രുദ്രദൃഷ്ടി: ഭാഗം 8: ഇന്ദ്രജിത്തിന്റെ ജീവിതത്തിലെ ഏറ്റവും കഠിനമായ പരീക്ഷണം തുടങ്ങുകയാണ്. പ്രണയവും ധർമ്മവും തമ്മിലുള്ള പോരാട്ടം… അഘോരനന്ദന്റെ വാക്കുകൾ ഹിമാലയത്തിലെ മഞ്ഞുകാറ്റിൽ പ്രതിധ്വനിച്ചു. ഇന്ദ്രജിത്തിന്റെ ഉള്ളിലെ നീലവിഷം അഘോരനന്ദന് ലഭിച്ചാൽ അയാൾ രക്തരക്ഷസ്സിനേക്കാൾ ഭീകരനായി മാറും. എന്നാൽ രുദ്രാവതിയെ ഒന്ന് തൊടാൻ പോലും കഴിയാത്ത ആ ശാപം ഇന്ദ്രജിത്തിന്റെ ആത്മാവിനെ ദഹിപ്പിക്കുകയായിരുന്നു….. "ഇന്ദ്രജിത്ത്... ആലോചിക്കാൻ സമയമില്ല" അഘോരനന്ദൻ തന്റെ മന്ത്രദണ്ഡ് ഉയർത്തി. "ഈ ശാപം തുടർന്നാൽ വൈകാതെ നിന്റെ ഉള്ളിലെ വിഷം രുദ്രാവതിയുടെ ചൈതന്യത്തെ ദൂരെ നിന്നുതന്നെ കരിച്ചുകളയും. നിന്റെ പ്രണയം തന്നെ അവളുടെ മരണമാകും"... ഇന്ദ്രജിത്ത് പതറുന്നത് കണ്ട രുദ്രാവതി മുന്നോട്ട് വന്നു. അവളുടെ മുഖത്ത് ഭയമായിരുന്നില്ല, മറിച്ച് ഒരു നിശ്ചയദാർഢ്യമായിരുന്നു….. "ഇന്ദ്രജിത്ത് എന്റെ ജീവനേക്കാൾ വലുതാണ് ഈ ലോകം. മഹാദേവൻ നിനക്ക് ഈ ശക്തി നൽകിയത് എന്നെ സംരക്ഷിക്കാനല്ല, മറിച്ച് ധർമ്മം നിലനിർത്താനാണ്. അസുരന് മുന്നിൽ തലകുനിക്കരുത്".... അവളുടെ വാക്കുകൾ ഇന്ദ്രജിത്തിനെ ഉണർത്തി. അവൻ അഘോരനന്ദനെ നോക്കി ഗർജ്ജിച്ചു "ഭൈരവന്റെ ഭക്തൻ ഭിക്ഷ യാചിക്കില്ല അവൻ അധികാരം പിടിച്ചെടുക്കുകയേയുള്ളൂ.. ശാപമോക്ഷം ഞാൻ എന്റെ തപസ്സിലൂടെ നേടിയെടുക്കും".. ക്രുദ്ധനായ അഘോരനന്ദൻ തന്റെ യോഗശക്തിയാൽ ഹിമാലയത്തിലെ ഉറങ്ങിക്കിടന്ന ഹിമയക്ഷികളെ ഉണർത്തി. വെളുത്ത വസ്ത്രം ധരിച്ച മുഖമില്ലാത്ത ആ രൂപങ്ങൾ കാറ്റിൽ ഒഴുകി നടന്നു. അവയുടെ കരച്ചിൽ കേൾക്കുന്നവരുടെ കാതുകളിൽ നിന്ന് ചോര വരും….. യക്ഷികൾ രുദ്രാവതിയെ വളഞ്ഞു. ഇന്ദ്രജിത്ത് തന്റെ ശൂലം വീശി അവയെ തടയാൻ ശ്രമിച്ചു. പക്ഷേ, ഒരു