𝓥 𝓲 𝓷 𝓪 𝔂 𝓪 𝓷
2K views • 12 days ago
#📙 നോവൽ പെണ്ണ് 💐💐
പാർട്ട് 79
ജിഫ്ന നിസാർ 💥
"ഇനിയുമെന്തിനാ കരയുന്നെ...?"
പറയുന്നതിനൊപ്പം തന്നെ കാശി കാർത്തുവിന്റെ മുഖം തന്റെ നെഞ്ചിൽ നിന്നും പിടിച്ചു മാറ്റി അവളുടെ കണ്ണിലേക്കു നോക്കിയിട്ടൊരു ചിരിയോടെ ചോദിച്ചു.
"എനിക്കറിയില്ല..."
കരച്ചിലിനൊപ്പം അവളിലപ്പോൾ ഒരു ചിരി കൂടി തെളിഞ്ഞിരുന്നു.
കാശിയോട് പറഞ്ഞത് പോലെ.. ഇനിയുമെന്തിന് കരയുന്നെന്ന് അവൾക്കപ്പോൾ സത്യമായും അറിയില്ലായിരുന്നു.
ഒന്നുറപ്പാണ്.
ഹൃദയം നിറഞ്ഞു കവിയും വിധം സന്തോഷം അനുഭവിക്കുമ്പോഴും മനുഷ്യൻ കരയുമെന്ന്.
"എങ്ങനാ പുറത്തിറങ്ങിയെ...ആരാ സഹായിച്ചേ..?
കവിൾ തുടച്ചു കൊണ്ടവൾ അവനോട് ചോദിച്ചു.
ഏത് താഴിട്ട് പൂട്ടിയാലും നിനക്ക് വേണ്ടി... ഞാനിറങ്ങി വരുമല്ലോ.. എനിക്കെന്റെ വാക്ക് പാലിക്കണ്ടേ.."
അവളെയേറെ കൊതിപ്പിക്കുന്നൊരു ചിരിയോടെ അവനുത്തരം പറയുമ്പോൾ കാർത്തുവിന്റെ മുഖം കുനിഞ്ഞു.
"എന്റെ റിലീസിന്റെ പേരും പറഞ്ഞു കൊണ്ടാവും നിന്നെ നിന്റച്ഛൻ മഹേഷിന് മുന്നിൽ കൊണ്ട് പോയി നിർത്തിയതല്ലേ..?"
കാശി ആ മുഖം വിരൽ തുമ്പു കൊണ്ടുയർത്തി ചോദിച്ചു.
"മ്മ്.."
അവൾക്ക് വീണ്ടും കരച്ചിൽ വന്നു.
"സാരമില്ല.. പോട്ടെ.. ഞാനിങ് വന്നില്ലേ.."
അവനലിവോടെ കാർത്തുവിന്റെ കവിളിൽ തട്ടി.
അത്രയും ഹൃദ്യമായി സംസാരിക്കാൻ അറിയാവുന്നവൻ..അവൾക്കപ്പോൾ അത്ഭുതമാണ് തോന്നിയത്.
തനിക്ക് മുന്നിലെപ്പോഴും കലിപ്പിന്റെ മൂട് പടത്തിൽ ഒളിച്ചിരുന്ന ഒരു കാശിനാഥൻ മാത്രമാണ് ഉണ്ടായിരുന്നത്.
ഇങ്ങനൊരാളെ കണ്ടിട്ടേയില്ല.
കാണാൻ ഏറെ കൊതിച്ചിട്ടും.
"ഇങ്ങനെ കണ്ണിൽ കണ്ണിൽ നോക്കി നിന്നാ നിന്റമ്മയിപ്പോ കുളി കഴിഞ്ഞു വരും കേട്ടോ.."
അവളുടെ കണ്ണിമാ ചിമ്മാതെയുള്ള നോട്ടം കണ്ടിട്ടൊരു അടക്കി ചിരിയോടെ അവൻ പറയുമ്പോൾ അവൾ വീണ്ടും ഞെട്ടി.
അതിനെ കുറിച്ചെല്ലാം തത്കാലം മറന്നു പോയത് പോലാണ്.
"പോവണ്ടേ..."
അവനവളുടെ കണ്ണിലേക്കു നോക്കി പതിയെ ചോദിച്ചു.
അവനെ നോക്കി കൊണ്ട് തന്നെ അവൾ വേണമെന്ന് തലയാട്ടി.
"എങ്കിൽ വാ..."
കാശി അവൾക്ക് നേരെ കൈ നീട്ടി.
"ഞാൻ.. എനിക്കൊരു കാര്യം ചോദിക്കാൻ.."
കാർത്തു അവന് കൈ കൊടുക്കാതെ തന്നെ പറഞ്ഞു.
"മ്മ്..ചോദിക്ക്.."
അതെന്താവുമെന്ന് വ്യക്തമായി അറിയാമായിരുന്നു അവന്.
"മഹേഷിന്റെ താലിയിൽ നിന്നും രക്ഷപ്പെടുത്തി കൊണ്ട് പോകാമെന്നാ എനിക്ക് വാക്ക് തന്നത്.."
അവളൊരു പതർച്ചയോടെയാണ് പറയുന്നത്.
"മ്മ്.. അതേ.. ആ വാക്ക് പാലിക്കാൻ വേണ്ടിയല്ലേ ഞാനിത്രേം റിസ്ക്കെടുത്തു കൊണ്ട് വന്നത്.."
അവന്റെയാ വാക്കുകൾ.
കാർത്തുവിന്റെ തിളക്കം കെട്ടു പോയി.
ആ മുഖം വാടി..
"എന്തേ.. നിനക്കിപ്പോ രക്ഷപ്പെട്ടു പോകണ്ട എന്നൊരു തോന്നലുണ്ടോ.. അങ്ങനെ ആണെങ്കിൽ.."
കാശിക്കൊരു കള്ളത്തരം..
മുഖം കുനിഞ്ഞു നിൽക്കുന്നത് കൊണ്ട് തന്നെ അവൾക്കത് മനസ്സിലായതുമില്ല.
കാർത്തുവിന് വീണ്ടും സങ്കടം വന്നു.
"അപ്പൊ.. എന്നിട്ടിപ്പോഴും ഒട്ടും ഇഷ്ടമില്ലേ.."
അവന്റെയാ മുഖം കണ്ടിട്ട് ഒരിഷ്ടമുണ്ടെന്നൊക്കെ തോന്നുന്നുണ്ട്.
പക്ഷെ ഇനിയിപ്പോ മഹേഷ് താലി കെട്ടാതിരിക്കാൻ വേണ്ടി മാത്രമാണോ കൊണ്ട് പോകുന്നതെന്നുള്ള സംശയവും തോന്നുന്നുണ്ടവൾക്ക്.
പക്ഷെ അവളോട്ടും പ്രതീക്ഷിക്കാതെ കാശിയവളെ പിന്നിൽ നിന്നും പുണർന്നു.
"വെറും ഇഷ്ടമെന്നൊക്കെ പറഞ്ഞതിനെ നീ നിസ്സാരമാക്കല്ലെന്റെ പെണ്ണേ... എന്റെ ജീവനാ നീ..മഹേഷല്ല.. അവന്റച്ചൻ വന്നാലും ഇനിയീ കുഞ്ഞാറ്റകിളിയെ ഞാൻ വിട്ട് കൊടുക്കില്ല.. നീ ഇനിയീ കാശിയുടെ പെണ്ണാ.. കാശിനാഥന്റെ സ്വന്തം..."
സ്വകാര്യം പോലെ അവളുടെ കാതിനടുത്തേക്ക് മുഖമടുപ്പിച്ചു കൊണ്ടവൻ പറഞ്ഞ ആ വാക്കുകൾ.
ഹൃദയം നിലച്ചത് പോലെ അവളോന്നു പിടഞ്ഞു..
ശേഷം നിറഞ്ഞ കണ്ണുകളോടെ തിരിഞ്ഞു നോക്കുമ്പോൾ അവനപ്പോഴും കള്ളത്തരം തന്നെ.
അവളിന്ന് വരെയും കാണാത്ത.. കാണാൻ ഏറെ കൊതിച്ച ആ പ്രണയത്തിന്റെ ഭാവം.
.
അതങ്ങനെ കാശിയിൽ പൂത്തുലഞ്ഞു നിന്നു.
"കൂടെ കൊണ്ട് പോണത് മഹേഷിനെ പേടിച്ചു കൊണ്ടല്ല.. ഞാനെന്റെ നെഞ്ചിൽ ചേർത്ത് പിടിച്ചു സ്നേഹിക്കാനാ.. എനിക്കെന്റെ സ്വന്തമാക്കാനാ.. ന്തേ..അത് മതിയാവില്ലേ.."
അവളുടെ ചിതറി കിടക്കുന്ന മുടിയിഴകളെ ഒതുക്കി വെച്ച് കൊടുത്തു കൊണ്ട് അവൻ പറഞ്ഞ ആ വാക്കുകൾ.
