ഇരുവർ ഭാഗം 8 എങ്ങനെ കണ്ടുപിടിക്കാനാണ് ?? കഴിയുമെന്ന് തോന്നുന്നില്ല. എന്റെ ജീവിതം നശിച്ചു. ലയന കണ്ണുനീർ തുടച്ചു. നീ പേടിക്കാതിരിക്ക്, ഞാനില്ലേ നിന്റെ കൂടെ. സത്യങ്ങൾ നമ്മൾ കണ്ടുപിടിക്കും. എന്റെ തോന്നൽ ഒരുപക്ഷെ ബദ്രി തന്നെയാണോ ഇതിന് പിന്നിലെന്നാ... മഹിമ പറഞ്ഞു. ഇല്ല... ബദ്രി പാവമാണ്. ബദ്രി ഒരിക്കലും തെറ്റ് ചെയ്യില്ല. ഉറപ്പാണോ?? അതെ, എനിക്കുറപ്പാണ്.. എങ്കിൽ ഇതിനെല്ലാംപിന്നിൽ ആരാണെന്ന് നമ്മൾ കണ്ടെത്തും. നീ ബദ്രിയുടെ കൂടെ സന്തോഷമായി ജീവിക്കുകയും ചെയ്യും. ഇത് ഞാൻ എന്റെ കൂടെപ്പിറപ്പിന് നൽകുന്ന ഉറപ്പാണ്.മഹിമ പറഞ്ഞു. ലയനയുടെ മുഖത്ത് ആശ്വാസം നിറഞ്ഞു. അവർ അകത്തേക്ക് കയറി... എങ്ങനെ കണ്ടുപിടിക്കാനാണ് എന്താ നിന്റെ ഉദ്ദേശം.??ലയന ചോദിച്ചു... പറയാം... ആദ്യം ആ പെൺകുട്ടി ഏതാണെന്നു മനസ്സിലാക്കണം. എങ്ങനെ മനസ്സിലാക്കാനാണ്?? നമ്മൾ ആ പെൺകുട്ടിയെ ആദ്യമായിട്ട് കണ്ടതല്ലേ, അതിന്റെ പേരോ,നാടോ, ഒന്നും നമുക്കറിയില്ലല്ലോ.... എടീ.....നമ്മുടെ കസിൻസ് ചിലർ ഫോണിൽ വീഡിയോ എടുത്തു കൊണ്ട് നടക്കുന്നുണ്ടായിരുന്നു... അവരെ വിളിച്ച് നോക്കിയാൽ, അവരെടുത്ത വീഡിയോയിൽ ആ പെൺകുട്ടി വന്നിട്ടുണ്ടോ എന്ന് അറിയാൻ പറ്റും. ശാരികയും കിഷോറും ഒക്കെ, തലങ്ങും വിലങ്ങും നടന്ന് വീഡിയോ എടുക്കുന്നുണ്ടായിരുന്നു. ഞാൻ അവരെ ഒന്ന് വിളിച്ചു നോക്കാം, മഹിമ ഫോൺ എടുത്തു. മഹിമ ആദ്യം, ശാരികയെ വിളിച്ചു നോക്കി. എടി...മുഹൂർത്തത്തിന്റെ സമയമായപ്പോൾ ഞാൻ വീഡിയോ ഓഫ് ആക്കിയിരുന്നു. എന്റെ കല്യാണവും അടുത്ത മാസമല്ലേ, അതുകൊണ്ട് താലികെട്ട് എങ്ങനെയാണെന്ന് കണ്ട് മനസ്സിലാക്കാമെന്ന് കരുതി നിൽക്കുകയായിരുന്നു. നീ കിഷോറിനെ ഒന്ന് വിളിച്ചു നോക്കിക്കേ, അവൻ ഫോട്ടോയും വീഡിയോയുമൊക്കെ എടുത്തുകൊണ്ട് നടപ്പുണ്ടായിരുന്നല്ലോ. എന്നാൽ ശരിയെടീ...ഞാൻ അവനെ ഒന്ന് വിളിച്ചു നോക്കട്ടെ. മഹിമ പറഞ്ഞു. എന്തായി അവളുടെ കൈയിൽ വീഡിയോ ഉണ്ടോ?? ലയന ചോദിച്ചു ഇല്ല, താലികെട്ടിന്റെ സമയമായപ്പോഴേക്കും അവൾ വീഡിയോ എടുത്തു കൊണ്ടിരുന്നത് നിർത്തിയെന്നാ പറഞ്ഞത്. ഞാൻ കിഷോറിനെ ഒന്നു വിളിച്ചു നോക്കാം. അവൻ വീഡിയോ എടുക്കുന്നുണ്ടായിരുന്നുവെന്നാ ശാരിക പറഞ്ഞത്. മഹിമ കിഷോറിനെ വിളിച്ചു. എന്താടി...??