ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6awDk369?d=n&ui=v64j8rk&e1= മരുമകൾ 57 തുടർച്ച പൊതിഞ്ഞു വച്ചാലെ കൊച്ചിന് മഞ്ഞ വരും. പിന്നേ വല്യ പാടാ.... വയറ്റില് വെയിലടിക്കണം. പ്രസവം വരെ ഇനി സെറ്റും മുണ്ടും സാരിയും ഒക്കെ ഉടുക്കാവൂ... അതും നിങ്ങളൊക്കെ സാരി ഉടുക്കണത് പോലെ വയറു മൂടിക്കെട്ടി ഉടുക്കല്ല്. വീട്ടില് നിക്കണത് തന്നല്ലാ...? ആരും വന്ന് വയറ്റിലോട്ട് നോക്കേന്നും ഇല്ല... " സുബാഷ്...! എന്റെ കയ്യിലെ പൊതി അറിയാതെ താഴെ വീണു. ഇത്രേം കോണിഷ്ട്ടൊക്കെ എവിടുന്ന് കിട്ടുന്നു? ഞാൻ ദയനീയമായി അമ്മായിയെ നോക്കി. ശേഷം കുനിഞ്ഞു നിലത്തു കിടക്കുന്ന പൊതി എടുത്തു. ഒന്നും മിണ്ടാതെ അതെടുത്തു റൂമിലേക്ക് കൊണ്ട് ചെന്ന് വച്ചു. " അതില് രണ്ടെണ്ണേ ഒള്ളൂ... ഇനീം തരാം. എന്റല് വേറെ പഴയത് കുറേ ഒണ്ട്. " അമ്മായി പിറകിൽ നിന്ന് വിളിച്ച് പറയുന്നുണ്ട്. സത്യം പറഞ്ഞാൽ അവരിപ്പോ പറഞ്ഞതിനെക്കുറിച്ച് എനിക്ക് വലിയ ധാരണയൊന്നുമില്ല. അതുമല്ല ഗർഭിണികൾ വെയിൽ കൊള്ളുന്നത് കുഞ്ഞുങ്ങളിലെ മഞ്ഞപ്പിത്തം ഒഴിവാക്കാൻ നല്ലതാണെന്ന് ആരൊക്കെയോ പറഞ്ഞു കേട്ടിട്ടുമുണ്ട്. അറിയാത്ത കാര്യത്തെക്കുറിച്ച് തർക്കിക്കുന്നത് ശരിയല്ലല്ലോ? അതാണ് ഒന്നും മിണ്ടാതെ ഇങ്ങ് പോന്നത്. എന്ന് വച്ച് അവര് പറഞ്ഞതു പോലെ ഡെലിവറി വരെ വീട്ടില് സെറ്റും മുണ്ടും ഉടുത്ത് നടക്കുന്നതൊന്നും പ്രാക്ടിക്കൽ അല്ല എന്ന് എനിക്ക് തന്നെ അറിയാം. പണ്ടുള്ളവർ ഫുൾടൈം സാരി അല്ലേ ഉടുത്ത് നടന്നതെന്ന് ചോദിക്കാം..... അവര് അതല്ലേ ശീലിച്ചത്. അതുകൊണ്ട് അവർക്കതൊരു ബുദ്ധിമുട്ടായി തോന്നിയിട്ടുണ്ടാവില്ല... പക്ഷേ എന്റെ കാര്യം അങ്ങനെയല്ല. ബി എഡിന് സാരി ഉടുത്തോണ്ട് പോയ പാട് എനിക്കറിയാം. സാരിയൊക്കെ വൃത്തിയായിട്ട് ഉടുക്കാൻ അറിയാം എങ്കിലും ഒരുപാട് നേരം അതുടുത്തിട്ട് നടക്കുന്നത് ഇത്തിരി ബുദ്ധിമുട്ടുള്ള