#📙 നോവൽ #📔 കഥ #💞 പ്രണയകഥകൾ MY DOCTOR❤️ 20   കാർ നിർത്തി ദേഷ്യത്തിൽ പുറത്തേക്കിറങ്ങി. ബംഗ്ലാവ് പോലുള്ള വീട്ടിലേക്കവൾ ഓടി കയറി . കയ്യിലുള്ള ഹാൻഡ് ബാഗ് ആ വലിയ ഹാളിന്റെ ഒത്തനടുവിലേക്ക് ഒറ്റ ഏറ് . ഹാളിൽ സംസാരിച്ചിരിക്കുകയായിരുന്ന മാർട്ടിനും ക്ലാരയും ഞെട്ടി സോഫയിൽ നിന്നും എണീറ്റു. മെർലിൻ ഹാളിലേക്ക് കടന്ന് സോഫയിൽ തളർന്നിരുന്നു.  " എന്ത് പറ്റി കുഞ്ഞാവേ ......" മെർലിനടുത്തേക്ക് വന്നിരുന്ന് മാർട്ടിൻ ആശങ്കപ്പെട്ടു . ക്ലാരയും വേവലാതിയോടെ ഓടി വന്നു. " ചേട്ടായീ......................" കരഞ്ഞു കൊണ്ടവൾ മാർട്ടിന്റെ നെഞ്ചിലേക്ക് വീണു. മാർട്ടിന്റെ ഹൃദയം വേദനിച്ചു, ഓർമ്മവച്ച കാലം മുതൽ തന്റെ കുഞ്ഞു പെങ്ങളെ കരയാൻ ഇടവരാതെ കൊണ്ട് നടന്ന സഹോദരനാണവൻ . അവളാണീ നെഞ്ചിൽ വീണു അലച്ചു കരയുന്നത് . " പറ കുഞ്ഞാവേ എന്ത് പറ്റി ...."  " ചേട്ടായി , എനിക്ക് ഏഥനെ വേണം ......  ഏഥൻ എന്റേതാണ്...." അവൾ ആർത്തു കരഞ്ഞു. " അതിനാണോ എന്റെ കുഞ്ഞു ഇങ്ങനെ കിടന്നു കരയുന്നെ .... ഞാൻ ആദ്യമേ പറഞ്ഞതല്ലേ അവന്റെ വീട്ടിൽ നേരിട്ട് പോയി ചോദിക്കാമെന്ന് . നാളെ തന്നെ ഞാൻ പൊക്കോളാം ..  നീ ഒന്ന് സമാധാനപെട് ." അവളുടെ തലയിൽ തഴുകി മാർട്ടിൻ പറഞ്ഞു. അവൾ ആഗ്രഹിച്ചതെന്തും നേടി കൊടുക്കാൻ മാർട്ടിനൊരു മടിയുമില്ല. അപ്പനും അമ്മയും നഷ്ടപ്പെട്ടതിൽ പിന്നെ അവളെ വളർത്തിയത് മാർട്ടിൻ ആണ് . 18 വയസിലാണ് മാർട്ടിന്റെ അമ്മച്ചി മെർലിനെ പ്രസവിക്കുന്നത്. അവൾക്ക് അവൻ ഒരു ഏട്ടൻ മാത്രമായിരുന്നില്ല അപ്പൻ കൂടെ ആയിരുന്നു. അവളെ ഈ 28 വർഷം താഴത്തും തലയിലും വെക്കാതെയാണ് മാർട്ടിൻ കൊണ്ട് നടക്കുന്നത്. "അതല്ല ചേട്ടായി.... ഒരുത്തി എഥനെ മയക്കി വച്ചിരിക്കുകയാണ്. അവൾ കാരണം ഏഥൻ ഇന്നെന്നെ അടിക്കാൻ വരെ കയ്യോങ്ങി . "  അവൾ പറഞ്ഞത് കേട്ട് ക്ലാരയും മാർട്ടിനും ഞെട്ടി മുഖത്തോട് മുഖം നോക്കി. മാർട്ടിന്റെ കണ്ണുകളിലെ ദേഷ്യം ക്ലാര വ്യക്തമായി കണ്ടു. " എനെറെ കൊച്ചിനെ നോവിച്ചാൽ അവനേം അവളേം ഞാൻ വെറുതെ വിടാൻ പോകുന്നില്ല...." കോപത്തോടെ മാർട്ടിൻ പറഞ്ഞു. അവന്റെ കോപം കണ്ടതും മെർലിൻ ഉള്ളാലെ ചിരിച്ചു. അവൾക്കറിയാം ആരെ കൊന്നിട്ടായാലും അവളുടെ ചേട്ടായി അവൾ ആഗ്രഹിച്ചതെന്തും നേടി കൊടുക്കുമെന്ന്. അവൾ കരച്ചിൽ നിർത്തി മാർട്ടിന്റെ നെഞ്ചിൽ നിന്ന് തലയുയർത്തി. കണ്ണുകൾ കൈ കൊണ്ട് അമർത്തി തുടച്ചു. " എഥനെ എനിക്ക് വേണം ചേട്ടായി... എന്നെ വേദനിപ്പിച്ചതിനുള്ള ശിക്ഷ ഞാൻ തന്നെ അവനു കൊടുത്തോളം , പക്ഷെ അവൾ ഇനി ഏഥനെ തേടി വരാൻ പോലും ഭയക്കണം.... ആ ഒരുമ്പെട്ടോൾ എന്റെതിനെ സ്വന്തമാക്കാൻ ആഗ്രഹിച്ചത് പോലും തെറ്റാണെന്നു കാണിച്ചു കൊടുക്കണം. " പകയോടെ മെർലിൻ പറഞ്ഞു.   മാർട്ടിൻ ഒരാലോചനയോടെ ഇരുന്നു. " അവൾ എവിടെ ഉള്ളതാ .... പറ . ബാക്കി ഞാൻ നോക്കിക്കോളാം ."  മെർലിൻ അഞ്ജുവിനെ കുറിച്ചവൾക്കറിയുന്നത് പറഞ്ഞു. കുറച്ചു നേരം കൂടെ സംസാരിച്ചിരുന്നിട്ട് മാർട്ടിൻ പുറത്തേക്കു പോയി. അവനെന്തെങ്കിലും തീരുമാനിച്ചിട്ടുണ്ടാകുമെന്ന് മെർലിനറിയാമായിരുന്നു. അവൾ ഗൂഢമായൊന്നു ചിരിച്ചു. ക്ലാര അവൾക്കടുത്തേക്കിരുന്നു. മെർലിനെ  സൂക്ഷിച്ചു നോക്കി. " നാടകം നിർത്തി ഇനി സത്യം പറ എന്താ സംഭവം."  ക്ലാര പറയുന്നത് കേട്ട് മെർലിൻ നീട്ടി ചിരിച്ചു. ക്ലാരക്ക് അവളെ അറിയുന്ന പോലെ മറ്റാർക്കും അവളെ അറിയില്ലല്ലോ. ക്ലാര മാർട്ടിനെ കല്യാണം കഴിച്ചു വരുമ്പോൾ മെര്ലിന് പ്രായം 9 ആണ്. അന്ന് മുതൽ 19 കൊല്ലം ഒരു ചേച്ചിയായും അമ്മയായും കൂട്ടുകാരിയായും ക്ലാര അവൾക്കൊപ്പം ഉണ്ടായിരുന്നു. മെർലിൻ നടന്നത് മുഴുവൻ ഒറ്റ ശ്വാസത്തിൽ വിവരിച്ചു. ക്ലാര അന്തം വിട്ടിരുന്നു.  " ഇതിന്റെ കാരണം നീയാണ് കുഞ്ഞാവേ...." എല്ലാം കേട്ട് ക്ലാര പറഞ്ഞു. മെർലിൻ അവൾ പറഞ്ഞതു കേട്ട് സംശയത്തോടെ പുരികം ചുളിച്ചു. " കേട്ടിടത്തോളം ഏഥൻ ഒരു നിരാശ കാമുകനാണെന്നു തോനുന്നു. അപ്പോൾ അയാൾക്ക് അതിന്റെതായ ഫീലിങ്ങ്സ് ഒക്കെ കാണും. അവൾ ബുദ്ധി മതി ആണ് .  ആണിന്റെ വീക്നെസ് എന്താണെന്നു അവൾക്കു നന്നായറിയാം. അതിൽ കേറി പിടിച്ചു അവളങ്ങു കേറി കൊളുത്തി. നീ ആണെങ്കിലോ അവന്റെ പിന്നാലെ ഇഷ്ട്ടമെന്നും പറഞ്ഞു വെറുതെ നടപ്പാണ് ."  " ഞാൻ പിന്നെ എന്തോ വേണമെന്നാ ചേട്ടത്തി പറഞ്ഞു വരുന്നേ..." ആശയ കുഴപ്പത്തോടെ മെർലിൻ ചോദിച്ചു. " അവളുടെ കാര്യം നിന്റെ ചേട്ടായി നോക്കിക്കോളും. പിന്നെ അവന്റെ കാര്യം, നീ  ഒരു ഡോക്ടർ അല്ലെ അവനു വേണ്ടതെന്താണെന്നു ഞാൻ പറഞ്ഞു തരണ്ടല്ലോ... വേണ്ടത് വേണ്ടതുപോലെ കൊടുക്കാൻ നോക്ക്. പിന്നെ നീ വരച്ച വരയിൽ നിന്നും അവൻ ചലിക്കില്ല.."   മെർലിൻ ആലോചനയോടെ ഇരുന്നു. പിന്നവളുടെ ചുണ്ടിൽ ഗൂഢമായൊരു പുഞ്ചിരി വിരിഞ്ഞു.  " നിന്നെ ഞാൻ എന്റെ അടിമയാക്കും ഏഥൻ.... എല്ലാവരുടെയും മുന്നിൽ ഞാൻ അപമാനിക്കപെട്ടതിനു ഞാൻനിന്റെ സ്നേഹം തട്ടിയെടുത്തു കൊണ്ട് പ്രതികാരം വീട്ടിയിരിക്കും .....ഒരുത്തിക്കും വിട്ടു കൊടുക്കില്ല ഞാൻ." മെർലിൻ സ്വയം പറഞ്ഞു. ക്ലാര അവൾ പറയുന്നത് കേട്ട് പുഞ്ചിരിച്ചു. ********************** ഏഥൻ അഞ്ജുവിനെ ഹോസ്റ്റലിലാക്കി നേരെ പോയത് നവീന്റെ വീട്ടിലേക്ക് ആയിരുന്നു . പാർക്കിങ്ങിലുള്ള നവീന്റെ കാറിനടുത്തായി കാർ പാർക്ക് ചെയ്തവൻ കാളിങ് ബെൽ അമർത്തി. വാതിൽ തുറന്നു  ലൂസ് ഫുൾ സ്ലീവ് കുർത്തിയും പലാസോ പാന്റും ധരിച്ചൊരു സ്ത്രീ ഇറങ്ങി വന്നു. " ആരാ ഇത്? ഏഥൻ തമ്പുരാനോ .... അടിയന്റെ വീട്ടിലേക്കുള്ള വഴിയൊക്കെ അങ്ങേക്ക് ഓർമയുണ്ടായിരുന്നോ ? " അവനു മുന്നിൽ കൈ കൂപ്പി തല കുനിച്ചു നാടകീയമായവൾ പറഞ്ഞു. ഏഥൻ ഓടി ചെന്നവളുടെ കഴുത്തിലൂടെ കൈ ഇട്ടു പിടിച്ചു. " മറന്നു പോയിരുന്നെടി നീലി ....  പിന്നെ വഴിയിലുള്ളവരോടൊക്കെ ചോദിച്ചു ചോദിച്ചു വന്നതാണ് ഞാൻ " കഴുത്തിൽ ഇട്ട കൈ മുറുകി കൊണ്ടവൻ പറഞ്ഞു. " ആ...... വിടെടാ വേദനിക്കുന്നു.... " അവന്റെ കയ്യിൽ അടിച്ചു കൊണ്ടവൾ കുതറി . ഏഥൻ ചിരിയോടെ അവളെ മോചിപ്പിച്ചു. " തെണ്ടി... ഇപ്പൊ കൊന്നേനെ " അവളവനെ നോക്കി കണ്ണുരുട്ടി. " പോടി നീലി പെണ്ണെ ...." ഏഥൻ പുച്ഛിച്ചു  " നീലി നിന്റെ പെണ്ണുമ്പുള്ള , എന്റെ പേര് നീലിമ എന്നാണ് ;" അവന്റെ വയറിൽ അമർത്തി ഇടിച്ചു നീലിമ പറഞ്ഞു. ഏഥൻ വയർ അമർത്തി അവളെ നോക്കി പല്ലു കടിച്ചു. രണ്ടു പേരും ഉള്ളിലേക്ക് കടന്നു.  " നവീൻ എവിടെടി? " വീടിനകം മുഴുവൻ നോക്കി ഏഥൻ ചോദിച്ചു. " നവീനും മോളും കൂടെ പുറകിലുള്ള അടുക്കള തോട്ടത്തിലുണ്ട് ..... ഹോസ്പിറ്റലിൽ നിന്നും വന്നയുടനെ ഡ്രസ്സ് മാറി അങ്ങോട്ട് പോയതാണ്..."  ഏഥൻ ഹാളിലുള്ള സോഫയിലേക്ക് കയറി ഇരുന്നു.  " നീ എപ്പോൾ എത്തി ? "  " ധാ വന്നു കേറിയൊള്ളു..... നിന്നെപ്പോലെ പ്രൈവറ് ഡോക്ടർ അല്ലല്ലോ ഞാൻ .... കഴിവുള്ളത് കൊണ്ട് ഗവൺമെന്റിൽ കയറി. നിന്നെപോലൊന്നും തോന്നിയ നേരത്തല്ല ഞാൻ കേറി വരുന്നത്. എനിക്ക് എല്ലാം കറക്റ്റ് ടൈം ആണ്." ഡ്രെസ്സിന്റെ ഷോൾഡർ പൊക്കി അഭിമാനത്തോടെ നീലിമ പറഞ്ഞു. അവളുടെ പ്രഹസനം കണ്ടു ഏഥൻ ആവോളം പുച്ഛം വാരി എറിഞ്ഞു. " ആരാ നീലു അവിടെ....." മോളുടെ കയ്യും പിടിച്ചു നവീൻ അകത്തു നിന്ന് വന്നു. മുണ്ടും ടീഷർട്ടും ആണ് വേഷം. കയ്യും കാലും മുഖവും കഴുകിയതിന്റെ നനവ് കാണാം ശരീരത്തിൽ . " സാക്ഷാൽ ഏഥൻ മില്ലർ.... ഇംഗ്ലണ്ട് മഹാരാജാവ് ..." നീലിമ ചിരിയോടെ പറഞ്ഞു. നവീൻ ചിരിയോടെ അവർക്കടുത്തേക്കു വന്നു. നീലിമയും നവീനും ഏഥനും മെഡിക്കൽ കോളേജിൽ ഒരുമിച്ചു പഠിച്ചതാണ് .നീലിമ oncologist ആണ്. നവീൻ കഴിഞ്ഞാൽ പിന്നെ ഏഥൻറെ ഏറ്റവും അടുത്ത സൗഹൃദമാണ് നീലിമ. അവനു ആകെയുള്ള പെൺ സൗഹൃദവും അവളാണ്. പഠന കാലം തൊട്ടുള്ള പ്രണയമായിരുന്നു ഇരുവർക്കിടയിലും. കല്യാണം കഴിഞ്ഞു 3 വർഷം കുഞ്ഞുങ്ങളില്ലാതിരുന്നവർക്ക് ഏഥൻറെ ചികിത്സയിലാണ് ഒരു മോളെ കിട്ടിയത്. സൗഹൃദത്തിനൊപ്പം ആ ഒരു കടപ്പാട് കൂടെ അവർക്കു എഥനോടുണ്ട് . പക്ഷെ വയസിത്ര ആയിട്ടും തമ്മിൽ കണ്ടാൽ കീരിയും പാമ്പുമാണ് നീലിമയും ഏഥനും ...... അവരുടെ കളിചിരികൾ നവീനെ ഒരുപാടു സന്തോഷിപ്പിക്കാറുണ്ട് .  ഏഥൻ അത്രത്തോളം സന്തോഷത്തോടെ ഇരിക്കാറുള്ള ചുരുക്കം ഇടങ്ങളിലൊന്നാണ് ഇത്. ഏഥൻ എണീറ്റ് പോയി മോളെ വാരിയെടുത്തു. നവീന്റെ നാലുവയസുകാരി നവമി. പോക്കറ്റിൽ നിന്നൊരു ചോക്ലേറ്റ് എടുത്ത് മോൾക്ക് കൊടുത്തു.  " താങ്ക്സ് അങ്കിൾ ...." കുഞ്ഞി പല്ലു കാണിച്ചു സന്തോഷത്തോടെ ചിരിച്ചു കൊണ്ട് നവമി പറഞ്ഞു. " അപ്പടി അഴുക്കാണ് അവളുടെ ദേഹത്തു ..... " നീലിമ പറഞ്ഞു. " അത് സാരമില്ല അല്ലെടി കാന്താരി.... " മോൾക്ക് ചോക്ലേറ്റ് പൊളിച്ചു കൊടുത്തു കൊണ്ട് ഏഥൻ പറഞ്ഞു. നീലിമ മോളെ കുളിപ്പിക്കാനായി ജോലിക്കാരിയെ വിളിച്ചു.അവർക്കുള്ള ചായയും പലഹാരങ്ങളും ടീടേബിളിൽ കൊണ്ട് വച്ച് അവർ ഏഥൻറെ കയ്യിൽ നിന്ന് മോളെ കുളിപ്പിക്കാനായി കൊണ്ട് പോയി. മൂവരും സോഫയിലേക്കിരുന്നു. " എനിക്കൊരു കാര്യം പറയാൻ ഉണ്ടായിരുന്നു."  അൽപ്പം ജാള്യതയോടെ ഏഥൻ പറഞ്ഞു. നവീൻ പൊട്ടി വന്ന ചിരി കടിച്ചു പിടിച്ചു.... ടേബിളിൽ നിന്നൊരു ചായ എടുത്തു കുടിച്ചു. " എന്താടാ ? " നീലിമ അവനൊരു ചായ നീട്ടി ചോദിച്ചു. അവൾ നീട്ടിയ ചായ വാങ്ങി കൊണ്ട് എങ്ങനെ പറഞ്ഞു തുടങ്ങണമെന്നറിയാതെ ഏഥൻ കുഴങ്ങി. ഏഥൻ നിസ്സഹായതയോടെ നവീനെ നോക്കി.  " നീലു.... ചിലരൊക്കെ ഇപ്പൊ ഹോസ്പിറ്റലിലേക്ക് വരുന്നതെന്തിനാണെന്നോ ? കിസ്സടിക്കാൻ ....." പൊട്ടിചിരിയോടെ ഏഥനെ ടാർഗറ്റ് ചെയ്തു നവീൻ പറഞ്ഞു. കുടിച്ചു കൊണ്ടിരുന്ന ചായ നെറുകയിൽ പോയി നീലിമ ചുമച്ചു. ഏഥൻ വേഗം അവളുടെ തലയിൽ തട്ടി കൊടുത്തു. വെള്ളമെടുത്തു അവൾക്കു നേരെ നീട്ടി . വെള്ളം വാങ്ങി കുടിച്ചവൾ എഥനെ അവിശ്വാസത്തോടെ നോക്കി. " ആരെ ആര് എപ്പോ എവിടുന്നു കിസ്സടിച്ചെന്ന് " വിശ്വാസം വരാത്ത പോലെ നീലിമ ഉറക്കെ ചോദിച്ചു. ഏഥൻ നാണക്കേടോടെ മുഖം താഴ്ത്തി .അവന്റെ ഭാവം അക്ഷരാത്ഥത്തിൽ നീലിമയെ ഞെട്ടിച്ചു. അവളുടെ അറിവിൽ അങ്ങനൊരു ഏഥൻ ഇല്ല .  അവൻ ഒന്നും പറയുന്നില്ലെന്ന് കണ്ടതും നീലിമ നവീന് നേരെ തിരിഞ്ഞു. " ആരാ എന്താ എന്നൊക്കെ ഈ ഇരിക്കുന്നവനോട് ചോദിക്ക്. ഞാൻ കണ്ടത് ഞാൻ പറഞ്ഞു തരാം..."  നവീൻ അവൻ കണ്ടതത്രയും നീലിമയോട് പറഞ്ഞു. നീലിമ വാ പൊളിച്ചു എല്ലാം കേട്ടിരുന്നു.  ഏഥൻ ഇടം കണ്ണിട്ടവളെ നോക്കി. ആ നേരം അവളിൽ അവനെ കളിയാക്കിയോരു ചിരി ആയിരുന്നു. തുടരും........... അഭിപ്രായങ്ങൾ വേഗം പോരട്ടെ.... എന്നാൽ രാത്രി ആവുമ്പോഴേക്കും ഒരു പാർട്ട്‌ കൂടെ തരാം 😌