ജന്മം സഫലമായ പോലെ കാർത്തു വീണ്ടുമവന്റെ നെഞ്ചിൽ പതിഞ്ഞു കിടന്നു.
ഹൃദയങ്ങളപ്പോൾ അത്രയും അരികെ ഒന്നിച്ചു മിടിച്ചു..
"കാശിനാഥൻ പ്രണയിക്കുന്നില്ല.. പരിഗണിക്കുന്നില്ല എന്നല്ലേ നിന്റെ ഇത് വരെയുമുള്ള പരാതി.. ഇനി കാശിനാഥന്റെ പ്രണയം എനിക്ക് താങ്ങാൻ പറ്റുന്നില്ലെന്ന് പറയും നീ.. പറയിപ്പിക്കും ഞാൻ.."
അവനവളെ ഒന്നു കൂടി മുറുകെ പിടിച്ചു.
"ഇനിയുമിങ്ങനെ തന്നെ നിന്നാ കാശിയുടെയും അവന്റെ പെണ്ണിന്റെയും അവസാനവും ഇവിടെ തന്നെയാവും.. അത് കൊണ്ട് പെട്ടന്ന് പോയ.. രക്ഷപ്പെട്ടു പോകാ.."
കുറുകി കൊണ്ട് തന്നിലേക്ക് ചേർന്ന് നിൽക്കുന്നവളോട് അവനത് പറഞ്ഞ നിമിഷം തന്നെ അവളകന്നു മാറി.
"എങ്ങനെ പുറത്ത് ചാടും.."
കാർത്തു ടെൻഷനോടെ അവനോട് ചോദിച്ചു.
"വഴിയൊക്കെ എനിക്കറിയാം. ഞാൻ നോക്കി വെച്ചിട്ടുണ്ട്.പക്ഷെ റിസ്ക്കാണ്.."
"ഇവിടെന്തു റിസ്ക്കും പോകും.. "
വെല്ലുവിളി പോലെ പറഞ്ഞു കൊണ്ടവൾ ധൃതിയിൽ താൻ പാക്ക് ചെയ്ത് വെച്ച ബാഗ് വലിച്ചെടുത്തു.
"ഫുൾ സെറ്റപ്പിലായിരുന്ന ല്ലേ.."
തിരികെ അവളുടെ മുറിയിലേക്ക് കയറി തുളസി കുളിക്കാൻ കയറിയ ബാത്റൂമിന്റെ വാതിൽ പുറത്ത് നിന്നും ലോക്ക് ചെയ്ത് കൊണ്ടവൻ ചോദിച്ചു.
ഇതെന്തിനാ ഇങ്ങനെ ചെയ്യുന്നേ..?"
അവളൊരു വല്ലായ്മയോടെ ചോദിച്ചു.
"ഈ സിറ്റി വിട്ട് പോകാൻ നമ്മുക്ക് കുറച്ചു ടൈം വേണം.. അത് വരെയും ചേച്ചി അതിനകത്ത് സേഫായി ഇരിക്കട്ടെ.."
അവൻ അവൾക്ക് നേരെ തിരിഞ്ഞു.
പോകാം.."
കാശി വീണ്ടും കൈ നീട്ടി കൊണ്ടത് ചോദിക്കുമ്പോൾ ഒരു വട്ടം കൂടി ആ വാതിലിനു നേരെ നോക്കി അവൾ അവന്റെ കയ്യിൽ മുറുകെ പിടിച്ചു.
സങ്കടപെടല്ലേ.. ഇവരൊക്കെ നമ്മളെ തീർച്ചയായും അംഗീകരിക്കുന്നൊരു നാള് വരെയും.. കുറച്ചു കാത്തിരിക്കേണ്ടി വന്നാലും നിനക്കിവരെ ഇത് പോലെ തന്നെ ഞാൻ തിരികെ തരും.. അത് വരെയും ഞാനുണ്ട്.. അച്ഛനായും അമ്മയായും.. "
അവളുടെയാ ഉള്ളറിഞ്ഞത് പോലെ കാശിയവളെ ചേർത്ത് പിടിച്ചു.
"നമ്മള്.. നമ്മളെങ്ങോട്ട് പോകും കാശ്യേട്ടാ.."
ബാൽകണിയിലെക്കിറങ്ങുമ്പോൾ കാർത്തു ചോദിച്ചു.
