ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6aRVM1O0?d=n&ui=v64j8rk&e1=c മിശ്വ 9 "നിന്നെ ഒഴിവാക്കാനോ? അങ്ങനെ ഒരുവളെ എന്തിന് നീ അന്വേഷിച്ചു നടക്കുന്നു തരുൺ.?" മൃദുലക്കെന്തോ ദേഷ്യം വരുന്ന പോൽ തോന്നി. "അങ്ങനെ അങ്ങ് രക്ഷപ്പെട്ടു പോകാൻ ഞാൻ അവളെ സമ്മതിക്കുമോ.?" ചുണ്ടിന്റെ കോണിലൊരു ചിരിയോട് കൂടി തരുൺ പറഞ്ഞപ്പോൾ മൃദുല പുരികം ചുളിച്ചു. "എന്ന് വെച്ചാൽ.? നീയെന്താണ് ഉദ്ദേശിക്കുന്നത്.. തെളിച്ചു പറ. " കാറ്റിൽ പാറുന്ന മുടിയിഴകൾ ചെവിക്കിടയിലേക്ക് ഒതുക്കി വെച്ചു കൊണ്ട് മൃദുല ഗൗരവത്തോടെ ആരാഞ്ഞു. "അങ്ങനെ ഒന്നും ചോദിച്ചാൽ എനിക്ക് പറഞ്ഞു തരാൻ അറിയില്ലടോ.. കളിക്കൂട്ടുകാരായിരുന്നു ഞങ്ങൾ. എന്റെ അച്ഛന്റെ സ്വഭാവം അറിയാല്ലോ. കുഞ്ഞുനാളിലൊക്കെ അച്ഛൻ ഫാമിലേക്ക് പോകുന്ന സമയങ്ങളിലാണ് ഞാൻ വീടിന് വെളിയിലേക്ക് ഒന്നിറങ്ങാറ് പോലും. അതിൽ പകുതി സമയവും ഞങ്ങൾ ഒരുമിച്ചായിരുന്നു. ഞങ്ങൾ വളർന്നത് ഒരുമിച്ചാണെന്ന് പറയാം. വലുതായപ്പോൾ ആ ഗ്രാമത്തിലെ പകുതി പെൺകുട്ടികളും എന്നെ ഇഷ്ടപ്പെട്ട് എന്റെ പിറകെ വന്നപ്പോഴും മിശ്വ മാത്രം ഇന്നേ വരേ എന്നോടൊരു ഇഷ്ടവും പ്രകടിപ്പിച്ചിട്ടില്ല. അത് തന്നെ ആയിരിക്കാം ഞാൻ പോലും അറിയാതെ എന്നെ അവളിലേക്ക് അടുപ്പിച്ചതും. " തരുൺ പറഞ്ഞു കൊണ്ട് നിശ്വസിച്ചപ്പോൾ മൃദുല ഞെട്ടലോടെ അവനെ നോക്കി. "പക്ഷേ അവളോട് എനിക്കുള്ള വികാരം എന്താണെന്ന് എനിക്കുമൊരു പിടുത്തവുമില്ലായിരുന്നു... അവൾ ഇങ്ങോട്ട് വരുന്ന വരെ." "നിനക്കവളോട് പ്രണയമാണോ.?" "എനിക്കറിയില്ല മൃദുലാ. അവിടെയുള്ള പല സുന്ദരിമാരേയും ചോട്ടു എനിക്ക് സെറ്റാക്കി തന്നിട്ടുണ്ട്. പക്ഷേ അങ്ങനെ ഒരു വികാരത്തിനപ്പുറം എന്തോ ഒന്ന് മിശ്വയോട് എനിക്കുണ്ടായിരുന്നെന്ന് ഇപ്പോൾ ഞാൻ മനസിലാക്കുന്നു. അത് കൊണ്ട് തന്നെ ആയിരിക്കാം അവളെ കുറിച്ചൊരു വിവരവുമില്ലെന്ന് അവളുടെ അമ്മ വന്ന് പറഞ്ഞപ്പോൾ അച്ഛനെ പോലും വകവെയ്ക്കാതെ ഞാനിങ്ങോട്ട് വണ്ടി കയറിയതും!" മൃദുല കണ്ണുകൾ തുറിച്ചു കൊണ്ട് തരുണിനെ നോക്കി. "അതേടോ. അല്ലാതെ ഞാനൊന്ന് വഴക്കിട്ടപ്പോൾ എന്റെ അച്ഛൻ ഇങ്ങോട്ട് വരാൻ എനിക്ക് സമ്മതം തന്നെന്നു കരുതിയോ താൻ? അതൊരിക്കലും ഉണ്ടാകില്ലെന്ന് ആരേക്കാൾ നന്നായി എനിക്കറിയാം. ഇങ്ങോട്ടെന്നല്ല.. ആ ഗ്രാമം വിട്ട് എങ്ങോട്ട് പോകാനും ദിനകർ റെഡ്‌ഡി എന്നെ അനുവദിക്കില്ല. അയാളുടെ പട്ടിക്ക് സമമാണ് ഞാൻ. ആളുകളിൽ നിന്നും ലഭിക്കാനുള്ള പണം അവരെ പേടിപ്പിച്ചു കൈക്കലാക്കാനും അയാളുടെ സ്വത്തുവകകൾക്ക് കാവൽ നിൽക്കാനും ഒരു പട്ടി! ആജ്ഞ പോലെ നിന്നാൽ വയറു നിറയേ ആഹാരവും, കിടക്കാൻ ഇടവും മറ്റു സൗകര്യങ്ങളും ലഭിക്കും. എതിർത്താൽ ഈ ഭൂമുഖത്ത് നിന്നും ഇല്ലാതാക്കുകയും ചെയ്യും!" തരുൺ ഒരു ചെറു പുഞ്ചിരിയോടെ പറയുന്നത് മൃദുല ഒരു ഞെട്ടലോടെ കേട്ടിരുന്നു. അമ്മാവൻ ഒരു ക്രൂരനാണെന്ന് പല സംസാരങ്ങളിൽ നിന്നും താൻ ഗ്രഹിച്ചെടുത്തിട്ടുണ്ടെങ്കിലും സ്വന്തം മകനോടും അയാൾ അങ്ങനെ ആണെന്നുള്ള സത്യം അവളെ ഞെട്ടിച്ചു കളഞ്ഞു. മൃദുലക്ക് താനെന്തൊരു ഭാഗ്യവതിയാണെന്നും ആ നിമിഷം സ്വയം തോന്നിപ്പോയി.. "അതാണ് ഞാൻ പറഞ്ഞത്. എനിക്ക് തന്റെ സഹായം വേണമെടോ. മിശ്വ എന്നോടൊന്നും പറയാഞ്ഞത് അത് എന്റെ തെറ്റുകൾ കൊണ്ട് തന്നെ ആയിരിക്കാം. മറ്റുള്ള പെൺകുട്ടികളോടുള്ള എന്റെ സമീപനം കണ്ട് അവരെ പോൽ ആണ് ഞാനവളെയും കാണുന്നത് എന്നോ അല്ലെങ്കിൽ എല്ലാം പറഞ്ഞ് കൂടെ കൂട്ടാൻ പറ്റിയ ഒരു വ്യക്തി അല്ല ഞാനെന്ന് ചിന്തിച്ചു കൊണ്ടോ.. മനപ്പൂർവ്വം എന്നെ ഒഴിവാക്കികളഞ്ഞതാണ്.. പക്ഷേ എനിക്കവളെ കണ്ടുപിടിക്കണം മൃദുലാ . എന്തെങ്കിലും ആപത്തിൽ കുടുങ്ങി കിടക്കുകയാണെങ്കിൽ അതിൽ നിന്നും രക്ഷപ്പെടുത്തുകയും വേണം.." “എന്നിട്ട്.? " "എന്നിട്ട്.. എനിക്കവളെ അറിയിക്കണം. എന്റെ ഉള്ളിൽ ഒരു പ്രത്യേക സ്ഥാനം അവൾക്കുണ്ടെന്ന്." തരുൺ പുഞ്ചിരിയോടെ പറഞ്ഞപ്പോൾ മൃദുല നഷ്ടബോധത്തോടെ ഒന്ന് പുഞ്ചിരിക്കാൻ ശ്രമിച്ചു. "നമുക്ക് നോക്കാം തരുൺ. സ്ഥലത്തിന്റെ പേരറിയാത്തത് കൊണ്ടാ. മൈസൂരിൽ എവിടെയാണെങ്കിലും നമുക്ക് നിഷ്പ്രയാസം ചെന്ന് കണ്ടുപിടിക്കാമായിരുന്നു. എന്തായാലും നീ ഇവിടെ ഒക്കെ ഒന്ന് ചുറ്റിയടിക്ക്. എന്തെങ്കിലും സൂചന കിട്ടിയാലോ." മൃദുല പറഞ്ഞപ്പോൾ തരുൺ ഒന്ന് അമർത്തി മൂളി. മൃദുല പുഞ്ചിരിച്ചു കൊണ്ട് എഴുന്നേറ്റ് പോയതും എന്തോ ഓർത്ത പോൽ വേഗം തിരികെ വന്നു.. "പിന്നെ തരുൺ.. അച്ഛനോട് നീ ഇതിനാണ് ഇങ്ങോട്ട് വന്നതെന്നൊന്നും ഇപ്പോൾ തന്നെ പറയണ്ട കേട്ടോ. തല്ക്കാലം അച്ഛന്റെ കൂടെ നിൽക്ക്. അനന്തരവനല്ലേ. അച്ഛന്‌ എന്തൊക്കെയോ പ്ലാനുകളുണ്ടെന്നു തോന്നുന്നു.“ തരുണിന്റെ നെറ്റി ചുളിഞ്ഞു. “അച്ഛൻ ഒരിത്തിരി പെശകാണ്‌. അറിയാല്ലോ. ആളെ കണ്ടപ്പൊ ഒരു ഗോഡ് ഫാദർ വൈബ് ഇല്ലാർന്നോ ?” അവന്റെ മുഖത്ത് കൗതുകം വിടർന്നു. “എന്റെ വായീന്നൊന്നും വീഴൂന്ന് നോക്കി ഇരിക്കണ്ട.” അവൾ തരുണിന്റെ മൂക്കിനിട്ട് ഒരു കുത്തു കൊടുത്തു. “എന്തായാലും എന്റച്ഛനായതുകൊണ്ടു പറയുകയല്ല. ആൾ ഒരു കൊച്ചു ഡോൺ തന്നെയാണ്‌. നോക്കീം കണ്ടുമൊക്കെ നിന്നാൽ നിനക്കത് നല്ലതാ. പ്രത്യേകിച്ച് ഈ വീട്ടിൽ, ഇതൊക്കെ നോക്കി നടത്താൻ ഒരു ആൺകുട്ടി ഇല്ലാത്ത സ്ഥിതിക്ക്.” തരുൺ തലയാട്ടി. “പിന്നെ, വളരെ വളരെ സീരിയസായിട്ട് ഒരു കാര്യം പറയാം.” അവളുടെ മുഖത്ത് ഗൗരവം കലർന്നു. “നിനക്കു കിട്ടുന്ന അടുത്ത ചാൻസിൽ, ആ ചോട്ടു എന്നു