ఆషాఢ శుక్లపక్ష ఏకాదశి విశేషం పండరీపురంలో శ్రీ పాండురంగస్వామి యాత్ర – చూడటానికి రెండు కళ్లు సరిపోవు! భారతదేశం అనేక దివ్యక్షేత్రాలకు నిలయంగా ప్రసిద్ధి చెందింది. ప్రతి క్షేత్రానికి ఒక ప్రత్యేకమైన చరిత్ర, పురాణ ప్రాశస్త్యం, భక్తి సంప్రదాయం ఉన్నాయి. ఆంధ్రప్రదేశ్‌లోని తిరుమల శ్రీ వేంకటేశ్వరస్వామి క్షేత్రం ఎంత ప్రసిద్ధమో, మహారాష్ట్రలోని పండరీపురం కూడా అంతే ప్రసిద్ధి చెందిన వైష్ణవ పుణ్యక్షేత్రం. మహారాష్ట్రలోని షోలాపూర్ జిల్లాలో, భీమా నది (చంద్రభాగా నది) తీరాన వెలసిన ఈ పవిత్రక్షేత్రంలో శ్రీ మహావిష్ణువు శ్రీ పాండురంగ విఠలుడు (విఠోబా) రూపంలో కొలువై ఉన్నారు. దేశం నలుమూలల నుండి లక్షలాది మంది భక్తులు ప్రతి సంవత్సరం ఈ దివ్యక్షేత్రాన్ని దర్శించడానికి వస్తుంటారు. పండరీపురానికి చేరుకున్న భక్తులు ముందుగా చంద్రభాగా నదిలో పవిత్ర స్నానం చేసి, అనంతరం పుండలీక మహర్షిని దర్శించి, తర్వాత శ్రీ పాండురంగస్వామి వారి ఆలయానికి వెళ్తారు. ఈ విధానాన్ని అత్యంత పవిత్రమైన ఆచారంగా భావిస్తారు. పుండలీకుడి మహాభక్తి పండరీపురం క్షేత్ర మహిమ వెనుక పుండలీకుడి భక్తి ప్రధాన కారణంగా పురాణాలు చెబుతున్నాయి. ప్రారంభంలో పుండలీకుడు ఇహలోక సుఖాలకు బానిసై, తన తల్లిదండ్రులను నిర్లక్ష్యం చేశాడు. వారు విష్ణుభక్తులైనా, అతను వారిని గౌరవించలేదు. కాలక్రమేణా మహనీయుల ఉపదేశంతో పుండలీకుడికి జ్ఞానోదయం కలిగింది. తన తప్పును గ్రహించి, పశ్చాత్తాపంతో జీవితాన్ని మార్చుకుని, తల్లిదండ్రుల సేవనే పరమధర్మంగా స్వీకరించాడు. ఆయన పితృభక్తిని పరీక్షించాలనే ఉద్దేశంతో శ్రీమహావిష్ణువు స్వయంగా పుండలీకుడి ఇంటికి విచ్చేశారు. ఆ సమయంలో పుండలీకుడు తన తల్లిదండ్రులకు సేవ చేస్తున్నాడు. వెంటనే లేచి రాలేక, సమీపంలోని ఒక ఇటుకను శ్రీహరికి విసిరి, “ప్రభూ! దయచేసి ఈ ఇటుకపై నిలబడి కొద్దిసేపు వేచి ఉండండి. ముందుగా నా తల్లిదండ్రుల సేవను పూర్తి చేస్తాను” అని వినయంగా ప్రార్థించాడు. భక్తుని పితృభక్తికి పరమానందం చెందిన శ్రీమహావిష్ణువు ఆ ఇటుకపై రెండు చేతులను నడుముపై ఉంచుకుని నిలబడి, పుండలీకుడి కోసం వేచి చూశాడు. సేవ పూర్తయిన తరువాత పుండలీకుడు భక్తిపూర్వకంగా శ్రీహరిని దర్శించి నమస్కరించాడు. అప్పుడు శ్రీమహావిష్ణువు, “ఏదైనా వరం కోరుకో” అని అనగా, పుండలీకుడు “ప్రభూ! మీరు ఈ పుణ్యక్షేత్రంలో శాశ్వతంగా నిలిచి, యుగయుగాల పాటు భక్తులను అనుగ్రహించాలి” అని ప్రార్థించాడు. భక్తుని కోరికను మన్నించిన శ్రీహరి అక్కడే శిలారూపంలో నిలిచిపోయాడు. అదే నేటి శ్రీ పాండురంగ విఠలస్వామి దివ్యరూపంగా భక్తులకు దర్శనమిస్తోంది. ఈ కారణంగానే పండరీపురం క్షేత్రం పితృభక్తికి ప్రతీకగా, భక్తికి పరమ నిదర్శనంగా ప్రపంచవ్యాప్తంగా ప్రసిద్ధి చెందింది. ఆషాఢ శుక్లపక్ష ఏకాదశి విశేషం చంద్రభాగా (భీమా) నది మహిమ పండరీపురం క్షేత్రాన్ని ఆనుకుని ప్రవహించే భీమా నది అర్ధచంద్రాకారంలో ప్రవహించడం వల్ల దీనిని చంద్రభాగా నది అని కూడా పిలుస్తారు. ఈ పవిత్ర నదిలో స్నానం చేయడం వల్ల పాపాలు నశించి, మనస్సు పవిత్రమవుతుందని భక్తుల విశ్వాసం. అందుకే పండరీపురానికి చేరుకున్న ప్రతి భక్తుడు ముందుగా చంద్రభాగా నదిలో పవిత్ర స్నానం చేసి, అనంతరం క్షేత్ర దర్శనాన్ని ప్రారంభిస్తాడు. ఈ స్నానాన్ని పుణ్యప్రదమైనదిగా, మోక్షప్రదమైనదిగా భావిస్తారు. పుండలీక మహర్షి ఆలయం చంద్రభాగా నదిలో స్నానం చేసిన తరువాత భక్తులు ముందుగా పుండలీక మహర్షి ఆలయాన్ని దర్శిస్తారు. పండరీపురంలో శ్రీ పాండురంగస్వామి కొలువై ఉండటానికి పుండలీకుడి భక్తియే కారణమని స్థలపురాణం తెలియజేస్తుంది. అందువల్ల పుండలీకుడిని దర్శించిన తరువాతే పాండురంగస్వామి దర్శనం చేసుకోవడం సంప్రదాయంగా కొనసాగుతోంది. పుండలీక మహర్షిని భక్తిశ్రద్ధలతో దర్శిస్తే, స్వయంగా శ్రీహరిని దర్శించినంత పుణ్యం లభిస్తుందని భక్తులు విశ్వసిస్తారు. శ్రీ పాండురంగస్వామి ఆలయం పుండలీక మహర్షిని దర్శించిన అనంతరం భక్తులు ప్రధాన ఆలయానికి చేరుకుంటారు. ఆలయ ప్రవేశ ద్వారం వద్ద పూజా సామగ్రిని తీసుకుని భక్తిశ్రద్ధలతో ఆలయంలోకి ప్రవేశిస్తారు. ఆలయానికి ప్రధాన ప్రవేశద్వారం సంత్ నామదేవ్ మహాద్వారంగా ప్రసిద్ధి చెందింది. ఈ ద్వారం పండరీపుర భక్తి సంప్రదాయానికి ప్రతీకగా నిలిచింది. మహాద్వారం సమీపంలోనే మహాభక్తుడు సంత్ చోఖామేళాకు అంకితమైన మందిరం ఉంది. శ్రీ పాండురంగస్వామిపై అపారమైన భక్తి కలిగిన చోఖామేళా, భక్తుల ప్రార్థనలను స్వామివారి సన్నిధికి చేర్చే మహాభక్తుడిగా గౌరవింపబడుతున్నాడు. అదేవిధంగా సంత్ నామదేవ్ మహారాజ్ విగ్రహాన్ని దర్శించి, ఆయన పవిత్ర మెట్లను నమస్కరించిన తరువాతే ప్రధాన గర్భగుడి వైపు వెళ్లడం అనాదిగా కొనసాగుతున్న ఆచారం. గర్భగుడిలో దివ్య దర్శనం గర్భగుడిలో ఎత్తైన పీఠంపై రెండు చేతులను నడుముపై ఉంచుకుని నిలబడి ఉన్న శ్రీ పాండురంగ విఠలస్వామి వారి దివ్యమంగళ విగ్రహం భక్తులను అమితంగా ఆకట్టుకుంటుంది. ఆ స్వామివారి కరుణామయమైన రూపాన్ని చూసిన ప్రతి భక్తుడి హృదయం భక్తి పారవశ్యంలో మునిగిపోతుంది. ఇక్కడి ప్రత్యేకత ఏమిటంటే, సంప్రదాయ ప్రకారం భక్తులకు స్వామివారి పవిత్ర పాదాలను స్పర్శించి నమస్కరించే అవకాశం లభిస్తుంది. ఆ దివ్యస్పర్శ భక్తుల జీవితంలో మరపురాని ఆధ్యాత్మిక అనుభూతిని కలిగిస్తుంది. స్వామివారిని ప్రధానంగా తులసీదళాలతో అర్చిస్తారు. తులసీదళాలతో చేసిన పూజను శ్రీహరి అత్యంత ప్రీతిగా స్వీకరిస్తారని వైష్ణవ సంప్రదాయం చెబుతుంది. రుక్మిణీదేవి ఆలయం స్థలపురాణం ప్రకారం, శ్రీకృష్ణుడు పుండలీకుడి కోరిక మేరకు పండరీపురంలోనే నిలిచి ఉండగా, ఆయనను వెతుకుతూ వచ్చిన శ్రీ రుక్మిణీదేవి కూడా ఈ క్షేత్రానికి విచ్చేసింది. తనకు తెలియజేయకుండా కృష్ణుడు ఇక్కడికి రావడంతో అమ్మవారు అలిగి, స్వామివారి ప్రధాన ఆలయానికి కొంత దూరంలో నివసించారని కథనం చెబుతుంది. అందుకే పండరీపురంలో శ్రీ రుక్మిణీదేవికి ప్రత్యేక ఆలయం నిర్మించబడింది. ఈ ఆలయంలో భక్తులు కుంకుమార్చన చేసి అమ్మవారి అనుగ్రహాన్ని పొందుతారు. ఆలయంలోని రుక్మిణీదేవి పాదాలను భక్తులు భక్తిశ్రద్ధలతో స్పర్శించి నమస్కరించవచ్చు. ఉపాలయాల విశిష్టత ప్రధాన ఆలయ ప్రాంగణంలోనే శ్రీ సత్యభామాదేవి, శ్రీ రాధాదేవి, శ్రీ దత్తాత్రేయస్వామి, శ్రీ కాలభైరవస్వామి, శ్రీ సూర్యనారాయణస్వామి, శ్రీ మహాలక్ష్మీదేవి, శ్రీ వేంకటేశ్వరస్వామి తదితర దేవతలకు అంకితమైన ఉపాలయాలు ఉన్నాయి. ఈ దేవాలయాలను దర్శించడం ద్వారా భక్తులు సమస్త దేవతల అనుగ్రహాన్ని పొందుతారని విశ్వసిస్తారు. ఆషాఢీ ఏకాదశి మహిమ పండరీపురంలో జరిగే ఉత్సవాలలో ఆషాఢ శుక్ల ఏకాదశి (ఆషాఢీ ఏకాదశి) అత్యంత వైభవంగా నిర్వహించబడుతుంది. దీనినే శయన ఏకాదశి, దేవశయనీ ఏకాదశి అని కూడా పిలుస్తారు. ఈ రోజు నుండి శ్రీమహావిష్ణువు యోగనిద్రలోకి ప్రవేశిస్తారని వైష్ణవ సంప్రదాయం చెబుతుంది. ఈ పవిత్ర తిథి నాడు పండరీపురం లక్షలాది మంది భక్తులతో కిక్కిరిసిపోతుంది. ఆలయమంతా నామసంకీర్తనలు, భజనలు, అభంగాలు, హరినామ స్మరణలతో మారుమోగిపోతుంది. భక్తులు "విఠల్... విఠల్... జై హరి విఠల్..." అంటూ స్వామివారిని భక్తిశ్రద్ధలతో కీర్తిస్తారు. ప్రపంచ ప్రసిద్ధ "వారీ" పాదయాత్ర ఆషాఢీ ఏకాదశి సందర్భంగా జరిగే "వారీ" పాదయాత్ర ప్రపంచ ప్రసిద్ధి గాంచింది. మహారాష్ట్రలోని ఆలంది నుండి సంత్ జ్ఞానేశ్వర్ మహారాజ్ వారి పాలఖీ, దేహు నుండి సంత్ తుకారాం మహారాజ్ వారి పాలఖీ వేలాది మంది వార్కరి భక్తులతో కలిసి వందల కిలోమీటర్లు కాలినడకన ప్రయాణించి పండరీపురం చేరుకుంటాయి. మార్గమంతా భక్తులు అభంగాలు పాడుతూ, హరినామ సంకీర్తన చేస్తూ, భగవన్నామ స్మరణలో మునిగిపోతారు. ఈ యాత్రలో జాతి, మతం, కులం, ధనిక–పేద అనే భేదాలు ఉండవు. అందరూ భగవంతుని సన్నిధిలో సమానులే అనే సందేశాన్ని ఈ వారీ యాత్ర ప్రపంచానికి చాటిచెబుతుంది. వార్కరి సంప్రదాయం పండరీపురం వార్కరి సంప్రదాయానికి కేంద్రబిందువుగా ప్రసిద్ధి చెందింది. "వారీ" అంటే ప్రతి సంవత్సరం నియమితంగా పండరీపురానికి పాదయాత్ర చేయడం. ఈ సంప్రదాయాన్ని పాటించే భక్తులను వార్కరీలు అని పిలుస్తారు. వార్కరీలు సత్యం, అహింస, దయ, సేవ, భక్తి వంటి సద్గుణాలను జీవితంలో ఆచరిస్తారు. తులసీమాలను ధరించి, "రామకృష్ణ హరి", "జై జై రామకృష్ణ హరి", "విఠల్ విఠల్" అనే నామాలను నిరంతరం జపిస్తూ భక్తిమార్గంలో నడుస్తారు. మహాభక్తుల పుణ్యభూమి పండరీపురం అనేక మంది మహాభక్తుల తపోభూమిగా ప్రసిద్ధి చెందింది. వారిలో ముఖ్యులు: - సంత్ జ్ఞానేశ్వర్ మహారాజ్ - సంత్ నామదేవ్ మహారాజ్ - సంత్ తుకారాం మహారాజ్ - సంత్ ఏకనాథ్ మహారాజ్ - సంత్ చోఖామేళా - సంత్ జనాబాయి - సంత్ సక్కుబాయి ఈ మహాభక్తులు విఠలుని మహిమను అభంగాల రూపంలో ప్రపంచానికి పరిచయం చేశారు. వారి భక్తి, వైరాగ్యం, సేవాభావం నేటికీ కోట్లాది మంది భక్తులకు ఆదర్శంగా నిలుస్తున్నాయి. సక్కుబాయి భక్తి శ్రీ పాండురంగస్వామిపై అపారమైన భక్తి కలిగిన సంత్ సక్కుబాయి జీవితం భక్తికి ప్రతీకగా నిలిచింది. కుటుంబ సభ్యుల వేధింపులను భరించిన ఆమెను స్వయంగా శ్రీ పాండురంగుడు రక్షించి, ఆమె సేవలను తానే స్వీకరించాడని భక్తి సంప్రదాయం చెబుతుంది. ఆషాఢీ ఏకాదశి సందర్భంగా సక్కుబాయి భక్తిని స్మరించుకుంటూ ప్రత్యేక కార్యక్రమాలు నిర్వహిస్తారు. భీమా (చంద్రభాగా) నది పురాణం స్థలపురాణం ప్రకారం, త్రిపురాసురుడిని సంహరించిన అనంతరం పరమేశ్వరుడు తీవ్రమైన అలసటతో సహ్యాద్రి పర్వత ప్రాంతానికి చేరుకున్నారు. ఆ సమయంలో ఆయన శరీరం నుండి కారిన చెమటధారలు ఒక ప్రవాహంగా మారి భీమా నదిగా అవతరించాయని పురాణాలు పేర్కొంటాయి. పండరీపురం వద్ద ఈ నది అర్ధచంద్రాకారంలో ప్రవహించడం వల్ల దీనిని చంద్రభాగా నది అని పిలుస్తారు. ఈ పవిత్ర నదిలో స్నానం చేసి, అనంతరం శ్రీ పాండురంగస్వామిని దర్శిస్తే జన్మజన్మల పాపాలు నశించి, విష్ణు అనుగ్రహం లభిస్తుందని భక్తుల విశ్వాసం. భక్తికి నిలువెత్తు నిదర్శనం పండరీపురం కేవలం ఒక పుణ్యక్షేత్రం మాత్రమే కాదు. ఇది భక్తికి, సేవకు, పితృభక్తికి, నామసంకీర్తనకు ప్రతీక. భక్తుడి కోసం ఇటుకపై నిలబడి ఎదురుచూసిన భగవంతుని దివ్యక్షేత్రం ఇదొక్కటే అని చెప్పడంలో అతిశయోక్తి లేదు. ప్రతి భక్తుడు జీవితంలో కనీసం ఒక్కసారైనా పండరీపురాన్ని దర్శించి, శ్రీ పాండురంగ విఠలస్వామి వారి దివ్య అనుగ్రహాన్ని పొందాలని మనసారా కోరుకుందాం. శ్రీ పాండురంగాష్టకం శ్రీ ఆది శంకరాచార్యులు రచించిన ఈ పవిత్ర స్తోత్రం శ్రీ పాండురంగ విఠలస్వామి వారి మహిమను అద్భుతంగా వర్ణిస్తుంది. «మహాయోగపీఠే తటే భీమరథ్యా వరం పుండరీకాయ దాతుం మునీంద్రైః । సమాగత్య తిష్ఠంతమానందకందం పరబ్రహ్మలింగం భజే పాండురంగమ్ ॥ 1 ॥» «తటిద్వాససం నీలమేఘావభాసం రమామందిరం సుందరం చిత్ప్రకాశమ్ । పరం త్విష్టకాయాం సమన్యస్తపాదం పరబ్రహ్మలింగం భజే పాండురంగమ్ ॥ 2 ॥» «ప్రమాణం భవాబ్ధేరిదం మామకానాం నితంబః కరాభ్యాం ధృతో యేన తస్మాత్ । విధాతుర్వసత్యై ధృతో నాభికోశః పరబ్రహ్మలింగం భజే పాండురంగమ్ ॥ 3 ॥» «స్ఫురత్కౌస్తుభాలంకృతం కంఠదేశే శ్రియా జుష్టకేయూరకం శ్రీనివాసమ్ । శివం శాంతమీడ్యం వరం లోకపాలం పరబ్రహ్మలింగం భజే పాండురంగమ్ ॥ 4 ॥» «శరచ్చంద్రబింబాననం చారుహాసం లసత్కుండలాక్రాంతగండస్థలాంగమ్ । జపారాగబింబాధరం కంజనేత్రం పరబ్రహ్మలింగం భజే పాండురంగమ్ ॥ 5 ॥» «కిరీటోజ్జ్వలత్సర్వదిక్ప్రాంతభాగం సురైరర్చితం దివ్యరత్నైరనర్ఘైః । త్రిభంగాకృతిం బర్హమాల్యావతంసం పరబ్రహ్మలింగం భజే పాండురంగమ్ ॥ 6 ॥» «విభుం వేణునాదం చరంతం దురంతం స్వయం లీలయా గోపవేషం దధానమ్ । గవాం బృందకానందదం చారుహాసం పరబ్రహ్మలింగం భజే పాండురంగమ్ ॥ 7 ॥» «అజం రుక్మిణీప్రాణసంజీవనం తం పరం ధామ కైవల్యమేకం తురీయమ్ । ప్రసన్నం ప్రసన్నార్తిహం దేవదేవం పరబ్రహ్మలింగం భజే పాండురంగమ్ ॥ 