ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/mlBpzEQv?d=n&ui=v64j8rk&e1=cമിശ്വ 21 പുലർച്ചെ ആറ് മണി. കൂറ്റൻ ഗേറ്റുകൾ കടന്ന്, ആ കറുത്ത മഹീന്ദ്ര താർ കോമ്പൗണ്ടിനുള്ളിലേക്ക് കയറി. അതേ സമയം തന്നെ ബംഗ്ലാവിന്റെ കവാടവും തുറക്കപ്പെട്ടു. ട്രാക്കും, ടീ ഷർട്ടും ധരിച്ച് ജോഗിങ്ങിന് പോകാനുള്ള തയ്യാറെടുപ്പിൽ രാജശേഖര റെഡ്ഡി പുറത്തേക്കിറങ്ങി. ഇടവും വലവുമായി അസാമാന്യ വലിപ്പത്തിലുള്ള രണ്ട് പട്ടികളും അയാൾക്കൊപ്പമുണ്ടായിരുന്നു. തൊട്ട് പിറകിലായി, കറുത്ത വസ്ത്രം ധരിച്ച രണ്ട് ബോഡിഗാർഡുകളും ഇറങ്ങി. തരുൺ പോർച്ചിനുള്ളിലേക്ക് കയറ്റിയിടാനുള്ള ശ്രമമായിരുനു. ഇടയ്ക്ക് ഗ്ലാസ്സ് താഴ്ത്തി അവൻ അമ്മാവനെ നോക്കി ഒന്നു പുഞ്ചിരിച്ചു. "അങ്ങോട്ട് മാറ്റിയിടെടാ!" ഒട്ടും മയമില്ലായിരുന്നു ശേഖർജിയുടെ സ്വരത്തിന്. തരുൺ ഞെട്ടലോടെ തല ചെരിച്ചു നോക്കി. ഒരു നിമിഷം സ്തംഭിച്ച് ഇരുന്ന് പോയ അവൻ വണ്ടി ഒതുക്കി ഇട്ട് പുറത്തേക്കിറങ്ങി. "മാമാ... ചാവി എന്താ ചെയ്യേണ്ടത് ?" "ആവോ ? എന്തെങ്കിലും കാണിക്ക്‌. ഇതുവരെ നിന്റെ തോന്ന്യാസമല്ലാരുന്നോ. അങ്ങനെ തന്നെ നടക്കട്ടെ. " "മാമാ ഇതെന്താ ഇങ്ങനെയൊക്കെ സംസാരിക്കുന്നെ?" "ഇത്ര പ്രായായില്ലെടാ നിനക്ക്‌ ?" കൈ നിവർത്തി അവനെ അവജ്ഞയോടെ ഒന്നു നോക്കിയിട്ട്‌ മാമൻ ഓടാൻ ആരംഭിച്ചു . അവൻ അമ്പരന്നു. ഞാനിതെന്ത് ചെയ്തിട്ട് ? ഗേറ്റ് കടന്ന് പോകുന്ന ശേഖർജിയെ അൽപനേരം നോക്കി നിന്നതിന് ശേഷം തരുൺ തിരിഞ്ഞ് ബംഗ്ലാവിന്റെ പടികൾ കയറി. മുൻവശത്തെ തുറന്നിട്ട കവാടത്തിലൂടെ അവൻ അകത്തേക്ക് കയറി. മുന്നിൽ വിശാലമായ ഹാൾ. എങ്ങോട്ട് പോകണമെന്നറിയാതെ ഒരു നിമിഷം തരുൺ പകച്ച് നിന്നു. പെട്ടെന്നാണ് അവന്റെ ശ്രദ്ധ ഹാളിന്റെ ഇടതു വശത്തായുള്ള കൊറിഡോറിലേക്ക് ചെന്നെത്തിയത്. തരുൺ അങ്ങോട്ട് ചെന്ന് അതിലൂടെ മുൻപോട്ട് നടന്നു. രണ്ടടി തികച്ച് വെച്ചില്ല, ആ കോറിഡോറിന്റെ വലതു വശത്ത് കണ്ട കാഴ്ച്ചയിൽ അവൻ സ്വയമറിയാതെ നോക്കി നിന്നു പോയി. മൃദുല! വരാന്തയുടെ വലതു ഭാഗത്ത് കാണുന്ന ഗ്ലാസ്സ് ഭിത്തികൾ കൊണ്ട് തീർത്ത ആ മുറിയിൽ, വ്യായാമം ചെയ്യുകയാണ് മൃദുല. ഇറുകിയ ഷോർട്സിലും, സ്പോർട്സ് ബ്രായിലും അവളുടെ ശരീരവടിവ് എടുത്ത് കാണിക്കുന്നുണ്ടായിരുന്നു. ആ വെളുത്ത ശരീരത്തിൽ പറ്റിപ്പിടിച്ചിരിക്കുന്ന വൈഡൂര്യം കണക്കെ വെട്ടിത്തിളങ്ങുന്ന വിയർപ്പ് കണങ്ങൾ, ഭിത്തിക്കിപ്പുറം നിന്നിട്ടും തരുൺ വ്യക്തമായി കണ്ടു. അവൻ മുൻപോട്ട് ചലിച്ച് ഗ്ലാസ്സ് ഭിത്തിയിൽ കൈ കൊണ്ടൊന്ന് തട്ടി. ശബ്ദം കേട്ട് ഞെട്ടി നോക്കിയ മൃദുല, തരുണിനെ കണ്ടതും പുഞ്ചിരിച്ചു. അവൾ കൈ നീട്ടി ആംഗ്യം കാണിച്ചു കൊണ്ട് അവനെ അകത്തേക്ക് ക്ഷണിച്ചു. തരുൺ മുന്നിൽ കാണുന്ന ഗ്ലാസിന്റെ വാതിൽ തള്ളിത്തുറന്നു കൊണ്ട് ഉള്ളിലേക്ക് കയറി. "എങ്ങനുണ്ടാരുന്നു ട്രിപ്പ് ?" ആകാംഷയോടെയുള്ള മൃദുലയുടെ ചോദ്യത്തിന് തരുൺ ഒരു നേർത്ത പുഞ്ചിരിയിൽ മറുപടിയൊതുക്കി. "പപ്പയെ കണ്ടില്ലേ ? വരുന്ന വഴിയാണോ ?" "ഉം " "ഇതെന്താടോ അവാർഡ് പടമോ ? ഡയലോഗ്സ്‌ ഒന്നുമില്ലല്ലോ " മൃദുല പുരികം വളച്ചു. തരുൺ ഒന്നും മിണ്ടാതെ ആ മുറിക്കകം മുഴുവനൊന്ന് കണ്ണോടിച്ചു. "ജിം സെറ്റപ്പ് കൊള്ളാല്ലോ " "നിനക്ക് ഈ വക പരിപാടികളൊന്നുമില്ലേ ? ഉണ്ടാകേണ്ടതാണല്ലോ. നല്ല ടോണ്‌ഡ് മസിൽസ് ആണ് നിന്റെ " മൃദുല അവന്റെ കൈകളിൽ തൊട്ട് നോക്കിക്കൊണ്ടാണ് ചോദിച്ചത്. " എനിക്കും ചെറിയൊരു സെറ്റപ്പ് ഒക്കെയുണ്ട് നാട്ടിൽ. പക്ഷേ ഇത്ര ഭീകരമായിട്ടൊന്നുമല്ല കേട്ടോ. ഞാനും ചോട്ടുവും രാവിലെ ഒന്നരമണിക്കൂർ-" വാക്കുകൾ പൂർത്തിയാക്കാനാകാതെ തരുൺ നിർത്തി. അത്ര നേരം അടക്കിപ്പിടിച്ചിരുന്ന ഓർമ്മകളെല്ലാം ഒരുമിച്ച് തലച്ചോറിലേക്കിരച്ചു കയറി. ചോട്ടു... മൃദുലയ്ക്ക് പക്ഷേ അശേഷം ഭാവവ്യത്യാസമില്ലായിരുന്നു. "എന്നിട്ട് പറ... എങ്ങനെ ഉണ്ടായിരുന്നു ഫസ്റ്റ് ട്രിപ്പ് ടു കേരള ?" "നിനക്കറിയാമല്ലോ എല്ലാം. പിന്നെ എന്താ ?" തരുൺ അവളെ രൂക്ഷമായൊന്ന് നോക്കി. "ശരിക്കും എന്താ ഉണ്ടായത് ?" മൃദുല ഗൗരവത്തോടെ ചോദിച്ചു. "അതൊക്കെ വിടൂ മൃദുലാ. ഞാനൊരു കാര്യം ചോദിക്കട്ടെ ?" മൃദുലയുടെ നെറ്റി ചുളിഞ്ഞു. "നിന്റെ പപ്പക്കിതെന്തു പറ്റി? എന്നെ കണ്ടിട്ട് കണ്ണിൽ പിടിക്കാത്തൊരു മട്ടും ഭാവോം " "ആഹാ... അതോ. നിങ്ങടെ അവിടത്തെ പ്രകടനം കേട്ട് പപ്പാ ഭയങ്കര ഹാപ്പിയായിപ്പോയി മോൻ! ഇവിടെ കെടന്ന് വെപ്രാളം പിടിച്ച് ഓടുന്നത് കണ്ടു. ഒപ്പം നിന്നേം നിന്റെ അച്ഛനേം ഒക്കെ പൂരത്തെറി ആയിരുന്നു " മൃദുല ചിരിയടക്കി. "ങേ ? ഞാനെന്തു ചെയ്തിട്ട് ?" തരുണിന്റെ കണ്ണുകൾ തുറിച്ചു. "പന്ത്രണ്ട് കോടീടെ മൊതലാണ് മാൻ! ചുമ്മാ പിള്ളേര്കളിയാണോ ? നീ എന്തോർത്തിട്ടാണ് ആ റിസോർട്ടിൽ ചെന്ന് മുറിയെടുത്തത്?" "പന്ത്രണ്ട്!?" തരുൺ നടുങ്ങിയത് വ്യക്തം. "പിന്നെ നീ എന്താ വിചാരിച്ചേ ? " "അതേ, പറയുമ്പോ എല്ലാം പറയണം. ഞാനെന്താ ഊഹിച്ചറിയുമോ ? എന്നോട് പുള്ളിക്കാരൻ എന്താ പറഞ്ഞേ ? വയനാട് വരേ ഒന്ന് പോയി വരണം. ഒന്നും അറിയണ്ട എന്നും പറഞ്ഞു. ഇത്രയൊക്കെ കോംബ്ലിക്കേഷൻ ഉണ്ടെങ്കിൽ അത് നേരത്തേ പറയണ്ടേ ?" തരുണിന്റെ മുഖം വലിഞ്ഞു മുറുകി. "ടെൻഷൻ ആകണ്ട ബ്രോ. ഒക്കെ ആ ചെറ്റത്തെണ്ടി ഒപ്പിച്ച പണിയല്ലേ. നിന്നോട് ഞാൻ ഫസ്റ്റ് ഡേ തന്നെ പറഞ്ഞില്ലേ അവൻ പെശകാണെന്ന് " അതും പറഞ്ഞ് തിരിഞ്ഞ മൃദുലയുടെ തോളിൽ തരുണിന്റെ കരങ്ങൾ അമർന്നു. അവൾ ഞെട്ടി തിരിഞ്ഞു നോക്കി. തരുണിന്റെ മുഖത്ത് അവൾക്ക് മനസ്സിലാക്കാൻ സാധിക്കാത്തൊരു ഭാവം. "എന്താണ് മാൻ ? ഞങ്ങൾ പെണ്ണുങ്ങൾ ഭയങ്കര എക്സ്ട്രാ കണ്ണിങ്ങ് ആണ്. ഉദാഹരണത്തിന്, ഫസ്റ്റ് ഡേ അവൻ എന്നെ കണ്ട സെക്കന്റിൽ എന്റെ ബാക്കിനെ പറ്റിയല്ലേ നിന്നോട് കമന്റ്‌ പറഞ്ഞത് ? " "നിനക്കതെങ്ങനെ അറിയാം ?" തരുൺ അമ്പരന്ന് പോയിരുന്നു. "നീ വിചാരിക്കുന്ന പോലത്തെ ചില്ലറ കളിയാണോ മോനേ ഇതൊക്കെ ? ഇത്രയായിട്ടും, ഞാനൊരു നോർമൽ നാടൻ പെൺകൊടി ആണെന്നാണോ മോൻ ധരിച്ചു വെച്ചിരിക്കുന്നെ ?" മൃദുലയുടെ ചുണ്ടിലൊരു പരിഹാസം മിന്നി. "അത് കൊണ്ടാണോ നീ അത് ചെയ്യിച്ചത് ? നിന്നെ ഒന്ന് നോക്കി