പറയുന്നവനെ ഒഴിവാക്കണം.” “ങ്ഹേ!” “എന്റെയൊരു ഇന്റ്യൂഷനാന്ന് കൂട്ടിക്കോ. അവൻ ആള്‌ ശരിയല്ല. നിനക്കത് ഭാവിയിൽ മനസ്സിലായിക്കോളും.” തരുണിൽ നിന്നും ഒരു ദീർഘനിശ്വാസമുയർന്നു. ഇത്ര അധികാരത്തോടെ തന്റെ ജീവിതത്തിൽ കയറി അഭിപ്രായം പറയാറായോ ഈ പെണ്ണ്‌ ? അവന്റെയുള്ളിൽ ചെറുതല്ലാത്ത ഒരു ഈഗോ രൂപപ്പെട്ടു. “അപ്പോ... ഞാൻ പറഞ്ഞു വരുന്നത്, നീ അച്ഛന്റെ കൂടെ നിൽക്കുകയാണെങ്കിൽ, ഒരുപാട് യാത്രകൾ വേണ്ടിവരും. അപ്പോ, ആ വഴിക്ക് നീ ഒന്നു നന്നായി ശ്രമിച്ചാൽ ചിലപ്പൊ, മിശ്വയെ കണ്ടുപിടിക്കാൻ പറ്റിക്കൂടായ്കയില്ല.” “ഉം...” “എന്താ പെട്ടെന്നൊരു ഗൗരവം ? ചോട്ടൂന്റെ കാര്യം പറഞ്ഞത് നിനക്കിഷ്ടയില്ല അല്ലേ ?“ ”അതെന്താന്നറിയോ മൃദുല... അവനെ ഞാൻ കാണാൻ തുടങ്ങിയിട്ട്-“ ”അതൊന്നും എനിക്ക് കേൾക്കണ്ട. സുഖിപ്പിച്ച് സംസാരിച്ച് ശീലമില്ല എനിക്ക്. ഐ ഡോണ്ട് ഗിവ് എ ഷിറ്റ് എബൗട്ട് യുവർ ഫ്രണ്ട്ഷിപ്പ്! അവൻ ബാഡ് ന്യൂസാണ്‌. ഒഴിവാക്കണം! ദാറ്റ്സ് ഇറ്റ്!“ സ്കൂളിൽ പഠിപ്പിക്കാൻ വിറ്റ സമയത്ത് ചോട്ടുവിന്റെ കൂടെ കറങ്ങി നടന്നില്ലായിരുന്നെങ്കിൽ, ഇപ്പോൾ അവൾക്ക് ഇംഗ്ലീഷിൽ തന്നെ, ഒത്ത ഒരു മറുപടി കൊടുക്കാമായിരുന്നു എന്നായിരിക്കണം തരുൺ ഓർത്തത്. അവന്റെ മുഖത്ത് ഒരു ഇളിഭ്യച്ചിരി വിടർന്നു. ******* ഇരുട്ടിലും വെട്ടിത്തിളങ്ങുന്ന വിജയപുരയിലെ ഒരു ബംഗ്ലാവ്. ചുറ്റിലും ബൾബ് പിടിപ്പിച്ചിട്ടുള്ള മതിൽ കെട്ടിനുള്ളിലെ ആ പടുക്കൂറ്റൻ ബംഗ്ലാവിനുള്ളിൽ ഒരു സ്വകാര്യ നിശാ പാർട്ടി അരങ്ങേറുകയാണ്. ബംഗ്ലാവിന്റെ പ്രധാന വാതിൽ വഴി അകത്തേക്ക് കയറിയാൽ, ഹാളിന്റെ ഒത്ത നടുക്കായി ഇരുവശങ്ങളിലൂടെയും ഒരേ സമയം കയറി മുകളിലേക്കെത്താൻ സാധിക്കുന്ന ഇരട്ട ഗോവണികൾ കാണാം. ഗോവണി കയറി മുകളിലെത്തിയാൽ വലതു വശത്തായി