8 ॥» ఫలశృతి «స్తవం పాండురంగస్య వై పుణ్యదం యే పఠంత్యేకచిత్తేన భక్త్యా చ నిత్యమ్ । భవాంభోనిధిం తేపి తీర్త్వాంతకాలే హరేరాలయం శాశ్వతం ప్రాప్నువంతి ॥» ఇతి శ్రీ పాండురంగాష్టకం సంపూర్ణమ్। ఆషాఢీ ఏకాదశి సందేశం ఆషాఢీ ఏకాదశి మనకు ఉపవాసం యొక్క గొప్పతనాన్ని మాత్రమే కాదు, భక్తి, సేవ, వినయం, నామస్మరణ, మాతాపితృ సేవ అనే ఐదు మహోన్నత విలువలను కూడా గుర్తుచేస్తుంది. పుండలీకుడి పితృభక్తి, సంత్ జ్ఞానేశ్వర్, తుకారాం, నామదేవ్, సక్కుబాయి వంటి మహాభక్తుల నిష్కపట భక్తి, శ్రీ పాండురంగుని అపార కరుణ – ఇవన్నీ కలిసే పండరీపురాన్ని భూలోక వైకుంఠంగా నిలబెట్టాయి. పండరీపురానికి వెళ్లే ప్రతి యాత్రికుడు కేవలం ఒక దేవాలయాన్ని మాత్రమే దర్శించడు; భక్తి అనే జీవన మార్గాన్ని అనుభవిస్తాడు. ముగింపు భక్తుని కోసం ఇటుకపై నిలబడి వేచి చూసిన దయామయుడు శ్రీ పాండురంగ విఠలుడు. మాతాపితృ సేవే మాధవ సేవ అని ప్రపంచానికి ఆచరణలో చూపించిన పుండలీక మహాభక్తుడు. నామసంకీర్తనే మోక్షమార్గమని చాటి చెప్పిన మహనీయుల పుణ్యభూమి పండరీపురం. జీవితంలో ఒక్కసారైనా ఈ దివ్యక్షేత్రాన్ని దర్శించి, శ్రీ పాండురంగ విఠలస్వామి వారి కృపాకటాక్షాలను పొందాలని ప్రతి భక్తుడు సంకల్పించాలి. జై జై రామకృష్ణ హరి! జై జై విఠల్! పాండురంగ విఠల్! శ్రీ పాండురంగ విఠల స్వామికి జయము! 🙏 #తెలుసుకుందాం #తొలి ఏకాదశి #🌻" తొలి ఏకాదశి శుభాకాంక్షలు "🌻 #జయ పాండురంగ విఠల ప్రభో 🙏🕉️🙏 #పాండురంగ స్వామి

సత్యనారాయణ స్వామి వ్రత కధల అంతరార్ధం.............!! మనకున్న ఎన్నో గొప్ప విశేషమైన పూజలలో, వ్రతాలలో శ్రీ సత్యన్నారాయణస్వామి వ్రతం చాలా ఉత్కృష్టమైనది. పెళ్ళిళ్ళలో, గృహప్రవేశాలలో, ఏ శుభ సందర్భంలో అయినా మనం ఆచారంగా ఈ వ్రతం చేసుకుంటాము. ముందుగా అష్టదిక్పాలకులను, నవగ్రహాలను, దేవతాసమూహాన్ని వారి సపరివారంగా ఆహ్వానించి, ఆవాహన చేసి ఉచితాసనాలతో సత్కరించి వారి ఆశీస్సులను స్వీకరించి మంత్రపుష్పం సమర్పించి అప్పుడు స్వామివారి లీలా విశేషాలను కధల రూపంగా విని తరిస్తాము. ఈ వ్రత విధానం స్కాందపురాణం రేవాఖండంలో వివరింపబడి వున్నది. ఇక్కడ 5 కధల సమాహారం ఎన్నో విశేషాలను మనకు తెలుపుతాయి. 1. మొదటగా నారద మహర్షి శ్రీమన్నారాయాణుని దర్శించి కలియుగంలో ప్రజలు పడుతున్న కష్టాలను వివరించి వాటిని తగిన నివారణోపాయం సూచించమని వేడుకుంటాడు. ఈ అధ్యాయం మనకు ఎదురవుతున్న ఎన్నో కష్టాలను పేర్కొంటూ వాటిని ఎలా పోగొట్టుకోవాలో చెబుతోంది. భరోసా ఇస్తోంది. మన పూర్వ జన్మ పాపం ఇప్పుడు మనకు రావలసిన ఆనందాలకు ఎలా అడ్డుపడుతుందో ( ఒక కుళాయి కొట్టంలో నీటిని ఒక అడ్డంకి ఎలా ధారను ఆపుతోందో) మనకు అవగతమవుతుంది. వాటిని ఇటువంటి క్రతువులు ఒక దూదికొండను ఒక నిప్పురవ్వ మండించి తొలగించినట్టు ఎలా తీరుస్తాయో చెబుతుంది. మనం ఇప్పుడు అనుభవిస్తున్న సుఖ దుఃఖాలన్నీ కూడా మన పూర్వం చేసిన కర్మ ఫలమే. వాటిని ఎలా తగ్గించుకోవాలో మోక్షం మన పరమపదం అని చెప్పడానికి నారదుడు మన తరఫున స్వామి వారికి నివేదించి పరిష్కారం ఆయన చేతనే చెప్పిస్తాడు. 2. రెండవ అధ్యాయంలో ఒక వేదవేత్త అయిన బ్రాహ్మణుని కష్టాలను ఎలా వ్రతం చేసి గట్టేన్కిన్చారో తెలియచేస్తారు. ఆ బ్రాహ్మణుని వ్రతం చూసి ఒక కట్టేలమ్మేవాడు ఎలా ఉద్ధరింపబడతాడో వివరిస్తుంది. ఒకరు ధర్మాన్ని నమ్ముకున్న వారికి వారి కష్టాలనుండి గట్టేన్కించడానికి స్వామి వారే ఎలా వస్తారో చెబుతుంది. త్రికరణశుద్ధిగా మనం మన కర్మ చేస్తే కష్టాలు ఎన్నో రోజులు వుండవు. కష్టపడే వాడిని ఎలా దేవుడే స్వయంగా పూనుకుని ఉద్ధరిస్తాడో చెబుతుంది. కామితార్ధప్రదాయి స్వామి. దేవుడు కేవలం కర్మ సాక్షి. కానీ ఆయనను శరణుజొచ్చిన వారికి కర్మఫలాన్ని ఎలా అనుకూలంగా మారుస్తారో తెలుసుతుంది. ముందుగా ఇహసౌఖ్యం ఇచ్చి, వారి ధర్మ ప్రవర్తన కారణంగా వారికి మరు ఉతరోత్తరాజన్మలలో మోక్షం సిద్ధింపచేస్తాడు. ౩. ఒక రాజు కామ్యం కొరకు ఎలా వ్రతం ఆచరిస్తాడో, తద్వారా అతడికి సంతాన భాగ్యం ఎలా కలిగింది, తద్వారా ఆ లీల చూసిన సాధు అనే వైశ్యుడు కూడా ఎలా సంతానవంతుడయ్యాడో వివరిస్తుంది ఈ కధ. తరువాత లోభించి ఎలా వాయిదా వేస్తాడో, దేవుని మోసం చెయ్యడం వలన ఎలా కష్టనష్టాలు అనుభావిస్తాడో చెబుతారు. అతడి పాపం వలన అతడి కుటుంబం కూడా ఎలా కష్టాలు పడ్డదో, మరల తిరిగి వారి ఆడవారు వ్రతం చేస్తానని సంకల్పించుకోవడం వలన యలా అతడు కష్టాలనుండి బయటపడ్డాడో తెలుస్తుంది. ఒకరికి ఒక మాట ఇచ్చామంటే కట్టుబడి వుండాలి. అది మన తోటి వారికైనా దేవునికైనా. లోభం వలన అతడు మాట తప్పి, తనవారికి కష్టాలు తెస్తాడు. ధర్మాచరణ, వచనపాలన చాలా ముఖ్యం. ఇక్కడ తనకు పూజ చెయ్యలేదని శపించేటంత శాడిస్టు కాదు దేవుడు. అతడికి ఎన్నిసార్లు గుర్తుకొచ్చినా లోభించి, మొహానికి లోనయి మోసం చేసే ప్రవృత్తి వున్నవాడు అతడు. అతడెందుకు మనం అందరం కూడా అటువంటి వైశ్యులమే. నాకు ఇది చెయ్యి నీ హుండిలో ఇన్ని వందలు, వేలు వేసుకుంటాం అని బేరం పెడుతున్నాం. సుఖాలోచ్చినప్పుడు నాకెందుకు ఇచ్చావు అని ఎవడూ అడగడు, కేవలం కష్టాల్లో మాత్రమె మనకే ఎందుకు వచ్చాయి అని వగుస్తాము. ఇక్కడ కధ మనలో వున్న లోభాత్వాన్ని అణచమనే. అలాగే మనం చేసిన పాపం, మననే కాదు మన కుటుంబాన్ని కూడా కట్టి కుదిపేస్తుంది. అలాగే మన కుటుంబం వారు తప్పు తెలుసుకుని మరల శరణాగతి చేస్తే అది మరల మనను నిలబెడుతుంది. ఇక్కడ నేను, నా కుటుంబం వేరు కాదు. అంతా ఒక్కటే, కష్టాలయినా సుఖాలయినా కలిసే అనుభవిస్తాము. మన ధర్మం మననే కాదు, మన వారినందరినీ రక్షిస్తుంది, అలాగే పాపం కూడాను. 4. ఈ అధ్యాయంలో ఆ వైశ్యుడు మరల ఎలా మొహం లో పడిపోతాడో, క్రోధంతో ఒక సాధువును ఎలా హేళన చేస్తాడో చెప్పారు. అలాగే వ్రతం చేసినా కూడా ప్రసాదాన్ని స్వీకరించక కళావతి ఎలా కొంతసేపు కష్టాలు చవిచూసిందో చెబుతుంది. పెద్దలను గౌరవించమని మన వాంగ్మయం చెబుతుంది. ఒక పుణ్య కార్యం చేస్తామని వచ్చిన సాధువుని హేళన చేసి, క్రోధపూర్వకంగా మాట్లాడి కష్టాలు కొని తెచ్చుకుంటారు. ఇత: పూర్వం చెప్పినట్టు ప్రసాదం స్వీకరించకపోతే వారి జీవితం నాశనం చేసేటంత క్రోధం దేవునికి వుండదు. ఆయన వాటి ద్వారా మనకు ఒక బోధ చేస్తున్నాడు. ఇక్కడ గమనించవలసిన విషయం చూడండి, అక్కడ దేవుడు ఒక లీల చూపించి అక్కడే వుండి వారికి జ్ఞానోదయం అయ్యాక మరల వారివి వారికి ఇచ్చేస్తాడు. కేవలం వారిని పరీక్షించి వారికి పాఠం నేర్పుతాడు. అంతే తప్ప అనంతమైన కష్టాలు ఇవ్వడు. ఈ కధల ద్వారా ఒక మనిషి ఎలా ఉండకూడదో తెలుస్తోంది. అలాగే దైవానుగ్రహం మనకు ప్రసాద రూపంలో వస్తుంది. దాన్ని అలక్ష్య పరచాకూడదని మనకు చెప్పే కదా ఇది. అంతే తప్ప ఆయన మనల్ని కష్టపెట్టి ఆనందించే స్వభావం వున్నవాడు కాదు. 