#📙 നോവൽ ഇനിയും അവരോട് മത്സരിച്ചു നിൽക്കാൻ തന്നെ ആണോ ചേച്ചിയുടെ ഭാവം... അച്ഛന്റെ ജോലി പോയപ്പോൾ വലിയ വീരവാദം ആയിരുന്നല്ലോ... ഞാൻ ജോലി എടുത്തു കുടുംബം പോറ്റിക്കോളാം എന്നും പറഞ്ഞ്... എന്നിട്ട് ഇപ്പോൾ എന്ത് ഉണ്ടായി... ചേച്ചിയുടെ ജോലിയും പോയില്ലേ...? " സ്മിത പരിഹാസതോടെ സിതാരയെ നോക്കി കൊണ്ട് പറഞ്ഞു... ജോലി പോയി എന്ന് വീട്ടിൽ വന്നു പറഞ്ഞപ്പോൾ തുടങ്ങിയ അങ്കം ആണ്... അമ്മ ഒരു മുക്കിൽ അല്ലലും ആപത്തുo പറഞ്ഞു മൂക്ക് പിഴിഞ്ഞ് ഇരിപ്പുണ്ട്... അച്ഛൻ ആണെങ്കിൽ വിവരം പറഞ്ഞത് മുതൽ ഒരക്ഷരം മിണ്ടാതെ ആ ഇരിപ്പ് ഇരിക്കുന്നത് ആണ്.... സ്മിത മാത്രം കിട്ടിയ അവസരം നന്നായി വിനിയോഗിക്കുന്നുണ്ട്... " ഒരു ജോലി പോയിട്ടുണ്ടെങ്കിൽ അടുത്തത് ഉണ്ടാകും.... അന്വേഷിക്കണം...! അല്ലാതെ ഒരു ജോലി പോയി എന്നും പറഞ്ഞു അയാളുടെ മുന്നിൽ തോറ്റു കൊടുക്കാൻ പറ്റുമോ...? " സിതാരക്ക് ദേഷ്യം വന്നു തുടങ്ങി... " എന്താൽ തോറ്റു കൊടുത്താൽ... ഒരു രാത്രിക്ക് ഒന്നും അല്ലല്ലോ... ജീവിത കാലം മുഴുവൻ കൂടെ ജീവിക്കാൻ അല്ലെ അങ്ങേര് വിളിക്കുന്നത്... " സ്മിത വായിൽ തോന്നിയത് അങ്ങ് പറഞ്ഞു. പൊടുന്നനെ സിതാരയുടെ കൈ വായുവിൽ ഒന്ന് ഉയർന്നു താഴ്ന്നു... ചെകിടടിച്ചു ഒരു അടി ആയിരുന്നു സ്മിതക്ക് സിതാരയിൽ നിന്നും കിട്ടിയ മറുപടി... സ്മിത മുഖത്തോട് കൈ ചേർത്ത് വെച്ചു താരയെ തന്നെ നോക്കി... " താരേ...! ലക്ഷ്മി ഇരുന്നിടത്തു നിന്നും ചാടി എഴുനേറ്റു... " നീ എന്നെ തല്ലിയല്ലേ...? സ്മിത സിതാരയെ കൊല്ലാനുള്ള ദേഷ്യത്തോടെ അവളുടെ അടുത്തേക്ക് ചീറി അടുത്തു... " വേണ്ടാ...! കേശവന്റെ ശബ്ദം അവിടെ ഉയർന്നു... സ്മിത വർദ്ധിച്ചു വരുന്ന ദേഷ്യം അടക്കാൻ ശ്രമിച്ചു കൊണ്ട് കേശവന് നേരെ തിരിഞ്ഞു... " അച്ഛൻ കണ്ടില്ലേ... അവളെന്നെ തല്ലിയത്... " " നീ അത് ചോദിച്ചു