ഒരു വലിയ മുറിയാണ് .. ചുവന്ന പശ്ചാത്തലത്തിൽ അങ്ങിങ്ങായി പ്രകാശം തൂക്കിയിട്ടുള്ള ആഡംബരം വിളിച്ചോതുന്ന രീതിയിൽ ഒരുക്കിയിരിക്കുന്ന ഒരു മജ്‌ലിസ് ഹാൾ പോൽ തോന്നിക്കുന്ന ആ മുറിയിലാണ് പാർട്ടി നടക്കുന്നത്.. ചുവപ്പിൽ സ്വർണ്ണ നൂലുകൾ കൊണ്ടുള്ള ചിത്രപ്പണിയാൽ തീർത്ത മനോഹരമായ ആ വലിയ പരവതാനിക്ക് ഒത്ത നടുക്ക് ചെന്ന് അയാൾ ഉപവിഷ്ടനായി.. ആ ബംഗ്ലാവിന്റെ ഉടമസ്ഥനും, ആ നാട്ടിലെ അറിയപ്പെടുന്ന ഒരു സമ്പന്നനുമായ സാക്ഷാൽ വീർ സിംഹ റാവു! വെള്ള ശർവാണിയും അതിനു മീതെ ചുവന്ന നിറത്തിലുള്ള ഒരു ചെറിയ കോട്ടും ധരിച്ച അൻപതിനോടടുത്ത് പ്രായം തോന്നിക്കുന്ന ആ വെളുത്ത് തടിച്ച മനുഷ്യൻ ആകാംഷയോടെ കാത്തിരിക്കുകയാണ്. അയാൾക്ക് ചുറ്റിലുമായി വിവിധയിനം ഭക്ഷണവിഭവങ്ങളും, പാനീയങ്ങളും, മദ്യകുപ്പികളും നിമിഷങ്ങൾക്കകം വന്ന് നിരന്നു. വീർ സിംഹ അജ്ഞാപിച്ചപ്പോൾ ജോലിക്കാരിൽ ഒരാൾ മുൻപോട്ട് വന്ന് മദ്യക്കുപ്പിയെടുത്ത് പൊട്ടിച്ചു കൊണ്ട് ഒരു ഗ്ലാസിലേക്ക് അല്പം പകർന്നു കൊടുത്തു. അത് ചുണ്ടോട് ചേർക്കുന്നതിനോടൊപ്പം അയാളുടെ വിരലുകൾ മുൻപോട്ട് നീങ്ങിക്കൊണ്ട് എന്തോ ഒരു ആംഗ്യം കാണിക്കുന്നുണ്ടായിരുന്നു. അടുത്ത നിമിഷം തന്നെ ചടുല താളത്തിൽ ഒരു ഗാനം ഉയർന്നു അവിടെ. അതോടൊപ്പം, പാട്ടിനൊത്ത് ചുവടുകൾ വെച്ച് കൊണ്ട് അല്പവസ്ത്രധാരിയായ ഒരു പെൺകുട്ടിയും ആ വേദിയിലേക്ക് കടന്നു വന്നു! അവളെ കണ്ട മാത്രയിൽ വീർ സിംഹ റാവു വിന്റെ കണ്ണുകൾ തിളങ്ങി. ശരീരത്തോട് പറ്റിച്ചേർന്ന് ഉടൽവടിവുകൾ എടുത്ത് കാണിക്കുന്ന പച്ച നിറത്തിലുള്ള ഇടുങ്ങിയ ഹാഫ് ടോപ്പും കഷ്ടിച്ച് തുടയെറ്റം വരേ എത്തി നിൽക്കുന്ന ഒരു മിനി സ്‌കർട്ടുമാണ് ആ പെൺകുട്ടിയുടെ വേശം. നൃത്തത്തിനനുസരിച്ച് ചലിക്കുന്ന പഞ്ഞിക്കെട്ട് പോലുള്ള