"വ്യക്തമായി ഒരു സ്ഥലം എന്റെ മനസ്സിലും ഇല്ല.. പക്ഷെ ആദ്യം ഇവിടെ നിന്നും രക്ഷപ്പെട്ടു പോകണം. അതാണ് വേണ്ടത്.. നിന്റച്ചൻ ഫുള്ള് അലർട്ടാണ്.. "
കാശി മുന്നറിയിപ്പ് പോലെ പറയുമ്പോൾ പെട്ടന്നവൾക്ക് മിയ പറഞ്ഞത് ഓർമ വന്നു.
"ഇനിയെന്താ...
അവൾ പെട്ടന്ന് നിന്നത് കണ്ടിട്ട് കാശി ചോദിച്ചു.
മിയ ഉണ്ട് ഇവിടെ. അവളോട് കൂടി പറഞ്ഞിട്ട്.."
അവന്റെ നോട്ടം കണ്ടതും കാർത്തു പറയാൻ വന്നത് പാതി വിഴുങ്ങി.
"എങ്കിൽ അവളോട് മാത്രമാക്കാൻ നിക്കണ്ട.. താഴെ നിന്റെ അച്ഛനുമില്ലേ.. മൂപ്പരോട് കൂടി പറഞ്ഞിട്ട് പോയേക്കാം.. നീ ചെല്ല് ഞാനിവിടെ വെയിറ്റ് ചെയ്യാം.."
അതും പറഞ്ഞു കൊണ്ടവൻ അവളുടെ കൈ വിട്ടു.
"വേണ്ട.. വാ പോകാം.."
കാർത്തു അവന്റെ കൈ പിടിച്ചു വലിച്ചു.
അവളെ ഒന്ന് കൂടി നോക്കിയിട്ട് കാശി സൂക്ഷിച്ചു കൊണ്ട് ബാൽകണിയിലെ കമ്പിയിൽ പിടിച്ചു താഴെക്കിറങ്ങി.
എന്നിട്ടവൻ അവൾക്ക് നേരെ കൈ നീട്ടി.
താഴെക്കിറങ്ങാൻ നല്ലത് പോലെ പേടി ഉണ്ടായിട്ടും താഴെ കൈ നീട്ടി നൽകുന്നവൻ കൈ വിടില്ലെന്നുള്ള വിശ്വാസമുണ്ടായിരുന്നു അവൾക്ക്.
അത് കൊണ്ട് തന്നെയാണ് ഏറെ റിസ്ക് ഉണ്ടായിട്ടും കാശിയെ പോലെ തന്നെ അവൻ കാണിച്ചു കൊടുത്തയിടതെല്ലാം പൊത്തി പിടിച്ചു വലിഞ്ഞു കയറിയും ചാടി ഇറങ്ങിയും രണ്ടു പേരുമാ ഇരുട്ടിൽ പതുങ്ങി പുൻവശത്തെ പടർന്നു നിൽക്കുന്ന വലിയ മാവിന്റെ ചുവട്ടിൽ എത്തി നിന്നത്.
അപ്പോഴും ശ്വാസം നേരെ വീണിട്ടില്ല. ഏത് നിമിഷവും പിടിക്കപ്പെട്ടേക്കും എന്നൊരു ഭയമാണ് ഉള്ള് നിറയെ.
അവിടേക്ക് വെളിച്ചത്തിന്റെ നേർത്തൊരു പാളി മാത്രമാണ് വന്നു പതിക്കുന്നത്.
ഇരുട്ടിന്റെ നിഴൽ പറ്റി അങ്ങേയറ്റം സൂക്ഷിച്ചു കൊണ്ടാണ് കാശി മുന്നോട്ട് നടക്കുന്നത്.
അവന്റെ മറ പറ്റി അവളും.
"പുറത്തെന്റെ ബുള്ളറ്റുണ്ട്.."
കാർത്തുവിന്റെ കൈ പിടിച്ചു കൊണ്ട് മതിലിനു നേരെ നടക്കുമ്പോൾ കാശി പറഞ്ഞു.
"കയറിക്കോ.. സൂക്ഷിച്ചു നോക്കി വേണം താഴേക്ക് ചാടാൻ.."
അവളുടെ കയ്യിലെ ബാഗ് വാങ്ങിച്ചു കൊണ്ടവൻ പതിയെ പറഞ്ഞു.
വലിഞ്ഞു കയറാൻ ശ്രമിച്ചിട്ടും അതിന് പറ്റാഞ്ഞ കാർത്തുവിനെ കാശി പുഷ്പം പോലെ എടുത്തുയർത്തി മതിലിൽ വെച്ച് കൊടുത്തു.
"റോഡിൽ ആരെങ്കിലുമുണ്ടോ.."
താഴെ നിന്നും അവളുടെ ബാഗ് എടുത്തു കൊടുത്തു കൊണ്ടവൻ ചോദിച്ചു.