വാങ്ങിയത് അല്ലെ..? " കേശവന്റെ മറുപടിയിൽ താരയുടെ മുഖത്ത് ഒരു പുച്ഛച്ചിരി വിരിഞ്ഞു... അത് കൂടെ കണ്ടപ്പോൾ സ്മിതക്ക് തല പെരുക്കും പോലെയാണ് തോന്നിയത്... " നിങ്ങളുടെ വളർത്തു മകൾ ഇവളാണോ അതോ ഞാനാണോ...? നിങ്ങൾക്ക് ഇവൾ മതിയായിരുന്നു എങ്കിൽ എനിക്ക് എന്തിനാ നിങ്ങൾ ജന്മം നൽകിയത്... ജനിച്ചപ്പോൾ തന്നെ കഴുത്തു ഞെരിച്ചു കൊല്ലായിരുന്നില്ലേ എന്നെ... " സ്മിത പല്ലുകൾ ഞെരിച്ചു കൊണ്ട് കേശവനെ നോക്കി... " അച്ഛനോട് ആണോ നീ ഈ തട്ടി കയറുന്നത്.. ലക്ഷ്മി അവളെ തടയാൻ ശ്രമിച്ചു കൊണ്ട് ചോദിച്ചു.... തന്റെ തോളിൽ അമർന്ന അമ്മയുടെ കൈ സ്മിത വാശിയോടെ തട്ടി എറിഞ്ഞു. " ഒരു കാര്യം നീ ഓർത്തോ... നിന്റെ ഭാവി ചേതന്റെ ഭാര്യയായി നരകിച്ചു ജീവിക്കാൻ തന്നെ ആണ്... ഒരിക്കലും നിനക്ക് അനന്തേട്ടനെ കിട്ടില്ല...എന്റെ ശരീരത്തിൽ ഒരു തരി ശ്വാസം ഉണ്ടെങ്കിൽ അത് നടക്കില്ല...! ഞാൻ നടത്തിക്കില്ല... " പ്രതികാര ബുദ്ധിയോടെ വെല്ലുവിളിച്ചു കൊണ്ട് സ്മിത ചവിട്ടി തുള്ളി അകത്തേക്ക് വലിഞ്ഞു... ലക്ഷ്മിയും താരയെ ഒന്ന് രൂക്ഷമായി നോക്കി സ്മിതക്ക് പിന്നാലെ ചെന്നു.. " അച്ഛാ... ഞാൻ... സിതാര മുഖം കുനിച്ചിരിക്കുന്ന കേശവന് അരികിലേക്ക് മുട്ട് കുത്തി ഇരുന്നു... " എനിക്ക് അവളെ അല്ലെ തിരുത്താൻ കഴിയു... നിന്നെ തിരുത്താൻ എനിക്ക് അവകാശം ഇല്ലല്ലോ... അങ്ങനെ തിരുത്താൻ ശ്രമിച്ചാലും നീ അത് ഒരു വേർതിരിവ് ആയെ കാണു...സ്വന്തം ചോര അല്ലാത്തത് കൊണ്ട് ആണ് നിന്നോട് ഇങ്ങനെ കാണിക്കുന്നതെന്നെ നീ കരുതു.." കേശവന്റെ ഉള്ളിൽ നിന്നും പുറത്തു ചാടിയ വാക്കുകൾക്ക് പല അർത്ഥങ്ങളും ഉണ്ടെന്ന് താരക്ക് തോന്നി... ഒരക്ഷരം മിണ്ടാതെ അച്ഛനും മുറിയിൽ കയറി കതക് അടച്ചതോടെ ഇനി എന്ത് വേണം എന്ന് അറിയാതെ സിതാര രാത്രിയുടെ കൂരിരുട്ടിലേക്കും നോക്കി അങ്ങനെ ഇരുന്നു