കമന്റ് പറഞ്ഞതിന്റെ പേരിലാണോ നീ അവനെ..." തരുൺ കിതച്ചു. "വാട്ട് ദി ഫക്ക് മാൻ!! ഞാൻ എന്ത് ചെയ്യിച്ചെന്നാണ് ??" മൃദുലയുടെ കണ്ണുകൾ മിഴിഞ്ഞു വന്നു. "അവൻ ഇങ്ങനെ ഒരു ചതി എന്നോട് ചെയ്‌തെന്ന് വിശ്വസിക്കാൻ പറ്റുന്നില്ല മൃദുലാ... ഒരിക്കലും " തരുൺ മുഖം അമർത്തി തുടച്ചു കൊണ്ട് അവിടെ ഇരുന്നു. മൃദുല തിടുക്കത്തിൽ ചെന്ന് ഏതൊക്കെയോ സ്വിച്ചുകൾ ഓണാക്കി. നിമിഷങ്ങൾക്കകം ആ മുറിയിലെ എല്ലാ ഗ്ലാസ്സുകളും അതാര്യമായി മാറി! ഇപ്പോൾ കണ്ടാൽ, വെളുത്ത നിറത്തിലുള്ള തിളങ്ങുന്ന ഭിത്തികളായേ തോന്നൂ! തുടർന്ന് അവൾ മെല്ലെ തരുണിന്റെ അടുത്തേക്ക് നടന്നു. "നീയെന്താ പറഞ്ഞെ തരുൺ ? എനിക്ക് മനസ്സിലായില്ല. ഞാൻ ഉദ്ദേശിച്ചതു തന്നെയാണ്‌ നീ ആ പറഞ്ഞതെങ്കിൽ, വീ ഹാവ് എ സീരിയസ് പ്രോബ്ലം." അവൾ അവന്റെ അരികിലേക്കായി ഇരുന്നു കൊണ്ട് പറഞ്ഞു. മറുപടി മൗനമായിരുന്നു. "ശെരിക്കും തരുൺ ? ഡോണ്ട് യൂ ബിലീവ് മീ?" തരുൺ ഒന്നും പറയാതെ ദീർഘമായി ഒന്ന് നിശ്വസിച്ചു. "എനിവേ, ഡോണ്ട് വറി എബൌട്ട്‌ പപ്പാ. വയസ്സായില്ലേ... ഞാൻ സംസാരിച്ച് ശെരിയാക്കിക്കോളാം. ബട്ട് പ്ലീസ് മേക്ക് ഷുവർ, നീ ഇപ്പോൾ എന്നോട് സംസാരിച്ചത് പോലെ ഒരിക്കലും പപ്പയോടു സംസാരിക്കരുത്. അങ്ങേരുടെ തീരുമാനങ്ങളെ ചോദ്യം ചെയ്യരുത്. അത് പോലെ ഈ ചോട്ടു എന്ന ക്യാരക്റ്ററിന്റെ കാര്യം പപ്പയോട് മിണ്ടുക പോലും വേണ്ട!!" തരുൺ നിശബ്ദനായി എല്ലാം കേട്ടിരുന്നതെ ഉള്ളു. "ഇപ്പൊ ആ ഷർട്ടൊന്ന് ഊരിക്കെ... നോക്കട്ടെ" മൃദുല പറഞ്ഞപ്പോൾ തരുൺ ഞെട്ടലോടെ തലയുയർത്തി. "തെറ്റിദ്ധരിക്കണ്ട. ബോഡി ഒന്ന് കാണാനാ. ഒരു ജിമ്മിലല്ലേ നിൽക്കുന്നത്. അപ്പൊ അതിന്റേതായ കുറച്ച് ചടങ്ങുകൾ ഒക്കെയില്ലേ." മൃദുല കുസൃതിച്ചിരിയോടെ പറഞ്ഞു കൊണ്ട് തരുണിന്റെ അരികിലേക്ക് നീങ്ങി ഇരുന്ന് ഷർട്ടിന്റെ ബട്ടനുകൾ ഓരോന്നായി അഴിച്ചു മാറ്റാനാരംഭിച്ചു. തരുൺ പെട്ടെന്ന് അവളുടെ കൈകൾ തടഞ്ഞു. "സോറി മൃദുലാ... എനിക്കൊരു സുഖം തോന്നുന്നില്ല. രാത്രി മുഴുവൻ ഡ്രൈവ് അല്ലായിരുന്നോ... ഞാൻ ഒരിത്തിരി നേരം ഒന്ന് കിടക്കട്ടെ " തരുൺ എഴുന്നേറ്റ് നിന്നു. "ഓക്കേ. പിന്നെയൊരിക്കലാവാം... എന്തായാലും എന്നെ കൊതിപ്പിച്ച് ഇങ്ങനെ അധികകാലം നടക്കാൻ പറ്റില്ല കേട്ടോ. അത്രക്ക് ക്ഷമയൊന്നും ഇല്ലെനിക്ക് " മൃദുല ഇടതു കണ്ണൊന്നിറുക്കിയടച്ചു തുറന്നു.. തരുൺ ഒന്നും മിണ്ടാതെ ഒരു തളർന്ന പുഞ്ചിരിയോടെ പുറത്തേക്ക് നടന്നു. ഗോവണി കയറി മുകളിലെ മുറിയിലേക്ക് നടക്കുമ്പോഴും അവന്റെ ഉള്ളം സംഘർഷത്താൽ ഉഴറുകയായിരുന്നു. ചോട്ടുവിന്റെ കരച്ചിൽ, അതവന്റെ ശ്രവണ പദങ്ങളിലേക്ക് അലയടിച്ചൊഴുകി വന്നു. മുറി തുറന്ന അവൻ കാണുന്നത് ബെഡിൽ അലസമായി കിടക്കുന്ന ചോട്ടുവിന്റെ വസ്ത്രമാണ്. തരുൺ ദീർഘമായൊന്ന് നിശ്വസിച്ചു കൊണ്ട് നേരെ ബാത്‌റൂമിലേക്ക് നടന്നു. ഷവറിന് താഴെ കണ്ണടച്ചു പിടിച്ചു നിൽക്കുമ്പോഴും അവന്റെ ഉള്ളിലേക്ക് ചോട്ടു അവസാനമായി പറഞ്ഞ വാചകങ്ങൾ കടന്നു വന്നു. "ചതിയാണിത്!" തരുൺ ഞെട്ടി കണ്ണുകൾ തുറന്നു. ശരീരത്തിലൂടെ ഒലിച്ചിറങ്ങുന്ന തണുത്ത ജലത്തിന് പോലും അവന്റെ ഉള്ളിലെ നീറ്റലടക്കാൻ സാധിച്ചില്ല. തരുൺ അനങ്ങാതെ നിന്നു. ഏകദേശം ഒരു മണിക്കൂറോളം അവനാ വെള്ളത്തിന് കീഴെ കണ്ണുകൾ അടച്ചു നിന്നു. കുളി കഴിഞ്ഞ് വസ്ത്രം മാറിയതിനു ശേഷം അവൻ നേരെ ബാൽക്കണിയിലേക്കാണ് നടന്നത്. ആകെ ഒരു മരവിപ്പ് ബാധിച്ച പോലെ. നോക്കെത്താ ദൂരത്തേക്ക് കണ്ണും നട്ട് നിൽക്കുമ്പോഴാണ് പെട്ടെന്നൊരു ശബ്ദം അവനെ നടുക്കിക്കളഞ്ഞത്. താഴെ, പോർച്ചിൽ നിന്നുമാണ്. തരുൺ സൂക്ഷിച്ചു നോക്കി. പോർച്ചിൽ നിർത്തിയിട്ടിരുന്ന താർ അതാ ആരോ ഓടിച്ചു പോകുന്നു. തരുണിന്റെ കണ്ണുകൾ തുറിച്ചു. "അതിന്റെ ചാവി എന്റെ കൈവശമല്ലേ ? " അവന്റെ ഉള്ളിൽ ഒരു നൂറ് ചോദ്യങ്ങൾ ഒരേ സമയം ഉടലെടുത്തു. പൊടുന്നെനെയാണ്, മുറിയുടെ വാതിലിൽ ആരോ മുട്ടുന്നത് പോലെ തരുണിന് തോന്നിയത്. അവൻ നെറ്റി ചുളിച്ചു കൊണ്ട് മുറിയിലേക്ക് ചെന്ന് കതക് തുറന്നു. മുന്നിൽ പുഞ്ചിരി തൂകിക്കൊണ്ട് രാജശേഖര റെഡ്ഡി! തൊട്ടു പുറകിൽത്തന്നെ ഒരു