കാര്യം തന്നെയാണ്. സാരി പിന്നെയും പോട്ടെ.... പക്ഷേ സെറ്റും മുണ്ടും? ഞാനും ആ സാധനവും പണ്ടേ മൂന്നാം നാൾ ആണെന്നേ..... എന്തായാലും അമ്മ പറഞ്ഞതിന്റെ സത്യാവസ്ഥ എന്താണെന്ന് അറിയണമല്ലോ? ഗൂഗിൾ അമ്മായി തന്നെ ശരണം. ഫോൺ എടുത്തു കുത്താൻ തുടങ്ങി. ഗൂഗിൾ അമ്മായി കുറെ കാര്യങ്ങൾ പറഞ്ഞുതന്നു കേട്ടോ..... ഗർഭിണികൾ അയഞ്ഞ ഇളം നിറമുള്ള വസ്ത്രങ്ങൾ ധരിക്കുന്നതും സൂര്യപ്രകാശം ഏൽക്കുന്നതും നല്ലതുതന്നെ. അതിനു സാരിയോ സെറ്റുമുണ്ടോ തന്നെ വേണമെന്ന് നിർബന്ധമൊന്നുമില്ല. വൈറ്റമിൻ ഡി ലഭിക്കുന്നതിനും അതുവഴി അമ്മയുടെയും കുഞ്ഞിന്റെയും എല്ലുകളുടെ ആരോഗ്യത്തിനും ഇത് സഹായകമാകും. അത് കൊണ്ട് രാവിലെയും വൈകിട്ടും 15-20 മിനിറ്റ് സൂര്യപ്രകാശം ഏൽക്കുന്നത് ഗർഭിണിയുടെ മനസികവും ശാരീരികവുമായ ആരോഗ്യത്തിനു നല്ലതാണെന്ന് പലയിടത്തും കണ്ടു. കൂടുതൽ സമയം വെയിൽ ഏൽക്കുന്നതും അധികം ചൂടുള്ള വെയിൽ ഏൽക്കുന്നതും നല്ലതല്ല എന്നും കണ്ടിരുന്നു.... പക്ഷെ കുഞ്ഞുങ്ങളിലെ മഞ്ഞയുമായി ബന്ധപ്പെടുത്തി ഒരു വിശദീകരണം എവിടെയും ഞാൻ കണ്ടില്ല. എന്നാപ്പിന്നെ നവജാത ശിശുക്കളിലെ മഞ്ഞപ്പിത്തതിന് കാരണം എന്താണെന്ന് നോക്കാമെന്ന് കരുതി. അതും സേർച്ച്‌ ചെയ്തു പിന്നെയും കുറച്ചു നേരം ഇരുന്നു.... സത്യത്തിൽ കുഞ്ഞിക്കരളിന് സാധാരണ പോലെ പ്രവർത്തിച്ചു തുടങ്ങാൻ എടുക്കുന്ന കാലതാമസമാണ് കുഞ്ഞുങ്ങളിലെ മഞ്ഞപ്പിത്തതിന് കാരണം എന്നാണ് ഗൂഗിൾ അമ്മായി പറഞ്ഞു തന്നത്. ജനിക്കുന്ന പത്ത് കുഞ്ഞുങ്ങളിൽ ആറ് പേർക്കും ഇതുണ്ടാവാറുണ്ടത്രേ.... മഞ്ഞ ഉണ്ടെന്ന് കണ്ടാൽ ഡോക്ടറിനെ കാണിക്കണം. സാധാരണ ജനിച്ച് ഏഴു ദിവസം കഴിയുമ്പോ കുഞ്ഞിക്കരളിന്റെ പ്രവർത്തനം സാധാരണ പോലെ ആവുകയും മഞ്ഞ താനേ സുഖപ്പെടുകയും ചെയ്യാറാണുള്ളത്. ചിലപ്പോ അത് സാധിക്കാതെ വരും. അങ്ങനെ ഉള്ളപ്പോ ചികിത്സ വേണ്ടി വരും.... അപ്പൊ പിന്നെ ഗർഭിണികൾ വെയിൽ കൊണ്ടാൽ കുഞ്ഞുങ്ങളിൽ മഞ്ഞ വരില്ല എന്ന് പറയുന്നതിൽ എത്രത്തോളം സത്യമുണ്ട്? ഇനി ഗൂഗിൾ അമ്മായി കള്ളം പറഞ്ഞതാണോ? അല്ല പുള്ളിക്കാരിയെ പൂർണമായും വിശ്വസിക്ക വയ്യല്ലോ? അടുത്ത തവണ ഡോക്ടറിനെ കാണുമ്പോ നേരിൽ ചോദിക്കാമെന്ന് തീരുമാനിച്ച് ഫോൺ ടേബിളിലേക്ക് തന്നെ തിരികെ വച്ചു.. 🦋 കുറച്ചു കഴിഞ്ഞതും "അത് ഉടുക്കാത്തത് എന്ത് മക്കളേ" എന്നും ചോദിച്ചു അമ്മ വന്നു. " ഇതൊന്നും ഉടുത്തോണ്ട് വീട്ടില് നടക്കാൻ പറ്റില്ലമ്മാ.... " എന്ന് ഞാനും പറഞ്ഞു. " ഹാ... ഇത് തന്നെ...! ഇപ്പഴത്തെ പെൺപിള്ളേർ ഒരു വക പറഞ്ഞാ അനുസരിക്കില്ല. എല്ലാത്തിനും തന്നിഷ്ടവും അഹങ്കാരവും. സുമലതേടെ മോള് കണ്ടാ? വെയില് കേറാത്ത ഇറുവിപിടിച്ചത് ഓരോന്ന് ഇട്ടോണ്ട് നടന്ന് അവസാനം കൊച്ചിന് മഞ്ഞ കൂടി കൊച്ച് ചത്തും പോയി. അത് പോലെ വയറ്റി കെടക്കണതിന് ഒന്നും പറ്റാതിരിക്കാൻ വേണ്ടി പറയണതാ... അതെങ്ങനാ പറഞ്ഞാ മനസ്സിലാവോ? " എന്റെ നെഞ്ചോന്ന് കാളി. ഗർഭിണി ആയിട്ടിരിക്കുന്ന എന്നോട് പറയുന്ന വാർത്തമാനമാണെന്ന് ഓർക്കണം. അവര് പിന്നെയും എന്തൊക്കെയോ പറഞ്ഞിട്ട് പോയതും ഞാൻ ഫോൺ എടുത്തു ഡോക്ടറിനെ വിളിച്ചു സംസാരിച്ചു. ഡോക്ടറിന്റെ വിശദീകരണം കേട്ടതും മനസ്സൊന്നു ശാന്തമായി. ഒരു പുഞ്ചിരിയോടെ പുറത്തിറങ്ങി വഴിയിലൊക്കെ നടന്നു. നല്ല കാറ്റാണ് പുറത്ത്. കാട്ട് പൂക്കളെയും പൂമ്പാറ്റകളെയുമൊക്കെ നോക്കി കുറേ നേരം അങ്ങോട്ടും ഇങ്ങോട്ടും നടന്നു . 🦋 കുറച്ചു കഴിഞ്ഞു ലോല മാമി വന്നു. മുൻ വശത്തിരുന്ന് ലോല മാമിയോടും അമ്മായി എന്തൊക്കെയോ മുറുമുറാന്ന് പറയുന്നത് കേട്ടു കൊണ്ടാണ് ഞാൻ വീടിന് പിന്നിലേക്ക് നടന്നത്. ഈയിടെയായി പരദൂഷണത്തിന്റെ ' പ ' കേൾക്കുന്നതേ എനിക്ക് അലർജിയാണ്. വീടിന്റെ പുറകു വശത്തെ പടിയിൽ ഇരുന്ന് പുറത്തേക്ക് കാലും നീട്ടി വച്ച് കറുമ്പി പൂച്ചയോട് കിന്നരിച്ചിരിക്കുമ്പോഴാണ് ലോല മാമി വീടിന്റെ പുറത്ത് കൂടി അടുക്കളഭാഗത്തേക്ക് വന്നത്. " മക്കളെന്ത് ചേച്ചി തന്ന സെറ്റ് മുണ്ട് ഉടുക്കാത്തത്? കൊച്ചിന് ഒന്നും വരാതിരിക്കാനല്ലേ? " വന്ന പാടേ ചോദിച്ച ചോദ്യമാണ്. " സ്മിത ചേച്ചി പ്രെഗ്നന്റ് ആയിരുന്നപ്പോ വീട്ടില് ചുരിദാർ അല്ലെ മാമി ഇട്ടിരുന്നത്? എന്നിട്ട് വാവയ്ക്ക് മഞ്ഞ ഒന്നും ഉണ്ടായില്ലല്ലോ? " എന്റെ മറുചോദ്യം കേട്ട് ലോല മാമിക്ക് ഉത്തരം മുട്ടി. സ്മിത, ലോല മാമീടെ മോളാണ്... " ഈ സമയത്തു നമുക്ക് സൗകര്യം തോന്നുന്ന ഡ്രസ്സ്‌ അല്ലെ മാമി ഇടാൻ? ദാ നോക്ക്, ഞാൻ ലൂസ് ആയിട്ടുള്ളതൊക്കെ ഇടാറുള്ളൂ.... ഈ സെറ്റും മുണ്ടും ഒക്കെ ചുറ്റിക്കൊണ്ട് നടന്നാ ശ്വാസം മുട്ടും മാമി. രാവിലേം വൈകിട്ടും വെയില് ഞാൻ കൊണ്ടോളാം. അത് നല്ലത് തന്നെയാ... എന്നും പറഞ്ഞു ഇരുപത്തി നാല് മണിക്കൂറും ഇതും ചുറ്റി നടക്കണമെന്ന് പറഞ്ഞാ? എനിക്ക് വെപ്രാളം എടുക്കും.... " ഞാൻ പറഞ്ഞത് മനസ്സിലായിട്ടോ എന്തോ, മാമി കൂടുതൽ ഒന്നും പറയാതെ ആരോഗ്യം ശ്രദ്ധിക്കാനൊക്കെ പറഞ്ഞിട്ടങ്ങ് പോയികളഞ്ഞു. അമ്മ പിന്നെ അപ്പൊ തന്നെ, ഞാൻ പറഞ്ഞാൽ കേൾക്കുന്നില്ല എന്നൊക്കെ വല്യമ്മേ വിളിച്ച് പറയുന്നുണ്ടായിരുന്നു. അതിന്റെ കൂടെ പുതുതലമുറയിലെ പെൺകുട്ടികളുടെ തന്നിഷ്ടത്തേക്കുറിച്ചും അനുസരണയില്ലായ്മയെക്കുറിച്ചും ഘോര ഘോരം പ്രസംഗിക്കുന്നുമുണ്ടായിരുന്നു. എനിക്കത് കേട്ട് ചിരിച്ചു വന്നു. പുതു തലമുറയിലെ പെൺകുട്ടികൾക്ക് അവരുടെ അഭിപ്രായ സ്വാതന്ത്രത്തേക്കുറിച്ചും മറ്റും അറിവുണ്ടായിപ്പോയത് അവരുടെ തെറ്റാണോ? എന്തായാലും അമ്മ തന്ന സെറ്റും മുണ്ടും ഞാൻ അപ്പൊ തന്നെ തിരികെ കൊടുത്തു. അതോടെ അത് വരെ കടന്നൽ കുത്തിയത് പൊലിരുന്ന അമ്മായീടെ മുഖം കലം കമിഴ്ത്തിയത് പോലെ കൂടുതൽ വീർത്തു. 