Part 21 A അന്തമില്ലാത്ത വരികൾ - സഖിയുടെ സഖാവ് - പിറ്റേന്നത്തെ പ്രഭാതം… ബസിൽ നിന്ന് ഇറങ്ങിയ ലക്ഷ്മിയെ വരവേറ്റത് പതിവ് കോളേജ് കാഴ്ചകളായിരുന്നില്ല. വിവിധ വർണങ്ങളിലുള്ള പാർട്ടി കൊടികൾ കാറ്റിൽ പാറിപ്പറന്നുകൊണ്ടിരുന്നു. കോളേജ് ക്യാമ്പസാകെ തിരഞ്ഞെടുപ്പിന്റെ ആവേശം നിറഞ്ഞിരുന്നു. മരച്ചില്ലകളിലും മതിലുകളിലും വഴിയരികുകളിലും വിദ്യാർത്ഥി സംഘടനകളുടെ കൊടികളും ചിഹ്നങ്ങളും പോസ്റ്ററുകളും നിറഞ്ഞുനിന്നു. ക്യാമ്പസിന്റെ ഓരോ കോണിലും തിരഞ്ഞെടുപ്പിന്റെ ചൂട് പ്രകടമായിരുന്നു. പാർട്ടി പ്രവർത്തകർ വിദ്യാർത്ഥികളുമായി സംസാരിച്ചും നോട്ടീസുകൾ വിതരണം ചെയ്തും സ്ഥാനാർഥികളെ പരിചയപ്പെടുത്തിയും തിരക്കിലായിരുന്നു. മുദ്രാവാക്യങ്ങളുടെ മുഴക്കവും വിദ്യാർത്ഥികളുടെ ചർച്ചകളും നിറഞ്ഞ ആ അന്തരീക്ഷം, സാധാരണ കോളേജ് ദിനങ്ങളിൽ നിന്ന് തികച്ചും വ്യത്യസ്തമായിരുന്നു. ഒരു നിമിഷം ചുറ്റും കണ്ണോടിച്ച ലക്ഷ്മി, ആ തിരഞ്ഞെടുപ്പ് ആവേശത്തിനിടയിലൂടെ പതിയെ കോളേജിനുള്ളിലേക്ക് നടന്നു. പ്രവർത്തകർക്ക് ഓരോ കാര്യങ്ങളും പറഞ്ഞുകൊടുക്കുന്നതിനിടയിലും, ദേവിന്റെ ശ്രദ്ധ പൂർണമായി അവിടെയായിരുന്നില്ല. അവനറിയാതെ അവന്റെ കണ്ണുകൾ ഇടയ്ക്കിടയ്ക്ക് കോളേജ് ഗേറ്റിലേക്ക് വഴുതി വീണുകൊണ്ടിരുന്നു. ആരെയോ കാത്തിരിക്കുന്ന മനസ്സിന്റെ ആകാംക്ഷ ആ നോട്ടങ്ങളിൽ വ്യക്തമായിരുന്നു. കോളേജ് ഗേറ്റിലൂടെ പതിയെ അകത്തേക്ക് നടന്ന് വരുന്ന സ്വർണനിറമുള്ള കുർത്തയും വെള്ള പാന്റും ധരിച്ച്, ചുറ്റുമുള്ള കാഴ്ചകളെ ആസ്വദിച്ചുകൊണ്ട് പതിയെ നടന്ന് വരുന്ന തന്റെ സഖിയിലേക്കായിരുന്നു ദേവിന്റെ കണ്ണുകൾ പതിഞ്ഞത്. ഒരു നിമിഷം… അവന്റെ കണ്ണുകൾ വിടർന്നു. അറിയാതെ തന്നെ ചുണ്ടിൽ ഒരു ഇളംപുഞ്ചിരി വിരിഞ്ഞു. കവിളിലെ ചെറിയ നുണക്കുഴികൾ താടി രോമങ്ങൾക്കിടയിലൂടെ തെളിഞ്ഞു. ആ നിമിഷം, ചുറ്റുമുണ്ടായിരുന്ന തിരഞ്ഞെടുപ്പിന്റെ ബഹളവും ആൾക്കൂട്ടവും അവന് അപ്രത്യക്ഷമായതുപോലെ തോന്നി. അവന്റെ ലോകം മുഴുവൻ ആ ഒരൊറ്റ മുഖത്തിൽ മാത്രം ഒതുങ്ങിനിന്നു. ഒരു നിമിഷം അവളും ചുറ്റും നോക്കി. ആരും അറിയാതെ… അവളുടെ കണ്ണുകളും ആരെയോ തേടുകയായിരുന്നു. ലക്ഷ്മി…” പിന്നിൽ നിന്ന് ഉയർന്ന ആ വിളി കേട്ട് ലക്ഷ്മി തിരിഞ്ഞുനോക്കി.തുടരും part 21 B കാത്തിരിക്കൂ #📙 നോവൽ #💞 പ്രണയകഥകൾ #📔 കഥ #📝 ഞാൻ എഴുതിയ വരികൾ #തുടർകഥ