ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/XZ1VZXb?d=n&ui=v64j8rk&e1=cഅൽപ്പദൂരം ഡ്രൈവ് ചെയ്തു കഴിഞ്ഞപ്പോഴേക്കും മിഴിക്ക് വല്ലാത്ത ക്ഷീണം തോന്നി. വയറ്റിൽ നിന്നും മുരൾച്ച കേൾക്കുന്നത് പോലെ.. അപ്പോഴാണ് ഇത്ര നേരമായിട്ടും താൻ ഒന്നും കഴിച്ചിട്ടില്ലല്ലോ എന്ന് അവൾ ഓർമിച്ചത്. ഇന്നലെ വൈകിട്ട് രണ്ട് ബ്രഡ് തിന്നതാണ്.വിശപ്പും ദാഹവും ഒന്നും അറിയുന്നില്ലായിരുന്നു. ഇപ്പോൾപക്ഷെ, വിശപ്പ്‌ സഹിക്കാൻ പറ്റുന്നില്ല. കണ്ണുകളിൽ ഇരുട്ട് കയറുന്നത് പോലെ തോന്നുന്നുണ്ട്. അവൾ ആദ്യം കണ്ട ഭക്ഷണശാലക്ക് മുൻപിൽ വണ്ടി നിർത്തി. ഓർഡർ ചെയ്ത ഭക്ഷണവും, ഒരു ഗ്ലാസ് വെള്ളവും കൂടെ കുടിച്ചു കഴിഞ്ഞപ്പോഴാണ് അവൾക്ക് സമാധാനമായത്. അവൾ കൈ കഴുകാനായി എഴുന്നേറ്റു. വാഷ് കൗണ്ടറിലെ മിററിൽ തന്റെ രൂപം കണ്ടപ്പോൾ അവൾ നോക്കി നിന്നു. കൺതടങ്ങൾക്ക് താഴെ കറുപ്പ് പടർന്നിരിക്കുന്നു,കവിളുകൾ നന്നേ ഒട്ടിയിരിക്കുന്നു..ഉറക്കച്ചടവുള്ളമുഖം. സൗന്ദര്യ സംരക്ഷണത്തിൽ എത്രമാത്രം കരുതലുള്ള പെൺകുട്ടിയായിരുന്നു താൻ. ഇപ്പോൾ തന്റെ രൂപം കണ്ടാൽ പാവം തോന്നും. അവൾ ഒരു ദീർഘനിശ്വാസത്തോടെ പിന്തിരിഞ്ഞു. ബിൽ പേ ചെയ്തുകൊണ്ടിരുന്നപ്പോഴാണ് ഭക്ഷണം കഴിക്കുന്ന രണ്ടു പേരെ അവൾ ശ്രദ്ദിച്ചത് ആകാശ്..... കൂടെ ഒരു പെൺകുട്ടിയും ഉണ്ട്. ആകാശിന്റെ മടിയിൽ ഒരു കൊച്ചുകുഞ്ഞിരിപ്പുണ്ട്. ആ പെൺകുട്ടി ആകാശിനോട് എന്തോ പറഞ്ഞു ചിരിച്ചതും വിക്കി ചുമച്ചതും ഒരുമിച്ചായിരുന്നു. ആകാശ് പൊടുന്നനെ അവളുടെ നിറുകയിൽ തട്ടുന്നതും ചുമച്ച്‌ ചുമച്ചവളുടെ കണ്ണുകൾ നിറഞ്ഞൊഴുകിയത് തുടച്ചു കൊടുക്കുന്നതും കണ്ടപ്പോൾ മിഴിക്ക് ഉള്ളിൽ എന്തോ വേദന തോന്നി. മടിയിൽ ഇരിക്കുന്ന വാവയോട് എന്തോ പറഞ്ഞ്, ആ കുഞ്ഞ് വായിലേക്ക് ഭക്ഷണം വച്ച് കൊടുക്കുകയാണ് ആകാശ് അയാൾ തന്നെ കാണുന്നതിനു മുൻപ് അവിടെ നിന്നും പോകണം എന്ന് വിചാരിച്ച് അവൾ നടക്കാൻ തുടങ്ങിയപ്പോഴാണ്, ആകാശവളുടെ നേരെ നോക്കിയത്. ആകാശ് ഒരു നിമിഷം അവളെ തന്നെ നോക്കിയിരുന്നു. ആകാശ് നോക്കുന്നത് കൊണ്ടാവണം ആ പെൺകുട്ടിയും മിഴിയുടെ നേരെ നോക്കി. പെട്ടെന്ന് ആ പെൺകുട്ടി ചെറുചിരിയോടെ എഴുന്നേറ്റ് മിഴിയുടെ അടുത്തേക്ക് വന്നു. മിഴി പരുങ്ങലോടെ അവളെ നോക്കി. ചേച്ചി... അവൾ തൊട്ട് മുൻപിൽ വന്ന് നിന്നു. മിഴി ചിരിക്കാൻ ശ്രമിച്ചു. ഏട്ടൻ , ചേച്ചിയുടെ കാര്യം പലപ്പോഴും എന്നോട് പറഞ്ഞിട്ടുണ്ട്. എനിക്ക് ചേച്ചിയോട് നന്ദി മാത്രമേ ഉള്ളൂ.. ഈ ഭൂമിയിലെ ഏറ്റവും നല്ല മനുഷ്യനെ എനിക്ക് കിട്ടിയതിന് കാരണം ചേച്ചിയാണ്. ഇല്ലാത്തതൊക്കെ പറഞ്ഞുണ്ടാക്കിയിട്ടാണെങ്കിലും ചേച്ചി ഏട്ടന്റെ ജീവിതത്തിൽ നിന്ന് ഇറങ്ങി പോയതുകൊണ്ടാണ്, എനിക്ക് ഏട്ടനെ കിട്ടിയത്. മിഴിക്കവളെ നോക്കാൻ മടി തോന്നി. ചേച്ചിക്ക് നല്ലതേ വരൂ....പറഞ്ഞിട്ട് ആ പെൺകുട്ടി തിരിഞ്ഞു നടന്നു. മിഴി പുറത്തേക്കിറങ്ങി. കാറിൽ കയറി സ്റ്റിയറിങ്ങിൽ തല വച്ച് അവൾ കുനിഞ്ഞിരുന്നു. കുറ്റബോധത്തോടെ മാത്രമേ തനിക്ക് ആകാശിനെ കാണാൻ കഴിഞ്ഞുള്ളൂ. തന്റെ കഴുത്തിൽ താലികെട്ടിയ നിമിഷം മുതൽ എത്ര കരുതലോടെയായിരുന്നു അയാൾ തന്നെ കൊണ്ടു നടന്നത്. താൻ ടിവി കണ്ടുകൊണ്ട് കിടക്കുമ്പോൾ തന്നെ അരികിൽ വന്നിരിക്കും. ഒരിക്കൽ താഴെ ഇരുന്ന് അയാൾ തന്റെ കാൽപാദങ്ങളിൽ ചുംബിച്ചത് അവൾക്കോർമ്മ വന്നു.. എത്ര സ്നേഹത്തോടെയും ബഹുമാനത്തോടെയുമാണ് അയാൾ തന്നെ കരുതിയിരുന്നത്. കയ്യിലുള്ള മാണിക്യത്തെ കളഞ്ഞിട്ട് താൻ വെറും മുക്ക് പണ്ടത്തെ തിരഞ്ഞു പോയവളാണ്. ആകാശിനെ സ്നേഹിക്കാൻ എപ്പോഴെങ്കിലുംശ്രമിച്ചിരുന്നെങ്കിൽ, തനിക്ക് എന്തൊക്കെ സംഭവിച്ചാലും അയാൾ തന്റെ കൂടെനിൽക്കുമായിരുന്നു. ജീവിതത്തിന്റെ അങ്ങേയറ്റം വരെ അയാൾ തന്നെ കരുതലോടെ കൊണ്ടുനടക്കുമായിരുന്നു. ഞാൻ എന്തൊരു മണ്ടിയായ സ്ത്രീയായിരുന്നു. എല്ലാം സ്വയം നശിപ്പിച്ചതാണ്. ആകാശ്....ഇനിയുള്ള ജന്മമെങ്കിലും എനിക്ക് ആകാശിനോടൊപ്പം ജീവിക്കാനുള്ള ഭാഗ്യം ഉണ്ടാകുമോ? ഇനിയൊരിക്കൽ കൂടി അങ്ങനെ ഒരു അവസരം ലഭിച്ചാൽ... ആകാശ് ഒരിക്കലും ഞാൻ നിന്നെ വിട്ടു പോകില്ല. എനിക്ക് നിന്റെ ഭാര്യയായി നിന്റെ കുഞ്ഞുങ്ങളെ പെറ്റ് പോറ്റി നിന്നോടൊപ്പം കഴിഞ്ഞാൽ മതി. അവൾ മുഖം അമർത്തി തുടച്ചു. പിന്നെ വണ്ടി മുന്നോട്ടെടുത്തു. ഗൂഗിൾ മാപ്പ് നോക്കിയാണ് അവളുടെ യാത്ര. ആദ്യമായിട്ടാണ് ഇത്രയും ദൂരം സ്വയം ഡ്രൈവ് ചെയ്യുന്നത്. മണിക്കൂറുകൾ ഇഴഞ്ഞു നീങ്ങി. അവൾ ഡോക്ടർ ഷാനി പറഞ്ഞ സ്ഥലത്തെത്തി . ഇനിയങ്ങോട്ട് ഡിയോണിന്റെ തോട്ടത്തിലൂടെയുള്ള വഴിയിലൂടെ പോകണം. ആ വഴി ഒരു അവസാനിക്കുന്നത് അവരുടെ ബംഗ്ലാവിന് മുന്നിലാണെന്നാണ് പറഞ്ഞത്. അവൾ അങ്ങോട്ട് വണ്ടി തിരിച്ചു. കുറച്ച് ഉള്ളിലേക്ക് പോയപ്പോൾ വലിയൊരു ബംഗ്ലാവ് തലയുയർത്തിനിൽക്കുന്നത് കണ്ടു. അവൾ വണ്ടി നിർത്തി ഇറങ്ങി. മോളെ... അവിടെ നിൽക്ക്.. ഓടല്ലേ... പൊന്നേ വീഴും... ഒരു സ്ത്രീയുടെ ശബ്ദം കേട്ടിടത്തേക്ക് മിഴി നോക്കി ഒരു പെൺകുഞ്ഞ് കുടുകുടെ ചിരിച്ചുകൊണ്ട് ഓടി വരികയാണ്. കുഞ്ഞിന് പിന്നാലെ, അന്ന് ഡിയോണിനൊപ്പം കണ്ട സ്ത്രീ ഓടി വരുന്നുണ്ട്. അമ്മയുടെ മുത്തേ... ഓടല്ലേ വീഴും...അമ്മ പറയുന്നത് കേൾക്കു മോളെ... അവർ പിന്നാലെ ഓടിവന്ന് കുഞ്ഞിനെ എടുത്തു. വണ്ടിയുടെ ശബ്ദം കേട്ട് ഡിയോണും അങ്ങോട്ട് ഇറങ്ങി വന്നിരുന്നു. ഇത് കണ്ടോ ഡിയോൺ ഈ കുറുമ്പിഎന്നെ ഇട്ട് ഓടിക്കുന്നത്... അയാൾ ചിരിയോടെ പുറത്തേക്ക് നോക്കിയപ്പോഴാണ് മിഴിയെ കണ്ടത്. അയാളുടെ മുഖത്തെ ചിരി മാഞ്ഞു അലീന കുഞ്ഞിനെയും എടുത്തുകൊണ്ട് ഡിയോണിന്റെ അരികിൽ വന്നു നിന്നു. ആരാ ഡിയോൺ ഇത്? അയാൾ അതിനു മറുപടി പറഞ്ഞില്ല. മിഴി ആ സ്ത്രീയുടെ കയ്യിലിരിക്കുന്ന കുഞ്ഞിനെ കണ്ണിമയ്ക്കാതെ നോക്കുകയായിരുന്നു. തന്റെ കുഞ്ഞ് തന്നെപ്പോലെ തന്നെയാണ് ഇരിക്കുന്നത്. അവളുടെ ഉള്ളം ആർദ്രമായി... ഉള്ളിൽ മാതൃത്വം നിറഞ്ഞുതുളുമ്പി. അവൾ അവരുടെ അടുത്തേക്ക് ചെന്നു. എന്റെ... എന്റെ കുഞ്ഞിനെ ഇങ്ങു താ.. അവൾ കുഞ്ഞിനെ എടുക്കാൻ ആഞ്ഞു അലീന കുഞ്ഞിനെയും കൊണ്ട് പിറകിലേക്ക് മാറി. എന്റെ കുഞ്ഞാണിത് ഇങ്ങ് തരൂ...മിഴി പറഞ്ഞു. ഇവർ എന്തൊക്കെയാണ് ഈ പറയുന്നത് ഡിയോൺ. അലീന പരിഭ്രാന്തിയോടെ ചോദിച്ചു. എന്താ ഒന്നും മിണ്ടാതെ നിൽക്കുന്നത് ഡിയോൺ? ഇവർ ആരാ? നിങ്ങൾ ആരാണ്, മര്യാദക്ക് ഇറങ്ങിപ്പോകാൻ നോക്ക്. ഡിയോൺ മിഴിയുടെ നേരെ ചൂണ്ടി. അവൾ കത്തുന്ന കണ്ണുകളോടെ അയാളെ നോക്കി. നിങ്ങൾക്ക് ഞാൻ ആരാണെന്ന് അറിയില്ലല്ലെ?? മിഴി അലീനയുടെ നേരെ തിരിഞ്ഞു. ഇയാളെന്നെ ചതിക്കുകയായിരുന്നു. ഇത് എന്റെ കുഞ്ഞാണ്. മിഴി പറഞ്ഞു. നിങ്ങൾ ചോദിച്ച കാശ് ഡിയോൺ തന്നില്ലേ ? പിന്നെ കുഞ്ഞിന്റെ മേൽ നിങ്ങൾക്ക് എന്തവകാശമാണുള്ളത്? പണത്തിനു വേണ്ടിയല്ലേ നിങ്ങളീ കുഞ്ഞിനെ ഗർഭം ധരിച്ചത്? കിട്ടേണ്ടത് കിട്ടി കഴിഞ്ഞപ്പോൾ നിങ്ങൾ കുഞ്ഞിന്റെ മേൽ അവകാശം ചോദിക്കുന്നോ? എന്താ പറഞ്ഞത് കാശിനു വേണ്ടിയാണെന്നോ ? മിഴി പകച്ചു പോയി പറ...നിങ്ങൾക്ക് എത്ര പണം വേണമെങ്കിലും ഇനിയും തരാം. മേലിൽ എന്റെ കുഞ്ഞിന്റെ മേൽ ഒരവകാശവും പറഞ്ഞു വന്നേക്കരുത്.അലീന പറഞ്ഞു. ഓഹോ അങ്ങനെയൊക്കെയാണോ കാര്യങ്ങൾ? മിഴി പുച്ഛത്തോടെ ചിരിച്ചു. അപ്പോൾ ഇയാൾ ചതിച്ചത് എന്നെ മാത്രമല്ല,നിങ്ങളെയും കൂടിയാണ്. നിങ്ങൾക്കറിയാമോ ഇയാളെ ഞാൻഎത്രമാത്രം സ്നേഹിച്ചിരുന്നുവെന്ന്. സ്നേഹം ഭാവിച്ച് എന്റെ കഴുത്തിൽ ഇയാൾതാലികെട്ടി. എന്റെ ശരീരവും മനസ്സും ഞാൻ ഇയാൾക്ക് സമർപ്പിച്ചു. ഇയാളുടെ കുഞ്ഞിനെ ഞാൻ ഉദരത്തിൽ പേറി. കൂടെ ജീവിച്ച ഒരുനാളിൽ പോലും ഇയാൾ വിവാഹിതനാണെന്ന് പറഞ്ഞിരുന്നില്ല. എന്റെ വിശ്വാസം അയാൾ എന്റേത് മാത്രമാണെന്നായിരുന്നു. ഡെലിവറി കഴിഞ്ഞപ്പോൾ ഇയാളും, ഇയാളുടെ കസിൻ ഷീന ഡോക്ടറും കൂടി എന്റെ കുഞ്ഞു മരിച്ചുപോയി എന്ന് വരുത്തി തീർത്തു. ഞാനതു വിശ്വസിച്ചു പോയി. പക്ഷെ, ഒരമ്മയിൽ നിന്നും കുഞ്ഞിനെ മറച്ചു വയ്ക്കാൻ ആർക്കും കഴിയില്ല. ഇതെന്റെ കുഞ്ഞാണ് ചതിയിലൂടെ ഇയാൾ കൈക്കലാക്കിയതാണ് എന്റെ കുഞ്ഞിനെ അലീന നിറഞ്ഞ കണ്ണുകളോടെ ഡിയോണിന് നേരെ നോക്കി.. ഇല്ല അലീന ഇവൾ കള്ളം പറയുകയാണ്... അയാൾ തല കുനിച്ചു കൊണ്ട് പറഞ്ഞു. അലീന അയാളുടെ മുഖം പിടിച്ചുയർത്തി. പറ ഡിയോൺ, കുഞ്ഞിനു വേണ്ടി ഈ പെൺകുട്ടിയെ ഡിയോൺ ചതിക്കുകയായിരുന്നോ? ... പറ...? അയാൾ വീണ്ടും തലകുനിച്ചു. അയാൾക്ക് അലീനയോട് മാത്രം കള്ളം പറയാനാവില്ല. അപ്പോൾ, ചതിച്ചു സ്വന്തമാക്കിയതാണ് കുഞ്ഞിനെ? അല്ലേ...?അലീന ചോദിച്ചു. അയാൾ അപ്പോഴും തലയുയർത്തിയില്ല. 💚💚💚💚💚 തുടരും. കണ്ണൂർകാരൻ ❤️❤️❤️ #📔 കഥ #✍ തുടർക്കഥ #📚 ട്വിസ്റ്റ് കഥകൾ #📙 നോവൽ #💞 പ്രണയകഥകൾ