🦋 മാസം ഏഴാകുന്നു. ഇത് വരെയും എന്റെ ഇഷ്ടങ്ങൾ ഒന്നും തന്നെ അമ്മ ചോദിച്ചിട്ടില്ല. മുൻപ് വല്ലപ്പോഴും ഉണ്ടാക്കാറുണ്ടായിരുന്ന പലഹാരങ്ങൾ പോലും ഇപ്പൊ ഉണ്ടാക്കാറില്ല എന്നതാണ് അതിലും രസം. ഈ സമയത്തെ കുഴപ്പം അറിയാല്ലോ? എന്തെങ്കിലും വേണമെന്ന് തോന്നിയാലും സ്വയം ഉണ്ടാക്കാൻ തോന്നില്ലന്നെ.... ആരെങ്കിലും ഉണ്ടാക്കി തന്നാൽ പിന്നേം കഴിക്കാം എന്ന കണക്കാണ് ഞാൻ.... വീട്ടിൽ പോകുമ്പോ അമ്മ ആവശ്യം ഉള്ളതും ഇല്ലാത്തതും ഒക്കെ ഉണ്ടാക്കി നിരത്തും.... ഒന്നോ രണ്ടോ കഴിക്കേ ഉള്ളെങ്കിലും ഞാനത് ആസ്വദിച്ചു കഴിക്കും. ഈയിടെയായി ശർദ്ദിൽ അങ്ങനെ ഇല്ല. അതാ കാര്യം. പ്രത്യേകിച്ച് ഒരാഹാരത്തിനോടും കൊതി തോന്നാറില്ല എങ്കിലും, ഉച്ചയ്ക്ക് കഞ്ഞിയും, രാത്രി ദോശയും കഴിച്ചു മടുക്കുമ്പോ "ഹരിയേട്ടന്റെ പുറത്ത് പോയി എന്തെങ്കിലും കഴിക്കാം" എന്നുള്ള ക്ഷണം ഞാൻ സ്വീകരിക്കും. ഇങ്ങനെ വല്ലപ്പോഴും ഞങ്ങൾ പുറത്ത് പോയി ഭക്ഷണം കഴിക്കുന്നതിനും അമ്മായി കാര്യമായിത്തന്നെ മുറുമുറുക്കാറുണ്ട്. ഈ സമയത്ത് പുറത്ത് നിന്ന് food കഴിക്കാൻ പാടില്ല. കുഞ്ഞിന് വല്ലോം പറ്റിപ്പോവും എന്നും പറഞ്ഞു പിറുപിറുക്കും ആശാത്തി. എന്ത് പറഞ്ഞാലും അവസാനം പറയുന്നത് അതാണ്‌. കുഞ്ഞിന് എന്തെങ്കിലും പറ്റിപ്പോവൂന്ന്. ഇനി അവരുടെ ആഗ്രഹം അതാണോ എന്ന് പോലും എനിക്ക് സംശയം വന്ന് തുടങ്ങി. ഏഴ് മാസം ആകാൻ പോകുന്നു. ഇതിനിടേൽ ആകെക്കൂടി അഞ്ചോ ആറോ തവണയാണ് പുറത്ത് നിന്ന് ആഹാരം കഴിച്ചത്. അതിനാണ് ഈ പറയുന്നത് എന്നോർക്കണം.... പണ്ട് അമ്മായി ഹരിയേട്ടനെ ഗർഭിണി ആയിരുന്നപ്പോ അരിയും ഗോതമ്പും ഒന്നും കഴിക്കാൻ തോന്നാത്തോണ്ട് എല്ലാ സൺഡേയ്സിലും അച്ഛനേം കൂട്ടി ഹോട്ടലിൽ പോയി റവ ദോശ കഴിക്കാറുണ്ടായിരുന്നു എന്ന് മുൻപ് എപ്പോഴോ പറഞ്ഞിട്ടുള്ളവരാണ്. മരുമകൾ ഗർഭിണി ആയപ്പോ അതൊക്കെ നേരെ തിരിഞ്ഞു. അത് എങ്ങനെയാണാവോ? എന്തായാലും അമ്മായി അവിടിരുന്നു പറഞ്ഞോട്ടെ എന്ന് കരുതി ഞാൻ ഇതിനൊന്നും മറുപടി കൊടുക്കാൻ പോകാറില്ല. ഹരിയേട്ടൻ പിന്നെ മൈൻഡ് ചെയ്യാറേയില്ല. നാവ് കഴയ്ക്കുമ്പോൾ നിർത്തിക്കോളും എന്നൊരു ഭാവമാണൾക്ക്.... 