പോയി... ⭐⭐⭐⭐⭐⭐⭐⭐⭐⭐⭐⭐⭐⭐⭐ ഗ്ലാസിൽ പകരുന്ന കടുത്ത നിറമുള്ള ദ്രാവകം അവന്റെ ചൂട് പിടിച്ച ചിന്തകളെ തണുപ്പിക്കുന്നില്ലായിരുന്നു... കണ്ണടച്ചാൽ അവളുടെ മുഖം ആണ്... സിതാര...!! നക്ഷത്ര കണ്ണുള്ള പെണ്ണ്...!! അവളുടെ മുഖം ആലോചിക്കും തോറും എന്തൊക്കെയോ വികാരങ്ങൾ തന്നിൽ വന്നു മൂടുന്ന പോലെ ചേതന് തോന്നുന്നുണ്ടായിരുന്നു. മുത്തശ്ശൻ തന്റെ ഭാര്യയായി അവളെ തന്നെ കൊണ്ട് വരണം എന്ന് പറയുന്നതിനുള്ള കാരണം എത്ര ആലോചിച്ചിട്ടും ചേതന് മനസിലാവുന്നില്ലായിരുന്നു... മുത്തശ്ശൻ ഒരു കാര്യം ആവശ്യപെട്ടാൽ അത് തന്നെ കൊണ്ട് തള്ളാൻ കഴിയില്ല.. പക്ഷെ അവൾ സിതാര...! മറ്റൊരു പുരുഷനും ആയി പ്രണയബന്ധത്തിൽ നിൽക്കെ അവളെ നിർബന്ധിച്ചു തന്റെ ഭാര്യ ആക്കുന്നത് ഒരിക്കലും ഒരു ന്യായീകരണവും അർഹിക്കാത്ത പ്രവർത്തി തന്നെ ആണ്... പക്ഷെ തന്റെ ആഗ്രഹം സാധിച്ചില്ലെങ്കിൽ ജലപാനം സേവിക്കില്ല എന്ന് പറയുന്ന മുത്തശ്ശൻ ചേതനെ തന്റെ ഭാഗം മാത്രം ന്യായീകരിക്കാൻ പ്രേരിപ്പിക്കുന്നു...സിതാരയിൽ ഉള്ള ന്യായം തള്ളി കളയാനും... മുത്തശ്ശന്റെ ആഗ്രഹം നടത്താൻ ഏത് അറ്റം വരെ പോവാനും അവൻ മനസ്സിൽ തീരുമാനിപ്പിച്ചുറപ്പിച്ചിരുന്നു... കൂടാതെ സിതാരയുടെ അഹങ്കാരതിനുള്ള ചെറിയൊരു മറുപടിയും..! ചേതന്റെ ജീവിതത്തിൽ പല പെൺകുട്ടികളെയും കണ്ടിട്ടുണ്ട്... പണത്തിനുo പദവിക്കും വേണ്ടി മടി കുത്തു അഴിക്കുന്നവർ ഉൾപ്പടെ അതിൽ പെടും... പക്ഷെ കയ്യിലിരുന്ന പണം തന്റെ മുഖത്തേക്ക് വലിച്ചു എറിഞ് നോക്കിയ സിതാരയുടെ കണ്ണുകളിൽ കണ്ട ആ ആത്മാഭിമാനം താൻ ഇത് വരെയും മറ്റൊരാളുടെ കണ്ണിലും കണ്ടിട്ടില്ല എന്നവന് തോന്നി. എങ്കിലും ചേതനോട് അങ്ങനെ പെരുമാറിയത് തെറ്റായി പോയി സിതാര... " ചെറിയൊരു മറുപടി നിന്റെ ആ അഹങ്കാരത്തിന് ഞാൻ തരണ്ടേ അപ്പോൾ... ഇല്ലെങ്കിൽ പിന്നെ ചേതന് എന്താണ് ഒരു വില...? ഒരു