കിഷോർ ചോദിച്ചു. എടാ ലയനയുടെ കല്യാണദിവസം ഒരു പെൺകുട്ടി വന്നു ബഹളമുണ്ടാക്കിയില്ലേ, ആ വീഡിയോ നിന്റെ ഫോണിൽ ഉണ്ടോ.?? ഉണ്ടടി ഉണ്ട്.... എടാ അതൊന്നു വാട്സ്ആപ്പിലേക്ക് സെന്റ് ചെയ്യാമോ.?? എന്താടി എന്തെങ്കിലും കുഴപ്പമുണ്ടോ?? കിഷോർ ചോദിച്ചു. ചെറിയൊരു പ്രശ്നമുണ്ടെടാ. അത് ഞാൻ പിന്നെ പറയാം. ഇപ്പൊ തൽക്കാലം നീയാ വീഡിയോ ഇങ്ങോട്ട് സെന്റ് ചെയ്യ്. ഓകെ ചെയ്യാം.അവൻ പറഞ്ഞു. മഹിമ കോൾ കട്ടാക്കി. അവന്റെ കൈയിൽ വീഡിയോ ഉണ്ട്. പെൺകുട്ടിയെപ്പറ്റി നമുക്ക് അന്വേഷിക്കണം. ആരുടെയെങ്കിലും പരിചയത്തിലോ മറ്റോ ഉള്ളതാണോയെന്ന് നമുക്കൊന്ന് തിരക്കി നോക്കാം... അതൊക്കെ അത്ര എളുപ്പമുള്ള കാര്യമാണോ??ലയന ചോദിച്ചു. അല്പം റിസ്ക് ഏറ്റെടുക്കാൻ മനുഷ്യർ തയ്യാറാകണം.നിന്നെപ്പോലെ ഇങ്ങനെയെല്ലാ കാര്യങ്ങൾക്കും മടി പിടിച്ചിരിക്കുന്ന സ്വഭാവമല്ലെനിക്ക്. ഞാനിത് കണ്ടെത്തും. കാരണം, കുറച്ചുനേരത്തേക്കാണെങ്കിലും നീ എന്നെ തെറ്റിദ്ധരിച്ചില്ലേ, ഞാനാണ് തെറ്റുകാരി എന്ന് കരുതിയില്ലേ..?? എനിക്ക് സത്യം തെളിയിക്കണം. മഹിമയുടെ ഉറച്ച വാക്കുകൾ കേട്ടപ്പോൾ ലയനക്ക് ആത്മവിശ്വാസം വർദ്ധിച്ചു. ഫോണിൽ നോട്ടിഫിക്കേഷൻ സൗണ്ട് കേട്ടപ്പോൾ മഹിമ വാട്സ്ആപ്പ് ഓപ്പൺ ചെയ്തു. കിഷോർ വീഡിയോ അയച്ചിട്ടുണ്ട്. അവർ വീഡിയോ ഓപ്പൺ ചെയ്തു നോക്കി. ആ പെൺകുട്ടിയുടെ മുഖം വ്യക്തമായി കാണുന്നുണ്ട്... അവൾ അതിന്റെ ഒരു സ്ക്രീൻഷോട്ട് എടുത്തു. നമ്മുടെ കുറച്ചു കൂട്ടുകാർക്ക് ഈ ഫോട്ടോ സെന്റ് ചെയ്തു നോക്കാം, ആരെങ്കിലും ഈ പെൺകുട്ടിയെ എവിടെയെങ്കിലും വച്ച് കണ്ടിട്ടുണ്ടോ എന്നറിയാമല്ലോ... അവൾ സുഹൃത്തുക്കൾക്ക് ആ ഫോട്ടോസ് അയച്ചു കൊടുത്തു. ഈ പെൺകുട്ടിയെ എവിടെയെങ്കിലും വെച്ച് പരിചയമുണ്ടോ എന്ന് ചോദിച്ചു. പക്ഷേ ആർക്കും ആ കുട്ടിയെ പരിചയമില്ല. ഇതിനുമുമ്പ് കണ്ടിട്ട് പോലുമില്ല. ഞാൻ പറഞ്ഞില്ലേ, നമുക്കത്ര പെട്ടെന്നൊന്നും കണ്ടുപിടിക്കാൻ പറ്റില്ല. ലയന നിരാശയോടെ പറഞ്ഞു. എന്തെങ്കിലും ഒരു വഴി നമ്മുടെ മുൻപിൽ തെളിയാതിരിക്കില്ല.മഹിമ അവളെ ആശ്വസിപ്പിച്ചു. നീ ഏതുനേരവും ബദ്രിയുടെ കാര്യമാലോചിച്ചു വിഷമിച്ചിരിക്കാതെ ഓഫീസിൽ പോകാൻ നോക്ക്... ഇന്നെന്തായാലും വൈകി. ഇനി നാളെ മുതൽ നമുക്ക് പോകാം...ലയന പറഞ്ഞു. പിറ്റേന്ന് മുതൽ അവർ ജോലിക്ക് പോയി തുടങ്ങി... ഓഫീസിൽ ഇരിക്കുമ്പോഴും ലയനക്ക് വല്ലാത്ത വിഷമമായിരുന്നു. ബദ്രിയെ കുറിച്ചോർക്കുമ്പോൾ സഹിക്കാൻ പറ്റുന്നില്ല. രണ്ടുമൂന്നു ദിവസങ്ങൾ കടന്നുപോയി അഭിമന്യു ബദ്രിയോടൊപ്പം തന്നെ ഉണ്ടായിരുന്നു അവനെ ആശ്വസിപ്പിക്കാനും, അവനെ ചിരിപ്പിക്കാനും അഭിമന്യു ശ്രമിച്ചുകൊണ്ടിരുന്നു. ഒരിക്കൽ മദ്യപിച്ചത് കൊണ്ട് അവൻ വീണ്ടും മദ്യപിക്കുമോ എന്ന ഭയമാണ് അഭിമന്യുവിന്. അതുകൊണ്ട് അവൻ ബദ്രിയോടൊപ്പം തന്നെ നിന്നു. കുറച്ച് ദിവസങ്ങൾ കൂടെ കടന്നു പോയി. മഹിമ ഓഫിസിൽ നിന്നും മടങ്ങി വരുകയായിരുന്നു, ലയനയുടെ ഓഫീസിനു മുന്നിൽ നിന്നും ലയനയെ കൂടി വാഹനത്തിൽ കയറ്റി ഒരുമിച്ചാണ് അവർ വീട്ടിലേക്ക് പോരുന്നത്. മഹിമ നേരേ ലയനയുടെ ഓഫീസിന് മുന്നിൽ വണ്ടി ഒതുക്കി. ലയന ഓഫീസിൽ നിന്നും ഇറങ്ങുന്നതേ ഉള്ളൂ.... മഹിമ ഫോണെടുത്ത് ഇൻസ്റ്റഗ്രാമിൽ റീൽസ് നോക്കി ഇരുന്നു. അല്പസമയം കഴിഞ്ഞപ്പോഴേക്കും ലയന ഇറങ്ങി വന്നു.. പെട്ടന്നാണ്.... വഴിക്കപ്പുറം നിന്ന് ഒരുവൻ ഫോണിൽ സംസാരിക്കുന്നത് ലയനയുടെ കണ്ണിൽ പെട്ടത്. അത്... അത്.. ആയാളല്ലേ...?? ബദ്രിയുടെ വീട്ടിൽ കയറിയവൻ. താൻ മോശക്കാരിയാണെന്ന് വരുത്തി തീർക്കാൻ നോക്കിയവൻ. അവൾ അയാളുടെ നേരെ കുതിച്ചു... ഹേയ്... ലയന നീയെങ്ങോട്ടാ?? മഹിമ വിളിച്ചു ചോദിച്ചു. ലയന അത് കേൾക്കുന്നുണ്ടായിരുന്നില്ല. അവൾ അയാൾ നിൽക്കുന്നിടത്തേക്ക് കുതിച്ചു ചെന്നു. മഹിമ വേഗം വണ്ടിയിൽ നിന്നിറങ്ങി. ഇവൾ ഇതെന്താ ഈ കാണിക്കുന്നത്...?? ലയന അയാളുടെ തൊട്ട് മുൻപിൽ ചെന്നു. അപ്പോഴാണ് അയാൾ അവളെ ശ്രദ്ദിച്ചത്.. അയാൾ പെട്ടന്ന് അവിടെ നിന്നും നടക്കാൻ ആഞ്ഞതും, ലയന അയാളുടെ ഷർട്ടിൽ കു.ത്തിപ്പിടിച്ചു... നിൽക്കെടാ... നീ ആരാ...??എന്തിനാ എന്റെ ജീവിതം തകർക്കാൻ നോക്കുന്നത്.?? പറ.. ഒരു സ്ത്രീ പരസ്യമായി ഒരു പുരുഷന്റെ ഷർട്ടിന് പിടിച്ചു വലിക്കുന്നത് കണ്ട് ആളുകളെല്ലാം അങ്ങോട്ട് നോക്കുന്നുണ്ടായിരുന്നു. പെട്ടന്ന് അയാൾ ലയനയുടെ കൈ ബലമായി വിടുവിച്ചിട്ട് മുന്നോട്ട് ഓടി.. ലയന പിന്നാലെയും.. ഹേയ്.... എടീ...നിൽക്ക്. മഹിമ ഉറക്കെ വിളിച്ചു.. മഹിമാ... ഇയാളാണ്... ഇയാളാണ്... ലയന അയാൾക്ക് പിന്നാലെ കുതിച്ചു... 🍀🍀🍀🍀🍀🍀🍀 തുടരും. #📔 കഥ