Part 51 ലതയുടെ പറച്ചിൽ കേട്ട് എല്ലാവരും വാതിക്കലേക്ക് നോക്കി ഇരിക്കുവാണ്. ചായ വെച്ച ട്രേയുമായി താൻ വേടിച്ച് കൊടുത്ത ഹാഫ് സാരിയും ഉടുത്ത് സൂക്ഷിച്ച് വരുന്നവളെ കണ്ടതും ശ്രീയുടെ ഉള്ളം തുടിച്ച് പോയി. " ഹാ മോളെ ആദ്യം അവന് തന്നെ കൊടുക്ക് " : ചായ എവിടുന്ന് കൊടുത്ത് തുടങ്ങും എന്ന് അറിയാതെ നട്ടം തിരിഞ്ഞ് നിന്നവൾ കണ്ടതും വേണു പറഞ്ഞു. അത് കേട്ടതും ഒരു നാണത്തോടെ അവൾ ശ്രീയുടെ അടുത്തേക്ക് നടന്നു. തനിക്ക് നേരെ ട്രെയും പിടിച്ച് നിൽക്കുന്നവളെ കണ്ടതും അവൾക്കായി കണ്ണ് ചിമ്മി കൊണ്ട് ചായ എടുത്തു. അതും കൂടി കണ്ടതും അവളുടെ നാണം കൂടി വന്നു. പിന്നെ അടുത്തിരിക്കുന്നവർക്കും ഒരു പുഞ്ചിരിയോടെ ചായ കൊടുത്ത് ട്രേയുമായി മാറി നിന്നു. അപ്പോഴേക്കും സരസ്വതി ബാക്കി എല്ലാവർക്കും ചായയും കൊടുത്ത് അടുക്കളയിൽ പോയി ജ്യൂസും പലഹാരങ്ങളും ഒക്കെ എടുത്തിട്ട് വന്നിരുന്നു. സരസ്വതി വന്നതും ലെച്ചു അവരെ പറ്റി ചേർന്ന് നിന്നു. എങ്കിലും കണ്ണ് തന്നെ നോക്കി ചായ കുടിക്കുന്നവനിൽ ആയിരുന്നു. ലെച്ചുവിനെ വന്നവർക്ക് എല്ലാം ഇഷ്ടമായി. ഇരുനിറമാണെങ്കിലും അവളെ കാണാൻ ഭംഗി ഉണ്ടായിരുന്നു. ഇന്നത്തെ ഒരുക്കം കൂടി ആയപ്പോൾ ആ ഭംഗി ഒന്നും കൂടി കൂടിയ പോലെ. " ഞങ്ങളെ ഒക്കെ അറിയോ മോൾക്ക്...? " : മീര തന്നെ സംസാരത്തിന് തുടക്കം കുറിച്ചു. അതിനൊരു ചിരിയോടെ തലയാട്ടുക മാത്രമേ അവൾ ചെയ്തുള്ളു. " ചേച്ചിക്ക് എന്നെ അറിയോ...? എന്നെ കുറിച്ച് എന്തെങ്കിലും പറഞ്ഞ് തന്നിട്ടുണ്ടോ ഈ ചേട്ടൻ....? " : ഒരു ആകാംഷയോടെ അനു തിരക്കി. അതിനും ലെച്ചു പറഞ്ഞിട്ടുണ്ടെന്ന പോലെ തലയാട്ടി. " എന്താ പറഞ്ഞെ....? എന്നെ കുറിച്ചുള്ള കുറ്റങ്ങൾ ആയിരിക്കും അല്ലെ കൂടുതൽ എനിക്ക് അറിയാം " : ശ്രീയോട് കെറുവ് നിറച്ച് കൊണ്ട് അനു പറഞ്ഞു. അതിന് ശ്രീയുടെ കയ്യിൽ നിന്ന് തലക്കൊരു