ചിരിയോടെ അവൻ സിതാരയോട് എന്ന പോലെ പറഞ്ഞു... ⭐⭐⭐⭐⭐⭐⭐⭐⭐⭐⭐⭐⭐⭐⭐ " ഇതെന്തൊരു പവർ കട്ട് ആണ്.. ഇതിന് ഇപ്പോൾ നേരവും കാലവും ഒന്നും ഇല്ലാതെ ആയോ...? ലക്ഷ്മി ഓരോന്ന് പിറുപിറുത്തു അടുപ്പിൽ തീ കൂട്ടുന്ന തിരക്കിൽ ആയിരുന്നു... തറവാട് വരെ പോയത് ആണ് ഇന്ന് രാവിലെ... തിരിച്ചു എത്തുമ്പോൾ രാത്രി ആയി... കേശവൻ രാത്രി ചൂടുവെള്ളത്തിൽ ഒന്ന് കുളിച്ചതിന് ശേഷമേ കിടക്കാറൊള്ളൂ... അതൊരു ശീലം ആണ്... അച്ഛന് തോന്നുമ്പോൾ ചൂട് വെള്ളം ഉപയോഗിക്കാലോ എന്നും പറഞ്ഞു താരക്ക് ആദ്യത്തെ ശമ്പളം കിട്ടിയപ്പോൾ ഹീറ്റർ ഒരെണ്ണo അകത്തെ ബാത്‌റൂമിൽ പിടിപ്പിച്ചത് ആണ് അവൾ... പക്ഷെ ഇന്ന് ഇപ്പോൾ കറന്റ് ഇല്ലാത്തത് കൊണ്ട് ഇതല്ലാതെ വേറെ വഴി ഇല്ലാ... " സാന്ദ്യേച്ചിടെ വീട്ടിൽ എല്ലാം കറന്റ് ഉണ്ടല്ലോ അമ്മേ... സ്മിത പടിഞ്ഞാറെ മുറ്റത്തുള്ള ജനൽ തുറന്നു അപ്പുറത്തെ ഓടിട്ട വീട്ടിലേക്ക് ഒന്ന് എത്തി വലിഞ്ഞു നോക്കി കൊണ്ട് പറഞ്ഞു.. ലക്ഷ്മി കണ്ണിലേക്കു തറഞ്ഞു കയറുന്ന പുക ചുരുളുകൾ കൈ കൊണ്ട് ആട്ടി അകറ്റി സ്മിതയുടെ അടുത്തേക്ക് നടന്നു... " ശരിയാണല്ലോ... അവിടെ വെളിച്ചം കാണാനുണ്ടല്ലോ... " " താരേ.... " ലക്ഷ്മി മുഖം തിരിച്ചു സിതാരയെ ഒന്ന് നീട്ടി വിളിച്ചു.. വസ്ത്രം എല്ലാം മാറി വീട്ടിൽ ഇടുന്ന ഒരു കോട്ടൺ ചുരിദാർ മാറി ഇട്ടു താര പുറത്തേക്ക് ഇറങ്ങി... സ്മിത അപ്പോഴും പുറത്തു പോവുമ്പോൾ ഇട്ട വേഷത്തിൽ ആണ്... അമ്മയുടെ കയ്യിൽ നിന്നും ഇനി രണ്ട് തല്ല് കിട്ടാതെ അവൾ അത് മാറ്റി ഇടുന്ന പ്രശ്നം ഉദിക്കുന്നില്ല... " നീ സന്ധ്യക്ക് ഒന്ന് വിളിച്ചേ... അവിടെ കറന്റ് വന്നിട്ട് ഒരുപാട് നേരമായൊ എന്ന് ചോദിക്ക്... " " മം... സന്ധ്യയുടെ വീട്ടിലേക്ക് ഒന്ന് പാളി നോക്കി  കൊണ്ട് സിതാര ഫോണും പിടിച്ചു ഉമ്മറത്തേക്ക് ഇറങ്ങി... " ഹലോ... " " ഹലോ... താരയാണ് ചേച്ചി...