ചുറ്റുമൊന്നു നോക്കിയിട്ട് അവളില്ലെന്ന് പറഞ്ഞു.
'എങ്കിൽ ചാടിക്കോ.. "
ഒരു നിമിഷം കൂടി വീടിനു നേരെ നോക്കി കാർത്തു..
അവൾക്കുള്ളിൽ വല്ലാത്തൊരു നോവ് കിനിഞ്ഞു.
കൂടെ ഉള്ളവനോളം തന്നെ അവൾ സ്നേഹിച്ച രണ്ട് പേരാ വീട്ടിലുണ്ട്.
നിങ്ങളെന്നെ കൊണ്ടിത് ചെയ്യിപ്പിച്ചതാണെന്ന് വിലപിച്ചു കൊണ്ടാണ് കാർത്തു റോഡിലേക്ക് ചാടിയത്.
അവളിറങ്ങിയ നിമിഷം തന്നെ കാശിയും ചാടിയിറങ്ങി..
വേഗം വാ... ഇനിയുള്ള ഓരോ നിമിഷവും വിലപ്പെട്ടതാണ്.നിന്റച്ഛന്റെ കയ്യിൽ കിട്ടിയ പിന്നെ ഞാൻ ബാക്കിയുണ്ടാവില്ല.. "
അവളുടെ ബാഗ് വാങ്ങി തോളിൽ തൂക്കി കാർത്തുവിന്റെ കയ്യിൽ പിടിച്ചു കൊണ്ടവൻ കുറച്ചു മാറി നിർത്തിയ ബുള്ളറ്റിനു നേരെ ധൃതിയിൽ നടന്നു.
അവിടെ നിന്നുമൊരു പോക്കറ്റ് റോഡുണ്ട്.
നേരെ പോയാൽ മെയിൻ റോഡിൽ പോയി കയറാം.
അതിന് ചാരി വലിയൊരു മരത്തിന്റെ മറവിലാണ് അവൻ വണ്ടി നിർത്തിയിട്ടിക്കുന്നത്.
അടുത്തൊന്നും വേറെ വീടുകളില്ല.
വലിയൊരു പറമ്പാണ്.
ബാഗ് അവൾക്ക് നേരെ നീട്ടി കൊണ്ടവൻ ബുള്ളറ്റിനു നേരെ ഓടി ചെന്നു.
തള്ളി നിരക്കി അത് റോഡിൽ എത്തിച്ചു..
"വാ. വന്നു കയറ്.."
അതിലേക്ക് കയറി ഇരുന്നു കൊണ്ടവൻ കാർത്തുവിനോട് പറഞ്ഞു.
ബാഗ് ഇടയിൽ വെച്ച് കൊണ്ടവളും കയറി ഇരുന്നു.
കാശി ഒന്ന് കൂടി പിന്നിലേക്ക് നോക്കി.
ഏതാനും സമയം കൊണ്ട് കാർത്തു മിസ്സിംഗ് ആണെന്ന് ആ വീട്ടിൽ അറിയും.
അതിന് മുന്നേ സുരക്ഷിതമായൊരു സ്ഥലത്തെത്തി ചേരണം.. അല്ലായെങ്കിൽ അത് അപകടമാണ്..
ബുള്ളറ്റ് സ്റ്റാർട്ട് ചെയ്യുമ്പോൾ അതായിരുന്നു അവന്റെ മനസ്സിൽ.
"പിടിച്ചിരുന്നോ.. അത്യാവശ്യം സ്പീഡിൽ പോകേണ്ടി വരും.. താഴെ വീഴരുത് കേട്ടോ.."
അവൾക്ക് നേരെ ഒരു ഹെൽമെറ്റ് എടുത്തു നീട്ടി പറയുന്നതിനൊപ്പം തന്നെ അവനവളുടെ കൈകൾ പിടിച്ചെടുത്തു തന്റെ വയറിൽ അമർത്തി പിടിപ്പിച്ചു..
തുടരും..
അങ്ങേര് കാണാതെ വണ്ടിയിൽ കയറ്റി വിട്ടിട്ടുണ്ട് ഞാൻ..
ഇനിയൊക്കെ അവന്റെ കയ്യിലാ..
അശോകേട്ടന്റെ കയ്യിൽ കിട്ടാതിരിക്കാൻ ഞാനും മുട്ടി പായി പ്രാർത്ഥിക്കുന്നുണ്ട് ട്ടാ
😎
റിവ്യൂ ഇട്ടിട്ട് പോണേ..
സ്നേഹത്തോടെ jif
12 shares