വൃദ്ധനെയും കാണാമായിരുന്നു. അദ്ദേഹത്തിന്റെ മാനേജരാണ്‌. വിക്ടർ ഇമ്മാനുവേൽ. ആ ഗോവക്കാരനെ തലേന്നു പരിചയപ്പെട്ടത് തരുണിനോർമ്മ വന്നു. "വേഗം റെഡിയാവ്. നമുക്കൊരിടം വരെ പോണം " അയാൾ പറഞ്ഞതും തരുണിന്റെ മുഖം ചുവന്നു. "ഇത്തിരി നേരം ഉറങ്ങട്ടേ മാമാ.. ടയേഡ് ആണ് " അവൻ താല്പര്യമില്ലാത്ത മട്ടിൽ പറഞ്ഞു. "തരുൺ! ഞാൻ നിന്നോടൊരു കാര്യം പറയട്ടെ ?" "ഞാൻ അതിനു മുൻപ് മാമനോട് ഒരു കാര്യം പറയട്ടെ ?" തരുൺ ഇടക്ക് കയറി. "ഞാൻ ഇവിടെ ജോലിക്ക് വന്നതാണെന്ന രീതിയിലുള്ള പെരുമാറ്റം വേണ്ട കേട്ടോ!! അങ്ങനെയുള്ള ഒരു തെറ്റിദ്ധാരണയും വേണ്ട നമുക്കിടയിൽ" വിക്ടർ ഞെട്ടിപ്പോയി. "കുഞ്ഞേ... വേണ്ട കേട്ടോ " അയാൾ വിലക്കി. ഉടനെ തന്നെ റെഡ്ഡി അയാളെ കൈ ഉയർത്തി തടഞ്ഞു. "നിന്നെ കുറിച്ച് എനിക്കൊരുപാട് പ്ലാനുകൾ ഉണ്ട് മോനേ " വിടർന്ന പുഞ്ചിരിയോടെയാണ് അമ്മാവൻ അത് പറഞ്ഞത്. "ഒരു നിമിഷം. മാമൻ വരൂ " തരുൺ ശേഖർജിയുടെ ചുമലിൽ കൈ ചേർത്തു കൊണ്ട് ബാൽക്കണിയിലേക്ക് നടന്നു. പിറകേ വരാൻ ആഞ്ഞ മാനേജരെ അവൻ തടഞ്ഞു. "മാമനോട് എതിർത്തു സംസാരിക്കുകയല്ല. ഇനിയിപ്പോ അങ്ങനെ തോന്നിയാലും എനിക്കൊന്നുമില്ല." വളരെ ദൃഢമായിരുന്നു അവന്റെ സ്വരം. മൈസൂർ അടക്കിവാഴുന്ന ശേഖർ ജി എന്ന കിരീടം വെക്കാത്ത രാജാവിനോടാണ്‌ സംസാരിക്കുന്നതെന്ന യാതൊരു വിധ ഭാവഭേദവുമുണ്ടായിരുന്നില്ല അവന്‌. "ഞാൻ ഇവിടെ വന്നതിന് ഒരു ഉദ്ദേശമുണ്ട് മാമാ. നിങ്ങടെ കൂടെ കൂടി ഒരു കള്ളക്കടത്ത് ഡോൺ ആകാനല്ല!" ഒന്നു നിർത്തിയിട്ട് തരുൺ അയാളുടെ കണ്ണുകളിലേക്കു നോക്കിയാണ്‌ തുടർന്നത്. "എനിക്ക് പ്രിയപ്പെട്ട ഒരാളെ തേടി ഇറങ്ങിയതാണ് ഞാൻ. മിശ്വ! എന്റെ കളിക്കൂട്ടുകാരി... എനിക്കൊരുപാടിഷ്ടമുള്ള എന്റെ പ്രിയപ്പെട്ട പെൺകുട്ടി..." ആവൻ ഉറച്ച സ്വരത്തിൽ പറഞ്ഞു നിർത്തിയപ്പോൾ അമ്മാവന്റെ മുഖത്ത്‌ കടുത്ത നിരാശ വ്യാപിക്കുന്നത്‌ വ്യക്തമായിരുന്നു. തുടരും... കണ്ണൂർകാരൻ 🥰🥰🥰🥰 #🕵️‍♀️ കുറ്റാന്വേഷണ കഥകൾ #🧟 പ്രേതകഥകൾ! #📙 നോവൽ #✍ തുടർക്കഥ #📔 കഥ