഹെല്പ്പ് ചെയ്യാനാകും. പോത്തനെ ഹെല്പ് ചെയ്യാനാകും.“ ആൽബിക്ക് മനസ്സിലായില്ല. ”നേരത്തെ ഫോൺ വിളിച്ചപ്പോ, പോത്തൻ നിന്നെപ്പറ്റി എന്നോട് പറഞ്ഞിരുന്നു എന്നു ഞാൻ പറഞ്ഞില്ലേ ? സാധാരണ, കേസ് കാര്യങ്ങളൊന്നും എന്നോട് അയാൾ ഡിസ്ക്കസ് ചെയ്യാറുള്ളതല്ല. പക്ഷേ... ഈ ഒരു കേസിൽ പോത്തന്‌ വളരെ പേഴ്സണലായ ഒരു താല്പ്പര്യമുണ്ട്. പോത്തൻ കരുതുന്നത്, ഈ കേസ് തെളിഞ്ഞാൽ, ഒപ്പം ആ കുടുംബത്തിന്റെ കൊലപാതകവും തെളിയുമെന്നാണ്‌. ബിലീവ് മീ ആൽബർട്ട്. എനിക്കും അതുറപ്പാണ്‌.കാരണം, ഞാനും പോത്തനും തമ്മിൽ പല കാര്യങ്ങളിലും അഭിപ്രായ വ്യത്യാസങ്ങളുണ്ടായിരിക്കും, പക്ഷേ, ഒരു പോലീസ് ഉദ്യോഗസ്ഥൻ എന്ന നിലയിൽ, ധിലീഷ് പോത്തനെപ്പോലെ സമർത്ഥനായ മറ്റൊരാളെ എനിക്കറിയില്ല.. അയാൾക്ക് ഒരു ഇന്റ്യൂഷനുണ്ടെങ്കിൽ, അത് സത്യമായിരിക്കുമെന്ന കാര്യത്തിൽ സംശയമേ വേണ്ട. സോ, പ്ലീസ്. പോത്തനുമായി സഹകരിക്കുക. എനിക്കെന്റെ ഭർത്താവിനെ, തിരിച്ചു കിട്ടാൻ ഒരു പക്ഷേ ആകെയുള്ള ഒരു വഴി ഇതായിരിക്കും. Will you help me Albert ? “ തുടരും കണ്ണൂർകാരൻ ❤️❤️❤️❤️ #📔 കഥ #📙 നോവൽ #✍ തുടർക്കഥ #📚 ട്വിസ്റ്റ് കഥകൾ #💞 പ്രണയകഥകൾ