🍃🍃🌼🍃🍃 નીડર સિદ્ધાંતવાદી સદ્. ઇશ્વરચરણદાસજી સ્વામીનું જીવન ભાગ :- 67 એક દિવસ સદ્ગુરુઓએ બાપાશ્રીને મળી, અમદાવાદ તથા મૂળીમાં જે થોડો થોડો વિક્ષેપ ચાલતો હતો તે સંબંધી વાત કરતા કહ્યું : “જો આમ ને આમ ચાલશે, તો આગળ જતાં કોઈ કોઈનો ભાર નહિ રહે. પણ અમને એમ થાય છે કે મૂર્તિને ભૂલીને એ માર્ગે ન ચાલવું. વળી મોટા મોટા સદ્ગુરુઓના સિદ્ધાંત જોતાં એમ પણ થાય છે કે મંદિરમાં કાંઈ બગાડ થતો હોય તો ન થવા દેવો, પોતાનું જાણી મમત્વ રાખવો. આમાં આપશ્રીને પૂછવાનું એટલું કે અમારે હવે શું કરવું? " બાપાશ્રી કહે : “ અમને પણ આ વિક્ષેપની માહિતી મળી છે. આ બધા વિક્ષેપ ‘હું અને મારું’ એ બે માંથી થાય છે, તમારે તો આગળની રીત પ્રમાણે ચાલવું ને મહારાજને સંભારવા. જો ‘શિક્ષાપત્રી' પ્રમાણે સૌ પોતપોતાના ધર્મ સાચવે તો કોઈને કોઈ દુઃખ ન થાય. તેમાંય આચાર્ય મહારાજ તો ધર્મ પળાવવામાં કારણરૂપ ગણાય, કેમકે શ્રીજીમહારાજે એમના ઉપર બધાયને ધર્મ પળાવવાનો ભાર મૂક્યો છે; એટલે આચાર્ય મહારાજશ્રી સાથે વાતચીત ચલાવી સમાધાન થાય તેમ કરવું. તમે સૌ ધીરજ રાખજો. મહારાજ બધુંય સારું કરશે.” ત્યાર બાદ મૂળી મંદિરના સંતો ઉપરાંત અમદાવાદ દેશના સદ્ગુરુ સ્વામી ધનશ્યામજીવનદાસજી, સ્વામી નારાયણ-સેવકદાસજી, સ્વામી વૃંદાવનદાસજી, સ્વામી ઈશ્વરચરણદાસજી, પુરાણી નંદકિશોરદાસજી સ્વામી વગેરે મોટા મોટા સંતો તથા મોટેરા હરિભક્તોએ મળી વિચાર કરતાં સૌને એમ લાગ્યું કે આચાર્ય મહારાજશ્રીને રૂબરૂ મળીને સમજૂતી સાધવા પ્રયત્નો ચાલુ રાખવા. તેમાં સૌનો મત એવો થયો કે મુક્તરાજ બાપા શ્રી હસ્તક આ વાતચીન થાય તો સારું. આથી સૌએ મળીને સદ્દગુરુ ઈશ્વરચરણદાસજી સ્વામીને આગ્રહ કર્યો કે તમો વૃષપુર જઈ બામાશ્રીને જન્માષ્ટમીના સમૈયે તેડી લાવો. સદ્ગુરુશ્રી ઈશ્વરચરણદાસજી સ્વામીને પણ એમ થયું કે બાપાશ્રી મૂળીએ પધારે ને આચાર્યશ્રી સાથે વાતચીત કરતાં જો સમાધાન થઈ જાય તો સત્સંગમાં સૌને સુખશાંતિ થાય. જો આ કલેશ નહિ મટે ને વિક્ષેપ લાંબો ચાલશે તો સત્સંગમાંથી કેટલાયનાં મન પાછાં પડી જશે, દ્રવ્યની હાનિ થશે ને કોઈને ભજન-સ્મરણ કે કથાવાર્તાનું સુખ નહિ આવે. એમ વિચારી પોતે થોડા સાધુઓ અને બાપાશ્રીના કૃપાપાત્ર સેવક આશાભાઈને લઈને વૃષપુર ગયા. બાપાશ્રીને વિનંતીપૂર્વક બધી વાત સમજાવી. ભુજના હજૂરી ઘેલાભાઈ, કોટવાળ ધનજીભાઈ વગેરે મોટા મોટા પચાસ હરિભક્તો સાથે બાપાશ્રી મૂળી પધાર્યા. ત્યાં સૌએ નક્કી કર્યું કે આચાર્ય- મહારાજશ્રી અહીં પધારે તો બાપાશ્રી તથા મોટા મોટા સંત-હરિભક્તોના સમૂહમાં વાતનો નિવેડો આવી જાય. આ પ્રમાણે ઘેલાભાઈ, ધનજીભાઈ આદિ હરિભક્તો અમદાવાદ ગયા, આચાર્ય મહારાજશ્રીને મળ્યા. તે બધા વ્યવહારકુશળ ને મહિમાવાળા હરિભક્તોએ ઘણાં વિનય વચનોથી સમજાવ્યા ને કહ્યું : “મહારાજ! એક વાર અમારું માનીને જુઓ તો ખરા! તમારા સાથે કોઈ ભિન્નભાવ નથી. અનાદિ મુક્તરાજ અબજીબાપાશ્રી પંચોતેર વર્ષની ઉંમરે કચ્છમાંથી મૂળી સુધી આપને મળવા સારુ આવ્યા છે, ને એમના કહેવાથી આપને તેડવા અમે આવ્યા છીએ, તો આપશ્રી મૂળીએ આ વખતે જરૂર પધારો એવી વિનંતી છે. ત્યાં સૌ આપશ્રીની વાટ જોઈ રહ્યા છે, તેથી પરસ્પર એકબીજામાં જે કાંઈ અસંતોષ જણાય છે તે મટી જશે. બાપાશ્રી મહાસમર્થ મુક્તરાજ છે અને તેમને આપના પરત્વે પૂરતી લાગણી છે. તમો પણ શ્રીજીમહારાજનું સ્વરૂપ કહેવાઓ, એટલે બંને પરસ્પર ભેળા થાઓ તો જે વાતની ગૂંચ નડતી હોય તે નીકળી જાય. જો આપને ત્યાં પધારવાની મરજી ન હોય તો એમને અહીં બોલાવીએ.” એવાં એવાં ઘણાં વિનય વચનો કહ્યાં, પણ એકેય વાતનો ખુલાસો ન કરતાં મહારાજશ્રી એટલું બોલ્યા “જે કાંઈ થાય છે તે ભગવાનની ઇચ્છાથી થતું હશે. તમારે સૌએ જવું હોય તો જજો, ને મારા સૌને જય શ્રી સ્વામિ-નારાયણ કહેશો.” આથી હરિભક્તો નિરાશ થઈ મૂળીએ પાછા આવ્યા. 🍃🍃🌼🍃🍃 #🦋😊 𝗝𝗮𝘆 𝘀𝘄𝗮𝗺𝗶𝗻𝗮𝗿𝗮𝘆𝗮𝗻 🤗 ##જય સ્વામિનારાયણ #✋ જય સ્વામીનારાયણ #અનાદિમુક્તરાજ શ્રી અબજીબાપા #🙏 સ્વામિનારાયણ મંદિર