മേട്ടവും അവൾക്ക് കിട്ടി. അത് കണ്ട് എല്ലാരും ചിരിച്ചു. ലെച്ചുവിന് അത് കണ്ട് ചിരിയൊന്നും തോന്നിയില്ലെങ്കിലും പുറമേക്ക് ചിരിച്ച് നിന്നു അവൾ. " രണ്ട് കുടുംബത്തിലെയും ആകെ പെണ്ണ് തരി അല്ലെ അപ്പൊ ഇവളെ അതുപോലെ ലാളിച്ച വളർത്തിയെ അതിന്റേതായ എല്ലാ കുറുമ്പും കുസൃതിയും ഇവൾക്കുണ്ട്. ഇവളെ ഏറ്റവും കൂടുതൽ ലാളിച്ച് വെച്ചിരിക്കുന്നത് ശ്രീതന്നെയാ " : മക്കളെ രണ്ട് പേരെയും വാത്സല്യത്തോടെ നോക്കി കൊണ്ട് വേണു പറഞ്ഞു. അത് കേട്ടതും ലെച്ചുവിന്റെ ഉള്ളിൽ അനുവിനോടുള്ള അനിഷ്ടം കൂടി. അല്ലെങ്കിലും ശ്രീ അമ്മയോടും അനുവിനോടും കാണിക്കുന്ന സ്നേഹം ലെച്ചുവിന് ഇഷ്ടമല്ല ഇപ്പൊ ഇതും കൂടി കേട്ടതും എന്ത് ചെയ്തിട്ട് ആണെങ്കിലും അവർക്ക് കിട്ടുന്ന സ്നേഹവും പരിഗണനനയും തനിക്ക് മാത്രം കിട്ടണം എന്ന ദുരുദ്ദേശം നിറഞ്ഞു അവളിൽ. ' ഈ കല്യാണം ഒന്ന് കഴിഞ്ഞോട്ടെ അടുപ്പിക്കില്ല രണ്ടിനെയും '  പുറമെ ചിരിച്ച് കൊണ്ടവൾ ഉള്ളിൽ നൊടിഞ്ഞു. " മോൾക്ക് അമ്മേയെ അറിയോ....? " : ലെച്ചുവിന്റെ കൈ പിടിച്ച് കൊണ്ട് അനില തിരക്കി. അപ്പോഴാണ് തന്റെ അടുത്ത് വന്ന ശ്രീയുടെ അമ്മയെ ലെച്ചു ശ്രദ്ധിച്ചത്. ഓരോന്ന് ചിന്തിച്ച് നിന്നത് കൊണ്ട് അനില അവിടെ നിന്ന് എണീറ്റതോ തന്റെ അടുത്ത് വന്നതോ ഒന്നും അവൾ അറിഞ്ഞിരുന്നില്ല. അനിലയുsrടെ ചോദ്യത്തിന് ശ്രീയെ ഒന്ന് അനിലയെ നോക്കി ചിരിയോടെ തലയാട്ടി. " അമ്മയ്ക്കും മോളെ അറിയാം. ശ്രീ മോൾടെ ഫോട്ടോ ഒക്കെ കാണിച്ച് തന്നിട്ടുണ്ട്. അന്ന് മുതൽ മോളെ വന്ന് നേരിട്ട് കാണണം എന്ന ആഗ്രഹം ഉള്ളിൽ കൊണ്ട് നടക്കുവാ ഞാൻ. പക്ഷെ എല്ലാത്തിനും അതിന്റേതായ ഓരോ രീതികൾ ഇല്ലേ, അതാ അമ്മ മോളെ കാണാൻ വരാഞ്ഞേ. അവന്റെ ഇഷ്ടം തന്നെയാ ഞങ്ങൾക്കും അതാ അവനൊരു ആഗ്രഹം പറഞ്ഞപ്പോൾ പിന്നെ ഒന്നും നോക്കാതെ ഞങ്ങൾ എല്ലാം ഇങ് വന്നേ " : ലെച്ചുവിനെ ചേർത്ത് പിടിച്ച് കൊണ്ട് അനില പറഞ്ഞു. " മോൾ വാ അമ്മ ചോദിക്കട്ടെ " : അതും പറഞ്ഞ് അനില ലെച്ചുവിനെയും കൊണ്ട് ഡൈനിംഗ് ഹാളിലേക്ക് നടന്നു. അവർക്ക് പിന്നാലെ ബാക്കി ഉള്ള സ്ത്രീ ജനങ്ങളും വെച്ച് പിടിച്ചു. ആണുങ്ങൾ ഒക്കെ ഹാളിൽ ഇരുന്ന് രാഷ്ട്രീയവും അന്തരാഷ്ട്രവും ഒക്കെ എത്തി നിന്നു. എങ്കിലും ശ്രീയുടെ കണ്ണ് ഇടക്ക് ഇടക്ക് അവന്റെ പ്രിയപ്പെട്ടവളെ തേടുന്നുണ്ടായിരുന്നു. ഇപ്പുറം സ്ത്രീജനങ്ങൾ ആണെങ്കിൽ കുടുമ്പജീവിതവും കൊച്ച് കൊച്ച് പരദൂഷണങ്ങളിലും ഏർപ്പെട്ടു. സമയം മുന്നോട്ട് പോയതും ഉച്ചക്കുള്ള ഭക്ഷണവും കഴിച്ച് വീണ്ടും എല്ലാവരും ഹാളിൽ ഒത്തു കൂടി. ഉച്ചക്ക് എല്ലാർക്കും കൂടി ഇരിക്കാൻ സൗകര്യം ഇല്ലാത്തത് കൊണ്ട് ഒരു ട്രിപ്പ്‌ ആയിട്ട് ആണ് ഇരുന്നത്. കുട്ടികൾ എല്ലാം ബിരിയാണിക്ക് പിറകെ പോയപ്പോൾ മുതിർന്നവർ സന്ധ്യ കഴിച്ചു. ഈ കുറഞ്ഞ നിമിഷം കൊണ്ട് തന്നെ ഇരു വീട്ടുകാരും നല്ലത് പോലെ തന്നെ അടുത്തിരുന്നു. അനു ഏട്ടത്തി എന്നും വിളിച്ച് കൊണ്ട് അവൾക്ക് പിന്നാലെ തന്നെ കൂടിയിട്ടുണ്ട് ഒപ്പം തന്നെ മാധവും, അവൻ ഇപ്പോൾ പ്ലസ് വൺ ആണ്. അതൊക്കെ ലെച്ചുവിൽ ഈർഷ്യം നിറക്കുന്നുണ്ട് എങ്കിലും കടിച്ച് പിടിച്ചിരുന്നു അവൾ. സതീഷനും സരസ്വതിയും ലതയും ഒക്കെ വളരെ മാന്യമായി തന്നെ അവരോട് പെരുമാറി. അതിനാൽ തന്നെ ഇടക്ക് മങ്ങി പോയ പാർവതിയുടെ മുഖം വീണ്ടും തെളിച്ചം വെച്ചു. എങ്കിലും ഇടക്കുള്ള ലെച്ചുവിന്റെ വിനയം ഒന്നും അവർക്ക് അത്ര പിടിക്കുന്നുണ്ടായിരുന്നില്ല. " എന്താ ഇനി മോൾടെ പ്ലാൻ. ഡിഗ്രി കഴിഞ്ഞില്ലേ, ജോലിക്ക് പോണം എന്നാണോ അത് തുടർന്ന് പഠിക്കണം എന്ന് വല്ലതും ഉണ്ടോ. എന്താണെങ്കിലും പറയണം കേട്ടോ മോളെ ഞങ്ങൾ അങ്ങനെ പഠനത്തിന്റെ കാര്യത്തിൽ ഒന്നും എതിർപ്പ് കാണിക്കുന്ന കൂട്ടത്തിൽ അല്ല. മോൾക്ക് എത്ര വേണം എങ്കിലും പഠിക്കാം ഇനി ജോലിക്ക് പോകണം എന്ന് ആണെങ്കിൽ അങ്ങനെ " : ഉച്ചക്ക് ഭക്ഷണം ഒക്കെ കഴിച്ച് എല്ലാരും കൂടി ഹാളിൽ ഇരിക്കുമ്പോൾ വിശ്വൻ സംസാരിച്ച് തുടങ്ങി. അദ്ദേഹത്തിന്റെ ചോദ്യം കേട്ടതും ലെച്ചുവിന്റെ നോട്ടം ആദ്യം പോയത് ശ്രീയിലേക്ക് ആണ്. " അത്... അത് ശ്രീയേട്ടന് ഞാൻ ജോലിക്ക് പോകുന്നത് ഇഷ്ടമല്ല, അതോണ്ട് പിന്നെ ജോലിക്ക് ഒന്നും ഞാൻ നോക്കുന്നില്ല ചെറിയച്ച. പിന്നെ ഇനി പഠിക്കുന്ന കാര്യം അത് പിന്നെ ഞാൻ ശ്രീയേട്ടനോട് ചോദിച്ചിട്ട്...... " : ചെറു നാണത്തോടെ അവൾ പറഞ്ഞ് നിർത്തി. അത് കേട്ടതും ശ്രീയുടെ വീട്ടുകാരുടെ മുഖത്ത് ആകെ ഒരു തിളക്കം വന്നു, എന്തിന് പറയുന്നു അത് വരെ മൂടികെട്ടി ഇരുന്ന പാർവതിയുടെ മുഖം വരെ ഒന്ന് ഉദിച്ചു. ഭർത്താവിനെ ദൈവതുല്യമായി കാണുന്നവർക്ക് അതൊക്കെ വലിയ കാര്യമായിരുന്നു. " ആഹാ അങ്ങനെ വേണം പെൺകുട്ടികൾ ആയാൽ, എന്ത് കാര്യം ചെയ്യുമ്പോഴും ഭർത്താവിന്റെ അനുവാദം വാങ്ങിയിട്ട് വേണം എന്തും ചെയ്യാൻ, എന്നാലേ കുടുംബത്ത് ഐശ്വര്യം ഉണ്ടാകു. ഹാ ഒന്ന് വഴി തെറ്റി പോയെങ്കിൽ എന്താ മറ്റൊന്ന് വീട്ടുകാരുടെ വളർത്ത് ഗുണം കാണിക്കുന്നുണ്ടല്ലോ " : പാർവതി ലെച്ചുവിനെ പുകഴ്ത്തി പറഞ്ഞു. അത് കേട്ടതും ലതക്കും സതീഷനും സരസ്വതിക്കും ഒരുപോലെ പുളകം കൊണ്ടു. അതിന് പ്രധാന കാരണം അതുവരെ മുക്കിയും മൂളിയും മറുപടി നൽകി കൊണ്ട് ഇരുന്നവർ, ഇപ്പൊ ഇതാ ലെച്ചുവിനെ പറ്റി പുകർത്തി പറഞ്ഞിരിക്കുന്നു. അത് കേട്ടതും ബാക്കി ഉള്ളവരും ഒരു അത്ഭുതത്തോടെ പാർവതിയെ നോക്കി. അതിന് പ്രധാന കാരണം അവർ ഇവിടെ വന്നപ്പോൾ മുതൽ പാർവതിയുടെ മുഖത്തെ അനിഷ്ടം കാണുന്നതാണ്. സരസ്വതി ആണെങ്കിൽ ' എന്റെ മകളാണ് ഞാൻ ആണ് അവളെ വളർത്തിയത് എന്ന അഹങ്കാരത്തിൽ നിന്നു ' " അച്ഛാ അമ്മ ഉള്ളത് പറയാലോ എനിക്ക് വേണ്ടത് എന്റെ എല്ലാം കാര്യങ്ങളും ചെയ്ത് തരാൻ കഴിയുന്നൊരു ഭാര്യയെ ആണ്. അതിൽ രാവിലെ എന്നെ വിളിച്ച് ഉണർത്തുന്നത് തൊട്ട് രാത്രി വരുന്നത് വരെ എനിക്ക് വേണ്ടി കാത്തിരുന്ന് ഭക്ഷണം വിളമ്പി തരാൻ വരെ എനിക്ക് എന്റെ ഭാര്യ വേണം എന്ന് ചിന്തിക്കുന്നവനാണ് ഞാൻ. അതിൽ എനിക്ക് ഒരു തെറ്റും തോന്നിയിട്ടില്ല. അപ്പൊ ലെച്ചു ഇനി ജോലിക്കൊന്നും പഠിക്കാനോ പോയി കഴിഞ്ഞാൾ ഇതൊന്നും നടക്കില്ലല്ലോ......? " : ശ്രീ തന്റെ ഭാഗം വ്യക്തമാക്കി കൊണ്ട് ചോദിച്ചു. ശ്രീയുടെ ' അച്ഛാ അമ്മ ' എന്ന സംബോധന ഇഷ്ടമായത് പോലെ പെട്ടന്ന് തന്നെ ഇല്ലെന്ന പോലെ തലയാട്ടി. " അതാണ് അത്രേ ഞാനും പറഞ്ഞുള്ളു. ഓരോരുത്തർക്കും ഓരോ സങ്കൽപ്പം ഇല്ലേ എനിക്കും അതെ എന്റെ ഭാര്യ ആകാൻ പോകുന്ന കുട്ടി അവളുടെ നല്ല കാലം ഒക്കെ എനിക്ക് വേണ്ടി സമയം ചിലവഴിക്കണം എന്നാണ്. എന്ന് കരുതി ലെച്ചുവിനെ എന്റെ വീട്ടിലെ അടുക്കളക്കാരി ആകാൻ കൊണ്ട് പോകുവാണ് എന്നൊന്നും പറയുവല്ല ഞാൻ, പിന്നെ അത്യാവിശം വേണ്ട ഭക്ഷണം ഒക്കെ ഉണ്ടാകാൻ അറിഞ്ഞിരിക്കണം അത്രേ ഉള്ളു. " : അവരുടെ മറുപടി കേട്ടതും ശ്രീ ഒരു ചിരിയോടെ പറഞ്ഞു. " അത്രേ ഉള്ളു എന്നോ ഒരു കുടുംബത്തിലെ വിളക്ക് എന്ന് പറയുന്നതേ ആ കുടുംബത്തിലേക്ക് വന്ന് കയറുന്ന പെണ്ണാ, അവളാണ് പിന്നെ ആ കുടുംബം മുന്നോട്ട് പോകേണ്ടത് അപ്പൊ ഒരു വീട് നോക്കാൻ ഉള്ള പ്രാപ്തിയും കാര്യബോധവും അറിവും ഒക്കെ അവൾക്ക് ഉണ്ടാവണം. പിന്നെ ഭർത്താവിനും വീട്ടുകാർക്കും ഭക്ഷണം വെച്ചുണ്ടാക്കി വിളമ്പുന്നത് അടുക്കളക്കാരിക്ക് സമം ആയിട്ടല്ല മറിച്ച് അത് അവളുടെ കടമയാണ്. " : കൊച്ചുമകൻ പറഞ്ഞത് ഇഷ്ടപ്പെടാതെയും അതെ പോലെ അവൻ ഇനി അച്ചികോന്തൻ ആയി പോകുമോ എന്ന ഭയത്തോടെയും പാർവതി ശ്രീ പറഞ്ഞതിന് പിന്നാലെ പറഞ്ഞു. അത് കേട്ടതും ശ്രീയുടെ മുഖത്ത് വല്ലായിമ നിറഞ്ഞു. അത് പക്ഷെ അച്ഛമ്മയുടെ കുത്തൽ കേട്ടിട്ട് ആയിരുന്നില്ല മറിച്ച് താൻ പറഞ്ഞത് ഒരു