5. తుంగధ్వజుడనే రాజు కొందరు గొల్లలు చేసే వ్రతాన్ని తక్కువ చేసి చూసి ఒక మాయ వలన తాను నష్టపోయినట్టు భ్రమకు లోనయి తప్పు తెలుసుకుని తిరిగి ప్రసాద స్వీకారం చేసి ఆ మాయను తొలగించుకుంటాడు. వ్రతం ఎక్కడ జరిగినా భక్తిపూర్వకంగా వుండాలి. వ్రతం జరిపే వారి ఎక్కువ తక్కువ అంతరాలను దేవుడు చూడడు. భక్తి మాత్రమె ఆయనకు ప్రధానం. మద మాత్సర్యాల ద్వారా ఆ రాజు ఎలా కష్టపడ్డాడో, వివేకం ఉదయింప చేసి ఆ లీలను ఎలా ఉపసంహారం చేసారో చూపించారు. కొన్ని నీతి సూత్రాలను మనం ఈ కధల ద్వారా తెలుసుకుంటాం........ 1. ఈ వ్రతం చాతుర్వర్ణాల వారు ఈ ఐదు అధ్యాలలలో ఎలా వ్రతం చేసుకుని ఉద్ధరింపబడ్డారో చూసాక మన పూజలు, వ్రతాలు కేవలం కొన్ని వర్ణాలకు మాత్రమె పరిమితం అని చేసే విషప్రచారానికి గొడ్డలిపెట్టు. 2. ఈ కధల ద్వారా కామక్రోధలోభ మోహ మద మాత్సర్యాలను ఎలా దైవానుగ్రహం వలన అదుపులో పెట్టుకుని ధర్మార్ధకామమోక్షాలు సాధించవచ్చో వివరిస్తాయి. 3. మాట ఇచ్చి తప్పడం ఎంత ప్రమాదమో మనం గ్రహించాలి. సత్యనిష్ఠ, ధర్మనిష్ఠ వలన ఎలా మంచి జరుగుతుందో, లేకపోతే కష్టాలు ఎలా పడతామో కళ్ళకు కట్టినట్టు వివరిస్తుంది. 4. దైవానుగ్రహం ఎలా మన దుష్కర్మల ఫలాన్ని దూరం చేస్తుందో తెలియచేస్తుంది. 5. చెడు త్వరగా అర్ధమవుతుంది. మంచి చేస్తే మంచి వస్తుందని ఎంత చెప్పినా తేలిగ్గా తీసుకుంటాం, మన మెంటాలిటి తప్పు చేస్తే ఏమి కష్టాలు వస్తాయో చెబితే యిట్టె పట్టుకుంటుంది. వాటిని చెబుతూ ఎలా పోగొట్టుకోవాలో తరుణోపాయాలను చెబుతుంది. ఇవే కాదు ఎన్నో మరెన్నో నీతి నియమాల సమాహారం ఈ వ్రతకధా తరంగం. స్వామిని పూర్తిగా నమ్మి శరణాగతి చేసి మనం కూడా ఆయన ఆశీర్వాదం పొంది ఉన్నతిస్థితిని పొంది ఇహపరసౌఖ్యాలను పొందుదాం. విమర్శించే సమయంలో ఒక్క వంతు మనం ఈ కధ మనకు ఏమి చెబుతోంది అని ఒక్క క్షణం ఆలోచిస్తే మనకు మరెన్నో విషయాలు బోధపడతాయి అని నా మనవి. # శ్రీ సత్యనారాయణ స్వామి వ్రతం 🙏🙏🙏🙏🙏 #అన్నవరం సత్యనారాయణ మూర్తి స్వామి #అన్నవరం #తెలుసుకుందాం ##పురాణాలూ_కథలు

🪷🪷🪷🪷🪷🪷🪷🪷🪷🪷 🌹 శ్రీవారి గర్భగుడిలో ఎన్ని విగ్రహాలు పూజలందుకొంటాయి 🌹 🪷🪷🪷🪷🪷🪷🪷🪷🪷🪷 శ్రీవారి గర్భగుడిలో మూలవిగ్రహముతో పాటుగా కౌతుకబేరము, ఉత్సవబేరము, స్నపనబేరము, బలిబేరము అనే విగ్రహాలు పూజలందుకొంటాయి. అంటే మొత్తముగా ఐదు విగ్రహాలుంటాయి. అవి (1) ద్రువబేరము (2) కౌతుకబేరము (3) స్నపనబేరము (4) ఉత్సవబేరము (5) బలిబేరము. ఈ ఐదు విగ్రహాలు వైష్ణవవైఖాసన ఆగమము ప్రకారం సందర్భోచితంగా పూజలందుకొంటాయి. దక్షిణ భారతదేశంలోని అనేక వైష్ణవాలయాలు ఇదే వైఖానస లేదా పాంచరాత్ర ఆగమ సంప్రదాయాలను అనుసరిస్తాయి, అయితే తిరుమల క్షేత్రం వైఖానస ఆగమాన్నే ప్రధానంగా పాటిస్తుంది. గ్రామశ్రేయస్సు కొరకు ద్రువబేరానికి పూజలు నిర్వహిస్తారు. ద్రువబేరమంటే మరేమి కాదు మూలవిగ్రహమే. దీన్నే స్థిరమైన, చలింపని విగ్రహంగా భావిస్తారు కనుకనే "ధ్రువ" అనే పేరు వచ్చింది. వైఖానసనాగము ప్రకారము గర్భగుడిలోని దేవుడు రెండు రకాలు. ఒకటి కంటికి కనిపించే బేరము, అంటే సాకారరూపమన్నమాట. రెండోది కంటికి కనబడని దేవుడు. ఈ దేవుడినే నిరాకారరూపుడని అంటారు. కనుక తిరుమలలోని తిరువెంగడనాథుని (శ్రీ వేంకటేశ్వరుని) రూపము సాకారమన్నమాట. మూలబేరాన్ని శిల, మట్టి, దారువు (కట్టె)లతో నిర్మించాలి. వీటికే నిత్యపూజలు వైఖాసన లేదా పాంచరాత్ర ఆగమాల ప్రకారము పూజలు జరపాలి. ద్రువబేరానికి అభిషేకముండదు, ఎందుకంటే మూలవిగ్రహం అత్యంత పవిత్రమైనదిగా, స్పర్శకు అతీతమైనదిగా భావించబడుతుంది. పాలు నేయి తేనె ఘృతం (పెరుగు) వంటి వాటితో తిరుమంజనసేవలు / అభిషేకాలు కౌతుకబేరానికి చేస్తారు. కౌతుకబేరమంటే దినసరిపూజకు ఏర్పాటుచేసిన బంగారు /వెండి/ పంచలోహాలతో చేసిన విగ్రహం. మూలవిగ్రహంలో వుండే శక్తిని కౌతుకబేరములోకి ఆవాహన చేసి పూజలు నిర్వహించి, సాయంత్రం పూజ ద్వారా తిరిగి ఆ శక్తిని మూలవిగ్రహంలోనికి ప్రవేశపెడతారు. ఈ ప్రక్రియనే ఉద్వాసనమంటారు. మూడవదైన విగ్రహము ఉత్సవవిగ్రహము. పుర ఊరేగింపునకు ద్రువబేరాన్ని తీసుకువెళ్ళటానికి వీలుకాదు కనుక ఉత్సవబేరాన్ని ఊరేగిస్తారు. తిరుమలలో ఈ ఉత్సవమూర్తినే "మలయప్పస్వామి" అని పిలుస్తారు, బ్రహ్మోత్సవాలు వంటి పర్వదినాలలో వాహనసేవలకు ఈ మూర్తినే ఊరేగిస్తారు. స్నపనబేరాన్ని అమ్మవారి విగ్రహాలతో పాటుగా కోనేరుకు తీసుకువెళ్ళి చక్రవారి స్నానము చేయిస్తారు. ప్రతిదేవాలయంలోనూ ప్రధానమూర్తితో పాటు పరివారదేవతలుంటారు. వీరిని ఉపదేవాలయాలలో వుంచి పూజిస్తారు. గరుడ, నంది, వినాయక, శ్రీదేవి భూదేవి, భైరవ, పరశురామ, బలరామ, యక్షగంధర్వ దేవతలు ఇందుకు ఉదాహరణగా చెప్పుకోవచ్చును. చివరిది ఐదవదైన బలిబేరాన్ని పరివారదేవతలకు బలి ఇవ్వటానికి ముందు అర్చిస్తారు. బలి ఇవ్వడమంటే జంతువధ చేయడం కాదు. బల్యాన్నాన్ని (బలి అన్నము) ను సమర్పించడమే. కొన్ని ఆగమవిధానాలలో మూలవిగ్రహానికి అభిషేకము కూడా చేస్తారు. నిరాకార రూపుడైన భగవంతునికి అకారపూజా విధులేమి వుండవు, భక్తిప్రవృత్తులే ఇక్కడ ప్రధానము. ఈ పంచబేరాల విధానం కేవలం తిరుమలకే పరిమితం కాక, వైఖానస ఆగమాన్ని అనుసరించే అనేక దక్షిణ భారత వైష్ణవాలయాలలో కూడా విస్తృతంగా అమలులో ఉందని ఆగమశాస్త్ర పండితులు పేర్కొంటారు. ఏడుకొండలవాడా వెంకటరమణా ☆ \|/ ♧ గోవిందా గోవిందా 🙏🙏🙏🙏🙏 #TTD తిరుపతి తిరుమల #తిరుమల తిరుపతి దేవస్థానం #🙏శ్రీ వెంకటేశ్వర స్వామి #తెలుసుకుందాం

#depression #mental health నా depression ప్రయాణం లో నేను కొందరిని అదే ప్రాబ్లెమ్ తో ఉన్న వాళ్ళతో మాట్లాడడం జరిగింది. first of all మీది డిప్రెషన్ నో కాదో తేల్చాల్సింది doctors . మీకు మీరే అనేసుకోవద్దు. అసలు ఆ dr దగ్గరికి వెళ్లాలో లేదో అనేది చెప్పాల్సింది జనరల్ ఫిజీషియన్స్ డైరెక్ట్ గా మీరే నిర్ణయించుకోకండి. ఆడ/ మగ లో dull గా మనసుబాలేక పోవడానికి చాలా reasons ఉంటాయి. చిన్న చిన్న వాటికి , మనసుబాలేకపోతే , డిప్రెషన్ అని అనేయడం ఈ మధ్య అందరికి పరిపాటి అయ్యింది. జనరల్ గా బాడీ లో డెఫిషియన్సీ లు ఉన్నా dull గా నిద్రపోతూ ఉంటారు. ఆడవాళ్ళకి గైనిక్ సంబంధించిన ,/ హార్మోన్స్ ఇంబాలెన్స్ వల్ల కూడా mood swings ఉంటాయి. చాలా చాలా ఇబ్బంది పడుతుంటారు. ఒక్కో శరీరం ఒక్కోలా స్పందిస్తుంది. ఒకరికి ఎక్కువ ఉండచ్చు. ఒక్కోరికి చాలా ఎక్కువ ఇబ్బంది ఉండవచ్చు. ఆ మేమూ దాటివచ్చాం అనే చుట్టుపక్కల వాళ్ళ మాట చెవికి ఎక్కుంచుకోవద్దు. ముందు జనరల్ ఫిజిషియన్/ గైనకాలజిస్ట్ ని సంప్రదించి… వాళ్ళ సలహామేరకు మాత్రమే మీరు సైకాలజిస్ట్ దగ్గరికి వెళ్ళండి. కొంతమంది మిత్రులు నేను వాడే మందులు ఒక స్ట్రిప్ పంపు.. వాడి చూస్తాను . నిద్ర ఉండటం లేదు అనేవాళ్ళు. అమ్మో. సైకియాట్రిస్టులు ప్రిస్కిప్షన్ లేనిదే ఆ మందులు షాప్ లో ఇవ్వరు. లెక్క ప్రకారం రెండు నెలల కి అంటే ఒక్క టాబ్లెట్ కూడా ఎక్స్ట్రా ఇవ్వరు. అవేం నిద్ర మాత్రలు కావు. చాలా రిస్క్ అలా వేసుకోవడం. అక్కడే అర్ధం అయ్యింది వాళ్లకి డిప్రెషన్ మీద అవగాహన శూన్యం అని. కొందరికి పరిస్థితులు చక్కదిద్దుకునే నార్మల్ అయిపోతారు. అది డిప్రెషన్ కానే కాదు. టెంపరరీ పెయిన్. ప్రతీ ఒక్కరి జీవితం లోనూ ఎత్తుపల్లాలు ఉంటాయి. వాటిని దాటక తప్పదు. మీ వల్ల కాకపోతే, కౌన్సిలింగ్స్ ఉపయోగపడతాయి max. మందులు కాదు. మీకు కౌన్సెలింగ్ చాలా/ మందుల అవసరం ఉందా అనేది డాక్టర్స్ నిర్ణయిస్తారు. ఒక విషయం చెప్పనా ఫ్రాంక్ గా ………డిప్రెషన్ అనేది ఒక ఏడాది, నెల లో ఏర్పడేదే కాదు. ఆల్రెడీ దానికి పునాది ఎప్పుడో ఎన్నోసార్లు దెబ్బ మీద దెబ్బ పడే ఉంటుంది. #depression #తెలుసుకుందాం

🕉️ శ్రీ లక్ష్మీ హయగ్రీవ స్వామివారు అంటే ఎవరు?🙏📚 విద్య, జ్ఞానం, జ్ఞాపకశక్తి, వాక్పటుత్వానికి అధిదేవతగా ఆరాధించబడే దైవం శ్రీ లక్ష్మీ హయగ్రీవ స్వామివారు. శ్రీమహావిష్ణువు అవతారాలలో హయగ్రీవ అవతారం అత్యంత విశిష్టమైనది. గుర్రం ముఖం, మానవ శరీరంతో దివ్యరూపంలో దర్శనమిస్తూ, తన కరుణాకటాక్షంతో భక్తులకు జ్ఞానాన్ని ప్రసాదిస్తాడు. 🌺 స్వామివారి విశిష్టత: పురాణాల ప్రకారం మధు–కైటభ రాక్షసులు అపహరించిన వేదాలను తిరిగి సంపాదించి బ్రహ్మదేవునికి అందించిన జ్ఞానస్వరూపుడు హయగ్రీవుడు. అందుకే ఆయనను సర్వవిద్యల ఆధారమూర్తిగా భావిస్తారు. విద్యార్థులు, ఉపాధ్యాయులు, పోటీ పరీక్షలకు సిద్ధమవుతున్నవారు, పరిశోధకులు, కళాకారులు భక్తితో హయగ్రీవ స్వామిని ఆరాధిస్తే జ్ఞానం, ఏకాగ్రత, జ్ఞాపకశక్తి, విజయాన్ని ప్రసాదిస్తాడని విశ్వాసం. 🕉️ 1. హయగ్రీవ ధ్యాన శ్లోకం జ్ఞానానందమయం దేవం నిర్మలస్ఫటికాకృతిమ్ । ఆధారం సర్వవిద్యానాం హయగ్రీవముపాస్మహే ॥ 🌺 అర్థం: జ్ఞానం, ఆనందం స్వరూపుడై, నిర్మలమైన స్ఫటికంలా ప్రకాశించే, సమస్త విద్యలకు ఆధారమైన శ్రీ హయగ్రీవ స్వామిని నేను భక్తితో ఉపాసిస్తున్నాను. 🕉️ 2. విద్యా ప్రసాద శ్లోకం హయగ్రీవ హయగ్రీవ హయగ్రీవేతి యో వదేత్ । తస్య నిస్సరతే వాణీ జాహ్ను కన్యా ప్రవాహవత్ ॥ 🌺 అర్థం: ఎవరు భక్తితో "హయగ్రీవ" నామాన్ని జపిస్తారో, వారి మాటలు గంగానది ప్రవాహంలా స్పష్టంగా, మధురంగా ప్రవహిస్తాయి. 🕉️ 3. విద్యా సిద్ధి శ్లోకం శ్రీమాన్ హయగ్రీవో మే సన్నిధత్తాం సదా హృది । విద్యాం బుద్ధిం బలం చైవ దేహి మే కరుణానిధే ॥ 🌺 అర్థం: ఓ కరుణాసాగరుడా! నా హృదయంలో ఎల్లప్పుడూ నివసించి నాకు విద్య, బుద్ధి, బలం ప్రసాదించు. 🕉️ 4. జ్ఞాన ప్రాప్తి శ్లోకం విద్యానాం దేవతం వందే హయగ్రీవం దయానిధిమ్ । యస్య ప్రసాదాత్ సర్వజ్ఞం భవేత్ మానవ జీవనం ॥ 🌺 అర్థం: సమస్త విద్యలకు అధిదేవత అయిన హయగ్రీవ స్వామిని నమస్కరిస్తున్నాను. ఆయన అనుగ్రహంతో జ్ఞానం, వివేకం, విజయాలు లభిస్తాయి. 🕉️ 5. ప్రార్థన ఓం శ్రీ లక్ష్మీ హయగ్రీవాయ నమః॥ 🌺 అర్థం: విద్య, జ్ఞానం, బుద్ధి ప్రసాదించే శ్రీ లక్ష్మీ హయగ్రీవ స్వామికి నమస్కారం. 📖 పిల్లలు ప్రతిరోజూ ఉదయం లేదా చదువు ప్రారంభించే ముందు ఈ శ్లోకాలను భక్తితో చదివితే ఏకాగ్రత, జ్ఞాపకశక్తి, ధైర్యం, విద్యలో పురోగతి కలుగుతాయని విశ్వాసం. 🙏🌸 🕉️ శ్రీ లక్ష్మీ హయగ్రీవ స్వామివారు 🙏 📍 స్వామివారు ఎక్కడ ఉంటారు? శ్రీ లక్ష్మీ హయగ్రీవ స్వామివారికి భారతదేశంలో అనేక ఆలయాలు ఉన్నాయి. వాటిలో ప్రసిద్ధమైనవి: 📍 తిరువహీంద్రపురం (తమిళనాడు) – శ్రీ లక్ష్మీ హయగ్రీవ స్వామివారి అత్యంత ప్రసిద్ధ క్షేత్రం. ఇక్కడ ఊషధగిరి కొండపై స్వామివారు భక్తులకు దర్శనమిస్తారు. 📍 నంగనల్లూరు, చెన్నై (తమిళనాడు) – శ్రీ లక్ష్మీ హయగ్రీవ స్వామివారికి ప్రసిద్ధ ఆలయం. 📍 బాసర జ్ఞాన సరస్వతి ఆలయం (తెలంగాణ) – ఇక్కడ కూడా హయగ్రీవ స్వామివారిని విద్యాప్రదాతగా ఆరాధిస్తారు. #తెలుసుకుందాం #హయగ్రీవ స్వామి #లక్ష్మీ హయగ్రీవ స్వామి #🕉️ శ్రీ హయగ్రీవ 🙏 #హయగ్రీవ

హిందూ సనాతన ధర్మములో గల తెలుసుకోవలసిన కొన్ని ముఖ్యమైన విషయాలు...........!! *1. ముక్కులు కుట్టించుకున్నచో దృష్టి దోషము కలగదని నమ్మకము.* *2. చెవులు కుట్టించుకున్న హృదయ సంబంద రోగములు రావు.* *3. ఎడమ హస్తము పరమాత్మ అనియు, కుడి హస్తము జీవాత్మ అనియు ఈ రెండు ఏకము కావలెనను ఉద్దేశముతో రెండు చేతులు కలిపి నమస్కరించుచున్నాము. *4. తడి పాదములతో బోజనము చేసిన ఆయుర్వుద్ధి.* *5. తడి పాదములతో శయనించిన ఆయుక్షీణం.* *6. స్త్రీలకు బేసి సంఖ్య గల అక్షరములతో, పురుషులకు సరి సంఖ్యా గల అక్షారములతో పేర్లు పెట్టుట మంచిది.* *7. సూర్య గ్రహణానికి ముందు ''12 '' గంటల కాలము, చంద్ర గ్రహణానికి ''9'' గంటల ముందు కాలము కడుపు ఖాళీగా ఉంచుకోవలెను.* *8. శిశువు పుట్టినప్పుడు చంద్రుడు ఎక్కడ ఉంటె ఆ స్థానం వారి జన్మ రాశి . బంగారం కుజునికి , వెండి గురువునకు , రాగి రవికి ,ఇత్తడి బుధునకు, ఇనుము శని కి ఇష్టము.