യക്ഷി രുദ്രാവതിയുടെ തോളിൽ നഖം ആഴ്ത്തി. അവൾ വേദനകൊണ്ട് പുളഞ്ഞു. ആ മുറിവിൽ നിന്ന് ഒഴുകിയ രക്തം മഞ്ഞിൽ വീണപ്പോൾ അത് കറുത്ത നിറമായി മാറി…. "രുദ്രാവതീ " ഇന്ദ്രജിത്ത് അവളെ പിടിക്കാൻ ആഞ്ഞു, പക്ഷേ ശാപം ഓർത്തവൻ പെട്ടെന്ന് കൈ പിൻവലിച്ചു. ആ നിസ്സഹായത അവനെ ഭ്രാന്ത് പിടിപ്പിച്ചു. സഹികെട്ട ഇന്ദ്രജിത്ത് തന്റെ വിശ്വരൂപം പുറത്തെടുത്തു. അവൻ ഹിമാലയത്തിലെ മഞ്ഞിൽ ചവിട്ടി നിന്നു. അവന്റെ ഇടതുകണ്ണിൽ നിന്ന് തീജ്വാലകൾ പുറപ്പെട്ടു. അവൻ തന്റെ നീലകണ്ഠത്തിൽ നിന്ന് പുറപ്പെടുവിച്ച ശബ്ദം ഹിമപാതത്തിന് കാരണമായി….. ആ ഹിമപാതത്തിൽ യക്ഷികൾ മഞ്ഞടിഞ്ഞു പോയി. അഘോരനന്ദൻ തന്റെ മാന്ത്രിക കവചത്തിന് പിന്നിൽ ഒളിച്ചു. "ഇന്ദ്രജിത്ത് നീ നിന്റെ ശക്തി ഉപയോഗിക്കുന്തോറും ശാപത്തിന്റെ വേഗത കൂടും. നോക്കൂ നിന്റെ രുദ്രാവതിയുടെ ശരീരം നീലനിറമായി മാറുന്നു"... അഘോരനന്ദൻ പറഞ്ഞത് സത്യമായിരുന്നു. ഇന്ദ്രജിത്ത് ശക്തി പ്രയോഗിക്കുമ്പോൾ അവനിലെ വിഷം അന്തരീക്ഷത്തിൽ പടരുകയും അത് രുദ്രാവതിയെ ബാധിക്കുകയും ചെയ്യുന്നുണ്ടായിരുന്നു. ഈ സമയം ഭൈരവി അവിടെ പ്രത്യക്ഷപ്പെട്ടു. അവളുടെ കയ്യിൽ പവിത്രമായ ഒരു കലശമുണ്ടായിരുന്നു…. "ഇന്ദ്രജിത്ത്.. നീ ഇപ്പോൾ പോരാടേണ്ടത് അഘോരനന്ദനോടല്ല. കൈലാസത്തിന്റെ മുകളിലെ മാനസസരോവരത്തിലാണ് നിനക്കുള്ള മരുന്ന്. അഘോരനന്ദനെ ഞാൻ തടയാം നീ രുദ്രാവതിയെയും കൊണ്ട് മുകളിലേക്ക് പോകൂ.. പക്ഷേ ഓർക്കുക മുകളിലെത്താൻ നീ നിന്റെ കാഴ്ച ഉപേക്ഷിക്കേണ്ടി വരും".... ഇന്ദ്രജിത്ത് ഞെട്ടിപ്പോയി. കാഴ്ചയില്ലാതെ എങ്ങനെ അവൻ തന്റെ പ്രണയിനിയെ ഈ ഹിമപാതത്തിലൂടെ മുകളിലെത്തിക്കും…. തുടരും…. ✍️ സന്തോഷ്‌ ശശി…. #📙 നോവൽ #💞 പ്രണയകഥകൾ #📔 കഥ #✍ തുടർക്കഥ #കഥ,ത്രില്ലെർ,ഹൊറർ