അബദ്ധം ആയിരുന്നോ എന്ന് ഓർത്ത് ആയിരുന്നു. എന്നാൽ സരസ്വതിക്കും ലെച്ചുവിനും ഒന്നും പാർവതി പറഞ്ഞത് അത്ര പിടിച്ചില്ല. എങ്കിലും അത് മുഖത്ത് കാണിക്കാൻ പാടില്ല എന്ന് സരസ്വതി കണ്ണ് കൊണ്ട് മകളെ വിലക്കി. " അത് ചേച്ചി പറഞ്ഞത് ശെരിയാ പെൺകുട്ടികൾ ആണ് ഒരു വീടിന്റെ ഐശ്വര്യം. ഞങ്ങളും ലെച്ചുവിനെ അതൊക്കെ പറഞ്ഞ് കൊടുത്ത് തന്നെയാ വളർത്തിയ, പിന്നെ ആഹാരം ഉണ്ടാകുന്നത് ഇത് വരെ പടുത്തം ഒക്കെ അല്ലായിരുന്നോ അതുകൊണ്ട് കാര്യമായിട്ട് ഒന്നും അങ്ങോട്ട് അവൾക്ക് പറഞ്ഞ് കൊടുക്കാൻ കഴിഞ്ഞിട്ടില്ല. എങ്കിലും ഞങ്ങൾ എന്ത് സഹായത്തിന് വിളിച്ചാലും ഒരു മടിയും കൂടാതെ അവൾ ചെയ്ത് തരും. ഇനി ഇപ്പൊ കല്യാണം വരെ സമയം ഉണ്ടല്ലോ അപ്പോഴേക്കും ഓരോന്ന് ആയി വേണം ഇവൾക്ക് പറഞ്ഞ് കൊടുക്കാൻ. " : പാർവതി പറഞ്ഞത് ഇഷ്ടമായില്ല എങ്കിലും മുഖത്തെ ചിരി വിടാതെ ലത പറഞ്ഞു. അത് കേട്ടതും വന്നവർ എല്ലാം മൗനമായി. നിമിഷങ്ങൾ കഴിഞ്ഞതും അനില വേണുവിന്റെ കൈമുട്ടിൽ തട്ടി കൊണ്ട് പറയാണെന്ന പോലെ കണ്ണ് കാണിക്കാൻ തുടങ്ങി. അത് കണ്ടതും സതീഷനും സരസ്വതിയും ലതയും പരസ്പരം മുഖത്തോട് മുഖം നോക്കി. ലെച്ചുവിന് പിന്നെ ഇവർ എന്താ പറയാൻ പോകുന്നെ എന്ന് മനസ്സിലായതും അച്ഛൻ എന്ത് പറയും എന്ന ടെൻഷൻ ആയി. " എന്താ എന്തെങ്കിലും പറയാനുണ്ടോ.....? എന്താണെങ്കിലും പറഞ്ഞോ...? " : ആരും ഒന്നും മിണ്ടുന്നില്ല എന്ന് കണ്ടതും സതീശൻ തിരക്കി. തുടരും........ എല്ലാരും കാത്തിരുന്നു എന്ന് അറിയാം sorry എമൊരു emergency ഉണ്ടായിരുന്നു അതാ ഇന്നലെ തരാൻ കഴിയാഞ്ഞേ. ഇന്നലെ കഥ ഉണ്ടാവില്ല എന്ന് എനിക്ക് പറയാനും കഴിഞ്ഞില്ല, ഇനി മുതൽ story ഇല്ലെങ്കിൽ ലാസ്റ്റ് ഇട്ട part ന്റെ കമന്റിൽ അറിയിക്കാട്ടോ....... ❤️ #കഥ #തുടർകഥ #mallu stories #പ്രണയം #പ്രണയ കഥ #നോവൽ #തുടർകഥ #പ്രണയം #viral #trending