* *9. రుద్రాక్ష ఎంత పెద్దదైతే అంత మంచిది, సాలగ్రామం ఎంత చిన్నదైతే అంత మంచిది.* *10. బుధవారం నాడు బూడిద గుమ్మడి కాయను, గురువారం నాడు కొబ్బరి కాయను ఇంటి ముందు వ్రేలాడ కట్టుకుంటే నరఘోషలు తొలుగుతాయి.* *11. యాత్ర సమయములందు మార్గ మధ్యమున పరుండునపుడు పాదరక్షలను తలక్రింద పెట్టుకుని పరున్నచో మృత్యుభయం తొలగి సులభ మార్గమధ్య మేర్పడును.* *12. ఎవరికైనా వస్త్రములను ఇవ్వదలచినపుడు(వస్త్ర యుగ్మం) రెండు వస్త్రాలను ఇవ్వవలెను.* *13. తాంబూలం ఇచ్చేటపుడు తమలపాకు మరియు అరటిపండు తొడిమలను ఇచ్చేవారి వైపు, కొసలు తాంబూలం పుచ్చుకునే వారివైపు ఉండాలి.* *14. ఇరువురు వ్యక్తులు ఎదురెదురుగా కుర్చునప్పుడు దక్షిణ ముఖం అను ఆక్షేపణ రాదు. అలాగే హోమం చేయునపుడు -రుద్రునకు అభిషేకం చేయునపుడు నాలుగు వైపులందు నలుగురు కుర్చుండిన దిశల ఆక్షేపణలు ఉండవు.* *15. ఇద్దరు కూతుర్లకు ఒకేమారు వివాహం చేయవచ్చును, కాని ఇద్దరు కొడుకులకు ఒకేసారి వివాహం చేయకూడదు. కనీసం ఆరు మాసాలు తేడా ఉండాలి. లేదా సంవత్సర భేదం జరగాలి.* *16. గృహ ప్రవేశ సమయములందు మంచి గుమ్మడికాయను పగలకొట్టుచుందురు. అది కేవలం పురుషులు మాత్రమే చేయవలెను. ఎట్టి పరిస్థితిలోను స్త్రీలు చేయరాదు.* *17. వినాయకునికి తులసి దలంతోను- శివునకు మొగలిపువ్వుతోను- దుర్గ ను గరిక తోను పూజించరాదు.* *18. తులసి దళమును-బిల్వ దళమును ఒకసారి పూజ చేసిన తర్వాత కడిగి మరల మరొకసారి పూజించవచ్చును.* *19. భోజనం చేసిన తర్వాత ఎడమ వైపు తిరిగి పడుకొని, కుడివైపు తిరిగి లేవవలెను.* *20. కొబ్బరి- మామిడి-అరటి-పనస ఉదయం పూట తినరాదు.* *21. వేరుశనగ పప్పు-అరటిపండు తిన్న పిదప నీరు త్రాగ రాదు.* #తెలుసుకుందాం #పల్లెటూరి సాంప్రదాయాలు #హిందూసాంప్రదాయాలు #🌾మన సప్రదాయాలు🌾 #మనసాంస్కృతిసంప్రదాయాలు

*రామాయణం - శ్రీ రామనామ విశిష్టత* ఏ నామం అయినా పలికితే నామం యొక్క దేవుడు మాత్రమే పలుకుతాడు.కానీ అదే శ్రీ రామ అనే నామం లో రాముడు ఒక్కడే పలుకుతాడు అనుకోడం పొరపాటు శ్రీ రామ అనే నామం జపిస్తే ఆరుగురు దేవతలు పలుకుతారు అదెలాగో చద్దాం రామ అంటే రాముడు పలుకుతాడు. రామ అనే నామం ఉన్న చోట అందరికన్నా ముందర వచ్చి ఆ నామాన్ని విని ఆనందించేది నిస్సందేహంగా ఆ హనుమంతుడే శ్రీ అంటే లక్ష్మిదేవి. రా అంటే విష్ణువు { ఓం నమో నారాయణాయ ) అనే నామంలో నుంచి రా అనే జీవ అక్షరం తీసుకున్నారు. మ అంటే శివుడు { ఓం నమః శివాయ } అనే నామంలో నుంచి మ అనే జీవ అక్షరం తీసుకున్నారు. శివుడు హనుమంతుడి రూపంలో భూలోకానికి రామ సేవ కోసం వస్తున్నప్పుడు పార్వతీదేవి నాకు ఆ అదృష్టం కావాలి అంటే అపుడు శివుడు ఇలా అన్నాడు.ఈ అవతారంలో హనుమంతుడు బ్రహ్మచర్యాని పటిస్తాడు కనుక నిన్ను తీసుకెళ్లడం కుదరని పని అపుడు పార్వతీదేవి అయితే నేను మీ తోక రూపంలో వస్తాను అని హనుమంతుడి తోకలో ప్రవేశించిందట. మరి రామ అన్నపుడు హనుమ వస్తే పార్వతీ కూడా వచ్చింది కదా... రాముడు,హనుమంతుడు, లక్ష్మి,విష్ణువు,శివుడు,పార్వతీ. ఒక్క నామం పలికితే ఆరుగురు దేవతలు వచ్చి ఆశీర్వదిస్తారు. అలాంటి నామ పారాయణం చేయడం మరువకండి. రామాయణం పఠించడం వలన కలిగే ప్రయోజనములు ప్రాచీనకాలంలో దేవతల జీవన విధానం వారు అనుసరించిన పద్ధతులకు సంబంధించిన పవిత్ర పురాణ గ్రంథాలు ఎన్నో వున్నాయి. వాటిని పఠించడంగానీ లేదా వినటం గానీ చేస్తే మన సర్వపాపాలు తొలగిపోవడమే కాకుండా జీవితంలో వున్న కష్టాలు తొలగిపోయి. లాభాల పంటలు పండుతాయని ఆనాటి ఋషువులు పేర్కొన్నారు. అటువంటి పవిత్ర గ్రంథాల్లో వాల్మీకి రచించిన రామాయణం ఎంతో మహోన్నతమైంది.24,000 శ్లోకాలతో కూడిన రామాయణం హిందూ చరిత్ర సంస్కృతి ఆచారాలపై ప్రగాఢ ప్రభావాన్ని కలిగి వుంది. అందులో వున్న పాత్రల ద్వారా మంచి-చెడు మధ్య భేదాలు ఆదర్శ జీవిన విధానం గౌరవ అగౌరవాలు వంటి విషయాలను ఎన్నో నేర్చుకోగలగుతాము. ముఖ్యంగా అందులో వున్న పాత్రలు మనకెంతో తోడ్పడుతాయి. బంధాలు, బంధువుల పట్ల ఎలా వ్యవహరించాలి.మన జీవితానికి సార్థకత ఏంటిఅన్న వాటి గురించి క్లుప్తంగా విశదీకరిస్తుంది. ఆదికావ్యం రామాయణం వాల్మీకి రామాయణాన్ని చదవడం ద్వారా మన దోషాలను నివారించుకుంటూ శత్రువులను కూడా జయించవచ్చు. ఆటుపోట్లను ఎదుర్కుంటూ విజయాలబాట వైపు అడుగులు వేయొచ్చు. పెళ్లయిన స్త్రీలు రామాయణాన్ని చదివినాగానీ విన్నాగానీ వారికి రాముడువంటి మంచి కుమారుడు జన్మిస్తాడు. పెళ్లికాని కన్యలకు శ్రీరాముడు వంటి సద్గుణాలు కలిగిన మంచి భర్త లభిస్తాడు. రామాయణాన్ని నిత్యం పఠించడం ద్వారా మానవ శరీరంలో వున్న సమస్త రోగాలు తొలగిపోవడమే కాకుండా ఆరోగ్యవంతుడిగా వెలుగుతాడు. మృత్యుదోషాలు తొలిగిపోతాయి. దీర్ఘాయుష్షును పొందుతాడు. అలాగే సంకల్ప సిద్ధి దైవానుగ్రహం కూడా కలుగుతాయి నలుగురిలో గౌరవ మర్యాదలు పొందుతారు. నిర్వహించుకునే ప్రతి కార్యక్రమంలోనూ మంచి ఫలితాలను పొందుతారు. జీవితంలో ఎన్ని ఇబ్బందులు వచ్చినా వాటిని ఎదుర్కుంటూ ముందుకు సాగిపోతారు అంతేకాదు మానవ జీవితంలో అవసరమయ్యే విషయాలు అన్నీ సమకూరుతాయి. శ్రీరామ అతులిత మధురం రామ నామము శ్రీమన్నారాయణ మంత్రములో రా జీవమును శివ పంచాక్షరి మంత్రములోని మ జీవాన్ని కలిపి రామ అనే నామముతో దశరథ సుతాగ్రజునికి నామకరణం చేసారు వశిష్ఠ మహర్షుల వారు. సృష్టిలోని తీయదనము దివ్యత్వము అంతా కలిపి ఆ దివ్యనామములోనే ఉందేమో రామా అన్న చాలు హరియించును సర్వ పాతకములు జన్మ జన్మలలోని దోషాలన్నీ హరించి పోతాయి. ఈ నామ సంకీర్తనము ద్వారా అందుకే మన కంచెర్ల గోపన్న గారు ఓ రామ నీ నామ మెంత రుచిరా అని పాడి రామదాసు అయిపోయారు. ఎందరో మహా భక్తులు రామ నమ మహితాత్మక శక్తి చేత ధన్యులయ్యారు. రాతిని నాతిని చేసిన పరమ పావనమీ దివ్య నామము కరకు బోయ తిరగేసి పలికితే కవిగా చేసిన నామమీ దివ్య నామమని మన ఆరుద్ర వారు చెబుతారు. *శ్రీరామ రామ రామేతి రమే రామే మనోరమే !* *సహస్ర నామ తత్తుల్యం రామనామ వరాననే |!* #తెలుసుకుందాం #sri rama #🚩జై శ్రీరామ 🕉️ #జై శ్రీరామ #జై శ్రీరామ