🦋 🦋 🦋 🦋 🦋 Note : രക്തത്തിലെ ചുവന്ന രക്‌തണുക്കൾ നശിക്കുമ്പോൾ അതിലെ ഹീമോഗ്ലോബിൽ വിഘടിച്ചുണ്ടാകുന്ന ബിലീറൂബിനാണ് മഞ്ഞപ്പിത്തതിന് കാരണമാകുന്നത്. കുഞ്ഞുങ്ങളിൽ ഇതിന്റെ അളവ് കൂടുതൽ ആയിരിക്കും. കരളാണ് ഇത് പുറം തള്ളാൻ സഹായിക്കുന്നത്. കുഞ്ഞിക്കരളിന് ഇതിനുള്ള ശേഷി കുറവായിരിക്കും. അതാണ്‌ ജനിക്കുന്ന അറുപത് ശതമാനം കുട്ടികളിലും മഞ്ഞപ്പിത്തം കാണുന്നത്. അമ്മ വെയിൽ കൊണ്ടത് കൊണ്ടോ, നവജാത ശിശുവിനെ വെയിൽ കൊള്ളിച്ചത് കൊണ്ടോ മഞ്ഞപ്പിത്തം മാറണമെന്നില്ല. അതിന് ചിലപ്പോൾ ഫോട്ടോതെറാപ്പി പോലുള്ള ചികിത്സാ രീതികൾ വേണ്ടി വരും. അത് കൊണ്ട് കുഞ്ഞുങ്ങളിൽ മഞ്ഞ കണ്ടാൽ സ്വയം ചികിത്സ ചെയ്യും മുന്നേ ഡോക്ടറിനെ കാണിക്കേണ്ടത് അത്യാവശ്യമാണ്. ഇപ്പോഴത്തെ direct sunlight നമ്മൾ മുതിർന്നവരുടെ skin ന് തന്നെ മോശമാണ്. അപ്പൊ കുഞ്ഞുങ്ങളുടെ സോഫ്റ്റ്‌ skin ന്റെ കാര്യം പറയണോ? കുഞ്ഞുങ്ങളിൽ മഞ്ഞ കണ്ടാൽ നിങ്ങളുടെ neonatologist നെ consult ചെയ്ത ശേഷം മാത്രം ചികിത്സ നൽകൂ.... കുഞ്ഞിന്റെ ആരോഗ്യമല്ലേ നമ്മുടെ സന്തോഷം ❤️ ഇത് ഇത്രേം എഴുതാൻ കാരണം, എന്റെ ഒരു സുഹൃത്തിന് പറ്റിയ ഒരബദ്ധമാണ്. ഡിസ്ചാർജ് ആയിട്ട് വീട്ടിൽ വന്ന ശേഷമാണ് കുഞ്ഞിന് മഞ്ഞ ഉണ്ടെന്ന് അറിയുന്നത്. വെയിൽ കൊള്ളിച്ചാൽ മതി എന്ന് അവളുടെ അമ്മമ്മ പറഞ്ഞത് പ്രകാരം അങ്ങനെ ചെയ്തു. രണ്ട് മൂന്ന് ദിവസം കഴിഞ്ഞും മാറ്റം ഉണ്ടായില്ല എന്ന് മാത്രമല്ല, കുഞ്ഞിന് ബുദ്ധിമുട്ടുണ്ടാകാനും തുടങ്ങി. ഹോസ്പിറ്റലിൽ എത്തിയപ്പോ കണ്ടിഷൻ ഒരല്പം ക്രിട്ടിക്കൽ ആയി മാറിയിരുന്നു. ഒടുവിൽ വാവയുടെ രക്തം മാറ്റേണ്ടി വന്നു. അത് കൊണ്ട് നവജാത ശിശുക്കളിലെ മഞ്ഞ നിസ്സാരമായി കാണേണ്ട ഒന്നല്ല... തുടരും കണ്ണൂർകാരൻ ❤️❤️❤️ #📔 കഥ #✍ തുടർക്കഥ #📚 ട്വിസ്റ്റ് കഥകൾ #💞 പ്രണയകഥകൾ #📙 നോവൽ