കറന്റ് എപ്പോൾ പോയതാ?... ഞങ്ങൾ വന്നു കയറിയപ്പോൾ മുതൽ കറന്റ്റില്ല ഇവിടെ ." " എന്റെ പൊന്നു മോളേ.. നിങ്ങൾ എപ്പോൾ എത്തി..? നിന്നെയും കേശവൻ ചേട്ടനെയും എത്ര വട്ടം ഫോൺ ചെയ്‌തെന്നൊ... " സന്ധ്യയുടെ വാക്കുകളിൽ വല്ലാത്ത ആകുലത " അമ്മയുടെ തറവാട്ടിൽ ഒട്ടും റേൻജ് ഇല്ലാ ചേച്ചി...അല്പം റെയ്‌ഞ്ച് കിട്ടണേൽ വല്ല തെങ്ങിലും കയറണം.. ചേച്ചി എന്തിനാ വിളിച്ചേ...? " " എന്റെ പൊന്നു താരേ..നിങ്ങൾക്ക് ഇന്ന് മുതൽ  വെള്ളവും വെളിച്ചവും ഒന്നുമില്ല...!! " " ചേച്ചി എന്തൊക്കെയാ ഈ പറയുന്നത്..? " സിതാര നെറ്റി ചുളിച്ചു... " സത്യമാ മോളേ... നിങ്ങള് പോയി കുറച്ച് കഴിഞ്ഞപ്പോൾ ഇവിടെ  ഒരു ചെറുക്കനും കുറച്ച് പേരും കൂടെ വന്നിരുന്നു... ഞാൻ തൊടിയിൽ ആയിരുന്നു അന്നേരം.. കോവിലകത്തെ കാറ് കണ്ടു കൂട്ടത്തിൽ ഒരാളോട് ചോദിച്ചപ്പോഴാ അറിയുന്നത് മോളേ പെണ്ണ് അന്വേഷിച്ചു വന്ന കൊച്ചു തമ്പുരാൻ ആണ് അത് എന്ന്...! " സിതാരയുടെ നെഞ്ചിടിപ്പ് ഒന്ന് ഏറി... കേൾക്കാൻ പോവുന്നത് അത്ര ശുഭകരമല്ലാത്ത എന്തോ വാർത്ത ആണെന്ന് അവൾക്ക് സന്ധ്യയുടെ പതർച്ചയോടെ ഉള്ള സംസാരത്തിൽ നിന്ന് ഊഹിക്കാവുന്നതെ ഉണ്ടായിരുന്നുള്ളൂ... ⭐⭐⭐⭐⭐⭐⭐⭐⭐⭐⭐⭐⭐⭐⭐ " നിങ്ങൾ എവിടുന്നാ....അവരൊന്നും ഇവിടെ ഇല്ലാ മോനെ... ചേച്ചിയുടെ തറവാട്ടിൽ ഒരു വിവാഹം കൂടാൻ പോയതാ... " സന്ധ്യ ചേതനെ ഒന്ന് എത്തി വലിഞ്ഞു നോക്കി കൊണ്ട് പറഞ്ഞു... പിന്തിരിഞ്ഞു നോക്കിയവനിൽ ഒരു ചിരി ആണ്... " അത് അറിഞ്ഞിട്ട് തന്നെ വന്നതാണ് ചേച്ചി... " ചേതൻ ഭംഗിയായി ഒന്ന് ചിരിച്ചു " മോനെ ഇതിന് മുന്നേ ഇവിടെ കണ്ടിട്ട് ഇല്ലല്ലോ... " സന്ധ്യ സംശയ ഭാവത്തിൽ ചോദിച്ചു... അപ്പോഴേക്കും ഒന്നും മിണ്ടാതെ ചേതൻ അടുക്കള വശത്തേക്ക് നടന്നു നീങ്ങിയിരുന്നു... സന്ധ്യയുടെ കണ്ണുകൾ കുറുകി ..