శ్రీ అన్నపూర్ణా దేవిని ధ్యానిస్తే మేధాశక్తి వృద్ధి చెందుతుంది. మధుర భాషణం, సమయస్ఫూర్తి, వాక్ సిద్ధి, శుద్ధి, భక్తిశ్రద్ధలు, ఐశ్వర్యం కలుగుతాయి. మానవుణ్ణి సకల సంపూర్ణుడిగా ఈ దేవి అనుగ్రహిస్తుంది. "సృష్టి" పోషకురాలు శ్రీ అన్నపూర్ణా దేవి. అమ్మ ధరించిన రసపాత్ర అక్షయ శుభాలను అందిస్తుంది. బుద్ధి, జ్ఞానాలను ఈ తల్లి వరంగా ఇస్తుంది. పరిపూర్ణ భక్తితో తనను కొలిచే భక్తుల పోషణాభారం ఈమె వహిస్తుందని ఆర్షవాక్యం. `ఓం సహనా వవతు సహనౌ భునక్తు సహవీర్యం కరవావహై తేజస్వినావధీతమస్తు మా విద్విషావహై,ఓం శాంతిశ్శాంతిశ్శాంతిః' ఇదే అన్న సూక్తం. . 💐అన్నపూర్ణాష్టకం💐 నిత్యానందకరీ వరాభయకరీ - సౌందర్యరత్నాకరీ నిర్ధూతాఖిలఘోరపాపనికరీ - ప్రత్యక్షమహేశ్వరీ ప్రాలేయాచలవంశపావనకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 1 నానారత్నవిచిత్రభూషణకరీ - హేమాంబరాడంబరీ ముక్తాహారవిడంబమానవిలస - ద్వక్షోజకుంభాంతరీ కాశ్మీరాగురువాసితాంగరుచిరా - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 2 యోగానందకరీ రిపుక్షయకరీ - ధర్మైకనిష్ఠాకరీ చంద్రార్కానలభాసమానలహరీ - త్రైలోక్యరక్షాకరీ సర్వైశ్వర్యకరీ తపఃఫలకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 3 కైలాసాచలకందరాలయకరీ - గౌరీ హ్యుమా శాంకరీ కౌమారీ నిగమార్థ గోచరకరీ - హ్యోంకారబీజాక్షరీ మోక్షద్వారకవాటపాటనకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 4 దృశ్యాదృశ్యవిభూతిపావనకరీ - బ్రహ్మాండభాండోదరీ లీలానాటకసూత్రఖేలనకరీ - విజ్ఞానదీపాంకురీ శ్రీవిశ్వేశమనఃప్రమోదనకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 5 ఆదిక్షాంతసమస్తవర్ణనికరీ - శంభుప్రియా శాంకరీ కాశ్మీరే త్రిపురేశ్వరీ త్రిణయనీ - విశ్వేశ్వరీ శ్రీధరీ స్వర్గద్వారకవాటపాటనకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 6 ఉర్వీ సర్వజయేశ్వరీ జయకరీ - మాతా కృపాసాగరీ నారీ నాలసమానకుంతలధరీ - నిత్యాన్నదానేశ్వరీ సాక్షాన్మోక్షకరీ సదా శుభకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 7 దేవీ సర్వవిచిత్రరత్నరచితా - దాక్షాయణీ సుందరీ వామా స్వాదుపయోధరప్రియకరీ - సౌభాగ్యమహేశ్వరీ భక్తాభీష్టకరీ సదా శుభకరీ - కాశీపురధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 8 చంద్రార్కానలకోటికోటిసదృశా - చంద్రాంశుబింబాధరీ చంద్రార్కాగ్నిసమానకుండలధరీ - చంద్రార్కవర్ణేశ్వరీ మాలాపుస్తకపాశసాంకుశధరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 9 క్షత్రత్రాణకరీ సదా శివకరీ - మాతా కృపాసాగరీ సాక్షా న్మోక్షకరీ సదా శివకరీ - విశ్వేశ్వర శ్రీధరీ దక్షాక్రందకరీ నిరామయకరీ - కాశీపురాధీశ్వరీ భిక్షాం దేహి కృపావలంబనకరీ - మాతాన్నపూర్ణేశ్వరీ| 10 అన్నపూర్ణే సదాపూర్ణే - శంకరప్రాణవల్లభే జ్ఞానవైరాగ్యసిద్ధ్యర్థం - భిక్షాం దేహీచ పార్వతి, మాతా చ పార్వతీ దేవీ - పితా దేవో మహేశ్వరః బాంధవ శ్శివభక్తాశ్చ - స్వదేశో భువనత్రయమ్‌| ఇతిః శ్రీ అన్నపూర్ణాష్టకం సంపూర్ణమ్‌ అన్నమధికమైన అరయ మృత్యువు నిజము అన్నమంటకున్న ఆత్మనొచ్చు చంప బెంప బువ్వ చాలదా వేయేల విశ్వధాభిరామ వినుర వేమా! అన్నాడు యోగి వేమన. అన్నానికున్న ప్రాధాన్యతని వేదాలు కూడా వక్కాణించాయి. అన్న సూక్తాన్ని పఠించడం కూడా అన్నం మీద మన భక్తి భావాన్ని నిలుపుకోవడమే. అందుకే ఆర్యులు `అన్నం పరబ్రహ్మ స్వరూపం' అన్నారు. అన్నమే జీవిని బతికిస్తుంది. అన్నమే పోషిస్తుంది. అన్నమే ఆరోగ్యాన్నిచ్చి కాపాడుతుంటుంది. అన్నమే మనుగడకి ఆలంబనగా ఉంటుంది. అన్నం పరబ్రహ్మ స్వరూపం. ఏ దానం ఇచ్చినా దానం తీసుకున్నవారిని మనం సంతృప్తిపరచలేకపోవచ్చు కాని అన్నదానం చేస్తే మాత్రం దానం తీసుకున్నవారిని పూర్తిగా సంతృప్తిపరచవచ్చు. అన్ని దానాల్లోకీ అన్నదానం గొప్పదని పెద్దల వాక్కు. పూర్వం అన్ని లోగిళ్ళలోను నిత్యం ఇంటిల్లిపాదికీ వండే టప్పుడు ఒక గుపెడు బియ్యం ఎక్కువ పొయ్యిమనేవారు. ఎందుకంటే, అతిధి, అభ్యాగతుల కోసం, అన్నార్తులెవరైనా వస్తే పెట్టాలనే ఉద్దేశ్యంతోను అలా చేసేవారు. 💐భోజన విధానం💐 1. అన్నాన్ని భుజించేటప్పుడు కూడా పద్దతి పాటించాలి. శుభ్రంగా అలికిన నేల మీద కంచంలోగానీ, అంతకన్నా శ్రేష్టమైన అరటి ఆకులో గానీ అన్నం, శాకాలు వడ్డించుకుని పీటలు వేసుకుని ఇంటిల్లిపాదీ కింద కూర్చుని భుజించడం చాలా ఉత్తమం. 2. భుజించే ముందు అందరూ అన్నానికి నమస్కరిస్తూ దానిని మనకి ప్రసాదించిన దేవుని దివ్యప్రసాదంగా భావించి, కళ్ళ కద్దుకుని తినడం ప్రారంభించాలి. 3. సోఫాల్లోను, కుర్చీలోను కూర్చుని భుజించడం నిషిద్ధం. వీలైతే అన్న సూక్తం పటించడం మరీ మంచిది. 4. అన్నం భుజించేటప్పుడు మనం అన్నం మీదే దృష్టి నిలిపి తింటే అది వంటపడుతుంది. 5. అన్నానికి ఉన్న మరో శక్తి ఏమిటంటే, అన్నం తినే సమయంలో మన భావాలు ఏవి ఉంటాయో, శారీరకంగా అందుకు తగిన ఫలితాలే తిన్న అన్నం వలన కలుగుతాయి. అందుకే టీవీలు చూస్తూ, కబుర్లు చెప్పుకుంటూ, చాడీలు మాట్లాడుకుంటూ తింటే నెగెటివ్ ఆలోచనలు వృద్ధిచెందుతాయి 6. భగద్భక్తితో, మనసులోకి ఎటువంటి ఆలోచనల్నీ రానీయకుండా, పద్దతిని పాటిస్తూ భుజిస్తే పాజిటివ్ ఆలోచనలు వృద్ధిచెందుతాయి. మనసు ప్రశాంతంగా ఉండి చేసే అన్ని పనులు విజయవంతంగా ముందుకు సాగుతాయి. 7. ఎవరైనా భోజనం చేసి వెళ్ళమని ఒకటికి రెండు సార్లు అడిగితే తిరస్కరించకూడదు. వండి వడ్డించిన వారిని లోపాలు ఎంచకూడదు. 8. ఇంట్లో పెద్దవారు, పిల్లలు ఉంటే, ముందుగా వారికి భోజనం పెట్టాలి. అందువల్ల ఆకలితో వేచివున్న వారి ఆత్మ శాంతిస్తుంది అన్నదానాన్ని ఒక యజ్ఞంలా భావించి చేసేవారిని కూడా చూడవచ్చు. అన్నదానం చేయలేకయినా అన్నం పెట్టే ఇంటినన్నా చూపించమని పెద్దలు చెప్తారు. దీనికి సంబంధించి ఒక కథనాన్ని కూడా చెప్తారు. మహాభారత యుద్ధంలో కర్ణుడు మరణించిన తరువాత స్వర్గానికి వెళ్ళాడు. అక్కడ కర్ణునికి అన్ని సౌకర్యాలు లభించాయి. స్వాగత సత్కారాలు లభించాయి. ఏది కావాలంటే అది పొందే అవకాశం ఉంది. అన్నీ అందుబాట్లో ఉన్నాయి. ఏంలాభం...! కర్ణుడికి ఏదో అసంతృప్తి. ఏదో వెలితి. ఎంత తిన్నా కడుపు నిండినట్టుండడంలేదు. సంతృప్తినేది లేదు. ఎందుకు ఈ విధంగా ఉంటుందో అతనికర్థం కావడంలేదు. ఇదే మాట దేవేంద్రుడిని అడిగాడు కర్ణుడు. అప్పుడు దేవేంద్రుడు చిరునవ్వుతో, నీవు అనేక దానాలు చేసావని, అడిగినవాడికి లేదనకుండా ఇచ్చే దానకర్ణుడివని చెప్తారు. మరి.. ఎప్పుడైనా అన్నదానం చేసావా?’’ అనడిగాడు. దానికి సమాధానంగా ' లేదు..నేనెన్నో దానాలు చేసాను గాని అన్నదానం మాత్రం చేయలేదు '. అన్నాడు కర్ణుడు. పోనీ అన్నం పెట్టే ఇల్లయినా చూపించావా? అనడిగాడు దేవేంద్రుడు. కాస్త ఆలోచించిన కర్ణుడు చెప్పాడు- అవును. ఓ బీద బ్రాహ్మణుడు నా దగ్గరకు వచ్చి అన్నం పెట్టించమని అడిగాడు. అపుడు నేను ఏదో ధ్యాసలో ఉండి, నాకు అవకాశం లేదు గానీ... అక్కడ ఆ ఇంటికి వెళ్ళు అని ఒక ఇంటిని చూపించాను. అని చెప్పాడు కర్ణుడు. నీవుఅన్నదానం చేసిన ఇంటిని చూపించిన వేలిను నోట్లో పెట్టుకో అన్నాడు ఇంద్రుడు. సరేనని ఆ వేలిని నోట్లో పెట్టుకున్నాడు కర్ణుడు. ఒక్క గుటక వేసాడు. ఆ క్షణంలోనే అతని కడుపు నిండిపోయింది. అంతవరకున్న అసంతృప్తి మటుమాయమైంది. ఎనలేని తృప్తి కలిగింది. ఈ కథనం ద్వారా అన్నదానం యొక్క మహత్మ్యం, దాని ప్రాశస్త్యం తెలుస్తోంది. నిత్య జీవితంలో మనం ఎదుర్కొనే అనేక ఇబ్బందులనుండి, ఇక్కట్ల నుండి బయటపడడానికి చక్కటి రెమిడీగా పనిచేస్తుంది అన్నదానం అని చెప్తారు పండితులు. 💐 అన్నదానం విశిష్టత ...💐 1. అన్నదానం వలన ఎన్ని సమస్యలున్నా పరిష్కారమవుతాయని చెప్తారు. అన్నదానం చేసేటప్పుడు దైవభక్తులకు తాంబూలంతో పాటు దక్షిణ ఉంచి దానం ఇస్తేఅద్భుతమైన ఫలితాలు పొందవచ్చని ప్రతీతి. 2. కొందరు ఆర్థికంగా చాలా ఇబ్బందులు పడుతుంటారు. ఎంత ప్రయత్నించినా సరైన రాబడి లేకపోవడం, దానికితోడు విపరీతమైన ఖర్చులతో సతమతమవడం జరుగుతుంది. అలాంటివారు అన్నంతో లడ్డు పెట్టి, తాంబూల సహితంగా దానం ఇస్తే అధిక ఆదాయం పొందడంతో పాటు శ్రీమంతులయే అవకాశం ఉందని శాస్త్రాలు చెప్తున్నాయి. 3. ఇక అనారోగ్యంతో బాధపడుతున్నవారు, దీర్ఘ రోగాలతో సతమతమవుతున్నవారు అన్ని రోగాలు తొలగి సంపూర్ణ ఆరోగ్యవంతులవుతారు. కొన్నిసార్లు ఇంటిపై మాంత్రిక దోషాలు కూడా కలుగుతుంటాయి. అటువంటప్పుడు చిత్రాన్నంతోపాటు వడ దానం చేస్తే గృహంపై జరిగే ఏ విధమైన మంత్ర, తంత్ర సంబంధమైన దోషాలైనా తొలగిపోతాయి. 4. బెల్లం అన్నం దానం చేస్తే శ్రీమంతులవుతారు. 5. భోజనం చేసేముందు మొదటి ముద్దను పరమేశ్వరార్పణం చేసి దానిని కాకులకో, ఇతర పక్షులతో ప్రాణులకో పెడతారు. ఇలా చేయడంవలన భగవంతునికి సమర్పించినట్లు అవుతుంది. ఇక అన్నం తినేముందు కొద్దిగా అన్నాన్ని కాకులకు వేయడం వలన శని దోషాలనుంచి బయటపడవచ్చని కూడా చెప్తారు.. ఇలా చిన్న చిన్న విషయాలు పాటిస్తుంటే మనకి, ఇంటిల్లిపాదికీ ఆయురా రోగ్యాలకి ఎటువంటిలోటూవుండదు. అందరి ఆలోచనలు సన్మార్గంలో నడుస్తాయి. తినే పదార్ధాలని వృధాచేయకుండా, సద్వినియోగం చేస్తూవుంటే ఆ అన్నపూర్ణమ్మ తల్లి నిత్యం మనింట్లో ధాన్యరాసుల్ని కురిపిస్తుంది. అలక్ష్యం చేస్తే భుక్తికోసం వెంపర్లాడక తప్పని పరిస్థితిని చవిచూడవలసి వస్తుంది. కనుక అన్నాన్ని గౌరవిద్దాం..నలుగురిని ఆదరిద్దాం...తృప్తిగా జీవిద్దాం.. భిక్షాం దేహి కృపావలంబనకరి మాతాన్నపూర్ణేశ్వరి. #తెలుసుకుందాం #🙏శ్రీ అన్నపూర్ణ దేవి🙏 #అన్నపూర్ణ దేవి

#తెలుసుకుందాం #హర హర మహాదేవ 🙏 #om Arunachala siva🙏 #🙏ఓం నమః శివాయ🙏ૐ

🕉️🌺 ధనాకర్షణ దక్షిణామూర్తి — లక్ష్మీదేవి & కుబేరుని అంతరార్థం 💰🪷 దక్షిణామూర్తి స్వామి అనగానే మనకు ముందుగా గుర్తుకు వచ్చేది జ్ఞానం. వటవృక్షం క్రింద మౌనంగా ఆసీనుడై, మాటలు లేకుండానే సనకాది మహర్షులకు పరమతత్త్వాన్ని బోధించిన ఆదిగురువు ఆయన. 🙏 అయితే ధనాకర్షణ దక్షిణామూర్తి ఆరాధనలో “ధనం” అనే పదానికి కేవలం బంగారం, డబ్బు అనే అర్థమే కాదు. జీవితాన్ని సుసంపన్నం చేసే ఐశ్వర్యం అనే విస్తృతమైన అర్థం కూడా ఉంది. 🌺 శ్రీమహాలక్ష్మీదేవి సంపద, సౌభాగ్యం, శుభం, సమృద్ధికి ప్రతీకగా ఆరాధించబడుతుంది. 💰 కుబేరుడు దేవతల ధనాధిపతిగా, సంపదకు రక్షకుడిగా పురాణ సంప్రదాయంలో ప్రసిద్ధుడు. 🕉️ దక్షిణామూర్తి ఆ సంపదను సరిగ్గా పొందడానికి, నిలుపుకోవడానికి, ఉపయోగించడానికి అవసరమైన జ్ఞానం మరియు వివేకానికి ప్రతీక. ఇక్కడే ఈ తత్త్వంలోని లోతైన సందేశం దాగి ఉంది. 🌿 లక్ష్మీ అనుగ్రహం సంపదను ప్రసాదిస్తే, కుబేర తత్త్వం దానిని సంరక్షించడాన్ని సూచిస్తుంది; దక్షిణామూర్తి జ్ఞానం ఆ సంపదను ధర్మమార్గంలో వినియోగించే బుద్ధిని ప్రసాదిస్తుందని భావించవచ్చు. 💎 సంపద ఉండి వివేకం లేకపోతే అది అహంకారానికి కారణం కావచ్చు. 💎 జ్ఞానం ఉండి జీవనోపాధి లేకపోతే జీవితం కష్టసాధ్యమవుతుంది. 💎 సంపద వచ్చినా దానిని కాపాడే నియమం లేకపోతే అది నిలవదు. అందుకే జ్ఞానం–లక్ష్మీ–కుబేర తత్త్వాలను పరస్పరపూరకంగా చూడవచ్చు. 🌳 దక్షిణామూర్తి వటవృక్షం క్రింద కూర్చోవడం కూడా ఒక గొప్ప సంకేతం. వృక్షం తనకు వచ్చినదాన్ని తనకే దాచుకోదు—నీడను ఇస్తుంది, ఫలాలను ఇస్తుంది, అనేక జీవులకు ఆధారమవుతుంది. అలాగే మనకు వచ్చిన సంపద కూడా మనకే కాకుండా కుటుంబానికి, అవసరంలో ఉన్నవారికి, ధర్మకార్యాలకు ఉపయోగపడినప్పుడే దాని విలువ పెరుగుతుంది. 🙏 🪷 లక్ష్మీదేవి మన ఇంటికి ఐశ్వర్యాన్ని తీసుకురావాలి. 💰 కుబేరుని అనుగ్రహం సంపదను సక్రమంగా నిర్వహించే స్థిరత్వాన్ని ఇవ్వాలి. 🕉️ దక్షిణామూర్తి కృప మనకు ఆ సంపదను ధర్మబద్ధంగా ఉపయోగించే జ్ఞానాన్ని ఇవ్వాలి. అప్పుడు “ధనాకర్షణ” అనేది కేవలం డబ్బును ఆకర్షించడం అనే భావనగా కాకుండా— “జ్ఞానాన్ని ఆకర్షించాలి… ధర్మాన్ని ఆకర్షించాలి… శుభసంకల్పాలను ఆకర్షించాలి… అవకాశాలను సద్వినియోగం చేసుకునే వివేకాన్ని ఆకర్షించాలి… అలాంటి జీవితంలో ఐశ్వర్యం స్వయంగా అర్థవంతమవుతుంది.” 🌺 🙏 శ్రీ ధనాకర్షణ దక్షిణామూర్తి స్వామినే నమః 🪷 శ్రీ మహాలక్ష్మీ దేవ్యై నమః 💰 శ్రీ కుబేరాయ నమః 🕉️ #తెలుసుకుందాం