അവളുടെ നഗ്നമായ വയറിലേക്കും പുക്കിൾ ചുഴിയിലേക്കും ഇടക്കിടെ അയാളുടെ കണ്ണുകൾ പാളുന്നുണ്ടായിരുന്നു. ഈണത്തിനൊത്ത് കറങ്ങുമ്പോൾ ഉയർന്നു താഴുന്ന കുഞ്ഞുടുപ്പ് അവളുടെ ശരീരം മുക്കാൽ ഭാഗവും പ്രദർശിപ്പിച്ചു. കൈ കാലുകൾ ചലിപ്പിച്ചും, അകത്തിയും, തുള്ളിയും വശ്യമായ ചടുല നൃത്തത്തോടെ നിമിഷങ്ങൾ കൊണ്ട് അവൾ വി ഐ പി യുടെ മനസ്സ് കവർന്നു. മദ്യം നുണഞ്ഞു കൊണ്ടായാൾ അവളെ മാടി വിളിക്കുമ്പോൾ ചിരിയോടെ തുള്ളിക്കൊണ്ട് ആ പെൺകുട്ടി അയാൾക്കരികിലേക്ക് ഓടിച്ചെന്ന് ശരീരത്തിൽ തൊട്ടുരുമ്മി നൃത്തം ചെയ്തു. ചുറ്റിലുമുള്ള ഭക്ഷണത്തളികയിൽ നിന്നും ഓരോ വിഭവങ്ങളായി സ്പൂണിലെടുത്തു കൊണ്ടവൾ അയാളുടെ വായിലേക്ക് വെച്ചു കൊടുത്തു. ഇതെല്ലാം കണ്ട് കൊണ്ട് പൂച്ചക്കുഞ്ഞിന്റെ മുഖഭാവവുമായി ഒരു പെൺകുട്ടി ആ മുറിയുടെ മൂലയിൽ ഇരുപ്പുണ്ട്. ചുറ്റിലും നടക്കുന്ന കാഴ്ച്ചകൾ കണ്ട് ഭീതിയോടെ വിറക്കുന്ന അവളെ ചേർത്തു പിടിച്ചു കൊണ്ട് അംശിയും! ഭക്ഷണം വാരികൊടുത്തു കൊണ്ട് ആ പെൺകുട്ടി ചുവടുകൾ വെച്ച് തിരിഞ്ഞതും വീർ സിംഹ അവളുടെ മൃദുലമാം കയ്യിൽ പിടിത്തുമിട്ടു. നാണത്താൽ എന്ന പോലെ മിഴികൾ പിടപ്പിക്കുന്ന അവളെ വലിച്ചടുപ്പിച്ചു കൊണ്ട് അയാൾ ചുംബിച്ചതും മുറിയുടെ മൂലക്കൽ ഈ കാഴ്ച്ച കണ്ട് ഇരുന്ന മിശ്വ അറപ്പോടെ മുഖം വെട്ടിച്ചു! "മോളേ... ഇയാളെ പോലെ ടിപ്പ് തരുന്ന വേറൊരാൾ ഈ വിജയപുരിയിൽ ഇല്ല." അംശി അവളുടെ ചെവിക്കരികിൽ ചുണ്ടുകൾ ചേർത്ത് അടക്കി പറഞ്ഞതും മിശ്വ നീട്ടിയൊരു തുപ്പായിരുന്നു! ഉറക്കെ കാർക്കിച്ചു തുപ്പിയ ശബ്ദം കേട്ടതും വി ഐ പി ഞെട്ടലോടെ ആ മുറിയുടെ മൂലയിലേക്ക് തിരിഞ്ഞു നോക്കി! ഗാനം നിലച്ചു. നിശബ്ദത! സൂചി വീണാൽ കേൾക്കുന്നത്ര നിശബ്ദത! അത്രയും നേരം പുഞ്ചിരിയോടെ ഇരുന്ന അയാളുടെ മുഖത്ത് വെറുപ്പും ദേഷ്യവും ഒരുപോൽ നിറഞ്ഞു. അംശി ഇരുന്ന ഇരുപ്പിൽ വിയർത്തു കുളിച്ചു. മിശ്വയുടെ ശരീരം കുലുങ്ങി വിറയ്ക്കാനാരംഭിച്ചു. വീർ സിംഹ റാവു അരിശത്തോടെ പരവതാനിയിൽ നിന്നും എഴുന്നേറ്റു! പോകുന്ന വഴിയിൽ മദ്യലഹരിയിൽ വഴുതിയ അയാൾ ഒരു കാൽ എടുത്ത് വെച്ചത് ബിരിയാണി പാത്രത്തിലേക്കാണ്. ദേഷ്യത്തോടെ അയാൾ ആ പാത്രം വലം കാല് വെച്ച് ചുഴറ്റിക്കൊണ്ട് ഒരൊറ്റ തൊഴി! അലോസരപ്പെടുത്തുന്ന ശബ്ദത്തോടെ ആ ബിരിയാണി പാത്രം ഭിത്തിയിൽ ചെന്നിടിച്ചു ചിതറി! അക്ക താഴെ നിന്നും ഗോവണിപ്പടിയിലൂടെ ഓടിക്കയറി വരുന്ന ശബ്ദം കേൾക്കാമായിരുന്നു. ഒരു കാട്ടുപോത്തിന്റെ ഭാവാദികളുമായി കലിതുള്ളിക്കൊണ്ട് ആ തടിച്ച മനുഷ്യൻ പുറത്തേക്കിറങ്ങിപ്പോയത് അക്കയുടെ മുൻപിലൂടെയാണ്‌. അയാളുടെ മുഖഭാവം കണ്ടിട്ടാകണം, എന്തു പറ്റിയെന്നൊന്നു ചോദിക്കാൻ പോലും ആ സ്ത്രീയ്ക്ക് സധിച്ചില്ല. മജ്ലിസിന്റെ അകത്തേക്ക് കയറി വന്ന അക്ക, മുന്നിൽ നിൽക്കുന്ന ഡാൻസുകാരിയെ ഒന്ന് നോക്കി. ദഹിപ്പിക്കുന്ന നോട്ടം! അവൾ വേഗം മിശ്വയെ നോക്കി വിരൽ ചൂണ്ടി. ഭയന്നു വിറങ്ങലിച്ച്, ശരീരം കിലുകിലെ വിറച്ചുകൊണ്ട് ആ സാധു പെൺകുട്ടി അക്കയെ നോക്കി ദയനീയമായി കൈ കൂപ്പി. സാവധാനം അക്കയുടെ മുഖഭാവം മാറി. ഒരു ചെറിയ പുഞ്ചിരി വിടർന്നു. ഭാവമേതാണെന്ന് തിരിച്ചറിയാനാകുന്നില്ല ആർക്കും. കണ്ണുകൾ കുറുകി വന്നു അവരുടെ. മിശ്വയുടെ അരികിലെത്തി കുനിഞ്ഞ അവർ, സാവധാനം ആ പെൺകുട്ടിയെ പിടിച്ചെഴുന്നേൽപ്പിച്ചു. "ഇവിടെ വെച്ച് വേണ്ട..! നീ വാ..." അക്കയുടെ ചുണ്ടിൽ വിരിഞ്ഞ പുഞ്ചിരി കൊലച്ചിരിയായാണ് തൊട്ടരികിൽ നിൽപുണ്ടായിരുന്ന അംശിക്ക് തോന്നിയത്! തുടരും. കണ്ണൂർകാരൻ ❤️❤️❤️ #🕵️‍♀️ കുറ്റാന്വേഷണ കഥകൾ #🧟 പ്രേതകഥകൾ! #📔 കഥ #📙 നോവൽ #✍ തുടർക്കഥ