പെട്ടെന്ന് ആണ് സന്ധ്യയുടെ കണ്ണുകൾ കോവിലകത്തെ വണ്ടിയിലേക്ക് നീളുന്നത്... " ചേച്ചി... കോവിലകത്തെ കൊച്ച് തമ്പുരാൻ ആണ് ആ പോയത്...ചേച്ചി വീട്ടിലേക്ക് പൊയ്ക്കോ...." എവിടെ നിന്നോ ഓടി പാഞ്ഞു എത്തിയ മനു സന്ധ്യയോട് ശബ്ദം അടക്കി കൊണ്ട് പറഞ്ഞു... സന്ധ്യയുടെ ഭർത്താവ്ന്റെ ഒരു അകന്ന ബന്ധത്തിൽ ഉള്ള ചെറുക്കൻ ആണ് ഈ മനു... കാലാകാലങ്ങൾ ആയി അവിടെത്തെ കാര്യസ്ഥ പണി മനുവിന്റെ വീട്ടുകാർക്ക് ആണ്... സന്ധ്യക്ക് എന്തോ രംഗം പന്തി അല്ലെന്ന് തോന്നി... " തമ്പുരാൻ എന്താ ഇവിടെ.. അതും അവരൊന്നും ഇല്ലെന്ന് അറിഞ്ഞിട്ടും ചോദിക്കുമ്പോൾ സന്ധ്യയുടെ കണ്ണുകൾ ചേതൻ പോയ വഴിയേ ആയിരുന്നു... " ചേച്ചി വീട് അടച്ചു ഉള്ളിൽ ഇരുന്നോ... ഈ കുടുംബത്തിൽ ഉള്ളവരോട് വല്ല്യ അടുപ്പത്തിനൊന്നും നിൽക്കണ്ട...കൊച്ച് തമ്പുരാൻ രണ്ടും കല്പിച്ചാ... ഇവിടെത്തെ പെൺകുട്ടിയെ കെട്ടാൻ മൂപ്പർ ഏത് അറ്റം വരെയും പോവും... ഇഷ്ടം കൊണ്ട് ഒന്നുമല്ല... കൊച്ച് തമ്പുരാന് അതിനോട് നല്ല വൈരാഗ്യം ഉണ്ട്...പിന്നെ വല്ല്യ തമ്പുരാൻ ആ പെൺകുട്ടിയെ മാത്രേ ആ കുടുംബത്തിലെ മരുമകൾ ആക്കുകയൊള്ളു എന്ന വാശിയിലും ആണ്... "  സന്ധ്യയോട് ഉള്ള ഒരു അടുപ്പo കൊണ്ട് ആണ് മനു അത്രയെങ്കിലും അവരോട് പറഞ്ഞത്... മനു ചേതന്റെ അടുത്തേക്ക് പോയി കഴിഞ്ഞിട്ടും സന്ധ്യക്ക് ഒരു സ്വസ്ഥത കിട്ടിയില്ല.... അവര് ഏകദേശം വൈകുന്നേരം അടുപ്പിച്ചു ആണ് പോയത്... അതിനിടെ ഒരു ലോറിയുടെ ശബ്ദം സന്ധ്യ ശ്രദ്ധിക്കുകയും ചെയ്തു... ഏറ്റവും ഒടുവിൽ എല്ലാവരും പോയി കഴിഞ്ഞു അടുക്കള വശത്തേക്ക് ചെന്നു നോക്കിയപ്പോൾ ആണ് സന്ധ്യ ആ കാഴ്ച്ച കാണുന്നത്... തുടരും സൂര്യകാന്തി റിവ്യൂ റേറ്റിംഗ് ഒന്നുല്ലല്ലോ ഗയ്‌സ്.. കഥ ഇഷ്ടമാവുന്നില്ലേ...? ആദ്യത്തെ പത്തു പാർട്ടിൽ കഥ ഒരു ഒഴുക്കിൽ അങ്ങ് പോവുകയാണ്... അതിന് ശേഷം കഥ അടുത്ത ഘട്ടത്തിലേക്ക്.. ❤️