*നിഴൽച്ചിത്രങ്ങളുടെ താഴ്‌വര* *(ഭാഗം 6)* *____________________________* പുസ്തകം ഹിറ്റായതോടെ മായ തേടിയെത്തിയ സമാധാനത്തിന് മേൽ വീണ്ടും നിഴലുകൾ വീണു തുടങ്ങി. മായയുടെ സ്വകാര്യ ജീവിതം ഉപേക്ഷിച്ചുള്ള ഈ തിരിച്ചുപോക്ക് പലരിലും അസൂയയുണ്ടാക്കി. സോഷ്യൽ മീഡിയയിൽ മായയെ അനുകൂലിക്കുന്നവർ വർദ്ധിച്ചപ്പോൾ തന്നെ, അവൾ ഒരു 'ഫ്രോഡ്' ആണെന്നും പ്രശസ്തിക്ക് വേണ്ടി പുതിയ നാടകം കളിക്കുകയാണെന്നും ആരോപിക്കുന്ന ഒരു വിഭാഗം ഉയർന്നു വന്നു. ഒരു ദിവസം രാവിലെ മായയുടെ വീടിന് മുന്നിൽ ഒരു സംഘം ആളുകൾ തടിച്ചുകൂടി. അവരിൽ പലരും ക്യാമറകളും മൈക്കുകളുമായി വന്ന യൂട്യൂബർമാരായിരുന്നു. "മായ, നിങ്ങൾ അർജുനെ മനപ്പൂർവ്വം ചതിച്ചതാണോ? പണമെല്ലാം തീർന്നപ്പോൾ അയാളെ ഉപേക്ഷിച്ചു വന്നതാണോ?" "ഈ പുസ്തകം എഴുതിയത് നിങ്ങൾ തന്നെയാണോ അതോ വേറെ ആരെങ്കിലും എഴുതി തന്നതാണോ?" ചോദ്യശരങ്ങൾ മായയെ തളർത്തി. താൻ ഓടി ഒളിക്കാൻ ശ്രമിച്ച ആ സൈബർ ലോകം തന്നെ പിന്തുടർന്ന് തന്റെ ഗ്രാമത്തിലും എത്തിയിരിക്കുന്നു. അച്ഛൻ പരിഭ്രാന്തനായി അവരെ തടയാൻ നോക്കിയെങ്കിലും ആരും കേൾക്കാൻ തയ്യാറായില്ല. അന്ന് രാത്രി മായയ്ക്ക് ഒരു ഇമെയിൽ വന്നു. അത് അർജുന്റെ വക്കീലിൽ നിന്നായിരുന്നു. അർജുൻ ആത്മഹത്യയ്ക്ക് ശ്രമിച്ചുവെന്നും ഇപ്പോൾ ഒരു സർക്കാർ ആശുപത്രിയിൽ തീവ്രപരിചരണ വിഭാഗത്തിലാണെന്നുമുള്ള വാർത്തയായിരുന്നു അത്. ആ വാർത്ത മായയെ മരവിപ്പിച്ചു കളഞ്ഞു. താൻ അവനെ വെറുത്തിരുന്നുവെങ്കിലും അവന്റെ ഈ അവസ്ഥയ്ക്ക് താനും കാരണമാണോ എന്ന് അവൾ ഭയപ്പെട്ടു. പിറ്റേന്ന് തന്നെ മായ നഗരത്തിലേക്ക് തിരിച്ചു. ആശുപത്രിയുടെ ജനറൽ വാർഡിൽ അവശനായി കിടക്കുന്ന അർജുനെ കണ്ടപ്പോൾ അവൾക്ക് തിരിച്ചറിയാൻ പോലും കഴിഞ്ഞില്ല. ആ പഴയ ഗ്ലാമറും ആത്മവിശ്വാസവും എല്ലാം പോയിരിക്കുന്നു. കടക്കെണിയും ഏകാന്തതയും അയാളെ പാടെ തകർത്തിരുന്നു. മായയെ കണ്ടപ്പോൾ അർജുന്റെ കണ്ണുകളിൽ നിന്ന് കണ്ണുനീർ ഒഴുകി. "മായ... എനിക്ക് മാപ്പ് തരണ്ട. ഞാൻ നിന്നെ ഒരു ഉൽപ്പന്നമായിട്ടാണ് കണ്ടത്. ഇന്ന് എനിക്ക് ഈ ലോകത്ത് ആരുമില്ല. എന്റെ ഫോളോവേഴ്സ്, എന്റെ ബിസിനസ്സ് പാർട്ണേഴ്സ്... എല്ലാവരും എന്നെ ബ്ലോക്ക് ചെയ്തു." മായ അവന്റെ കൈകളിൽ പിടിച്ചു. "അർജുൻ, നമ്മൾ രണ്ടുപേരും തെറ്റായ പാതയിലായിരുന്നു. നീ തോറ്റത് ലോകത്തിന് മുന്നിലല്ല, നിന്റെ തന്നെ വാശികൾക്ക് മുന്നിലാണ്." ആശുപത്രിയിൽ അർജുനെ ശുശ്രൂഷിക്കുമ്പോൾ മായ വീണ്ടും ക്യാമറക്കണ്ണുകളിൽ പെട്ടു. "മായ അർജുന്റെ അടുത്തേക്ക് തിരിച്ചെത്തി" എന്ന തരം വാർത്തകൾ പ്രചരിച്ചു. പക്ഷേ ഇത്തവണ മായയ്ക്ക് കുലുക്കമുണ്ടായില്ല. അവൾ തന്റെ ഫോൺ ഓഫ് ചെയ്തു വെച്ചു. പക്ഷേ അർജുന്റെ ആശുപത്രി ചിലവുകൾക്കും കടങ്ങൾക്കും വലിയൊരു തുക ആവശ്യമായിരുന്നു. അവളുടെ പുസ്തകത്തിൽ നിന്ന് കിട്ടിയ റോയൽറ്റി ഒന്നിനും തികയുമായിരുന്നില്ല. ആ സാഹചര്യത്തിലാണ് ഒരു വലിയ ചാനലിൽ നിന്ന് അവൾക്ക് ഒരു ഓഫർ വരുന്നത്. ലോകം മുഴുവൻ ചർച്ച ചെയ്യുന്ന അവളുടെ ജീവിതകഥ ഒരു സിനിമയാക്കാൻ അവർക്ക് താല്പര്യമുണ്ട്. കോടികളാണ് അവർ ഓഫർ ചെയ്തത്. മായ ഒരു പ്രതിസന്ധിയിലായി. വീണ്ടും ആ ഗ്ലാമർ ലോകത്തേക്ക് മടങ്ങണോ? അതോ അർജുന്റെ ജീവൻ രക്ഷിക്കാൻ ഈ അവസരം ഉപയോഗിക്കണോ? *(തുടരും...)* _Husna Ubaid Chappanangadi..._ #📔 കഥ