part 22 “അവന് പെണ്ണ് കിട്ടാത്തതിന്റെ വില എന്റെ ജീവിതം കൊണ്ട് കൊടുക്കണമെന്നാണ് അവർ തീരുമാനിച്ചത്.” അഭി ഞെട്ടി അവളെ നോക്കി. “ഞാൻ വേണ്ടെന്ന് പറഞ്ഞതാണ്. പക്ഷേ ആന്റി പറയുന്നത്… ‘ഞങ്ങൾ നിന്നെ ഇത്രയും വർഷം വളർത്തിയില്ലേ, പഠിപ്പിച്ചില്ലേ… ഞങ്ങളുടെ മോനുവേണ്ടി ഇത്രയെങ്കിലും ചെയ്യണം’ എന്നാണ്.” അവൾ കണ്ണുകൾ അടച്ചു. “അവർ ചെയ്ത നന്മകൾ മറക്കാൻ എനിക്ക് കഴിയില്ല അഭി… അതുകൊണ്ടാണ് അവരോട് എതിർത്ത് നിൽക്കാനും കഴിയാത്തത്.” കുറച്ചുനേരം നിശ്ശബ്ദത. പിന്നെ അവൾ പതുക്കെ പറഞ്ഞു, “അന്ന് ജീവൻ അർജുൻ ചേട്ടനെയും എന്നെയും കുറിച്ച് മോശമായി പറഞ്ഞപ്പോൾ ഞാൻ മിണ്ടാതിരുന്നതും ഇതുകൊണ്ടാണ്.” അഭി അവളെ നോക്കി. “ഞാനും അർജുൻ ചേട്ടനും തമ്മിൽ എന്തോ ഉണ്ടെന്ന് അവൻ വിശ്വസിച്ചാൽ… ഈ കല്യാണത്തിൽ നിന്ന് പിന്മാറുമെന്ന് കരുതി.” അവൾ ഒരു വേദനയുള്ള ചിരി ചിരിച്ചു. “പക്ഷേ വിധി അവിടെയും എന്നെ തോൽപ്പിച്ചു.” അവളുടെ കണ്ണുകളിൽ വീണ്ടും അർജുന്റെ മുഖം തെളിഞ്ഞു. അവൾ എഴുന്നേറ്റു. “ഞാൻ പോട്ടെ അഭി… കുറെ നേരമായി.” രണ്ടടി നടന്ന ശേഷം അവൾ തിരിഞ്ഞുനോക്കി. “നാളെ കല്യാണമാണ്. ആരെയും വിളിക്കുന്നില്ല.” “എന്താ?” മാളവിക കണ്ണുനീർ തുടച്ചു. “വിളിക്കാൻ എന്റെ സ്വന്തം എന്ന് പറയാൻ ആരുമില്ലല്ലോ…” അവൾ നടന്നു മറഞ്ഞു. അഭി അവൾ പോയ വഴിയിലേക്ക് നോക്കി നിന്നു.#തുടർകഥ